لا يناسبني

طلعة 😉

٢٠٢٠/٦/٥

كعدت هديل بغرفتها وظلت ترتب بغراضها لحد ما تعبت طلعت وكفت بالبالكون وظلت تباوع على الشارع سيارتها مركونة ومغطيها باوعت عليها وابتسمت

هديل : اشتاقيتلج يا روحي

انتجت على السياج وعينها على الباب
تذكرت بيوم الي اجة سيف ووكف بالباب وحجو سوة

هديل: اشتاقيتلك... يا ترى بعدك ممزوج
شونها حياتك وراية...يارب تكون نسيتني

سمعت صوت الباب يندك
دخل عادل وبيدة صينية وبيها جاي وكليجة
اندارت علية وابتسمت من شافتة
كعد كدامها وحط الصينية على الميز

عادل: تعالي ناكل

هديل: ماما وين؟؟ بعدها ضايجة

عادل: لا مضوج.. شبيج انتي هاي هلكج مشتاقتلج هيج سوت
خطية جانت كل يوم تنظف غرفتج وتظل تبجي

هديل: ادري اذيتها بهاي السفرة.. بس جنت مجبورة

عادل: كلنا ندري بهلشي لا تهتمين
حتى هية جانت تكول احسن شي سوتة انو سافرت
لان اكيد مرح يعوفج بعد الي صار

حطت استكان  الجاي بالصينية وعقدت حواجبها

هديل: شنو قصدك.. ليش صارت مشاكل ورة ما رحت؟؟

عادل: يبوم الي سافرتي وودعناج بالمطار
بس رحتي التفتت لكيتة يباوع علينا من بعيد
وقبل ما تسافرين جان كل يوم يوكف براس الشارع يباوع على البيت

هديل: وليش ما كلتولي؟؟

عادل: انتي يمكن مجنتي حاسة على نفسج
مدري متباعين بالمراية
ترة بذيج الفترة انتي جنتي مثل الميتة تشتغلين بهبل وتموتين روحج من التعب
كلنا جنا ندري انج ما جنتي تنامين الليل كلة

زفرت نفس وباوعت برة

هديل: مدري شون عدت ذيج الفترة
حمد لله خلصت

صار شوية عصبي

عادل: هو شنو الي خلص.. ترة مبين من عيونج بعدج تحبي.. احجيها طك بطك لان اني وياج واحد حافظ الثاني ومو مال مجاملات هسة

هديل: عادل.. اني رحت لهناك حتى ارتاح واجيت علموكم ما اريد اتذكر شي رغم انو مديطلع الموضوع من بالي ولا طلع اصلا.. بس اني اريد ارتاح
روحتي لدبي تعبتني لان وحدي دوم وجنت الهي روحي بالشغل واوقاات الفراغ اني بس افكر
رجعت حتى الهي روحي اكثر بلكت انسى واخلص من هالسالفة

عادل: ماشي...
بس اذا شفتي شنو رح تسوين؟؟

هديل: ولا شي.. خلي يفهم انو اني مو اله.. انتهى كلشي

عادل: اكلي يلة... مصدكت امي طلعت الكليجة صارلها سبوع ضامتها منتظرة سهام تجي

هديل: شونها سهام... حبابة ؟