لا يناسبني

رسالة ذهاب

2020/4/27

الحب اكبر الم ممكن تتعرضلة بحياتك كلهة
بعض الناس تحب بكلبها..
واني الي حبيتها... حبتني بعقلها
معركة خسرانة.. بس رح اظل اقاتل بيها
لان حبي اقوة من عتادها
ورح اثبتلها هالشي.. لان ادري بيها ما تنساني حتى لو مثلت العكس

سيف: كافي.. لا ترجف بعد اكثر
ليش حاس اكو مصيبة وره هالعلبة
ليش ما مرتاح يا كلبي شبيك؟؟
ما علمتك على الخوف.. ليش بت بغداد خلتك تخاف هيج

حط ايدة على كلبة وتقدم بخطوات بطيئة
كعد بصف الصندوك وفتح القبق بهدوء ورجفة ايدة واضحة
شاف الفستان الي جابلهيا وورقة

شال الفستان وشمة
فتح الورقة وبأيدة اللخ الثوب

" اعرف الوكت تأخر على هالاكلام..
بس لازم اكولة الك مهما كلفي

ما اكدر اكذب عليك.. اني بعدني احبه ومدا اكدر انساه ابدا
واعتقد انك متريد تكمل حياتك وية وحدة تفكر بغيرك
التفت لمستقبلك.. اتزوج وحدة مناسبة الك واسعد اهلك
ريح نفسك من هالعذاب وانساني.. اني ما افيدك
حبك الي غلطة ولازم انت تصلحهة
اتمنالك السعادة والراحة
واتمنى اني ما اشوفك بعد
لا تضطرني ابتعد اكثر
اختك هديل"

قرة كلماتها وهو كلبة ينعصر بكل حرف كاتبتة
لحد ما خلصت الرسالة وعقج الورقة بأيدة
غمض عيونة وضغط على اسنانة بقوة لزم فستانها وحطة على كلبة ونزلت دمعتة

سيف: لللليش؟

شمر الفستان بالكاع وصرخ بكل صوتة واوردته راسة ظهرت

سيف: لييييييييش؟!
شنو الي سويتة الج حتى تعاقبيني هيج
ليييييش؟
هذا جزاء حبي

كال اخر جملة بنبرة وجع
ركع بالكاع وهو منهار تماما ودموعة ما وكفت ابدا
حط ايدة على راسة وجر شعرة حيل يحاول يفهم الي ديصير ويا وهو بحالة جنون

سيف: جذابة.. اني متاكد انها جذابة
دتبعدني

كام بسرعة اخذ الورقة والفستان وحطهن بالصندوك  وطلع من الغرفة وجانو الشباب متجهين  لغرفتة بسبب صوتة العالي الي سمعو قبل شوية وهمة خايفين كلش 

وهو يمشي بسرعة لزمو من ايدة وحاولو يوكفو بس ما وكف وما كدرو علية

جعفر: شبيك.. ؟ شصاير
تعاااال

لزمة جعفر من ايدة بقوة حتى يوكف بس ما كدرلة

سيف: هد ايدي
عوووووفني دا اكلك ...

صرخ بوجهة بقوة وترجع جعفر ليورة
عاف ايدة
كمل طريقة وكأنو ماكو احد كدامة
بس جلال ركض ورا لان هو اقرب شخص الة ويعرف شنو بداخلة وشلون يداوي

نزل من الدرج وكلهم جانو جايين بآتجاهة وكلها تباوع علية وتتسأئل
حاولت والدتة توكفة بس ماكدرت لان ابتعد عنها