٢٠٢٠/٥/٦
البارت المفروض ينزل اليوم قبل الفطور بس نت كللش ضعيف اسفة جدا
مصطفى: كافي.. هذا خبال
لازم تتواجهون وتبطلين تنهزمين منة مثل الفارة المهزومة من المصيدة
هديل: مصطفى شون ما تريدني اخاف منة
روحتنا لهناك ممكن تاثر
هو كال لاهلة كلهم انو يحب وحدة ومنتظرها ويريد يزوجها
واذا احد حس اني ما رح اكدر اسوي شي
هذولة عشكهم مال مخابيل مستعد يخطفني ويزوجني غصبا عني
مصطفى: شهل عقل
شنو هالتفكير الاوفر
لا تخلين القصص والمسلسلات تأثر عليج
ترة مو كل اصابعج سوة
انتي متردي ورافضتة بعد على شنو خايفة
هديل: واذا كدام الكل اجة وطلب مني الزواج او خطبني من بابا او منك شنو رح يكون جوابك؟؟
وين اروح ساعتها وشسوي اني
مصطفى: بس خليني اسألج سؤال..
انتي مو رافضتة ومتردي؟
ليش هيج خايفة منة؟
ليش هيج متوترة وما تردي يتقدم خطوة جديدة
يمكن اذا تقدم اكثر ممكن تشوفين الجانب الحلو الي بي
هديل: ما ادري
خايفة وبس
تايهة ومدا اعرف شسوي
مصطفى: هديل.. انتي حابة هالموضوع وعاجبج يظل يفتر وراج حتى تتاكدين من حبة الج
وحتى ما تعبين روحج وتظلين بتفكير دائم انو ممكن يتخلى عنج
اندهشت من كلامة وصارت عصبية كللش
هديل :انت شدتحجي.. شبيك مصطفى تخبلت؟
اني اذا رفضتة كدام الكل شيخ زهير رح يزعل علية
ورح اضطر اخسر سرمد اذا مو هو بطل من الشركة
ممستعدة لهيج خسارات
ويمكن حتى تصير دم
حجة بأستهزاء وانتقص من تفكيرها لان تعجب من اختة الي حجت بدون وعي
مصطفى: شوكت تبطلين تفكرين هيج
عيشي بكلبج مو بعقلج
العقل يتعب ترة لا عبالج بي راحة
هديل: مو جنت اسويها قبل و انچويت..
ولا تنكر انت هم جنت تسويها قبل.. وهم انچويت
ظل صافن عليها وما كدر يرد بعد على كلامها
بلش كلشي يتغير بداخلي بعد ما اخذت عهد على نفسي انو هاي رح تكون اخر محاولة مني
وراها رح اتركها وما احاول اتقرب منها مرة لخ
كعد الصبح وبلش يحرث بالبستان ويزرع ورد
مر الاسبوع عادي ما بين شغلها بالشركة وشغلة بالبستان والحياة طبيعية وكانو ماكو شي.
بس بداخل كل واحد بيهم بركان ثأر مدا يخمد
وهمة ثنيهم بشوق ولهفة ليوم الجمعة بسبب الفضول الي كاتلهم حتى يعرفون ردة فعل بعض من يتشاوفون
حظرت غراضها الخميس بليل وبلشت ترتب
وحطت راسها على المخدة بس ما كدرت تنام ابدا
الليل كلة تفكر شنو رح تكول وشنو رح تسوي
هديل: لازم.. اي لازم اخلص هالشي
هو جبير بالعمر واني هم جبيرة
لازم ابعدة حتى يشوف حياتة ويكملها بعيد عني
بس ياريت اكدر ابعدة بهدوء وبدون مشاكل
ادري بي مخبل ويسوي اي شي بس حتى يفوز بية
عبالك سباق ويريد ينتصر بي ضد القدر
اما سيف فجان كاعد كدام التلفون
متردد ما بين يخابرها اولا
سيف: هسة اذا خابرتها بشنو رح استفاد!
اصلا ما عندي حجي اكولة الها
نام سيف نام...
حتى لو خابرتها مرح ترد عليك
هية اول وتالي مرايدتك
كاعد كدام التلفون جان يدك فجاءة
هو فز من دك التلفون وكلبة كام يرجف عباله هية لان عقلة وتفكيرة كلة وياها
جان مكتوب (محمد دوام)
طلع صاحبة الي جان ويا بالجيش
فتح خط ورة ما شاف الاسم وارتاح شوية
محمد: هاا لك.. حقير صارلك يومين ممخابرني
ولا تسأل حتى برسالة
سيف: انجب لك.. والله خرعتني خرعة مصايرة مثلها بحياتي
محمد: ليش لك؟
سيف: ردت اتصل بيها
صارلي ساعة كاعد كدام التلفون دا افكر شون اخابرهة واذا خابرت شكللها
وانت دكيت
محمد: هيج الحب مأثر عليك
بعدين انت على شنو مستعجل
هية مو باجر رح تجي
اصبر شوية لو ما بيك
سيف: اصبر اصبر شعدي قابل
محمد: دنزل يلة اني برة وصلت وهياتهم الولد كاعدين
رح انتظرك يمهم
سيف: ماشي جااي
لبس دشادشتة ونزل كعد وياهم
ظلو يسولفون ويشاقون الولد كلهم
محمد راح لبيتة ورة ساعتين والولد واحد واحد بلشو يصعدون
بقة جلال وسرمد وجعفر وسيف
جلال: هسة الدور لسيف.. لازم نخلص سالفة سرمد ونندار عليك ونزوجك كافي عزوبية
سيف: مأثر عليك بشيء
جلال: اي مأثر... بني ادم ميعرف شوكت يموت
واني اريد اشوف جهالك قبل لا اموت
سيف: وجهالي بشنو رح يفيدوك لو يفرحوك
دير بالك على روحك
سرمد: اهووو رح تظلون تحجون وتتعاركون
رح اروح انام باجر وراية سود وسريد
ضحكو وراها سرمد وجعفر دخلو للبيت
ظل سيف وجلال يسولفون
جلال: باجر تجي..
شرح تسوي؟
سيف: ما ادري
عايفهة على الله
جلال: حاول انك تحجي بهدوء
واسمعها للاخير قبل لا تحكم عليها
تصرفك الاخير جان غلط فلازم تحاول تصلح الموقف وياها
حس سيف بهزة على الميز شاف الشاشة طلع مكتوب (المهندسة هديل)
عرف انو هذا تلفون سرمد
سيف: هاي هية..
كام جلال وحط ايدة على جتفة وعافة وراح
ظل سيف صافن على التلفون ميدري شيسوي
وراها فتح خط وظل ساكت
ظلت ساكتة وما حجت شي مثل الي عرفت انو هذا سيف
وهو هم ما حجة
مرت خمس دقايق على هالحالة
سيف: ما رح تحجين شيء؟
ما تردين تسمعيني صوتج
لو حتى بهاي تردين تأذيني
هديل: شلونك؟
سيف: انت تدرين شلوني..
تعرفين شبية..
وتعرفين دواية
ظلت ساكتة وهو ضاج
سيف: شبيج
هديل: اول مرة احس اني انسانة ظالمة
سيف: المن ظلمتي يبت بغداد؟
اني.؟ . لو نفسج..؟ لو هو؟
هديل: باجر اكدر اشوفك
سيف :منتظر باجر حتى بس اشوفج والمح عيونج وما اريد يخلص هاليوم
اول مرة احس انج دتحاولين تقتربين مني
لو بس اعرف ليش هيج دسوين
شنو الي يخليج ترفضين حبي الج بكل هاي السهولة وانتي ما شفتي مني شي
انتي قاسية
هديل: باجر تعرف كلشي
سيف: وليش مو هسة
ليش ما تردين تريحيني
ظلت ساكتة متعرف شترد غمضت عيونها من الوجع الي بداخلها وضغطت على اسنانها
سيف: ليش ما سديتي التلفون من سمعتي صوتي؟
جاوبت بس بتردد وخوف
هديل: اكذب عليك اذا كتلك ما اريد اسمع صوتك
سيف: صوتي..؟؟
منتظرج باجر... ورح اظل انتظرج طول عمري
لاخر نفس بية رح اظل اصيح بأسمج
رح تبقين جمرة بداخلي ما تطفة
واذا طفت.. اموت
شمرت التلفون واديها على حلكها حتى ما يسمع صوت بجيها
بس هو جان دا يسمع وبوضوح
ظلت على هالحطة الليل كلة لحد الصبح
صارت ساعة ب5 الصبح
غيرو ملابسهم ونزلو كلهم تريكو وكملو كلشي وصعد عادل وية هديل ومصطفى وامة وابو ويا بسيارتة
عادل: شبيج.. شكلج ما نايمة؟
هديل: اي البارحة جان عندي شغل كملتة وما نمت
عادل: متاكدة؟
هديل: شنو دا اجذب عليك اني؟
ضاجت من كلامة بس هو ما سكت سوة روحة مو مبالي
عادل: اي دچذبين
هديل: خلف الله عليك
رد بأستهزاء وعصبية وعوج بحلكة
عادل: شنو هو ( خلف الله عليك)؟
انتي باجية
ماكو احد يعرفج مثلي
هديل: اسكت عادل
ما رد عليها وظل ساكت بس ضاج منها ومن كلامها
ورة ساعة تقريبا اتصلت بمصطفى
هديل: خلي ننزل بالبانزين خانة
ما عندي بانزين وخلي نشتري شي ناكلة
سدت التلفون وصلو للبانزين خانة ونزلو
عادل: روحي غسلي واشتري اكل واني افول بانزين
هديل: اوك
دخلت للحمام وكفت كدام المراية وغسلت وجهها
هديل: شبيج.. ؟
انتي الي ما جان يهزج حتى الموت
ليش هيج ديصير بيج
عيشي.. كافيج خوف من المستقبل
الي يريد يروح خلي يروح.. والي يريد يبقة خلي يبقة
اخذي دورج وريحي نفسج
فرحة وكملي حياتج بالي عاجبج
ليش مهتمة للكل؟
انفتحت الباب ودخلت وحدة
غسلت وجهها ونشفت ورجعت للسيارة
صعدت بصف السايق
عادل: متسوقين؟؟
هديل: اريد انام شوية
انت امشي ورة مصطفى وعينك علىGBS
عادل : اوك
رجعت الكرسي شوية
وحطت السماعات بأذانها وغمضت عينها من دون ما تشيل النظارة
وكملو طريقهم
لحد ما هزها عادل
عادل: رح نوصل.. كعدي
هديل: منايمة اصلا
2020/5/7
1144