تمشيت فأرض الله وانا كنتأمل .. واش كلهم هازين هم بحالي.. الوجوه تختلف .. منها اللي باين فيه البؤس ومنها اللي فرحان.. ولكن حتى واحد معارف شنو مخبية الضحكة.. مرا وراجل كل واحد غادي بوحده ومكيشوف فلاخور..ووحدبن اخرين شادين فيد بعضياتهم.. وفرحانين.. وصلت للمحطة معرفتش شحال ضربت دالطريق .. بقيت كنسول كل دقيقة واحد ونقوليه فين طريق المحطة.. وشوية يدوزو عليا شباب يبداو يهضرو .. مبقيت كيهمني حد.. والخوف تسالا.. وصلت ومشيت نجلس.. المكان الوحيد اللي عامر بالناس.. واللي نقدر نجلس فيه بلا ما نقدر ننعس.. مع انه بزاف اللي باينين ليا ناعسين .. العيا كان متمكن مني بزاف.. بقيت كنفكر شنو يكون واقع دابا.. وايهاب اش غايكون داير...داني النعاس وانا كنقكر.. شوية فقت على واحد كيجبد مني صاكي.. شفت فيه وبديت نغوت وكنجر صاكي .. فجاأة جبد الموس وعطاني بيه لدراعي .. طلقت بعدو الصاك وبدا كيسيل مني الدم.. طار ومبقيت شفتو .. وحتى واحد مداها فيا يعتقني.. بدات الضربة كتحرقني.. شوية بداو الناس يتجمعو عليا وانا بديت نحس قوتي كتنقص مني.. بعد شوية جات الاسعاف وهزاتني..مشاو الفلوس ومشاو الحوايج وكلشي.. وحتى لاكارت ناسيونال ديالي مشات.. داوني للسبيطار خيطولي دراعي.. وداوني للناموسية ننعس.. بقيت غير كنشوف .. وليت وحيدة مع انه حياتي كلها وانا بوحدي.. كل الناس جاو عندهم عائلاتهم جابو ليهم الماكلة الا انا.. شوية جات عندي واحد البنت .. كانت جاية لعائلتها.. البنت: تاكلي اختي.. اكرام: شكرا.. البنت: واش مجا معاك حد.. اكرام: لا راني بوحدي.. البنت: وعلاش مجاوش معاك عائلتك.. اكرام: حيت معندي حد.. مقطوعة من شجرة.. البنت: اه .. واخا انا كنجي كل وقت لعند خالتي كنجيب ليها الماكلة.. غانجيب ليك حقك حتى نتي.. اكرام: الله يجازيك بخير.. عطاتني كليت وعاوناتني.. مهما كان الشر بزاف فالدنيا.. رغم ذلك مازالين كاينين الناس اللي فيهم الخير.. فعلا كل وقت كانت كتجيبلي الماكلة.. وبزاف دالناس بعدها اللي جا يزور عائلتو كيطل عليا يشوفني ويطمئن عليا وكل واحد كيقولي واش خاصاك شي حاجة نجيبهالك.. وتصادفت مع نهار الجمعة تما.. شفت بزاف دالناس جاين وجايبين ماكلة وحوايج كيفرقوهم على المرضى اللي معندهم حد.. ناس كيجيو من بعيد بزاف وكيضربو تمارا باش يديرو الخير فواحد مكيعرفوهش.. وباغين غا دعوة الخير.. كاين اللي عطاني الفلوس بعدما عرف اني اتسرقت.. جاو البوليس خداو اقوالي النهار الاول.. طول المدة اللي انا جالسة فيها تما.. وانا كنفكر اش غاندير ملي نخرج من هنا اش غاندير وفين غانمشي.. اما النهار الاخير واللي كتبلي فيه الطبيب الخروج.. تفاجأت بانسان جا عندي للسبيطاار.. كان ابن المرا اللي ديرها للسبيطار.. يا ترى علاش جاي.. الراجل: سولت عليك قالولي تضربتي ومشيتي للسبيطار.. على سلامتك.. اكرام: الله يسلمك.، يا ترى علاش كتسول فيا الراجل : انا اسف على داك النهار.. مقصدتش .. على العموم امي باغا تشوفك وتشكرك بنفسها.. وانا منقدرش نكسر ليها كلمة.. اكرام: خرجات من السبيطار؟ الراجل: اه راها فالدار.. وكتستناك تشربي معاها شي كاس داتاي العشية.. اكرام: واخا.. عاوني وخرجت من السبيطار.. كان موجد الطوموبيل .. ركبت فيها ومشينا.. مكانش كثير الكلام ابدا..وعينيه فيهم حدا غريبة.. وصلنا للدار ... وخرجت وانا شادة دراعي.. ومازال حوايجي فيهم الدم.. كلهم سرقهم الشفار.. الله يقطع يديه..نتضامن مع عاهرة ومنتضامنش مع شفار فحياتي.. حيت بالسرقة ديالهم كيدمرو بنادم... دخلت للدار .. واستقبلاتني المرا.. سبحان الله كاين شي ناس غا تشوف فوجهم ينشرح قلبك من عند الله.. المرا: بنتي اش وقعلك.. اكرام: تكريسيت.. المرا: الله يقطعلو يدو هادا اللي دار فيك هادشي.. اجي جلسي .. اكرام: ربي يحفظك.. المرا: قوليليا اكرام.. فين عائلتك.. اكرام: انا معندي حد.. امي تزوجات وجرات عليا من الدار.. وبا الله يرحمو.. المرا: وفين جالسة دابا نتي.. اكرام: فالزنقة.. 😞 عاد جيت البارح.. وتسرقو فلوسي وحوايجي.. المرا: من ليوم غانعتبرك بحال فارس.. اكرام: شكون فارس.. المرا: ولدي .. وبقاي تعيطيلي مي هنية.. اكرام: واخا امي.. ليا الشرف تكوني امي .. هنية.. حتى انا ابنتي.. مكرهتش تكوني بنتي.. اللي تحرمت منها.. 😞 اكرام: واش عندك بنت؟ هنية: كانت عندي.. قبل ما تقرر تكون مع راجلها وتمشي.. اكرام: كيفاش.. هنية: مشيت نطل عليها .. ولكن راجلها محملش وجودي .. وخيرها اما تمشي معاه اما تبقا معايا.. سمعتها كتقول ليه غانمشي معاك.. وجمعت حوايجي وخرجت جيت للمحطة وركبت لهنا.. ووقع للي وقع.. اكرام: فين كانت بنتك غاتمشي .. هنية: مشات مع راجلها لايطاليا.. اكرام: سمحيلي على هاد الهضرة.. ولكن بنتك حمارة.. انا لوكانت امي بغاتني .. غانسمح فالدنيا على قبلها.. هنية: الله يهنيها مع راجلها.. الى كانت مرتاحة معاه.. انا غانكون فرحانة ليها.
دار المتعة
SiinYam tarafından
قراءة ممتعة 💜💜 Daha Fazla