وصلنا للعرس اللي كان فقاعة .. نزل فارس بأناقتو وحل الباب لامه.. نزلات .. انا نزلت قبلها لراسي.. وبقيت كنستناه وهو شاد فيها وكينزلها.. سد الباب ديال الطوموبيل.. وعطا دراعو لامه.. شدات فيه.. شافت فيه ديك الساعة شاف فيا وعطاني دراعو الاخرى.، انا تزنكت وحماريت من جديد.. شفت فمي هنية ضحكات عندي وحركات راسها بمعنى شدي فيه.. شديت فدراعو وانا قريب نسخف.. تمشينا بثلاثة بينا.. وانا حاسة راسي طايرة فالسما.. انا اللي مكان حتى واحد دايرلي اعتبار ... ولا حاسبني فالدنيا كاع.. وليت شادة فيد خيرة الناس وداخل بيا لعائلتو.. لا هادشي بزاف عليا.. دخلنا واكثر من عين كانت علينا.. وعليا انا بالذات.. يمكن حيت مكيعرفونيش وبزاف مستغرب علاش انا مع فارس وامه.. استقبلاتنا مولات العرس وكنسمعها كتسول مي هنية عليا.. قالتليها بنتي.. لوخرا جاوباتها ب الله يفرحك بولدك فارس يا ربي.. مشينا جلسنا فراحد الطاولة.. حسيتو عرس فخم وفين غانبان انا معاهم.. بقيت جالسة وشادة يديا عندي.. وبزاف دالبنات كانو كيشطحو قدامي.. فارس: ياكما قنطي.. اكرام: لا ابدا.. العرس زوين بزاف.. فارس: نوضي نشطحو انا وياك.. اكرام: 😳انا؟ فارس: اه .. نوضي.. ناض وصاوب الكوستوم ديالو ومدلي يدو باش نوض.. قلبي مقدرش يتحمل.. كما المصائب لا تأتي فرادى .. بحال الافراح لا تأتي فرادى.. وانا قلبي تخلع من الفرحة.، مشاعري ميمكنش نوصفها .. نضت وبقيت كنتهر قدامو زعما را كنشطح وهو قدامي راقي حتى فشطيح ديالو.. شاد فيديا بجوج وكيشطحني.. وانا غانسخف بقوة الحشمة.. فالعادة معنديش مع الشطيح ولكن من هاد النهار وليت كنحماق عليك.. شوية وجلسنا.. هنية: تبارك الله عليكم.. اكرام: الله يبارك فيك ☺️ هنية: الله يحفظكم من العين.. فارس: امين.. شوية جا واحد سلم على مي هنية.. وشاف فيا.. الشاب: خالتي هنية..شكون هاد البنت.. هنية: بنتي.. الشاب: بالصح؟؟ هي نجي نخطب.. حشمت انا شفت ففارس.. بدل الضحكة.. 😒 هنية: نفوت ولدي فارس ونعطيهالك.. راه مايمكنش.. خبز الدار ياكلوه مالين الدار.. كوووول.. وهدف في منتصف الجبهة.. بزاف هادشي بزاف.. واش وليت ماريا شارابوفا .. كيدابزو عليا الرجالة.. شفت ففارس دار واحد الضحكة خطييرة.. الشاب: مبارك ومسعود اخويا فارس.. تستاهل .. ديتي الزين والتباتة.. فارس : الله يبارك فيك.، واش كنحلم.. واش قاليه الله يبارك فيك.. يعني.. اش كيعني هادا.. عندك نكون كنحلم.. واقيلة كنحلم باينة ..مي هنية تلهات مع شي عيالات.. العرس كله.. وانا كنسرق نظرات باش نشوف فيه وهو كذلك.. حطو العشا.. وبدينا الماكلة.. كنت كناكل بواحد التباتة كبيرة.. خفت يشوف فيا شوفة خايبة .. بغيت نبقى نبانليه زوينة وصاف..كملنا العشا.. وبدات العروسة كتضور بالباسي.. تمنيت راسي بلاصتها.. بقيت غا كنشوف فيا.. الدنيا فشكل.. قبل مكنت باغا لا عرس لا والو كنت باغا غير نخرج من دارنا .. اما دابا تطورو احلامي.. وليت باغا نركب فالعمارية حتى انا.. فارس: اوهوو فين مشا عقلك.. اكرام: مع العروسة 😊 فارس: بغيتي تكوني بلاصتها؟؟ تزنكت مللي قالها وارتبكت معرفت منقول وهو يجي عندو واحد سلم عليه.. تمنيت نشنق عليه فهاديك اللحظة.. علاش مخليتيهش يكمل هضرتو.. كان غايقولي شي حاجة. كان غايطلب مني الزواج مثلا.. ااه يا قلبي.. فيقي اكرام.. واش صافي جلسوك حداهم تيقتي.. متنسايش منين جابوك.. سالا مع السيد وتقلب عندي وبقا كيشوف ..، ولكن سكت... حتى انا سكتت وتقلبت شفت فالعروسة عاود.. فارس: شفتي البوفي.. اكرام: اشناهوا؟؟ فارس: ديك الطبلة الطويلة اللي عامرة بالحلويات.. اكرام: اااه زوينة .. فارس: يمكنليك تهزي منها اللي بغيتي .. سيري . اكرام: بالصح،؟؟ فارس: طبعا .. وجيبيلي معاك حتى انا 😉 نضت وانا فرحانة .. كنشوف الاشكال والالوان ..بقيت كنختار .. خديت واحد المادلين عامرة بالكريمة مكتوب فيها .. كاا كاب.. كاب كيك.. كاب كيك،. هي هادي.. وشي حلوات .. و.. مجهول: نعاونك،، اكرام: شكرا.. ممحتاجاش.. مجهول: نتي الوحيدة اللي بعقلها فالبنات هنا.. غايحصلي الشرف الى تعرفت عليك.. اكرام: سمحلي .. منقدرش.. مجهول: حيدي عليك الحشمة.. هاكي ها النمرة ديالي .. غانستنا اتصالك.. حطلي ورقة فيدي ومشا .. انا ارتبكت.. ولكن ضربي بدا يضرب مللي بانلي فارس قدامي جاي لعندي وحاط يديه بجوج فجياب السروال.. ومغوبش.. ناري قفرتها.. وصل عندي ومازال مهضر..وانا نطلع الورقة وعطيتهالو.. اكرام: مم مكنعرفوش.. حطلي الورقة ومشا .. ا انا قلتلو لا .. شد مني ديك الورقة وشاف تما واحد الشمعة شاعلة دا ليها الورقة وحرقها وطفاها.. كان قلبي غايوقف .. فارس: ختاريتي شي حاجة؟ مقدرتش نهضر تصدمت.. واش صافي مغايدابزش معايا.. ؟؟ بدا كياخد فجوج طباسل صغار عمرهم بالحلو.. فارس: شدي طبسلك.. يالله نجلسو. فارس: شدي طبسلك.. يالله نجلسو.. شديت منو وانا مصدومة وتمشيت موراه حتى وصلنا لبلاصتنا.. وجلسنا.. دابا كيغاندير ناكل.. اش هادشي وقع دابا وشنو معناه.. زعما يكون غار.. لا اكرام ربما شافو ضاسر عليك وجا يعتقك.. فارس: كولي 😒 اكرام: واخا شدات فيا الرعدة كليت شوية ووحلاتلي .. مقدرتش نصرط.. فارس: هاد العرس مالو ما بغا يسالي.. اكرام: واش مليتي .. خلينا نمشيو الى مليتي.. فارس: ونتي.. باغا تبقاي ولا مليتي حتى نتي؟ اكرام: فين ما تكونو نتوما انا غانكون فالدار ولا هنا.. المهم هو نتوما.. دار واحد الابتسامة عريضة ومفاجئة.. فارس: انا بغيت نمشي 😀 اكرام: صافي واخا قول لمي هنية تنوض.. نوضنا مي هنية وخرجنا وانا تابعة فارس بعيني مشا للطوموبيل .. وحل لامه الباب وحل الباب اللوراني ليا.. هادشي بزاف عليا.. حياتي كلها دوزتها بالعنف والغصب.. عمري دوزت هاد اللطافة فحياتي..
