خرجت مع ختي ومشينا لرييطورون قريب .. جلسنا بحال الناس وخدينا ل menu وختارينا اللي حبينا براحة تامة..شيماء متيقاتش.. اول مرة نخسرو الفلوس هاكا.. كنا ديما نجمعوهم.. عندي ثمن لحمي.. غايكفيني وزيادة.. كلينا حتى شبعنا وخلصت ومشينا.. ضرنا على الحوانت.. شريت حوايج جداد وصباط وشريت حتى لختي.. فرحات بزاف بهادشي.. شرينا اللي حتاجيناه وشرينا صباط لداك السكايري اللي غايكون كيستنانا باش ينكد علينا ورجعنا للدار وفعلا.. لقيناه كيستنى.. قبل ميهضر جبدت الصباط من داك النوع اللي كيعجبو.. شافهم وسكت خداهم ومشا بلا شكر.. الفلوس شحال كتبدل النفوس.. اكبر مشاكلي فالحياة كان سبابها الفلوس.. معرفتش واش نبغيها ولا نكرهها.. بقينا كنشوفو الحوايج انا وختي .. واللي لاحظت انها فرحت بزاف.. باش نفعوني المبادئ.. انا فدارنا كنت كناكل العصا وفابور.. دابا على الاقل كناكل العصا بالفلوس.. اول مرة كنحس بقلبي متزيرش وانا كنصرف الفلوس.. ماشي مشكل.. اللي جاي احلى.. داز داك النهار وانا مهدنة نوعا ما .. ماشي بحال قبل .. الغد ليه مشيت الخدمة.. شاف فيا مسيو احمد مقالي والو.. العجب.. مايكون غا السي ايهاب.. وصاه.. 😏.. بقيت خدامة وكالعادة مهضرت مع حد.. التيقار زوين..داز سيمانة وايهاب مبانش قدامي.. معندي ما ندير .. واحد النهار كنت خدامة حتى سمعت التلفون كيصوني.. نمرة بريفي.. مقدرتش نجاوب.. ميكت.. اكيد مايكون غا داك ايهاب.. جاتو الحالة يجلدني عاود.. الله يلكيها ليه.. دعيتو لله.. جيت نخرج .. وانا غادية فالطريق وحانية الراس .. سمعت التلفون كيصوني عاود ونفس النمرة..جاوبت هاد المرة -الو!! - اكرام.. لاباس؟ - شكون معايا.. - دغيا نسيتي صوتي.. انا جلال . - 😳 الوقت توقف فهاد اللحظة ومبقاش كيتحرك.. اش غانقول.. اش جا يقول.. جا يطمئن واش كسرني ولا باقي.. واش نجح فتدميري ولا لا.. جا يشوف واش البنت اللي تعلقات بيه .. خلصات راسها من ديك المصيبة اللي وحلها فيها ولا لا.. علاش كيسول .. كلها اسئلة جات فبالي قبل منستجمع قوتي ونهضر اكرام: شنو بغيتي جلال: اكرام انا توحشتك بزاف.. ومكننعسش الليل بالتفكير فيك.. انا.. اناكنبغيك .. كان يصحابلي باللي غانقدر نبعد عليك.. ولكن مقدرتش.. كنفكر فيك ديما.. اكرام: شنو المطلوب مني دابا 😤 جلال: تستنايني .. غانجمع شوية الفلوس ونجي المغرب نتزوجو.. انا مبغيتش نبقا هنا.. بلاصتي حداك.. بغيت نعيش معاك الى الابد.. اكرام: انا باغا منك حاجة وحدة.. جلال: آمري .. اكرام: تنسا باللي عرفتي شي نهار وحدة سميتها اكرام.. وتقيلني عليك.. باراكة غير داكشي اللي وقعلي بسبابك.. ومتعاودش تصوني فهاد النمرة جلال: اكرام انا غانعوضك وند.. طيت طيت طيت سديت تلفوني.. ومشيت.. وانا كنفكر فكلما داز عليا.. ماشي ساهلة .. الانسان الوحيد اللي بغيتيه فحياتك.. هو او من يدوس عليك برجليه ويسببليك خيبة ما بعدها خيبة.. احترت الغضب والكره.. وانا أراك تلعب على اعصابي .. انا التي احببتك قبل نفسي.. فضفتك بين اجمل امنياتي.. فما جنيت من حبي لك.. غير توهاني وضياع عمري.. فجئتك امشي على جروحي.. على جروحي والام روحي.. جئتك أقدم كل قرابيني .. كل حبي واحلامي.. فدست على مشاعري.. ودست على براءتي وكبريائي.. ترى؟ هل هذا هو جزائي؟ ..جزاء صبري ومعاناتي!! .. فذرفت دمعتا على خيبتي.. وغادرت مصحوبة بندمي .
