وليت عارفة راسي معجبة بفارس.. شخصيته الانطوائية الممزوجة بجدية غير طبيعية.. كتخليني نتجذب ليها .. وليت كنتبعو بعينيا فينما مشا .. حتى انه مللي كيخرج كنتبعو بعيني .. وكنطل عليه من السرجم حتى يركب فطوموبيلتو ويمشي.. وكنوض بكري قبل منو كنوجد الفطور.. وكنوجد العشا بالليل .. كنحفظ التوقيت اللي كيدخل فيه وكيخرج..جلسنا العشا واحد النهار.. هنية: قوليلي ابنتي.. حتى فين وصلتي فقرايتك اكرام: التاسعة.. فارس: نجحتي فيها اكرام: ☺️اه انا كنت قراية.. فارس: الى بغيتي نقدر نسجلك فباك حر .. الى نجحتي غادي نسجلك فالجامعة.. اكرام: واش يمكن 😃 فارس: فالقانون الى نجحتي فالتاسعة تكوني خديتي بيها شهادة الاعدادية.. تقدي تدفعي لباك حر.. وبعدها تقدري تسجلي فالجامعة.. اكرام: فرحتيني بزاف.. فارس : شهر 11 غايبدا التسجيل.. وجديلي لاكارط ناسيونال ديالك.. نجيبلك بيها الوثائق كلشي.. بلا متتعدبي نتي.. اكرام: لاكارط ناسيونال 😳 فارس: معندكش؟ اكرام: تسرقاتلي 😔 فارس: خاصك تديكلاري بيها .. اكرام: واخا.. فارس: شي نهار سيري نتي وماما .. غانتاصل ليكم بصاحبي فالكوميسارية.. غايعاونك.. اكرام: واخا.. جمعت الطابلة.. بقيت كنشوف فيه بطرف العين.. تصدمت مللي لقيتو محيدش عينيه عليا.. كان غايوقفلي القلب .. وووجهي ولا حمر.. متنفست حتى وقف واستأذن باش ينعس.. ناضت مي هنية تنعس حتى هيا .. وانا قلبي بقا كيضرب.. حتى مشيت لبيتي .. ووقفت مور الباب وانا شادة على قلبي.. نظرات نظرات.. اتراه يفكر فيّٓ؟.. أتراني بباله..؟أحقا نظراته تعبر عما بداخله؟ اذا كان كذلك فأنبأك أن تطمئن.. فالرسالة قد وصلت.. او اني متوهمة حالمة.. انسج احلامي على مقاسه.. نظرات اخرى.. الاهي احفظني من نار هذه النظرات.. الملتهبة الحارقة كالشرارة.. وقودها اللهفة والسكوت.. نظرات .. نظرات.. نظرات كالسهام يبعثها بقوة.. فتخترق جدار الصدر وتنغرس في قلبي.. فلماذا..؟ وماذا ؟ والى ماذا يرمي..؟ كيفما كان الحال فأنا تعبت.. وطال بي الصمت.. وطالت معاناتي.. فلك ان تتقدم خطوة .. او تتراجع خطوات.. تأكد من ان ذلك سيكون خيرا لي .. ولك. بقيت متبعاه فكل خطوة.. فالغالب هو ساكت وكيقرا كتاب.. او جريدة.. او كيهضر مع امه.. نهار الويكاند ديالو فاق الصبح بكري كالعادة.. ولقاني كنوجد الفطور.. فارس: حتى فالويكاند كتنوضي بكري.. كتمحني بزاف.. كلشي نتي اللي كديريه.. الميناج والتصبين والطياب.. الى كتعياي انا ممكن نجيب شي وحدة اللي دير هادشي.، اكرام: هادشي عمرو مكان متعب ليا.. ابدا.. هادشي اقل شيء ممكن نديرو ليكم.. حيت درتو معايا خير عمري ننساه.. فارس: انا اللي خاصني نشكرك.. امي من نهار جيتي للدار وصحتها تحسنات.. كتفوجي عليها بزاف.. نفسيتها ولات مزيانة.. هادشي منقدرش نجازيك بيه.. اكرام: متبادل.. حتى انا نفسيتي تحسنات بزاف مع مي .. كاين شي بنت كتسخى من امها وكتسنى مقابل..؟ فارس: الله يجازيك على قد نيتك قلبي فرح بزاف حيت نيتو اتجاهي بدات كتتحسن.. بدا كيتعامل معايا مزيان.. حتى انه قرر يخرجنا انا وامه داك النهار.. تسارينا حتى شبعنا.. وفوجنا.. جيت للدار حتى نعسو كلهم.. وانا يبانولي الحوايج اللي كنت لابسة نهار جيت هنا.. الحوايج دالنحس.. جبتهم وبديت نقلب فيهم.. حتى لقيت الساروت ديال دار المتعة.. تفكرت باللي كنت دايراه فالجيب... حطيتو فالماريو حتى نتخلص منو من بعد.. بقبت كنفكر .. من اول يوم بغيت فيه جلال وحلمت ببيت صغير معاه.. وقنعت بالقليل.. حتى لهاد الشي للي وصلت ليه.. فكرت فأن جلال هو اكثر شخص اذاني فهاد الدنيا.. وهو السبب المباشر فمشاكلي
