كرشي كانت كتحرق بزاف.. شربت مسكنات .. ومبغاش الحريق يمشي.. حسيت انه شي حاجة ماشي عادية كاينة.. باينة انه الاعراض ديال الحرام بانو.. اما شي مرض فالرحم او حمل.. الى كانت الاولى الحمد لله انه ربي بغا يكفر عليا سيئاتي فالدنيا.. قبل الاخرة.. اما الى كانت التانية فهاديك غاتكون مصيبة.. في كل الاحوال اول شخص فكرت فيه يحل ليا المشكل ويديني للطبيب هو ايهاب.. خديت تلفوني وصونيت ليه... ايهاب: نعام.. اكرام: انا فيا نزيف.. خاص تديني للطبيب.. ايهاب: خرجي للدرب .. انا 10 دقايق نكون معاك .. نديك للطبيب .. اكرام: واخا.. نضت بتثاقل وخرجت بلا ميحس بيا شي واحد.. وبقيت كنستناه.. حتى داز بالطوموبيل وهزني.. مشينا لنفس المصحة ديال ديك المرة.. انا واخا فيا الحريق ولكن كنت مركزة على كل التفاصيل.. دخلنا ومشا هضر معاهم وانا بقيت نستنى.. شوية لقيتو جاي هو وواحد الطبيبة ودخلوني لبيت .. قالتلي نعسي على واحد الباياص.. حدا الايكوغرافي.. غطاتني.. وعراتلي كرشي ودارت بوماد.. ديك الساعة بدات كتدوز بداك الجهاز.. شوية قالت.. الطبيبة: مللي عارفة راسك كاين عنف لاش كتحملي.. باغا تديري اجهاض وخلاص.. عنف!! اجهاض.. واش هاد السيدة عارفة شي حاجة.. اكرام: اجهاض؟؟ ولكن انا مدرت اجهاض.. الطبيبة: شنو كنتي كتسناي.. علاش مكنتيش كتشربي كنينة.. ايهاب: هي معندها ذنب.. انا اللي كان خاصني نعلمها.. هي معارفاش فداكشي.. الطبيبة: كل مرة كتجيبلي وحدة وتقولي هي معارفة والو.. راه هادي صحتهم.. شي نهار تموت شي وحدة بهادشي.. كل مرة.. يعني جاب قبل مني بزاف دالبنات.. انا كنت عارفة انه لللي بحال ايهاب ذئب وضحاياه كتار .. الطبيبة: راها دارت اجهاض.. المرة الجاية بقا تفكر فالكنينة.. حسيت بغصة.. مبقاش فيا الحمل قد ما بقا قيا راسي اللي وليت لعبة فانسان احترف التعذيب.. درت الاجهاض ورغبت الطبيبة نمشي لدارنا.. منقدرش نبات حيت غايعيقو بيا.. كرهت ومليت.. اتصلت بختي تتلقاني.. وصلني ايهاب.. رجعت للدار ودخلت للبيت نيشان ونعست.. قلت لامي باللي فيا الدم.. وبقيت ناعسة وما ديتها فحد.. وليت لا ماكلة ولا نعاس.. شفت فالدوا اللي شرالي ايهاب.. وتفكرت هضرة الطبيبة.. اللي قالت باللي كل مرة يجيب وحدة.. انا من ضمن بزاف..بقا كل نهار كيصوني يسول فيا.. كنجاوب بزز.. هو كيسول غا فوقاش نولي لاباس.. باش نمشي لعندو.. كيكملها بتوحشتك.. مكرهتش نموت ونتهنى.. ونسالي هاد العداب.. بعد شهرين.. وليت لاباس ورجعت عاود لداك العداب..ولكن هاد المرة ركزت مع راسي وبديت نشرب الكنينة.. واحد النهار كنت راجعة من عندو.. وانا نتلاقا واخد السيدة كنعرفها كانت خدامة معايا.. المرا: لاباس اكرام.. فين غبورك.. مبقيتيش خدامة؟ اكرام: خدامة فمعمل اخور.. المرا: فخبارك جات واحد البنت ولات علينا باطرون.. قالك مرت مول الشركة.. الصراحة زويينة.. اكرام: مرتو!!! جاني عجب .. هو مزوج واش باغي مني مازال.. المرا: قالك خطيبتو ومازال مادارو العرس.. بنت العز باينة فيها.. اكرام: غانخليك تعطلت.. بالسلامة.. ولد الحرام.. خاطب بنت العز.. وانا مخليني للمتعة.. الله يخليه بالخلا..
