دخلت لبيتي.. وضرت فيه وانا خايفة.. خايفة نكون كنحلم ... وهدوءي غايكون نسبي ونرجع من جديد للالم.. كرهت حياتي.. تفكرت واحد البنت كانت كتقرا معايا فالاعدادية.، وكانت كتبغي واحد السيد.. طلع حتى هو شماتة معاها وبدلها بوحدة اخرى.. بدات كتنوح وتبكي.. وكتقول انا غادي ننتاحر.، شحال غبية.. عندها امل تعيش ومكتعيش على قبل راجل.. فتحت الماريو.. باش نبدل حوايجي.. لفت انتباهي عدم وجود البورطابل اللي جابلي المسخوط.. التلفون اللي من زهرو درتو فالجيب نهار جيت لهاد المدينة ومتسرقش مع الحوايج الاخرين.. ولكن فين غايكون مشا.. زعما يكون خداه فارس.. وبيه عرف دار المتعة.، خرجت دغيا من البيت مشبت لقيتو جالس وكيقرا فكتاب.. شاف فيا وسدو.، فارس: جلسي.. اكرام: عندي شي اسئلة بغيتك تجاوبني عليهم.. فارس: تفضلي.. اكرام: كيفاش حتى عرفتي فين انا.. وعرفتي الدار.. وكيفاش عرفتي سميتها دار المتعة.. فارس: (ابتسم وحنا راسو وعاود طلعو) نبداو بدار المتعة.. تلفونك راه عندي.، ومنو قريت الميساجات اللي كان كيصيفطلك داك الجحش واللي كان كيهددك بيهم.، وتما عرفت دار المتعة.. اما كيفاش عرفت بلاصتك،،، مشيت للكوميسارية جبت الاسم والعنوان ديال السي ايهاب.. ومشيت لعندو الشركة بقيت كنرفبو وتبعتو حتى جا للدار.، خليتو حتى خرج وجيت دقيت عليك.، اكرام: 😔 بغيت التلفون.، فارس: الى بغيتي نخلصك من ايهاب.. التلفون يبقى عندي .. الميساجات دليل مهم فالقضية.. ابتزازو مغايدوزش عادي.، بيه غانقلبو عليه القفة.. اكرام: واخا.. شكرا ليك فارس: اكرام.، اكرام : نعام فارس: (الصمت) تيقي بيا واخا؟ اكرام: اكيد.. نضت دخلت لبيتي وشايفة بعيني تابعني بنظراته.. شحال زوينة تشوفي حرص شخص عزيز عليك فعينيه.. تمنيت لوكان تاق بيا من الاول.. دابا مبقيتش باغا نتصدم مرة اخرى.. حيت مبقا فيا فين تجي شي دقة اخرى .. نعست وانا خايفة بزاف..اش غايوقع واش ايهاب غايسكت.. وغايخليني..هوسه بيا غايخليني.. منظنش.. ولكن اللي متأكدة منو ان فارس معايا.. او على الاقل امه معايا.. فقت الصباح .. ونضت مشيت نوجد الفطور.. فاق فارس كيتكسل.. وشاف فيا.. وابتسم.. الله يا ربي واش هادا اللي كان ديما مغوبش فوجهي.. فارس: صباح الخير.. بلعت ريقي من هو الصدمة.. المشهد جديد عليا.. ولكن لا مخاصش نتيق راسي بزاف .. مافيا ما يتحمل صدمة جديدة.. خاص نتعامل برسمية .. اكرام: صباح الخير استاذ فارس.. شاف فيا وضحك هاد المرة بالجهد ماشي غا ابتسامة.. اكرام: واش قلت شي حاجة غلط فارس: لا ابدا..هه غير الرسميات مكاين لاش نتعاملو بيهم.. اكرام: مهما كان .. العين عمرها ما تعلا على الحاجب.. نتا استاذ وغاتبقا استاذ.. اما انا.. شكون انا.. فارس: عمرك تقللي من نفسك.. حيت نتي قوة هائلة .. مشفتش بحالها فالدنيا.. ربما تكوني نتي اعظم مني عند الله.. وفالحقيقة نتي اعظم مني.. انا كنت ضعيف من اول مشكلة واجهاتني فالحياة.. واستسلمت.. ولكن نتي لا.. كنتي قوية حتى الاخر.. وتحملتي اللي ميتحملوش انسان.. نتي فعلا عملة نادرة فهاد الدنيا.. اكرام: 😅 بدا العرق كيطيح مني وكنرجف.. اش هادا .. بقالو غا يقول قصيدة فيا.. واش متأكد كيهضر عليا.. شكون هادي اللي كيهضر عليها.. ناري غانسخف هنا دابا،. فارس: فين القهوة ديالي.. 😉 اكرام: هاهي 😀ً كنت علاين نكبها عليه بقوة الرعدة اللي فيدي ... فارس: ههه بشوية عليك.. ناري هاد السبد غايقتلني ويخرج عليا.. اكتشفت اني فعمري ما بغيت جلال.. وانه كان فقط ملاذ ليا.. ومهرب من ظروف عيشي فدارنا.. ولكن دابا احاسيسي مختلفة.. كنتكركب غا مع راسي.. كنحس بتفاعل فالاعماق دالقلب ديالي مللي كنشوفو.. عمري كنت كنظن ان هاد القلب غايحيى من جديد ويبغي ويعيش الحب.. كنت كنظن ان ايهاب قتل كل شيء زوين فيا.. ولكن فارس استطع يفيق من جديد هاد الروح ويرجعها للحياة.. فارس: اكرام..شنو رأيك تمشي ليوما معايا للجامعة.. وتدخلي تحضري المحاضرة اللي غاندير مع الطلبة.. اكرام: 😳بالصح..؟ فارس: الى بغيتي 😊 اكرام: حلم حياتي انه نقرا فالجامعة.. جوج دقايق نلبس ونجي.. فارس: غانستناك مشيت كنجري وانا مامتيقاش راسي.. لبست اللي جات قدامي.. وخرجت لقيت مي هنية جالسة كتفطر هنية: صباح الخير ابنتي... فين باغا تمشي.. فارس: غاتمشي تقرا.. هنية: بالصح،.، تبارك الله على بنتي.. اكرام: ربي يخليك اخالتي
