خليت خوتي باتو فالدار.. وانا حلف عليا فارس نرجع معاه للدار.. قالك مقادرش ينعس وهو عارف اني ماشي حداه هه.. يخليه ليلي.. الصباح لقاني واجدة حيت اصلا منعستش.. ركبنا فالطوموبيل.. وشدينا الطريق للعروبية.. وصلنا.. ومشيت لدار جدي.. لقيت خوالي تما..غا شافوني.. عرفوني لاش جاية.. دخلوني لعند امي.. اللي لقيتها فالارض.. ضعافت بزاف ومكتهضرش.. غا شافتني غرغرو عينيها بالدموع.. محسيتش براسي حتى نزلت على ركابيا وحطيت راسي فحجرها.. وبكيت فصمت.. مهما كان هادي امي .. واللي مازال اثر الحبل السري فكرشي.. اللي ربطني بيها.. العاطفة غلباتني.. حطات يدها على راسي وبدات تدوز عليه.. الام: كان يحسابلي ضيعتك من يدي.. بنتي اكرام.. نتي اكثر وحدة هزيتي الحمل .. وماكنتش ام مثالية ليك ابدا.. اكرام: صافي امي.. غانطويو صفحة الماضي.. وغانبداو من جديد.. سكتنا بجوج وتعانقنا .، حسيت ان الكلام سالا.. ومابقا ليا من امي غير العناق.. بقينا مدة هاكاك.، حتى انتابهت باللي فارس من مدة وهو كيشوف فيا.. امي: شكون هاد السيد.. مسحت دموعي .. وجاوبتها بفخر.. اكرام: هادا طوق النجاة.. خطيبي فارس.. امي: الله يرضي عليك اولدي.. فارس: خاصك تجي معانا الالة.. امي: معندي فين نمشي اولدي.. غانبقا هنا.. ويكفيني اني طمئنيت على بنتي اكرام فيد راجل بحالك.. اكرام: ماما حنا ردينا الدار.، وخوتي كيستناوك فيها.. امي: بالصح 😭 اكرام: اه امي .. من هنا الفوق.. مكاين دموع.. غانفرحو وصاف امي.. امي: الله يرضي عليك ابنتي.. 😭 شديت فامي وديتها للطوموبيل.. بعدما ودعنا خوالي.. شدينا الطريق وانا فرحانة.. وكنشوف هاد الراجل اللي حل ليا مشاكلي كلها.. بلا مقابل.. باغي غير حب مني.. شفت فيه وشديت فيديه.. هو زير عليها وخداها وباسها.. الله يخليك ليا افارس.. ويجعلني نردليك جزء صغير من هادشي اللي درتي معايا.. وصلنا للدار دخلت امي ودموعها فعينيها.. تلقاو ليها محسن وشيماء وعنقاتهم وهي كتبكي.. واخيرا.. تجمعو عائلتي.. والفضل لفارس.. الراجل اللي عمري مندمت ولا غانندم حيت غانرتبط بيه.. هادا هو الحب.. الحبيب الحقيقي هو اللي يدير المستحيل على قبل اللي كيبغي.. ومايستى منو والو.. هادشي كان كيختلف فعلاقتي بجلال.. بحيث منت كندير مجهودي.. باش يكون بخير وفرحان.. باش نسهل عليه ارتباطنا.. الا انه مكان كيدير والو.. من غير انه عطاني ضربة عمري.. ولكن الحمد لله انه خرجني لبر الامان.. لو انه موقعش داكشي.. مكنتش غادي نتعرف على فارس.. ونبغيه ويبغيني.. دازو ايام وتعارفت مي هنية على امي.. وبغاتها كما بغيتها انا.. الام الثانية ليا.. وفرحو وبداو يوجدو لعرسنا.. انا قررت انه يكون بسيط.. جاو دارنا.. ونشطو بعدما وجدو الدار.. قررت اني ننشط معاهم بيناتنا.. وانهم يجيبو لعدول للدار.. كنت باغا نلبس قفطاني وصاف.. حتى لقيت واحد جوج بنات داخلين للبيت وجابين معاهم لوازمهم.. قالتلي مي هنية راه جابهم فارس باش يوجدوني للعرس .. خليت ليهم نفسي.. ومبغاونيش نشوف فالمرايا حتى سالاو.. لبسوني كسوة العرس.. شفت فالمرايا معقلتش راسي.. خرجو.. ودخل حبيبي ..كان لابس الكوستوم.. وانيق وعاطي للعين... وهز يدي وباسها.. فارس: يا اجمل ما رأت عيني.. اكرام: يا اعظم رجل في الكون.. كنبغيك افارس.. شكرا على كل ما درتي على قبلي.. وعلى صبرك عليا.. وعلى قبولك بيا.. فارس: شوووت.. هاد الهضرة مغاتجيبليك الا الدموع،. وانا مبغيتش حبيبتي تبكي.. ورب عينيكي.. لأزيلن الحزن من قلبكي.. كما نزعتي رتاج قلبي وسكنتيه.. مقدرتش ننطق .. حيت هاد الجملة لخصات كلشي .. واسكتت لهيب الخوف في اعماقي.. شديت فيه ونزلت.. وتبهرت بروعة المكان.. الورد الابيض فكل بلاصة.. مكنتش كنتخيل اني فيوم من الايام غانكون اميرة هاكا.. فارس عتقني من جمر الماضي.. وبنا معايا المستقبل.. جلسنا وكتبنا العقد وانا مامتيقاش اني وليت زوجة لفارس.. واني تخلصت من اللعنة ديال الماضي.. بداو الزغاريد والافراح.. شد فيا فارس وبدا غادي للخارج.. انا مفهمت والو.. فين غادي.. ركبني فالطوموبيل.. اكرام: فين غانمشيو.. فارس: غانمشيو لعرسنا.. 😌 مفهمت والو.. عرسنا 😳
