هنية: نتي غاتبقاي معايا.. الدار كبيرة .. وغانعطيك بيت وتونسيني هنا.. اكرام: ولكن يقدر ولدك ميبغيش.. هنية: ولدي النهار كله وهو فالجامعة.. مكيجي حتى الليل.. وانا كنبقا النهار كله بوحدي .. اكرام: سوليه ربما يكون عندو مانع.. دخل فارس وقالت ليه امه الكلام تصدم.. هنية: ولدي .. اكرام غاتبقا معانا.. فارس: امي..ممكن نهضرو بوحدنا.. ناضت امي هنية وبقات مع ولدها.. ولكن هضرتهم كانت مسموعة.. فارس: امي اش عاد الهضرة.. فين عرفنا هاد البنت شكون ولا اصلها وفصلها.. تخيلي صدقات نصابة ولا شفارة.. هنية: لا باينة فيها نية ودريويشة.. منرضاش نخليها للذياب فالزنقة.. فارس: امي.. هنية: واش باغي تعصيني.. انا صافي قررت.. فارس: مستحيل نعصيك امي.. ولكن كيفاش نقدر ناخد راحتي فداري ومعايا بنت غريبة .. هنية: نتا متاقي الله.. وغاتعرف حدودك.. واش عاجبك الله النهار كله وانا وجهي فالحيوط.. بغيتها تونسني .. فارس: 😓 كما بغيتي امي.. ولكن انا ممريحانيش.. وبانلي موراها شي سر.. هنية: وسع خاطرك اولدي.. ماشي كاع العيالات بحال بحال.. رجعات عندي امي هنية وانا كتعاود فودني كل كلمة قالتها.. اش كتقصد بالعيالات ماشي بحال بحال.. واش ديجا نصبات عليهم شي وحدة ولا.. هنية: اجي ابنتي نوريك بيتك.. غانحسبك بحال بنتي بيسان.. وغانعطيك بيتها وحتى حوايجها.. نصت معاها وتبعتها دخلت للبيت.. ولقيتو زوين .. مكنتش كنحلم باللي فيوم من الايام غايكون عندي بيت بحالو.. حلاتلي الماريو.. فين حوايج سبحان الله تقول ليا.. الدنيا غريبة.. كنت راضية بيت فوق السطح مع جلال.. والله عطاني دابا بيت كبير وام ثانية .. عوضني بيها.. فرحت بزاف.. هنية: دوشي راه الحمام فيه كلشي.. وحاولي على دراعك.. بدلي حوايجك .. ديك الساعة اجي تتعشاي .. اكرام: لهلا يخطيك عليا اماما.. معرفتش كيفاش غانردليك هاد الخير.. هنية: باراكة عليا غير هاد الكلمة.. ابنتي.. عنقتها وحسيت براحة كبيرة بزاف.. عمري معنقت امي.. اول مرك نحس بطعم الحنان.. كان من هاد السيدة .. خرجات وبقيت كنتفرج فبيتي.. عجبني بزاف.. واخيرا غانبدا حياة جديدة.. وغاننسى كلشي.. ننسى الماضي ديال ايهاب.. وديال جلال .. واخا نموت هنا مغايهمنيش.. حيت غانموت مرتاحة... دخلت للدوش .. كان فيه كلشي.. البرودويات والفوطات... انا هادشي كنت كنلقا فيه صعوبة.. كنت نشري شمبوان بزز.. الدنيا كتتقلب فلحظة.. ياريتني هرب من زمان.. ومخفتش من الهروب.. حيت احيانا الهروب نجاح.. دوشت وحسيت جسمي خفاف بزاف عليا.. اول مرة كنحس راسي نقية.. ومافياش داك الوسخ ديال ايهاب..ساليت الدوش وخرجت لبست حوايج جداد.. الله يرحم الايام اللي كنت كنشري فيهم من البال.. هادو ميتحسبوش اوكازيون بالمقارنة مع هادوك اللي كنت كنلبس.. فرحت براسي وخرجت نقية .. كنت كنحس براسي ديك الساعة ليدي ديانا.. نزلت لقيت امي هنية جالسة .. وفارس كيحط فالعشا.. استغربت واش هو اللي وجد العشا زعما.. وكيحطو بنفسو.. واش مازال فهاد الزمان كاينين رجال بحال هادا بارين بوالديهم.. سعداتو اللي غايتزوجها هنية: اجي ابنتي تجلسي.، جلسي حدايا.. اكرام: لهلا يخطيك هنية: مدي يديك.. راه ولدي فارس كيعرف يطيب.. شهوة من طيابو.. اكرام: بالصح؟ الله يعطيه الصحة.. هو حنا راسو ومجاوبش.. كما قالت امه متقي الله .. ومكيهزش عينو فيا.. الله ياربي واش باقيين فالدنيا بحال هاد الرجال.. انا عرفت جوج رجال فحياتي.. كل واحد ازبل من التاني.. وكرهوني فالرجال دالدنيا كلهم.. كملنا العشا .. وبدا عاود يجمع الطبلة.. ومعكزش.. الله ينعل العيالات قدامو،. مغنكدبش ونقول انه ما جدبش انتباهي.. هو من اول نظرة .. ومن اول تصرف .. قدر يثير انتباهي.. وغير نطرتي على الرجال.. وانهم كيشوفو المرا فقط مثيرة.. ومتصلاح غير للشهوة
