تجرحت بزاف وبقا الدم كيسيل مني وانا كنلوح عليه الما.. شافتني واحد السيدة.. جابتلي خرقة حطيتها على الجرحة.. ونضت كنزحف.. هنية: فين كنتي من قبيلة كنقلبو عليك .. اكرام: هانا غا هنا.. هنية: مالك كتزحفي.. اكرام: تفرعت من رجلي..انا غانغسل ونلبس حوايجي.. هنية: بسم الله عليك ابنتي.. الله يحفظك.. شيماء: حتى انا غانغسل ونلبس حوايجي.. هنية: غانبقا هنا بوحدي ولا.. حتى انا بحالكم.. غسلت دغيا باش منعيقش ونشفت جسمي ولبست... كنت كنحس بحريق كبير فرجلي.. شدينا طاكسي ومشينا للدار.. دخلنا وطلعت لبيتي .. حسيت رجلي طايبة ومقدرتش نتمشى عليها بالحريق... على الله نكون تخلصت من هاد القذارة.. شديت المانطة ونعست.. محسيتش براسي.. حتى حسيت يد كتدوز عليا.. اكرام: فارس 😪 فارس: حياتي فيك السخانة... انا غانديك للسبيطار.. اكرام: لا مكاين لاش.. انا غانكون لاباس.. 😪 فارس: واش مشايفاش راسك كتتنفسي بزز.. انا غانتاصل بالاسعاف محسيتش براسي حتى سخفت عاود تاني ونعست.. مافقت الا فالسبيطار.. كنسمع لاصوات بزاف.. دايرين الصداع فودني دايرين صدى.. فرزت غا صوت مي هنية.. وواحد يمكن الطبيب.. الطبيب: درنا ليها فحص سريري.. تبين بللي عندها جرح على مستوى الفخذ باينة تجرح بآلة حادة غير معقمة.. وهو اللي دار ليها السخانة.. خرج الطبيب وانا بديت كنستعد شوية وعيي.. كنسمع مي هنية كتهضر مع فارس وتقوليه.. باللي هادشي وقع فالحمام بعدما شافت فيا جرحة وسولاتني عليها.. بعدها اختفيت.. نعست من جديد .. المفعول ديال الدوا.. حتى فقت بالليل لقيت حدايا فارس شاد فيدي.. حسيت راسي احسن دابا.. اكرام: فارس فارس: حياتي.. اكرام: انا وليت لاباس .. خرجني من هنا.. فارس: علاش ا اكرام.. الى نتي مكتهمكش صحتك انا كتهمني وبزاف.. زيزوار ا إكرام.. مخفتيش تقتلك.، اكرام: 😭 اثر خلاه فيا ايهاب.. مبغيت حتى حاجة تفكرني بيه.. فارس: متبكيش.. انا ماشي كنلومك ولا محاسش بيك.. ولكن كان عليك تعلميني ونمشيو بجوج لطبيب تجميل يحيدهالك.. ولكن تجرحي راسك .. هانتي دخلتي للسبيطار بسبابها.. اكرام: سمحلي.. 😢 فارس: واعديني انك من هنا الفوق تتهلاي فصحتك.. وتبغي نفسك.. كنحس انك كتستحي من راسك ومني.. اكرام انا كنبغيك كما نتي.. معندك مناش تحشمي مني.. ماضيك كنعرفو وقابل بيه.. علاش هادشي كله.. اكرام: مكاين والو افارس انا بخير.. 😥 فارس: لا .. نتي من الداخل ديالك بركان.. عاصفة دازت عليك.. وخلات اثارها.. ومن سيسلم من جراح العاصفة بعد هدوءها.. واخا مشاكلك تحلات الا انك مقادراش تنساي.. وداكشي الداخل ديالك مكيخليكش تستمري.. اكرام: انا بخير افارس 😓 هاد الهضرة معندها فايدة دابا.. فارس: انا غانكون ديما بجنبك.. متخافيش.. غاتكوني بخير،. رتاحي احبيبة.. وغادي تخرجي غدا.. نعسي دابا.. اكرام: واخا.. تهربت من الحديث.. كأني فرحت حيت سالا الموضوع.. باب سديتو على جروحي من شحال هادي.. علاش باغي يفتحو.. وانا مقادراش على تذكرها حتى.. خايفة نغرق فيها.. وميعتقني حد من الغرق.. خليني هاكا..كالعادة النعاس حل وهروب من المواجهة.. الصباح جات عندي شيماء ومي هنية.. وخرجني فارس.. وانا شادة فيه.. مازال كنحس الحريق فرجلي.. ولكن نوعا ما مللي عرف فارس ارتاحيت.. وصلنا للدار .. يوماين بعدها وانا مكنهز منحط.. شيماء كدير كلشي.. بالمناسبة سجلها فارس فواحد المدرسة بريفي .. وبانليا فيها دارت عقلها.. وبقات كتحفظ.. واحد النهار رجع فارس من الخدمة.. دخل وجاب معاه انسان رجعت جروحي حيات كلها مللي شفتو.. دخل وحاني راسو .. على غير العادة اللي كنت كنعرفو عليها.، الحرقة والدموع والصدمة كلهم تخالطو ليا .. محسن خويا.. اللي معمرو عنقني.. اللي ضربني قبل اي واحد.. اللي ماحمانيش من راجل امي.. اللي عمرو ما حس بيا.. اللي كان باغي يقتلني نهار عرف مصيبتي.. فارس: جبت محسن معايا .. باغي يقوليك شي حاجة اكرام.. مطلعش عينيه فيا.. وانا دموعي غلبوني.. شي حاجة لداخل ديالي حرقاتني.. رابطة الاخوة البي بيناتنا.. اللي ما ماتتش رغم العداوة الكبيرة.. حيت شفت البغض دالغرباء.. رغم اني طول حياتي وانا كنقول كلمة كنكرهو بعدما يجيبو سيرتو قدامي.. الرابطة ماماتتش.. والجينات المشتركة اللي بيناتنا حتى هي ما ماتتش.. قربت منو وانا مخايفاش.. رفعت دراعاي.. طلع عينيه وعنقني لاول مرة وهو كيبكي،. خويا انكسر الحبس كسرو بزاف.. وعرف ان حضن خواتاتو جنة.. فهاد الدنيا وهو معارفش قيمتهم.. عنقتو وانا كنبكي.. وكلشي تأثرو بهادشي.. هو بقا كيردد كلمة وهو كيتخصص.. محسن : 😭 سمحيلي اختي.. سمحيلي ..
