2020/3/11
هديل :روح الغي حجز الفندق
وراها كمل شغلك وروح للبيت حظر ملابسك وغراضك
سرمد : ماشي... بااااي
طلع من مكتبها متحمس وفرحان كلش وكل شوية
ينط
كملت شغلها ورجعت للبيت تحضر جنطتها
دخل عليها اخوها مصطفى
مصطفى: ممكن ادخل
هديل :اكيد..
دخل وكعد بجانب الجنطة الي دتحضرها وهي مستمرة بتحضير الغراض
مصطفى: شكد رح اطولين هناك؟
هديل: والله ما اعرف.. الشغل اقل شيء لازم يخلص بسنة
يمكن اظل شهر ووراها ارجع ويمكن اكمل اذا ما اشتغلو زين
مصطفى :والشركة؟!!
هديل :حسام موجود واني يمكن اجي كل جمعة
واذا بقيت يمكن اسويلة وكالة
مصطفى: زين وين رح تكعدين؟
اجراتي بيت
هديل :المهندس الي رح يجي وياية بيت جدة هناك وعزمني ابقة يمهم اني كتلة اذا حسيت روحي ثكيلة اروح للفندق
مصطفى: والله اهل الجنوب ضيافتهم حلوة وما يقصرون ابد
يمكن حتى بعد ما ترجعين اذا شفتي دلالهم
هديل: واذا عجبني الوضع ابقة
صح ما احب عاداتهم بس بنفس الوقت همة خوش ناس
مصطفى: يحتاج اجي وياج؟
اذا تردين اجي وارجع بعد اسبوع بين ما تضبطين امورج
هديل: ماكو داعي اول وتالي رح اظل بالبيت اسبوع
هسة بس اريد اسلم الورق لمهندس المساحة حتى يبلش تخطيط ووراها نبلش والله اعلم شوكت
خطف نظرة على الجنطة
وشال الكتاب الي بيها
مصطفى :شوكت تبطلين تقرين هالكتاب.. ما مليتي منه؟.
هديل :ما اكدر استغنى عن اجاثا كرستي
مصطفى: اجاثا كرستي لو متكدرين تستغنين عن سمير؟
سكتت وظلت تباوع على الكتاب الي بأيدها
مصطفى: مو قصدي اذكرج بس لازم تنسي
ميصير تظلين حاطة كل شي يخصة كدام عينج
انسي.. هو راح وبعد ميرجع
هديل: ومنو كلك انو اني متذكرتة
نسيتة ومن زمان
الي سوا جان كابوس بالنسبة الي اكثر من المرض نفسة
مصطفى ما اريد اتذكرة سد الموضوع
مصطفى: اني اروح وانتي كملي
غراضج ونامي وراج سفر
هديل :اوك.. تصبح على خير
حاولت تنام بعد ما كملت غراضها بس ما كدرت
صارت ب٤:٣٠
غسلت وغيرت ملابسها وجمعت اغراضها وطلعت
عادل نقل الجنط بالسيارة
ودعت اهلها وراحت
اتصلت بسرمد وصعد وياها
هديل : اي سرمد سولفلي..
سرمد :شسولف
هديل:سالفة انك تجي وياية وكايل لاهلك انك رايحلهم
قبل ما اني ابلغك بالمشروع مدا تدخل بعقلي
ابتسم وتردد يحجي
سرمد: بصراحة
هديل: اشمرك من السيارة اذا جذبت ... وبالنهر
.ضحك وهية ملامحها شبه جدية
سرمد :حسام كان واسطة
تدرين اني طلع قبولي بغداد واني من الناصرية
واجتني فرصة شغل وحاليا وحدي ببغداد
لذلك من سمعت بالمشروع طلبت من حسام يحطني بالنص حتى اثبت نفسي بهلمشروع وهم اروح لاهلي
هديل: ماشي.. يعني متفق وية حسام
ترة اني ما اگل بشر.. يعني لو جاي وكايلة جان اخذتك وياية
ماكو داعي تخلي حسام يجذب علية
مرة لخ لا تعيدها ترة قسم بالله ازعل عليك
واوعدك بانتقام على هالسواية
ابتسم وباوع للطريق
سرمد : تؤمرين
هديل :هسة سولفيلي عن اهلك شوية خلي نتعرف عليهم
سرمد: والله عائلتنا كلش جبيرة بمنو تردين ابلش؟
هديل:بلش من اكبر واحد واعدادهم خلي نفتهم راسك من رجلك
ضحكو سوة وهو طلع عصير وانطاها
سرمد: جدي الشيخ زهير عمرة ٧٨سنة
ورث كاع من ابو وضل يشتغل بيها والله رزقة بنه بيت شكد ما تفرين بي ما يخلص
طبعا هو مهندس معماري لذلك اني رحت هندسة لان كلش حبيتها
عندة اربع ولد و بنية
عمي سالم الجبير وعمرة ٥٨ وعندة ثنين ولد وثنين بنات
ابنة الجبير يصيحولة امير الديرة لان رح يورث جدي وابوه بعد عمر طويل
وعمي الثاني فلاح عمرة٥٦ وهذا عندة بس اربع بنات
وراهم عمتي زهرة عمرها تقريبا ٥٥ عدها ٩ولد وثنين بنات
ظلت تباوع علية بتعجب
هديل: الناصرية بيها مكان لو بيت جدك محتليها كلها
ضحك وكمل
سرمد:
وعمي الثالث جاسم استشهد بالحرب جان عريس
اما الرابع كامل فهو ابوية عمرة ٥٣ سنة اني ابنة الصغير عندي ثنين اخوان وخوات ثنين
هديل :وهذولة الاحفاد بيهم احد متزوج؟
سرمد :طبعا...
بنت عمي سالم الجبيرة مزوجة
ثنين من بنات عمي فلاح
وولد عمتي ثلاثة مزوجين
واخوية الجبير مزوج والثاني رح يخطبولة
هديل: تقريبا اعمار الاحفاد متقاربة؟
سرمد: اي لان عمي سالم وعمي فلاح اتزوجو بنفس اليوم ووولدهم تقريبا نفس العمر
وابوية وعمتي تزوجو بنفس اليوم لان ابوية اخذ اخت رجل عمتي الي هية امي
وخالي اخذ عمتي
هديل: شرحك خنفشاري
ضحكو وكملو الطريق سوالف لحد ما وصلو لجسر
سرمد :نزلي خليني اني اسوق
هديل:ليش؟؟؟
سرمد :اذا جدي عرف انج تسوقين يضربني فلقة
هديل: وليش.. ممنوع عدكم المرة تسوق؟
سرمد: جدي يكول البنية اميرة والي يتعبها وما يشيلها ع راسة اكسر راسة
هديل: لا تخاف.. اذا سألك كلة هية متقبل احد يسوق سيارتها
سرمد: اذا نضربت بذمتج
ابتسمت
هديل: ماشي بذمتي
صدك.. اول شي خلي نروح للمشروع ننطيهم الورق وراها نروح لبيت اهلك
وصلت المخططات وكملت الشغل ورة ساعتين من الشرح
وصلو لبيت اهل سرمد واستقبلوهم نسوان هواية وياهم خمس ولد ورجال جبير
سلم عليهم وباس راس امة ودنك باس ايد ابوه
ووراها سلم على الولد الي واكفين
اما اني سلمت على النسوان وجانت الابتسامة الي بوجههم والفرحة متوصف وكأنما اني بنتهم وفرحانين بشوفتي
سرمد: ست هديل... انطي المفتاح لعلي خلي ينزل الغراض
ناولتة المفتاح ونزل الغراض وحطهن بالاستقبال
اما اني دخلت وية البقية
راح سرمد على رجال جبير بالعمر جان كاعد برأس المجلس
باس ايدة وراسة وكعد بصفة
واني هم كعدت بصف الشيخ من الجهة الثانية
سرمد: شلونك جدي... اشتاقيتلك هوواية هواية
زهير: يا ضوة عيوني انت
ليش هالغيبة مو تدري ما اكدر على فراكك
سرمد: والله ادري بس انت مو تريدني اصير مهندس مثلك
هاي صرت واسال عني اهل بغداد كلها تعرفني..
جدي اعرفك.. المهندسة هديل عبد الرحمن
مديرتي بالمكتب
اندار علية وابتسم
زهير: يا هلا بيج يبنيتي نورتي دارنا
هاي كل اهل بغداد هيج حلوين
ضحكت على كلامة المعسول
هديل: تسلملي الله يديم عزك
لا بس اني حلوة
اهل بغداد مو حلوين
زهير : هاي ثقة لو غرور
وضحك وكلنا ضحكنا
هديل: ثنينهن
وحجت وحدة من الكاعدين جانت كاعدة بصف سرمد
"يمة سرمد... كوم غسل وبدل وشوية ارتاح حتى نصب الغدة"
سرمد: صار يمة
هديل: حجية من رخصتج شيرتاح
الطريق كله لو نايم لو ياكل
سرمد: الفلقة..
زهير: ليش منو جان يسوق؟
هديل: شيخنا... عصاتك ثكيلة وحلوة
غمزلي الشيخ واندار علية وهو معصب
زهير: ثكيلة ثكيلة
لملم غراضة وراد يطلع من الديوان مستعجل
سرمد : اروح ارتاح
زهير : اكعد اكعد.. هالمرة سماح لان جبت وياك هالكيمر
اندار علية الشيخ مرة لخ
زهير: اي يبنيتي سولفيلنا.. انتي منين
وشجابج لديرتنا
هديل: والله يا شيخنا اني مديرة مكتب هندسة معمارية
واجيت علمود بناء مستشفى
زهير: انتي بغدادية لو لا
لان شكلج مو من اهل بغداد
هديل: صحيح.. اني اصلي كربلائي بس مولودة بغداد
جدي جان ساكن بكربلا بس اجتة رزقة زينة واجة لبغداد
زهير: اول مرة تجين للناصرية
هديل: يي شيخنا اول مرة
زهير: اهلج شلون وافقوا تجين وحدج
هديل: ابوية لو مو يدري بيكم تصونون الامانة وغيرتكم وسمعتكم سابقتكم
ما جان دزني
وبعدين وياية سرمد بالف رجال
سرمد: جدي لا تخاف عليها بالف رجال
مرة ضربت رجال تحارش ببنية كسرتة تكسر
زهير: وليدي الي يتحارش ببنات الناس لا تصيخلة رجال هذا الحرمة ارجل منه
هديل :صح لسانك شيخنا
زهير: صيحيلي جدي يبنيتي... . انتي مثل حفيدتي من اليوم
وامانة بركبتج اي شيء تحتاجي تكليلي وام سرمد متقصر وكل البنات بخدمتج
هديل: ما تقصرون
والنعم من اصلكم الطيب
زهير: سمية....
كامت وحدة من البنات الي كاعدات
سمية: أمر جدي..
زهير: غرفتج بيها جرباية فارغة تحضريها للمهندسة
لان رح تبات وياج بالغرفة
سمية: كل الهلا.. بعيني وعلى راسي
تأمر بشي بعد
زهير: الله يرضى عليج..
علي.. انت صعد الجنط للغرفة
هديل: لا لا شيخنا اني اصعدهن ما اريد اتعبكم
علي: ماكو تعب خيتي.. بخدمتج احنا
هديل: تسلم خوية بس ما اريد اتعبك
سرمد : يلة عيني سبايدر مان
هو انت غرفتك كوة تصعدلها
علي: رجعنا لهللسان
زهير :عيب عليكم عدنا ضيف
صعد علي الجنط للغرفة وصعدت هديل وية سمية
سمية: تفضلي حبيبتي
هاذا سريرج وهاي باب الكنتور كلها الج
وشتريدين اني حاضرة وامانة بركبتج اذا تحتاجين شي لا تخجلين انتي مثل اختي
هديل :تسلميلي
سمية :هسة رح انزل
انتي غيري ملابسج وغسلي اذا تردين هذا باب الحمام
ساعة ب3 الغدة كلنا نجتمع بغرفة الطعام
هديل: اوك حبيتي
نزلت وعافتها وحدها بالغرفة
دخل سرمد وعلي للغرفة
سرمد: ايييي يا ريحة هلي
شتاقيت لفراشي وغراضي والكعدة الحلوة
علي: والله جذاب
انتي جاي لان مشتاق للحب
سرمد: اي والله مشتاقلها
ليش ما جتي عمتي
علي :كالت تجي على العشة
لان رجلها عندة شغل بالنهار ويرجع تعبان على الغدة
اصبر مطير ست سارة
سرمد : كلبي ملهوف على شوفتها
رتبت غراضها بالكنتور ولبست صاية كلش عريضة ونزلت
شافتها بنية على الدرج وفززتها
"هلاووو... وين تردين ترحين؟"
فزت والتفت وراها شافتها بنية صغيرة تطلع بعمر 17سنة
هديل: هلاوات... فززتيني
اريد اروح لغرفة الطعام سمية كالت الغدة ب3
"اي تعالي وياية"
هديل :وانتي منو؟
شسمج وبت منو
"اني اسمي نورهان بس الكل تصيحلي نور
اخت سيف الصغيرة "
هديل: ومنو سيف؟
نور: عزززة متعرفين امير الديرة
تعجبت نور من كلامها وهديل ضحكت
هديل:انتي بنت سالم اذا
لعد وينها اختج الجبيرة
شسمها؟
نور: اي
بيت رجلها اليوم متجي يمكن باجر تجي
اسمها عايدة
مشو بطريقهم
ونور وكفت بالباب
نور:اروح اعاون البنات بالمطبخ انتي دخلي
هديل: لا اجي وياج
نور :ميصير.. انتي ضيفتنة
هديل: بس اباوع ما اشتغل
ضحكت ونور هم ضحكت عليها وفتحتلها باب المطبخ
دخلت ولكت كوووم نسوان يشتغلن ناس تصب وناس تودي الاكل
اجت بأتجاها وحدة شايلة صينية تريد تفوت من الباب الي وراها
هديل: انطينياها
"لا لا حبيبتي.. اني اوديها
هديل: ما اخليج تفوتين.. انطينياها
" تردين جدي يزعل علية"
هديل :انتي شسمج؟ وبنت منو
اول شيء خلي اعرفج وبعدين نتفاهم
وضحكت
" اني هدى اخت سرمد وسمية"
هديل: دجيبي الصينية وروحي كملي شغلج
اخذت منها الصينية ودخلت بيها ورة سمية
جان كاعد شيخ زهير براس السفرة وكاعدين بصفة ٣ رياجيل كبار الي همة سالم وفلاح وكامل و٦شباب من ضمنهم سرمد وعلي
وواثناء ترتيبها للسفرة انتبة شيخ زهير انو هاي الضيفة
زهير: يبنيتي شدسوين.. انتي ضيفتنا
ميصير تشتغلين شيكولون علينا اهل بغداد ما كرمنا الضيف
هديل: جدو.. قبل شوية انت كلتلي اني مثل حفيدتك
حدد اذا اني ضيفة لو حفيدة
زهير: انتي حفيدتي
ابتسم وباوع على الولد الي كاعدين
هديل: لعد حالي من حال البنات
واهل بغداد اكص لساناتهم اذا جابو طاريكم بالمو زين
زهير: والله لسانج مينكدر علية
ضحكت وكملت ترتيب الغراض
واحد من الولد نغز سرمد
"لك هاي منين جايبها؟ فدوة لله شهالحلاوة
سرمد: سعد تنجب او اكوم اطشرك
مو من شيمنا نباوع على لحم العالم
استحي هاي ضيفة
سعد :شبيك بابا ولك عجبتني والله لو ابوية يقبل جان هسة خطبتها بس بعدني صغير
سرمد: لا تتامل هية ما تقبل بيك
سعد :وشبية ليش؟
سرمد: مهندسة عدها شركة وسيارة و بيت واملاك تاخذ واحد مثلك عندة كرابة
سعد: خرب ببليسك شكد غثة
زهير: سعد..
صاح بعلو صوتة
سعد ارتبك وخاف
سعد: نعم جدي
زهير: شوكت تبطل حجي على نعمة الله
تنفس الصعداء وابتسم
سعد: جدي والله مشتاق لاخوية شسوي قابل
زهير: كافي..
سعد:صار جدي
همسلة سرمد وهو يضحك
سرمد : الا بالرزالة
هاي عود انتة اخوية الجبير
رجعت هديل للمطبخ حضرت خواشيك وكملو الاكل وكلهم كعدو على السفرة
اجت اخر وحدة ظلت تباوع كل واحد كاعد بمكان عرفت انو كل شخص اله كرسي محدد
هديل: واني وين اكعد؟
زهير: بالمكان الي يعجبج
هديل: عادي اكعد يمك
اشرت على الكرسي الي يمين الشيخ
زهير: على لسانج الحلو بعد هذا المكان الج من اليوم
هديل: ليش هو مال شخص معين.
زهير: مال الحجية رحمة الله عليها
هديل: لعد تعذرني
هالمرة ما رح اطيعك
رح اكعد هنا
كعدت بالكرسي الي بجانب كرسي الحجية
زهير: سوي الي يريحج يبنيتي
حط الدجاجة كدامها بالماعون
هديل: جدو هاي الدجاجة مو صغيرة اريد هذيج الجبيرة
ضحكو كلهم وهو غص من الضحك
هديل: جدي احنا ٥ نفرات بالبيت كلنا ناكل دجاجة وحدة ويزود منها
وانت تريدني اكل دجاجة كاملة
معدة لو شوال طحين
زهير: اكلي منها الي يكفيج والباقي رجعي
ابتسمت واخذت بس الفخذ
ورة شوي سمعو صوت طلقة
كل الشباب وكفو
صاح الشيخ بعلو صوتة
زهير: كعدو.... ولا وحدة منكم يطلع
جلال وسعد وعلي كومو شوف شكو
طلعو برة وراها رجع جلال يركض وهو شايل دشداشتة للنص
جلال : جدي جدي
وكف بصف جدة وعدل روحة
زهير:شكو!!! ؟
مد جلال ايدة وهو مبتسم واسنانة ظاهرة
جلال: اريد بشارة
زهير :بشارتك ٥٠ الف
.....
.
.
.
.
.
.
انتهى الجزء2020/3/11
1824
ان شاء الله ما مقصرة وياكم
الجزء يتنقح ويتعدل اكثر من عشر مرات
اي ملاحظات لا تبخلون بيها علية
استقبل اسئلتكم واقتراحاتكم برحابة صدر
اي استفسار اني موجودة وحاضرة
بخدمتكم
دمتم بعطر المسك