⚔عشق الملك برقان⚔
👑oumaima mega 👑
👣42👣
برقان كيسمع هاد التعويدة و عقد حجبانو كثر و كثر شكون هادا لي تجرأ يستحضرو و هو ناعس مع مرتو ... نزل عينو لاية لي كانت ناعسة في صدرو بتاسم بهدوء وهو كيشوف فيها بنضرات كلها عشق وهيام و حيدها بشوية من عليه و نزلها على الناموسية ....و ناض هو من تما ورجع عقد حجبانو...كيخطوي في بيتها للباب و دوك الخطوات غادين و كيتسمعو بعاااد حتى اختفى قبل حتى ميوصل لباب
في وسط وحد الغابة و في الظلااام ....كان واحد السحاار مشعود كبيير في السن و شعرو بيض بالشيب وطوييل و مسخ لدرجة زغباتو مشابكين مع بعضياتهم و لابس جلابة طويلة بالبيض و الوسخ في جسمو كامل ضفرانو طوال شوية و مسخين و رجلو حفيانين مسخين ...مربع رجلو و جالس وسط واحد دوارة ماسونية و مدور بيه الشموع شاعلين و شي جماجم ...و العافية شاعلة قدامو
السحااار كيغوت : ااااجب يااابرقااان بحق هيث هيث مرث مرث ايوله ايوله ايوه ايوه هايلوثي هايلوثي ياه هيلوثي ظلظليوتي (....) خلق الله الليل و النهار ايل اهيا شارهيا ادوانى صباؤت ال شدى توكل يا برقااان .....(مكتبتهاش كلها تحت الطلب ) ......و السحار كيلقي هاد التعويدات و كيلوح فحال الرماد في لعافية باش تشبك حتى حس بشي حاجة من موراه ريحة المسك كتفوح ...حبس مصدوم و دار من وراه ...كان واقف الملك برقان داير يدو من موراه و معاه جوج جنود معندهم لا رجل لا يد و لابسين لكحل من وراه
السحار خرج عينو و ضحك : ههه لملك برقان تسليم تسليم كنرحب بيك عندي انا طالب منك لامان باش متأدينيش عاد نقول ليك شنو بغيت
برقان بدا كيتمشى و كيدور على ديك الدائرة بشوية : قول شنو بغيتي علاش ستحضرتيني هنا وغنعطيك لامان على حساب شنو غنسمع...و وقف قدامو
السحار بشر كيهضر : بغيتك ا لملك برقان تقدي ليا وحد الشغل و غنعطييك لي بغييتييي لي بغيييتيي
برقان واقف بهدوء و مكمش وجهو فيه : شنو هو هاد شغل؟
السحار سيفتو خايبة كتبين على شرو واعمالو السوداء : بغيتك تشعل العافية فوحد الدار و تخلق لفتنة بغيت لمرة متبقا تبغي راجلها و الراجل ميبغي بناتو و بناتو ميبغيو مهم
برقان هز حاجب : بغيتي للعافية تشعل ؟
السحااار : اااه و طلب اي قربان على وجه لرض غنقدمو ليك (وهو يتسيف عليه الملك برقان عينو حمارووو و هو في بلاصتو السحار التخلع ) تسليييم تسلييييم املك لجان ....برقان بدا كيحرك شفاهو بهمس وهو كيلقي تعويدة و فحال صوت البوق طلق في ديك الغابة لخالية و المضلمة و هي تشعل العافية في السحار ....و البوق كيقشعر بدن لي كيسمعو اي طير و لا حيوان كان في ديك الغابة هرب ....و السحار ناض كيغوت و العافية شابكة ليه في وجهو و في يدو وكيجري في ديك الغابة ....برقان وقف شفايفو و معاه تطفات العافية و السحار طاح لرض كيغوت من حر الحريق ...وقف عليه برقان على راسو
و السحار مزال كيغوت و كيطلب التسلييم و الامااان التسليم و الامان ...و كلمة تسليم هي في الاصل تعويدة طلب السلم من ملك الجان
برقان كيشوف فيه : هادا غير باش تعلم تأدي واحد من عباد الله شعودة ديالك ما غضرهم بوالو حيت لايفلح الساحر حيث اتى و هادي اخر مرة غنسمعك كتمارس الشعودة ديالك ولا غادي نحرقك بعافيتك حتى لموت .... و غبر في بلاصتو هو وجنودو ...و تمحات الدائرة لي دارها السحار و تشير بالجماجم و طفات لعافية و بقا غير صوت السحار كيغوت من حر العافية والحريق
⚔عشق الملك برقان⚔
👑oumaima mega 👑
👣43👣
في صباح ديال النهار الثاني ....آية ناعسة و بدات تفيق بشوية بشوية و ترمش بعينيها ...طلعت يديها كتحسس واش برقان حداها ...حلات عينيها بزربة و ناضت جلست و دارت جنبها مكانش برقان ....عضت فمها لا ميمكنش تكون كتخيل لا ميمكنش وميلت تعابيرها فحالا غتبكي....ميمكنش يكون هادشي كولو لي عاشتو مع برقان خيال وهي تفكر انه كتب ليها في يدها سميتو ...دغيا طلعت يدها و شافت في معصمها و خرجت عينيها كانت مكتووووبة سميتو بشكل واااضح...شهقت بصدمة و شدات من معصمها و ضحيكة كتبان على فمها ...و دارت كتقلب على لكتاب لي كتب ليها فيه ....شافتو هزاتو و بدات تقلب في صفاحيه حتى لقات خطووو عاد تنفست الراحة وقلبها هنا ورتاح و خدات لكتاب و خشاتو عنقاتو في صدرها و غمضت عينيها ...شي فرحة زوينة دخلت لقلبها هو كاين بصح ماشي كتوهم ...حلات عينيها ...دابا من بعدما تاكدت بلي هو كاين شكون هو بضبط منين كيدخل ...ادن بصح هي تزوجت بيه و دارو كاع داكشي ديال مزوجين و دوك القصور لي مشات ليهم و دوك الناس لي تعرفت عليهم صغرت عينيها هادشي مكيدخلش للعقل و ماشي منطقية ...راسها بدا يضرها ...ناضت في حيرة مشات لطواليط توضات و خرجت لبست عبايتها و دارت شد فوق راسها و سرحت السجادة ...و وقفت مقابلة لقبلة غادي تصلي ...وهي تسجد و بدات كتشكي لله على شنو كيوقع ليها و كتسولو الى كان بلاء يبعدو عليها و كتطلب باش يوريها الطريق الصحيح و المستقيم ...و ناضت وقفت كتصلي ...عادي بوحدها و في الظل لي على الحيط ...كان واقف قدامها راجلها كيصلي بيها حتى هو ....حتى سلاو ....سلم هو يمين و شمال و هي من وراه سلمت يمين و شمال و دار عندها كيشوفيها متبسم وهي بداك اللباس و كتجمع السجادة و هو كيزيد يغرق في حبها كثر و كثر ....اية دارت مكتشوف والو بيتها خاوي حيدت العباية ...و الشد وخرجت من البيت نزلت لتحت ....كانت مها حياة جالسين كيشرملو الدجاج و جداها كتصايب تقويم البسطيلة ...و زينب كتنقب و كتضرب ليها حياة يديها باش تحيدها ....آية هبطت عندهم و مشات جلست حدا جداها
جدتها : اجي ابنتي اجي (نعستها على كتفها ) قالوليا مرضتي نوارت الدار مرضت لينا
حياة : عين هاديك ضربتها خاصني نبخرها
اية كتبسم : غير عييت شوية ا مي لالة
جداتها : ايوا حتى جايين ناسك باغين يعرفو امتا غيديوك لدار راجلك عاد مرضتي ابنتي
اية فتحات عينيها و ناضت بشوية تفكرت محمد امييين و خطبتها بييه و هي مزوجة دابا ببرقان بلاتي عقلها كيفاش نسا هادشي وهي مع برقان
جداتها كتمسح ليها في شعرها : مالكي ابنيتي ؟
اية دارت عندها قلبها بدا كيضرب وعقلها غينفاجر بلأسئلة لي مكيتقبلهاش لعقل : ءءءء؟ م م مالي والووو
حياة : اية ابنيتي لا كنتي وليتي لباس شوية نوضي عاونيني جيبي ديك الخضيرة من الكوزينة قطعيها
اية دارت عندها ووجها مخطوف درية مرفوعة : ءءء؟ واخااا ....و ناضت بلا عقل من تما معارفة شنو غدير عقلها غير مع هادشي لي واقع ليها ..... برقان كان واقف في الصالون نيت مكيبانش سمع كلشي و عقد غوباشتو ...تعصب فاش سمع هاد لهضرة مرتو هو جايين يهضرو في عرسها شنو هاد تخربيق ...يتبع