عشق الملك برقان (قصة رعب _رومانسية بدارجة المغربية +18 في طور كتابة )

33

⚔عشق الملك برقان⚔
👑oumaima mega 👑
👣119👣

كانت طموبيل تاع راجس واقفة بالكحل و واقف عليها الشيفور الخاص بيه وفاتح الباب الخلفي تاع لوطوو ...و الغريب هو انه تحطت رجل راجس على الارض و خرج من اللوطو بكومبلي اسود بالفيست ديالو كيعقدها ... و نظراتو حادة و هو عاقد الحواجب ديالو ...آية كانت الصدمة عليها كبيرة و عقلها تخلط عليه كلشي لدرجة انها دارت من وراها في المكان لي شافتو فيه ...شنو هادشي لي مكيستوعبوش العقل ...مرجعتش شافت في راجس حيت الخوف ركبها ...دارت وهبطت راسها كتشوف في الارض و بغات غير تمشي تجاوز الموضوع و لكن يد نجوى لي جرتها من دراعها حبستها ...دارت تشوف فيها ...كانت نجوى متبسمة و بين سنانها كتهدر : آييية بلاتي ...اية رجعت عينها في راجس لي كان جاي لجيهتهم ...و وقف بعيد عليهم شوية و داير يدو في جيبو

نجوى بابتسامة : سلام ا مسيو الميداوي
راجس عينو في آية و رجع نظراتو لنجوى : سلام تفضلو معايا نوصلكم
آية كان ردها الرفض كيف ديما : لاا غادي نمشيو بوحدنا ...راجس بان واضح على وجهو بلي معجبوش الرد ديالها : واخا قولي ليا بعدا شنو هو العنوان ديالك ؟ ...اية جاها هاد الانسان كيتطفل بزاف على حياتها يلاه بغات تجوبو و لكن نقزت الفريفرة تاع نجوى و قالت ليه بسعة رحب العنوان كامل بلا متنقص منو حرف .... و بشكل مضبوط خلات اية غير تتشوف فيها بصدمة
راجس : شكرا (و رجع عينو لآية ) منين مبغيتيش تركبي معايا  تفضلي راه طاكسي كيتسناكم ...آية و نجوى دورو عينهم كان فعلا طاكسي واقف بابو لخلفي مفتوح ليهم ...نجوى نقزت بتعابير الشكر و جرت اية معاها من دراعها باش يمشيو : شكرا ا مسيو الميداوي شكرا شكرا ...و جرتها غادا بيها ...آية كتمشى معاها و كتسول راسها شنو مشكيلتو علاش كيبقا يبان ليها علاش كيفكرها في برقان كل مرة ...دخلت لطاكسي مجموعة على راسها كتحس بدماغها كيدور كيفكر بزاف ...لو كان برقان بصح غير في خيالها شكون هاد راجس واش هو الواقع .... مبقات عارفة والو ولا مستوعبة شي حاجة تخربقت كليا ...و نجوى طلعت و سدت لباب ...و طريق كلها و هي شاداها الضحكة ....حتى وصلو للدار و بغات نجوى تخلصو و لكن رفض حيت ديجا كان خالص ....هبطت نجوى غطير بالفرحة ...و اية غير غادا معاها توصلو لدار ...حلو لباب و سلمو على حياة لي كانت لتحت مع الحاجة كيهدرو ...و طلعو لبيت اية ...بدلو حويجهم لبسو بيجامات توضاو صلاو ....نجوى هبطت جابت بلاطو تاع الماكلة من عند حياة لي موجدة ليهم غداهم و كلشي ...و طلعاتو لعند اية تاكل هي و ياها و يحفظو ...اية كلات معاها غا شوية و ناضت رجعت بلور جلست في فراشها ...بقات نجوى تاكملت ماكلتها و جات جلست مربعة رجليها حدا اية

نجوى بابتسامة صغرت عينيها : قولي ليا مبانش ليك مسيو لميداوي كيعاملنا بشكل خاص شي شوية
اية هزت فيها عينيها و خنزرت فيها : كيفاش مفهمتش
نجوى قربت لعندها : زعمة حنا لي كيهدر معانا و كيطلب يوصلنا
اية مخلاتهاش تكمل : منعرف حنا ماشي سوقنا فيه ...و قلبت وجهها اصلا عندها مشكل مع وجهو لي كيشبه لملكها برقان ...نجوى نزلت الضحكة و لاحت ليها كتاب : شدي شدي حفظي نتي كتجي تال هاد المواضيع و كتحماقي شدي ....و نجوى تهيا شدت كتابها و بدات تحفظ ...اية كتشوف في الكتاب و فينما كتفكر بالاختلاط لي في راسها كيتجهدو انفاسها و كتقلق راحتها