جلسات شادة فراسها تترمش وفاتي و سلوى معاها مشوشين طاح فبالهم كل الاحتمالات الا الحمل حتى وحدة ماجبداتها ففمها...حتى رتاحت مريام شوية فاش مشات و ناضت تاكل تعتق بيه روحها حيت عيات و ماواكلاش مزيان و فاش تتكون فيها ليغيكل تتجيها الدوخة و التقية ...و الاعراض هاهوما و الدم فين هي ؟ يوماين وهي تتفكر مبرزطة مع هاد الموضوع حيت موضوع ماتقدرش تنساه بالنسبة ليها عاد قالت الدورة رجعات عندها منتظمة و تتعيش مرتاحة كاي مراة و حتى الدوايات لي كانت تتشرب على زيادة الخصوبة مابقاتش تتشربهم وقفاتهم بفترة قصيرة بعد طلاقها من تما ماتخسرات ليها ولا وقع ليها شي مشكل ...تغداو و كلاو و ناضت فاتي غي لي جمعات كلشي و رجعو جلسو شي فوق المطارب و شي فوق الطابي على المخاد و الريش و النعومة و سليمان تيحبو فالارض و يلعب مع حنين ...تبسمات مريام وهي تتشوف فحنين و سليمان و ترجع تشوف فتليفونها و مرة مرة تتشارك فاتي و سلوى الكلام حتى تنهدات من القلب و ردو ليها البال ...
_ ههههه توحشتي حبيب القلب من دابا ..
مريام ( تتغمزهم يسكتو ) شش حنين تتسمع ..
فاتي ( دارت فخض فوق فخص تتضحك ) مالها ماتسمع ؟ خليها تسمع و تعلم حتى هي مالها صغيرة ..
مريام ( قلبات وجهها تتضحك ) زعما نتي بوحدك والله ، خليها مسيكنة بريئة يجي باباها يقول رديت ليه البنت سافلة...
سلوى ( تتشوف فحنين باعجاب ) ماتتشبهش ليه باينة تتشبه لماماها...
مريام ( بقات ساكتة و قالت بعد فترة قصيرة ) لله يرحمها ...
صونا تليفون حنين و ماردات ليه البال حتى هزاتو و قشعات اسم عبد الهادي دق قلبها بالزربة و عيطات ليها...
_ حنين باباك تيصوني اجي...
ناضت كطير لعندها خدات تليفونها و فتحات لابيل تتضحك ..
_ بابا ...مم انا مع م..م مريام ..والو كنلعب مع سليمان ...( دارت شافت فمريام عرفو راه تيسول عليها ) فيها الدوخة ...وخا ...مع السلامة ..
قطعات معاه فرحانة و مشات تكمل لعب ديالها مع سليمان و سلوى و فاتي تيشوفو كيفاش عيط لحنين و ماعيطش لمريام وخا قالت ليه كانت فيها الدوخة...ماكملاتش حتى الفكرة فراسهم و صونا ليها فتليفونها ناضت من قدامهم و دخلات للبيت و ردات عليه بصوت هادي ..
_ الو ...
عبد الهادي : السلام عليكم ..
مريام : و عليكم السلام...كيف وصلتي مزيان ؟
عبد الهادي : الحمد الله .. واش مريضة امريم ؟
مريام : لا لا تتوقع ليا هكا فهاد الفترة ...
عبد الهادي : بالدوخة ؟
مريام ( تبسمات ) وي و بالدوخة حتى هي ..
عبد الهادي ( بدفىء ) و عادي هاد الدوخة و هاد الحالة كاملة ؟
مريام : هههه عادي ...
عبد الهادي : ..كاينة بوحدك ؟
مريام : لا معايا ختي سلوى و خالتي ...
حنين ردات البال لغياب مريام و ناضت تتقلب عليها حتى شافتها خارجة بعد فترة من البيت وهي مبسمة و عينيها تيلمعو ...
_ هانا تتقلبي عليا...
رجعات جلسات معاهم و التليفون فيديها حرمو عليها الهدرة معاه فاش عرفهم معاها ..قلبوها ضحك و نشاط و حنين شادة تليفونها تتصور فسليمان و تصرد ليه و تصور راسها و تصيفط ليه و تصور فمريام و تصيفط ليه وهي كاع مارادة ليها البال تتصور كل تصويرة و كي جاتها مع تتضحك مع حانية راسها لتليفونها تتبسم و مرة تترد شعرها ورى ودنيها و رجليها مربعين و سيقانها و فخاضها معربين ...شافتها مريام تتصور ووقالت ليها بتنبيه ..
_ تتصوري لباباك ؟
حنين : نعم شافهم دابا كلهم ..
مريام : صوري احبيبة غي سلوى و فاتي ماتصوريهمش صافي ؟
حنين : وخا صافي...
مريام : انشوف شنو صورتي ...( شافت تصاورها و ضحكات ) على تصاور درتي ليا ماحشوماش عليك ...
حنين ( تتفرنس ) زوينين ..
مريام : ههههه تيحمقو كنتي تعلميني بعدا غي نقادو الحالة ...
فاتي : ههههه جيتي زوينة مالكي عجبوني عفويين خلي السيد يتمنظر فرزقو ..
مريام : لالا ردود افعالو تتصدم بعض المرات يقدر مايعجبوش الحال و يقوليا كون صيفطاتهم لشي حد اخر من غيري ...ماعرفت نتوقع منو هادشي غي شعري بان شوية من الفولار ماعجبوش الحال ...
فاتي : طحتي فيه مغيار حتى هو ...
سلوى ( عوحات فمها ) عقلية جلال حتى هو ! يشوفني حاطة شي صورة مقزبة فيها فتليفوني كيمسحها ليا و يشبعني هدرة ...حقا ماحقا التليفون تيطيح و يتسرق و يطيح فيد سليمان يدير ليك شي شوهة فالفايسبوك...
مريام ( ضحكات) : شفت حتى عيت و بحال غيرة جلال مزال ماشفت ...مي تيبغيك احبيبة ديالي ماعليش صبري معاه راه عندو الحق...
دوزو اليل قصارين تيهدرو حتى تكمشو ينعسو ...فاتي و سلوى فبيت و حنين و مريام فبيت ..! تخشاو ففراشهم و حنين طاحت دودة فالنعاس عيااات اليوم و تحركات على كيف مولفة ديما...نعسات ماحساتش براسها و جاتها الراحة فديك النعسة بعد تعب ..اما مريام النعاس طار عليها تتفكر ، صحبتها و لي هي الطبيبة ديالهل شادة دابا ماتقدرش تصيفط ليها لقاات راسهل وسط قوقل تتقلب كاتبة فالغوشيغش...
_ سبب نزول قطرات الدم قبل وقت الدورة الشهرية ...
من موقع لموقع و اغلبية نفس الهدرة دم انغراس البويضة او التعشيش فاش تيوقع الحمل ، دق قلبها بالزربة وهي تتقرا على هاد الانغراس لدرجة جلسات جالسة تتقرا و تعاود باغية تفرح قلبها و فنفس الوقت تتمنع ديك الفرحة لدرجة عينيها دمعو و خرجاات بحالها من قوقل مازادش قرات ولا غطسات فداك الحلم تتكدب كلشي بلا ماتفرح راسها و مايصدق والو وتعاود تعيش نفس الاحباط .كانت محيدة من بالها هاد الاحتمال حيت حملات من قبل و ماوقعش ليها هكا ماشافت لا دم الانغراس لا والو اذا ماشي ضروري هاد الكلام يكون صحيح ...تكمشات طافية التليفون هاربة من دوك الافكار تسيطر عليها ماباغياش تعمر راسها بيهم ماباغياش تعاود تجرب الصدمة و الاحباط و البكا ثاني فاش يخرج التيست نيكاتيف ...وهي تتهرب و تفكر من هاد الموضوع كانو عينيها تيقطرو بالدموع و يديها محطوطة على كرشها تتحسس فيها و تبكي ... حتى الامل و خايفة تتأمل و تحطم ! دوزات ليلة البكا والنعاس طار عليها و فاقت معطلة هي و حنين و بزز منها دارت داك الفطور وكلشي راد ليها البال ماشي هي هاديك و غي ساكتة ماشي تتضحك و تبسم حتى من حنين ردات ليها البال....سولاتها فاتي بقلق ..
_ مريام حبيبتي واش عيانة ؟
مريام : عيانة شوية ..
سلوى ( بحنان ) دخلي ترتاحي ليك شوية حنا هنا دابا مع حنين ..
مريام : لا ماعليش قلتو خارجين لا ؟ ...
فاتي : الا كنتي قادرة احبيبة....
مريام ( تبسمات ) دونك نبدلو علينا نتحركو على بكري....حنونة لبسي عليك نخرجو ...
حنين : وخا...
ناضت من فوق الطبلة بادب و كياتة وغسلات يديها و فمها و عطرات راسها و خرجات من الحمام بسندالة بيضة ديالها و مشات كي البنات المقيدات تتختار شنو تلبس عليها ..حياة مريام و الخرجات ديالها ولات تتعجب حنين .. عالم مريام انثوي و زهري فيه كاع داكشي لي تتبغي البنات ثم البنات و الالوان و الحوايج و الخياطة و الرسم و الطبخ ..ولات تتحماق تدخل معاها للكوزينة و تمشي معاها للخدمة و تخرج معاها لبرا ولا دير معاها شوبينغ...تعلمات حاجات زوينين قد عمرها و فنفس الوقت ولاات تتميل لشي حاجات كبار من عمرها تتشوفهم عند مريام تتبغي بحالهم....! طلقات الطبيعة مع مريام وولفات عليها ، و حتى مريام تتشم فيها ريحة عبد الهادي لي حسات براسها توحشاتو الاتصال ماتيقنعش و القلوب مشتاقة تلاقى بعضها ، لقات حنين ونيسها و معاها تتنسى همومها لي تتخبيها علىى حبابها...ماعاوداتش فكرات فسيرة الحمل فاش تيبغي الشيطان يوسوس ليها تتضربها بخرجة ولا شي اكتيفيتي تنسى الفكرة ...حتى فاش وصل وقت العادة كي تتجيها ديما و ماجاتش علق بالها معاها ..كل نهار تيدوز عليها و ماجاتش تتحطو فحسابها و ترجع تنسي راسها مع حنين و روتينها حتى تشوف حل لهاد الدوامة لي دخلات ليها اما تزعم و تفرح ولا تحطم و تهرس من جديد...
اما أصيلة من نهار مشات حنين اتصلت بيها ثلاث مرات و اتصال واحد بمريام تتسول فيها و على احوالها.....اليوم باليل عولو بناات الادريسي يديرو صواغي بيجامة بين البنات فدار مريام ... خرجات مريام و حنين لسوبير ماركت يختارو اش بغات خاطرهم ...كانو بجوج لابسين جلالب فنفس اللون و حنين كي ديما سارقة العين كلسي تيبقى يشوف فيها و فاش تيشوفو راسهم عيقو تيبتسنو لمريام بحرج ...حطات مريام يديها على كتف حنين حاضية معاها و بالها معاها كل شوية حنين بقاي حدايا ماتحركيش من قدامي...حيت وخا تعمل معاها المزيان قد مادارت نهار تغلط غلط واحد غينساو خيرها و يردوها زوجة الاب لي عمرها تبعي بنت راجلها ...هاد العقلية ماتحيدش من البال و صعيب تبدل ، لالة حنين ولات لالة و مالي بديك الجلابة و النظاظر فوق شعرها و السناسل فعنقها وحدة فوق وحدة و ساعة بنوتية قد عمرها فيديها شراتها ليها مريام ...تتختار فالسقاطى و الشكلاط و لي عشقات خاطرها و تحط فالشبيكة ديالها صغيورة بحالها.... هزات مريام العين فيها و قالت...
_ هذا مازوينش تيدير الحبوب فالوجه بلاش منو...
حنين : هذا ؟
مؤيام : وي هذاك .. خودي هذا زوين ...
حنين ( راشقة ليها ) وخا ...
بقات هاك بلاك هز و حط حتى سالات ...ضحكات مريام و قالت..
_ صافي ساليتي ؟
حنين ( ضحكات تترمش ) صافي ...
صونا تليفوون حنين وهوما فلاكيس...كان عبد الهادي فتحات الخط بالزربة و شافت فمريام لي تتدوي مع البنت لي فلاكيس و رجعات شافت فالكاميرا تتستناه يبان حداها حتى بان وجهو جالس فالبيرو ماسمعاتوش شنو تيقول و عبسات ...
_ بابا ماسمعتش ......
سالات مريام و شافت فيها تتسولها...
_ شنو وقع...
جنين : بابا اتصل بيا و قطع ...
مريام ( قلبها دق ) دابا يعاود ...
عاود عبد الاتصال و فتحات حنين الخط تتبسم وهوما خارجين من باب السوبير ماركت ...
_ حنين كتسمعيني ..
حنين ( تتبسم فرحانة ) نعم كنسمعك ...
عبد الهادي : فين كنتو ...
بانت ليه مريام لابسة حجابها و جلابة و عينيها مغطيم بنظاظر د الشمس كحلين ... تبسمات للكاميرا و قالت ..
_ كنا فالسوبير ماركت ... و نتا ساليتي الاجتماع ؟
عبد الهادي ( شاف فيها بنظرة خاصة ) تقريبا ...وقت توصلو رسلي ليا رسالة...
مريام : وخا ...
حنين : بابا شحال باقي و ترجع...
تبسمات مريام حداها غادين للطموبيل تحط السخرة حتى داز واحد شاف فيها و غمزها بوقاحة و رمى الهدرة ...
_ نعاونك البلارة ...
قلبات منو وجهها حتى طاح الصاك د مريام حدى الطنوبيل هزاتو بالزربة تترمش و بالها مع عبد الهادي واش سمع ولا ماردش البال ...تمناتو مايكون سمع والو ، تتسمع غي حنين تتقول. ..الو بابا فين مشيتي ....الو ...( شافت فمريام معبسة ) قطع ثاني....
مريام ( مزنكة بالشمس ) دابا يعاود ...ركبي دابا نتحركو من هنا ..
ركبات حنين دايرة السمطة و مداها مريام لي تحركات من تما هارب ليها الخاطر ولات على سبة مرة تكون تتضحك و على حاجة بسيطة تتوقع ليها تتختافي ديك للضحكة و تبقى ساكتة ماتبسم معاك متعصب عليك الانزعاج عندها بالسكاات...شافت فتليفووها و بالها معاه يكون سمع ولا ماسمعش ؟ علاش قطع ؟ يكون تلاقا بشي واحد ! الف من جواب لسؤالها حطات ...غي وصلات للدار رسلات ليه كي قال ليها لكن مافتحش عرفاتو مشغول...بدات تتوجد لليلة من ماسكات و بيجامات والورد و جليسة و مخدات فالغوز و الناموسية و النفاخات و فاتي و بنت عمتها تيعاونوها ..جاو البنات ووتحمعو كل وحدة ووشنو جايبة كاملين لبسو بيجامات ها الحرير ها ااساتان و الورد وردي و ابيض منشور.. وطلقو الشعورات و السقاطة و الضحك و حنين جالسة جنب مريام و سلوى تتسمع ووساكتة لابسة بحالها بحال مريام....و مع البنات تيقولوو شي هدرة تتبقى تسمع و تسجل وخا تتعيى مريام تغمز فيهم يسكتو يحشمو...ساعة الحجر يحشم و فاتي و امثالها مايحشموش....تزنكات مريام بالضحك و حطات يديها على خدها تتعض فشفايفها و تغمز فاتي فاش تمادات ...
_ واش بغيتو تفضحوني مع عبد الهادي ( بهمس ) راه تتعاود ليه كلشي....
بنت عمها : هههه صافي ها حنا ساكتين الالة مراة سيدي ...حنين واحد عمك خليل شنو تيعاود ...
حنين ( ببراءة ) مكيعاود والو ..
بنت العم ( باستها تتضحك على جوابها ) الزين بالزين ...
حنين : شكرا...
فاتي : تعلمو غي الكياتة و الادب و الحلاوة منها ...
مريام : نتوما تخليو شي حد مؤدب معاكم ! تعلموها لي عمرها سمعاتو ...
فاتي : دابا تكبر و تفهم و تحتاج هاد الهدرة ...
سكاتهم واحد بنت عمها اخرى هازة ايفون تتصور ووتغمز فيهم يسكتو ...عرفوها ثاني دايرة سطوريات مع المتتبعات ديالها و ضروري من صورة ...
_ ليفي شكون بغات تصور معايا نحط البوسط.. صواغي بيجامة اونطغ فيي...ميمي تصوري معانا عفاكي عرفتي راه تيحماقو عليك و ديما تيسولوني عليك و تيقولو علاش ميريام ماتتبانش معاك ...
.
مريام : مرة اخرى ماشي دابا ...صوري لي بغيتي حيديني انا و حنين ماعنديش الجهد للصداع هاد الساعة...
مريام : مرة اخرى ماشي دابا ...صوري لي بغيتي حيديني انا و حنين ماعنديش الجهد للصداع هاد الساعة...
سلوى : تنا حيدوني مامعاكمش...
بنت العم : اوكاي ..
تصورو البقية حتى شبعو و القصارة بيناتهم مزال طويلة ..مريام وخا ضاحكة معاهم بالها باقي مع لي وقع فالصباح ..عيات تسنى منو اتصالو و مادواش معاها ولا مع حنين ...
______
دخلات صفاء للقصر ، لابسة عباية عراقية و شال غي رامياه على شعرها و صافي مرة ديرو مرة تحيدو ماشادة بو حجاب ...تلاقات مع رئيسة للخدم لي كحلات بالعمى فاش شافتها تتكره تساطح معاها ...
_ مسا الخير لالة صفاء...على سلامتك ..
ماجاوبتهاش حدها هزات راسها و زادت تتسمع الكلام فالصالون فين كانو مجموعين لالة اصيلة و جويرية و ختها جليلة .. رمات السلام وسلمات عليهم و جلسات حدى ختها رامية داك الشال مخلية شعرها المصبوغ يتسبسب مع كتافها...
_أصيلة : على سلامتك حبيبتي ...
صفاء : الله يسلمك ...فين حنين ماكايناش ؟
جويرية : حنين مع مريام هادي عشريام ...
صفاء ( ببرود ) مزيان...
جليلة ( باستغراب ) مابقيتيش على تواصل بمريام ؟
صفاء ( قلبها عامر ) هي لي مابقاتش ماشي انا ...
أصيلة هزات فيها عينيها بتتاقل اما جويرية عرفات صفاء غتكحلها على مريام بشي هدرة قرمات و سكتات تتسمع الحوار بينها و بين جليلة و متأكدة انو أصيلة رادة بالها معاهم بتركيز ...
جليلة : علاش ياك كنتو صحابات قبل ماتعرف على عبد الهادي ..وقع بيناتكم خلاف ؟
تبسمات صفاء بهدوء دايرة رجل على رجل و الغرور تينقط من ملامحها ...
_ كنت غالطة فيها....
هاد المرة نطقات أصيلة بملامح جدية ..
_ علاش شنو صرى بيناتكم ؟
صفاء ( بسخرية ) ماعمرك سولتي نفسك مرة من المرات علاش مريام تحجبات بهاد السرعة و تحولات هاد التحول كامل فستايلها ...
أصيلة ( هزات حاجبها ) المعنى من كلامك اصفاء ...
تدخلات جويرية تتلف الهدرة حيت تتعرف صفاء مزيان ...: يمكن بيناتهم شي خلاف غيتصلح مع الوقت ..
صفاء : لا بالعكس الالة جويرية مريام كتبقى مراة خويا الكبير ماشي صديقتي ، كانت اما دابا مابقاتش ماعندي غرض بصديقة كتعرفني وقت حاجتها كانت كتبغي عبد الهادي و دارت مني طريق ليه ...و نفس الطريقة كديرها مع حنين اماما ...
أصيلة ( دارت شبه ابتسامة باردة ) اذا كان مبررها هو الحب عندها عذرها....
جويرية ( ساكتة و تتشوف فصفاء لي باين فعينيها ماناوية خير )
صفاء ( خبات صدمتها من رد فعل مها ) الحب ماشي ديما كافي اماما ..
جويرية : من الاحسن نبدلو الموضوع ماكاين فائدة من هاد الكلام ، مريام دابا مراتو بالقانون و شرعا و مستقبلا ام ولادو لي هوما حفايدنا ان شاء الله ...هاد الكلام ماليه داعي ابنتي صفاء...
صفاء ( تحركات الغيرة فقلبها و هجمات على عقلها ) مريام اصلا ماكتولدش ...اشمن ولاد كتهدرو عليهم و كيهدر عليهم الحاج حتى هو ؟
شافت فيها أصيلة شوفة قاصحة و ناضت واقفة و سالفها الاسود مايل معاها...
_ غنطلع نرتاح حسيت بشوية العيا...( شافت فصفاء ) طلعي ترتاحي حتى نتي باين عليك التعب...
اليوم ماكنتش عولا نحط ولكن فاش شفت حماسكم لقصة و التعليقات ديالوكم حمستوني باش نحط
انا كنحط البارتيات واحد من مور واحد فاش تشوفوني حبست عرفو ماغاديش نحط او مدام حطيت 5ولا 8 البرتيات راه ميمكلياش نزيد نحط
😍