🍁قيد العراقي 🍁 (طور التنزيل )

part11

مارداتش عليها ، مافيها و ماعندهاش الكانة حاليا ، خرجات من الواتساب بلا ماترد على حتى ميساج ، و دخلات للفايس و بالضبط لداك القروب تتضرب طليلة عليه من فترة لفترة شافت اخر المنشورات وجلسات جالسة فوق الناموسية ، لابسة بيجامة د النعاس رطيطبة فالزهري و تقاشر بيضين قصار تيشعلو فرجليها شادة شعرها بالقلم و وجعها صافي من المكياج و من اي اثر طبيعي و صافي , تسندات على المخدة تتأمل فواحد الصورة فيها اسم محمد بالخط السنبلي ماعرفاتو سنبلي حتر شافت سميتو تحت الصورة ، هزات قلم الرصاص وورقة و صوبات جلستها بدات تتحاول تقلد الخط ، عندها يد فنانة و مبدعة ماكانتش متوقعة غتقرب من النجاح من اول محاولة ...حاولات و مسحات و عاودات ، كانت هالة من السكون مسيطرة عليها ، و طريق يديها بعيد على القفاطن و الجلالب و الحوايج تتمسح و تسوك على البقايا د المسيح من فوق الورقة حتى كطير القصة من فوق وجهها ، كتبات اسم محمد للمرة الرابعة حساتو شوية مقبول على المحاولات الاخرى صوراتو عندها عاد لوناتو بلابليكاسيون د التلوين باللون الاسود و مع ذلك ماحساتش بيه بداك الاصالة و العراقة كي شافت فالصورة ...حاولات تقلد خط النسخ و خط الثلث و خط اخر شافتو لقات سميتو خط عربي بنزرتي ...تما اكتشفت انه باش تعلم لهاد الخطوط خصها أسرار و طرق و ووسائل و الا لي جا يرسم ، ينعس و يفيق و يقول انا وليت خطاااط ...كانت تتشوف فالخطوط و طلع فالصور و كاع ماكانت رادة البال داخل كل صورة فيها اسم عبد الهادي مطبوعة صغيرة ، كانت مخشعة ماكايناش فالواقع تتعاند تتحاول و لكن ماتتجيش نفسها ناقصها حاجات هوما ماشي غي حاحة وحدة وخا يديها فنانة و عندها مع الرسم لكن لكل مجال عندو فنان ديالو ...و هاد المجال عجبها و جلب فضولها و اهتمامها و حرك عنادها ..!! صورات المحاولات لي دارت وتلقائيا صيفطاتهم لفائزة ، تتكتب و تمسح حيت الهدرة مع هاد النوع عندها البروتوكول ديالها و خصها تكتب غي بالفصحى ..دارت بالناقص و قررات تحيد شوية د الرسميات و سجلات ليها اوديو...
_ السلام عليكم مدام فائزة كي دايرة لباس ...رسلت بعض الصور شوفيهم و عطيني رأيك و قوليلي واش كاين أمل ولا لا ههه...

رسلاتو و حطاتو مكملة الرسم ديالها ، شي ساعة هكاك عاد ردات عليها فائزة حتى هي بالاوديو بصوتها الزوين...
_ و عليكم السلام مريام كيف الاحوال و الجو عندك فبليونش ، سمعت عليها لكن الفرصة نزورها مزال ماجات ...بالنسبة للصور انا ماشي مختصة ففن الخطوط ولكن تبارك الله كان عندي الحق فاش قلت ليك عندك يد فنانة و مبدعة...الصور ديالك انا رسلتهم لسي العراقي و العمراني و اي رأي توصلت بيه غنرسلو ليك....

وقفات مريام الاوديو على ديك السي العراقي و حطات التليفون بعد ماردات عليها بلا ماتبين انها تدهشات من انها صردات ليه التصاور...بقات تتشوف و تترمش و تفحص فالرسم ديالها ..لا مجال للمقارنة فين غيوصلو ديالها لديالو شغيقول عليها دابا ؟ فاقت بين ليلة و نهار بغات تولي حتى هي خطاطة غي اجي و ولي خطاطة بلا معلم ولا مؤطر هاد التكبر و الغرور كلو فيك امريام ؟ دلكات جبهتها بندم ،حطات داك الاوراق فجيه و هزات تليفونها تتلف و تلعب بالسنسلة فعنقها ، من بين منشور و منشور اخر لقات راسها ساهرة الليل و هي مزال غارقة بين المنشورات ...حتى قررات تنعس و حطات التليفون....