جات ماماه واحد الطويلة و رشيقة حتى هي حروفها زوينين و عنقها طويل تقول شي عارضة ازياء صوراتها مريام عاد نزلات الكاميرا ليديها تتضحك معاها اول مرة تشوفها حاوراتها بالانجليزية و اخيرا شي واحد تيفهم الانجليزية...
_ اليوم عندنا عرس أخت كمباي ( عطاتها واحد الثوب و المجوهرات ديالهم لي لابسين هوما ) هذا ثوب الاحتفال و مجوهرات المتزوجات عندنا ...
مريام ( شداتهم من عندها بلطافة) شكرااا ...اخت كمباي يعني بنتك لا ؟
المراة ( ضحكات ) لا بنت زوجي ...
مريام : مبروووك ...واش نتي الوحيدة لي تتعرفي تهدري بالانجليزية ؟ فين تعلمتيها...
المراة : تعلمتها من الزوج ديالي و من صديقتي الاوروبية فالتينيا ...
مريام : اخت كمباي الزوجة الاولى للعريس ؟
المراة ( تبسمات بفخر ) لا الزوجة الثانية ..زوجها البارح قتل الاسد لي هجم على البقرة و عطاوه العروس لي ختارها هو جائزة الحرب ...
مريام ( بصدمة ) جائزة الحرب ؟ واش البارح هجم اسد هنا فوفاش ...
المراة : لا مادخلش للتجمع لكن وصل لأبقارنا و مشاو الرجال حاربوه و لي قتلو كان العريس و كما العادة اختار زوجة ليه و فاز بيها....
مريام ( بغرابة و فضول ) عجييب ...البارح اختار و اليوم العرس ههههه ...
كل دقيقة تتدوزها هنا تتزيد تصدم و هي مزال ماتتفهم والو فلغتهم هادشي لي تتقدر و تصور من عقلها ... قربات للخيمة وفيديها داك الثوب لي ماتقدرش تلبسو بطريقتهم حيت محجبة ، يلاه غتدخل قشعات عبد الهادي و مالك تيصليو برا الخيمة ،مالك سالا و جمع الصلاية و بقى عبد الهادي و الدراري الصغار واقفين مخبيين تيطلو و يشوفو بدهشة و حتى بعض النسا خلاو شنو فيديهم و بقاو تيشووفو فهاد المنظر لي عمرهم شافوه ...شنو تيديرو ؟ واش نوع من الرقص ؟ واش طلب الحظ من الإله ؟ شوف تقاشرو شحال بيضين تيشعلو و شعرو كحل تيبري واش بالما ولا بالنقاوة ؟ شنو تيقول و شنو كيدير !!! عقلهم ماتصورش انو تيصليو و جزء من العبادة حيت عالمهم بوحدو و اغلبهم مامتبع حتى شي دين ...بعدات مريام بقات تتشوف فردات فعلهم و تفكر بعض المرات عبد الهادي عن قصد تيهدر معاهم شي كلمات باللغة العربية و خاصة السلام و ان شاء الله و شكرا و شي كلمات سهلين يبقاو فالراس و شحال من برهوش تما سمع ديك السلام منو و رجع تيقولها و يعاودها و يحيي صحابو بيها...
نظرتها ليه نهار على نهار تتبدل و الاعجاب لي حسات بيه اتجاهو نهار تعرفات عليه تيكبر ...قدام الناس راجل ثابت مرزن و بعقلو و حرش مايعرف يضحك ولا يمازح ..راجل صعيب المراة الرومانسية الحالمة تعايش معاه و هاد النظرة داروها فيه تاصيلتها كاملين من لالة لطيفة و جبد كاملين قالو السيد معقلو و مثقف و ثقيل و كاريزما لكن مريام ماتتصبرش لهاد النوع كما الحال دابا مع لالة نجمة وهي فرياضها كي الوزيرة...
_ اوى لالة مريام غبرات علينا و ماكاينشاي عليها خبار ...
لالة لطيفة : دوات معايا هادي ثلاث ايام قالت غيمشيو لشي بلاصة مافيهاش الريزو ...كان باين عليها فرحانة و عاجبها الحال مسكينة...
عمتها : مصاب الحبيبة تلقى راحتها معاه باغين ليها غي الراحة و تزيد تنور و تفتح و ماترجعش وردة ذابلة ثاني...الراجل شفتو و عرفتو باين رزين و حكيم و عندو نيشان نيشان الله يخليهم لبعضهم و يفرحها فهاد التزويجة بشي وليد و لا بنوتة ...
لالة لطيفة : امين اميين...مريام ديالي الحبيبة كون ماكان داك الولاد لي معشوقة فيهم ماتفكر تعاود تزوج مرة اخرى...غرضها غي فالولاد و على الله ربي يفرحها و مايتهرسش قلبها مرة اخرى...
لالة نجمة ( تتموت على النكير فاش تتشد فشي حد و تاخد عليه نظرة نهار الاول سير حتى تموت عاد تبدل رايها ) اوى على الله ماتندمش على هاد التزويجة لي دارت على قبل الولاد تصدق لا راجل يضحك الوجيه ويبرق العين ولا ولاد ينسيو همو..
لطيفة ( ضحكات ) الله يهديك الالة نجمة الله يهديك ...مالو ماحملتيهش ! راجل زين و مسرار الف وحدة تمناه انا فاش شفت بنتي مرتاحة رتاحيت ليه ...
نجمة ( عوجات فمها ) اش غدير هي بالزين و السر الا كان يصبح و يمسي معبس و لسانو حرش و مر ..يدير لسانو فوق لسانك يضربك المساس ...
ضحكو عليها بالدموع والو لي فراسها راه فراسها....مع مسكينة كانت مزوجة بواحد مايضحك مايتبسم ملامح كي الحجرة يابسة عاشت معاه المرار ....
النجوم مضوية و السما كحلة صافية تقول فالصيف ماشي في فصل الشتاء ...! يوم العرس كان ليه تقاليد اخرى و مختلفة احتفال و اغاني و شطيح و المجهورات و الحلي ...المراة ماتتشوفش راجلها داك النهار كلو ماشي غي العروسة حتى المزوجات...مريام غبروها من تحت عينيه ليلة كاملة و كل شوية تيمشيو عينيه للخيمة ديال العروسة الحوار مع الرجال و العين على الخيمة ...اما مريام فاش لقات شي وحدة تتفهم الانجليزية عاد رشقات ليها و نشطات مزيان ...كانت خيمة صغيرة لدرجة تيمشيو داخلها مقوسين ...النساء النص تيجهزو خيمة العرسان من الدقيقة لي تقرر فيها الزواج و النص مع العروسة تيلبسوها و يزينوها زعما بداك الهدرة ديالهم و الغناوي و المديح عندهم فشكل تيمدحو العروسة و الاب ديالها ماشي مها تقول الاب هو لي ولدها الراجل عندهم هو الكل فالكل.... كانو تيهدرو و ديك المراة تترجم لمريام لي عاد بداا تفهم و توعى و تتعرف على عقليهم العجيبة....جات وحدة عيطات لديك المراة قالت ليه شوفي بنتك تتعيط ليك و ستري وجهك عندو الزوج ديالك يشوفك قبل مايشوف العريس عروستو اليلة...دارت لي قالت ليها و هزات طراف الثوب غطات بيه نص وجهها و شافت فمريام تتضحك...
_ حكمات العادة مايشوفش الزوج وجه مراتو حتى يشوف العريس عروستو و حتى نتي ماتخرجيش من القاعدة ساعتها زوجك غينفر وجهك و ماتحلاش ليه فالنعاس....
مريام ( فتحات عينيها بغرابة مسايراها ) اه اوووكاي اووكاي ...
خرجات خلات مريام وسطهم تتصور الأجواء و تصور مع النساء لي تيهدرو معاها و هي غي تتبسم و تصور حيت مغتفهم والو...
نطقات وحدة : لبسي المجوهرات و ثوبك قبل ماتخرج العروس هذا هو الوقت...
ردات الاخرى : القمر مكتمل و مضوي اليوم شي وحدة غتحمل اليلة...
بقات وحدة تتشوف فمريام و نطقات : سمعت من رئيسنا غيزوج الضيف بوحدة من بناتنا اليلة و تكون زوجة ثانية ليه ...عرفتو شكون اختار ؟
فتحو عينيهم بصدمة للخبر و البنات العازبات كلهم شافو فاجمل وحدة فيهم قالو غتكون غي هي ! حيت الضيف عزيز على الرئيس و اغلبهم ماتيعرفوش فالزين حيت ماشايفينش النساء فالعالم فتحو عينيهم غي على بعضهم و جاب ليهم الله عندهم أحمل الفتايات و كاع الرجال بحالهم تيحاربو السبوعة و الاسود باش يزوجو ليه شي وحدة و بغاو يكرموه بزوجة من عندهم بحال زعما راه غيديرو معاه واحد الحاجة كبيييرة و عظيييمة يعطيواه زوجة وخا بلا مايكون محارب و قاتل شي اسد معاهم......سمعاات جميلة القبيلة هاد الهدرة و فرحات غتزوج براجل ابيض و تولد ولاد بيضييين مختلفين و مميزين على باقي ولاد القبيلة...مع الزوينة ديالهم تما و عندها قوام ممشوق و مؤخرة بارزة و صدر بارز و ماطويلاش بزاف بحالهم حيت الاب ديالها ولدها مع وحدة من قبيلة اخرى و دوز معاها حرب القبائل و الاصول ، كانت مبدلة عليهم و كارهة العيشة تما باغية غي طير و تلفت ليهم ، ...و فعلا كانت زوينة بزاااف و فاتنة و بلعاني ماتتبغيش تبرز جمالها حدا الرجال حيت غيطمع فيها شي محارب ويطلبها كجائزة وهي تموت و ماتزوج بيه من هنا...معروفة قبيحة و صعيبة ولكن فرصة بحال هادي ماتقدرش ضيعها...شغدير شغدير نقزات حدى مريام تتطلف معاها و ترحب بيها عاد جاها الترحيب...بقاات مريام غي تتشوف فيها مافاهمة والو فيها لكن جمالها عجبها و جاها فريد من نوعو حتى سنانها مستفين زوينين....هزات مريام تليفوونها و ضحكات معاها...
_ شحال زوينة ...غندير معاك صورة ؟ شوفي هنا ...
#يتبع