🍁قيد العراقي 🍁 (طور التنزيل )

part31

شاف فيها فاتي مبتسمة بفرحة ...
_ دابا سالينا جيتي تتحمقي ...

ابتسمت ليها مريام وخا تتخبي التوتر مفروش فعينيها ...
_ عويناتك احبيبتي ...

فاتي : عرفتي القفطان كي طلع تيحمق اصحبتي  السفيفة المكناسية هماوية الصراحة ...تيجي معاك هاد اللون الفخامة....

مريام ( تبسمات ) اختيار سلوى ذوقها ديما زوين ...

فاتي : سلوى تتعشق الاخضر الملكي فالبلدي  ....

سمعو صوت الزغاريت و الصلاة و على النبي عرفو راهم جاو ...تزاد حماس فاتي كثار ..
_ وقيلة وصلوو...

خرجات فاتي  من البيت  تتطل لابسة قفطانها هازاه من الجناب بصبيعات يديها , الدنيا تقلبات بالصلاة على النبي و الزغاريت و الهدايا داخلة فيد رجال لابسين سمرين و صحاح و غلاض  بالسلهام و البلدي كل واحد هاز الخير فيديه ...كمشات عينيه تتحاول تقشع العريس و مابانش ليها نطقات مراة العم تتشوف فالهدية و الدخلة الهماوية لي دخلو مابقى ليها ماتقول....
_و الصلاة على النبي ، ديك البنت عندو شحال زوينة و مأدبة ...

فاتي : علاش شفتيهم نتي ؟ ماشفتهمش فاش دخلو...

مراة العم : شفتهم ..جا هو و ماماه و جدو و عمامو وقيلة و ختو وحدة ديك لي سميتها جليلة...

فاتي ( هزات حاجب باستغراب  ) ماتقوليهاش ؟ صفاء ماجاتش ..

مراة العم : ماشفتهاش معاهم ...

فاتي : العجب ...

سمعو صوت لالة نجمة تينكر عليهم من وراهم ...
_ شنو كتقولو تما...افاطمة الزهرة فين مريام ماغاديش تهبط...

فاتي : مابغاتش لطيفة تهبط دابا حتى يجي الشيخ و تدخل مع الحاج ...

لالة نجمة ( تنفخات ) علاش شنو كتفهم لطيفة فهاد شي ؟ سمع شنو تنقولك و قول لمريام تهبط ...العدول جا و العريس جا و تاصيلتو جات شنو كتستناو ...

فاتي ( قلبات عينيها تتسوط بقلة صبر ) اوى ولدك و لطيفة تيقولو كلام و نتي تقولي كلام...ستناو حتى يجي الشيخ يعطرنا بكلامو و بنصايحو مايقدرش نبداو بلا بيه كل تزويجة تيكون حاضر معانا ماجاتش دابا مايكونش حشومة ( غمزات لزوجة العم تتدخل ) اولا اسكينة ؟ عندي الحق ولا لاء...

سكينة : ايه عندك الحق الحق ديالك حشومة الالة  حتى يجي الشيخ و يبداو ، مريام ماتبقاش جالسة مصمرة فوسطهم تحت السلهام وهي محجبة ، صبري الالة الحبيبة تدخل فاش يجي الشيخ يكتبو كتابهم عاد تجلس براحتها واخدة راحتها مع النساء ...مايكون حد غريب عليها ديك الساعة ...

نجمة ( بالنكير ) اوى و تركاب  الخواتم  ؟ هادشي فشكل ماعجبنيشاي ...

قلبات فاتي وجهها تتسوط ، بقات واحلة معاها سكينة حتى هبطات معاها التحت و دخلاتها للمجمع ...واحلة معاها ، غي شافتها لالة لطيفة هكاك قلبات وجهها منها تتدوي مع لالة أصيلة حيت عرفات الا جات العين فالعين غتزبلها السيدة خرفات و العقل تيهرب ليها ماديرش عقلها فيها....بقات لالة نجمة حاطة يد فوق يد بحال جالسة فوق المجمر...تبسمات أصيلة معاها و نطقات تتدوي مع لطيفة بالثقالة و ابتسامة رزينة....
_ لالة نجمة اسم على مسمى الله يخليها نجمة مضوية عليكم ...

لطيفة : امين ربي يخلي ليك ماعزيز عليك....

اصيلة : امين...كنت باغية ندوي معاك قبل و ماكانش فالمكتاب...

لطيفة ( تقابلات معاها محافظة على ابتسامتها ) و دابا جابها المكتاب مرحبا قولي تنسمعك...

أصيلة : كل ناس و عادتهم و تقاليدهم فالزواج سبحان الله ... يمكن حفل عقد القران جا بالزربة حيت مولفين بحفلة تركاب الخواتم ..

لطيفة : و الصراحة كاينة ، حيت عندنا التعارف بعدها تتيجي الخطبة و تركاب الخواتم عاد العقد و بعدها العرس...

أصيلة : مشاء الله هنا وقع اختلاف...عبد الهادي متدين ماعندوش فكرة تركاب الخواتم بلا عقد الزواج بيناتهم و كان ماكان ...

لطيفة : وي تفهمنا الموضوع و الحق ديالو ..

أصيلة ( هزات راسها  متمكنة من ادب الحوار و التواصل تتسمع ليها بانتباه حتى تتسالي عاد تتقول فكرتها بابتسامة راقية ) بارك الله فيكم...عندنا اختلاف كبير بين العادة لي غاديين بها و بين الاعراس لي حضرت هنا ،  عندنا العريس ماتيركبش الخاتم و المجوهرات لي خدى ليها قدام كلشي ، و خاصة اذا كان متدين وهي محجبة ما يدخلش وسط مجمع النسا بوحدو راجل غريب عليهم  وو يزين ليهم  مراتو قدامهم ماعندناش هاد العادة ...

لطيفة ( بدهشة ) سبحان الله ..

أصيلة : بعد  مايدوز  العقد كتكون الخلوة بيناتهم بعدها كيدير لي يحلى ليه ، و يلبس ليها  المجوهرات ديالها و كتخرج تجلس مع حبابها و تكمل فرحتها معاهم .....

لطيفة ( بغرابة ) اول مرة نسمع هاد الكلام فرصة زوينة نتعرفو على عادات غيرنا و نعيشوها علاش لا ..

أصيلة ( تبسمات ) من ذوقك الالة لطيفة...
شافت لطيفة الشيخ جا ، تبسمات مع أصيلة مستئذنة و خرجات طالعة عند مريام تلاقات مع جلال شافتو فرحات و عجبها الحال...
_ و نهار كبير هذا اولدي. .

سلم ليها راسها تيضحك : لالة لطيفة كي دايرة مع الصحيحة لباس...

لطيفة : الله يرضي عليك ...الحمد لله هاد الساعة و على السلامة ديالك المرضي ...

جلال : الله يسلمك ...

جا الحاج عيط ليه تيهدر معاه فرحان بيه و طلعات لطيفة عند مريام دخلات عليهم للبيت لقاتها واقفة تتقاد السلهام فوق راسها من ثوب ثقييل فالاخضر الملكي حتى هو و بتفاصيل ملكية مخزانية ...
_ مشاء الله على زينة البنات ...غطي شوية صدرك من هنا و هذا هكا صافي مزيان ...

فاتي : جا الشيخ ؟

لطيفة : عاد جا ..يلاه ابنتي سمي الله و قرا الدعاء و سورة الفلق و توكلي على الله ...ربي يكمل ليك بخير و يسعدك مع هاد السيد و يفرح قلبك و يعوضك على لي فات  .انا راضية عليك دنيا و اخيرة بالرضى دوالديك غتمشي و طريقك منقية من الشوك....

مريام ( دمعو عينيها بلا والو متوترة و مرتبكة و مزيرة ) امين اماما ...

لطيفة ( تبتات راسها بزز ) يلاه هبطي الناس تيستناو الله يرضي عليك....

مدات  مريام  يديها من بين السلهام و هزات  شوية من جلايل قفطان و  خرجات هابطة فالدروج و من وراها جوج نسا قدهم قداش لابسين النقري صوتهم مجهد و قوي تيزغرتو و يصليو على النبي وهي وسطهم هابطة فالدروج بأناقة قلبها بين صدرها تيضرب داكشي لي تتسمع فودنيها و لالة لطيفة و فاتي من وراها ...دخلات للصالة ناشرة فخامة ثوبها ، تيبان فيها غي شوية من وجهها تتشوف غي الرجلين و صوت باباها حدى ودنيها جلسات حداه و قلبها تيدوي بلاصتها ، تقول عمرها تزوجات ولا عاشت هاد الاجواء ، تتسمع صوت الشيخ و صوت  مالوف كان صوت الجد العراقي ، و العدول و صوتو هو مفروز  لوذنيها ...بداو بمحاضرة عريضة طويلة على الزواج  و النكاح وهي عقلها مرفوع ...حتى تعطات الكلمة للعدول كلام كثير ثقال شي شدااتو و شي ماقدر وذنيها يسمعو مع دقاات قلبها...حتى قال العدول ...
_ مهر السيد عبد الهادي العراقي للعروس مريام الادريسي 7 مليون سنتيم و مصحف  مكتوب على الرق بخط النسخ ، السطر الأول و الاخير كتب بماء الذهب مع التكحيل و مشكول بالفضة بخط يده ... قابلة بهاد الزواج  ؟

الحاج ودنيه تصمكو و دغيا حمار و تتزنك و عراق فاش تيتحمس ..، اما مريام بقات غي تترمش صابتها نفس دهشة الحاج ...كرر العدول كلامو
_ مريام الادريسي بنت موسى الادريسي قابلة الزواج من السيد عبد الهادي العراقي ابن عبد الغفور العراقي ....

خرج صوتها انثوي مرتجف  وسط خشونة اصوات الرجال ...
_ قابلة...

العدول :  بسم الله على بركة الله وقعي هنا و هنا و زيدي هنا....

شدات القلم منفذة شنو قال ، وقعات بعد ماوقع هو ...و اعلنهم زوج و زوجة تحت مباركات الكبار ...
_ مبارك لكما اللهم ارزقمها الخير و البركة و السعادة و انعم عليهما بالذرية الصالحة ...امييييين نقراو الفاتحة ..
هزو كفوفهم تيقراو الفاتحة ، و الدعاء ليهم و خاصة الشيخ لي خدى الكلمة و طاح عليهم بالدعاوات واحدة مورى الاخرى  بالخير و الفرح و المسرات و يرزقهم بالذرية الصالحة و  تيقولو امين جماعة ....!ودنيها سخنو عليها  تتشوف غي من التحت التحت وجهها ماتتبانش كاملة ، ناضو واقفين و الحاج تيسالم مع الجد العراقي تيباركو لبعضهم .. بقات تتدور فعينيها تتحس بيه حداها و ماهزات الراس ولا تحركات  ,  شاف فيها الحاج العراقي و رجع شاف فعبد الهادي برضى...
_ مبروك لكما و عليكما الله يكمل بالخير ويسر حياتكم الزوجية و ان شاء الله نطفة حسنة حلال و صالحة من رحمها ...

عبد الهادي :  اللهم أميين ...

مريام (  تزنكات من صراحة الكلام نطقات بصوت خافت ) امين....

تعلن ان الزواج تم و  هللو النساء بالمباركات و الزغاريت و الصلاة و السلام على النبي ...و خبر المهر  دار بوووم عند كلشي لي حاضرين  و خاصة فاش شافو المصحف و تحطات عليه العين سبحو الخالق و تدهشو من الجمالية ديالو  و هذا تيسول الاخر واش هو كتبو كلو بيديه ؟ شحال دا ليه ديال الوقت باش سالاه ؟!  و كي دار كتبو ؟

الرجال جلسو فقنت و النساء بقاو جالسين بلاصتهم  عازلين النساء عن الرجال و لي كانت لابسة شي لبسة رجعات بدلاتها دايرة عرض الازياء ..و مريام غي دخلات لبيتها ترد النفس شوية ، حيدات عليها السلهام مدهشرة و معاها لطيفة تتعاونها فرحانة كثار من الحاج...
_ الله يكمل عليكم بالخير...

مريام : امين اماما...مدي ليا معاك نشرب عفاك ...

لطيفة ( مداتو ليها تتبسم ) شربي و صاوبي حالتك ، نحيد ليك هاد السنسلة فعنقك ولا نخليها ؟ ولا خليها حسن يحيدها هو ...

مريام ( باستغراب ) ماما شنو تتقولي...

لطيفة ( ابتسامة ماكرة ) شنو تنقول ؟ ماباغياش تهدري معاه ؟ راه ماهدرتوش اولا و هادي هي الفرصة راه ماعيدخلش عندك يبرز معاك حدى النسا و يجلسو يصورو فيكم ... غتكوني معاه فالبيت الكبير بوحدكم تما  موجدين كلشي الكادويات لي جاب و ذهبك تبارك الله الخير و خاتم الزواج شكون غيركبو ليك من غيرو ؟

مريام ( بحال ضربها الضو  )  اول مرة نسمع هادي   ...

لطيفة : تنا اول مرة نسمعها  و لكن لالة أصيلة هكا قالت و عندها الحق ...

طلعات معاها السخانة تتشوي هادي ماكانتش ليها على البال، قلبها بلا والو كان غيسكت قبيلة عاد دابا كي غدير ؟ فوقاش غتحس براسها طبيعية وقت تجبد سيرتو ولا تشوفو ولا تسمع صوتو ...شنو هاد الحالة لي ولات تتجيها ، بحال شي قاصر زوجوها حشمانة ..هي ماشي قاصر مراة ناضجة و هادشي ماشي اول مرة ليها...لكن العين و حاسة بيها غدمع مع الخلعة لي شداتها فاش خرجات مع لطيفة كل ماتتقرب و الزغاريت فودنيها تيتسمعو بعيييد غي صوت قلبها لي صمكها... دخلوها فين الهدايا محطوطة بفخامة وهي واقفة  بسلهامها تتشوف سلوى وفاتي  تيصورو فداكشي نبهات لطيفة فاتي بصرامة...
_ ماتحطي والو فالغيزو سيوسيو ..

فاتي ( غوبشات ) اوى صافي حفلة بنت ختي و مانحط حتى لعبة هي لي ماتكونش...

سلوى : فردوس ديجا حطات دي بوسط اماما فالانستا تلقى كلشي عرف دابا مابقى مايتخبى ،

لطيفة ( ضربات حناكها ) اوى تمهل و تصبر مالها كطيير ... دابا يلاه نخرجو من بعد و نهدرو..

سلوى ( شافت فمريام) مالك حسك مقطوع ...

فاتي ( غمزات مريام ) خلي التليفون معاك ، وقعات اي حاجة بغيتي شكون يعتقك انا معاك...

ضحكات سلوى و لطيفة تتهز فراسها اما مريام بقناع هادي مزيف قالت ..
_ هههههه وخا صافي ...

لطيفة ( حيدات ليها السلهام و رمات عليها رداء العروس مغطية ليها بيه وجهها   ) خليه ماتحيديهش حتى يحيدو هو براسو ...

مريام : وخا....

خرجو من عندها وحدة مور وحدة ، بقاات هي بلاصتها  ماعارفة مادير التلفة ضرباتها و روناتها ...وقفات هازة طرف الستاير من السرجم تتطل على الخصة و الولاد الصغار تيلعبو معاها و لالة حادة تتجري عليهم عندهم يطيحو و حاضية عليهم يخليو الخصة و يمشيو عند العصافير للقفص تيضحكو و يلبعو ويجريو ، ماقدرات تسهى معاهم ولا تلف ...و دقات القلب  طغاااو و زهاو  فاش سمعات صوت خطوات على برا ... طيحات الستاير بالزربة و تعلقو عينيها بالباب
و الشبكة طايحة على وجهها مغطياها ...حنات رموشها للارض فاش دخل و شد الباب من وراه  و كل خطوة واثقة تيقربها منها تتزيد تفقد هي اتزانها و هدوئها...رمى السلام ببحة جميلة و كانت غترد ،  ذهنيا باغية ترد لكن لسانها عجز و رجليها بلا ماتحس خطاو خطوة اللور وهي تتشوفو تيقرب منها بثقة حتى وقف قدامها بيناتهم خطوة وحدة  و حجب عليها كلشي ومابقى تيبان ليها غي هو حداها تتشوف غي صدرو ..رمى عينيه ليديها كانت مزيرة على طراف القفطان ، تياخد وقتو فكل خطوة و فكل كلمة و فكل نظرة ... هز عليها الغطا راميه من عليها  و بان وجهها  لعينيه ..خيط الريح مع جبهتها و رموشها محنيين تيهتازو بارتباك، ملامحها كانت تتقطر جمال و حياء و انوثة ، هز يديه  و  لمس  ذقنها و الخطوة لي كانت فاصلاهم قطعها و ولى  صدرها قريب  يضرب السلام لصدرو تما ديك شوية من الثبات لي كان فيها تبخر ...سبقاات شفايفو نطقات بثقة و عينيها تيمشطو تفاصيل وجهها مشيط...
_ مشاء الله ...مبارك لنا و علينا ...

يديه لي تتسارا فذقنها تلفااتها و خلات عينيها يدمعو و ماعرفات كيفاش كونات حروف فعقلها و صرداتهم للسانها و خرح صوتها مرتجف اشد فتنة من رموشها...
_ مبرووك...

ظهرت ابتسامة دافية فعينيه ، و حط يديه بجوج على كتافها مقرب كثار  طابع قبلة على جبهتها ، و نطق بصوت فصييح بلا مايحرك شفايفو على جبهتها...
_ اللهم اجعلها لي كما أحب و اجعلني لها كما تحب و اجعلنا لك كما تحب و ترضى ...

شفايفو فوق جبهتها و يديه على كتافها  خلاو قلبها يرجف  ، الدموع لي كانو فعينيها محبوسين طلقات ليهم سراحهم  و غمضات عينيها على اثر كلامو ناطقة من القلب..
_ اميييين...

حط جبهتو على ديالها و يديه زهقو من كتافها على خصرها  و شفايفو رفضات تتحرك من على وجهها...باسها فعينيها اليمنية تيدق بابها يتحل ، و رفضت ..حاول مع عينيها اليسرية و رفضت ، عاد هبط بشفايفو التحت  و عينيه تحطو على شفايفها تما صدرها ولى تيطلع و ينزل قدام صدرو و حسات بركابيها فاشلين و غطيح و التوزان هرب بلا عقلها لي ترفع..ضرب نيفو مع نيفها الصغيير وغي حس بها غتحرك حط شفايفو على شفايفها كاتم شهقتها الخافتة  ، و يديها بالصدمة حطاتهم على  دراعو مزيرة عليه...ماعمرها كانت تتخايل تكون معاه فهاد الموقف و لا قدرات تصورها فعقلها صورتو فعقلها بعيدة على هاد اللحضات الحميمية....