فاتي : ههههههه اوى شنو ؟...
مريام : فاش تشوفيه و تلاقايه عاد تقدري تفهمي شنو تنقصد دابا وخا ندوي حتى يطلع النهار ماغاديش تفهمي...
فاتي : اهاه كملي...
عطاتها مريام الفيديو ديالو تشوفو فواحد الندوة ...
_ سمعيه ...
شدات فاتي التليفون تتسمع , اول ماظهر فعينيها هو الاعجاب بالحضور ديالو و صوتو و الهيبة لي عاطية منو ..غي تتشوف احترام الناس ليه تتحترمو حتى نتا بلا وعيك و تتعجب بهاد المكانة لي عندو ...وراتها مريام باقي الصور ديالو و السيرة الذاتية ديالو ...بقاات ساعة تتقرا بلا ملل و اعجاب بشخصيتو ...شافت فمريام و قالت...
_ السيد كاريزما اصحبتي ...مابايناش فيه قرييب يدير ربعين سنة ..
مريام ( بهدوء و رزانة ) عجبك ؟
فاتي ( ضحكات ) بيان سبيغ شكون مايعجبوش...
مريام : داك الاعجاب نفسو لي حاسة بيه نتي حاساه تنا ، دونك شي اخرى فبالك ماكايناش افاتي....
فاتي ( مسايراها ) وي فهمتك ...مهم كيعجبك وهو ماكيعطيش شي تلميحات ؟
عاودات ليها مريام نهار د الندوة و نهار عطاها الحبر و الايك لي دار ليها باختصار بلا ماتعمق معاها ماباغياش تسيح ورى مشاعرها و دقات قلبها وهي تتعاود عليه و ماباغياش تعتارف بلي الاعجاب لي حاساه فاتي ماشي هو نفسو الاعحاب ديالها ليه ، ماباغياش تحس براسها وصلات للنقطة لي بين الإعجاب و الحب...ماعندهاش القدرة ولا الجهد ترخي الحبل لدوك المشاعر ...و خاصة وهي مامتأكداش من التلميحات ديالو ، و ماباغياش تأكد ....بقات فاتي تتصنت باستمتاع عجبوها بحال تتسمع لشي قصة غريبة على قصص المصاحبة و عطيني نمرتك و بلوكاني و بلوكيتو ....تبسمات و قالت بحماس...
_ شهادشي تنسمع امريام ...هاد النوع تيفشلني انا بعدا ، نبصم عليها حتى تتعجبيه و مهتم بيك ، تنظن رمى ليك الكرة تيستناك ترديها تما يقدر يدير شي خطوة ، حيت على مافهمت و ماحسيت السيد ماشي من النوع لي تيدوي بزاف و مع من كان ، ولا يعطي الاهتمام ديالو بالسخاوة ...وماشي سهو منو تيدير معاك هادشي ، عارف راسو شنو كيقول و شنو كيدير ، مسخوط كيتيستيك غي بالمهل....
مريام ( تتهرب من مشاعرها ) شنو كيتيستي فيا ؟
فاتي : و راه خصو يعرف واش كاين منك تجاوب ولا لاء ؟ غادية معاه فالخط ولا لاء باش يقدر يعرف واش عندك شي حد فحياتك ولا نو...غي بيني و بينك ! تخايلي كون كنتي مصاحبة بصح وهو يجي يدير شي خطوة القدام ، راه داك النوع ماتيخطي خطوة حتى يكون عارف راسو فين تيزطم ماشي غي مدرم....احح هادشي شحال حلو عندكم ...
مريام ( بقات ساكتة تتشوف في صمت )
فاتي ( بحنان ) مريام حبيبتي حاسة بيك مترددة و خايفة و بلا ماتنكري الموضوع يقدر يكون فات الإعجاب ، عطي فرصة لراسك اصحبتي ...
مريام ( بهدوء ) شمن فرصة غنعطي افاتي ، تتهدري و نتي متأكدة على واحد ماعمرك عرفتيه ولا دويتي معاه...هادشي ماتيمشيش بالاحساس ديالك حاسة و ماحاساش و كنظن وكنشك ...حاليا ماباغياش ندخل هادشي لراسي ..يلاه تصبحي على خير جاني النعاس....
فاتي جراتها من يديها تتضحك : و اجي فين غادية غي قولي ليا واش فاش تتجي عينيك فعينيه تتضحكي ليه ؟
مريام ( تتشوف فيها مسايراها ) لاااا ....سي بون ؟ شي كيستيون ؟
فاتي ( بحماس ) و علاش ؟ اويلي سقي السيد بشي تبسيمة من عندك ، راه الا عولتي عليه والله ماتشوفيها من عندو هاد النوع فشكل ...و لكن الا سبقتي نتي يقدر اصحبتي ...جاوبي السيد على التلميحات ديالو غي بتبسيمة باركة ...و شوفي شنو غيدير معاك من بعد..كلشي باين امريام غي نتي تتحشمي منو ولا ماباغياش تفهمي ولا ماعرفت شنو قصتك بزاف على هاد الحشمة منو ....مية الف تبسيمة كتعطيها فالنهار للرجال و للنسا و جيتي حتى لعندو و خبيتي ديك الضحيكة الزوينة ديالك ....
مريام ( تبسمات ببرود ) هكا ولا هكا ...هكا حسن ياك نبين سناني ولا لاء....فاتي بلا عياقة اصاحبتي راه كبرنا على هادشي ...بون نوي مابيل انا غادي ننعس ....
جرات عليها الغطا عاطياها بالظهر مخلية فاتي وراها فايقة تتنكر شوية و ترجع تدوي عليه شوية حتى طفات الضو و تكات وراها و مزال كتتدوي عليه...
_ و سمية عندو ..عبد الهادي العراقي ...
خشات مريام راسها تحت المخدة تتقلب على النعاس و فاتي بلعاني تتعصبها شادة معاها الضد حتى دوخها النعاس و نعسات و تهنات مريام فنعاسها ...
فالصباح بقات عليها حدى الدريسينغ حاضياها شنو تتلبس و كل شوية تجبدو ليها راشقة ليها و ضاحكة و تتمنى من قلبها مريام تجاوز الماضي و تشوف حياتها ...خدمات مريام مود الهدوء و التجاهل و خلاتها تتهدر و تعبر حتى عيات و مشات تفطر..عاد لحقات عليها مريام بعد ما لبسات غوب نواغ طويلة و مفتوحة حتى للركاب مع بوط ديال الكوير كيبري حتى هو للركاب ، لبسات شال فلون الشكلاط بحال لون سمطة الكسوة ديال الكوير من لاماغك معروفة ...خرجات تتشد الساعة فمصعم يديها مزروبة...
_ غنوصلك لدارك عاد نمشي ...
فاتي ( شافت فلباسها برضى ) راكي معطلة بلا مانزيد نعطلك...
مريام : تعطلت وي ، مي ماعليش اول مرة مافيها باس ...
ركبات معاها فاتي و قلعات طايرة وصلاتها لدارها وودعاتها...
باي باي حبيبتي بوسي ليا خالتي نعيمة...
فاتي: ' باي ماشيغي مبلغ....
غي حطات فاتي ، تحركات طايرة لفاس ، كانت معطلة بساعة على الساعة لي تافقو عليها., ابتسمت مع السيكيريتي بلطافة كي مولفة و كملات طريقها بهدوء و اتزان للطابق فين كاينة القاعة و يلاه خطات اخر خطوة ...سمعات صوت العمراني مع مدام فائزة و صالحة ، سبقات نطقات باتزان ...
_ السلام عليكم ...
فائزة : و عليكم السلام مريام اهلا و سهلا ....
مريام ( شافت فالعمراني ) بارك الله فيك مدام فائزة، سي العمراني علمتك انني غنتعطل وماغاديش نوصل فالوقت مي كنظن جيت معطلة واش سالات الحصة ديال اليوم ؟
العمراني ( بوقار ) لا لا مزال مابديناش الطلبة في المكتبة ...جيتي فالوقت المناسب...التحقي بالزملاء ديالك مع مدام فائزة...
فائزة ( بابتسامة ) سي العراقي اقترح يعزلك نتي و سلمى و مدام حكمة بقاعة خاصة نظرا للمشكل لي تتواجهوه في تذوق الحرف ...
مريام ( شافت فالعمراني و رجعات شافت فيها تتضحك ) صافي سي العمراني فقد فيا الامل...
العمراني ( ابتسم ) التعليمات جاية من الفوق ماعندي ليكم جهد ...
ضحكات فائزة ، اما مريام حدها ابتسمت و سكتات ، تابعة فائزة للقاعة الاخرى ، كانت قاعة فالطابق السفلي منها للجردة ، غي دخلات لاحظات الفرق بين القاعة هادي و الاخرى.كانت بحال شي قاعة قدييييمة في زمن السلاطين .. الكتب مفرقين فكل جهة ماشي اي كتب ..كتب قدام فلون مايل للياجوري ..الصور و الطابلوات معلقين فالحيط مغطيين على لونو الابيض ، بقى غي داك لون الخشب و صور الصحراء و الخيام و الغزال و الناقة ...و صور الحروف منتشرة بطريقة عريقة و فنية فوق الحيوط و بلا الجلسة لي دايرين ماكانوش كراسا عاليين ، منك للارض طاولات قصار و بونجات مغطيين بثوب حريري على من تجلس صافي...! بقات تتشوف فالقاعة وريحتها حسات براسها فزمن غير هاد الزمن و الحروف مختلفة مكتوبة بخطوط مختلفة ...نطقات فائزة مبتسمة...
_ على الله ينفع معاك هاد الحل ،و الا سي العراقي غيصيفطك للصحراء هههههه
مريام ( تبسمات ) نتمنى ينفع ..
البنات تفاعلوا حتا انا باش نتحمس انحط
اشنو تتوقعو رايكم فالقصة