#سبيل_الغيب
"الحلقه الثالثه وعَشرون "
ما صبرت الا إنشرلكم لن أحبكم وكلامكم اليه وحبكم لسردي جداً أسعدني عساني ما أنحرم منكم أحبكم♡
نهى
ـ الدڪتوره عصبيه ومزعوجه وتحجي بغضب وهي تكول .
الدڪتوره ـ أنتِ شُنــــوْ من إم وبنتج عباره عن جنازه ترى مو غبيه وما تعبر عليه هيج سوالف ولاتحاولين تقنعيني بكم حجايه ، بنتج تحت تعذيب نفسي وجسدي يا أمي حرف ما بيها تنطق وعيونها تصب دموع وتتوسل بيه تطلب الموت ، وفوك هذا كله الطفله مخنتگه وحالتها كلش تعبانه يا تعيش يا تموت أحجولي سهى وين جانت .
جنان ـ دكتوره مشاڪل عائليه مرينا بيها ما ناقصين فدوة رحتلج .
ـ لا خاله أعذريني سهى راح أقدم بيها تقرير وانتوا تتحاسبون على كل إذى سببتوا الها حرام والله حرام
نهى ـ لا دكتوره فدوة تقرير شُنــــوْ ، دفعتني وگالت
ـ أبتعدي .
نهى ـ مشت يمه شنسوي هسه
جنان ـ راح ننفضح فوك فضاحتنا ومصيبتنا .
ـ ابقي إهنا هسه ارجعلج ، رحت وراها ردت أقابلها رفضت سالت الممرضات كالوا هايہ ما تتفاهم عرفت اسمها دكتوره هيام ، اروح اله هو يحلها لازم يعرفها
سألت عنه دلوني عـلـىٰ غرفته تفاجئ بيه أريد أحجي وياك بموضوع مهم ما عندي غيرك .
ضرغام ـ ما عندي كلام وياج .
نهى ـ اكو دكتوره إسمها هيام شافت وضع سهى بالعمليات وكامت تحجي وتريد تقدم تقرير وما تسكت وما نريد اطش السالفه ومحد يعرف بالأخص أخواني ، لهذا حلها بطريقتك وطلعنا منها .
ضرغام ـ ماشي ، طلعوا من المُستشفى والباقي عليه
نهى ـ مشڪور ، طلعت من يمه لكيت مطلعين سهى بالردهه وأمي يمها وهي تلوب من الوجع ها شلونج
جنان ـ تلوب عدها وجع والدكتوره أجت هم كامت تحجي .
ـ حليتها ضرغام راح يتكفل بيها بس لازم نطلع من المُستشفى وبسرعه والطفله شلون وينها .
جنان ـ ما اظن تعيش دخلوها خدج ، اظن بسبب المخدر اللي أنطاه الها المغضوب الله يكصف عمره
ـ أي أكيد اله تأثير مو زين طلعت عايشه نحجي ودخلت الممرضه .
الممرضه ـ الدڪتور ضرغام يبلغكم خل يخلص الدوام واطلعوا .
نهى ـ ماشي ، راحت باوعت لأمي شلون هسه الطفله منو يبقى يمها .
جنان - أني ما ابقى ولا أنتِ أخوانج ما يقبلون
سهى ـ لعد شلون يمه .
ـ شمدريني شلون
نهى ـ هسه ارجع ، عفتهن ورحت اله لكيته ما موجود ضليت يم باب الغرفه وأجه ضرغام اريد احجي وياك .
ضرغام ـ شعندج أنوب .
نهى ـ بنتك بالخدج وحالتها تعبانه لو تعيش لو تموت هي وحظها واقل شيء شهر يلة يطلعونها لن ولاده مبكره وهم السبب الرئيسي أنت أعرف وافهم بي
بعدين يوصلك التقرير ، وأحنه ما عدنا احد يبقى يمها .
ـ شبيها .
ـ أكيد بسبب أبرة التخدير فهمك كفايه .
ـ ماشي .
ـ دير بالك عليها ، ما رد عليه نزل رأسه ومشيت من يمه ، وصلت الهن وعيون سهى تحاجيني باوعتلي وهمست
سهى ـ شفتي .
ـ هزيت رأسي أي شفته ، أمي طلعت برا ولزمت ايدي .
ـ شگالج شحجيتوا شلونه .
ـ طلبت منه علمود الطفله تضل بالخدج هو أبوها ويدير باله عليها
ـ سوده بوجهي .
ـ عبرتها بصدرها واجتي امي ودخلت علينا الممرضه هاا .
الممرضه ـ تكدرون تطلعون .
نهى ـ سنتدتها بالكوه موجوعه فد مره وأمي وياي وطلعنا من المُستشفى وفلتنا بريشنا ما ناقصين فضيحه كافي البينا انوب تقارير وروح وتعال شيخلصنا .
" طلعنا للبيت ولكينه أبويه موجود شافها واجه متلهف لشوفتها حضنها وكام يبجي .
نجم الدين ـ أسف بابا .
جنان ـ هسه كمت تتأسف وين جان عقلك من زوجتها وتالي جابها الك جنازه حسبي الله عليك أنت وياه وصديقك الأكشر ساعة السوده عرفانهم بيها
نهى ـ أخذتها ودخلتها الغرفه أرتاحي .
سهى ـ يولي مشتاقتله .
ـ شسويلج هسه ، سگتي يمعوده حيري بمصيبتج وكت شوك .
ـ شلون أكمل حياتي من دونه
ـ تكملينها غصباً عنج شتسوين يعني هايہ هي بعد .
سگتت وما ردت .
" أيام صعبه حيل وسهى بالها يم بنتها وأني وياها عمليتها التهبت وأعقم الها دايرتها لما صارت زينه وسحبنا الخيط ورجعنا البيت .
سهى ـ نهى روحي شوفي بنتي فدوه رحتلج بالي يمها .
نهى ـ ما أڪدر أمي ما تقبل مو عـلـىٰ كيفي هسه ارتاحي عود إتصل عليه واسأل عنها .
ـ تحجين وياه .
ـ اي غير اسأل على بنتج شبيـــچ سهى .
ـ لأ يولي ما بيه شيء بس عادي من تتصلين تفتحين سماعه أسمع صوته أمانه .
ـ ماشي ، يلة ارتاحي خل أقفل الباب وأتصل عليه .
قفلت الباب وطلعت رقمه وأتصلت رن واجاني صوته
ضرغام ـ هاا .
نهى ـ شلونك .
ـ أختصري .
ـ أحم خابرتك اسأل عـلـىٰ الطفله شلونها شكالوا عـلـىٰ وضعها .
ـ زينه .
ـ الحمدللة يعني تعيش .
ـ أي
ـ ماشي شُڪراً ، قطع الأتصال ، سمعتي صوته أرتاحيتي ، ما ردت عليه وضعها صعب بعيده عن أطفالها ورجلها الله يعينج يا خيتي ، شطالع بيدي عليج غير ادعيلج الله يصبرج ويبرد نار قلبج .
" مرت الايام بالگوه والف ويلاه ندفع بالأيام دفع وأتصل ضرغام وفزت متلهفه عّلى صوته جاوبته
هاا عيني .
ضرغام ـ تعالي أخذي الطفله لـ أمها . !!
نهى ـ ماشي يعني مسموح تطلع هسه ، وضعها زين
ـ أي وضعها زين ، شوكت تجين .
ـ هسه اخذ تكسي وأجي .
ـ ماشي .
نهى ـ أنتهى الاتصال وهو دمعتها على خدها هسه تعمين ولج .
سهى ـ گالج تعالي اخذي الطفله لـ أمها يعني ما يحرمني من بنتي .
ـ لأ هي طفله شُنــــوْ ذنبها ، أروح أجيبها الج وارجع
ـ نيالج راح تشوفينه وتحجين وياه .
ـ لا والله نياله هو عـلـىٰ حبج ، شبعتي بصط ودك وأهانات وغلط وفشار وبعده حبه مثل ماهو .
ـ أي والله .
نهى ـ يلة ديري بالج عـلـى نفسج طلعت من يمها وبلغت أمي ما گالت شيء هزت رأسها وطلعت رحت المُستشفى وأخذتها جان موجود ما حجه شيء مشه لشغله ورجعت وصلت البيت أنطيتها بنتها أخذتها وكامت تبجي تبوس بيها ، شُنــــوْ تسمينها .
ـ خطر عـلـىٰ بالي أزل ولو جنا ناوين نسميها حليمه
ـ أزل حلو بلكي تنزال عنج هالمصايب وترتاحين وصار إسمها ازل ، طلعت من يمها وحالنا حال وأمي بس صافنه وعمار يوميه يتعنتر علينا أطلگها وانعل والديه وما يدري بالضيم ، بالگوه مرت هالأيام .
: جان يوم جمعه وكاعده يمها وتنوم بيها وتباوع لوجهه وتبجي وترجع تبوسها وتحضنها احس تكول أنتِ من ريحة أبوج جريت حسره وطلعت من يمها وجرتني أمي الغرفه وگالت .
جنان ـ أخذي الطفله وخليها بالسله ولفيها زين وخليها يم باب بيتهم ودگي الباب ولا تروحيــــن الا تشوفينه يطلع وأذا مو هو غيره ، المهم الطفله تعيش يمهم !
ـ وإذا عرف أحنه مخلينها .
ـ خل يعرف ، المهم الطفله تعيش بيتهم ، أحنه مو مال تربيه !!
ـ وسهى شلون بقيها فدوة رحتلج حتى هو بنفسه گال تعالي اخذيها لـ أمها يعني ما يريد يحرمها من بنتها
ـ طبها مرض ، يريد نربي اله لن يا فهيمه ما عنده احد يربيها اكيد أمهات كراعين كالن اله خليها يم أمها وتكبر ويجي يأخذها ، فـہ احسن شيء اولها أحسن من تاليها تحرگيي جيبيها وتعالي .
نهى ـ دخلت الها تباوع الها وتحجي وياها وتبجي
سهى انطيني الطفله !
ـ ليش خليها بحضني نايمه .
ـ أمي تكول وديها لـ إبوها متقبل نبقيها اهنا .
ـ شتحجين أنتِ ، يمه بنتي ما أنطيها گافـــــي أنحرمت من ليث أنوب بنيتي لا فدوة ما ناقصه قهر گافي عليه نار گلبي .
ـ حضنتۿها تمسكت بيها بقوه حاولت وياها متقبل شلون اللبوه ما تريد أحد يتقرب لـ أطفالها ، ضربت رأسي بالحايط شلون تعيش والله راح تموت شلون أخذ بنتها من حضنها .
ـ نهى فدوة رحتلج لاتأخذينها حبابه أقنعي أمي
والله أموت والله .
ـ دخلت أمي جرتها من حضنها بالقوه وضربتها عـلـىٰ رأسها وهي تتوسل ونهضت ادفع بأمي
- يمه فدوة خلي بنتي بحضني رحتلج فدوة لا تأخذينها من حضني يمه خليها يمي گافي عليه بعدي عن وليدي والله ما أتحمل فراكهم يمه رجعيلي بنتي لحضني يمه يمه ، يمه اشم بيها ريحة ليث يمه هي مصبرتني على مصيبتي خلوها بحضني رجعوهاا اليه
نهى ـ وكعت بالكاع تصرخ حضنتۿها وأتوسل بيها خل تروح أحسن ما تبقى يمج وتذكرج بيهم .
ـ أني ما اريد أنسى ولج سحبتوا روحي مني رجعولي بنتي يمه جيبيها فدوة
ـ نهضت بالكوه تمشي وأمي خلتها بالسلة مال المواعين بلاستك وغطتها ، شفت قلم جاف فوك الثلاجه وكتبت إسمها على إيدها أزل ضرغام قيس لبست عبايه أمي جريتها من الباب واخذتها من أمي وهي ضلت تصرخ ورانا وتتوسل بإمي .
ـ نهى رجعيها فدوة رحتلج رجعيها لحضني .
نهى ـ صدى صوتها بإذني ، أخذت تكسي وتوجهت لبيتهم ، تمشي بينا السياره وعيني عـلـىٰ الطفله
وصلت بيتهم وباوعت اله وجريت حسرات .
ونزلت وهي بحضني خليتها يم الباب ودزيتله رساله بنتك يم باب بيتكم تعال أخذها ، شوي وشافها دگيت الجرس ومشيت لابو التكسي صعدت عمي لاتشغل انتظر شوي .
" كامت تصرخ وأنفتح الباب طلع هو وراه ليث يمشي باوع لسله ودنك شالها وليث يباو؏ الها شغل عمي ، مشت السياره وهو وجهاله دخل البيت واني رجعت وبگلبي نار .
" وصلت البيت لكيت علاء موجود شافني وتقرب عليه وشكله ما يبشر بالخير .
علاء ـ منو سمح الكم تأخذون الطفله اله شلون تحرمونها من بنتها بابا شبي عقلكم .
نهى ـ أحجي ويه أمي اني مالي دخل ، مشيت وصاح وراي .
ـ لأ الج دخل وتعرفين شُنــــوْ صــاࢪ بينهم عـلـىٰ شنو تعاركوا وهيج ضاربها نهى أحجيلي خل افهم لاتخبلوني الزلمه جان يموت على التراب التمشي عليه هسه ما عاد يطيق ذكر أسمها شصار بس كوليلي
ـ مشاڪل عائليه بين الرجال ومرته إحنه شگوو هايہ هي كل أثنين ما توفقوا بحياتهم وكلمن يمشي بدربه وفلت راحت يراد الها روحه للقاضي خلاص فضونا عاد .
- خلاص ونفضها شُنــــوْ نمشي على كيفجن وقرارتجن ياهي رجلها يضربها صطرتين هايہ هي بعد تكعد بيت اهلها لعد الكل تعوف زلمها وتكابل اهلها وبعدين أنتِ شگوو زعلانه ويه أختج ورجلج نخابره مغلق ترة خبلتنا ، احجن شمسويات ويه الناس
بصياح ـ ما مسوين شيء بس العائله بإكملها ما متقبلين وجودنا وما يردونا ودائماً مشاڪل واني تعبت عايشه ويه رجال لا يحل ولا يربط وكلمته بيد أهله وما يريد اطفال مني يعني مالي قيمه بحياته حالي من حال بنات الليل يتونس بيه وبس وصلت لت اشرحها الك بعد .
ـّ أنجبي أنجبي ، الله ياخذنجن الصوج مو من منجن الصوج من عدنا من ابويه وأمي خلوجن عـلـىٰ حل شعرجن وتزوجن بكيفجن وَ؏ قرارتجن بنات اخر وكت ، اخابر رجلج وأحلها من عرجها وتنجبين وتكعدين لما نفضها .
ـ لأ تخابره ولا يخابرك السالفه وما بيها أحمد باك فلوس اهله وانهزم واني ما اكدر ابقى ويه حرامي أهله أنباكو باجر يروح الهم شيء وتوكع برأسي وأني ما تربيبت على هالشيء .
ـ شُنــــوْ ولج خوما اتهموجن بالسرقه احجيييي نهى
ـ لأ محد إتهمنا وسالفتي تختلف عن سالفة سهى كل وحده ومشكلتها وأني حجيت الك شنو مشاكلي .
ـ أمشييي أنكبري يم أختج لما أشوف أبويه وأحلها يا ويلها تفك حلكها وتكول اريد ارجع رجعه بعد ماكو هذاك البيت والعائله تنسنها الى الابد نوب ضلوا عليه الحراميه والله من البدايه ما ارتاحيت اله وما موافق عـلـىٰ هالزواج بس شسويلج أنتِ وامي ..
جنان ـ خلاص لاتضل تلغي أمشي بإجراءات طلاكهن وفضنا منهم ومن نسبهم الاكشر .
علاء ـ اي ليش لا ، عـلـىٰ كيفج تزوجين وَ؏ كيفج تطلگين لعبة جهال عندج مو بناتج من دمج ولحمج محد دمر البنات وطيح حظهن وخلاهن بس يردن الزواج ويهجن منج ومن مشاكلج أنتِ وأبويه غيرج أنتِ .
عائله كامله تدمرت بسببج بسبب كبريائج وعنادج ومشاكلج حطمتي الكل وخطية البنات بركبتج ليوم الدين .
نهى ـ هجمت عليه وادفع بي وتعاركوا بينهم .
جنان ـ أطلع من بيتي أبن أبوك شيطلع منك .
علاء ـ هذا اللي شاطره بي أبنك ابوك محسستني ابن شوراع مو إبنج .
نهى ـ طلع وركع الباب وراه وأمي دفعتني ودخلت مستعجله ويـــن راحت ركضت وراها بيدها صونده دفعت باب الغرفه وهجمت عـلـىٰ سهى ، ليش هايہ شعليها عوفيها يمه گافي البيها گافـــــي تضربين بيها .
جنان ـ شُنــــوْ شعليها كله المصايب من رأسها لما حبت هالمصخم وأخذته أحنه ما هذا حالنا وتالي طلعت من البيت بمصيبه وصخام وجهه أنسلب شرفها وخلت رؤوسنا بالطين وإخوانج يذبون اللوم عليه وأني بالعه موس وساكته من ضيمي من قهري شسويلها اذا عندت الا تأخذه عبالك خلصوا الزلم ما ضلوا بس ضرغام دهاج أستلمي حبج شسوه بيج إشسوت بيج العلاقات عـلـىٰ هالمهجوم وما وراه بس هجمان البيوت ، الله يأخذج ولج موتي وخلصيني من عارج .
نهى ـ موتوتها من الضرب عوفيها ابوس ايدج عافتها وأندارت عليه ضربتني حالي من حالها وكعت بصفها وهي ما دافعت عن نفسها وأيدها ما رفعتها خلتها تضربها الا إنتهت وكعت مرميه حتى عّلى وجهه ضربتها وطلعت وقفلت الباب علينا بجيت بقهر وزحفت لعندها سهى حاجيني بعدج عايشه .
" كمت رفعتها من الكاع خليت رأسها على رجليه وحضنتها وأبوس بيها حسبي الله ونعم الوكيل شُنــــوْ ذنبها أنعل ابو الحب وساعته شحصلتي من حبج اله شلتي بماي عيونج وينه هسه وينه .
" أباو؏ عـلـىٰ إيدها ملابس أبنها وبنتها بيدها ومتمسكه بي شنو ذنبها إنحرمت من دافع عن نفسها ومن أطفالها ليش المجمتع ظالم ليش . .
" مرت أشهــࢪ من عمارنا وحالنا حال الحيوان المسجون ضرب ومسبه عـلـىٰ طالع داخل .
وتطلگت من النذل أحمد علاء مشه بيها وأنفصلت من وتخلصت من قذارته وصرت حُره طليقه .
" وسهى هم أخواني طلبوا من عنده يطلگها وصاعقه ونزلت عـلـىٰ رأسها تخبلت تصرخ وادك وتلطم ملخت روحها وأمي رجعت عليها تضرب بيها .
جنان ـ تلطمين عليه ولج شحصلتي منه بس العار
أستحي وكعدي وحيري بمصيبتج ، الله ياخذجن تتطلكتن وكابلتني موت كرفجن وخلصني منجن
نهى ـ عافتها تلوب روحها تريد تطلع من صدرها
و أكثر من مره حاولت تتنحر وأحجي وأقنع ولوحدي إمي عايفتها ولا عليها تريدها تموت وأني لوحدي وياها ما اعوفها الا تنام وكل شوي أفز وما الكاها بفراشها تحاول تتنحر مره صعدت السطح وركضت الها وين تردين يمصخمه
سهى ـ عوفيني ما أكدر اعيش ويه هالعار أني ما أستاهل اعيش خلوني أموت .
ـ لو تموتين جان كتلج ذبي نفسج والله ما تموتين تتكسرين وتضلين ومحد بحالج منو يشيلج اني بالكوه شايله نفسي عوفي فكره الانتحار وتعالي عليه
من طاح حظ افكارج كل حيلج صاعده تردين تموتين شو تعالي كبر اي والله .
ـ أنجبي عوفيني .
ـ زعطوط عوفي الموت هو يجيج لاتخافين ، أجت عليه اوفف سهى لاتخبلني وياج ما بيه حيل والله تعبت أڪثر منج .
سهى ـ نهى الموت ارحم نهى تعبت والله روحي تنازع الموت بكل ثانيه ماكو حُره جرعت اللي جرعته
نهى عافني اللي حبيته ووتنفست وجوده عافني أبن هالروح عافني ذبحني وراح .
ـ خل يروح شنسويله قحط عليه ، خلاص تعالي أخذتها الغرفه نامي وأرتاحي بقيت مكابلتها كالعاده ما افاركها وهمزين عمار طول الوقت بالشغل ما يشوف المصايب اللي تحصل عـلـىٰ رأسنا وابويه وعلاء من يوم طلاقنا لا يوصلون ولا يجون .
" جنت نايمه وفزيت عـلـىٰ صوتها تكح انداريت هي ماكو نهضت مفزوعه دفرت الغطا وركضت مثل المخبله مطلعه كل الادويه والعلاجات شكو حب وكبسوله شاربتهن بس الاشرطه فارغه إشســويتي سهى !!
سهى ـ رايحه أنام .
نهى ـ نومة أهل الكهف ضربتها كف إشســويتي ولج يمصخمه هيجہ ما تموتين هسه معدتج تتملخ وأني ابتلي واحير بيج شلعتي گلبي وياج .
أنتِ حيوان روحج رخيصه عندج هاي أمانه الخالق شعليج بالعبد ، جريتها واكفخ بيها وأخذتها الحمام اريدها تتقيء خليت اصبعي بحلكها لعبي نفسي ماكو لحظات وسهى وكعت من ايدي يم المغسله سهى سهى ماتت البنت ، ركضت كعدت أمي يمه فدوة لحكيلي .
جنان ـ شگوو شبيـــچ .
نهى ـ سهى أنتحرت وكعت ما اعرف ماتت لو بعدها
ـ موتت الجلاب
ـ مشت وياي رشينا ماي حاولنا ماكو ركضت خابرت عمار واجانا من الشغل ركض شالها اوفف اخواني انشلع كلبهم ويانا أمي ما تحركت ، جريت عبايتها ومشيت وياها وطلعنا المُستشفى وبالطريق أحاول وياها وعمار يضرب بيها صطرات ماكو ، رجعت اصطر بيها من قهري من سوالفها التافهه تتنحر الثوله
" وصلنا ونركض بيها عمار عثر وكع هو وياها .
عمار ـ خيتي لحكوا الها فدوة
نهى ـ بجيت عـلـىٰ منظره شلون وكع بالكاع وكام رفعها لصدره وهي ذبلانه وصايره هزيله من الضعف
خلوها على السديه ودخلوها الطوارئ عمار ضل برى ودخلت وياها وانخبصوا بيها بصياح
الدڪتور ـ شبيها من شُنــــوْ تشكي.
نهى ـ شربت كميه هواي من الحبوب .
ـ بسرعه غسيل معده صيحي دكتور علي بسرعه المريضه راح تروح من عدنا .
ـ طلعوني برة كعدت منزله رأسي وحيل ما بيه والتفت بلكي يمر ويعرف بحالها شلونها بغيابه .
" مر وقت وإحنه ننتظر طلعت ونقلوها لردهه واحنه وراها شكلوا الها مغذيات وابر ، صاحيه وتباوع السقف وعمار صافن عليها .
عمار ـ والله لا أنعل والديه وشكوو واحد يطلع وراه .
نهى ـ ركضت وراه عمار ابوس ايدك عوفه خيولي خل نطلع للبيت قبل لا يجون ويسالون ندخل بسيم وجيم وليش شربت حبوب مالنا بيها عوفه .
دفعني وراح اله ، رجعت الها كومي نولي البيت بسرعه الله يسود وجهج على هالسالفه ناقصين مصايب ومشاكل مو كتلج ما تموتين لو تتنحرين موته موته لو تنجبين وتسكتين .
" سندتها وطلعت بيها مثل المخابيل انهزمت بيها وأخذت تكسي لبيت وما ادري عمار إشسوى وشصار
وصلنا البيت شافتها إمي غمتها وكفختها على رأسها
انحمي ودربالج تعيدينها بس تسحلين بيه گافي عليه مصايبي ما ناقصه ترى هديتي حيلي نوم ما شبعانه من وراج كعدي على عقلج تقبلي الامر وسگتي خلص
" أخذت نفس وكعدت وتلفوني رن فتحته رساله من ضرغام كاتب بيها
ضرغام ـ كفوا عني أنتِ وأختج وأهلج گافـــــي عاد كلمن مشه بطريق لا كل فترة مسويلي مهزله بنص المُستشفى كدام خلگ الله ، اني ما ناقص البيه يكفيني ترى مو هينه ولا سهله عليه ، وأختج خل تكعد عـلـىٰ عقلها وتراجع نفسها كافي رعونيه وتصرفات مزعطه ومراهقين .
نهى ـ والله كلامك ذهب ، خليت الرساله كدام وجهه شفتي شُنــــوْ دز رساله هايہ فعـــلاً يسمونها رعونيه وتصرفات مزعطه ومراهقين .
سهى ـ أنجبي أنتِ وياه .
نهى ـ هاا طلع الج لسان ميخالف ننجب هو انجبينا وأكلنا نعل ، بعد ما تعيدنها شفتي شكال خل تكعد عـلـىٰ عقلها وتراجع نفسها كافي سهى مو صغيره أنتِ ، ما ردت عليه لفت رأسها ونامت .
____________
سهى
ـ كلهم عايشين بعالم واني عايشه بعالم لوحدي تمنيت نفسي بحلم وكابوس وأصحى وأرجع لواقعي لـ بيتي زوجي أطفالي ، أبني ليث ما أعرف اي شيء عنه حتى ما أكدر اكول مشتاقه لـ اطفالي تجيني الكفخات من كل صوب ، قهري كاتمته بقلبي حاولت أموت بس الموت مو حل والانتحار ضعف وقلة حيله وأكتشفت نفسي غلطانه أشد الغلط خاصه بعد رسالته تندمت حيل كرهت نفسي الضعيفه حيل .
" ساعات تمر وأيام وأشهر كامله ما شايفه أطفالي ولا اعرف اي شيء عنهم كاعده بغرفتي ومكابله الحياطين عايشه بهجر وعالم يذبح ذكريات موجوعه
" أجت نهى من بيت أبويه دز عليها وراحتله ورجعت وجهه ما يبشر بالخير شڪوو شبيـــچ صاير شيء بابا شُنــــوْ حجه وياج .
نهى ـ ما حجه شيء يسلم عليج .
ـ وعليكم السلام لعد شبيـــچ ، أمانه عرفتي شيء عن إطفالي گلبي مثل النار عليهم .
ـ لأ ما عرفت شيء عنهم بس عرفت عن أبوهم !!
ـ أسم الله عليه شبي ، نهضت مفزوعه شعرفتي نهى حاجيني فدوة ضرغام شبي .
ّ ـ ضرغام خطب راح يتزوج . !!
يَتبع .. .. صعدوا الحلقه اليوم طالبتكم بتفاعل تعرفوني ما اطلب ابداً عـلـىٰ راحتكم قلبي 🤍