لطيفة : وخا المرضية يلاه كنستناوك معانا حتى خالك محمد و مراتو...
مريام ( ابتسمت ) شحال توحشتو...
لطيفة : و حتى هو اجي و نكملو الهدرة نخليك دابا بسلامة احبيبتي...
مريام : بسلامة ...
حطات التليفون و مشات طايرة توضات و صلات لبسات عليها و هزات سوارت الطموبيل ديالها و خرجات ...قصرات مع حبابها مخشية تحت دراع خالها تيضحك معاها و يشد فيها و غي قولها و ضحك عليها حتى لنص د اليل عاد تفرقو للفراش ، حتى للنهار لي صبح يوم الجمعة و فتحات عينيها على الميساج ديال فائزة تتذكرها بالموعد ...هزات راسها من فوق المخدة و شعرها تسرسب معاها ملوي ، صبحات على داك الميساج قلب ليها المجاج تتحس بحالا مربوطة ، علاش قلت ليها وخا و علاش دخلت راسي فهادشي و شداني ندخل لداك القروب...! ناضت رامية الغطا رامية التليفون فوق الفراش لبسات عليها و هبطات تفطر مع الحاج و لطيفة ..
_ صباح الخير جمعة مباركة...
الحاج : صباح الخير الشريفة ديالي كي صبحتي مزيان...
مريام : الحمد لله ماما نقدر ماغاديش نتقدر نتغدا معاكم اليوم مشغولة شوية...
لالة لطيفة : وخا المرضية الله يعاونك...
الحاج ( هاز حاجبو ) شمن شغل هذا الالة مريام...
مريام (بهدوء ) غنحضر لواحد الندوة و غنتلاقا مع صحباتي شحال ماتلاقيتهم...
الحاج (هز راسو ) ماعليش ماعليش ، ماتبقاش دافنة راسك غي الخدمة الدار الجمعية الخدمة الدار الجمعية كدوري بين هاد الثلاثة بحال البالونة ...الروتين صعيب غطيحي فالملل و الاكتئاب...
مريام ( هزات راسها تتضحك ) بديتي ثاني ابابا ماصالح ليك غي فاتي ...
لطيفة : ههه راه جاية غي دابا دوات معايا تقدر تلقاك هنا...
مريام ( مسحات فمها تتبسم. ) ياك ههه و نطلع نبدل عليا بصحة فطوركم و نهاركم مبروك...
لطيفة : نهارك مبروك احبيبتي...
طلعات فالدروج بشوية عليها و ظهرها مستقيم دافعة الصدر القدام و رجليها محطوطين فسندالة ديال الريش رطيطبة فالبيض ، وقفات حدى البلاكار ديالها تتفكر شنو تلبس ..حتى سمعات الدقان عرفاتها فاتي...
_ هههه غي دخلي عاد جاك الصواب...
فاتي ( طلات عليها تتضحك ) ياختي نحتارمو الخصوصيات و داكشي ..
ترمات فوق الفراش حاطة رجل على رجل تتشوف فيها تتقلب فالبلاكار تهز و تحط...
_ فين غادية ، سمعت ماغاتكونيش فالغدا...
حيدات مريام البيجامة الفوقانية و بقات بالسروال و السوتيان هازين صدرها واقف و عامر بالحوايج تيبان مخفي ملي تتعرا تيبان عامر و بيض بحال الروز ...رمات عليها فاتي مخدة تتنكر عليها ..
_ و معاك داوية مابقيتي تتعاودي ليا والو فين غادية و مخلية الغدا مع العائلة...
مريام : هههه قلتها قبيلة و بابا دار واحد الشوفة ضحكاتني عقلكم تيمشي لبعيد ...
فاتي : و الحاج هو هذا الله يهديه و يهديك علينا ، ( شافتها خرجات غوب نواغ واسعة شال فالغوز ) بلا ماتلبسي داك الغوب واسعة بزاف اصحبتي مالكي غادية تعزي ..
مريام ( شافت فيها بحيرة ) و شنو غنلبس ، هادي مزيرة من الصدر غنختالط مع ناس محافظين و غي بالخمار غنبان حداهم معيقة ...
فاتي ( هزات حاجبها ) علاش فين غادية...
مريام : تتعرفي لالة فائزة و الجمعية ديالها غنحضر للندوة و راكي عارفة و شايفة كي دايرة و على ماسمعت جاي الدكتور قدوري ..وقيلة غندير بلاش و نجلس بلاصتي...
فاتي : اااه اوى عادي الحجاب و محجبة و السترة مستورة لبسي داك الكسيوة فالموف و شال ببلوسيال و غطي رجليك حيدي دوك السندالات لي تيبينو الصبيعات و هاننتي مستورة شهوة منك....
هزات كسيوة فالموف مستيلية و ثوبها كلاسيكي و غطات شعرها لشال رطيطب فلون السما جاي مع بشرتها البيضة ، ماحطات والو فوجهها هزات صاكها و سوارت الطموبيل وخرجات مع فاتي تيهدرو....
ماحطات والو فوجهها هزات صاكها و سوارت الطموبيل وخرجات مع فاتي تيهدرو على الحجاب حتى قالت مريام..
_ فاش شفت مدام فائزة و الحجاب ديالها الصراحة عرفت راسي مامحجبة والو ...
فاتي غادية بواحد الجينز مزير و تريكو قصير و شعرها مطلوق ...
_ علاش شنو ناقصك نتي ، ماتتعراي ماتتخرجي زغبة من شعرك ..
لبسات مريام نظاراتها الشمسية و ركبات سيارتها الفخمة و فاتي حداتها تنركب السانتيغ تتسمعها تتقول...
_ غي اجي و قولي انا محجبة ، تنبان متبرجة قدام مدام فائزة و صحاباتها هههه....
فاتي ( ضحكات ) و شنو نقول أنا ، الله يهدينا هذا مانقولو..
مريام ( عين معاها و عين مع الطريق شادة فيها ) لي بداه بابا معاك غيكملو سي الكوميسير غي صبري ...
فاتي ( رمات داك السالف العودة لي عندها ورى ظهرها تتضحك ) الحاج تيشوفني تتمشي ليه الماكلة في طريق النفس تقول شاف عدوتو ماشي خت مراتو ياختي ماعرفت فاش غالطة معاه...
مريام : هههه مسكينة يلاه على سلامتك هانتي وصلتي و بوسي ليا نعيمة بزاف ...
فاتي : مبلغ حبيبتي يلاه اتوتالوغ مابيل ...
مريام : مع السلامة ...
ودعاتها و تحركات من تما تتشوف شحال فالساعة لاوتعطل على الموعد ، طلعات ليها لابيل ديال فأىزة و ردات مكملة طريقها لاأوتيل...
_ و عليكم السلام مدام فائزة. بارك الله فيك وي وي قربت صافي وخا ان شاء الله .....
تحركات في اتجاه الاوتيل ، دخلات لقاعة الندوات مع مدام فائزة و مدام صالحة أستاذة جامعية ماكاين غي الاداب و الكلام المتول و الفصحى والرزانة و نسا اخرين مستورين و اغلبهم كبار فالسن مريام الوحيدة لي تتبان باقية شابة لدرجة تتجيب العين وسطهم بنت فعمر الزهور واقفة وسط نساء كبار فالعمر ..عرفاتها فائزة على الاصدقاء ديالها و ماكاين غي هذا استاذ الفقيهي باحث غي علم كدا و هادر استاذة العلوي استاذة و عضوة فجمعية كدا و باحثة دوخات مريام و شفايفها عياو بكثرة ماكل دقيقة تتبسم فوجه شي حد ...بقات غي هي و فائزة عاد نطقات تتسول و تبحث...
_ مزال ماجا الدكتور قدوري ماشفتوش...
فائزة : لا مزال ماجا عارفة كان فالاردن يوم الثلاثاء ..لكن شفت اسماء المشاركين فالندوة لي وصلاتليا كانت سميتو كاينة و حتى سي العراقي ...
مريام ( بثبات ) قلتي انه عضو فاللجنة معاكم !؟...
فائزة : وي سي العراقي أهم ركيزة عندنا فالجمعية و جميع الشخصيات لي تتشوفي هنا ماكانوش غيجيو لو ماشافوش سميتو كاينة هو و الدكتور قدوري ...راجل واعي و باحث و راسو عامر دخلي للسيت لي صيفطت ليك البارح ووشوفي أهم الاعمال ديالو و لي مأطرها هو....( قشعاتو داخل و نعتات ليها بعينيها )هاهو جاي مع الدكتور قدوري....
رمشات مريام باهتزاز و هزات فيه عينيها داخل مع راجل كببر شوية فالعمر تيهدرو ، كان لابس بنطلون نواغ و شوميز فالازرق السماوي داير ساعة فخمة تتعيط من بعيد شعرو و عينيه أسود من الفحم و بشرتو مايلة للسمورية ...استقبلو المسؤول من اللجنة التنظيمية و رحب بيه و بالشخصيات لي معاه ، قربات لعندو مدام فائزة و مريام بقات واقفة بلاصتها.. ، كاع الرزانة و الثبات تبخرات فاش هز عينيه فيها المرة الاولى بعفوية و قلبهم وفديك الثانية رجع عاود هز عينيه بحال شاف شي حاجة كيتأكد منها , قلبات عينيها بالزربة تتلوي سنسلة الصاك فيديها لي تعرقااات حتى دوات معاها مدام صالحة بابتسامة ..
_ اجي معايا نعرفك على الاستاذ الفائزي هو لي مأطر طلبة نسخ القرآن مع السي العراقي..
زيرات على السنسلة دالصاك ديالها و تبعاتها حانية عينيها ، غي وقفات عندهم سبقات نطقات صالحة مع عبد الهادي و موسيو الفائزي و شخصيات اخرى ...
_ نعرفكم على مريام الإدريسي عضوة فجمعية نسوية و علاش لا طالبة معانا فالمستقبل ان شاء الله...
الفائزي : متشرفين و مرحبا بيك معانا..
مريام ( بثبات ) شكرا بارك الله فيك...
عبد الهادي شاف فيها بعينيه الكحلية و نطق بجدية : مرحبا مريم ...
مريام ( ماهزاتش فيه العين ) شكرا ..
مريم لا مريام مريم بالفتحة على الميم لا الكسرة ، الميم عندو الميم و الراء راء و الياء ياء كل حرف عطاه حقو فالنطق الصحيح ، ماخفات على حد نطقو لسميتها بلا رسميات بقاو غي تيشوفو و ملتزمين الصمت ...
ماخفات على حد نطقو لسميتها بلا رسميات بقاو غي تيشوفو و ملتزمين الصمت مازعموش يهدرو و مابينو والو على وجههم لكن فعقلهم كاين استفهامات هوما لا رجال لا نسا ، شخص بحال عبد الهادي مستحيل يدوي عبثا ، تحطات غي مريام بوجهها حدا فائزة و صالحة و دور فعينيها مامرتاحاش و قلبها مزير و كيضرب بالجهد..كيهدرو و هي غي ساكتة هازة صاكها أنيق فيديها وكل شوية تتثبت الشال على عنقها و عينيها حرمات ترجع تمشي لجيهتو ..حتى سمعات سميتها من فم أستاذ العمراني قال ..
_ نتي بنت أخ سي إبراهيم الادريسي ولا غلطت ؟
مريام : وي إبراهيم الادريسي عمي ...
العمراني : مشاء الله من خيير الرجال إنسان السمعة ديالو سابقاه ..
مريام اكتفت بابتسامة و سكتات تتدور فعينيها ، ماتهنات حتى جلس عبد الهادي بلاصتو لي موجدنيها ليه و للدكتور و بعض الشخصيات اخرى و البقية جلسو فالاماكن ديالهم ، مريام جلسات اللور مع مدام صالحة و بقات كي الأمانة فالكرسي ديالها دايرة رجل على رجل برزانة و رقي تتفرج بعويناتها و تسمع بوديناتها و كل مرة تيعرفو بشخصية و الجوائز و الدور ديالها فهاد الندوة...تطرق الدكتور القدوري لرسم المصحف ودلالته على أحكام التجويد ...الندوة كانت فهاد الموضوع الكلمة تتعطى لكل مشارك فالندوة ، حتى تعطات الكلمة لعبد الهادي و خدا بلاصتو مقطب جبهتو بجدية تيشوف فالحضور بثقة ووبصوت رخييم قال ...
_ السلام عليكم جمعة طيبة على الجميع ... إن كل حرف وكل كلمة وكل حركة في القرآن الكريم لها حكمة, ونحاول في هذه الدراسة أن نلتمس الحكمة وبالطبع لن نصل إليها كاملة فهناك متسع لمزيد من الاجتهادات والتدبر في معاني هذه الكلمات القرآنية وأسرارها..ونضرب هنا أمثلة لبعض الكلمات القرآنية التي جاءت على رسم مختلف...
من اللحضة لي بدا فيها كلامو و الانصات كانت مبتنى من طرف الجميع ، و من ضمنهم مريام طريقة طرحو للمواضيع و الفصحى ديالو و طريقة مخارج الحروف تتبين فصاحة اللسان عندو ، و مايمكنش ماتركزش معاه و ماتوقفش عند شي كلمة قالها و تحاول تعاودها من وراه بينك و بين نفسك تتذوق نطقها و مع ذلك ماتتخرح كيف تتسمعها من عندو كلمة عربية عادية لكن تيعطيها قيمة بالنطق ديالو ...بينو و بين العربية عشق لا من الكتابة ولا من النطق..لسانو متمرن و فصيييح كان مثال لرجل شرقي من جذووور عربية عرييقة من دم أصييل ...، ملي بدا يهدر و مريام مركزة معاه تتشوف فيه بعويناتها السود باعجاب ! و حواسها كانو فانجداب سريع عاطين إنذااار لبداية الغررررق في بحر الفصاحة ...........و الغرام !!
تسالات الندوة مع ختام الدكتور القدوري و شكر اللجنة التنظمية , المقرر تيدون أهم النقط لي دازو فالندوة و المصور موجد راسو للتصوير و الشخصيات لي حاضرة خدات بلاصتها باش يتصورو ، لي عندها شي راجل واقفة معاه و لي عندو شي مراة واقف حداها تصورو غي صحاب الندوة اما الحضور بقاو حتى للاخر عاد ناضو لصورة جماعية ، حتى من مدام صالحة وقفات بلاصتها حدى مدام فائزة وجرات مريام معاها و عبد الهادي واقف وسط الرجال تيشوفو فالكاميرا ...خداو الصور و تفرق المجمع ها لي هز الملفات ديالو و مشى يتغدا فالاوتيل و ها لي مزال تيطرح بعض الأسئلة على عبد الهادي و القدوري ، مريام تابعة غي مدام صالحة و فائزة و راجل فائزة لي نطق...
_ وقت الغدا هذا ...
فائزة ( ضحكات برزانة ) و اذا فات وقت الغذا شنو ؟ تحرم الماكلة على كرشك نساينو الجماعة اسي عبد الله....
عبد الله ( ضحك حتى هو بوقار ) استغفر الله الالة فائزة ماقلتي عيب ...( شاف فمريام لي مبتسمة لحوارهم ) سبحان الله شبهتك لواحد المراة تنعرفها نفس الصوت و نفس الكراكتير عندكم ...
فائزة ( دورات راسها تتضحك ) جاك الجوع بانت ليك فمريام دابا و لا شنو ؟ لاحولا ولاقوة الا بالله...
مريام ( ضحكات بخفوت ) حتى انا سبحان الله حسيتك قريب لكراكتير بابا ...
عبد الله ( بابتسامة ) فكريني بسميتك بعدا عاد نشوفو سمية الاب ديالك نقدر نكون كنعرفو ..نتي مريام ولا مريم ؟
مريام ( ضحكات برزانة مخبية ارتباكها فاش لمحات عبد الهادي و الاستاذ العمراني جايين لعندهم ) بحال بحال مهم المعنى واحد لا ؟
عبد الله ( ببشاشة ) و العلم لله حركة واحدة في اللغة العربية كتشكل فرق كبير فالمعنى سبحان الله ( شاف فعبد الهادي ) كاينة ولا لا اسي العراقي....
عبد الهادي ( بهدوء شاف فساعتو ) وقت الغدا اسي عبد الله...تفضلووو ..
عبد الله : مرحبا ...
زاد عبد الهادي مع عبد الله و العمراني و مدام فائزة و صالحة و مريام مع بعضهم ، دخلو للريسطو و جلسو النساء مع بعضهم الاتيكيت فالهدرة و الماكلة و الشوفات المرزنة و الثقافة تتمشي ليهم مع العروق ، كانو فطبلة لوحدهم ، هي و فائزة و صالحة و طبلة اخرى جالس عبد الهادي مع الرجال جات قبالة عينيه و قدام عينيها تهز عينيها قدامها تيجيو غي فيه ، و شحال من مرة عينيه صدفة جاو عليها و قشعاتو فائزة ... حرمات مريام الشوفة لديك الجهة و غي حانية عينيها حتى الماكلة ماتتعرفها كيف كدوز و لا منين ...تتعيش واحد الارتباك عمرها عاشتو من قبل وشعور فشكل تيخلي قلبها يتزير و يضرب ، تغلفات بالحشمة و الحياء باين عليها و لون الازرق السماوي فالفولار ديالها نفس لون القميجة لي لابس هو ، الازرق عاطيها هالة من النعومة و الرقة مع حريفاتها الكحلين و زينها الهادي و بياض بشرتها مع الازرق و البنفسجي تتبان مميزة قدام النساء لي حداها بالوان رسمية و داكنة ، مسحات فمها بطريقة انثوية و الساعة فمصعم يديها تتبري صبيعات يديها خاويين لا خاتم لا جوج ...سولاتها فائزة ببعض من الفضول ماقدراتش تخبيه....
_ سبق ليك تتعرفي سي العراقي ؟
هزات مريام عينيها لي بان فيهم عدم الثبات و الاتزان لي معروفة بيه...
_ لا تنسمع عليه و صافي ...تعرفت على صفاء و بنتو حنين هو عمرني صادفتو قبل...
فائزة ( مابغاتش تزيد تتدخل ) مشاء الله عندو بنت زوينة ...
صالحة : شفتها مرة وحدة فاش كانت بنت ست سنين دابا تبارك الله كبرات ..
فائزة :نعم التربية و الاداب و الحشمة كملات 12 سنة تبارك الله... زوين هكا يكون عندك بنت مراهقة و نتا باقي صغير تفهم عقليتها و تواكب جيلها ، انا بنتي الكبيرة تنحسها تتفهمني و تنفهمها لكن الصغار فرق كبيير فالعقليات بالرغم من المحاولات لي تندير نتقرب منهم لكن سبحان الله فاش تيكون فرق كبير فالسن بين الام و البنت ماشي مستحيل لكن صعيب التوافق...
صالحة ( شافت فمريام لي ساكتة و حانية رموشها ) تماما ، نسال الله تعالى يصلح وليداتنا و يعينا على تربيتهم ...مريام حبيبتي فين ساهية...
مريام ( بابتسامة ) لا معاكم تنسمع ...
فائزة : ماعطيتيش رأيك اليوم فالندوة . ماعندكش اهتمام تنخارطي ؟
مريام ( باعجاب ) بالعكس الموضوع عجبني كيحمس تعلمي و تكتاشفي حوايج جداد و سيغتو رسم القرآن مي تنشوف راسي تابعاني طريق طويلة و تبارك الله الطلبة تعمقو لدرجة الاحتراف....
فائزة ( تبسمات ) يديك مبدعة و فنانة مايكون صعيب عليك والو....غيعجبك مجال الخطوط و نصحك بيه مع سي العراقي غتشوفي مجال اخور عمرك فكرتي تسمعي عليه ...جانا عشرين طلب الانخراط فهاد المجال الا كنت مهتمة غنتواصل مع المساعد د سي العراقي يحدد وسيلة التواصل معاك ..
مريام ( بهدوء ) وي علاش لا ...
فائزة : صافي الايميل ديالك راه عندي...داز نهار ممتع الصراحة و الرفقة ديالك زوينة بحالك مريام ...
مريام ( تبسمات بلطف ) بارك الله فيك و انا كثار تشرفت بيك و بالزوج ديالك الله يخليكم لبعضكم...و بمدام صالحة بيان سيغ ..
فائزة : امين ..
صالحة ( تبسمات ) و انا أكثر عزيزتي .. بالمناسبة صوتك زوين بزاف....حنين بحال الشوفات ديالك...
مريام : من ذوقك حبيبتي ...
تلفات مريام الوقت معاهم ، وخا باين فيها الحياء و الحشمة مخلطة مع الرقي و الهدوء و الرزانة ، رموشها اغلب الوقت غي محنياهم و النسا داكشي لي تيلاحظو وخا يكون ماعرفت فين واصلين بحال هادشي مستحيل يخفى عليهم ، و خاصة مدام فائزة لي تتشوف فمريام و الحشمة ديالها من اللحضة لي شافتو فيها و دوات معاه و نطق سميتها بلا رسميات حسات بيها حشمات ، وتشوف فعبد الهادي لي عاقت بالشوفة لي دارها فيها أول ماشافها من بعد غض البصر غي الا جات عينيه عليها صدفة....حنات فائزة عينيها تتمسح فمها و تبسم بينها و بين نفسها....