#سبيل_الغيب
الحلقة الثامنه .
ضرغام
ـ شُنــــوْ هذا اللي سمعته بإي حق تزوجونها شُنــــوْ لعب جهال سهى مو لعبه تقررون عنها بزواج بدون رضاتها .
عمار ـ هيي أحشم نفسك واعرف أحجي عدل البنت تحجي عنها تكون بنتنا شوي أستحي وبعدين احنه اهلها واعرف بمصلحتها ، منو أنت بلا زحمه ؟
علاء ـ عمار عـلـىٰ كيفك
عمار ـ شُنــــوْ عـلـىٰ كيفي الرجال بدون مستحه جاي للبيت بعد كل كلام ابوه بحقنا وبحق بنتنا صدك ما تستحون لأ أنتَ ولا أهلك.
علاء ـ عمار عيب أسگتت .
نجم الدين ـ أش لحد يتدخل ما ما ربيتكم على قلة الاحترام وضرغام أبني اظن فهمت اللي حجيناه .
ضرغام ـ لا ما فهمت ولا راح افهم وراح اسوي روحي ما سمعت لن يا عمي بنتك اني رايدها على سنة الله ورسوله بشرع الله وين الغلط بالموضوع واكفين بطريقنا أنت وأهلي ترى داخل عليكم من الباب .
ويشهد الله بنتك رايدها وعاجبتني من يوم فاتحه جدها ومن هذاك اليوم نيتي نية خير ، ولمحتها صدفه ولا خايف ولا مستحي والحب مو حرام الرسول (ص) حب واجيتك لوحدي وگلني حشم بيك ما تردني خايب الظن
نجم الدين ـ يا أبني الزواج ما يصير هيج والمشية يراد إلها زلم تكعد وتكابلني وتخطبها مني ومن أخوانها بنتي مو رخيصه عندي واشمرها الك هالشمره ولا مكطوعه من شجره وبعدين أبوك بنفسه كال الاهل كلهم رافضين وما موافقين عـلـىٰ هالزواج ومريتك موجوده بنت خالتك ما اعرف خالك المهم هذا اللي كاله االيه ابوك ، يعني شلون انطيك بنتي وجاييني بطرك روحك واهلك ما يردونها ، وأني وأنت نعرف كلام الناس ما يرحم وراح يحجون بكل كعده يعني صعبه يا وليدي يا ضرغام .
َـ عمي من رخصتك تسمعني لـ الأخير وأكول العندي وبعدها البنت بنتك والقرار قرارك .
ـ أحجي أسمعك .
ـ شوف يا عمي طبعًا من حقك تريد مشيه لبنتك ومن حقها هي لن كُل بنت لازم مشيه زلم وهذا الشيء داير وممشي بي .
لهذا وعد شرف اجيب زلم واخطبها منكم بس مو أهلي أعذروني أني وياهم على خلاف ، وبنتكم اريدها ومصمم عـلـىٰ قراري وما اريد زوجة غيرها هي واتمنى منك يا عمي تفكر كُلش زين وأذا عـلـىٰ كلام ناس عُمره ميخلص وبعد ضلت يمك تشتري سعادة وراحة بنتك لو كلام الناس .
عمار ـ يعني تريد تقنعنه بهذا كلامك وبله منو الزلم اللي تجيبهم تستأجر كم واحد وتضحك علينا شايفنه غشمه لو جهال وينضحك علينا .
نجم الدين ـ عمار شُنــــوْ هذا كلامك عيب بابا ضرغام كلامه ما بي كل عيب وعداه العيب .
علاء ـ عمار الولد رايد نسبنا ويابه ياريت تفكر زين عن نفسي موافق ما عندي اي عارض .
نجم الدين ـ ضرغام .
ضرغام ـ عيني عمي .
ـ تسلم عينك وليدي ، شوف كلامك قنعني وأنت لبق ما شاء الله لهذا فكرت وقررت .
ـ أي عمي شُنــــوْ قررت .
ـ ما انطيها الك !!
ـ شُنــــوْ عمي !!
ـ اقصد وافقت انطيها الك تستاهل كل الخير .
ـ طرت من الفرح وكمت حضنته تسلم عمي الله يجبر خاطرك مثل ما جبرت خاطري وبنتك اخليها بنص عيوني واسد عليها هايہ بنت الغالي تعال بوسه انوب
سلمت على علاء وفرح وياي ما أنسى موقفك وياي يا صاحبي .
علاء ـ مُبارك وتستاهل كُل الخير عيني .
ضرغام ـ تسلم صاحبي الذهب ، تقدمت عـلـىٰ عمار وطلع وعافنا وعمي هز راسه معناها لا تهتم ، اي عمي
خيـــࢪ البر عاجلهُ باجر ان شاء الله وبعون الله أجيب خوالي واخويه اياد وعمي مصحب تعرفه أنت .
نجم الدين ـ اي عمي أعرفه شلون ما اعرف الله يقدم البي خيـــࢪ .
ضرغام ـ امين ، كعدت ومبتسم بگلبي ياريت عندج تلفون وأبشرج يروح ضرغام راح تصيرين ملاكي .. ..
________________
سهى
ـ كاعده عـلـىٰ نار وأنتظر قرار أبويه وشنو يحجون ونهى عينها عـلـىٰ التلفون ننتظر إتصال سرى
نهى ـ أتصلي عاد ادري خوما نمتي .
سهى ـ أنركع باب الحوش بقوه خيـــࢪ ، كمزنا أثنينا ودخلت امي معصبه حيل ومزعوجه وغمتني بيدها اثنين وگالت .
جنان ـ انطاج اله أمداج وامده هالقسمه هذا هم زواج اهله ما موافقين وما يردونج ورافضينج يالغمه يالعار
أنطاج بالرخص تبقين رخيصه بنظرهم لن ابوج رخصج انطاج بطرك روحه لا أب لا ماما لا داده لا اخ لا أخت لا عمام لا خوال ، تف على شگلج من بنت .
نهى ـ بيها الخير وأنت ليش مقهوره بدال ما تفرحين الها جايه تحجين عليها وما دامج ما راضيه على هالزواج ما جان تحجين وتنطين قرارج أنتِ مو أمها
ـ امها ليش ابوج يمشي بقرار احد انطاها وبلغ عماتها واجن بلغني ليش اني هم انعد على الامهات
ـ گولي لنفسج مو گلتي تنازلت عن حقوقي مقابل يعوفجن اليه وما اله شغله بيجن شو من اول الطريق أبويه قرر وخلص وأنتِ شالج من المسؤوليه ادري تنازل لعبة جهال ، لاتزعلين بس أنتِ هم ما تعرفين تتصرفين .
ـ انجبي اني تنازلت من ذاتي ما اريد لا حقوق لا صخام الوجه هو شُنــــوْ شفته من ابوجن عاد حقوقه
ما اريد منه بس يولي عني وأفتك
- اي لعد كعدي بالبيت مو كلما ما دز عليج رحتي تركضين بيت عماتي اللي اعرفه تتطلك تلزم عده مو صح .
ـ نهى ترى اطلع جنانيني عليج وانعل شيبج وشيب اهلج وياج طايحة الحظ ، عليمن تطلعن ابوجن نجم الدين ناختنجن نخت وأنتِ فرحانه مو ست الحس والجمال والبهيه افرحي بالجگمه تزوجي بس انسي عندج ام وهذا زواجج ما راضيه عليه لن ما عاجبني ولا راح يعجبني انطاج بالرخص ما عززج
سهى ـ يمه .
جنان ـ وجعة أبو امي وابويه ، شوفي تلمين غراضج وتولين بيت أبوج خلقتج بالبيت هذا ما اريد اشوفها مناك عرسي وانكلعي بيت الحبيب خل يفلج ويصونج خل هيفاء ام خشم تشبعج نعل مكطعه هي وبناتها رايحه بوسط كومه حيايا أمداج يالعار .
سهى ـ أنكسرت فرحتي بكلام أمي ، مشيت ورجعت گالت .
جنان ـ خل أمج اميره تجهزج ما عليه بيج بعد ولاتتصلين وغرفتي ما توصلينها رجليج اكسرهن واذا بيوم اجيتي تلطمين كافخج لو لابسج من الباب اطردج عليه خل ينفعج حبج وقرار ابوج .
نهى ـ گافـــــي عاد طوختوها وياها فد مره حَبت خوما كَفرت والرجال أجه خطبها حتى لو اهله ما موافقين ورافضينها المهم رجال كد كلمته وموقفه اجه وثبت معدنه شُنــــوْ ، والصار صار بعد لهذا المفروض منج توكفين ويه بنتج بهيج يوم وتفرحين وياها مو تصيرين ضدها وكلام طالع نازل .
جنان ـ امشي لحگي أختج والعندي كلته وهذا الزواج ما راضيه عليها للموت .
سهى ـ شبعت قهر دخلت الغرفه وبجيت لوحدي واجتني نهى تواسيني سمعتيها شگالت حتى ما تريد يزفني من يمها مستكثره وجودي .
نهى ـ شتسوين بعد هايہ أمي من يومها هيج ولعلمج ما تعرف تتصرف ضيعت أبويه وانوب ولدها وهسه بناتها عبالك بالصراخ والزعل تنحل المواضيع .
ـ لا هيج تحجين تبقى امي الله يحنن گلبها علينا .
اثناء كلامنا دخلت وشمرت التلفونات بوجوهنا
جنان ـ گومي جمعي ملابسج وخابري أبوج يجي يأخذج ، باجر يجي يخطبج ويعقد عليج .
" طلعت وعافتنا ونهى اخذت التلفون وكامت تغلط وعصبت شڪوو شبيج
نهى ـ هشام نازل غلط عليه شبي هذا شاخط وربي
ـ عوفي خيولي يمعوده .
ـ غير افهم منه شجاه تخبل عليه كبر يطمك اي والله
سهى ـ عفتها كمت جمعت ملابسي بالجنطه ونهى شمرت التلفون وضاجت .
ـ يعني هايہ هي راح تروحيــــن بعد وأضل لوحدي بهل الغرفه وأنتِ تنامين بحضن ضرغام وأني اكابل الحياطين .
ـ شسوي خيتي قسمتي اجتي بالحلال ووافقت لن ما أكدر اعيش ويه شخص غيره والحمدلله الله بيض وجهي وراح نتزوج .
ـ تستاهلين قلبج طيب وفطيره وَ؏ نياتج الله سهل الج امرج ، روحي الله يسعدج ويوفقج ويحنن قلب أهله عليج .
ـ أمين ، جمعت كل ملابسي ونهى تبجي شبعت قهر حضنتها وبلغت أبويه واجه طلعت وامي قافله باب غرفتها دگيت حاولت ميفيد يمه أني رايحه رضاج
ما ردت ودعت نهى وطلعت لكيت ابويه نزل اخذ الجنط وشغل وطلعنا للبيت
" طول الطريق ساكتيين خفت لا يحجي وياي بس الحمدلله ضل ساكت لما وصلنه دخلت البيت وسرى أخذتني الغرفه بطابق الثاني كعدت صافنه ومقهوره تمنيت ما أطلع من البيت يا يمه الله يحنن گلبج عليه
دخل بابا وهز رأسه لـ سرى وطلعت تقدم وكعد عـلـىٰ حافة الجربايه وكال .
نجم الدين ـ شوفي يا بنتي يا سهى ماكو فرق بيت أمج من بيت أبوج ولاتزعلين من ردة فعلها تضل أمج شنسوي هي هيج طبعها .
واذا على زواجج قسمه ونصيب وقدر ومكتوب الج وضرغام خوش رجال أعرفه شنو من طينه طينته طينه طاهره واذا عـلـىٰ أهله مع الوقت يتقبلون الأمر واني حجيت وياه بخصوص ويـــن تعيشون وگالي عنده بيت لوحده ومأثث من گلشي يعني راح أكون مرتاح ومطمئن محد يضايقج أو يسمعج كلام والله يسعدج ويوفقج بحياتج .
ـ تسلم بابا رفعت رأسي ونزلت دموعي واخذني بحضنه وبجيت عـلـىٰ صدره بابا حبيبي .
ـ يروح أبوج خلص لاتزعلين هي ترضى وعد أخليها تحضر عرسج وتزفج بيدها خلص بابا لاتكطعين گلبي عليج
ـ تمام حبيبي ، مسح دموعي وباسني من رأسي وطلع ودخلت سرى كعدت يمي شلونج
سرى ـ الحمدللة زينة ، سمعت اللي صــاࢪ لاتزعلين
َ ـ الحمدللة عـلـىٰ كل حال .
ـ لو تشوفين ضرغام شحجه عمي صدك أنتِ حابه الرجال گول وفعل اوكفي سجلت كلامه من ورى الباب رغم مو واضح بس يعني ما صبرت الا اخليج بالحدث .
ـ جابه التلفون وكعدنا نسمع يحجي واني مبتسمه خلص التسجيل شعندج سوالف ما خفتي واحد من الولد لكفج جان رزلوج .
ـ لا عادي وعلاء موافق وفرحان الج بس عمار لا ما مقتنع گلش وواكف ويه أمي وسمعت هالايام يأخذ مرته ويروح يسكن يم أمي .
ـ هاا هو هيج گال .
ـ اي والله بعد ما اعرف .
ـ بيها الخير ، كامت وكمت طلعت ثوب غيرت ملابسي وخليت تلفوني عـلـىٰ الشحن وصلتني رساله
ـ اعرف بيج وصلتي بيت أبوج ليش ما راسلتيني !
ـ جاوبته صارت أمور هواي شحجيلك
ـ أعرف أهلج ما موافقين وبالكوه قنعتهم راح أتصل أكو احد يمج اريد احجي وياج طاكه روحي على صوتج الدنيا طالعه من عيني .
ـ كمت قفلت الباب وأتصلت عليه ها عيني .
ـ اوفف هالصوت مأخذ حيلي اويلاه شگد مشتاقلج
ـ الحمدللة مرت عـلـىٰ خيـــࢪ .
ـ الحمدلله ، مُبــروك حلالي .
ـ الله يبارك بيك
ـ شبيج صوتج ما عاجبني شُنــــوْ تبجين
ـ عبرة ترس صدري جاوبته ضرغام .
ـ هاا حبيبي شبيـــچ أحجيلي منــو وياج منو غاثج
ـ محد
ـ لا أحجي
ـ أمي
ـ شبيها
ـ ما موافقه عـلـىٰ زواجنا وطردتني من البيت كالت روحي عـلـىٰ ابوج حتى عرسي ما تحضره .
ّ ـ وليش ما موافقه السبب .
ـ لن أهلك رافضين وعرفوا اني وياك على علاقه وتكول عيب ومن هالحجي وتكول الزواج ما يصير بدون مشيه وشلون ما جان وابوج رخصج انطاج بطرك روحه وو ... ، بجيت كمت اشهك .
ـ خلاص گافـــــي سهى بابا گافـــــي صغيره تبجين
ـ ضرغام ما أكدر أمي هايہ .
ـ اعرف يا حبيبي ، ميخالف خل تحجي أم ومن حقها وكلامها صح الصح وعين العقل ما الومها ، وأنطيها وقت هي تهدأ وتجي عليج وتزفج بيدها أعذريها .
ـ عاذرتها والله
ـ ميخالف حبيبي أم ، وأنتِ خوما حجيتي او رديتي بوجهها اموتج غير .
ـ لا والله بقيت ساكته
ـ اي عفيه هيج اريدج وهسه اريد منج تكومين تغسلين وتصلين ركعتين وتفتحين القران تقرئين كم صفحه نفسيتج ترتاح وكلي امرج لله وتوكلي عليه
ـ ان شاء الله
ـ أحبج ولج .
ـ وأني هم .
ـ دربالج عـلـىٰ حالج ، يله مع السلامة
ـ الله وياك .
أنتهى الأتصال كمت فتحت الباب وأجت سرى وكعدنا نسولف بس بالي مو يمها بالي يم أمي أخذت روحي حتى واهس ما ضلي البنت من دون إمها ما تسوى .
" لليل ڪاعدين اني ونسوان اخواني وتعرفت على زوجه عمار كلش فقيره وحبابه وضلت تسولف شلون تعرفت هي وعمار وعاشوا قصه حب طويله عريضه
سنوات واهلها وافقوا بدون اي عارض ، كل واحد وطبيعة مجمتعه تختلف عن الباقين .
" خلصت التعلوله وصعدت الغرفه راسلت نهى متجاوب وين مختفيه طمنيني عنج شصار أمي هم سألت عني اتصلت حاوبتها ها وينج
نهى ـ موجوده شلونج
ـ زينه أمي هم سألت عني
ـ لا أبداً ما سألت بس گالت باجر يجون يخطبونها هم الج نيه تروحيــــن كتلها الله كريم
ـ باجر !
ـ اي ليش ما عندج علم
ـ لا والله محد فتح الموضوع حتـَـہ ضرغام ما گالي ولا بلغني .
ـ ما اعرف عماتي أتصلن على امي وبلغنها وهاا محد يحضر خطوبتج اكولج من هسه دبري نفسج لوحدج
ـ ليش
ـ أمي مأكده عليهن اللي تروح بعد ما تحجي وياها
ـ وأنتِ .
ـ ما اظن تقبل والله بس أحاول وياها ، حتى عمار اليوم اجه عليها وراح يجيب مرته ويسكن يمها الصبح يجون وهاا هم ما يحضر لا هو ولا مرته .
ـ ليش تسوي أمي تريد تموتني قهر حرام عليها أني بنتها وهذه فرحة عمري خوما يوميه متزوجه .
ـ تكول خل تتحمل نتائج أختيارها هي وأبوها مالي شغل بيها بعد نارها تأكل حطبها .
ـ لهل الدرجه يعني .
ـ شتسوين تحملي خيتي
- الحمدللة عـلـىٰ كل حال ، نهى تعالي فدوة أحتاجج مرت ابويه ما تكدر اتقرب الها بعدني بسم الله اكو امور أنتِ اذكى مني بيهن حبابه اني اختج .
ـ ان شاء الله اجيج حتـَـہ لو نتعارك اني وياها ما عليج باجر اني يمج واذا ما حضرت بالجهاز والحنه والعرس اجي والله .
- تمام أنتظرج يلة مع السلامة ضرغام دزلي رساله
ـ روحي حبيبي الله وياج .
ـ أنتهى الأتصال واتصل هو ودخلت سرى قفلي الباب
اخذت نفس وجاوبته ها عيني .
ضرغام ـ صوتج شبي لخاطر الله شصايرلج .
سهى ـ ما صاير شيء .
ـ أحجيلي ترة صوتج أبداً ما يعجب هم تبجين مو
ـ شسوي لعد بهيج يوم مهم بحياتي لوحدي
ـ ليش لوحدج مو بيت أبوج
ـ اي
ـ بعد شڪوو يا عيني كل بيت تصير بي هالامور والمشاكل شُنــــوْ الغريب يا گلبي هونيها وتهون وبعدين تعالي اكولج أني وين رحت وين عايفتني
ـ عيني أنتَ
ـ خلص لعد أني موجود وباقي يمج وياج للموت لو مو أهلج يتخلون عنج لو الدنيا بإكملها تتخلى عنج اني ما أتخلى عنج وعد .
ـ أحبك
ـ بعد گلبي
ـ صدك أهلك شگالوا
ـ لحد الأن ما واصل البيت ولا شايفهم ولا ملتقي بأي واحد من سلالتي عدى شهد بنت أختي اداوم بالمستشفى واشوفها هايہ هي بعد يعني حالي أتعس من حالج .
ـ وشلون نضل هيج
ـ شعلينا بيهم المهم حُبنا يفوز وأخليج بحضني وطز باليزعل واليرضى عندي شمه من عطرج تسوى العشيره وأهلها .
ـ شلون بيك وبحبك اليه
ـ غير أعشقج واموت بهواج ، شعندي غيرج ياعمري
ـ فدوة رحتلك ، صدك حبيبي باجر تجي تخطبني
ـ أي حبيبي صُدك ليش متفاجئه .
ـ لا حبيبي لاتفهمني غلط ما متفاجئه ولا شيء هو أنتَ خطبتني بس بعد تخطبني رسمي هيج سألت والله .
ـ أحبج
ـ واموت بيك .
ـ باجر الصبح اعقد عليج وتصيرين عـلـىٰ ذمتي
ـ أن شاء الله حبيبي ، بقينا نحجي وسرى مبتسمه ونهيت الإتصال باجر يجي ولا محضره نفسي ولا مستعده بهيج يوم مكسوره امي اخذت كل واهسي
ـ أحنه موجودين وخاله اميره حاجزتلج يم الصالون بالـ ٩ نروح إلها ، ما ردت اكولج ناوين نسويها الج مفاجئه بس أنتِ وجهج يلطم وعبالج وما مهتمين الج بالعكس والله فرحانين الج وبابا وعلاء وخاله اميره مرتضين .
ـ فدوة فرحتيني عسىٰ ما انحرم منكم ، اجت حضنتي وكامت طلعت اليه ملابس لبست وخاله اميره صاحتنا ونزلنا سوه وضحكت .
أميره ـ سرى ما صبرتي الا تحجين .
سرى ـ هي بس وجهها يبجي ما صبرت كلت افرحها
اميره ـ نفرحها ليش لا مو عروس تدلل علينا يلة حَـبيبتـي خل نروح الصالون خاف ازدحام .
ـ مشكوره خاله تعبتج وياي .
ـ تعبج راحه حَـبيبتـي .
سهى ـ طلعنا لصالون وبابا وصلنا .
نجم الدين ـ من تخلصون خابروني ، اني رايح سبور ماركت أجيب ضيافه وعصائر
اميره ـ ماشي عيني روح الله وياك ، نخلص وأتصل عليك ، وهااا جيب ضيافه من الزينه شيء راقي ولو ميحتاج لن أنت گلشي تجيبه من الزين
ـ تدللين اجيب .
سهى ـ راح ودخلنا الصالون وصوت الأغاني وسرى طربت وتبوس بيه شوي انتظرنا وبلشت تحف وصبغت شعري وسرحته وسويت اظافري وصبغتهم يخبلن طلعن ، سويت عنايه كامل خاله اميره كومه نقدت فلوس الها لن الصالون شغله توب ، وبعدها طلعنا بلغت بابا واجه اخذنا السوك ونزلنا دخلنا المحل واخذت فساتين خطوبه وتجهيزات للخطوبه .
"خاله هواي صرفتي ميحتاج والله كلش گافي .
أميره ـ شُنــــوْ گافيي باجر مناسبة خطوبتج وهي فرحة العُمر ، خوما يوميه تنخطبين ولازم گلشي من أحسنه وماكو نواقصات وهسه نتصل على ابوج يجي يأخذنا قبل لا يعصب علينا .
سهى ـ أتصلت وهمزين طلع هادئ مو عصبي واجه وانطانا جگليت ويضحك ويسولف ويانا ، ووصلنا لكينا علاء وعائلته موجودين سلمنا عليهم وبابا ما قبل يرحون فـہ راح يباتون ، عفتهم وصعدت فوك
سرى ـ شفتي خالة أميره شُڪثر زينة والله من يوم اجيت أبداً ما ملت مني ولا خلتني بعازة شيء شيصير لو أمي متقبلتها وعايشين سوا براحه وسعاده
ـ مو گلشي نريده يصير وصدگي لو امي متقبله وجوده خالة أميره جان ما صارت زينه هم جان صارت مشاڪل بس القدر مرات يخالف والحمدلله .
ـ اي والله صحيـح كلامج .
سهى ـ ضلت يمي ونسولف ونخطط شُنــــوْ نسوي باجر وبعدها نزلنا يم زوجه علاء وهم سولفنا ونظفنا البيت والاستقبال وغسلنا الحوش ودخلت سبحت ونمت تعبانه ورسلت اله رساله شو ماكو مختفي !!
ضرغام ـ تعاركنا اني وأهلي ، الصبح أحاجيج .
سهى ـ شصار !!
ضرغام ـ الصبح نحجي هسه مشغول باي .
يتبع . باجر ان شاء الله بارت هديه لعيونكم 🤍