#سبيل-الغيب
الحلقه الأولىٰ .
سهى
ـ عن شُنــــوْ تحجون بالغرفه وصوتكم واصل يمي
نهى ـ وأنتِ عـلـىٰ أساس هلكد يهمج عن شُنــــوْ نحجي ، حتى لو عنستي متهمين عندج هل الخلقه گافيه عليج
ـ خلقه الله مثل خلقج خلقني وأنطانه كل شخص ميزه مو معناها أنتِ محلوه والله عندج وحمه
بوجهج أصلاً طبيعيه وصغيره بس أنتِ تبالغين .
ـ حجيج ما يشبع جوعان ، أكوم أولي أحاضر دورس أشرفلي من هالكعده ويه أمج ترسم أحلام بعيده المدى ويه عائلة قيس العبدالله .
ـ خيـــࢪ شجابهم عـلـىٰ بالكم
جنان ـ شُنــــوْ شجابهم مو جان صديق أبوج بالعسكرية شو ما تعرفين تحجين .
نهى ـ عن إذنكم
سهى ـ طلعت وضليت مكابله أمي تنظف تمن العنبر وتخزر بيه ، شبيچ يمه شو ما شلتي عينج عني .
جنان ـ هيج بنتي وأباوعلج الا تخلين بيها النا
شُنــــوْ حرام واحد يباوعلج تضلين تنگين .
ـ لا مو حرام ليش أني حجيت فگيت حلگي .
ـ يله عوفينا ، صدك نسيت أكلج تجهزي نروح بيت قيس يكولون أخته مريضه وحالتها مو زينه على فراش الموت نروح نشوفها خطيه وواجب لازم نروح .
ـ مبيها غير العافيه ، بسـَـہ أني شكوو رايحه وياج
ـ ليش مو بنتي ، شبيج أنتِ أكلج ثور وتسألين منو أبوه .
ـ مو قصد هيج ، بس الاقصده واجب وأنتِ روحي مره جبيره مبيها شيء ، اني شكوو مأخذتني وياج بيتهم مليان زلم .
ـ ليش عيوني شكالولج عليه داخله بالعمرين عجوز امشي على عكازه ، وبعدين رايحين نعافي لاخته مو نخطب ولده ياكلونج خوما ياكلونج .
ـ أووف يمه أحجيلي حجايه تسوينها كبايه روحي أنتِ وفضيها ، اني ما اروح وياج
ـ وليش ما تروحيــــن صغيره ناقصج ايد رجل ، بكد الدثو ، امشي وبله لغوه زايده ، مدري عليمن طالعه
طالعه على بيت جدج مثل ابوج عليمن تطلعين
ـ شبيج تعصبتي لو ما ترتاحين الا تحجين على أبويه يله يبرد گلبج .
ـ لاتضلين تلغين ترى فولت عليج تضلين غشيمه وكديش ماتصيرلج جاره .
ـ من الاخير اختصر الموضوع وياج لان مثل كل مره كلما نحجي بسالفه نتعارك وبالاخير توصلين أبوي وتبدين دعاوي عليه .
ـ أي اختصري خاتون شعندج .
ـ ما اروح وياج على بيت العميد قيس شعندي موليه
ـ أمشي ولي من يم وجهي عابت هالجهره عاد من حورج ، اخذ نهى وياي عـلـىٰ اقل تعرف تحجي مو مثلج بس تنگ .
سهى ـ أي بعد أحسن .
عفتها ودخلت الغرفه وركعت الباب وراي وصاحت
جنان ـ غضب على راسج مو باب الخلفوج تركعين بي بكيفج بكد الزمال حيوانه .
سهى ـ اللهم صبرج يا روح شلون طلابه .
سرى ـ راح تشد وياج منا لـ أسبو؏ ما تفك ياخه عنج وبعدين عـلـىٰ شُنــــوْ هالمره تعاركتوا خيـــࢪ!!
ـ أمي ما تعرفين سوالفها ، مدري منين طلعتلي تعالي نروح عـلـى بيت العميد قيس بطرانه على عمرها .
ـ سمعتها تحجي هي نهى تريد تشوفج أنتِ وياها لولده تكول بلكي واحد منهم ينعجب بيجن .
ـ كُل عقلها والله عدها سوالف أمج مدري شلون أبوي جارعها ، والله لو تكصبني ما اوصل بيتهم .
ـ كيفج دام ما تريدين تروحيــــن لا تروحيــــن مو غصب .
سهى ـ رجعت تقرأ بكتابها صف ثالث متوسط .
صار وقت الغده وسمعت صوت باب الحوش أجت نهى دخلت الغرفه شمرت جنطتها وغيرت ملابس كل قطعه بمكان ، يمتى ترتبين أضل الم وراج .
نهى ـ تعبانه راسي صدع طلاب طروا رأسي ، يله كومي نتغدا شو كاعده معتكفه لوحدج خيـــࢪچ !!
ـ تعاركنا
ـ واضح ، يلة گومي شسوين الها هي هيج طبعها .
سهى ـ لملمت الغرفه وطلعت وراها ، سرى تساعد أمي وتصب الأڪل وياها كعدنا وكامت تأكل وتحجي وذكرت أخوي علاء .
جنان ـ الزمال بالجذب ميكول خل أشوف أمي وأخواتي ، نايم بحضن مرته ياحيف تربيتي بيك .
نهى ـ اليوم ننبش الكبور الميتين ونحمس عظام العدلين ، خير يمه علاء صار أسبو؏ ما جايبه طاري شذكرج بي .
ـ من ورة أختج الزماله .
ـ يمه كلها عندج زمايل ، غيري المصطلج رحمه لهلج
ـ كديش مثل أبوج .
سهى ـ ضلت تحجي كالعاده من تتعصب وتنقهر تنفجر عـلـىٰ الكل وتالي الليل تجي يم رؤوسنا تبوس بينا وتبجي .
للعصر نايمه وأسمع ركع باب الكنتور أوف منج نهى ما تعرفين الهدوء شوي .
نهى ـ اريد من ملابسج جبه عبايه أسلاميه ملابسي كلهن بطانيل وقمصان .
ـ كمزت من فراشي ، خير شسوين بملابسي وين يا طاير ، وين السفره !!
ـ لبيت العميد !!
تعليمات ست الوالده ، يله گومي نسقيلي ما اعرف شلبس ، ملابسج كلهن الوانهن متقاربة ، شتختار دتحجي .
ـ يعني متجوز الا تأخذج
ـ أي وشكوو بيها ، عمو قيس دائمًا يجي يتفقد حالنا واحوالنه ، واجب نروح نشوف أخته مواته خطيه .
ـ بس ولا مره جاب احد من عياله وياه
ـ القصد ست سهى !!
ـ ما اقصد شيء ، كمت طلعت الها من ملابسي لبست وترتيب وكذا ورشت عطر من عطري فرغت الشيشه ادري دكافي عاد رايحه لعرس قابل هي زياره مريض
" ضليت بفراشي وسرى اخذت كتابها وراحت تقرأ بالاستقبال ودخلت أمي تخصرت يم الباب
جنان ـ كديش ما تلين رأسج تولين ويانا .
سهى ـ لا شعندي موليه روحن أنتن كافي واريد اسوي كبه خاف عمار ينزل من السليمانية باجر .
ـ أنهجم بيت الحنه والمحنه ، أمشي يمه أمشي .
سهى ـ طلعن ونهى لبست كعب وطك وطك صحت بيها لبسي فلات بالجكمه .
ـ ما عليج بيه أحب الكعب .
سهى ـ رجعت لملمت شغل البيت وطلعت اللحم من المجمدة يموع وطبخت التمن نصيت الحركة الطباخ وجريت تلفوني من الشاحن وكمت أكلب بي وصلتني رساله من نهى
نهى ـ وصلنا بيتهم ، فاتتج الحلو موجود أنهجم بيته وبيت أهله شگد شخصيه .
سهى ـ منو .
ـ أحمد ، طلع يمڪن عنده محاضره لو أعرف وين يحاضر جان رحت حاضرت وياه دروس ، أوكفي خل اسأل أخته .
ـ لاتصيرين خفيفه ثگلي ، عوفي الزلمه بحاله عيب مو النا هاي السوالف ، عمار اذا يلكفج يعدمج أنتِ وياه وتعرفين عمار شكد خبل وبعدين هو مو متزوج شڪوو تباوعين اله متكعدين راحه ست نهى .
ـ يله فهمنا يالحريصه باي .
سهى ـ عفت التلفون وتذكرت ضرغام أخر مره شفته بيها وأبتسمت همزين ما رحت جان فضحت روحي خل أكوم أشوف التمن احسن .
_____________________
هيفاء
ـ شذى أستعجلي خفي أيدج بالغده هسه يجون من الشغل جوعانين ويضل عمج يحجي علينا .
شذى - أي عمه من عيوني ، خلصت ضل بس التمن
بان گملي المقبلات .
بان ـ دزيت من المطعم بلغت محمد يجيب وياه
بيان ـ مو طيبه سويلنا مالت بيت أطيب بزعت من مالت المطاعم هسه درينا عدنا سلسله مطاعم فخمه بس مو هيج .
هيفاء ـ بان عاد أبداً ما تحب التفخخ مثل أبوها .
بان ـ سالمين ماما وليش ما أتفخخ شو اني ادرس وبابا عسكري متقاعد وعنده سلسله مطاعم وأخواني ضرغام دكتور أسنان ، أحمد مدرس وعنده محل مبايلات أياد محامي ، محمد خريج ويشتغل بالمطعم وعلي وضياء يدرسون وبيهم البركه ، عندي زلم ينرفع بيهم الرأس وما تريدني اتفخخ بيهم والله خوش يا ماما .
شذى ـ بسم الله ما شاء الله ، صلي عـلـىٰ النبي ولج
طگي الخشب لاتصيبنا العين .
هيفاء ـ المال محد يحسده غير أهله يمه .
بان ـ لا ليش بس أهله ، والعمام والخوال ويـــن راحوا عيونهم تكول عين مال طباخ هالكبره .
هيفاء ـ شعندج سوالف ، گومي ساعدي نسوان أخوانج وشوفيلي رشا ما خلصت خبز عاونيها خطيه .
بان ـ رايحه أساعدهن ست الكل بالج عـلـى الصغير والجبير فدوة رحتلج هيج الله يحبني وينطني عمه تشبهج مثل حنيتج على جنانيج الله والله بخت .
شذى ـ شعدها سوالف ، راحت واني كملت الطبخ وخليت بنتي لجين بحضن عمتي وركضت سبحت وتكشخت عمتي متقبل يجون ولدها واحنه بالمطبخ لازم نسبح ونكشخ قبل لايجون .
طلعت من غرفتي وصارت بوجهي رشا عيونها حمر باجيه ، رشا شبيج .
رشا ـ شبيه أحمد أفندي ميبطل سوالفه المكسره .
ـ شگوو يا ستار .
ـ يحجي ويه وحده وأخوانها لاكفينها وعارفينه وهاجمين عليه للمحل مكسرينه ومخربين المحل كله
عود اليوم اخذ أجازه يرتب المحل وانهجم على رأسه
ـ صخم الله وجهك عـلـىٰ هالدگه ، وهسه وينه
ـ ما أعرف منهزم ، هسه أجه محمد حجالنه وصايره نار بين عمي والولد أباب المحل فضاحه وعلي .
شذى ـ الله يستر ، عافتني ودخلت غرفتها تبجي أوف أحمد ولا تعقل شكبرك تصير ، من طاح حظك اي والله متزوج وعندك بنيه مثل الورده متوب .
" رحت عليهن عمتي تعبانه وبان لازمه جهاز الضغط وتقيس إلها وبيان تتصل محد يجاوب ومحمد معارك بالتلفون أكيد ويه عمي لن ميتفاهم أبداً .
" ڪاعدين وما حسينا غير أندفع الباب بكل قوته ودخل عمي قيس عصبي نار وتلهب ويصيح ويغلط وفشار غطوا وجهكم منا يبووو فضاحه ، ركضت سديت أذان لجين .
قيس ـ ما يصير برأسه خيـــࢪ أبنج هالعار هذا المسربت يوميه لاطش بوحده الساقط ابو دروب ابو النسوان حتى الـ ** ميشبع منه .
زوجته عبالي يعقل ويصير ادامي لا أنوب أستجلب ساقط أبن الساقط كلب كواد كح** والله لا اصلخ من جلده اليوم فاضحنه بالسوك ياهي تجي المحل يلطش الها عيني واغاتي من أنفكست عينك يل الادبسزز .
محمد ـ يابه هدي أعصابك فدوة لعينك
قيس ـ أنتِ أنجب وامشي ولي للمطعم شڪوو جاي للبيت لو ما تصدكون سالفه اصير وتعوفون شغلكم مسربتين .
شذى ـ محمد شال تليفونه وطلع من البيت فلت وكعد عمي نفسه سريع وجه أحمر وعمتي ما فتحت حلكها لن بس تحجي يكب بيها .
ومرت ساعه ودخلوا أياد وأحمد وهجم عليه عمي بوكسيات ودخل أياد يفازع ميفيد تعاركوا هو وياه
احمد ـ شُنــــوْ زعطوط اني تضرب بيه وبعدين ما مسوي شيء هي تبلت عليه ودزت أخوانها العارات .
قيس ـ الزعطوط هم أعقل منك ، تبلت عليك مو ليش أحنه غشمه ابو النسوان ما نعرف سوالفك أمشي ولي أطلع من البيت واذا شفتك گبالي خلقتك أشوهه
شذى ـ أياد باوعلي وأشرلي أروح أخذت لجين ودخلت المطبخ لكيت رشا مخليه أيدها وساكته
هاا شو كاعده أهنا روحي خابري عـلـىٰ زلمتج .
رشا ـ لا أروح ولا أتصل، اليجي من أيده الله يزيده ليش هو صغير صار أب وسوالفه المكسره ميعوفهن .
شذى ـ الله يهدي ويثبت عقله ، مر وقت هواي وصبينا الغده ، كعدنا كلنا ، خلصنا ونص الاكل رجع محد أكل بعدنا نجمع المواعين ودخل ضرغام أخر الناس ما يدري شڪوو
ضرغام ـ السلام عليكم
الكل ـ وعليكم السلام هلا بيك
ـ شُــوْ متأخرين بالغده شعجب
قيس ـ من ورى سوالف أخوك السگط .
ضرغام ـ خيـــࢪ
هيفاء ـ روح غير ملابسك وتعال أتغدى ونحجي
شذى ـ صعد لغرفته وبان حضرتله الاكل واني صبيت الجاي واخذته الهم ونزل ضرغام بلش يتغدى وعمي گال
ـ المحل ينقفل بعد ما ينفتح هذا مو مال شغل
يوميه مسويلنا طلابه الله يكصف عمره .
ضرغام ـ شتسويله حجي هو يكبر ويعقل .
ـ منو يعقل !! هذا يعقل ، كلها تصير برأسها خيـــࢪ الا هو الاعوج يضل اعوج مثل ذيل الجلب مينعدل .
هيفاء ـ كافي يا حجي ، تحرك بدمك من رجعت لهسه عوفه ، هو يحس بذنبه بلكي يتوب منها وما يعيدها
ـ أدعي الله يتوب لن هاي اخر مره ما اسكطه بيها .
شذى ـ عافنا وراح لغرفته وضرغام كمل الاكل بيان شالت المواعين وعمتي تحجي بقهر عـلـىٰ أحمد
هيفاء ـ ما يعقل ما يصير برأسه خيـــࢪ ، جاب العمر بهل الكلمتين طبعًا مشه عليهن ما سمع غيرهن عقد الولد بكلامه .
بان ـ ماما لا تزعلين أنتِ هم الج دور بخراب أحمد متقلبين احد يحجي عليه وهواي مدللته وعينه طلعت من يشوفج من جانبه .
ـ هاا رجعتي عليه ، حلكج ينسد من ابوج كاعد ، بس من يروح تطلعين لسانج بطول النعال عليه وتكومين تهلهين .
ـ قابل مكذبه
ـ شو سگتيي لأ أكوملج عابتلج
شذى ـ بان يمعوده سگتيي ، بالكوه سكتت أجه ضرغام بيده كوب الجاي هذا الوحيد بهل البيت ماله صوت هادئ الى درجه وحتى اذا يحتاج شيء ميطلب من احد يخدم نفسه بنفسه ، حتى قليل يشارك ، عقله كاعد وراكز عكس أحمد نار وشرار ما وراه بس المشاكل والصوت العالي .
هيفاء ـ أحجي ويه أبوك خل احمد يرجع البيت أخاف أخوانها يذبحونه ، گلبي مثل النار عليه .
ضرغام ـ وين يجي هسه متشوفين أبويه شلون أعصابه فايره عليه ، خلي يومين ويلفي البيت وين يروح قابل
. وبعدين عمتي مريضه وكت مشاكل وعياط رحموا حالها ترى الهدوء مطلوب مو مخابيل انتوا .
ـ أكولك گلبي ما مرتاح تگولي عمتي مريضه اني وين وأنت وين شُنــــوْ متحسون بيه أني أم
ـ رايح أجيبه أرتاحي .
ـ أي فدوة لطولك
شذى ـ راح وللمغرب يله رجع وأحمد وياه عمي أول ما شافه هجم عليه ويضرب ويغلط وفشار والصوت شعلوه
قيس ـ والله اليوم ابرد گلبي بيك يالسكط عار ابو النسوان و *** مو جنت ** شجابك انعل يومك ويوم اهلك .
شذى ـ دخل ضرغام بالنص وسحب احمد على صفحه وعاط بيهم
ضرغام ـ گافـــــي بس خلاص ما شبعتوا معارك معارك ، ما تكولون أكو مريض بالبيت لو ماكو لا ذمه ولا ضمير ولا أحسّاس ، شُنو من بشر أنتوا .
وأنت شوكت تعقل وتبطل سوالفك شكبرك تصير مو تزوجت ومرتك عين الله عليها وعندك طفله مثل الورد ما تحمد ربك وتشكره وتنجب وتوكف بكاعك لو تنكرص اذا ما تتحرك دمك يغلي بسك عاد ، ومن باجر المحل ينقفل لما تفض السالفة عوفه هالشهرين
والتهي بوظيفتك .
قيس ـ سمعت يله أمشي ولي لغرفتك .
شذى ـ احمد سكتت وما رد أول مره يسگت مو من عوايده وأخيراً حل الهدوء وطلع أياد من الغرفه وأبتسم على الوضعيه وتقدم گرصني من خدي يمعود مو وكتك
أياد ـ ردت اهد عليهم بس ابوي يفشلني ادري بي لهذا سكتت ومعروف ابوي يحترم ضرغام واخيراً
حجه وفضها .
شذى ـ اي همزين ، كعدنا كلنا وعمي باوع على بان وگال
قيس ـ عمتج فاطمه شلونها اليوم .
بان ـ بغرفتها روح شوفها .
ـ نجبي مثل أخوج .
ضرغام ـ ما تعرفين تردين مثل الاوادم ما عندج منطق مو تشوفينه نار وتلهب .
بان ـ والله تهمه أخته المريضه جان ما ضل يصيح من الصبح لحد الان يكدر يحل المشكله بغير مكان او بالهدوء وبعدين ما يروح الغرفه ويشوفها من بعدها
ـ ليش الهدوء يعرفكم تعرفونه عم خال ، والله يالله .
هيفاء ـ خلص بس عاد أنوب عليه أنتوا ، بان لسانج ويه ابوج واخوانج كصري مو وكت مرادد .
ـ سگتناا ، هاا اجانا خطار كملت تعالي بان قدمي ضيافه اوي شهل العيشه .
هيفاء ـ وجعوا شبيها عيشتج بس تبطرين ، امشي جهزي الضيافه شذى أستقبليهن هاي مرت صديق أبوك نجم ، زوجته وبنتها .
شذى ـ ضرغام صعد لغرفته ودخلتهن البيت وسلام ومباوس وبان جابت الضيافه وطلع احمد يفر بالسويج ، صاحت عمتي عليه .
هيفاء ـ وين
أحمد ـ عندي شغل .
شذى ـ رجعت كعدت يمهم سوالف وسألن على عمتي فاطمه وَ؏ صحتها عاد عمتي گالت إلها .
ـ والله على الله تعبانه خطيه
ـ الله يشفيها ويعافيها ، اي شلونكم البنات المتزوجات شلونهن .
ـ الحمدللة كلهن بخير ، شعجب ما جبتي البنات وياج
من زمان ما شايفتهن لو يم ابوهن .
ـ لا يمي بالبيت ، سرى عدها دراسه وسهى خليتها تسوي كبه ، ان شاء الله على الجايات يجن وتشوفيهن .
ـ أن شاء الله حَـبيبتي .
شذى ـ للمغرب كامن عزمتهن عمتي ما قبلن وبالطلعه أحمد دخل ودك صدره هو يوصلهن .
احمد ـ وين صدك جذب ترحون بالمغربيه والله تبقون على العشه
جنان ـ لا يمه عشاك واصل تسلم عزمتنا امك قبلك ما نريد نكلف عليكم وما ضل وكت لازم نرجع البنات وحدهن ما اكدر ابقى تسلم ومتقصرون والله .
أحمد ـ عـلـىٰ راحتج عمه اللي تريدنه يجرالج ماطول البنات وحدهن ما نكدر نضغط عليج ، بس اذا هيج اني اوصلكم مصير ترحون وحدكم تفضلوا اصعدوا
شذى ـ صعدوا وعمتي تعض بشفتها اله وتتوعد ، ما انصت ألها شغل السياره وطلعوا .
هيفاء ـ شگد خفيف هالولد ، لو ادري جان گلت ضرغام يوصلهن خطيه شمدريني المطيور يلكف عليه
أمشي امشي هذا راح يجلطني من وگت .
___________
سهى
ـ تأخر الوقت وهنأ ماكو ، أدري كالوا زياره المريض تڪون قصيره مو هالثخن ، نصيت حركه الدهن ولبست حجاب الصلاة وطلعت باوعت ماكو توني فتت دك هورن باوعت سياره عاليه طبگت يم بابنا وأمي ونهى نزلن منها رديت الباب وأسمع امي تحجي وياه .
جنان ـ مشكور يمه ما قصرت الله يوفقك تعبناك ويانا
أحمد ـ لا عمه شسالفه ما سويت شيء وتعبج راحه وبعدين أحنه أهل .
ـ اي والله ، يله عيني نترخص منك يلة نهى أمشي .
سهى ـ دخلن ونهى غمزتلي ورديت الباب وراهن ودخلت لحكت نهى خيرج تغمزين شعندج وهذا منو الوصلكم البيت .
نهى - حجيتلج عنه فديت شخصيته
ـ بله مياعه وخفه دم ، مـنو !؟
ـ الاستاذ أحمد بشحمه ولحمه هو بنفسه وصلنا بسيارته .
ـ ها خير إن شاء الله وليش طولتوا هالكثر جان تعيشتن يله ، لو جاي أبوي بالصدفه وما لاكينج بالبيت شتبررن موقفجن كدامه .
جنان ـ خير حجه المفتي مالنا ، شعندج مثل أبوج قنقينه تحجين بطارف خشمج .
ـ هيج ماكو شيء .
ـ يله صبن عشه جوعانه ، فحم گلبي من الحلو أكلته بيتهم هاي بان جابت جگليت عباره عن كاكاو هالكد طيب ، نهى باجر من تروحيــــن الأسواق دوري عليه وجيبي منه ، طيب من يجينا خطار نضيفهم من عنده مبين راقي .
ـ يمه هذا مال طاگين
ـ دوري وبله لغوه زايده .
سهى ـ عفتهن ودخلت المطبخ ادري شناقصنجن عنهم أبوي هم عسكري متقاعد لو بس العبد يرضى بعيشته جان الدنيا بخير .
لليل جنت أغسل مواعين وأندك الباب رحت فتحته أبويه حضنته شلونك بابا صحتك شونها .
نجم الدين ـ بخير بنيتي ، تعالي ابوج مشتاقلج أخواتج وين وأمج شلونها .
ـ كلهن بخير ، أتفضل بابا ، جان كاشخ وعطره فايح نفس كل مره نشوفه بيها دائمًا أنيق ومرتب وشخصيه فدوهہ لطوله .
" فتحت اله باب الاستقبال وركضت ألهن أمي عرفت بي جاي گلبت وجهه وغمتنا گلنا .
جنان ـ تراكضن عـلـىٰ حضنه ما أوصيجن .
نهى ـ يبقى أبونا ، شنسوي يعني طبعًا نروح نسلم عليه لعد هو ليش جاي ومتعب روحه .
ـ هايہ عود أنتِ الزينه بأخوتج وسانده گلبي بيج طلعتي مثلهن متفرقين عنهن .
سرى ـ أني رايحه أسلم عليه .
سهى ـ ها نهى تجين لو تبقين واكفه .
جنان ـ روحن كلجن هسه اجي وراجن .
سهى ـ دخلنا عليه وكُلش فرحان بينا ورحت جبت الجاي وشفت أمي واكفه على المرايا وتلفت ما خليتها تشوفني ، شفت بيدها كحله وخلت منها أوف يا يمه شصير لو تتنازلين عن كبريائج وتتقبلين واقعج وضرتج .
" أجت وتعدل بروحها اخذت نفس ودخلت وأني وراها قدمت الجاي ونظرات أبوي إلها ما شال عينه عنها بس هي تكابر وتعاند وكسرت الصمت نهى .
نهى ـ أي بابا جنات وأيهاب شلونهم .
نجم الدين ـ بخير كلهم رادوا يجون وياي بس گلت غير مره وامهم تضل وحدها .
جنان - ليـشہ عدكم عتوي بالمنطقه لو واوي يأكل .
سهى ـ أحمم اي بابا بات يمنا فدوة والله مشتاقين ألك ، گلت هيج وأمي گلبت عينها عليه .
نجم الدين ـ لا بنيتي ما أكدر أبات .
سهى ـ أباو؏ لـ أمي وأبوي حالتهم حاله أوففـہ لو ما متزوج وعافنه بهذاك اليوم اللي خرب نظام حياتنا كلها وگلب امي كلاب صارت أنسانه ثانيه بعد كسرة أبوي ألها صارت ما تتحمل اي شيء .
مرت ساعه وكام سلم علينا وحده وحده وطلع وأثناء طلعته گال
نجم الدين ـ عمار باجر يجي مو ان شاء الله
سهى ـ أي بابا باجر يجي .
ـ خير إن شاء الله ، عود أمركم من يجي ، يله بابا اودعانكم سهى حَـبيبتـي هذا المصرف ودربالج على أخواتج ما يحتاج أوصيج بعد .
ـ أن شاء الله بابا ، طبعاً أمي ما طلعت ضلت بالاستقبال بس احنه وصلناه الباب وراح الله وياه
رجعت وخليت الفلوس يم أمي شمرتهن بوجهي .
ـ خيولي هو وفلوسه ، مسوي فضل علينا بهل 150 والباقي بخت مرته وجهاله معيشهم بالعز والدلال وبيت طابقين واني وأنتن بيت قديم ، موت كرفه هو وجهاله عود حنين جاي يسأل عليجن .
سهى ـ ماما ليش الدعاء مبيها داعي دعواتج وكلامج شنسويله يعني أبونا رضيتي أو زعلتي شطالع بيدنه عليج يا عيني .
ـ أبوج وكاتلتج المحنه وما تقبلين أحجي عليه روحي ولي سكني وعيشي يمه شگو مكابله جهرتي ولسانج متر ، بنت أبوج طبعًا أدافعين اله قابل توكفين ويه أمج اللي ضحت وصبرت علمودجن خرب بحياتي .
نهى ـ سهى گافـــــي .
سهى ـ سكتت وشلت الفلوس ورحت لملمت المطبخ
وأسمعها تبجي ونهى تسگت بيها ، أوف هسه أني ليش ما أسكت هي گلبها محروك وحقها شجاني رديت سوده بوجهي أي والله .
الـ ثاني يوم أجه عمار وأمي وجهه مكلوب ما إلها خلك لأي أحد حتـَـہ عمار استقبلته من ورى خشمها ولاحظ عليها ومُباشرةً گال .
عمار ـ أبوي جان أهنا مو وحالة امي حالة وضعها ما يسر الخاطر ، خوما تعاركوا .
نهى ـ اي جان اهنا ، لا كالعاده من يروح تفرغ گلبها بينا شنسوي ألها يومين ثلاث ترجع لطبيعتها حقها .
عمار ـ أبوي هم عناد بالجذب ميحاول يصالحها ويراضيها بكلمه طيبه ويجبر گلبها المكسور .
سرى ـ ليش بابا قليل حاول وياها ، هي ما تريده بعد وما طلبت الطلاق من ورى عيب الناس تضل تحجي مطلقه وخافت تجينا سمعه بنات المطلقه .
عمار ـ طز بالناس واليحجي هم ، يله صبن غده جوعان وجبت وياي مكسرات وشغلات تحبنها بالجنطه وبقن لعائلة علاء خطيه أفرح الجهال بيهن وهاا ما اوصيجن لاتجيبن طاري لأمي تعرفن ماتحب تنذكر سيرة علاء .
نهى ـ ميحتاج توصي ، يله رايحه أصب غده سهى أمشي وياي .
سهى ـ صبينا غده وأمي أكلت لكمتين وبس صافنه
للعصر عمار أخذ الحلويات وراح لبيت علاء اللي شوفته حسره علينا هو وجهاله من يوم تعاركوا هو وأمي علمود زوجته وعاف البيت وطلع وأمي زعلت عليه ولحد الأن هالزعل مستمر .
" كلمن بفراشها وأني أكلب بتلفوني أيديه أخذتني لحسابه وأباوع لصور مالته ، أحس عايشه علاقه حب ناقصه فقط من طرفي ، من يوم شفته بفاتحة جدي الله يرحمه اجه هو وأبوه وبليل أبوي ما قبل يرحون ضلوا عـلـىٰ العشه بوگته من شفته گلبي لحاله يدك وحده ، وما أعرف أسميها حب أو مجرد أعجاب بشخصه .
طلعت من حسابه وطفيت تلفوني ونمت كعدت الصبح نهى طالعه تحاضر وسرى كالعاده تقرأ جانت اشطر وحده بينا وذكيه ، أما أني حياتي خاليه من أي شيء فقط البيت والتنظيف روتين ممل وقاتل ربة بيت مثل بقيه النساء تخرجت وكعدت .
عمار شغله عماله بسليمانيه ماشيه اموره مرتاح وهو نفس الوقت مبتعد عن المشاكل وأختار هذا الشغل عمداً رغم هو كلش ما يحب طلعات كتل عليه بس من بعد زواج أبوي والمشاكل صارت بينهم أعتكف .
" مرت أشهــࢪ حياتنا طبيعيه وسرى كان اخر أمتحان ألها الحمدلله جاوبت ، بس نهى دومها شارده وبالها مو برأسها حاولت أفهم منها شبيها كانت تتهرب ، نهى بطييتعها كتومه وأكثر مكان يفهم شبيها هو الحمام تقفل على نفسها وتعزل روحها بي .
الى بيوم دخلت الغرفه وجان تلفونها ؏ الشاحن وأجه أشعار وأخذني فضولي ، فتحته واعرف رمز جهازها وشفت الرساله من حساب رجال والصدمه الرسالة جانت تحجي
ـ أني زوجته ياريت تفهمين شعوري كأمراه وتبتعدين عن زوجي والله يعوضج أحسن منه ، فكري زين !
ـ ما أعرف شحجي عفت التلفون مصدومه معقوله ملاحگه متزوج ومأخذته من مرته خرب بيج وبگلبج
يا نهى على هالحب المصخم مثل وجهج .
" دخلت باجيه وعيونها حمر ، قفلت الباب وجريتها
شُنــــوْ هذا الصخام بتلفونج قحط زلم خلصوا ضلوا بس المتزوجين ولج يمعزايه تهدمين بيته وتحركين گلب مرته علمود مشاعرج الزفت .
نهى ـ وأنتِ شعليج بحياتي !
سهى ـ لا والله شُنــــوْ شعليه أختي وغصباً على راسج المتبن فهمتي لو لا ، واجبي أنصحج وارشدج
ـ أوووي فهمنا ، ولي من رأسي أنتِ ونصائحج ما ناقصتج وبعدين أني مو طفله تكعدين تنصحين بيه أعرف أتصرف ما أحتاجتجج .
ـ لأ واضح هواي تعرفين تتصرفين ، شُنـــــــــــــو هايہ الرساله ممڪن تلگين تفسير مناسب ؟
ـ أحبه وشُنو الغريب !
ـ تحبينه ومن كل عقلج ، يالعار متزوج !
ـ وإذا متزوج قابل حرام الشرع حلل أربع
ـ الله حلل بس ما گال أهدموا بيوت عامره ، زوجته لما الضيم شابع گلبها ما تنزل نفسها الج وادزلج رساله تتوسل بيج تعوفينه أذن هايہ مرتاحه ما تريد بيتها ينهجم ، لهذا يا نهى شغلي عقلج وعوفي الزلمه لمرته وجهاله وأبتعدي بدال الخطوه الف فاهمه عليه لو لا .
ـ ما أبتعد أحبه ويحبني ونريد نتزوج شُنــــوْ الغريب بالعلاقه من بدايتها زواج قابل حرام .
ـ حرمت شلتج يالخايسه ، لما خايسه ما لحگتي متزوج ، أبقي بهذا الحب واذا نفسج مو غاليه عليج ترضين بالقليل والمشاركه طاح حظج أنتِ وحبج .
ـ لا تتدخلين بحياتي فاهمه وهذا الموضوع ما يحجي بي لا كدامي ولا وراي .
ـ طبج مرض
ـ ميخصج .
سهى ـ جانت عناد ورأس يابس ماكو نتيجه حبها الاعوج طغىٰ عليها وخلاها تستمر بالعلاقه أساسها خراب والله شُنــــوْ نتزوج ، أكص إيدي إذا نيته زواج
" حاولت أمنعها أڪثر من مره ما كدرت إلها وصلت بيه أكول لأمي عليها بس كسرت أيديه ورجليه من گالت !!
نهى ـ بس تحجين لأمي حرف ، أني هم أحجي عنج
سهى ـ شتحجين ولج ، ما عندي شيء أخاف منه والحمدلله ما مرتبطه بإي شخص .
ـ متأكده .
ـ شقصدج ست نهى !
ـ قصدي واضح هواي ، لاتحاولين تنكرين حبج لابن قيس العبدالله ضرغام !! .
ـ شتحجين أنتِ .
ـ ها خفتي وأرتبكتي أذن تحبينه .
ـ لأ احبه ولا عندي شيء وياه لأ تألفين من عندج وتتبلين عليه علمود تخلصين نفسج مني .
ـ ومحادثاتكم أنتِ وياه !
ـ عفواً ويه منــو مـّنو ؟!.
تسمع اذن شُنــــوْ يحجي حلگج الوسخ شهل التبلي أنوب محادثات .
ـ لا تكذبين وعيونج فاضحتج بحبه ويحجن گلشي ترى لا عبالج غبيه وبس أنتِ الوحيده الذكيه لا حَـبيبتي أني مفتحتلج بالماء العگر ، أنتِ وضرغام عـلـىٰ علاقه حُب ومن زمان لهذا أسگتي أحسن الچ .
ـ لا حُب ولا بطيخ ماكو هيج شيء روحي عني أنتِ وكذبج وأفتراءج عليه ، رايحه أكول لامي على سوالفج الخايسه ويه رجال متزوج .
" كمزت من مكانها وخلت شاشه تلفون بوجهي باوعت أعجاب لصورته بإسمي . !!
ـ شُنــــوْ هايہ !!
ـ ليش طلع كدامج .
ـ أي طلع كدامي وأبداً أبداً يا اختي العزيزه ما بحوشت بتلفونج وشفتج شلون نايمه بحسابه وسجل البحث عباره عن أسم ضرغام !!
ـ نهى
ـ نعم أختي العزيزه
ـ أحجي العندج وهسه ما عندي شيء ويه الرجال وأصلاً أمي تفرح اذا واحد من ولد قيس ينعجبون بناتها صح لو اني غلطانه .
ـ لا حَـبيبتي أمي تحب ماليه وفخامه قيس بس تكره اشكالهم وغرورهم الزايد .
ـ لعد مو جانت تريد ينعجبون بينا شُنــــوْ اللي تغير
ـ لا تصيرين رخيصه .
ـ عصبت عليها ردت اهجم بس تمالكت نفسي هالمره أعديها الج مره ثانيه ميصير خيـــࢪ لن گمتي تجفصين بسوالفج .
ـ مو أنتِ كلمتج تغث شجاوبج لعد ، وبعدين گتلج تحب فلوسهم بس تكره غرورهم معناها تتمنى المكان الزين مو الشخص المغرور وشايف نفسه وأمي تحب اللي يندك بينا مو أحنه نندك بيهم ونزل نفسنه الهم
يعني لا تأخذين فكرة الغلط عن أمي ، لن أمي عمرها ما فكرت تشمر بناتها بوسط بيئه يتظاهرون نفسهم هما وبس اوك يا ست سهى العاقله والفهيمه .
ـ أكلج تعالي تعالي شو عبالك لفتي السالفة يمين ويسار ولطشتي بيه ونسيتي نفسج شمسويه .
ـ لن أثنينا واكعين نفس الحفرة
ـ ما عندي شيء وياه لاتشمليني وياج .
ـ بس تحبينه ومراقبته وبعدين شگد قديمه من ضال يحب من طرف واحد ، عليج الله متملين لوحدج .
ـ شعليج أنتِ .
ـ أهاا وهسه ثبت الشك باليقين .
ـ حقيره .
ـ أنتِ لا تحجين لأمي ، وأني ما أكول ألها مراقبه حساب ضرغام ومحتفظه بصوره وتحبه وناويه تحجي وياه .
ـ ما ناويه لا تلوصين بكلامج من كيفج .
ـ هأ أتفقنا حبابه والله أحبه شعليج بينا هو القاضي راضي بگلشي فدوه لعينج .
ـ يعني مقتنعه بعلاقتج برجال متزوج صح وراح تأخذ مسارها الصحيح اللي هو الزواج على حساب دمار عيشة غيرج .
ـ أي ما مسوين شيء غلط هو يحبني وما مرتاح بحياته ويريد يتزوج اذا مو اني غيري ، ليش تبالغين
ـ أن شاء الله ما تتندمين .
ـ ما أتندم لتخافين .
سهى ـ عفتها ودخلت سرى تباوع النا .
سرى ـ خيـــࢪ شبيجن متلاغيات وجوهجن ما تفسر خوما تعاركتن علمود الشاحنه .
نهى - أي لن أخواتي العزيزات ما يكلفن على نفسهن ويشترن شاحنه جديده لازكات بشاحنتي ، يلة بعد كم يوم أشتري شاحنه ويا ويلها تشحن بيها .
سهى ـ طلعت نفسها من السالفه شيطان منــو يگدرلج ، طلعت لگيت عمتي يمنا كاعده بالحديقه وتحجي ويه أمي وسمعت طارف السالفه مرت ابوي تقدمت وسلمت شلونج عمه .
سهيله ـ الحمدللة زينه وأنتِ شلونج .
سهى ـ زينه ، أجيبلجن جاي
جنان ـ لا ما نريد عوفينا لوحدنا وشوفي أخواتج .
سهى ـ تمام ، عفتهن وسالفتهن على مرت ابوي بس لا تسوي سالفه ومشكله اوف يا يمه هايہ مو سوالفج شلج بيها .
مرت فترة وأمي علاقتها تحسنت بعماتي وكامت تروح وهنا يجن إلها وهذا الشيء ما مرتاحه اله ، جانت نهى طالعه عدها محاضرات دورس خصوصي وعمار راح الله وياه وبس اني وسرى بالبيت أندك الباب جريت شالي وطلعت فتحت الباب وشهگت وجه لوجه شهگت ورديت الباب ، ضرغام !!
يتبع .. بدايه جميله والروايه مو مطوله قصيره وحلوة أحداث عائليه شيقه وراح تعجبكم حبيابي ♡
" وأعتذر جداً ما أكدر أستقبل قصص لن عندي كم قصه يردن مني نشر ووقت وهايہ الروايه نشرتها لن قصيره وبوقت قصير نختمها أن شاء الله وجميله كُلش وراح تحبونها .