تحضى نار قلبي

حلقة التاسعه والخمسون

تحضى نـار قلبي
التـاسعة والخمسون
.....
چن هانت عليك عشرتنا وصارت عادي تحب وتشتاگ لغيري يـا محلى غيرة بعيني..!
...
قبل فترة سويت قناة تلي إلي تريد الرابط تراسلني خاص او تلگونة بالمنصة أشتركو بيها فيروزاتي
..
تفاعلو على الفقرات وراعو تعبي .

گعد عمي وسمعت صوت ياسين يهدء بي..
ربع ساعة دخلو للصالة

وياسين عاط على مصطفى
_غبي هذة أبوك تمد أيدك علية من أهمدة هل شارب اللازك بوجهك.
كل إلي يسوي على مودكم بس أنتم كواو.. ما تستاهلون لو ذرة من نياتة.

صد على عمي وحچة بحرگة
_والله لو بيك حظ لاتسوي شيء وخليهم يطكهم الدهر.

هز راسة عمي وتنهد بقوة
صد عليهم وگال الهم
_طلگت أمكم.

شهگت سلر ومصطفى ضحك بصوت مرتفع..
رد خالي
_ليش أستعجلت؟

رد عمي بكلمة وحدة
_أحسن.

حچت سلر من بين دموعها
_لا بابا فدوة اروحلك رجعها لذمتك..

أبتسم بحزن وحچة
_ما يصير بعد يروحي

ردت
_ليش يا بابا والله يصير..

رد عليهم ياسين
_طلکها بالثلاثة وما چان عصبي ولا متسرع لان ماخذ وقت يفكر بي وهل شيء يحرم يرجعها.

شهگت وزاد بچيها
_ليش بابا شلون هانت عليكم عشرة العمر والسنوات إلي قضيتوها بحلاها ومرورتها.

رد عمي بأنكسار
_من أيدها ما صانت عائلتها ولا عارت أنتباه لبيتها..

ضحك مصطفى بستهزاز وگال
_ دام صار بيها صون ومون أگوم أشرف إلي وأنتو أبقو أكلو بلحم أمي .

مشى خطوات وصل باب والتفت گال
_أمي مستحيل أتركها وأنتَ خلي الصون والمون يفيدك.

طلع من البيت بدون ما يضيف كلمة
عمي أختنگ لزم صدرة وگال
_جاهل مايعرف مصلحتة مصيرة تطيح حظة امة.

سلر:هسة غير تفهمني أمي شنو مسوية والله گلبي وگع من البارحة واليوم نوم عيني مشايفة ..

أشر إلي ياسين على المطبخ
رحت گدامة
تقرب علية وگال
_سوي نومي بصرة لعمچ..

بدون ما أجاوبة سويت النومي.
والتفت على ياسين فاتح الثلاجة أخذ بندول وگعد

حضنت أديني وحچيت
_شببك؟

لزم راسة وگال
_مسطور وعيني تحرگني.

زفرت نفسي وحچيت
_خااف الشقيقة

هز راسة بقبول وگـال
_ قابل أكو غيرها

گام وگف وفتح عيونة بقوة وگال
_قزحيتي عمچ متأذي أنطي النومي واليوم أحتمال أخلي يبقى هنا خاف يصير شيء علية ..

سرور: و بيبي منو يبقى يمها
ترى چبيرة بالعمر مو مال تبقى وحدها.

صفن علية لحضات بعدها گال
_ أتصلي عليها وعزميها على العشا واني أمر عليها أجيبها وباليل ما نخليها تروح بحجة الوقت تأخر وهيچ نضمنهم ثنينهم .

أبتسمت وحچيت
_شدعوة هلگد حنين أنتَ

بادلني الأبتسامة بطرف شفتة وأردف
_لان عاشرت أحن أنسانة بهل كون وتعلمت على الحنية منها.

طلع من المطبخ بعد ما رسم الأبتسامة على ثغري..
تنهدت براحة وحچيت بگلبي
_شگد أحبك ما تگلي.

فار النومي طفيتة وسكبتة بكوب وأخذتة لعمي.
أنطيتهيا أخذة مني وأحتسا مرة وحدة وهوَ حار يفور

هز راسة ونزل الكوب
رفع راسة علية وگال
_يرحم والديچ بنيتي.

أبتسمت طرف شفتي وحچيت بهمس
_آميين يارب

گعدت على طرف وأشوف شديصير وياهم.
عمي حالتة يرثا لها ساعة يعصب ساعة يهدئ
وسلر تبچي ما تسكت إلي يگلك فاتحين تنكر مي بعيونها مو دموع.

وخالي كالعادة يهدئ بيها
آخر شيء ياسين أقترح لعمي أنو يحچي ليش طلگها حتى تفض السالفة.

تنهد عمي وحچة بصوت مبحوح
_أمچ يا سلر سودت عيشتي تتفق ويا أخوها على خسارتي وهدمان شغلي..

خسرتني ملايين بشهر واحد وسرقة محل الذهب هيَ وخالچ مشتركين بيها.
من غير إلي عرفتة يوگف شعر راسچ..

سلر :وبعد بابا شنو إلي يوگف شعر راسي
بابا حبيبي ترى بنتك چبيرة مو صغيرة وتضم عليها .
گلي شنو السالفة كاملة لاتخليني أفكر ..

رد علية ياسين
_ أبو مصطفى كل الموجودين يعرفون بالي صار
وبنتك بهذاك اليوم راحت لشقة علي وبوقتها سرور يم خالها مقيمة.
وهم أسعفوها للمستشفى.

عمي شكلة أنصدم بحيث فتح عيونة وصد على خالي وعلية واني اطرش بالزفة.

صد على سلر ودمعن عيونة
نزل راسة وگال
_عذريني بوية ما گدرت أحافظ عليچ وأنتِ بنص بيتي..

هنا طخت عندي وفهمت قصد ياسين
سلر من سمعت كلام عمي زادت بالبچي وارتمت بحضنة تبچي وتگول
_لا بابا لاتطلگ ماما بسببي..

رد عليها عمي
_ الله يطردها من رحمتة إلي تسوي هيچ ببنتها شترجة منها وشلون أمن بيها ..
إذا هيٕ بنتها ما صانتها وحافضت عليها وخلف الله على الغريب حن عليها..

وصوجي اني يروح أبوچ ماعرفت البيچ ولا حاولت أعرف شبيچ گدام عيني تذبلين وما سويت شيء..
تمنيت الله ياخذ امانتة قبل لا أعرف إلي صاير وياج..

دموع عمي إلي نذرفن وبحة صوتة عذبني
خاصة من رفع راس سلر ومسح دموعها بأصابعة وكال الها
_بوية وحق من خلق آدم أخذ حقچ وأندمة على الساعة الفكر يمسچ بيها..

ما أطلع محسوب على الزلم إذا ماخليتها هوَ وأمچ يشحوتون بالشوارع وأحاسبهم على كل دمعة نزلت من عويناتچ عساهن يحرگنهم حرگ..

ميلت راسها وحچت بصوت بالگوة يطلع من گد ما تشاهگ
_لا عفية بابا لاتسوي شيء رب العالمين يحاسبهم عوفهم فدوة أروحلك..

رد عليها عمي
_لا والخلق آدم إذا ما أشوفهم نجوم الضهر ما أطلع زلمة خوالچ لعبو بمصيرهم بيدهم وبدت وياهم يا اني يا همَ.

العيـن بالعيـن والسن بالسن والبـادي أضلم.
همَ بدوها ومسوچ وأني أنهيها وياهم.

أبتعد عنها طلع من يمنة لان جهازة دك..
باليل ياسين جاب بيبي بقو يمنة.

ومرت الايام والأشهر بسرعة وبعد مدة عرفنة بـ أبن خال سلر دخل السجن بتهمة
وأهل أم سلر خسرو كل شغلهم ..

و الأهم أم سلر أختفت ومحد يعرف شيء عنها.

سلر وخالي حياتهم خاصة بيهم أبد ما خلو أحد يدخل بينهم.

أكثر شيء كسرني قبر عمي أبو منال إلي أختفى و مالة وجود يعني غريبة قبر شگبرة شگدة يختفي بدون علم أحد.

بنيامين وياسين أخذو موافقة حتى يرجعون يحفرون القبر والصدمة ماكو كل أثر ..

كل شيء سوو فشل أيجاد عمو فص ملح وذاب.
شكيت بعمام منال بس ياسين گالي
هم خابصين الامة وحتى شاكين على الدفان إلي يحلف ويتكفر أنو هوَ ما دافن.

رغم شهادة الوفاة موجودة وما ساعدتهم بشيء
وأنعادت علية مأسات ولادتي إلي هي المفروض افرح بيها بس رب العالمين أخذ مني روحين أعز من روحي..

بدل ما أسوي عيد ميلاد سويت دوران سنة على وفاتهن..
رجعت قوت علاقتي بياسين وغيمار
خاصة هوَ بلش يمشى خطوات ويناغي بعدة ما يحچي رغم كمل السنة وأشهر. ..
حياتنا هادئة لدرجة مو طبيعية

مرتضى حاول أكثر من مرة ويا برشة وهيَ قافلة أبد ما تقبل.

گاعدين اليـوم بالصالة شايلة غيمار وأحچي ويا أريدة ينطق ماما وهو يردد ببا تعبني من گد ما حچيت ويا وأقنعه يگول ماما.

آخر شي ضحكت برشة وگالت
_عليچ الله ما تعوفي ترى تعبتيني والله هو قافل على أبو أنتِ شحارگ حمامچ عوفي يختي

رديت عليها
_لا والله قابل هي هيچ صار ساعة أحاول وهو لازك ببابا

برشة :شكلچ نسيتي هو تعلم على أبو لان نص عمرة بحضنة.

زفرت نفس وحچيت
_ذلي بعد خاف ناقص

ضحكت بصوت مرتفع
وتنهدت وحچت
_سريوة

رديت
_هاا شكو

سكتت لحضات بعدها گالت
_اني ومرتضى صار النة فترة نسولف سوى

رديت عليها بعدم أهتمام
_أعرف وداعتچ شنو الجديد

زفرت نفسها بقوة وگالت
_أحبة والله

سرور:وافقي على طلبة لعد
الولد شاريچ ويريدچ.

برشة:ما أعرف بس أحس راح أنكسر من عندة ولهل سبب متخوفة .

سرور _لا تسبقين الاحداث برشانة

گامت وگفت وگالت
_شنو هل حديث البايخ اييييييع عوفي خليني أروح أرتاح .

ضحكت على كلامها وهي راحت.
نص ساعة تقريباً واجى ياسين صدمني من گال
_حضرو روحكم نروح للنجف.

عرفت منة بعد ما الغدا نطلع أنطيت علم لبرشانة وصعدت حضرت أغراضنة لان نبقى أسبوع..

نزلت يم ياسين گاعد يتغدا صد علية أبتسم وگال
_ كملتي أغراضكم

هزيت راسي بقبول وحچيت
_شنو السر ورا هل سفرة المستعجلة

ضحك بهدوء وگال
_نغير جو
عندچ مانع؟

رفعت حاجبي بشك وحچيت
_ليش لمانع بس تغيير جوك أبد مو بالصيف بعز الشتا شعندك متگلي وأهم شيء شغلك تتركة أسبوع كامل؟

گام وگال
_ والله مو وجة رحمة
خليچ بين أربع حيطان لا طلعة ولا طبة.

غسل أدينة وحچة
_نص ساعة إلي ماتكمل خلي تبقى تحرس البيت.
عن نفسي صاعد أغير وأطلع أعبي بانزين وأرجع أريدچن واگفات بالباب بس أدك هورن تطلعن.

مشى حتى قبل لا يخليني أحچي
هزيت أيدي ورحت لبرشة سولفت الها وغسلت المواعين بين ما خلصت ردت أصعد نزل هوَ مكمل على آخر حبة..

ردت أحچي سبقتني برشة تگول
_أكلك أبن خالتي بدون ما تجامل گول النة
خو ما تريدنا نخطبلك فد بنية مناك؟

رد عليها
_عندي أغاتهن شسوي بيهن.

برشة:دام عندك أغاتهن وزلغت روحك على أغاتهن چا المن هل كشخة والعطر واللبس
إلي يشوفك يگول هذا اليوم خطبتة ومتحضر .

حضن أدينة وگال
_يعني شلون وياچ ست برشة .؟

ردت علية
_والله يا أبن خالتو العزيزة الزلم ماتتأمن و دامك زلمة يعني ما الك أمان لو تشعل العشر شمع للأسف سمعتكم زي الزفتتت.

ياسين:حقچ والله لو ما زي الزفت ما چان واگف وأستمع لكلامج الفاشل.

برشة:رحم الله مرء عرف قدر نفسة وكلامي واقع حال مو من جيبي جيبلي وحدة واثقة ثقةةة عمية مليونين بالمية أنو زوجها ما يباوع لغيرها ولا يطرها هاجس القلق وانو زوجها يتزوج او يفكر بوحدة غيرها.

ياسين:لاتقيسين هيچ لان عقلچ يستجيب لتفكيرچ العميق.
واثق بسرور ماتفكر هيچ قبل لا تعرفچ بس هسة وياچ ما أضمن أبني هم.

برشة:ليش شنو قصدك سريوة تندفع وعربانة؟

ياسين:ماكو عربانة غيرچ يالتافهة الشقة بحد ست بريشة

ضحكت بصوت مرتفع ودخلت للغرفة
صد علية ياسين وگال
_لاتاخذين بكلامها عقلها عقل جاهل عمرة سنة.
ماتوزن كلامها.

سرور:المن تبرر مو غريبة عنها.

أبتسم وكرص خدي بيدة
سألني خاف محتاجة شي وطلع..

صعدت غيرت ملابسي اني وغيمار
أقل الربع ساعة أجى وصعدنا بالسيارة.
الطريق خفيف ماكو أزدحام والشمس غابت وأحنة بعدنا ما وصلنا..

وگف يم مجموعة محلات للحلويات نزل جاب واجى.
تقريباً ما طولنة ودخلنة لأراضي الزراعية ومسافة بسيطة دخلنة لبيت جد ياسين.

نزلنة ودخلنة للبيت
كل الموجودين بالبيت يعرفون بجيتنة الا الحجية.

فات ياسين وهو شايل غيمار بيدة واحنة ورا..
كلها أجت سلمت علينة وصارت هوسة

طلعت الحجية من غرفتها ضايجة من الأصوات هي شافت ياسين شهگت وفتحت أدينها..

راح الها ياسين حضنها وبوس راسها.
أخذت غيمار منة وتبوس بي وتشم بريحتة وتگول
_يمة وليد وليدي يبعد العافية وأهلها..

صدت علية قلصت عيونها صاحت بية
_عمش ما تجين تنطيني حبة فتحت أيدها
أبتسمت ورحت الها سلمت عليها بوستني وطبطبت على ضهري ..

صدت على برشة وكالت
_هل صغيرونة بنية خالتك

رد عليها ياسين
_اي يمة

أشرت الها وبرشة راحت سلمت عليها وگعدنا
عرفت جسار عازمنة على عيد ميلاد بنتة..

التهينة بالسوالف لحد ما نعست فد مرة ورحنة لبيت أخيل ....

بنفس الغرفة إلي نمت بيها قبل سنوات رجعت نمت بيها أحس صار إلي هواي ذكريات بهل بيت والمحافظة..

من المفلطح للعزيمة والطلعات ولبستان وختامها العرس..
نمت ما حسيت على نفسي غير ثاني يوم الصبح على صوت ياسين.

گعدت وبقى غيمار نايم.

تقريباً الفجر طلعنة وگعدنا يم الحجية.
تريگنا سوا وبدو يلتمون الاقارب..

عدا الوقت لحد ما صارت بالستة وكلها كامت تتجهز لان العيد ميلاد بالحديقة.

و إيناس من الصبح تجهز بالحديقة وتنفخ النفاخ من غير الزينة والميوزة والكراسي..

جابت الحلويات والكيك والضيافة للبيت وراحت لبيتها تتجهز.

برشة بقت تخلي مكياج
اني خلصت وطلعت وياي غيمار .

دخلت من هو يم الحديقة التزيين كلش حلو وعبارة عن اللون الوردي والابيض.

دخلت للبيت الحجية أخذت مني غيمار
التهيت ويا ميادة أسولف وكلها التمت ورحنة للحديقة

بلشت الحفلة والاغاني
بنت جسار تجنن شبهتها على خالتها مريم لان جديات البنية نسخة مستنسخة بس فرق اون العيون.

مجرد شفتها أجت ببالي منال
شتسوي من تشوفها خاصة حسب ما أعرف بنيامين كلش حلوة علاقتة بـ إيناس..

تقريباً خلصت نص الحفلة والحجية ما أعرف على منو تتصل وكل شوي مرزلة رزالة شكل..

هوااااي ناس ما أعرفها ولا شايفتها قبل موجودين
وحسب ماعرفت من ياسين اقاربهم وأصدقاء جسار.

لحضات ودخلو بنيامين ومنال مجرد شفتهم أبتسمت
منال حييل متغيرة وصايرة تجنن..

أتذكر آخر مرة شفتها بيها قبل أشهر من أجت لبغداد
ومرت علية أنطتني كل أماناتي وراحت.

تواصلنة ما نقطع مراسلة وأتصال..

مجرد لمحتني أجت علية حضنتني بقوة وتگول
_مشتاقتلچ سرورر وهوووواية همم

بادلنها الحضن وحچيت
_اني هم والله يروحي أنتِ..

أبتعدت عنها وحچيت
_شخبارچ أنتِ

ردت والدموع بعيونها
_حمد الله بألف خير
اسأل عليچ والله..

أبتسمت وحچيت براحة
_دوم الراحة ما تفارگچ يروحي..

منال:الچ المثل عمري.

اجى علينة ياسين مجرد شافها ضحك وگال
_منال شلونچ..

أبتسمت وتقربت علية مدت أيدها تصافحة وهو باسها من راسها..

أبتعدت عنة خجلانة..
ضحك ياسين وگال الها
_خو ما محتاجة شيء
مرتاحة هنا لا يابة

أبتسمت و ردت علية عيونها مفضوحة ذيچ وينهن الدموع.
_حمد الله سلامتك والله ممحتاجة شيء الحجية ممقصرة وياي ..

أبتسم ياسين وقاطعنة بنيامين يگول
_چن بعد ما أسويلك واهس تجي للنجف .

ألتفت علية وگال
_ليش؟

وگف ورا منال وحط أيدة على كتفها وحچة
_على فكرة لا أخوها ولا عمها حتى تاخذ راحتك وتعيش بالجو ضلعي.

رفع حواجبة و رد علية
_وأنتَ منو حتى تقرر أخوها لو عمها؟
لعلمك منال أعرفها أكثر من عندك وعايش وياها وأشوفها طفلة شما تكبر .

بنيامين: راح تتعاطف وتلف وتدور وأرجع أگلك أعرفها قبل لاتعرفها أنتَ وتبقى تعاند وتصر على نفس الموضوع وأخصمها وياك وأكلك كدام رب العالمين ماكو هيچ كلاوات.

وزوجتي أخاف عليها من الحرام ما أريدها توگع بنص الحرام بسببك يا ضلعي.

ياسين:متأكد نفسك بنيامين إلي أعرفة؟
شيخ ويفتي ولا تگعد راحة.

ضحك بنيامين و رد علية
_هذة الثانية وياك

ياسين:تحچي وحدگ وحق الكفل زينب.

رفع حاجبة ما عاجبة كلام ياسين..
أجى جسار يم الولد وغيرو الموضوع
بعدها أجت إيناس شايلة بنتها وتلهث.

أخذها منها جسار والطفلة مجرد شافت بنيامين شمرت روحها الها

أخذها بنيامين ويبوس بيها وهي تضحك..
دغدغها بلحيتة وگال لـ إيناس

_شراب مال گحة صايرة مو كافي أكل ملهوگة خو ما ملهوگة .

زفرت نفسها بتعب وگالت
_ ياا والله مو من الأكل أصلاً ولا نفس قبل صايرة ما آكل هواي..

رد عليها بنيامين
_اي واضح أبد ما تآكلين.
بس ماخذة عافية أبن عمي.

ردت إيناس
_شنو راح تخلي يلزمها علية ليش هيچ بنيامين والله ياكل أكثر مني ..

رد جسار. بضحك
_بعد گلبي ضلعي حچيت إلي بگلبي .

إيناس:شوووف شسوييت والله بعد ما أحچي وياك جساااار.

ضحك جسار وگال الها
_مو نعلتي أبو المسموط إلي ببالي بجرة كلامچ شوكت تحچين نفس العالم بدون جرة

إيناس:الناس بالناس والگرعة تمشط بالراس ..

ضحك ياسين وگال
_عوفوها يمعودين خنفوسة لاتهتميلهم يحچون وحدهم.

ردت علية
_فدوة الك يعمري
هذا الكلام الحلو..

جسار:دنعل ن... عمرچ والله لو ما البنات هنا چان خوش غردت ..

انصدمت من فشارة
وياسين ضحك وگال
_دنعل صفحة لسانك الزفر هو أنت قنبلتها وتگول لو ما البنات
ما تگلي شنو خليت.

بنيامين:جفصاتةما تنعد الله وكيلك .

إيناس : اووي شبيك جساااار ترى ياسين أخوية ..

بنيامين: أستلم خوية دروب آخر زمن .

ياسين:اليوم شحارگ دمكم ماتعوفوهن براحتهن.

جسار :وربك تن.. أمي من تگلي فلان وعلان أخوتي واني چانت مطلعة ابو روحي تستحرم .

ردت علية بضحك
_غير أعرف بيك تريدني شلون ما أتگلب و أدلل عليك.

ضحك ياسين وگال
_ شلون دلال طاسة الروبة والسوب شاهدات عليچ أم التگلب .

جسار:ليش تهيجون المواجع مو دافنها
و هل شلنفص ما خلت بال صافي تتگلب بنت خوش ناس

ردت علية بغرور
_محد گالك أكتل نفسك علية وترفع وتكبس بالكلام تذكر كلامك وياي يالمؤدب..

ضحك جسار وگال الها
_بس عاجبچ چان ولاتنكرين.

غيرت الموضوع منال من گالت
_صارلچ شگد بحملچ

ردت
_خمس أشهر قبطت..
و هذة حملي شلع گلبي نفسي تلعب من كل شيء.

فتح عيونة متفاجئ
_لا بربكم ولكم بنتكم بعدها صغيرة ما فكرتو بيها.

ضحك جسار وگال
_بالغلط وداعتك

رد علية بنيامين
_ما ألومك أبن عمنة هم هيچ سطرهم تلاثة بحجة الغلط.

ياسين:رزق ربنا هلا بي بعد المن هل كلام

جسار: والنعم بالله

بنت جسار نزلت من بنيامين وراحت لياسين
شالها ياسين وهو مبتسم..

بنيامين: والله الخلف ما ماتت أجت بنتة مصلحچية خلصت مني راحت لياسين
أكبر أثبات يثبت بنتة حتة أقوة من الدي ان اي.

ضحك ياسين وكرص خدها وسأل بستفسار
_شنو أسمها الحلوة !.

ردت إيناس
_مريم

ما أعرف ليش صارت عيني على بنيامين ومنال إلي تغيرت ملامحها..

ياسين تفاجئ ضحك بهدوء يكسر الصمت
تحمحم وگال
_عاشت الاسامي.

أخذتها إيناس وراحو يم الكيكة
طفو الشمعة وكصصو الكيك

كلها أنطتهم هداية وياسين أنطة مبلغ مالي.

ساعتين وخلصت الحفلة.
أنجمعنة بالاستقبال كلنا زلم ونسوان.

منال تغيرت ملامحها لدرجة مو طبيعية وعينها على بنيامين إلي شايل بنت جسار ويلاعبها..

وحدة من أقاربهم حچت ويا إيناس
_يا خالة هاي بنيتكم شبيهة مريتك الله يرحمها..

ردت عليها إيناس
_اي تنطيها شبة.

ضحكت وحچت بشقة ويا بنيامين
_ها خالة حنيت للمرحومة وتلاشي بهل طفيلة..

رفع راسة و رد عليها
_قصدچ مرايمي؟

صدمتني ردة فعلة صارت عيني على منال إلي ما عوزها تنفجر دموعها بطرف عيونها حيييل مرخصتهن..

والمرة هم ما گعدت راحة وگالت الة
_ يخالة شلون لايگين بس الموت ما يرحم وأخذها منك..

عقد حواجبة و رد عليها
_ما تگليلي تحچين عن منو ؟

ردت
_على مريتك مريم

سكت لحضات وأردف
_مريم الله يرحمها ما چانت زوجتي حسب ما أعرف توفت قبل لا أدخل عليها وتسمى خطيبتي.
وما أعتقد هسة أكو داعي لهل كلام لان لا المكان ولا الزمان مناسب.

وإذا على مريم بنت جسار محبتي الها على محبة أمها وأبوها وكلكم تعرفون علاقتي بيهم شنو.

ومن تخلص أحاديثكم دورولكم على سوالف بيها حظ بعيدة عن حياتي..

تلفت يمنى ويسرى وأردف بشقة
_تحسسوني گاعد بجامع وتتسمعون لمحاضرة الجمعة شبيكم صافنين بخلقتي هيچ حلو وما تگدرون ترفعون عيونكم عني والله خوش..

نهة كلامة بضحكة وغير مود الرزالة..

صار كلام بينهم الولد و منال أنسحبت
رحت وراها لگيتها من جهة البستان

تقربت عليها ولمست كتفها نزت والتفتت علية
دموعها نازلة وتشاهگ..

مجرد لمحتني زادت ما نقصت
حضنتني وتشاهگ
بادلتها وحچيت
_شبيچ يا روحي
ليش البچي نمنمة ؟

بعدتها عني وحچيت
_مو أحچي شبيچ فهميني ليش تبچين منو وياچ
بس لا ضجتي من كلام خالتهم؟

هزت راسها برفض ومسحت دموعها بيدها وحچت
_أريد أرجع وياكم لبغداد بعد ما أبقى هنا خلص كل شيء بينا أكبـر غلط حبي الة..

عقدت حواجبي وحچيت
_ليش
شكو
شصاير
لا تخوفيني عليچ يعمري

لا أنطتني حق ولا باطل بس تبچي..
صاحني ياسين طلبت منها تغسل وجهة وترجع تگعد
وهي گالت
_أرتاح شوية وأرجع .

رحت لياسين شكلة أعصاب صاير
وبيدة الجهاز يحچي بعصبية
غلقة وشمرة على الكاشي

صد علية وزمخ
_وين چنتي مو صار سااااعة أصيحچ

يا ساعة تحچي عنها مجرد صحتني أجيت
أنت شبيك

زفر نفسة ورفع شعرة
فرك وجهة وگـال
_الزمال مرتضى عزمنة على عرسة بهل أيام..

_عليك الله
اني حچيت وأسمع صوت شهگة
التفتت وأشوف برشة ورانة.. يتبع.

_رأيكم بالحلقة وتوقعاتكم للقادم

_ برأيكم ليش منال تريد تترك بنيامين

بالتوفيق الكم اليوم أول يوم بأمتحاناتكم إن شاء الله هينات وتگدرولهن وتخلصون منهن.