تخبلنا ثنينا طكك عيونة مد ايدة يتلمس ضهرها ويرجف طخ مكان الاسنان وصرخت تبجي وهوا تخبل شالها وذبها بحضني طلع ركض اخذ السويج
ما فهمني ولا حجا شي بس اشوفة شغل السيارة وطلع اني حضنتها واني ابجي على بجيها فحطت كلبي خطية متوجعة سودة عليا عليج مامي
جكيت البشت والشال حت ما كلت لابوها رحت للصيدلي كريب شوفتها ضهرها اخذها من ايدي وكعد يعالجها وهيا تبجي وتصرخ
رحت كعدت كدامها شافتني مدت ايديها تستنجد بيا وتصرخ مديت ايديا الها لزمتهن وتسحب نفسها سودة عليا فرفحت وفرفح كلبي وياها ابجي على بجيها
نضراتها تكلي ماما ساعديني يالله احتركت بنار تمنيت الوجع بكلبي عمت عيني عليج اميي
شالها وحطلها شاش مكان العضة تخوف نطاني هيا كال ديرو بالكم عليها ولا تخلون مي يصل الجرح
شلتها وحضنتها ابوس بيها وهيا تبجي مجلبة بيا جلبت بيها ونبجي سوا حضنتني وتصرخ
: كافي اميي كافي
نسيم: اووو اوووووووو
: اووووف يكلبي عليج اوف كافي يا عمر امج
اني كاعدة وشفت ادم دخل بحلقت عيوني ما شافني راح ع الصيدلي راد اسبرين والصيدلي نطا
: خويا؟
باوعلي بسرعة مستغرب
ادم: شجابج هنا شبيج يوجعج شي بويا؟
: لا خويا اني زينة
شاف نسيم تصرخ اخذها من ايدي نخبص بيها يسكتها وشكد هيا تبجي هوا يتلوة على دقيقة ويبجي
: امعود اشبيك ادم
: هاي ليش دتبجي شبيها شبيج جدو شبيج؟
نسيم: اووووو
: مااعرف منو عاضها
ادم: عاضها؟
: اي اخذت عمتها دنسويلها عملية اليوم وتركتها ببيت جدتها رجعتها شفت ضهرها معضوض
: ووين الافندي ابوها
: من شافها تصرخ من ضهرها ذبها عليا وطلع مدري وين راح
: استغفر الله ربي شلون عضة هاي
: مال جلاب اكيد الجلبة مرتة الثانية العضتها لئن جانت نسيم تزاورها
: وشراح تسوين
: والله افكر اشتكي واطيح حظها
: مشي هسة شتكي والله اندمها
: غير اكول لزوجي اول شكو اتصرف من راسي
عوفك مني هسة شجابك لهنا اسبرين لليش
: ها ااا هيج
: يوجعك كلبك بويا؟
دنك لام شفته لداخل حلكة
: كافي ادم الله يخليك هاي اكثر من سنة
: جن البارحة صارت عطرها عاصي بريتي
: الله يرحمها ياخوي شهيدة
: ما تستاهل هالموتة والله ريت الطلقة جت بكلبي ولا بيها
: احسن من الشهادة شنو ياخويا
: شلتني والله شلتني كلبي ما ديركد للان عقلي ما مستوعب انها ماتت اكعد الصبح ادور بتلفوني بلكت اشوف منها رسالة لو اتصال لو خبر
من اتذكر انها ماموجودة بعد روحي تشيط اروح يمها اسولف وياها احجيلها شنو جريت وشنو داجر ولي كلبي متلوع متلوع
كالها وداس عيونة بيدة رجع دفع حك العلاج ومال بتي ماقبل ادفع
طلعنا وبالي الف سؤال شلون هيج يحبها لعد ما كام يحب بشرى لو شنو مواقفة وياها انسانية والله يصدم اسئلة عليها لو مو مال هيج سؤال هسة ما حجيت كلبة دايوجعة
: بالله ادم اذا ضليت هيج كلبك حيوكف من القهر راح يصير بيك ذبحة
: اوووف اتمنى والله اتمنى
: دطير يتمنى واني وين اولي اذا صارلك شي هوا انت فتت بغيبوبة اني وصلت للموت تعرف شصار بحالي لو لا؟
: الشي الوحيد الضليت عايش على مودة انتي وهم
اكدر بكل بساطة باي واجب اطلعة اروح كدام الجنود وتجيني طلقة طايحة استشهد بيها واروح على سيرتي
بس انتي توكفين بعيني بويا كل ما اتذكر حجاياتج وشلون جنتي تجين تتوسلين بيا اكعد اتراجع عن هالفكرة
: ادم لا تسوي هيج حباب والله دتكصكص بكلبي
: قدر الله وماشاء فعل الحمدلله على كل حال يبرد كلبي مرات من اشوفها بالحلم تضحك وياي وتطمني على حالها تكلي مرتاحة ومكانك يمي هم انت لاحكني
: لالالا ادم ماتروح ادم والله ماا
: ههه نوكف بوجه الموت
: ماكو ادم ماكو والله ما تعوفني اموت وراك والله ما يصيرلك شي
: يمج بنيتي يمج مااتركج
وصلني لبيتنا ورجع للبيت طبيت شفت ضحى دتاكل بالهول
ضحى: كلت شردو وتركوني
: وين نتركج حبيبي لا اخوج مدري وين راح واني اخذت سومة للمضمد
شربت العصير براهاوة وكالت
ضحى: راح لبيت ابو
: ليش؟
: ديكتل هيل
كالتها ورجعت تاكل ماخذتها ببساطة
: وشعرفج؟
: عيسى كلي
: هذ مراقبنا لو شنو؟
: لا تستخفين بي
: بس ما متاكدين هيل العضتها
: امبلا هيل من طبت بشرى للحمام راحت عضتها من ضهرها الجلبة ورجعت لشغلها
: ولي ترا حجيج يخوف
: لا لا تخافين خل حاذق يكتلها ويجي وادزلها جم واحد من تبعي اجننها
كاعدين نسومة تباوع لضحى وساكتة وذيج تشيط تريد تلكفها بس القالب بوجها تخاف واني اخاف انطيها لا تضربها
جا حاذق عيونة براسة شبعان ضيم وقهر ما حجينا ويا شال نسيم يبوسها ويشم بيها وهيا تعلكت بلحيتة كالعادة باست خشمة
حاذق: سومتي بابا اذوج ياكلبي
لا تخافين بعد ما يجون يمج حبيبي ربيتهم
: وين رحت؟
: الكلبة بت الكلب ما شفتي شمسويا بضهرها
: وانت رحت تردلها هيا
: والله ما برد كلبي ردت اذبحها لبالها ما نشوف عمايلها بنت القوندرة
: اخذت نسيم للمضمد ترة وضمد ضهرها
بحلق بعيوني مصدوم
: اي لا تباوعلي هيج دم محصور بضهرها شنو من اسنان الخاطر الله فرفحت روحي وياها سودة عليا
ضحى: ضلو احجو وشجعوني اروح اكتلها اني هم
نيمنا نسيم يمنا اليوم يباوعلها واعصابة محتركة كل حسرة يجرها تشك الكلب
راسلتني بشرى ورديت
بشرى: ما تكليلي شبي رجلج؟
: شبي رجلي؟
: امعودة اجا هجم الباب وهوا يدكة طلعت هيل تفتحة
من شافها تخبل وكعلها دك كتل كل دفرة تاكلها اكول نكسرلها ضلع لو سكطها وما يقبل يكول شبي بس يسب بيها ويكللها على بتي
: اي حقج ماشفتي شمسوية
: شمسوية؟
: ولي عاضة نسيم من ضهرها هالمسعورة هاي ضهرها ازرك نيل والدم محصور مكان اسنانها
: عزااااا
: اي والله فحط كلبي حت المضمد لبالة اني عاضتها كال هاي ليش هيج مسويا بقيت صافنة بوجهه
ضليت العب ويا سومة الا نامت بعمق فاتحة حلكها لازمة الفلوس بيدها سودة عليا
بوستها وخليتها بكريوكتها ورحتلة جان متمدد صافن وضايج
رحتله سحبت رجلي وتكترت بحضنة ضمني هوا هم يبوس فروة راسي
: وين صافن حبيبي؟
: احنا غلطنا لمن حطيناها عدهم
: بعد ما تنعاد انشالله هالمرة اطرينا
: ماكدرت احافظ عليها ولج ساعات بسيطة بس سهيت عنها مزوركة ضهرها
ولج لو سامعة صراخة مفرفحة حركتني حرك رحتلها للحية
: شعرفك هيا العاضتها؟
: لعد امي؟ اكيد هيا مبين من سنانها الفارغات
: حقيرة دغمة وشسويتلها؟
: مااتذكر اغلب الاشياء بس طلعت حركة كلبي ولوعة بتي بيها
: تستاهل
كلتها ولفني باحضانة
ضحى ويا الايام ستعدلت ماضل بيها شي وبدا الدوام من جديد وسومة تموت عليها صارت معهد قبل الدوام اخذتها للسوك هيا والضمادة مال خشمها شتريتلها كومة ملابس ومكياج جهاز مال عروس طلعلها اخوها وهيا تتدلع علي بعد دوامت والاوضاع تمام ما صارت احداث ببيتنا هذ
ونسيت انو قيصر جالو ولد اصغر من بتي بشهرين وسما ذياب يخبل من صدك ذياب ملامحة حادة من اسيل
ادم صار صديق بشرى على طول تسولفلي عنه بس مقهورة يصيحلها خويا وهوا اني اشوف وجهه مابعينة مرة غير مرته
امي وماما شموخ وبابا راحو للعمرة سوا ورجعو
كحيلة واستبرق علاقتهم صارت تخبل احسن من قبل حت متيم صار يحب اخته اكثر من قبل وخالتي توافق رجعت للبصرة وتزوجت ابن عمها تهي بهي
حت مهيمن الله هداة وتزوج وحدة فرنسية وجابها واجا يموتون ضحك هوا هالكدوته وهيا عامود كهرباء
شاهين تعين ونظر بعد قيصر اتقاعد تعب واجر بيته الثاني وشغل سيارته وصار يشتغل ويا متيم بمشروعة
حيدر استقر ببغداد وهم جالة ولد سما ازاد مدري شمعناته
متيم فتحلة مصنع واشترا بيت صغير اجرة وترك شغلة المحاسب كال تتعب
سويت تجميل لبطني ونحت لئن حيل نضرت ورا حملي بنسيم غير طلعت تخوف رجعت جسمي يخبل انحت اكثر من قبل وصدري لئن مارضعت نسيم هم على اكثر
ونسيم متعلمة حركة جديدة ويا ابوها تزحف وهوا يباوعلها ومبتسم تضل تزحف وتناغي ويا روحها ماادري شتكول تجي ترفع بلوزة وتفوت بداخلة طلعت راسها من فتحة الركبة مالته وحطت راسها على صدرة تدكدك وتناغي دددددد وهوا مكيف بيها ينيمها على وضعيتها على كلبة حت اني ما يديرلي بال راح زمانج وهم
والا من تتعصب منه اذا يسوي شي ما يعجبها تنزل راسه غصبن عنه تخلي بحضنها وتلزم شعرها بيديها وتصرخ ااااا عود عنيفة وهوا يسايرها يصرخ عود متوجع ويبجي من جذب
اول كلمة كالتها بعد ذا على ضحى هيا ابااا عود بابا جانت بحضنه حاطتها ويحجي وياها يلعبها وهيا خربانة ضحك
تضحك بصوت فدوة وماعندها اسنان حلكها جكليته ورا ما كمل لعب لفها بحضنة يضحك
حاذق: نسمة ابوها ياتالي صبرة انتي فدوة غديتلج بابا
نسيم: اباااا
كالتها وتخبل طكك عيونة اني بعد نصدمت صفنا بوجه بعض وهيا لمت ايديها لحلكها تضحك صدقة تموت وهوا كمز
حاذق: شكلتي ولج؟ سومتي شكلتي بعد ابوج ولج وهم حجت
: حقيرة كالت ابا قبل ماما هوا منو المات بيج كلبة كولي ماما لا اشلع اذانج
نسيم: باا بااا
: طايحة حظ
لمن سننت ضحى النص ستاو هلهلت بحلكها كالت عادات عريقة
الحياة من افضل ما يكون استقرار وهدوء ما توقعت بيوم اصل لهنا مثل ما جنت مخططتلها تماما من كل الجهات
كبرت نسيم واحتفلنا بعيد ميلادها ونجاح ضحى مرة وحدة وهيا تصفك وتركص ويانا متونسة متيم يطكلها صباعة وهيا تكركر ويا تموت ضحك عمتي ما جت رغم عزمناها
بيت هرم حيل صار خير علينا من كل الجهات عتبته بركة وغيرت الغرف خليت بيهن حمامات لئن كبار اكبر من غرفتي الجانت ببيت ابو حاذق
خلصت ضحى اول سنة ببيتنا وجابت سعياتها كله امتياز و2من القسم مالها اعترفولها وسحكتهم
ورا عملية التجميل ضحى صارت تخبل حيل اصلا هيا حلوة نوب صغر خشمها صارت تطك بالكاع عيونها وساع وشفايفها منفوخات جن مسويا فلر لا سمرة ولا ذاك البياض وطويلة شويا اكصر مني وضعيفة يعوزلها سمن تطلع تخبل من صدك
حاذق تشددة عليا بطلة صح لازم ما اكعد. بحضن ادم والبس حجاب من يكون متيم موجود ع الاقل كدامة بس من يروح انزعة والله فشلة كبال متيم حجاب غير ضلعي
بس قل تقيدة على لبسي صار يسمحلي البس بناطير وتنورات لجوا الركبة بشبر جان بس جبب تكول دكتورة جامعية عمرها 50سنة
بس كالعادة ماكو حال يستمر على ما هوا علي للاسف
يوم عادي دنطبخ اني وضحى ونسيم تلعب جوا بالعابها متونسين بعد كم يوم زواج اخوها الجبير ابن ابوها وعازمنا احنا بعد كال جيبن حاذق ونسوانة وضحى دتختار شتلبس بس بنفس اليوم زواج بت عمي ميار اخت سيف وهم عزمتني هما يروحن على اخوهن واني على ميار
جان يدك فوني رحت شفت بشرى تتصل
: الو ها بشو
جاني صوتنها تناشغ
: ولج شكو شكووو؟
بشرى: امي وهم امي تخربطت
: شنووو؟
: ولج مادتكعد وكعت بالحوش ما دااكدر اسويلها شي
: جايتكم
سديته من عدها ورحت البس الصاية نسيم وضحى يباوعولي مستغربات
: ولج امج تخربطت
كلتها وضحى فكت عيونها بس بهدوء مو بخبصة رجعت دنكت لازمة لعابة نسيم
: شبيج ضحى؟
ضحى: احمم شبيها امي يعني؟
: ماادري كومي دنروحلها
: مااجي
صفنت شلون ما تجي
: ولج امج
: ادير بالي على بتج روحي انتي
ما جادلتها مخبوصة لبست ملابسي طلعت ركض اخذت السويج وخبرت حاذق بسرعة رد
: الوو
حاذق: شكو شكو شبيج؟
: امك تخربطت
: شبيها؟
: ماادري هسة بشرى خبرت كالت رايحتلها اني
: شنو رايحتلهم
: رايحة عليها حاذق اخذها للمستشفى
: اني رايحلهم طالع هسة اصل قبل انتي روحي للمستشفى
سديته وغيرت دربي رحت للمستشفى بسرعة كلت للمرضين حضرولها سدية وكعدت الوب دقيقة ودخلوها بالسدية حاذق وبشرى وهيل وراها يركضون بيها
بقيت صافنة مصدومة شبيها هاي جعليها صل شوكعها
دخلوها للطوارء وبقينا برا اشوفهم حاذق يلوب وبشرى تبجي رحت عليها اهديها
: كولي يالله بشو
بشرى: ولج امي هاي امي
: شلون صارت هيج؟
: ماادري من البارحة تشتكي من صدرها نطيتها اسبرين وما يفيد نامت كعدنا الصبح هم بيها وجع شو تكومت بالحوش وخبلتني الم بيها مااكدر ماعرفت شتصرف
: قويا امج قويا هسة يطلع الدكتور يكول ما بيها شي
: انشالله انشالله
كالتها وخبت عيونها تبجي رحت على اخوها الي ديحلج روحة يعض باصابعة رحت يمة لزمت ايدة بعدتها من حلكة ولزمت وجهه اوعي فقد يعض باصابعة
: حاذق حاذق باوعلي باوعلييي
رفع راسة عيونة حمر دم متشنج
: مابيها شي كول يالله هبوط يجوز وهسة تطيب منه
: صوجي
: ماصوجك انت شكوو؟
دنك راسة ولم شفته محموس مثل الداخ شويا سندته
: حاذق باوعلي كلت باوعلي ما بيها شي ما بيها شي امعود لا طيح علينا انت هم شوف اختك شصار بحالها على امك نوب انت هم
باوع لاخته روحة شايطة وهيا مفرفحة تبجي
: روح اكعد يمها هديها روح
هز راسة وراح عليها لفها بحضنة تبجي وهوا ياكل بروحة
طلع الدكتور رحتلة ركض وركضو وراي كال بيها صار ذبحة وتخبلو
حاذق نصدم بس يباوع بعيونه وبشرى وهيل يبجن
كتبلها علاجات راح ابنها اخذهن ورجع عليها طلعت من الغرفة تعبانة بس انتبهت لوحها مامبين ذبحة والله صح تعبانة بس مو ذاك التعب
راح عليها ابنها محموس باوعلها ودنك يبوس بيديها ويعتذر منها ويتوسل تسامحة لئن تركها
خايب مو طلعتنا سحل اني وياك بليلة ضلمة
هيا سوت روحها ما راضيلها وكلتلة ما اسامح الا نرجع نعيش سوا
شنو شنو اني ارجع لبيت سلبوح غير انجن اترك قصري واروح لذاك الكن اجمالة اخر مرة تركت بتي عدهم رجعولي هيا مزركة
باوعت لحاذق يباوع بعيونها وشبعان قهر لا يروح يقبل وانه مجنني
عمتي: يمة حت اذا ما تريد ترجع لبيتي وتترك بيتك احنا نتحول يمك
هلا جمالة تعيش ببيتي حت جلطة برو ماكس
هز راسة موافق واني اشيل روحي والزكها بالكاع لو ما مستشفى هسة الطم واضربة دفرة بس لزمت روحي يعني ربي ما ااكدر ارتاح ابد اني ماصدكت حياتي ستقرت على شي درجع للمرار وطياح الحظ
ضحكت سماح وهوا لزم ايديها يبوس بيهن امداك اي والله وامدا حضي
طلعت من المستشفى هيا وهيل صعدن ويا حاذق واني بشرى جت وياي الدرب كله هيا منحرجة مدنكة تدري مااريد امها واني داغلي احس راح يصير بيا اني ذبحة مو هيا
راح لمنطقتهم دياخذون الاغراض اليحتاجوها وصلو ووصلنا وراهم تذكرت لمن طردتنا وطلعتنا بالليل وهسة بيدينا دناخذها لبيتنا وانوب جايبة هاي السعلوة وياها يبو
ما رحت وياهن رحت لامي شموخ كعدت عدهم بين ما اخذو اغراضهم المهمة عشتو
5دقايق وصاحوني رحت مكملين كلشي ولامين كومة جنط انصدمت شلحكتو عرفت والله ماخالين ثاري كلها تخطيط طلعت الا انتي يصير بيج ذبحة انتي مفعلة هكر اسم الله رحت صعدت اسوق وبشرى مدنكة
: شبيج ولج رفعي راسج
بشرى: ادري احمم ادري ماتريدينا
: منو ما يريدكم ولج جم مرة كتلج انتي واختج تعالو عدنا
: اني واختي مو امي وهيل
: مو سالفة مااريدكم بس اني استقريت بحياتي وتدرين علاقتي بامج شلونها وشكد تحبني
سكتت ما حجت وصلنا البيت هدوء ولا سالفة ما نفتحت فتت للبيت بسرعة شفت ضحى حاطة نسيم بحضنها وتبجي بهدوء بالهول من شافتني شالتها وطبت لغرفتهن لحكتها
شفتها تمسح بدموعها تضاهر القوة
: شبيج ولج؟
ضحى: احمم شلون صارت امي؟
: مابيها شي جبناها ويانا
: اممم
كالتها ودنكت
: لا تبجين امعودة مابيها شي
: ادري
: لعد عليمن؟
: تبقى وللاسف امي خفت تموت واني مو يمها
: ديالله لا تخافين هياتهم بالهول طلعيلهم
استغربت كالت شنو بالهول
: اممم امج راح تستقر هنا هيا وجنتها
: عليج الله لا
: هههههه شنو عيسى ما كلج
: لا صارلة سبوع مختفي ذولة عليش جاين؟
: مو هيا امج احمممم صار بيها ذبحة
: اييي والله تجذب مابيها شي
: ههههههه منو توتها جانت تبجي
انطتني نسيم وطلعت امها جانت ع الديوان راحت عليها دنكت باست راسها وكلتلها حمدلله ع السلامة
سماح: زين تذكرتي عندج ام من اقتربت من الموت
: لا سموحة انتي ما تموتين تجددين اشتراك كل سنة ضايع السجل مالج ومسجليج مواليد الفين
هيل بسرعة كمزت تريد غرفة البنات وسماح طبكت وياها حاذق بالبداية راد يغلس بس من امه كالتله حولهن قبل اي من دنعل ابو امك
ضحى طككت عيونها وباوعتلي بلكت اكدر اغير رئية واني مشعوطة اكثر منها كال كومو غيرو الغرفة
: خليها لباجر ع الاقل بنهار حت نرتبها
هيل: لعد وين انام اني؟
: اعتبري روحج خطار اليوم ونامي بالهول مثل ذيج المرة باجر نحولج الغرفة
عمتي: واني بعد اريد الغرفة لبصف هيل
اي خل تحمى مكانكم وبعدين تامرن خرب شكلكم شكد حقنا
ابتسمت وكتلها صار باوعت لحاذق عينة بامه ضايج عليها استغفر الله زا
راح جابلهن عشا من برا ضحى ما اكلت احتقنت واني غصبن عني كعدت وياهم بشرى خطية ذايبة بهدومها
عمتي: بشرى هم تريد غرفة
نترت: اي خما برج خليفة مليون غرفة بي؟
خزرني حاذق سكتت
عمتي: يااا شوفها بعدنا باول يوم هنا ومرتك استثكلت منا
حاذق: لا يمة ما ستثكلت دتحشش
كالها وباوعلي درت راسي
بشرى: لا لا مااريد اي مكان ابقى بي
اني مستحيل اضوج من بشرى الا ضحى اني جنت اكللهن يجن عندي يبقون بس هالفردين لخر مااجرعهن نوب جن ببيتي وكل شويا يتبسبسن علي ما شايفات خير قدي واتعجبو بخشم ضحى اول مرة يشوفو
فرشتلهن بالهول وبشرى يم اختها ماامن اخلي بتي يمهن رحت داخذها لكيت بشرى تبوس وتشم بيها شافتني جيت عرفت داخذها
بشرى: شنو نسيم مو تنام هنا؟
ضحى: بلي
: لعد. وهم اكيد مو جايا تتعلل ويانا
ضحى: والله حقها تخاف تخلي بتها جوا اخر مرة سهت عنها رجعتلها ضهرها مزورك
كتلها كافي ضحى
بشرى: دخل تنام يمي اليوم حبابة وباجر خذيها مشتاكتلها كل قوتي
: ولج اني لو عليج انتي واختج وحق الله ماادي بال اصلا مااخذها بس والله هاي البرا دغمة
بشرى: لا تخافين نقفل الباب
ضحى: اي اني على روحي ما اامن دامن على عشلة بنصهن وعيسى افندي مو هنا
بشرى: ها وهم تخليها
جانت تباوعلي تريد ابقيها بشرى صح ما ربتها وبقت وياها مثل ضحى بس تشهكها تموت عليها
بشرى: يبوووووو كون اموت وتحطين تراب على وجهي
: لا اسم الله حبيبي طول العمر الج
: ولج اشهكها اشهكها لخاطر الله شنو من جقليتة
هيا تبوسها وذيج تحبب روحها تضحك بصوت عالي وتكمز وتتحارش بيهن تلعب وياها تخبي عيونها وتكول دييي ويتخبلن عليها بعد اكثر
بشرى: اي شراح تلبسون على زواج؟
ضحى: جنت ناوية اكشخ بس من شفت امج وهيل خرب واهسي
: اني دروح على زواج بت عمي اخت سيف
بشرى: اووو وهم دتعاي ع الواهس
: وج بت عمي هيا الي خلتني اخذ حضانة سمسمة ما تتذكرين واصرت اروح هم اخوكم غريب ما يعتبر حماية
تركتهن يلعبن بنسيم ودطلع صارت هيل متخصرة وتفر بحلكها شمتانة باب الغرفة سادة الطريق بيدها
: سوي مجال
هيل: واو الغرفة هاي مالي حتصير؟
: اممم للاسف
: واو حلوة وجبيرة تلوك بيا
: اممم حيل تلوك بيج هوا انتي متعودة على غرف بهل حجم
: اممم هههههههههه والله يالله دار الوكت ونجمعنا مرة ثانية وهم
: اي للاسف دار وذبج بوجهي ماكو خلاص منج اسم الله مثل السرطان للموت وياي
: هههههه مااكدر افارك عيونج اليخبلن
: بس اني اريد افاركج كلج صراحة
ضحى: لا تعبين نفسج بالحجي ياضيم اخوي ماراح تفهم
هيل: افف ضحى على كد ما جنت مرتاحة بفراك وهم مرتاحة اضعافة بفراكج
ضحى: القلوب عند بعضها على كد ما جنت مرتاحة واني اشوف وهم مرتاحة اضعافة بفراك وجهج
: ههههههههههه اليوم اخر يوم الج بهل غرفة ضحاوي استمتعي بيها
: اي ليش تخليني احلف يمين ما اطلع منها؟
: اي لو 100يمين هم اطلعين
: باعي جنت ناوية اسويها تسليم اهالي واخذج على كد عقلج بس والجبار العزيز فلا تنوليها وما تنامين الا بالمخزن جزاة كلامج ديالله
: هسة نشوف
كالتها وطلعت رحت على ضحى
ضحى: ههه لبالها نطلع وتاخذ الغرفة اي لو تموت والله مادام سوتها معاند والله فلا تنام بيها ليلة واني مو ضحى اذا خليتها تتهنى
: واخوج الوعدهن
: معليج تفض
خليت وطلعت من يمهن رحت سبحت سومة ونزلت تعللت ويا البنات اكثر سوالفهن تونس
كضيناها تحشيش وثرم بس اكو شي ممريحني ديصير مااعرفة بس كلبي دايلعب
طلعت من يمهن بعد ما حلفت مليون يمين لبشرى اني ما ضايجة من جيتهم وهيا تبجي تكول ثكلنا عليج
دطلع صاحتني عمتي
عمتي: تعاي يالصفرة
: ياا شكد صارلي ما سمعت هالاسم
: اشتاكيتيلة مو ولا يهمج حتسمعي وبكثرة
: امم للاسف
: اكيد ما عاجبج جيتنا لهنا
: ما اكدر انكر
: هههههههه خوش كتيلي
: حت تروحين؟
: لا حت ابربع على افادج
: انتي بلا ما تحاولين مسويتها اوريدي
: تعالي همسي لرجولي
: عفوا ماذا
: تدوسيهن
: اني؟
: لعد ابوج
: احمم مااكدر
: ياااا حاذق تعال شوف مرتك
: شيشوف من مرته مااكدر
: لا تعالي كلت هسة ابني جوا جناحي مو ميت عليج تعالي
زفرت ورحتلها والله يالله كعدت امعس برجليها تكول كصبة هسة شيفضهم ولا تطلب حركات وتكتيكات هيا مال هل بهدلة يالحسين
رادت تسبح كومتها للحمام طبت وسدت الباب بوجهي اي كون تعصين جوا بجاه واحد احد بس لا بعدين نكسر الباب
خلتني مزنوقة الا طلعت من الحمام وين اكو سبحة 5دقايق تنصبين ع الشامبو؟
رجعت امعس برجولها الله يكصبهن الهي
دافرك رجولها جان تنزل تتمخطر من فوك تضحك ركزت بيها شعرها ينزل مي ولابسة البرنص مالي
طككت عيوني عليها ربي فدوة لبالي غلط باوعتلي وضحكت لزمت راسي بتك ايد ماداستوعب
جت يمي تتمندل واني روحي شايطة وصلت يمي وابتسمت بوجهي تمسح بركبتها
اهز راسي وارجف مو مستوعبة الدايصير
: لا
هيل: شنو وهم شبيج؟
جانت تحجي برهاوة وتضحك
: مستحيل لا
كلبي اذاني وهيا عدلت شعرها دفعتها وطلعت اركض فوك بالزور اجر النفس دفعت باب الغرفة شفتة متمدد ياكل بشفته
اريد اركز بشكلة كلبي يوجعني
عيوني حركتني حرك كلبي احسة يدك بضلاعي مو ينبض اريد اتوازن مااكدر مااكو شي الزمة ايديا تخبط اريد يدة الباب اتناوشها
اجا تقرب مني واني روحي مفرفحة مااشوف كدامي
حاذق: وهم بويا شبيج؟
كالها وماحسيت على نفسي الا ضربته راشدي من قوته وجهه اندار
ما كمت احس بشنو اسوي باوعلي خزرني واني متخبلة ارجف كلي اريد استند على شي ماكو ماحسيت شلون وكعت بس راسي نطب بالارض
راسي يريد ينفجر احسة متوجعة ومااكدر ارفع ايدي بس دموع تجري
احس بي هوا يم راسي يحاول يحاجيني يريد ارد علي ما اسمع شيكول بس اسمي بصوتة وايدة على خدودي يضربني خفيف دوعة
اريد افتح عيني ادوس راسي مااكدر اتحكم باطرافي ميتة روحي مفرفحة
شويا شويا بدا صوتة يوضح واكدر افتح جفني
حاذق: وهم وهم هووو وهم ياضيمي شبيج ولج فتحي
رفعت جفني لافني بحضنة وفاتح صدر تراكي يهفلي بيدة وجهي وصدري مي وعيونة قلق
تذكرت منضر هيل ردت ادفعة من صدرة مسك ايديا قويا معسهن
: وخررر
: صوتج ياهجام
: وخر عني وخر حقير
: بس اسكتي هصص
: وخر كلت حيوان كلب خاين
كلتها وداس فكي بيدة الثانية حجا من بين اسنانة
: افتهمي وبعدين اهجمي
كالها وترك حلكي وايديا بنتر كمت من يمة هم دخت ووكعت يم الجرباية بس ما فقدت الوعي اجاني طاير شالني
حاذق: ولي والله متوهمة ماصار لبالج
كوة مسيطرة على روحي كلبي يوجعني حيل ايدي ماتعيني افركة منتهية بيدة شالني وحطني ع التخت يفرك كلبي
حاذق: ولي انتي مجنونة بالله تعال هاي شيفهمها بنتي والله ما باوعتلها ولا صار لبالج بس جت رادت تسبح
ما بيا افتح عيوني احس نار بصدري مستحيل طبت لغرفتي بس دتسبح كلبي حيل اذاني رغم ديفركة بس يوجعني
مستحيل تفوت لغرفتي بس حت تسبح مستحيل اكيد تقربلها اني صوجي جبتها لبيتي ماجان لازم اوافق اكيد جابها لغرفتي وعلى تختي نام وياها مثل ما سويت بيها دتعيدها بيا الحقيرة استعملت حمامي الله ياخذكم انتو الاثنين
كلبي محروك حرك وارجف مدااكدر اصدكة وهوا يحلف انها بس سبحت
حاذق: يابة وداعتج وداعة نسيم ما باوعت لوجها وهم يابة شبيج ترا اصلا شبه محرمة عليا شكو مداتصدكين
دفيته عني بتعب شلت ايدة من صدري ونطيته ضهري حاولت انام مااكدر كلبي يوجعني
زفر وحسيت علي تمدد مدري ليش مدااصدك كلامة معقولة
كعدت الصبح ماهو كمت بسرعة ونزلت جوا مستحيل اتحمل الكعدة بنصهم وجمالة اليوم خميس هسة الافندي مالي يجي من وكت
نزات لكيت هيل دتطبخ خرب شكلج وشكل الياكل من ايديج وعمتي مكيفة بالبيت
ضحى ماخذة نسيم وكاعدة بالغرفة ما تقبل تطلع وبشرى كاعدة على اعصابها ويا امها ودتحضر للتخرج مالها
طبيت للمطبخ قالبته قلاب مسويته سينما بقيت فاتحة عيوني علي البهارات والمواد حت الثلاجة عليها رواسبها خرب اهلج هاي شمسويا بمطبخي
باوعتلها بحركة مال احط راسج بالكدر الواكفة علي هسة
عمتي: وهم تعالي
زفرت وطلعت عليها ابتسمت واني لامة شفتي ما راضيلي
: ها عمة
: شوكت تفرغون الغرفة؟
: ايما غرفة؟
: النغلة بتج
كالتها وطككت عيوني هاي كل عقلها
عمتي: ها شبيج؟
: شدتكولين؟
: شنو تريدين اقتنع هاي بت ابني ما تشبهه بشي اسم الله خفت وجها
: عمة انتي يعني كل عقلج تحجين لو تتشاقين شهل كلام
: دنجبي لبالج اطلعين من بيتنا تخلصين منا لاحكتج وين ما تولين وراج
: استغفر الله ربي اكول انتي عليمن صايحتني
: دتفرغين الغرفة
: ليش دفرغة
: يعني ليش مثلا حت هيل تكعد بيها هذ الاتفاق
: هيل كل غرف البيت ما بعينها بس غرفة بتي؟
: اي حت تضل كبال عيني ورجلها بوجهه يفوت لغرفتها
: الهم طولك يا روحي ترا الغرفة ضحى بيها مو بس بتي
: يطلعن
: كليلها انتي خل تطلع واذا هيل تريد تكعد بمكان هيا التحضرة ما اشتغل عد ابو احد اني
هيل: يااا يعني وهم ما تفرغيلي الغرفة؟
: اي لو تموتين بعد وهاي غرفة ضحى وبتي مالجا شي بيها
: بتج لكيلها غير غرفة كل هالقصر الا الردتها اني
: وبكل هالقصر عينج على غرفة بتي؟
: حاذق كال
: انتي كلتي هوا ما كال مستحيل يقبل يطلع بته من غرفتها لخاطر شكلج
: هسة ديالله علوة لو بته
: الله يشيلج
: انتي وبتج كون بيوم واحد انشالله
: عليمن دتدعين بربوك
كلتها ودهجم عليها شفتها ما خافت يعني اكيد براسها تخطيط سحكتها وطلعت لغرفتي والله يالله فوك ما دياخذون غرفة بتي نوب اني احضرها الها ما تشتهي والله وجمالة تدعي عليها بت الزنا
للضهر اني بغرفتي الوب اتخيلهم سوا لبارحة مااكدر اصدك ماصار بينهم شي كلبي مفركس اجتني بشرى شايلة نسيم بيدها
من شافتني سومة ضحكت تفتح وتسد بيديها تريد تجيني تطفر من حضن بشرى وتضحك تخبل فدوة مال كرط
اخذتها ابوسها وهيا بعد تجلب بيا وتمص خدودي
: ياامي يدعن عليج الحياية اوووف الله يحفظج ليا ياروحها لامج انتي
كلتها وحضنتها وهيا تحضني بعد تكمز
بشرى: لا تحطين كلامهن ببالج
: ولج ببال منو هما اصلا
: ترا احم البارحة
: اي؟
: ترا ماصار شي
: بربج لا تذوبين كلبي
: لا والله ماصار شي يعني شسمة
: شعرفج
: اعرف خبالاتج ومن طلع حاذق الصبح عرفت متلاغين
: لا متلاغين ولا ابد منو هيا الدتلاغة ويا زوجي لخاطرها فد نعال
: خوش تعرفين
كاعدين شويا وصارت هوسة جوا باوعنا بوجه بعض وكمنا ركض نزلنا جوا ركض نشوف شكو
كالعادة ضحى حاطة هيل وواكعتلها دك كفخ صايرة مريدة جوا ايدها وامها تحاول تشيليها مو يمها
لازمتها من شعرها بيد وايد الثانية بوكسيات تضربها تكول زلمة وذيج تصرخ راحتلها بشرى ركض لبالها عيسى سدت عيونها وتقرا ايات بس دفعتها ورجعت تضربها خلتنا نصفن جان تضربها بدفرة تشقلبت ودنكت عليها عضتها من ضهرها وذيج تفرفح تحاول تدفعها بس اللحم بسنانها ينجر ويا راسها ضلت عاضتها الا طلع الدم من ضهرها عافتها وذيج شايطة
كامة ضحى مسحت حلكها برداناتها
ضحى: حت مرة الخ تعضين نسيم عدل
عمتي: مجنونة انتي مجنونة
جانت تحجي مفرفحة وضحى هادئة
ضحى: ماسويت شي بعد هاي جنت انتضرها من زمان من يوم السويت خشمي ببالي واليوم ذكرتيني بيها صحتلي فرصة وبعد اكو كتلة لخ حت تدعين عدل
كالتها ورجعت لغرفتها ببرود قاتل وبشرى راحت تساعد هيل وراها تتغدا ونسيم بقت يمي ترضع ممة ماشتهيت اني كعدتهم على كلبي
دقايق وصاحتني عمتي زفرت ونزلتلها هيل متمددة ع جهة الديوان منتهية عمتي كالت نضفي المطبخ
: ماا
: شنو ماا
: شهل سماطة لمسوينها اني ما ارتبها
: لعد مو بيتج ياراعيته؟
: اي بيتي بس بحياته ما وصل لهل درجة من القذارة الا بفوتتكم
بشرى: كافي اني اغسلهن
: لا والله ما تغسليهن هيل الوصخته
هيل: شنو تريدين انضفة دباعي حالي كله من ام اربعة واربعين
ضحى صاحت من غرفتها
ضحى: ليش تخليني اطلع اكملج؟
خنست ما حجت شي وعمتي حلفت يمين محد ينضفة غيري يالله امري لله مو على شي بس هذ بيتي ومااريد لمسات هيل بي
طلعت لغرفتي كعدت اغلي نسيم مغفية فدوة لكلبها صح وكحة بس عاقلة
دقيقة وطلعتلي هيل حاطة مكياج ومكحلة كحل عرب وبنت النعال عيونها يخبلن اني خكيت عليهن وفاكة شعرها على طولة صح ناسلته ضحى بس مع ذالك حلو مشطته
: انتي مو توتج نسحلتي؟
هيل: شوكت تفرغيلي الغرفة؟
: لمن تنجمين
: والله اني ردت افرغها بس دتشوفين اش سوت المجنونة ضحى
: اصيحها الج واخليها تكمل البدتة؟
: انتي ساحرتها وهيج تمشي بكلامج لو شنو؟
: لا هاي دروبج
: لعد شبيها تخبلت هيج عليا
: امم تذكرت من عضيتي نسيم تريدين تسكت؟ لا متوهمة هاي منكوعة بكلبها وزين منها ما موتتج
: اي حت حاذق يموتها
: لا بنتي بعد وراج جتلة ثانية لئن دعيتي عليها هوا حاذق الراح يكتلج
: اممم وشدعوة هيج يحبوها علوة لو بتهم
: ولي انتي عاقلة مجنونة شنو مو بتهم خمو كل العالم مثلج يوميا بحضن جعليج بزون
: شوفي دكلج...
: كلشي لا تكليلي لا احط النعال بحلكج اطفري من كبالي وابتعدي عن نسيم لا كفيلج الله مايصيرلج طيب
تركتني ونزلت تتمخطر وتضحك تفر بشعرها لبالها لئن تكحلت ديباوعلها اي والله عيونه ابززهن
اني الج هيل صبريلي
اعرف حاذق يفقد ع الشعر الطويل والعيون المكحلات قابل تعرفي اكثر مني مو بعيني
شلت قراصة ووكسرت منها شويا ولو احبها بس ميخالف اخذ غيرها وكحلت عيوني صح مو بجمال عيونها بس هم حلوات
لفيت شعري شلون ما جان بيها القرصة على نفس وتنكسر لبست دشداشة لي جوا الركبة ونزلتلي كدلة نزلت للمطبخ تراكين الماعين صايرة تل اي لئن اني الراح اغسلهن لو وكت هيل ما يوصخن خاشوكة
بس ماشي اذا ما اني اعلمجن ما اطلع وهم وكفنلي
لبست الكفوف وبديت اغسلهن هذ وكت جية حاذق وكفت اغسلهن الا متت من الحر كمت اصب عرك وامسح كصتي شو طول اليوم
دقايق وفات حاذق قبل ما اخلصهن طب للمطبخ ديشرب مي شافني بعدني اغسل انتجة ع الثلاجة
يباوعلي مسويا نفسي مو يمة هوا جذب اذاني بحضنة
كمت امسح بكصتي واحاول اطخ القراصة دتوكع وعصت ما تقبل تنزل
متكتف يباوعلي ماادري شينتضر دار راسة ديطلع وكعت القراصة وانفل شعري حجيت بنتر
: اهوووووو
باوعلي مستغرب
: شبيج يابة؟
: هذ البلة نفك شلون اسدة هسة
اهووووو
: البلة؟
: اي شعري
ردت انزع الكفوف حسيت بيدي لزمت شعري ولزك كصتة براسي وهمس
: تركي اني ارفعة الج
ابتسمت بشماتة بس مابينتها جان اشوف هيل واكفة باب الغرفة مال نسيم تباوعلنا سويت روحي ما نتبها حركت راسي خرب شعري بيدة صاح
حاذق: هاي شسويتي؟
: ولا شي احتريت
: دوكفي خل اعدلة لعد
يريد يسويلي كصيبة ما يعرف شلون كام يلوخ بشعري
همست: لعد بس هدد بيا
: شكلتي؟
هذ اذانه اذان الفارة اذا احجي بكلبي هم يسمعني
: ولا شي
: لا كولي منو المهددج بالله؟
: اي انت كل ما اكلك دكصة مضوجني تكلي اكص راسج
: هسة وبعد
: لابله معلية
: وعلة من الله هذ اخر كلام عندي ما ابدلة اذا شعرة وحدة نكصت ميصيرلج خير لمي انتي عاد
كالها وراد يطلع هسة هيل تستفرد بي على جثتي
: تعال تعال هوبك
: شبيج؟
: تعال ارفعة ع الاقل
: انتي ارفعي اني تعبت دطب جوا ارتاح مااريد مشاكل
راح للهول الثاني لحتكه الحية ركض تذب سمومها بس مو على وهم سوالفج يعدن يبعد هلي اني لفيت العالم تجين تلوفين عليا مو بعيني
بين القهر والحقد والغضب والحماس للخباثة صارن كوكتيل بدماغي هسة شنو اسوي اريد افرغ شحناتي وماراح اكدر اعمل شي مادام تل ابيب هذ ماخالص
طفرت شغلت اغاني سجودة باليوتيوب ولئن دي جي فوك ماطلعت نزلته خليت التلفون بالكدر وعليت كل علاته وشعري منكوث فريته شويا نحل كمت اغني وياها واركص للان اكو بس الدكة مابدت بالكلمات
طلعو ركض عليا ع المطبخ شافوني اهز براسي وخصري عود مو يمهم
حاذق: كلبتي البيت ملهى انتي دنصي الاغاني شدعوة هالعلو
: عوفني اونس روحي
: بالاغاني؟
: لعد بشنو؟
: راح اطفي اني والله
: لازم بكيفك معليك بيا
اشوفة حاط ايدة تحت انفة ويباوعلي عود ينتضرني اكمل
جا طفا التلفون واخذة
: هسة ليش تقتل المتعة؟
: الجيران كلهم عرفو دتغسلين اماعين
: اي حاذق شوف جم كدر موصخين وابتلي بيهن وهم دشوف شهل حالة صارلي ساعة وبعد كومة اكو تعبت رجليا من الوكفة
: تعبتي من الردح
: توني ردحت والله
: خلصي اماعينج على غرفتج ركض
: مااخلص للمغرب واله كثار مرتك نابشة المطبخ كله علي اليوم
: خلصي الهجام ولغرفتج
: عود ماشي
كلتها ونطاني ضهره هيل جانت منتجية ع الحايط تنتضر الدراما تخلص من راح غمزتلي لحكته يالله هاي محاولة ثانية بائت بالفشل اليوم كل مخططاتي ما ينجحن
زين اسوي روحي فقدت الوعي لو شني؟
لا يلكفني خل افكر بطريقة احسن شدبر شدبر وينج كحيلة تنطيني فكرة هسة
صدك الكالها متيم ثولة ما عرفتي تنطين لروحج فكرة
غميت روحي وكمت اغسل اجتني ضحى تاكل تفاحة باوعلتي
: عاجبج منضري؟
ضحى: والله ياضيم اخوي ماتكدرين تطلعين روحج منها تحتاجين فكرتي اتعينج
: صدك تحجين؟
: اي بس كلشي بثمن
: كولي
: نستلة روسيا وعصير وها نمبر ون
: يا جنج على هاي ابشري بس نطيني فكرة
: انتي تخافين من الحشرات بذات هذ ابو بريعص مو
: ليش انتي ما تخافين منه؟
: لا
: عرمة
: وانتي؟
: ايي يمةةةة اموت ولا اشوفهم
: زين اني دروح هسة وانتي شغلي مخج بشنو يفيد البريعص ترا يكدر يطلعج من المطبخ
: ضحى احجيها هيج ثولة اني ما راح استوعب
: سوي روحج تغسلين وجط عليج واصرخي وكولي ماافوت بعد للمطبخ الا تكتله وهوا راح يضل يدورلة ماهو وزوجج اثول وين اكو بريعص يطلع بهيج مطبخ وعود نزلي دميعاتج هم تخلصين من المواعين وهم يترك هيل
راحت بكل برود واني بقيت صافنة هاي صدك داهية تعالي شوفي كحيلة صرتي اكسباير
جريت نفس عميق وصرخت ذاك الصوت الجنن البيت كله طلعت اركض من المطبخ واضرب خدودي
على اثار صوتي طلعت سماح وهيل وحاذق مرة الخ ضحى مبينة من باب الغرفة مبتسمة بشماتة وتتصفح واني بالحوش اكمز واصرخ وابجي غير شعري صار مال سعلوات بكد ما نبشته
حاذق احتار بيا مايعرف شكو منين ميديرني اندار عنة واكمز واصرخ
: عااااا يمة لحكيلي
حاذق: شصابج ولج احجيييي؟
: يمة بوجهي بوجهي صار اااااا احد يخلصنيييي
: ولج غير تفهميني منو البوجهج هيييييي؟
: يمةةةةةة ولك خويا مرهم اي احد عااااااا
: كلهن ذكرتهن الا الدب الواكف يمها ولج بس هوووب
ذبيت روحي بحضنة واني شعري منعول اهله ووجهي من الضرب صاير احمر
هوا حضني وصار يفرك شعري ويوخرة عن وجهي
حاذق: شبيج كلبي؟
: خايفة حاذق خايفة احميني منه ياكلني
: منو هذ بويا اليجي يم ضيم الله مالتي؟
: بريعص جط على وجهي حاذق متت جان طويل كولش ومدنفش يشبه هيل لزك بوجهي وركض على شعري
سماح: ووجع كون عاطو على كبرج انشالله
حاذق: يمةةةةةةة هاي شبيج تدعين عليها
: مدتشوفها خبصتنا بالصياح لبالي الطباخ نفجر عليها
: اي تخاف من الحشرات ما تعرفيها
كالها وخلى وجهي بصدره يفرك شعري واني اتنفس بتعب وصدك دخت من الصياح رخيت بيدة رفعني من خصري ضمني اله دقيقة وصاح
حاذق: هيل
هيل: نعم
: كملي المواعين عنها
صار هدوء ثواني ما شفت شي لئن مخبيا وجهي وصاح فززني
:شحجييييت؟
اجت اخذت الكفوف من ايدي عت صاح بيها
حاذق: على كيفجج
اخذتهن واني بعدني راسي بصدرة مطلعة وجهي منه هالمرة دتروح وباوعتلي شفتها صارت تطحن
: باكستاني مالي
:هاا
: فوت اكتله
: شكتل بويا؟
: البريعص هالمرة كمز على وجهي وطفر اخاف والله
: مايجي يمج بعد
: لا لا يجي والله اخاف فوت اكتله
استغفر ودخل للمطبخ امداج وهم عفتيلهم المطبخ سوا بي مالت
رحت شفته حاير ويدور وهيا تغسل الماعين بعصبية
حاذق: ماكو اختفى
: واشلون؟ والله ماادخل المطبخ مادام هوا بي ابد لاحد يكلي اموت والله
: بويا لا تدخلين المطبخ بعد ميخالف هيل منا وجاي مااريد اسمع بوهم داخلة المطبخ خوش
كالها وطلع فوك حسيت صدك شرارة نطفت بداخلي متت فرح باوعت لهيل غمزتلها نزعت المريولة ونطيتها اياه وكمت اغني
: اجيبك للدرب كتلك اجيبك
انا مراهن عليك اصبح حبيبك عود ديري بالج من البريعص حبي
ولحكته جان يلعب ويا نسيم يشكيلها مني وهيا فاتحة عيونها تصفن بي وتناغي وتدد
حاذق: شفتي باب سوادين امج حلفت ما اطب المطبخ لئن بي بريعص اليشوفها مايصدك هيا جنها خفاش شوفي من تكبرين مااريدج تطلعين مثلها جبانة صيري سباعية البريعص شكي شك
تناغي وتحجي كلام مو مفهوم لزمته من لحيته حطت خشمه بحلكها تمصة وهوا ميت بيها
باوعتلة وتخصرت ما راضيلي هوا هم رفع راسة شافني شال نسيم واجا يمي اني واكفة بالباب حطها بيدي بكل هدوء اخذتها ابوس واشم بيها
حاذق: هديتي
: كلبي مجمر والله
: عليمن بويا
: حاذق سالفة ما طخ العقل طالعة من غرفتي تتبيهت
: والله بس سبحت وطلعت بوجها ما باوعت وحك لوعتي على بتي الماعندي اغلا منها بكل الدنيا
بقيت اباوعلة وحيرانة ما معقولة يحلف ببته جذب عدلت نسيم بيدي وتيهت نضراتي عنه
شال ايد نسيم وباسها يبتسملي كال ها صدكتي هزيت راسي اي ضحك وباس راسي فات سبح رحت العب ويا نسيم برد كلبي
صح ضايجة لئن طبت لغرفتي بس ميخالف متفشلة وجها اسود
لازمتها والعب وياها
: سومة امي
نسيم: اممم
: كولي مااامااا يالله امي ماااماااا
طلع واني حاطة نسيم على بطني شافته وكمزت تصيح
نسيم: بابااا باباا
حاذق: ياروحة لابوج
: بابا بابا
وهيا تلغي وتلعب شايلة لعاباتها وتناغي وياهم جن تحجي معاهم وتصيح داا وبابا ومدري شنو احس لسانها ثكيل شو لهسة ما حجت
اجا شالها يبوس بيديها وهيا يعحبها تحط ايدها بحلكة تكله اماح عود بوسني وهوا يكيف عليها ما يكللها لا يبوسها
تمدد يمي حطها على كلبة وسحبني لحضنة ما عارضت نمت هلى صدرة اني بعد
: حاذق
: ها بويا
: خل نطلع للشمال من يصحلك
: صار
: ولكربلاء
: ماشي
جت ببالي سالفة الغرفة مادام دايوافق على كلشي حطيت ايدي على صدرة ادكدك بصابعي
: باكستاني مالتي
: ها عيون الباكستاني
: دكلك شي ولا تضوج ماشي حبيبي
: لا يابا مااضوج منج
: احمم شوف غرفة البنات مااريد هيل تاخذها متعلمين عليها خطية حت ضحى تكول اريد اكول لاخوي ع الغرفة واقصر منه عن لا يضوج ما يكفي ببيته نوب تتطلب وسومة بعد تحب الغرفة مالهن متعودة عليها حباب خل تاخذ غرفة ثانية
صح جذبت بس والله فلا ابرد كلبها بسالفة دامها اختارت تعيش معاي خل تاكلها هز راسة موافق وباس سومة
صار وكت العشا نزلنا اني الراح اسوي الله يجرم هيل تعبانة من الكتلة الاكلتها من ضحى
من نزلنا اجت تعرج لاعشتو ولازمة وجها تتاذى الشفية جلبت بيدة كون قطار يدوسج
بوعتلهم ما عاجبني هوا افتهم شال نسيم وراح لغرفة اخته دينطيها نسيم كال تريد ضحى
جذب اصلا مو ببالها بس يعرف اكلبها كربلاء علي
فتت سويتلهم زهرمان البخاري ديتسممن طبخت البرياني وطلعته عليهن دناكل ونطقت عمتي السم
تمساح: يمة حاذق جاين ناس على خواتك
بشرى غصت باللكمة وضحى رفعت تك حاجب وكملت اكلها سحكتهم
حاذق: احممم اي؟
: دنطيهن
: منو الوادم
ضحى: وانت عليش تسئل؟ سموحة اطرديهم لا اطردج
حاذق: بشرى وانتي شنو كولج خويا
بشرى بالزور بلعت ريكها وذبت الخاشوكة بقت مدنكة عيونها ماثبتن
حاذق: هاهيا وصلت يمة ما انطيهن
ضحى: فديت ضلعي والله
عمتي: بس يمة الولد...
حاذق: كافي داكلج ما انطيهن
سكتت وكامت من الاكل يالله احسن ضحى تضحك وتاكل حاطة نسيم بحضنها تطعمها بتيته وتمن
لمينا الصحون باوعت لحاذق ضايجة واباوع لاضافري وايديا افتهمني كال لهيل هيا تغسل المواعين
احتقنت هيا وعمتي كامت غصبن عنها ابتسمت بنصر وضحى شماتة رفعت راسها وتلكف بسومتي
طلعت ضايجة من المطبخ ورا ما خلصت الماعين وكعدت ع الديوان يم عمتي
هيل: حاذق يالله
باوعلها وعوج حاجبة ما مفتهم كللها شتريدين
: اي فرغولي الغرفة
: احممم عود صدك
حاذق: غرفت ايش افرغلج؟
هيل: غرفة نسيم وضحى
ضحى دتكمز خزرتها سكتت وحطت ايديها على خدها
حاذق: ماافرغها
هيل: انت كلت افرغها
: وهسة رجعت بكلامي لجا شي يمي؟
لصمها صارت تطحن ضحى نزلت نسيم من حضنها راحت ركض على اخوها تربعت بحضنة وتبوس خدودها
ضحى: احلا احول عرفة التاريخ
حاذق: هههه امداج
: ول انت الكفو احبك والله
هيل: لعد وين انام؟
: وين ع تنامين كل يوم
: اضل طول عمري بالهول يم امك حاذق وين صايرة وهم امك دتاخذ الغرفة لبصف هاي
: مادام صايرة عدنا تصير يم كومة عالم واتمنى تلبسين حجاب منا وجاي كدامي ترا تحرمتي عليا هوو
: ماكو اريد غرفة
حاذق: اهووو
كالها وهيا سكتت اني طفرت
: حبيبي لا تضوج روحك حقها شافت البيت جبير هواي تريد غرفة ميخالف عود اممم نفضيلها المخزن الثاني؟
كلتها وهيا طككت عيونها
هيل: انام بمخزن اني؟ ليش يمة فارة؟
: ما ردتي غرفة؟
: مو مخزن
حاذق: كافي هيل شنو تريدين نبنيلج غرفة مثلا
ضحى: ترا مو مخزن هوا هيل جبير لا تنقهرين يعني حجمه زين مقارنة بيج
ما ردت صارت تطحن ودارت وجها خايبة توازين روحج للاهانة ليش
مر الوقت وضحى رادت تنام كامت جت على اخوها
ضحى: يالله يسلمو طبعا ما قصرتو نشكر تعاونكم معنا بس احنا مانشتغل ع الباتري ونريد ننام يالله جيب عشلي
حاذق: دروحي نشحني لعد ونامي
: هوا اني اكدر اتحرك اصلا اذا ما املي ريتي بعطر عشلي هيا شحن مالتي
كالتها وتذكرت شي دنكت تلعب باصابعها وتباوع لحاذق ببرائة
حاذق: غردي
ضحى: شسمة
: شسمة
: اريدد احممم اريد
: كولي خويا
: اريد فستان للزفة حباااااب
باوعلها وعوج وجهه
هيل: زفة اخوج الثاني مو؟
ضحى: اي؟
: اي المفروض هوا اليجيبلج مو حاذق خما نجبر بيج
حاذق: وقزالقرط
كالها بنتر جفلت وسكتت كمل كلامة
: ما دتاخذ من بيت الخلفج شماتريد تطلب ويجيها
هيل: بس جان قصدي انو ما تثكل عليك
: لا تدخلين انتي حيوانة
سكتت ودنكت راسها كال باجر روحن للسوك
ضحى: صدك والله
: اي وبشرى انتي هم خذيلج فستان
: واني راس ابوي اكرع
: لا خذي التريدي يابا
باوع لهيل كال خذولها لهاي هم رجع يبوس بنسيم
نسيم: بابااااا
حاذق: ياروحة لابوج
كالها وراحت على خشمة تبوسة
: هاي معناتها هيا هم تريد فستان
ضحى: يجيبلها المول كله
حاذق: خذولها احلا فستان اريدها تطلع احلا من العروس
راحت ضحى تبوس اخوها هوا جر وجهاا وباسة رادت تبوس ايدة سحبها ودمغها
حاذق: شبيج وهري اعقلي لا اشك حلكج
اخذت ضحى نسيم تلكف بيها تكللها يالله مشي ننام وذيج جلبة تكيف على ضحى
هيل بس نطتنا ضهرها لبستهن سحبته من ايدة وطلعنا هوا طلع قبلي ضحكت بوجهن وسويتلهن باي ورحت اي والله افلفلكم
ثاني يوم ردنا نشتري ملابس للزفات وكالعادة هيل كمزت ويانا الا تجي حاذق ستلم راتبة وحطة بيدي كلي لا تخلن بنفسكم شي
: كلتنا؟
: تقريبا هههههه
: والله مارديها تاخذ نستلة
: والله ولا اني بس هم حرام انتو كلكم تشترون وهيا لا
: انت دتخاف الله بس هنا
: تريدين الله يفحمني اكثر من هالفحم اشترولها وياكم يالله
: راح اخذ لنسيم قاطين
: ماشي
: ومكياج الي
: خذي
: واريد طبوعات لسومة
: خذيلها
: واريدلي....
: ماكو روحة
: لا لا هاهيا مااريد شي
اخذت البنات ونسيم وطبعا بباي جت ويانا رحنا للسوك نشتري ملابس اول ما طبينا ضحى كمزت على فستان لو هذ لو ما اخذ
منفوش شويا لونة كريمي صدرة تول وورد وردانة نفس الشي طويل بس كلش فخم ولطشت ما اروح الا اخذة
طبينا للمحل وشتريته ب75 ما كلت لا نزلة ورحنا
بشرى مادور شي من تشوف الاسعار تنسحب رغم اكللها ما تهتم بس ما تقبل اخذت بنطرون وبلوز وعلي وشال
هيل عينها فارغة تدور اغلى شي بس ما خليتها والله اخذتلها فستان حلو على لون عيونها ب33والله ما تستاهل 33ولعمتي اخذت جبة
ماعجبني شي بالسوك كله موديلات مكررة كلت اروح لسوك ثاني اخذلي اشترن احذية كعوبة كلهم كلشي ما شتريت ردنا ترجع وضحى جلبت الا ناخذ لنسيم قاطين
رحنا لمحل اطفال اخذتلها فستان كريمي وفستان اسود مرهم ببيض وحذائين ابيض وذهبي
رجعنا للبيت ميتين تعب عمتي كيفت لبالها ما اشتري اي لو اموت هم دروح بس الراتب طار خبرت حاذق ابجي
حاذق: شكو شكو شبيج؟
: وا حاذق ما شتريت فستااان
: وليش ماشتريتي بويا
: ماعجبوني
: لاتبجين نروح لسوك ثاني
: مو الراتب خلص
: ميخالف عندي فلوس خذي اليعجبج
عمتي: يااااا شدعوة هالمصرف كنتورج مليان
: لعد لمن جنتنج اخذت فستان ب33مو مصرف
: هيا كل وين ووين تشتري انتي كومة عندج
البنات قاسن فساتينهن طلعو يخبلن عليهن ضحى تموت وبشرى هم حيل نازكة ووجه بباي بعد طلعت حيل حلوة
رحنا على غير سوك اني وحاذق اليعجبني ما يحبة والي يعجبة لو اموت ما البسة وما تفقنا بس اخترتله قاط يجنن علي وهوا طويل واسمر طلع تحفة
ما عجبني شي ضاج ورجعني لئن مااخذت هم كلبتها مناحة
ردت اروح لسوك ثاني بس الافندي تعب اي اني ما تعبت
عمتي: وهم جم بدلة عندج؟
: اريد بعد
: لليش؟
: للعرس
: مالازم يمة الراتب طار
: ماعليا اريد فستان اني والله بنت عمي حتتزوج
: اي بت عمج تتزوج الا ببدلة جديدة عندج كومة خذي منهن
حاذق يمة احجي
حاذق: ترا صح كلامها وهم عندج ملابس ممدشنات
كمت احلج حلفت ما اشتري ولا اروح للعرس سويت اعتصام لبسني مادار بال خلاني اشيل روحي والزكها بالكاع طلعت لغرفتي اشيط
خبرني ادم كامرة مسحت عيوني اريدها ماتبين وفتحتها ضحكت بوجهه جان مدنك
: هلو خوياا
: اهلين بنيتي.....
سكت شويا صفن بوجهي كال هاي شنو
: شنو؟
: دتبجين؟
: ها لا لا
: شنو لا وهم دتبجين خدودج حمر شبيج يابة
: ماكو شي خويا ماكو شي
: شنو ماكو شي رجلج مضوجج بشي
صفن شويا وحجا
: خمو ضربج والعباس اجي ادفنة
: لا لا هوب ما ضربني والله ما سوالي شي
: لعد ليش تبجين؟
كالها وبرطمت غصبن عني كام يغلي
: جايج
: والله ماكو شي خويا
سدة وراح ديالله خل اشوف سماح شلون ما تخليني اروح بعد اي والله اشتري اشتري
مامسحت دموعي اصلا بجيت اكثر حت ادم يشوفني سويت كصيبتين راهيات عود كيوت ونزلت عمتي وهيل يباوعولي ويضحكن بسيطة سلابيح
دقايق والباب نهجم جان حاذق يسبح طلعت بشرى تفتحة
ثواني ودخل ادم عيونة تدورني عمتي وهيل كبل فكن عيونهن من شافو اي فديت حت عطرك
شافني وبرطمت من شفته فتختله ايديا اجا ركض عليا رفعني ولفني بحضنة حيل ويشمني واني تعلكت بركبته
شال راسي لزمة بثنين ايدي يمسح خدودي ببهامة وباس عيوني ابتسم بوجهي يطمني انه يمي بعدين حجا بجدية
ادم: عليش تبجين؟
عمتي: والله يمة اختك عقلها صغير
خزرها بس ما سكتت
عمتي: دتبجي لئن ما اشترت فستان جديد لزواج بت عمك
ادم: وليش ما دتشتري؟ شلون اصلا ما تشتري؟
: رجلها ما عندة والله وهيا عدها كومة فساتين
كالتها وحاذق نزل ركض من فوك ما يقبل تحجي هيج
حاذق: هوب هوب خل نتفاهم
ادم باوعلة وتخصر ينتضرة يحجي
ادم: اتفاهم يالله
حاذق: على جم سوك وديتج؟
: بس2
: وعجبج شي؟
: اي بس انت ماقبلت اخذه
ادم: وليش ما قبلت تاخذة بالله
حاذق: مفتوح هواي مو طماشة حرمتي
عمتي: يمة عدها فساتين باليعلمة الله عليمن المصرف
: ميخالف اريد بعد
باوعت لادم والبرائة تخر من خشمي باوعت للبنات بشرى عينها بادم وضحى حاضنة نسيم وكوة ماسكة ضحكتها بس ابتسامة تك خد على وجهه تخبل
ادم: تاخذها للسوك لو اخذها انا
اويلي الله كالها لو ملكت الدنيا ضل صافن رجلي كبل ابتسمت
ادم كله فضني
حاذق: دتكلك راحت لسوكين ما عجبها شي
ادم: انا اخلي يعجبها كومي بدلي
باوعت لزوجي وارمش دشو يقبل هوا يباوعلي بنص عين يعني اذا بيج حظ كومي بلعت ريكي ودنكت
ادم: ها يابة دكومي
: مو زوجي...
: حاذق تقبل غير
حاذق: لا
طكك عيونة ادم اوف انعلستي وهم حك طارف حاجبة ببهامة وكلة ما سمعت
حاذق: مااقبل تروح لئن راحت وما عجبها
ادم: بس انا داخذها
عمتي: يااا يمة ادم ديكلك رجلها ما تطلع
: لعد هوا ياخذها دتشتري من اخذتها من عدنا كلت اعيشها مثل ماعايشة عدكم ومن جانت عدنا تروح لاكثر من سوك لي ما تشتري
: خويااا
: مرتك وخواتك شترن لو لا؟
حاذق: اختارن العجبهن هيا مارادت شي
عمتي: يمة شنو دتسون مشكلة لخاطر روحة ع السوك
بشرى راحت يم حاذق همست باذانه مدري شنو باوعلها ما راضيلة
ادم: ها يابة عليمن جاي انا وهم؟
بشرى: وهم اذا دتروحين اريد اجي وياج
: اذا اخوج قبل اروح تعاي
بشرى: ها خويا
يستحي من ادم وقبل من حماسي طفرت بسته من حلكة كبالهم كلهم ادم نطاني ضهره
ضحى: لج هوووو مو هنا
طفرت على غرفتي لبست بنطرون وبلوز وبشت الشال لفيتة بسرعة ونزلت لكيت بشرى بغرفة نسيم
: يالله اني كملت وين بشو
ضحى: من البداية ماجانت نيتها تجي بس كالت هيج
: وادم؟
: برا ينتضرج
حاذق: ترا لها حساب هاي
: اراضيك ببوسة
: مكطوع عنج البوس سبوع
: ديالله ميخالف be open maind حبييي رايحة ويا اخوي
طلعت شفته واكف رحت لزمت ايده شال ايدي وباسها
رحت افتريت اسواق ويا ادم يونس مو مثل حاذق يشارك ولا يفرض شي بس يشجعني ع اللبس مثل هذ الون يرهم وهذ مميز وهذ يبرز وكذا خطية كسرت رجولة لي ما اخترت قفطان جرجيري بس حلو من نفس المول اخذت كعب وشال اسود وهوا دفع حكهن
: امعود جايبة فلوس وياي
: مشي اشتري بيهن محبس
: مااريد
: خليهن الج لعد
: ادم ما جبتك حت انت تدفعلي
: اذا لبنيتي ما ادفع المن ادفع ياعمري ثم شسوي بيهن اني ماعندي احد اصرفهن علي انا
سواني بكد النقطة دفع حسابهن ورجعني للبيت بوسته وفتت شفت حاذق ديلعب ويا نسيم وضحى رحت علي مطنكر دنكت بست ركبته ضحك
لبست القفطان وشوفته هوا طلع حلو الحمدلله رضا غمزتلة ضحك
هيل: شكد كلفوج كل ذولة
: وشعليج؟
: سئلتج باحترام جاوبي باحترام
: مو هواي
: يعني
: 150الف بس
عمتي شهكت وحاذق صفن فتح حلكة ضيعتها
مرت باقي الايام عادية هيل تورطت بالمواعين محد يغسل غيرها طبخ اني وبشرى ومرات ضحى تعزل
سماح كاعدة وتتعارك ويا ذبان وجها وتريد تزوج بناتها تكول لبشرى تقتنع حت حاذق يوافق وذيج ما تريد
اليوم زفة ميار واخو بشرى وضحى وين صايرة زفتين بيوم
سماح وهيل والبنات تحضرن من وكت ووداهن لبيت ابوهم حت يطلعون مع الزفة
بشرى.
اخذنا غراضنا ووصلنا حاذق لبيت ابونا وراح رجع لوهم
طبينا نهلهل ونصفك وضحى تضحك بوجه مرة ابويا تخليها تنشك لئن طالعة حيل حلوة خصوصي بعد عمليتها جنها وردة
حالة شعرها على طولة ومخلية بي ورد من ورا فستانها مزيج بين الفخامة والنزاكة والايلاينر والرموش قالبات جهرتها
هيل ما تعرف احد بس كلمن شافها انصدم عرفو مرة اخونا هيا حلوة ومرتبة جسمها متناسق
بس خوثة عليمن تركض ورا حاذق ماادري
صار وكت الزفة طلعنا ورحنا لبيت البنت شفت منطقة راقية وحلوة تشبه بيت حاذق وفتنا دناخذها
فات اخوي وفتنا ورا جان اصفن بالشفتها
مرهم اخت وهم من ضمن الموجودين وشويا من اهلها امها واسيل وجيهان واخت اسراء ليش منو العروس
رحت يم اخوي سئلته شسم مرتة كال ميار
وات يعني هسة هاي بنت عم وهم؟
رحت على مرهم سلمت عليها وسئلتها ع العروس كالت بنت عيالها
يعني احنا ووهم بنفس القاعة حنكون هسة ضحى تتخبل
رحت على اخوي سئلته شلون عرفها
: جانت طالبة عندي
: بربك
: اي والله ومرة خسرت كدامها جلسة10/3 قبل سنتين
: خسرت كدامها بقضية كفالة طفلة؟
: اي هيا
: الله ربك انت جنت محامي اهل محمد؟
: شنو؟
: لا هيج
واو صفنت ورحنا للزفة ميار عرفتني وسلمت عليا لئن بقضية طلاكي جنت اتواصل وياها وهيا عرفتني ع المحامي الثاني الطلكني
وهم.
كملت مكياج ولفت الشال رسمت عيوني بالايلاينر وسحبتهن طلعت عيون بزونة ونسيم بسابع نومة بس مبدلة وتخبل طالعة
حاذق طلع من الحمام يلبس ساعتة كال يالله خفي
: اي كملت
باوعلي ديتاكد وتغيرت ملامحة عرفت راح يعارض
: بشرفك لا
: ما اطلعين هيج
: فدوة حاذق مابي شي طويل ومستور وشايفة عليا قبل
: والمكياج الصارخ؟
: حلو ترا
: مااريد وجهج يطلع
: ترا جنت افتح لايفات والامة كلها تشوفني
: ما جنتي حاطة 5كيلوات طحين بوكتها
: ميخالف هم دروح بي
: وهم مااخليج اطلعين هيج والله شنو كواد اني
: اي لعد شسوي مثلا
: غسلي
: والله ما اصلا كلهن نسوان
: وهسة من راح نطلع شلون؟ هم كلهن نسوان؟
: مااغسل تعبت بي
: لعد شلون وهم حليها انتي
جريت الشال وغطيت بي انفي وحلكي ضلت بس عيوني طالعة كتله وهيج
باوعلي مبحلق عيونه وفاتح حلكه حسيت اعصابة رخت هذ يموت على العيون المكحلة شلت الشال بسرعة
: حاذق بروح امك لا
: بروح امي امبلا
: لا حاذق والله مو وكتها العرس راح يخلص فدوة
: شسويله وهم والله خاف جنت ناوي بس تغسلين هسة الا تسبحين يالله نطلع
كالها وطفرت من يمة بس وين اكدرله كمشني وحصرني بالحايط
: بشرفك تعبت بي والله
حاذق: هههه شدسويلج قابل؟
: اتركني حباب
: ماا
: صير خوش ولد
: ولد؟ تعالي اشوفج الولد شيسوي............
بشرى.
طولت وهم اريدها تجي ماهي كل شويا اكو هياتها وماكو
اجت اخير العالم جانت ضايجة ومادة البوز ماتضحك بتها بيدها تصفك مكياجها خفيف وعيونها حمر اجت يمنا نصدمت من شافتنا وكعدت
وهم: شجابج ولج؟
: زواج اخوي
: لا بربج
: والله ناسبناكم يابيت الصياد للمرة الثانية المهم وينكم ولج متاخرين؟
وهم: سوادين اخوج تالي وكت
كالتها وكمت اضحك بهستريا
وهم: ووجع
: بربي شنو انتو
: احنا شنو صوج اخوج جنت خالة مكياج شكد حلو من شاف عيوني مكحلات تخبل بالحرام ماتطلعين الا نسبح امعود ابو الغيرة ابد ولا يمي يكلي مينشبع من وجهج وكلي يالله نسبح والا سوا حت نلحك نجي وبالزور تلاحكت روحي خليت شويا كونسيلر واجيت هاي عملة هاي
: ههههههههههههههه ليش تتكحلين؟
: والله جاية لعرس ولابسة قفطان مغربي شحط مثلا تنت لا اكيد مكياج عرب
سماح: هسة وكت حماماتكم ولج؟
وهم: اي شسوي ياعمة ابنج مايسيطر على روحه من يشوفني مو زين كدرت اخلص منه بمرة وحدة بس
هيل: ووجع
: بفادج كون
سماح: وانتي ليش تسوين شي يسودنة بالله هسة وكتها؟
: والله حلالي واليحلالي اعمله يعني عمة ما جنتي تسودنين عمي المرحون بس لا ما اضن
ضحى شافت وهم وتخبلت اجت ركض شالت فستانها وتضحك فكت ابديها وذيج بعد تفك ايديها وتصرخ ذحةةةة وضحى تصيح عشلييييي
وصلت شالتها افترت بيها وفستازها كلوش افتر وياها سلمت على وهم اخذت نسيم تلكف بيها وتفتلها ع المعازيم وهم راحت تسلم على اهلها
وهم.
سلمت ع اهلي كلهم ومسكت جسار امعط بي الطفل ينكرط نضراته رصاص شفت امل شكد مشتاكتلها رحت ركض حضنتها هيا وابنها بيدها متغيرة سمنانة
: وحشتكم والله ولج
امل: والله انتم هم مشتاقيلكم
: لعد ما تجون
: بالله ما نطيق نجي لبغداد امي للتالي ما تقبل تعرفين انتي
: الله يعين كلبها والله شخبارها.
: الحمدلله دتراجع دكتور جملة عصبية والحمدلله ع طيق تتحرك شويا شنسوي هسة من سمعت بزواج ميار خطية شصاغ بيها ما تطيق تجي
: بالله بالي يمها ومشتاكتلها حيل
: تعالي انتي
: وين يقبل رجلي اطلع
: اخباركم وي ادم ما تزوج
: ادم ما يقبل يتزوج قافل حت امي كلتله اخطبلك تعارك وياها
: خما يضل قاتل نفسو ياوهم؟
: مكان اسراء يولي
: والله روحتها كاسرة ضهورنا بس شنسوي الحياة تستمر عبالكي سهل علي اقللكم خلي يتزوج وهوا كان زوج اختي الوحيدة لا والله للان اسمع صوتها وضحكتها وسوالفها
لمن كانت تجي تفحص اسناني وتقول اعالج خيست ثمكم
كالتها ودنكت تبجي حلجت كلبي
امل: لازم يشوف حياتو ما يصير يضل قاتل نفسو
: الله كريم اكول شفت اخوج عمار بزواجي متزوج
: اممم بنت عمي
: واو ردت اسئل واستحيت شلون وشوكت؟
: ورا ما ماتت اسراء البيت فرغ على امي عماد مغتو عازلي قالت امي خل نزوج عمار
قال خذولي فاطمة ورحنا خطبناها واخذها ع الساكت بلا اعراس وهوسة
ضليت اسولف وياها بيها عطر اختها لا عشتو للان مقهورة عليها حت للتلفون حاطة صورتها واجهة
رحت للحمام اعدل مكياجي الحاذق خربة
كعدت البخ الا ان طبت عليا هيل ضايجة سحكتها وحجت
هيل: تعرفين شديكولون عليا؟
: فد وحدة ساقطة
: لا هههههه احلا وحدة بالعرس اني
: لعد ضحاوي شتكول والله احلا منج
: اني حت من العروس احلا
: دنجبي عاد عيونها ملونات شويا مصدكة روحها الجكمجة هيكل عضمي متحرك
: اممم كلمن شافني كال حاذق ماعندة عقل التزوج عليج
: والله حقهم ما شافوني ثم حاذق الله يعينه عليج شابع ذنوب من وراج
: لعد وشعليا؟
: راكنج بس يالله طلعي عاد ضوجتيني
طلعت واني كملت مكياجي طلعت اخبل احلا من المكياج الجان قبل ما اطلع هالمرة رسمت عيوني رسمة اوضح ولزقت رموشي طلعت فد شي
طلعت اتمخطر رحت يم اهلي ونسيم بيد ضحى تفتر بيها والعالم مخبوصين بيها جعليها بزونة بنصهم
ملبستها فستانها الاسود وضحى كريمي طلعن يخبلن سوا نسيم مكيفة بضحى تباوعلها وتضحك تلم ايديها لحلكها وذيج تتخبل تشيلها تبوس بيها
وكفت ضحى بنص القاعة فرغت المكان ووكفت نسيم فرتها بيدها وذيج شعرها طويل شويا افتر وياها وتضحك بعدين اطكلها اصباعة وهاي تنطلق تكمز
رحت يم عمتي مرة الخ وجت عمة ضحى وبشرى على عمتي طاعجة وجها
: ها سماح شو هنا
عمتي: نعزمنا
: ومنو ذني البنتين الوياج ما مبين خلفتج شو ذولة ملونات
: جنايني نسوان ابني
: ياااا ماخذ ذني ثنينهم؟
: اي ثنينهن هاي الاولى وذيج الصفرة الثانية
هيل: خالة منو انتي؟
: اني عمة العريس عيني
: اممم خالة رجائا دتزعجبن عمتي بحجاياتج اتوقع لازم تروحين منا
بشرى: هيل انلصمي
عمتها: عمة بشرى هاي شو ما تحترم
كتلها والله خالة هاي شويا ما تمام اعذريها
: ايي من هذ تزوج عليها
هيل: لا والله مو من هذ هاي سحارة اني وين اكو مني
عمة ضحى: والله بس اليمشون بالسحر يحجون بي مو تمام سماح
كتلها خالة مايصير تبقين واكفة كعدي ويانا
: انتي ام ذيج البزونة البيد ضحى كالت بنت اخوها
: اي خالة بتي هاي نسيم
: صدقة تشبهج تخبل
: انتي الاحلا خالة ليش اني شنو يمج جعليج جكليتة
هيا حلوة تراسيم وجها تشبه ضحى وضحكتها تخبل هم تخبث على عمتي كيفت عليها
جت كعدت يمي واني ضحكت بوجها ذيج الضحكة والابتسامة التخبل باوعت من بعيد ضحى غمزتلي وباست نسيم عاد اني ما قصرت جريت وجه عمتها وبستها بخدودها
عمتها: يمة صدقة ماعندج بس هل بنية؟
عمتي: جان عدها وحدة من زوجها الاول وروحتها
: احممم
عمة ضحى: ليش يمة جنتي متزوجة قبل
سماح تباوعلي من جوا الجوا لبالها اضعف اي دكفيلي
: والله خالة زوجي الاول راح شهيد وجنت حامل ببنت ماتت ورا مباشرة الحمدلله على كل حال الله عوضني بحاذق وبتي
: يالله يمة لا تنقهرين باجر عكبة تجيبين كومة جهال
: خالة انتي وضحى تتشابهن حيل اكول ضحى المن طالعة حلقومة
: بنت اخوي بعد لمن سماح جانت حامل بيها جنت ببيتهم اني
: انشالله خالة بس كون من احبل اجيبج لبيتنا احطج كبال عيني حت جهالي يطلعون يشبهوج
: يمة فدوة لهل لسان كربي ابوسج
اخذت وجهي تبوس بخدودي باوعت لهيل كلتلها وانتي جم طفل عندج
هيل: ماعندي
: يااا
كالتها وباوعتلي ضحكت وكامت باوعت لهيل ما تضحك شويا وعمة ضحى راحت لشلة نسوان كبار بالعمر طلعن عمات ضحى الباقيات اجن سلمو عليا كامت بشرى تستقبلهن وكمت وياها
اللواكة تقرا الف ابوس بيهن وامعط وهنا يكيفن ضحى جت تضحك بيدها بنتي بوست عماتها وانطت بنتي لوحدة منهم
ضحى: شوفي عمة بت اخوي هاي
: يااا صدقة شلون بزونة هاي الجننت كل الموجودين يكولون جعليها من جذب
اخذوها يلكفون بيها وراحو رجعت على عمتي
هيل: ميتات على وهم عابت
: خايبة شوفيني شحلاتني اخبل نعل ابو كلمن شافني وماحبني
: اني ما حبيتج
: اي نعل ابوج
رادت تكوم تكتلني بس لزمت نفسها كعدت وسكتت بعدين كمزت
هيل: شو بنتج ما اسمعها تبجي؟
: قل اعوذ برب الفلق
: صدك ليش؟
: وعليمن تبجي؟
: مجلبة بضحى حت ما تتذكرج انتي وحاذق
: اي ضحى تحبها وتناغي وياها نهار كله تنسانا
راحت ضحى اختفت دقايق وطلعت هيا ونسيم صدك احتلت الساحة هالمرة
لابسة فستان يخبل لونة اسود كلوش قماشة حرير يلمع وحيل طويل شايلته بيديها صدرة مفتوح واردانة نازلات ومنفوشات ونسيم بدلتلها لبستها فستان كريمي وبي حزام اسود ورا ضحى ولازمة فستانها حت تعرف تمشي ومكيفات بيها العالم حت ميار شالتها وتركص رجعت تركص ويا ضحى
اخذت كل الانضار حت اهلي تعجبو بيها
كحيلة ما اجت جلبة مشتاكتلها جنت
الحفلة من احلا ما يكون كلشي بيها يخبل ومو مختلطة لي الليل فاتو الزلم حطيت الشال شلون ماجان على شعري من كدام جان شويا طالع شويا وفات حاذق
: ها ولك شجابك؟
: اروح؟
: لا اوكعود ونسنا
: وين بتج
: وين ما تشوف ضحى تلكيها اخذت كل الانضار اليوم
: اي بت حاذق بعد
: دطير حبوها لئن تشبهني
شفت نسوان يتهامسن بينهن يباوعولنا شبيهن ذني شويا وجت وحدة منهن كعدت يم حاذق وسلمت ردينا السلام جت ضحى شايلة نسيم كعدت يمها طلعت مرة عمها وكبل بدت تحجي
: عيني سماح جيتج بطلب
عمتي: كولي اذا اكدر علي
: والله حسين شاف اخت جنتج وكلي اجي اطلبها منج واحنا جاهزين شكد تريدون تعرفين حسين ابني شلونة صيدلي وعلي العين مايعيبة شي شتكولين
: عليمن دتحجين؟
: هاي
كالتها واشرت عليا دنك يباوعلها ماعاجبة وضحى طكتها ضحكة شعلاتها
عمتي: ماتغلى عليج
ضحى: اي ههههههههه وهم وياها عرض خاص خذي قطعة واحصلي على الثانية مجانا
هههههههههه مثل علبة النسكافي اذا تشترين قوطية ينطوج وياها كلاص
: شقصدج ضحاوي ماينطونا؟ يابنية اهلج ما ينطوج؟
ضحكت اني بعد على سوالفها
حاذق: خالة هاي مرتي
كالها وطككت عيونها باوعتلي مصدومة
ضحى: والله عمة جان بعيني بس للاسف الخادم الذي تحاول الاتصال به محجوز وهاي العشل بتها
: ياااا هاي بتج؟
: اي خالة بتي وهذ زوجي
ضحى: صارلي ساعة اكمز واكلكم بت اخوي بت اخوي شبيكم ماتصدكون
: لا عرفت بت اخوج بس اني اعرف هاي مرتة ام عيون البزون لبالي بتها
: هاي الثانية خالة
: يااااا والله لبالي خوات
كتلها لا عذا
: والله لبالي خوات وهاي بتها مو لبالي بتج
راحت من يمنا ضايجة شفتها وكفت يم واحد حليو بس كصير كتلة حاذق شوف خطيبي جرني من كتفي لحضنة كلي خبي وجهج شتعلو شواطينج
شغلو اغاني ركص باوعتلة وضحكت
حاذق: لا تفكرين
: حبااااااب كوم
كلتها وكمت سحبته من ايدة وفتنا بنص الهوسة كمت اركص بهدوء وهوا وياي يضحك جرني لحضنه ورجعني
نركص ونباوع بعيون بعض تذكرت زواجنا نركص هوا بعد مكيف لزم ايدي وفرني نتمايل سوا جرني لصدرة وايدة على خصري ونركص
شغلو اغاني ركص اقوة نردح ونطك اصابعنا سوا جت ضحى تتمايل حطت نسيم بيدي وكالت تركصين مثل سرمد جودي
وراحت تصورنا
اني وحاذق نركص ونسيم تركص ويانا عينها على ابوها بعدين عليا تصفك وتضحك تلم ايديها لحلكها فدوة دنك باسها
جت هيل تركص تتمندل ويانا عود ما لبالها شي ما نعرف نيتها عود جلبة
نسيم بيدي والفستان طويل داركص وماكدرت ارفعه جت هيل عود تركص جان تدفعني واعثر بالفستان اريد اتوازن مااكدر دست ع الطارف نشك ووكعنا اني وبتي
صارت الوكعة على ايدي ثكلي وثكل نسيم عليها حسيتها نكسرت غصبن عني صرخت
جا حاذق دنك علينا بسرعة
حاذق: على كيفج على كيفج حاولي تكومين اجالج
: بتي حاذق بتي
: مابيها شي مابيها شي هديها بس
: مااكدر ايدي ااااخ
ضحى بسرعة شالت فستانها وجت تركض ذبت روحها يمي
كعدت يمي مسكت ايدي
ضحى: ولج وهم اجاج تكدرين تكومين؟
: ايدي توجعني
حاذق: دتركي الطفلة واني اكومج تعالي ضحى خذيها
جانت نسيم تصرخ اخذتها وكومني
شفت هيل رحت بسرعة دفعتها مسك ايدي عتها اذتني كمت اصرخ تركها واني الوب لزم راسة وجتني بشرى
بشرى: شجاج؟
: دفعتني ذيج الجلبة
: هيل ليش
هيل: ياا والله تجذب
حاذق: كافي انتو الاثنين
راحت كعدت واني رحت يم اهلي ضايجة سحبوني يمهم بشرى وضحى وياي
حاولت بالزور حركت ايدي موتتني بس مو مكسورة الحمدلله ونسيم تصرخ ضحى احتارت بيها شلون تفرها
: ولي تاذت شبيها؟
ضحى: والله مابيها شي ما مطخوخة والله بس تشوفج تصرخين متوجعة اتخرعت
: جيبيها جيبيها
: اي ديريبالج
اخذتها حطيتها بحضني ابوسها باوعتلي وشفتها ترجف
نسيم: اممي
: ها امي
: اوا؟
: لا حبيبي ما بيا شي
حجيتها وشلتها ابوس بيها كالت اوااا واشرت على راسها من ورا بستها كن نطخت الله ياخذج هيل عاد شلون اخذ حوبة بتي
: ضحى
: هاا
: نسيم وكعت على راسها هاي هيل دفعتني والله
عاد ضحى تتنفسها لنسيم طكك عيونها ودارت راسها لهيل هزته تتوعد كالت سهلة والله لاهينها
اجا حاذق عليا سلم على اهلي ودنك جنت ضايجة منه ولازمة ايدي من مكان الوجع دنك باسها فزيت من حركته كلي شلون صارت
: زينة
: توجعج؟ اخذج لدكتور؟
: لا مايحتاجلها هسة اطيب
: وسومة؟
: راسها مطخوخ
: بربج
: والله اشرت على راسها تكلي اواا وين الخاتون؟
: بمكانها
: حاذق والله هيا الدفعتنا
: ماشفتها
: بهل بساطة؟
: نرجع للبيت ويصير خير يابة تعالي كعدي بمكانج عاد
سلمت ورحت يم عيالي وهوا طلع جت ضحى وجابت بنات عمامها طكطك باصابعها وتباوع لهيل كلت هسة تكتلها
لاتنسون تصويت⭐⭐⭐⭐⭐
اسراء العزاوي
💜💜💜💜