احساس منحور

part11

وطلعت ع الكلية مااريد اشوف احد رحت للاداب بوجهي صار حاذق كدامي رحت علي وكتله ع الصار
حاذق: شلون يعني ينطونج فصلية؟

: ماادري لبارحة اني عرفت قيصر متفق ومخلص وياهم راح ينطيهم سيارات الى بالمعرض واني

: وادم؟

: يعرف بكلشي وقابل اني هذ المدمرني شوف شلون ضربني قيصر لبارحة كسر فكي

: ايده بالكسر انشالله مستحيل يصير شلون هيج انتِ شنو ذنبج بخطايه

: ماادري والله كلي اتفقت والخميس العكد والزفة حاذق خلصني ما ليا غيرك

: شبيدي عليج هسة بس لا تخافين والله مااخليج يمهم

: يريدون ياخذوني للبصرة حاذق ذولة ناس ميخافون الله يكرهونا انوب اخويا جتال اخوهم

: وهم كافي تضغطين عليا الا الكة طريقة اخلصج منهم

: كلبي ديوجعني

: لا تخلين ببالج وهم والله اطلعج منها انتِ هم ساعديني شويا مااكدر ادير بالي ع كل الامور مرة وحدة

: شنو راح تكدر تسوي الخميس بعد 3ايام شنو دتكدر تسوي بهل ايام

: الاريده منج هسة لا تسوين شي يضايقهم حت لا يردون يضربوج

: شنو راح تسوي؟

: لا تفكرين هسة روحي ع كليتج وركزي بدرسج

انتهى الحجي عد هاي النقطة

رحت لقسمي واخذت الدروس بس ابد مو يمهم يشرح الدكتور ويطلع خلص الدوام ع هلحالة

رجعت للبيت جانت امي التعب مرسوم بوجها ماحاجيتها رحت لغرفتي داصفن بوضعي

اني مامكتوبلي ابقى بمكان ارتاح بي جنت يم ماما شموخ طلعت مو بنتها النوب جيت لهنا دروح فصلية حاذق ممبين علي راح يسوي شي بس ممعقولة يتخلى عني بهل سرعة

ردت اقرا مكدرت فكرة توديني فكرة تجيبني حطيت راسي ونمت

حلمت بحياتي شلون راح تصير كعدت المغرب على صوت دك باب البيت باوعت من البلكونة شفت شيوخ جاين ماطلعت من غرفتي اجا قيصر دفر الباب عليا
قيصر: كومي اجو اهل زلمتج

: قيصر ابتعد عني مااطلع

: كومي داكلج غطي شعرج ونزلي يالله لا اذبحج

: والله مااطلع واش ما تريد تسوي الله ويدك

ماسمعني جر قميص من خزانتي خلى على راسي وجرني من شعري واني اصرخ اريده يعوفني ماخليت طريقة للمقاومة ماجربتها

موتت روحي بيده ولا يفيد بي جرني سحل نزلني الدرج وفوتني الصالة اكو شيوخ كومة زلم معممة وكبالهم علاكتين فلوس

ذبني بنصهم كال هاي هي اخيتي وهذ الفصل الامرتو بي

باوعولي الزلم كلهم اكو واحد جبير يطلع بعمر قيصر جان يباوعلي بنضرات حقد
قيصر: شيخ چاچان هاي فصليتك حك دم اخيك وانا ممنون