صور دازيلها الها تخزي منضرها جان كلش مو راهم فشلة الصور تروح بيهن اذا شافها حاذق
ومكتوب جواهن سوي الاريدة لايصل ابداعج لاخوج
كمت ارجف انرعصت وهيا انتهت صارت تبجي وتلطم
: ولج منو هذ منوووو؟
ما ترد تلطم وتنوح
: ولج فهميني منو شيريد منج؟
بشرى: هذ مدحت
كالتها الا ضربتني براسي هذ جان زوجها شلون هيج يسوي وهسة هوا تزوج الاعرفة
دست راسي بثنين ايديا اريد استوعب عقلي وكف
باوعتلها ترجف
: شيريد منج؟
شهكت وغطت عيونها
: ولج شيريد؟
: يريد ارجعله يريد اتوسل باخوي يردني اله
: ليييش؟
: ماادري ماادري صارله فترة يلحكني واخته تحاجيني بالقسم ارفضها اكثر من مرة الا هوا بعد اجا صار بالبداية يهددني باشياء بسيطة هسة صار بيها صور
: منين جابهن؟
: ماادري ماادري والله
صارت تشهك وتلطم لزمت ايديها
: وشدتسوين هسة؟؟
: ماادري وهم ماادري فدوة طلعيني منها والله يموتوني والله
ضليت الوب هسة اش نسوي بشرى انتهت تبجي وتنوح وكل شويا تتخيل شي الراح يعملو اخوتها تكول حاذق اذا ينلزم سهر مخبل ما يخليها
: نخبر محارب ابتزاز
: مهددني اذا كلت لاحد ينشرهن
: ولج مرة صار وياي نفس الموقف بس اخوج الطلعني منه
: انتي مو اخته وهم احنا كبل ذبح
: شنو حيوانات وذبح لا تخافين خل نكلة
: لااااااا ولج شتكليلة لاااااا
كالتها وكامت تلطم
: هش هش هاهيا مااكله بس اهدئي
ضليت صافنة اجو ببالي اخوتي
: ادم
باوعتلي بسرعة وصدمة
: مالنا غير ادم والله يمرد ضلاعة مايخلي يجي يمج لو يتعرضلج بعد
بشرى: ولج اخاف اخاف لايسويلي مشاكل
:يكسر مبايلة براسة
: بعد حافظ الصور باكثر من جهاز ولج
: خل اكله بشرى
باوعتلي تبجي
: مايفضحني؟
: ولج شهل حجي لا اكيد ادم سبع وحوك عندة غيرة ومساعد هواي حالات مثل حالتج قبل خل اكله نستلحك لا يتعمق اكثر بسوادينه
صارت ترجف خايفة
: ولج حقا متيم هكر والله
: ولج تريدين تنشريني بكل عيلتج انتي؟
: لاتخافين من اخوتي ولج هسة اخبرهم
: وهم امنيهم ما يفضحوني حت لكحيلة ما يكول
: لا مااخلي كفي اخبرة
طلعت مبايلي خبرته بسرعة رد
متيم: تف لا هلا ولا مرحبا
: انجب يول هسة تعال لحكيلي اني بمصيبة
: شكو ولج؟ وينج هسة اجيج
: لا لا تجي شدتسوي هسة؟
: داشتغل
: تكدر تخترق مبايل؟
: افاا واشعلج اهله بعد شنو تريدين تعرفين رجلج يراسل منو
: ولك مو انيييي هاي خدمة انسانية لبنت يتيمة خطية ديبتزوها بصورها
: شوف ولد الزنا مايخافون ربهم معليج صارت يمي بس دزيلي اي شي منه يوزرة حسابة ع الفيس اي شي يدل علي
: اي اي هسة اسئلها ولج يكول حسابه
:شنو كاعدة يمج؟
:هاا اي هيا احممم هيا اخت حاذق
:شنوووووو؟ايما فرخ الي تدنالكم والله اجيب صور عشيرته كلها يمكم
:طليقها
:ايا ابن الزنا يا حيوان
:ساعدها متيم
: يوزره
: دقايق
سديته وطلعت حسابة ودزينا يوزرة دزلي اوك
ضلت تلوب بالساعة محتركة خطية وتبجي تباوعلي ودير عيونها حت اني حيرتني
جتني رسالة فتحتها من متيم كاتب بيها شتسون بدوني غير تشحطكم الجلاب
: ولج متيم رد
كلتها وهيا اخذت مبايلها فتحته بسرعة لكينا الحساب الدازلها الرسائل وصلت رسالة منه كاتب
: بيها من قلب الحساب مادام صرتي بحمايتي محد يكدر ياذيج طالعلج من عرج الانونيموس حت التلفون صار عبارة عن كفر
كالها والحساب احترك بثواني اويلي بقت صافنا
: كتلج لا تخافين
: ولج والله عندة اكثر من نسخة
: التلفون واحترك
: مو بس بالتلفون
: اذا متيم ما كدر لهل شي راح اكول لادم وخل يتصرف لئن الواضح ما يفتهم بلغة الكلام خل اخوي يهشمة
كومي هسة انتي غسلي وانزلي ادرسي اذا حاجاج بعد تعاليلي
ماكالت لا نزلت بقيت كاعدة صافنة على قدرة متيم عار بس كفو جعلي جني اتصل وفتحته كبل صحت
: ولك شلووووون؟
متيم: دخول رايق يسبب حرايق شحالكم بدوني
بس والله عندة كل صورة عائلية ورا الخ غير يفلشن
: صور البنت متيم لاتشوفهن
: والله ما اشوفهن كلت احركله الاستديو بس تعرفين فضول اتصفحت بحسابة شويا خطية الولد عقيم
: بربك
: والله شفت التحليل ماله حافضة بالاستديو وخزنته يمي عرفت بنت عيالج ثولة كلت خل ابرد كلبها شويا
وها رقم مرته الجديدة يمي مسجلها البيت هههههههه
: وحركته؟
: والله صار مايفيد للزينة الله بدالج خليته ينفجر من الداخل بس هاي صور اخت حاذق
: شوصلهن يمة اريد اعرف
: مو حقيقيات يولي تركيب
: ها وانت شعرفك مو كلت ما شفتهن؟
: هاا لا مو فتحت المحادثة
: شفتهن متيم؟
: هسة ديالله والله ما ع القصد شفتهن قبل مااحرك ما المبايل وها جاياته نقل مو هوا المسويهن يعني عندة شركاء
: هسة انجب لا تتفيك بس والله طلعت نجر شلون كدرت
: بنتي اني عمو متيم عندي مواهب متعددة
: والله لو اني مجان كدرت
: وتشبهين روحج بيا؟ انتي شنو يمي يولي ترا زبالتي انتي
: دنجب ابن القوندرة لا يكبر راسك لا افشة بنعال
: منو هاي التفش راسي بنعل بت العفريت والله اكسر راسج انتي وزوجج الاسود
: والله اخلي ادم يشكك
: لامادام صار بيها سلندر مان اني هنا انسحب
: اخوي هيبة يابة هيبةةةةة الكل تخاف منه
: لا حجمة لا اكثر انتي شايفة ايدة تطبك اثنين مني لئني رقيق وناعم وكيوت
: وبيك انوثة
: وانتي نعال 44بدماغج اكو يالله ولي عندي شغل
: شسمة متيم مااريد احد يعرف انت سويت هيج حت كحيلة
: لا يابة شسالفة هم عندي اخت ثولة ومتزوجة واحد ثور اخاف عليها واي شي تحتاجة لا تتردد واذا طلعلها مرة الخ خل تكلي هالمرة حركتة ع الهادء مرة الخ اخلي ينفجر بيدة
سديته لي الليل ماكو شي جديد ورا العشا ورا كلشي الماعين وهاي الثولة محبوسة يغرفتها
حاذق ساحكها حت ما سئل عليها وامه تلغي لا تفرق بينهن لا تفضل وحدة على وحدة مو يمها مكنك وكاعد يتصفح
الاسبوع مر طبيعي بعد ماصار شي هيل ع كد شغلها تطلع وتكعد ويا عمتي بس بشرى هم عادية ما حجت شي بعدها لبالي عافها الا اجتني العصر ترجف
: هاها شدعوة شكووو؟
: ولج شوفي
كالتها وغضت شوفتني صور انجس من ذولاك فضيحة بمعنى الكلمة
كاتب جواها تحسبين مادكدرلج لمن حركتي الجهاز ذني كلهن يصلن لاخوج اذا ما سويتي الكتلج علي حدج اسبوعين واذا سويتي نفس ذيج عملتج بساعتها ادزهن لكل الجامعة والله ترا خازنهن بمليون مكان مو بس الكلية تعرف بيهن كل العراق
: عزااااا
: ولج شسوي شسوي شوفي شسويييي
: مالنا غير ادم والله اذا راح نضل نحرك هوا يسوي غيرهن لازمله ضب
: بربج لا انفضح متيم من جهة وادم لا بربج
: يولي لا تخافيييين يوكفون وياج يوكفون وياج
: ادم يكدر يخلصني يعني يكدر يجيبة هوا مو ببغداد؟
: من سابع ارض يجيبة بس وافقي ما تتذكرين جاب الي خطفو بتي وهما جانو وين
بلعت ريكها وصارت تحوص تلطم
: ولج ثقي بيا ماحيسويلج شي هذ اخوي اعرفة والله مايئذيج ولا يفكر بس اقبلي وشما يكون الخايفة منه ارحم من الراح يعمله مدحت
ضلت محتارة تلوب وتخليني الوب وياها قافلة
صاحتني عمتي تريد انزل حاولت اغلس ضلت تصرخ شكد حقنة
اباوع لبشرى بتوسل دتوافق تخلي ادم يساعدها وهيا تبلع بريكها
اخير شي وافقت واخيرا كالت خل يخلصني من هالعذاب
نزلت اطكطك رجولي من الرعبة خطية بشرى ما تستاهل حاولت ابين طبيعية شكثر ما اكدر ضحكت وطبيت للغرفة
كلت لي الليل اخبرة بس لاجت روحي مااكدر اضل ساكتة
رحت لعمتي كالت لا تضلين وحدج بالغرفة تتخابرين ضلي يمي عليمن حابسة روحج
طلعت فوني خبرت على ادم اشوف شوكت يجي كالت المن تخبرين
: حيلي
: يعني منو؟
: ادم
: شلازكة بالعمود هذ
: عامود حياتي ادم فديته رفعة راسي
غلقة مارد تفشلت نزلته من اذاني باوعت لعمتي ابتسمت
عمتي: رفعة راسج غلقة بوجهج مو؟
قبل ما ارد رجع فوني دك ديتصل بيا فتحته وطلعت الصوت برا
: ياهيبتي
ادم: اهلين بنيتي فدوة طحت لهل صوت كون شلونج
: هلا بكلشي وبعد كلشي يا ضوة عيني ورمشي مشتاكتلك ليش اتصلت عليك وفصلته خويا؟
: مو لبالي ماعندج رصيد كلت انا اتصل
تريدين رصيد ادزلج؟ هسة ادزلج كرت
كالها وباوعت لعمتي العوجت وجها ماراضيلها
: لا حبيبي مااريد عندي والله بس شتكت لصوتك كلت اطمن عليك
: يابوياااااا من انزل اجيج
: اموت على صوتك كون تدفني
: من عمري لعيونج بعد ابوج انتي فدوة الج حبالي الصوتية اذا هيج تحبين صوتي
تدرين بابا
: ها بويا
: لوما حرام الا ادك اسمج وشم على صدري
: اويلييييييي
: اسم الله عليج من الويل بعد كل هلي وناسي انتي اوف اريد اشلع عيوني واحطهن كبالج حت اضل اباوعلج
: اخ كلبي كون انطيك روحي يا صحة اختك
شوكت تنزل؟
: جم يوم هيج
: من تنزل كلي دروح على بيتنا اشوفك
: عليمن اجي انا اخذج نروح سوا
: انشالله يابا يالله خذ راحتك ما اعطلك
: الله يحرسج قرة عين ابوج
سديته دقايق واجتني صورة فتحتها جانت صورة كرت 25 ع الشريحة مالتي اوي فدتك ضلوعي
هيل سوت العشا مركة شجر حشا النعمة شيبلعها ما اشتهيت دكت بخشمي ريحة بقلاوة متت الا اكلها
دورت بالمطبخ مالكيت دزيت رسالة لحاذق كتله بنتك تكول خل بابا يحيبلنا بقلاوة دزلي عيون عود من عيوني
ضحكت زرحت للمطبخ مااريد اكل الشجر سويت مخلمة وكعدنا ناكل اني وضحى النضراتها رصاص تريد تستجوبني اخير شي حجت ما ضلت ساكته
ضحى: وهم شمخبية؟
: ها
: شمخبية؟
: ممخبية شي ولج
: بلا جذب
: ها ليش شكلت؟
: وهم مبين من عيونج مخبية شي شكو شصاير؟
: والله ولا شي هالعادي مثل كل مرة
: صدك من ينزل اخوج ترحين لبيت اهلج؟
: اي مشتاكتلهم والله هم مرهم عد امي دشوف ابنها
: شسمته؟
: جسار
: حلوووو
: اي اسمة حلو كالت ملامحة حادة كالت لازم اسم يبين شخصيته
: شعجب لهسة مارحتيلها؟
: اخوج ما يقبل من راس السنة جابت واكله يوديني رافض
: امم شوكت تروحين لعد؟
: من ينزل ادم بس بعد ما كلت لاخوج
: كليله هوا يستحي من ادم بس عليج الله شعوطي شويا
: شلون؟
: خل متيم يروح لبيت اهلج هوا يغار منه وها هذ الصاك ابن خالج هم حلو
: والله انج داهية بس ليش هيج تخبثين؟
باوعتلي وندارت لعد اني المخبية لو انتي
لي الليل اجه وكتله على ادم ما عارض يقصر منه
بشرى تاكل بروحها تخاف تخطي اي خطوة لا يعمل رجلها شي ماكدرت احجي لمتيم
كتلها تجي وياي من اروح لبيت اهلي حت تحجي لادم بالبداية عارضت بس قبلت بعدين ورحنا نكول لعمتي وكالعادة رفضت
: فدوة لخشمج مال6 نفرات عمة خل تجي
عمتي: عليمن رايحة؟
: ونسى وكذا
: خل تلتهي بدرسها مو مال طلعات
: لا مابيها شي يعني شكو بيها اذا اجت البنات ملتمات على جية ادم وراح نتعلل
بشرى: فدوة ماما والله اريد اغير جو شويا
عمتي: ماكو روحة
ايسنا توافق الى ان جت ضحاوي اول ما طبت كلتلها روحي تحضري
عمتي: ماهو بكيفج
ضحى: وعليمن ما تروح وهم وياها ودتكلج البنات ملتمات
: ماتروح والله
: شوفي سموحة احترموج واستاذنوج توافقين توافقين ما توفقين يسحكوج خل يروحن بموافقتج احسن ما غصبن عنج
: دشو حت وهم ما اروح
: هيهييييييي اي هسة ما تروح عود كولي لادم من يجي ياخذها ما تروح اذا انتي حوك واذا كالتله دناخذ بشرى يابويااا ماتكدرين تفصين
شوفي سموحتي خلهن يروحن يتونسن ديفضالنا الجو اني وياج وحدة تونس الثانية ونخلي هيل تعمل محلبي
: مو هيل خدامة الخلفج
: لا خدامتي يالله وافقي بكرامتج يمة
ما قبلت دارت راسها كطعنا الامل الا ضحى كالت خبري اخوج وكليله مااكدر اجي من تنزل عمتي ما تقبل
هيل الي للاسف رجعت تطلع مرة ثانية وتكعد ويانا
: وهم شهل مبالغة خمو اخوج راجع من الموت؟
: اسم الله علي يومج قبل يومة بس ترا صارلي هواي ما شايفة اهلي اختي جابت الكل راحلها الا اني واني بكلشي اسوي الكا كبالي تركض
هم هاي شغلة بيني وبين زوجي هوا يكلي اروح الا اضل مو انتي ولا عمتج
عمتي: جزاة كلامج فلا ترحين ديالله
: عود اوكفي بوجه اخوي
كلتها وطلعت من يمهن والله خوش يلوكلهن بقن يدردمن هيل تكول اهلي مارايحتلهم من تزوجت وعمتي تكللها هاي النسولن المعدلة ما تترك بيت زوجها خاب دطيرن فاهيات
سويت الغدا وكعدنا ناكل يباوعولي بتحدي لليل اجا حاذق ونفتحن يردن يرفض
جان معارضهن كلامهن بس ضلن يكركن الا هيل كالت ترا كل كرايبها مجتمعين بيت خوالها وخالاتها
: والله تجذب
هيل: يعني متيم مو هناك؟
: وشعرف اني والله خوش اكله روح وتعال يشتغل عندي هوا حاذق اروح يعني اروح اختي جابت ومارحتلها
يباوعلنا يريدها تفض
هيل: والله متيم هناك
: ترا اخوي
عمتي: وعليمن رايحة ماصارلج شي ذاك اليوم بعد رحتي
: ترا صارلي شهرين ما رايحة شنو ذاك اليوم رحتي حاذق احجيلك كلمة
حاذق: كملن معمعتكم
عمتي: وتريد تاخذ بشرى وياها
من كالتها فتح عيونة ما مصدك
: هسة شكو بيها يا كلبي قابل وين موديتها وبيت كله بنات اني وخواتي وكحيلة
بس يباوعلي مبين ما عاجبة هسة بشنو اقنعة يالله
ضحى: خويا بنتك مشتاكة لاخوالها يمكن
كالتها وباوعتلي
: اي بربي حاذق مايعرفون بيا حامل شلون نسيت
ضحى: عزاااا صدك لهسة ما كتيلهم؟
: اي والله ما صحلي كل مااخبرهم مخبوصين بجسار سودة عليا مريض خطية بس يصرخ
عمتي: انتو كل جهالكم يجون مرضة لو شنو؟ انتي بتج بيها فتحة وابن اختج بس يصرخ اسم الله على جهالك يمة
باوعتلها ضجت حيل من كلامها حواجبي نطبكن واختنكت ببلعومي طلعت رحت للمطبخ جان تطفر منقذي
ضحى: يمةةةة شبيج شهل فال التفتحي على جهال اخوي امعودة تفي من حلكج لا صدك ويصير
ووهم اتوقع بتها الله يرحمها اجت هيج يمكن من كمية القهر الي صارت وياها لمن جانت حامل بيها مايصيرلها القهر
حاذق خويا مايصير مرتك تنقهر هذ ياثر على صحة طفلك يعني كول لامك لا تضل تفتح سيرة سمارة خويا مرتك اذا نقهرت يبين ببتكم
بشرى: يمة ترا حرام البنت ميتة والميت مايجوزلة غير الرحمة انتي ماعندج غير سالفة الطفلة؟
ردته يحجي ساكت ماطلعلة صوت خواتة فزعنلي وهوا ساكت بس بعدين حجا
حاذق: شوفو انتو الاثنين
بوهم لا تدخلن وسيرة بتها ماحد يجيبها بعد اني هواي عديتلكم بس انتو تدوسن بالمعجن
هواي فوتت بس هاهيا طفح الكيل بمرتي يمة لا تدخلين بعد لا تحجين على بتها لو اخوها لو متيم مالكم شغل
عمتي: يااا توكف بوجهي لخاطرها؟ ولك اني امك
: وهم مرتي يوم وام طفلي الجنتي حتموتي قبل
فدوة ابتعدو عنا لا تفيدوها بس هم لا تضروها هيا ممضوجتكم شوف عيني انتو الدتتعدن عليها واكثر من مرة بعد
بتها ماتت مقتولة وهيا مالها ذنب بهل شي اخوها عادي جدا اخ ويحب اخته شنو اني مااحب بناتج؟ ما اشتريلهن ما اطلعهن ما تعاركت ويا ذاك العار لخاطرها ما ضربته على مودها حالها حال العالم
اذا لوهم لو لبتي يصير شي بسببكم هالمرة راح انسى انتو منوو
كالها وطلع من الغرفة اسمع صوت دك رجولة بالكاع مسحت دموعي وبلعت ريكي ماريدة يشوفني
لبالي طلع برا كلت هاهيا زفرت بتعب حسيت ايد نلفت على بطني وجرني لحضنة حط راسة بركبتي نفسة حار عليها همس
حاذق: لا تنقهرين حبيبي
: مو مقهورة
جذبتي بينت بصوتي مخنوك دارني علي وحط راسي بكلبه
حاذق: هشش كافي اني وياج
: صدك حاذق الكالته امك؟ هم ممكن يجي طفلنا مريض ويموت؟
: لا اسم الله علي يابة من عمري لعمرة
: بس صدك الكالته ترا ابن مرهم مريض وولد هرم انابيب حت امي جابتني بيا خفقان واني...
ماخلاني اكمل حضني سكتني كال هشش
: خايفة حاذق ابني فدوة
: مابي شي حبيبي مابي شي انتي بس ديري بالج علي وماكو شي انشالله كل الصار قسمة حبيبي كل الصار قسمة مالج ذنب بشي
يحجي ويمسح على شعري شال راسي من صدرة يمسح دموعي باس جفني
حاذق: دموعج يكطعن بشرياني
: غصبن عني والله اني ماجنت هيج ماجنت ابجي انت تعرف اني جنت قويا
: وبعدج قويا بويا انتي ما تنكسرين اني مستقوي بعيونج
يالله مسحي الدمع منهن حبيبي
مسحت دموعي وتذكرت سبب اللخة هاي
: خل اروح لبيت امي من يجي ادم حباب
: روحي يابا ميخالف
: واخذ بشرى
ماجان عاجبة بس ماراد يكسر خاطري هز راسة قبل يالله الحمدلله
حاذق: اي والله مو راهمة انتو خوات مجتمعات هيا شكو بنصكم؟
: هم اختي هيا وهم للونسة خطية ضايجة من الامتحانات تونس روحها بالسوالف
دك تلفوني جان بغرفة عمتي جابته ضحى تركض على دقيقة وتكع
: هوب هوب
ضحى: اخوج يتصل ياضيم اخوي
فتحته وحجيت
: هلو خويا شلونك؟
ادم: هلا يابة الحمدلله وانتي شلونج
: الحمدلله
: وهم خويا انا نازل لبغداد تحضري دمر عليج زوجج يقبل اكيد
: اي يقبل كتله
: ديالله لعد نص ساعة ويمكم انا
: تنور بغداد كلها فديتك
سديته ورحت بدلت ملابسي وكلت لبشرى تبدل
لبست بينصل وترانشكوت وبوت شافني راد يحجي لئن البينصل كصير وجواته ستريج لحمي برطمت سكت وهيا لبست تنورة وقميص
حضرنا غراض النريدها ملابس وملازمها وهاي الامور فعلا نص ساعة وندك الباب طلع فتحلة ودخل ادم سلمو بالباب
ببدلته العسكرية وهيبته اويلي بشرى صارت تسبل
دورني بعيونه شافني وضحك فتح ايدي بحركة حضن رحت تعلكت بي وحضني قوي
ادم: افيييييش ياريحة الجنة بيج يبوي
: شلونك بويا
: هلا يعمر ابوج اشلونج انتي
عمتي: مو قبل شويا تخابرتو؟
باوعلها وسحكها رجع يحجي وياي لازم وجهي ويضحك
: ادم بشرى دتجي وياي
ادم: كل الهلا بيها وبيج يالله يابة مشونا
حاذق: دكعد امعود شهل جية
: لا والله تعبان على غير مرة يالله بناتي يالله
بشرى شايلة جنطة بيها كتبها واني جنطة صغيرة بيها ملابسي دنك شالهن
بشرى: لا لا اني اشيلها
كالتها وسحبتها ضل ماسكها خزرها تركتها حط الجنطة على جتفة وشال جنطتي بيدة وكال يالله
سلمنا وطلعنا هوا كبالنا سريع واحنا ورا بشرى رجليها تضرب ببعض من الخوف وتطكطك اصابعها
: ولي شبيج؟
بشرى: اخوج يخوف
: هوا اخوي اليخوف ايي واخوج الايدة جنها مهطارة شلونه؟
: هذ اذا ضربني براشدي اتسكط
ادم: يالله خفن
استعجلنا شويا ورحنا صعدنا بسيارة شويا قديمة
: ادم لعد وين سيارتك
ادم: والله ذيج غاالية اخاف عليها من التحق تجيها شضية شي تخربها حرامات اخذت هاي وياي
بشرى صعدت ورا واني بالصدر الطريق كله يحجيلي شسوا وهاجمين عليهم مسلحين وكضوهم اويلي من يشرح اعيش الاحداث ويا
شفت بشرى من المراية تباوعلة بالمراية وهوا عينه كدامه كل ما يتحرك تدير عيونها تخاف يلكفها تباوعلة
ردت ادعي انو ينبضلها كلبة بس اعرف مستحيل هوا يحب اسراء هم تبقى بنت عمتي مااريد احد ياخذ مكانها
هم مااريد اخوي يضل اسير الماضي لازم يشوف حياته
باوعلي صافنة بي ابتسم ومدلي ايدة حطها على كتفي وجرني لحضنة بستها وشالها شمها بنص الطريق تذكرت
: ياااااا
باوعلي بستغراب كلي شصابج يابوي
: مدينة من متيم فلوس ونسيت اوفيهن خرب
ونسيت اخذ من البيت يربك
: على هاي؟ هسة انا انطي
: والله نسيتهن ماضلن ببالي حت محضرتهن بالكنتور كلت من اجي اجيبهن
: هسة دكافي خويا شكد ماخذة منه؟
: هواي
: شكد
: ادم مااريد
: كولي
كالها بنتر خوفني كبل كتله 75
: ديالله لبالي مليون لو شكثر تالي طلعن بس ذني؟ بجيبي هسة انطي هنا
: مااريد اني بعد مديونة الك
باوعتلي بشرى باستغراب اويلي جفصت ما تعرف شتريت المحطة
بشرى: مديونة؟
: هاا ااا اي ذيج المرة هوا عبالي بانزين ونسيت ارجعهن احمم
ما صدكتني مبينة بس سكتت
ادم: لا تفكرين هيج يبوي مابينا هالكلام ازعل منج بعدين فلوسي هنا فلوسج
وصلنا لبيت امي نزلت ونزلت بشرى وراي ترجف ادم نزل الجنط وراح كبلنا
: ولج شبيج تتراجفين اهدئي
: اوووف وهم كلبي يريد يطك ولج باعي علي شلون يمشي يالله
: اطلعي من الانتي بي هسة وبعدين سبلي هيج يالله
دخلنا ورا للبيت جانو كلهم كاعدين بالصالة ديسلم على امي وباس مرهم من راسلها كللها يتربى بعزج يخوي
هرم بعد ولدها يطفرون ومتيم مخلي ابنه يحجي ويا جسار حت استبرق موجودة وتسولف
منضرهم يخبل سلمت ع الكل وكعدنا كتلهم بخبر حملي كلهم فرحولي وباركو خطية ادم دمعن عيونه دمغة متيم
: اعرف انو تشوف اختك حامل شي ما سهل الله يصبرك
ادم: انجب حيوان
متيم: شوف خواتك وحدة والدة والخ حامل خرب غيرتك
: لا ياابن الكلب يا سكط
ضلينا نتشاقة ونضحك ونصنف فدوة ادم عينة عليا شلون ما اتحرك ويكلي ديري بالج على روحج بشرى وحدها كاعدة بس تصفن احنا كلنا نحشش وهيا ساكتة
متيم غمها كلها امداج اي والله احلا من هالجو شنو
بشرى: هاا
متيم: وين صافنة يولي
: احمم بهل دنيا
: خما احد مضوجج
باوعتلي ودنكت هز راسة ما حجا ماراد احد يشك
شلت ابن مرهم شميتة وبوسته يالله ريحته تخبل وخدة ناعس مال كرط
صبينا الاكل تعشينا وكلش ونسا لعبنا شدة سحكت متيم الا خليته ينشك كل شويا اتحارش بي اضربة لو اتفل علي ويلحكني اختل ورا ادم يحاميني بذراعة يكله زلمة وطخها شوف شسوي بيك
متيم: كبر راسها كبر راسها تطلعين من ورا تالي
طلعتله لساني اعيب علي
: بربي اشلعة
ادم: ديالله دشو
نزلنا نلعب ببجي واكلنا حلويات بس بشرى تكول ارملة بالجديد حاضنة رجولها وكاعدة اني نسيت سالفتها من الهوسة بس جت ذكرتني
همست بشرى: وهم ما يالله
: شنو؟
رفعت حواجبها تاشر على ادم تذكرت هوا هم انتبه ضيكلي عيونه اشرتله يلحكني
طلعت يم الدرج واجت بشرى مجلبة بثوبي ترجف لحكنا ادم
ادم: ها خويا صاير شي
: ادم البنت بمصيبة محد يكدر يطلعها منها غيرك
: شكو شصاير؟
: بشرى حجيلة
دنكت تحك اضافرها
: احجي ولج
ادم: شكو ولكم؟
: بشرى طليقها ديبتزها بصور
ادم: شلون؟
: ماادري بس ادم فدوة البنت نختنا مالها غيرك اخوها دمة حامي لايسويلها شي
متيم هكر جهازة وحركة بس مدري شلون رجعهن وسوا حساب ثاني وهم دزلها ادم فدوة شوف شلون تتصرف
: وين بيته؟
بشرى: طالع من بغداد مدري وين رايح
ادم: سهل ينلكي لا تخافين والله اخلي يبوس حت حذائج انتي جوا جناحي صرتي
: الله يحفظك ويخليك لشبابك يازينة رجال
: ولو واجبنا هذ بركبتي انتي
المهم هسة تعالي دليني علي شوفيني وجهه حت الكفة ووهم صيحي متيم انتي اريده
صحته وطبيت
بشرى.
دطب كلي لا تطبين انتي تعالي اريدج
ضليت وكلبي برجولي من اكف يمة اسرح بطولة وهيبته سبحان الخلقة فارس
اجا متيم كله ها ضلع
ادم: هذ الحركت جهازة رجع ع البنت
باوعلي
متيم: اكدر احركلج كل الاجهزة اليراسلج منهن
: يضل يدخلي
كلتها وطلعت مبايلي شوفته المحادثة وغطيت الصور
كتله شوف يكلي اذا احترك الجهاز ادزهن لاخوج
ادم: تكدر تحدد موقع الارسال؟
: لازم بالابتوب وببيتي هوا
: خذنا علي
: لا عليمن اروح اجيبة واجي هياته البيت
: خذ راحتك بس بسرعة وانتي بشرى تعالي دحاجيج
كلبي صار يدبج جوبي اويلي يعرف اسمي من جهة كلبي محروك من مدحت ومن جهة فرحانة بادم اني يمة فوتني لغرفة مال امه يمكن كلي سولفي
: شسولف؟
: اول شي هذ طليقج لو زوجج؟
: طليقي تطلكت من تقريبا سنة
: ماشي انتي جان الج عداوات ويا؟
: لا بس طلبت الطلاك لئن تزوج عليا بدون سبب
: عندج احد من اهله هنا؟
: اخته وياي بالقسم
: نكدر ناخذ منها معلومات؟
: ما اتوقع علاقتنا نتهت من تطلكت
: خوش انتي هسة لا تخافين من شي احنا وياج نطلع مكانة وندشدش ضلاعة
: عمو ادم
كلتها وصفنت هوا هم رفع حواجبة مستغرب شنو عمو انتي حيوانة
: احمم العفو سيدي بس...
: كولي
: اني بشاربك فدوة
: شاربي بيدج زيني اذا ما خليته يتوسل يم رجولج
: الله يحفظك لشبابك الله يبرد كلبك والله تطلعني من جهنم اعتبرني وهم
شبيج مالت الثول مرة عمو مرة وهم شدتخرطين انتي
: لا تخافين بس اندلة
مر وقت اكثر من نص ساعة واجا متيم بيدة لابتوب دخل وسد الباب اني اطكطك
شغلة وكعد كلي شوفيني الحساب شوفته اله وطلعة مدري شكعد يدوس اباوع بس لاصابعة وهوا يكتب شفرات وتاكيدات
اول شي عرف الجيميل ومدري شسوا بعدين حاول يفتح الفيس وضل يدوس وعيونه تتحرك ضل اكثر من ساعة يشتغل بي
كال هذ الحساب مامن يتعب بس مو على متيم
طك ركبته ورجع يدوس مدري شعمل كلي عليش تطلكتو سكتت ما جاوبت
متيم: لا مو تدخل بالخصوصية هاي بس داكضي وكت واريد اعرف شنو الي يحبة ددزلة رابط
: عليش؟
: حت افتحه
دمغة ادم واني تفشلت
متيم: قصدي الحساب بس ماراح تمشي علي هاي اخذ احتياط اني اكدر اهكره
: ماادري
: عندج صور اخته؟
: ها
: اخته اخته
: اي عندي
: دزيلي
: ليش؟
باوعلي ما عاجبة كلي شكد تسئلين اتصرفي مثل ما اكلج
فتحت التلفون اخذة من ايدي وشكلة بالكيبل ع اللابتوب
كلي تعالي كليلي منو اخته اشرتلها عليها اخذ صورتها وشلع المبايل كلي خذي
ادم جان بس يراقب بصمت مدري شسوا وشدوس سوا رابط وخلة صورة طيبة واجهته ودزها من حساب فارغ لمدحت مكتوب بيها شوف اختك يالنجر
دقيقة واجا اشعار مدري شنو انه فتح الرابط كبل فز وصار يودس بالدكم
جنت اشوفهم ع النت مااصدك بس متيم واو
ضل يدوس جاب الايميل فات ع الفيس مدري شدوس اجت رسالة ع الايميل فتحها ورجع يشتغل صار الفيس بوك يمة
فتح الحساب وصار يتصفح بي
شبك اصابعة طكهن ورجعهن ورا راسة يضحك كال تعالي شوفي
الفيس والماسنجر مالته كبالي مفتوحات كلشي طالع جنة حسابة
: شلوووون؟
متيم: شغل عمكم بعد يالله هسة احركة لو شنو؟
ادم: لا طلع موقعة منين فاتحة
متيم: دقيقة
كالها صار يدوس بي كلة هيان موقعة بالنجف
: متاكد؟
: وداعة شواربك
: الموقع بالضبط
: اي بالنجف بال.....
: خوش
كالها وطلع تلفونة اتصل على معرف منو دقيقة ورد
ادم: سلام عليكم
هلا يابة اي والله اليوم نزلت تسلم خويا كفو منك وصلت انت؟ اي حمدلله ع السلامة يابة
اريدك بشغلة يالحوك وانت كدها فدوة لعيونك لا اريد واحد حثالة مضوجني
اشتغلة على راحتك قبل ما تجيبة علي بعد عمري كون تطلع ضيم حنونة بي
اي والله غاثني بحجاية ماتقصر يالحوك ماتقصر
اي يمكم بال...... اسمه؟
كالها وباوعلي اشرلي بيدة يعني احجي
: مدحت
ادم: مدحت ايش؟
: مدحت طلال احمد
ادم: مدحت طلال احمد. كفوو كفووو. يالله اودعناكم
كالها وسد المبايل كال لمتيم احرك الحساب والجهاز من اكلك
بقينا كاعدين بحدود الربع ساعة هما يحجون بيناتهم ع الشغل والمدري شنو متيم يريد يفتح مشروع مدري شنو وادم يصير شريكة بي حت قيصر كال يتقاعد ويشتغل بي
ما جنت ادخل بحجيهم اطك باصابعي اريدها بس تفض جان يدك مبايل ادم شالة اتصال فيديو ضحك
فتح وحجا ويا هذ الجان يحجي ويا وصوته مسموع
ادم: ها يالحوك دبرتها
: افااا سيدي وانا تربات ايدك
: شو خل اشوفة
: امرك
كالها ودار الكامرة اشرلي بيدة اروح لازمين مدحت مكعدي ع بلوكة كانما ينتضر شي كله هذ سيدي
باوعلي ادم اشرلي هذ كتله اي
ادم: اي هوا تكدر تجيبة
: صار
: ماخاب من سماك الحوك
كالها وسدة كال لمتيم احركه وما قصر ضل يدوس واحترك الحساب
ادم: خذي راحتج هسة حيجيبو اليا ساعتين بالمركز تخلي يتوسل بيج مثل الجلب تشفعيلة روحي على وهم الله يستر عليج
: جدا ممنونة جددددا لو شنو ما اسوي ما اوفي حككم انتو الاثنين فضلكم على راسي لحد ما اموت
: لا بشرى لا تكولين هيج بالخدمة احنا
كالها وطبطب على كتفي روحي سااحت شنو من كائن انت الخاكر الله
وهم.
كاعدة ويا خواتي وكحيلة نسولف ونحشش جسار حيل حلو وملامحة حادة مو بريئة هذ اذا كبر والله الايطلع هيبة
كحيلة تموت ضحك وابنها فدوة ابو لسان يكلي اذا جبتي بنت اتزوجها نهيت عليها
هرم ما عاجبها اني حبلت تكول ماصارلج شي من سقطتي المفروص تنتضرين ست اشهر
: وي وشبيدي اني عاد صار
هرم: لازم تاخذين احتياطاتج هاي فترة نقاهة وهم
هيج يصير الطفل واكف على حجة ممكن يصير عندج رخو وحت اسقاط او ولادة مبكرة
: لا لاسامح الله امعودة
دنحجي واجت بشرى فرحانة ابتسمت كعدنا كلنا نسولف
امي تريد تعتمر صارلها سنة وما دتكدر وقيصر راح يتقاعد بعد مابي حيل
اسيل الحولي ما عاجبها كعدتنا عبالك بيت ابوها لازمة بطنها وكاعدة اوع
طبعا ما اعرف الطفل وينه بكل هالشحوم البيها
ضلينة كاعدين نسولف طلع ادم برا كال مطول اني بشرى ثرمته بعيونها
همست: بعد بعد كومي ابلعي
بشرى: شبلع منه هذ اضل سنة اكل بي وما يخلص
: فضائل قل هوا الله احد كري على اخوي بعد كري
: ولج بربي باوعلي دخت الا لمن كلي بشرى لا تكولين هيج اويلي ردت اجط احضنه
: هاي الاسميها مسكينة وغشيمة
: كلشي يمون لادم
ضلينا يومين عد امي ادم رايح جاي للمركز يجي على ايدة دم وينفض بيها يصيح بشرى يروحون يحجون وحدهم على زوجها مرة تطلع تبجي مرة تطلع تضحك وتاهت
مرة بحجة السوك اخذها وطلعو مارجعو للمغرب انت مبينة باجية بس داتضحك وادم كللها مو كتلج زيني شاربي بيدج؟
بشرى: مايلوكن الشوارب هذني بس الك
امي تباوعلهم من جوا الجوا تنتنبه لابسط تفصيل صاحتني
امي: انتي ليش جبتي هاي البنت وياج؟
: رادت تجي تبارك لمرهم وجبتها شكو بيها؟
: وهم
: ها مامي شنو ما تستقبلون ضيوفكم شنو عملتج اسيل
: مو هيج بس انتبهي لتصرفاتها هيا وادم معقول بينهم شي
: هاا لا لا قابل شبينهم بس هيا عدها ضرف تريد ادم يساعدها بي
: وشنو هالضرف بالله؟
: بالكلية مالتها اش اعرف اني عاد اليوم نرجع
للمغرب خبرني حاذق كال تحضرن جاي
حضرنا كل غراضنا بشرى حلكها مشكوك من الضحكة كل ماادم يحاجيها هيح تصير غميتها ولميت الاغراض
اجا اخذنا ورجعنا للبيت مسويلي مواعين مال 10اشخاص خرب شكلكم هسة شينضفهن
طلعت على غرفتي نزعت الملابس والشال صاحتلي عمتي كالت ما تنامين اذا ما تنضفين المطبخ
باوعتله جان متمدد اشرلي معرف نزلت دنضف قذارتهم الجايفين
لبست الكفوف وكمت اغسل ضليت بيهن ساعتين ونص الا ضهري نقسم من الوكفة عليهن
كملت دطلع جان اشوف الهوسة الثانية المطبخ تكول واكع بي هاون شراح يفضها
تشكلت وكمت انضفة واشطف الارض مليانة مركة وشكر وجاي مدبكة وصايرة للضالين
شطفته بمي بارد ماضال مي حار سابحة بي وجه بباي والبرد يكص العظم تجمدت كمت ما احس برجولي
الكاونتر سماااااااطة الجام مليان دهون شمصخمييييين
شدعوة كل هالهوسة هاي الطباخ منعول اهله بطني لوتني كلت من البرد ميخالف
كملت التنضيف صار المطبخ يلمع جريت نفس كلت هاهيا اطلع عاد
دصعد الدرج جتني مغصة قويا حسيتها طلكة شهكت من قوتها جمدت ع الدرج
اريد اتحرك مااكدر متشنجة كطعت النفس وابلع بريكي لزمت بطني ونشليت
صحت على حاذق اكثر من صوت لئن صوتي جان مو كلش عالي هالكدرت علي بس ردته يجيني وزاد الوجع صرخ
: اااخ حاذق حااذق الحكلي راح اسقط حاذذذذق
كلتها وفتح باب غرفتي شافني ونصدم اجاني ركض لزمني يحجي بخوف
حاذق: شبيج وهم شكووو؟
: ماادري ماادري داتوجع ااااخ
حاذق بطني توجعني حييييل راح اسقط الحكليلي فدوة مااريد ابنا يموت
يباوعلي محتار ومخبوص مايدري شيسوي صاح بشرى اجت ركض ولحكتها ضحى تتمندل
لبالها امثل بس من شافتني الوب طككت عيونها واجتني ركض
بشرى: شصابج وهم هسة توج ما بيج شي شكو شكووو
: ااااخ بطني ولج داتكطع داتكطع اااخ
حاذق: شسوي هسة ولكم احد يفهمني
يريد يشيلني اصرخ يهدني هم انخبص بيا حط ايدي على راسة ويلوب طفر للغرفة ركض اجتني ضحى لزمت بطني
باوعتلي ضايجة طككت عيوني شبيها هاي كالت ماكو شي لا تخافين
لزمت ايدها اعصرها كالت بشرى لا تسوين هيج
عمتي ولا طلعت ولا اجتني ولا تكول حامل بابن ابنها
نزل حاذق بيدة صاية وشال لبسوني هنا بسرعة وشالني رغم صرخت بس قاوم صوتي ومشا بيا وكالعادة بشرى ويانا
فتح باب السيارة وخلاني بيها بسرعة ركبو ورحنا للمستشفى
صارلي زمان ما جايا يالله ميخالف بشرى نزلت ركض تصيح الممرضين وهوا شالني ونزل اجو اللمرضين حطوني بالسدية وطببوني للداخل ع الطوارء اجتني الدكتور
شافتني ابجي والوب من عرفت حامل رادت تفحصني بعدتها واني ابجي واصرخ
خلت ايدها على راسي تمسح بشعري وتهديني
: اهدئي ماما اهدئي لا تخافين ماكو شي
كالتها ومسكت ايدها
: دكتورة فدوة داموووت من الوجع
: خليني اساعدج لا تخافين ماشي اول كليلي انتي وكعتي شي؟
: لا
: تصوبتي لو تاذيتي نطخيتي؟
: لا
: تعبتي؟ اخذتي برد؟
: اي هواي قبل مااجي
: لعد خليني اساعدج لا تخافيني ماشي
تركت ايدها فحصتني كالت ماكو شي انشالله تعالي اعملج سونار
خلت المادة على بطني وحركت الجهاز عيني على ايدها اريد تطمني بكلمة
ضلت تحرك بالجهاز وعينها بالشاشة تسئلني اذا كن حبلت قبل لو اول طفل كتلها على سمارة وع الطاح ضلت تكولب بالجهاز واخيرا نطقت
دكتورة: ماكو شي يدعو للقلق الطفل بحجم مناسب ومكانه المناسب
: لعد كل ذاك الوجع؟
: الطفل مابي شي ماما انتي البيج
: ها شبيا؟
: مو تخصصي هذ بس اخذتي برد قوي واضافة لهل شي عندج قالون عصبي
: بين يمج بالسونار؟
خزرتني سكتت رجعت كملت
: لازملج راحة صح الطفل بحالة زينة حاليا بس
: حاليا؟
: انتي سقطتي قبل مدة بسيطة لو منتضرة فد 6اشهر افضل الج
من 3
هسة اكتبلج علاجات تاخذيهن وانطيج مسكن لئن حتصير عندج تشنجات هواي بالايام الجايا واسبحي بمي حار
: شكدة مدة حملي؟
: ما تعرفين؟
: ماحسبت
: امم انتي بالاسبوع العاشر حيخلص
نطتني مناديل مسحت بطني وكالت خذي راحتج وعندج العافية
نزلت ملابسي وحاولت انعدل دخلت بشرى ساعدتني اكوم دنكت تلبسني الحذاء جريت رجليا بسرعة بس لحت
: بشرى كومي
بشرى: وهم بلا عناد خل اساعدج
: بشرى كومي ما دنكين كومي مااحب هيج
: هيا دقيقة وقابل شمسويتلج الدكتورة كالت لا دنكين ولا تكنبصين خل اساعدج بس
جرت رجلي لبستني غصبن عني شكد ستحيت منها ساعدتني اكوم كالت بعده الوجع؟
هزيت راسي اي مشتني طلعت برا ماجان موجود حاذق
: لعد وين اخوج؟
بشرى: راح يجيب العلاج الي كتبته الدكتورة
: ما حجتلي شي
: كالت مغص طبيعي لازم راحة ونوم والقالون العصبي بعد ماثر عليج والبرد الاخذتي بعد تلايمت
: صدك شهل هوسة المسويتها امج بالمطبخ الخاطر الله شكر ومركة وجاي شمسوين هوا يومين رحت
: ماادري والله هسة نسئل ضحى من نرجع
اجا حاذق جايب علاجات ويا جانت عيونة ذبلانة شافني منتجية ببشرى اجا اخذني منها حضني
همس: شتحسين؟
: داتوجع هواي
شد قبضتة عليا كلي هسة تاخذين مسكن يهود
اخذته فعلا ورحت تمددت بالسيارة من ورا جفوني ثكلن طلع ساق واخته كعدت يمة
الطريقة كله اغمض عيوني وافتحهن جسمي رخا من الحباية
وصلنا المنطقة ساعة ب 1ونص نزلوني بالزور امشي من فتنا البيت شالني بثنين ايدي وطلعنا
جانت ضحى كاعدة متربعة بالحوش تباوع بصمت امه وهيل مطمورات
بس خلاني ع الجرباية رحت بالنوم ماكعدت لثاني يوم خمول بجسمي
كمت اطكطك دنيا تمطر تبين ليل باوعت للساعة 1اوف هسة عمتي تاكل كلبي
فتت سبحت بسرعة ولفيت شعري باوعت بطني توتها تبين نايس ضحكت ولبست ملابسي وشعري سشورته ونزلت
جانو البنات موجودات جايات من دوامهن يتغدون هيل وعمتي محتقنات
اي بالجذب وحدتكم تكول حمدلله ع السلامة حيات مو بيدكم تسسسس
جابتلي هيل صينية بيها اكل كالت انتي من تحبلين نساتج تصير ع الاكل اكلي
وات هيل تجيبلي اكل لا مستحيل ما صايرة اكيد حاطة شي بي
رجعت كعدت يم عمتي ما باوعولي
جنت ميتة جوع بس اخاف اكل لا يروح اكلها بي سم ما استغرب
دفعت الصينية بيدي كتلها مو مشتهيتهن وكمت للمطبخ سويتلي حليب حار واشياء مال ريوك لكيت كيمر وعسل اكلتهم
اجتني ضحى كالت لا تاكلين شي كله هيل الطبخته وشفتها تتهامس ويا امي
: شو ما كعدتني امج من الصبح؟
ضحى: حاذق نبه عليهن قبل ما يطلع كال مااريد تحجون وياها شي ولا تصيحولها ههه حت شغل ممنوع تشتغلين
: يالله هم زين
: اشلون صرتي؟
: الحمدلله بخير احسن
: الصار مو مال مجرد برد وقالون عصبي ترا
: شعرف هذ حجي الدكتورة
: شكد مدة حملج؟
كالتها وضحكت متفائلة فدوة ضحكتها حلوة اغلب ضحكاتها جانت شماتة مو منتبها عليها من تضحك بفرح
: ههه حكمل الاسبوع ال10
: يااا بعد سبوعين يصير بي نبض مو؟
: اي انشالله
: اويليييي وشوكت نعرف جنسة؟
: اممم ببتي الله يرحمها عرفت بالرابع
: منا لشهر موو
: هههههه مستعجلة اكثر من ابوه انتي
: اكول
: ها
: شنو قصة ابو نسيم حجيلي
: من هوا وصغير يحب هالاسم من جنا بالمدرسة
جان يحب الهوا الهادء وللان من يمر هوا تشوفي يغمض عيونه يستنشقة مرة طلعت العصر دالعب جان جوا شباجي كاعد من شافني غمض عيونة جنت اول مرة استعمل العطر اليحبة رحت يمة كتله شبيك كال انتي عطرج يخبل جعلي نسيم سمعة نظر كله ديالله ابو نسيم ومن وكتها انطبعت بدماغة كال اني ابو نسيم من نتزوج اني وانتي نجيب بنت ونسميها نسيم
: يااااااا والله حلو عفية عليج تتذكرين لبارحة شكلت نسيت
: هاي كلها نقوش بدماغي اكو اشياء ما تنسي الوقت ما يمحيها
دنحجي وطبت هيل المطبخ تثرم اللحم ضحى غمزتلي واستمرت
ضحى: عجبتني والله حيل حلوة يااااي انشالله تجي بنت ياااارب
: ههههه امين بس خاف اخوج يتسودن هوا سمع حامل شصار بي نوب يكمل حلمة وتجي البنت
: اي والله اخاف عقلة يضرب تجي البنت اليحلم بيها كل عمرة من المرة اليحبها كل عمرة اويلييي يمة اسم الله على اخوي تجي بالسلامة انشالله
: ههههههه خل بس الله يجفيني شر عبادة الحاقدين وهيا تجي سالمة مااريد غير شي
: افااا احنا بضهرج محد يكدر ياذيج
: كفوو والله
: يالله طلعي ارتاحي اخاف على بت اخوي لا يصيرلها شي اني وهوا هم وصا كال لا تخلون وهم تمد ايدها بشغلة اذا جيت ولكيتها مسويا شي احركم كلكم
هيل: اكيد مو لسواد عيون وهم يخاف على ابنه الي اشك يبقى
ضحى شهكت ولطمت صدرها خوفتني
ضحى: يمة اسم الله على بت اخوي ولج شهل حجي تفتحين حلك ما حلو البنته الماشفها
هيل: يااا شبيج هيج تسوين؟
: والله لاكله عليج دصبريلي
وشغلة ثانية طبعا يخاف على بته لئنها من وهم اكو عالم مرة ضلت حامل عود 3اشهر وتالي طلعت فشوش تذكرين نقهر لو سوا شي مو كام يركص؟
هيل صارت تغلي وهيا تباوعلها ببتسامة شماتة رجعت طكت اصابعها
ضحى: اي وهم مو جوعانة كلبي سودة بوجه هيل اكلتي كيمر وجاي يا عمري؟
: امم اي والله جوعانة واكلت اشياء ريوك حت بنتي جاعت بس والله اخاف اكل
: ياااا البيت بيت زوجج وتخافين تاكلين غير انتي ام البيت هسة نسويلكم اطيب اكل الا اكلج عليمن نجيب من برا
هيل: شدعوة هالمصرف الزايد اكو اكل الكدورة مليانة
ضحى: هم كمزت من خيرج دتصرف من بيت ابوج من مال اخوج انتي شكو
: دتشوفن حاذق بالزور يطلع الفلس تريدين تضيعه كله ع الاكل
: لبته ومرته مو لاحد غريب هسة لو بيج جان كلت والله حرامات
هيل اجت ضربت ضحى بجعب السجينه الخشب على حلكها هاي رفعت راسها ونكطع صوتها
جمدت يالله بس لا ماتت لو صارلها شي شو صوتها راح وصار ينزل دم من حلكها على ركبتها لصدرها وهيا رافعة راسها رحت عليها ركض نثولت لبالي ضربتها بالسجينة
: ضحى؟ ولي ضحاوي معودة طلعي صوت ولج
بحركة سريعة دندل راسها وفتحت عيونها تباوع لهيل وهيا مدنكة ورافعة عيونها
هيل صار وجها ليمونة من الخوف ذبت السجينة بالكاع ترجف
ضحى ابسمت ابتسامة طلعت بيها كل سنانها المغطيهن الدم وهوا يسيل من حلكها صار شكلها مرعب عبالك سايكو
باوعتلي وكالت اطلعي برا وهم
: ضحى
باوعتلي وهيا فاتحة عيونها كلهن ومبتسمة كالت اطلعي برا
هيل تهزلي براسها لا واني هم مرعوبة هذ عيسى مو ضحى اخاف من يطلع
جنا واكفات يم الباب هيل رادت تفلت بحركة سريعة ضحى مدت ايدها لزمت هيل من حنجرتها
ذيج طككت عيونها وطلعت السانها اختنكت اني ارجف
رجعتها لي يمها ومددتها تمددت فوكاها تخنكها ذيج مرعوبة وما تكدر تجر النفس
اخاف اخطو اي خطوة تروح تسقطني بوحدة من ضرباتها بس خمو اخليها تموت هيل
جيت اسحبها من عنها بالزور اجر بيها من ملابسها احاول افك اصابعها من ركبتها قويا تكول زلمة ما تفتحهن ودم ينزل من حلك ضحى على وجه هيل
احاول اسحب بيها ما يمها ذيج عيونها كولبت دتموت
اجر بيها ما تنجر
كمت اصرخ كتلهم لحكولي حتموتها طلعت عمتي وبشرى يركضن يجروها ما تنجر اجت بشرى بسرعة خبت عيونها وصارت تقرى ايات عليها بالزور رخت قبضتها ذيج جرت نفس شطولة وصارت تكح
ضحى تشنجت مثل البيها صرع صار واختها يمها تقرة عليها حت تهدء سماح يم هيل واني وحدي الوب
شفت ضحى رخت فد مرة وحجيت برجفة مااكر اعمل غير شي
: تعالي نطلعها
بشرى: عينيني
شالتها من ايديها واني من رجليها طلعناها حطيناها بتختها وبقت اخته يمها تمسح بحلكها
رحت على هيل الجانت تكح متكترة بالكاع بالزور تجر النفس وعمتي يم راسها
باوعتلي هيل بسرعة وغضب كالت صوجج
: ها لعد اني شكو؟
هيل: انتي خليتيها هيج تعمل بيا انتي جننتيها
: اول شي ضحى مو مجنونة ثاني شي انتي بيدج سويتيها ليش تضربيها ما تعرفين طبعها
: استفزيتوني
: دنجبي خوثة استفزينها هوا كل ما احد يستفزج تضربي بجعب السجينة؟ ثم والله مو مال معروف اني تاركتها تموتج مو احسن
تركتها وطلعت لغرفتي اطرافي ترجف تمددت بتختي حت الجوع نسيته
اجا حاذق بالليل نزلت علي حجتله امه ع الصار سوت ضحى موتة هيل خانكتها وتضربها وملت وجها دم مو هذ دم بنتج باوع لغرفة اخته جانت نايمة كلت هسة يدفنها على هذالشرح
راح عليها ولحكته لا ياذيها شفته دنك باس فروة راسها يمسح بشعرها وباوعلي
: حاذق ترا ضحى مو بوعيها
حاذق: اي ادري شلون صارت؟
: جنا نحجي بالمطبخ شويا استفزت هيل كامت احممم
: شسوت هيل؟
: حاذق
: شسوت غراب البين شسوووت؟
: ضربتها بجعب السجينة على حلكها
كلتها وفتح عيونه قوي ندار لاخته شال راسها شفتها خطية وارمة وزركة حط اصبعه بحلكها فزت متوجعة وشال الشفة العلوية هيا تدفع بيدة
كاسرتلها سن ولثتها مجروحة تخبل من شافها
ما لبالي هيج حتورم باسها ورجع غطاها وطلع رحت دتاكد من حلكها جان اسمع صوت صراخ طلعت ركض لكيته ديضرب بهيل
حاذق: بنت القندرة اني عليمن حاويج هنا تضربين خواتي
ولج اني شوكت ارتاح منجججج شوكت انتي شلون بلوة الله لازكها بيها شاكة حلكها بنت الكلب
هيل: هيا استفزتني والله هيا استفزتني
: تكومين تضربيها سجينة؟ لو موتتها بيها شسوي بيج شسويييييي
عمتي: يمة على كيفك هدها
حاذق: شنو مو بتجججج؟ مو بتج الشكت حلكها هيج؟
: وليش السوته قليل اختك مو هم خنكتها رادت تموتها
باوعلها يرمش تعجبت شلون تكسر ببنتها لعد والله حقها ضحى تضوح منج
فزينا على صوت ضحى وهيا تصرخ صوت كزاز نكسر رحتلها ركض دخلت عليها منهارة تبجي وتصيح تشوهت ومراية مكسورة بالارض
دخل عليها مسك ايديها وحضنها وهيا تبجي ضل حاضنها
رفع راسها مسح عيونها ببهامة كللها شصابج خويا
ضحى: شوف وجهي شوهتني يخوي
كالتها وبجت حضنها
حاذق: هشش لا ما شوفتج هوا ورم بسيط جم يوم النوب ويفش
ضحى: وسني؟
: اصلحة الج لا تخافين خويا
: شلون دطلع بهل وجه هذ شلون اروح للمدرسة والمعهد؟
: ياااا وشبيج خويا جنج وردة مفتحة ديالله احسبي روحج مسويا فلر مدر شتسمونا
: خذني على دكتور حاذق خذني على دكتور حباب
: باجر اخذج خويا باجر اوديج ابشري من هالشارب
سوينا عشا ما قبلت تاكل شي بس تبجي وهيل كل شويا ماخذتلها مسبة شكل هم منحصرة بزاوية الغرفة ترجف
فعلا ثاني يوم كلي انتي وديها اني مااكدر اويلي غير ضليت فاكة عيوني اريد استوعب صدك
حاذق يكلي اطلعي بلا ما اتوسل بي ساعة عيد وجابا العباس اليا ولة طلعت بوجه ضحاوي
اخذتها لدكتور اسنان السويت عندة اسناني من كسرهن قيصر دخلنا وفحص سنها رادت تعالجة كللها الا تطيب اللثة زين يالله نكدر نشتغلة
مرة اكثر من شهر واللثة ما طابت بس الشفة امبلا هيل كافية خيرها شرها كل ما تحجي تنسحل وبدن يحضرن للامتحانات البنات وضحى ما تطلع من البيت بلا كمامة صارت
بس الشي الزين الصار انها تعالجت من ميولها تماما حت نفسيتها تغيرت جانت بس تخبث هسة سوالف عادية تطلع صور شباب حلوين تكول هاي النعمة جنت محرومة منها
امتحنن نص السنة واني طبيت بالرابع بس بدت معاناتي مع الحمل تزيد
الطفل نازل لي جوا مغصات والالم تجي وتروح والتهابات دمرتني غير نساتي تلعب روحي من ريحة الطبخ والزيت مثل اول مرة صح اكل بعدل 3اشخاص بس كله بعرض الحايط كله استه ومااكدر اشم ريحة طبخ لازم قبل اكل
اخذت سونار طلع ممبين بنت الا ولد رجعت كالت لازملج راحة وتقللين المشي والوكفة ع الطباخ
ضحى عالجت سنها وطابت لثتها الحمدلله وعمتي كل مالها تزيد بشرها تريد اضل اركض بالبيت وما الحك غير لسانها وايدها هطولهم وتاذيني
يوميا مطلعة شغلة تحفرلها ببرة حت نرجع نرتبة من جديد
كاعدين اني وياها هيل ببيت غيداء حاذق مايجي لي الليل ضحى بعيد ميلاد صديقتها وبشرى خبرني ادم كلي يردها تروح ويا مدري وين اتوقعت انو شي يخص طليقها
عمتي كالت كومي غسلي الزوالي عدها 3زوالي وحدتهن بيها 9 كيلو صح صغار بس ثخان يكسرن الضهر
: خل تجي هيل ونغسلهن
عمتي: وعليمن تنتضريها؟
: شنو تريدين وحدي اغسلهن؟
: اذا غسلتوهن سوا راح تتكاونن
: لعد خل هيا تغسلهن
: انتي يعني انتي
: عمة والله بطني دتوجعني
: ما تموتين اذا غسلتيهن صيري نادرة وغسليهن بسرعة هيل ما تجي لي الليل
كمت من الجبر فجيت الزولية الاولة وكمت ادعكها شلتها فجيت الثانية شويا اكبر واثخن هاي كسرتني لي ما حطيتها ع التخته وفجيت الثالثة هاي ضهري فحط بيها
قالبة مجزرة شايلة وصخ الله واكبر مدري من اي متحف جايبتها مليانة تراب ووصخ كل بقعة بيها هالكبرها ولازكات ادعج مكان تطلع غير مكان عاد الحمدلله مي حار مو بارد الا جان فوك التعب ثلجت بس هم ما فضت ملابسي امتلن مي والهوا ثلج
اغسل مكان اتعب اخذ بريك وارجع اكمل وعمتي صارت جنها حامل كل شويا تريد بقصم لو جاي لو كعك لو نعال واروح واجي اجيبلها زقنبوت البخاري تتسمم
طلعت تلفونها وتخبر خواتها ولغي وضحك للضالين الا بعجت اذاني سقيعات
كمت سويت الغدا وشلت الزوالي وطلعتهن فوك نشرت الاولى الثانية والثالثة مكدرتلهن ثكال كلت حاذق يشيلهن
صاحتلي انزل اويلي اليوم شيخلصها ماكو بس اني وياها استفردت بيا خلالها الجو
نزلت صبيت الغدا واكلنا اكلت شويا ما اشتهي تعبانة كمت غسلت الماعين ودطلع ارتاح لبالي معرفت شمخططة الشفية صاحتلي
: ها عمة
عمتي: تعالي
: هاا هاا
؛ ساعديني بالديوان نعدلة
: شبي عدل
: لا اريد اغير ديكورة
: ما يتغير هيج احسن حل الغرفة ما يرهملها الا هيج
غلست وكعدت كالت لا طلعين ضلي اضوج لوحدي بقيت وياها كالت كومي ع السوك
: حاذق ما يقبل
عمتي: هياته السوك اشتري مسواك ما ضل
: حاذق ما يقبل
: خبري وكليلة
خبرته وكال ماكو روحة واني بعد كيفت مااريد اطلع
دخت من الكعدة وطلعت لغرفتي بطني كامت توجعني بس مو قوي بقيت بغرفتي نص ساعة وكالعادة القرقوز ما يسكت بدت تصرخ تريد انزل سحكتها
ضليت بغرفتي زاد وجعي حيل شبعت برد اليوم واني من ابرد بسرعة اصخن وبطني توجعني وراسي يصير فاتولة رحت بالنوم ما كعدت الى المغرب على صوت يمي
فتحت اريد استوعب راسي ثكيل مااكدر اميز شسالفة بس صوت يمي فتحت عيني بالزور ونصدمت من شفتها جانت جعليها عزرائيل يم راسي ودتزم يمي تهوس وتصيح
ما تسكت ضلت تلغي لئن نايمة هاي اول مرة تفوت لغرفتي بوضع طبيعي كل مرة تفوت على كتلة
عمتي: كومي دشو كومي
: شبيج شكو؟
: كومي سوي العشا يالله
: والله تعبانة وراسي يريد ينفجر مااكدر اكوم
: داكلللج كومي
: عمة شتريدين اسوي مثلا اني روحي بالزور كامشتها والله اكلج داموت شسوي يعني
سماح: والله زوجج حيجي جوعان يريد اكل واني مازوجته الخاطر اطعمكم ثنينكم
: يطلب من مطعم ماكو مشكلة عاد هوا يوم
: كرة عيني بيج وبي هوا تزوجج لخاطر اكل المطاعم وانتي تدللي علي بعد
بعد ما اتحمل ع كل كلمة وحرف واكفتلي واني حملي صعب صار وجسمي دايرجف عطت بيها
: اي عمة خما احطلي حيل اكوم اطبخ هسة والله مريضة تعبانة افتهمو يا ناس يا عالم مو جاي ادلل براسكم بس اعتقوني اتقي الله
: يا قليلة التربية يا بلا احترام تحجين هيج وياي ولج؟
ومسكت شفايفي تفركهن بقوة ادف ايدها لئن ورم حلكي
عمتي: حلكج افركة شنو اتقي الله لج شنو اني كافرة بربوك
دخل حاذق وهوا يشوف المعمعة الصايرة وشاف امه شلون تتصرف وياي
حاذق: هووووووووب هاي شبيج يمة شنو تريدين تموتيها؟
وندار عليا بقلق يمسح حلكي واني مسكت ايدة الهث راسي دايخ
عمتي: مرتك مو متربية قليلة احترام ساقطة خما محد حبل بس هيا كاضيتها نايمة ع الجرباية وتريد خدامة
: اي يمة تريدين تموتين مرتي اي شتريدين اسوي
: شسويتلها هيا تدلل عليك زايد كتلها تكوم تسويلك اكل ما تقبل تتزحزح من الجرباية شنو يمة حبلتي دتنامين هنا 9شهور
: يمة مو جوعان مااريد سم الهاري من اجوع اني اطبخ
: واني زوجتك الخاطر تطبخ لروحك يمة دللها بعد قويها عليك خلها تركب وتدندل رجليها
: اي عمة انتو ما عدكم مريض انتي هسة شتريدين
: اريد تسوين اكل هسة
اني كمت من سريري بسرعة بس ما وكفت مستقيمة اخذت وضعية الركوع واني ماسكة ايد حاذق متسندة بي
حاذق: اي يمة ع تشوفيها شلون بيها ما تكدر وهوا اكل يعني مااريد اوصي من مطعم
اني جنت راح اوكع بس لزمني بيدي ثنينهن
سماح: لا صدك سبع انت مالت
اني راح اسويلك اكل ادلل مااخلي ابني ينام جوعان
وبلشت تفشر عليا وتغلط وهيا بغرفتي وتكول مو رجال ما مسويتلك لكمة ونزلت حاذق تعصب
حاذق: وروح ابويا ماابات هنا اليوم
اني ما ردته يروح جلبت بي ماردته يعوفني وهوا يمشي
حاذق: وهم فلتيني
: بس اسمع دقيقة
: مااريد زقنبوت خليني اروح وهم مااريد ااذيج
هوا يمشي واني امشي ورا الى ان وصلنا الدرج واني اكله يبقى وميقبل
: ياعيني بس هوبك على كيفك
حاذق: دهدينيييي
وسحب ايده وتلني وياها واني روحي رايحة ويا السحبة زحطت وكعت بشكل قعود حسيت بهل وكعة الحوض انكسر مااكدرت اتحرك نشيلت تماما
اعيط من الالم هوا شافني بهل حالة فتح عيونة وحلكة واجا مسك بطني واني ابجي واعيط
حاذق: وهم
وهم اسف حبيبتي والله مو قصدي كومي كومي
: ضهري انكسرررررر
: مو بقصدي والله خرب
كومي كومي
كالها ولزم ايدي حاول يعدلني مكدرت احس ضهري نقسم
: حاذق حاسة روحي داموت
داموت من الوجع حاذققققق ابني راح يروح لا تخلي يموت امانة ماحمل اخسر واحد ثاني
ما كمت اعرف شسولف وهوا مصدوم بوجهي ايدي نشلت ما يعرف شيسوي حاول يشيلني بس ماكدرت تحرك حسيت روحي ماعت ع الدرج جنت دافقد الوعي راسي وضهري يوجعوني سوا مجلبة بيدة نبتت اضافري بيدة
شويا شويا صوتة تلاشة وعمتي الشفية متكتفة يم الدرج
ما احس على روحي الا حاذق متمدد يمي وجاي يلعب بشعري وحاطين جوا رجليا مخاد
: شصاير؟
حاذق: اتصلت بدكتورتج وحجيتلها الصار كالت اذا حسيتي بحركة الطفل وما نزفتي ماكو شي الحمدلله بس لازم راحة وتبقين رافعة رجليج هيج
: لعد كل هذ الوجع؟
: كتبتلج ادوية ودزتهن وراح اجيبهن باجر
: ما تعشيت
: نفسي مسدودة والله ما مشتهي شي بس اريدج تطيبين
: شورطك بيا
: شدتكولين؟
: انت ماتعرف اني عليلة؟ عمري كله خلص ع السديات وهسة انت متورط يوميا روحة ردة ع المستشفى
: اقبل بكل هذ حبيبي المهم تبقين يمي
: حاذق
: ياضيمة
: اريد اعزل
باوعلي بسرعة مستغرب
: فدوة اسمعني مابعد اكدر اتحمل كل هذ كلبي تعب
اني مداكلك اترك امك الا خواتك ولا حت هيل لا ولا اني راح اتركهن بس اريد اعزل اريد استقر لوحدي فدوة والله هلكت واني احاول ارضي بيها ومداترضى
واذا جان بكلبك قطرة حب الي او لابنك لاتخليني هنا ترا هلكتني اليوم بعد الزوالي ما شريتهن
هز راسة
حاذق: سهلة بويا سهلة
وخلى وطلع اني بعد بزعت منهم اوي
خبرت ادم مشتاكتله حيل سولفنا وسدة ارجعت اتصلت بكحيلة هم سولفت ابنها صاير يجنن نفس سوادينهم مصورته مطلعين معزوفة هوا وابو وديطكون صباعة سوا متيم يهز بشعرة وسند بطي*ة يموت ضحك بس ما استغرب ابو متيم
فيديو ثاني ديصنفون على شموسة ثنينهم سند يكول بيبي لابسة كومة ذهب مثل هذ المكحل يقصد عنخ امون لئن يتابع كرتون يطلع بي يرجع متيم يكلة شوف كل هالخير اخذته من جدي وملاحكتني ع الهايشة الاخذتها سند يكلة ما عدها ذوق ويهز راسة باسف
الطفل جعلي جني بس ينحب
ذبيت الفون راسي حيل دايخ رحت بالنوم وجسمي ثكيل نوب ابني نازل لي جوا متت
وكالعادة مثل كل صخونة لازم اجر يومين بالفراش
كعدت زينة بس واو كلشي ميخلوني اسوي نهار كله بالتخت مالتي اشكد رتحت ويوم الاطبخ لو اسوي شي يجي حاذق يكلبها كربلاء عليهم
عمتي ورا العركة ما خفت مشاكلها بالعكس زادت وصارت لاطيتلنا ع الكلمة اني وبناتها
ضحى ما تسكت تبقى تتعارك اني مرات ارد وتصير مشاكل ونحلها بلا ما يعرف حاذق لئن ماله واهس تعب بس وصلت حدها ويا
بشرى صارت تختل هواي تحط مكياج من تطلع ع الكلية بعد والتزمت اكثر بالريجيم شكلها يشكك بس ما هتميت فرحتلها لئن تحسنت نفسيتها
ايام عدت والوضع عادي بس ماكو وضع يستمر المشاكل زادت والتفاهم قل مع امه وهيل
صارت تجبرة ينزل ينام يم هيل وتهددة تغضب علي اذا ما نزل
مرات يعاند ويسحكها يجيني مرات بس ينام بالغرفة يحلف ايمان تكسر الضهر ما جا يمها بس السبت والاحد هذول ايامها يصير الها واني بطلت معاندة اصلا اكيف حت اشبع نوم
الى ان اجت هيل من غيداء بالليل فرحانة
هيل: ما تصدكون شكد فرحانة اليوم يمة ما ح تصدكين
عمتي: انشالله دوم شكو ولج حامل موو
كالتها وفزيت لا ويعوز تمام
هيل: ايي انشالله يمة انشالله بس مو هذ المفرحني
عمتي: لعد؟
: خالة غيداء تريد تخطب بناتج ثنينهن
كالتها وضربتني براسي لا مستحيل شنو بناتج ثنينهن
عمتي: ياااا اي الحمدلله يالله خل يجونا
: انتي من كل عقلج؟
هيل: وهم الحجي مو موجه الج لا ادخلين هاي امور عائلة
: شنو الدتحجي هيل ما راح يقبلن وحاذق هم
عمتي: غصبن عنهن يقبل وحاذق ماله دخل بيهن
: لعد منو الي اله دخل بيهن هيل؟؟ ترا اخوهن الجبير شنو ماله دخل بيهن
: اي اني موافقة وغصبن عنهن يوافقن هوا مو ابوهن
: اخوهن
: هنا عرفو قبل فترة ديصير اخ عليهن
: شنو ما ديصير عليهن اخ لا دشو اخوهن غصبن عن اكبر واحد وكلمتة التمشي
: امرهن بيدي اني امهن
: وهوا اخوهن
: ابن امهن بس الي عرفو من فترة ما ربى وياهن ما كبرو كبال عينه
: والله هذ عاد مو صوجة هوا ترا ابنج كافي
: ماله دخل بشي خلي بي خير يصرف عليهن زين وبعدين مو عايشين براتب ابوهن ذاك الوكت عود ينحسب اخوهن
: ترا ممقصر بشي وياهن اسئلي وحدة منهن اذا تحتاج شي كبل يجيبلها
حاذق: كافي وهم عاد
فتحت عيوني هذ شوكت جا ندرت بهدوء اريد اتاكد من جيته
عمتي جانت تغلي كبل شكلت ايديها
دخل بهدوء كال لا تدخلين عدهن ام
: بس حاذق
: لا تدخلييين كلت امشي لغرفتج
باوعت لعمتي ردتها تنكر لو تسوي شي ما حجت لزم ايدي وسحبني طلعنا فوك حان يغلي ما حجا شي فات سبح وطلع ينافخ ضايج ما حاجيتة باوعلي ودنك عرفت شيريد
فتحتلة ايديا بحركة حضن حضني وحط راسة على كتفي حضني
صاحتني عمتي تريد العشا دكوم مسكني كال ما تنزلين
: شلون ما انزل
: هيا مو تكول مالها دخل بيا ولا ليا دخل بيها؟ ما تنزلين تشتغليلهن مالنا شغل ببعض
: حاذق
: اش ماتريد تسوي خل تسوي بناتها وهيا حرة بيهن
: خواتك
: بناتها هوا اني شوكت عرفتهن اصلا؟ مالنا دخل وهم هاهيا هيا قررت
: بس هنا مموافقات خطية
: ينجازن كافي لغي عاد
سكتت شكلة حيل ضاج
: كوم اني جوعانة
باعلي وضحك هز ايدة
: شبيك جعت
: هسة اجيبلج لفات كليهن واسكتي نزلة ماكو
: لا مااريد ادزلي عندي كيك
: دكلي وجيبيلي يالله كومي
: تاكل معاي والله؟
كلتها بفرح لئو ميحب ياكل حلويات ضحك وهزلي راسة يعني اي
طفرت فتحت الثلاجة وطلعت الكيك والحلويات نكشتهن وكعدنا نسولف وناكل نطعم بعض ردت اطلعه من الجو شويا
راد ياكل قطعة ككو اخذها كتلها كلمن ياخذ حطيتها بين اسناني وغمزتله
اكل نصها من حلكي لبالي ديعوفني بس لزم راسي من ورا كملها ببوسة
طلعتة من المود ولو اعرف بس بالشكل ماراد يكسر بخاطري
ضلينا بغرفتنا لل10بالليل متمدد وحاط راسة يم بطني يحاجيها
حاذق: اوف يابويا شكد متحمس اشوفج تعالي عاد ادللج واجيبلج حلويات واش ما تريدين بس اشري ويجيج
شوفي بابا تسمعين كلامي ماشي
مااريد تطلعين راسج ثخين مثل امج
: هاها
: انتي لا تكمزين خليني ويا بنتي اي يابة وين جنا
ها اي تجتهدين بدروسج اي صيري شاطرة خوش اريد تصيرين كابتن طيارة
: خوش حت كل ما اضوج منك بتي تسفرني
: اهووو بابا معليج بيها اي خل نكمل
وديري بالج تعصبيني مااريد تخليني اضربج والله من افقد ماارحم
: اي دجرب ومد ايدك عليها
: بابا هاي ننطيها جبس وتعوفنا لو حرامات الجبس بيها؟
: اي والله اريد جبس
: اني صوجي فطنتج
: دكوم جيب
: مااكوم والله
: مو الي لبتك والله وهس توك كلت اش ما تريدين اشري ويجيج
باوعلي وابتسم ضيك عيونه
: يالله يالله كوم جيب جبس
حاذق: بالله شطولج شكبرج دورين جبس ثم تعاي مو فترة نساتج هاي
: شعرفك بنساتي انت كوم جيبلي
: اوف كايم كايم الامر لله
كام نزل واني بقيت متمددة دقايق ورجع باوعلي ماعاجبة وذب عليا العلاكة بيها 5نكهات فتحت واحد وكعدت اكل واوكله
مرة يعض اصابعي مرة يبوسهن مرة اخذها منه نتشاقة الى ان ندك باب البيت فزينا الساعة 10ونص منو الجاي بهل ليل
كام نزل واني طلعت من الغرفة اباوع منو جاي من فوك
فتح الباب وطبن نسوان 2 كبار ومرة شابة تكلع بالثلاثين هيج وزلمتين بيديهم ورد وات
كلت دشو منو ذولي جان تفوت غيداء وتمارة وياهم
لاتنسون تصويت⭐⭐⭐⭐⭐
اسراء العزاوي
💜💜💜💜