بقيت بس اباوعلها ماعرفت شنو اجاوب شنو يخطبني شنو زواج باوعتلي ورجعت كالت
ضحى: ترا جان سؤال عابر مامجبورة تجاوبين لفينا
: احسن
: ممفكرة تتزوجين؟
: لا امعودة زواج شني هسة مو وكتها خل التهي اربي بتي وكليتي هاي اخر سنة
: شلون كدرتي توفقين وقتج بين الدرس والبنت هاي اني مستغربتها
: لا ماجانت يمي اساسا البارحة اخذتها من المستشفى جانت بالخدج
دنحجي وصارت تبجي سمارة رحتلها اسكتها ماتسكت سئلتني ضحى شبيها
: جوعانة
: لعد رضعيها
:مااكدر ارضعها احسبي حت صدري نشف لئن مارضعتها
كلتها وهاي رخا وجها صحت بيها فزت
: شبيج يولو؟
ضحى: ها ولاشي بس استغربت يعني هسة انتي ماترضعيها؟
: لاوين ارضعها اساس ممنوع عليها حليبي واي شي بي حليب حساسية بالدم اكو نوع حليب معين اشربها منه
: شو خل اشوفة
تذكرت الحليب بالهزاز ووالهزاز بالسيارة لطمت كصتي عود ردت انام هنا ماجايبة بس الممة مالتها
ضحى: هاشبيج؟
: نسيت غراضها بسيارتي امعودة والسيارة ضلت بالكلية تعالي هسة هاي اش احطلها واطيب؟
: شوفي اني بحياتي ماسامعة بهيج مرض شنو طفل عندة حساسية من الحليب
: اني بعد ماسامعة بي والله لمن كلتلي الدكتورة استغربت بس بكل الحالات مجنت اكدر ارضعها 32يوم مارضعتها نشف صدري رضعتها يومين وكلولي لاتجين ترضعيها بعد ماجنت اعرف ليش هم لتهيت بالدوام جنت اروحلها كل كم يوم اشوفها من بعيد وارجع
: يااااا صدك الله يعينج يالله المهم مابيها شي وزينة هاي شكد تسوا انشالله الشفاء العاجل
: الله يسلمج حبيبتي يوم الج
: ولاخوي منج
: ضحى
: وهم
: اخوج متزوج شني مني
: اوي دادا هاي بطنها ناشفة ما تحبل ههههه
: لا انشالله يصير عدها
: لا ميصير لاتخافين الله مبدالج حت اذا مابيها شي ماتحبل
: ليش قفحتيها؟
: خذيها مني امعودة تنام بغرفة بحدها هاي قبل ماتجيبين من جبتي للان اني وهيا ننام بنفس الغرفة
: ههههههه ليش
: حاذق يشوف طفيف امل بنهاية المطاف
كالتها وغمزت غميتها
ضحى: يالله اني رايحة
: لا دبقي نسولف
: لا شبقى ارجع اكمل درس وانتي لكي حل لبنتج عاد رضعيها ذبيها ترجعيها
: ههههههه داهية انتي
: اي اني اسمي الحقيقي طلابة يالله باي حب قلبي
طلعت وبقيت حايرة بالصفارة العندي صح صوتها ناصي بس مزعج
حاولت بيها شكد تسكت ماتقبل هسة اني شسوي يالله
اخذتها وطلعت على امي كالت رضعيها
: يمة صدري ناشف شرضع منها؟
: بس حطي بحلكها تسكت اني هيج جنت اسوي بيج
: اخاف مازين
: لا لامعليها شي
سمعت كلامها ودخلت للغرفة فعلا سكتت بس دقايق وصارت تبجي اكثر حاولت احولها واطبطبلها تسكت ما تقبل جوعانة
حطيتلها مي بالممة شربته وتريد بعد اني هم جزعت روحي منها شلتها وذبيتها ع الجرباية صارت تصرخ دخلت امي على صوتها
شموخ: ولي وهم شسويتيلها؟
: والله بزعت منها شسويلها هسة؟
: اي بعد لبارحة اخذتيها شنو بزعت منها بعد كدامج عمر هاي بعد تطلع اسنان وتزحف
: هء بتي ماتزحف على احد العالم تزحف عليها
: انتي بربي مال ادمغج هسة الى متى هذ عقلج؟
: يالله شمو هسة اني شسويت خل بس الكا طريقة اسكت بيها سمسمي والله راسي طاش
: اسويلها شوربة؟
: مابيها حليب؟
: لا مااتوقع بيها ثم حت اذا بيها هيا مرة وحدة شدتضر
كالتها وراحت تسويلها شوربة جاهزة وجابتها بردت كمت اوكلها وهيا ميتة جوع لئن تقيت كل الحليب الشربته اكلت نصها
بشرى.
مليت من الدرس جنت كاعدة اني وطيبة نقرة ونشرح لبعض سوينا العشا وماعدنا شي دك تلفونها وراحت بالعادة ابد ما ادخل بيها
عيالي ماموجودين راحو معرف وين كلتهم مامهم بعد احسن
حرت شنو اسوي بروحي درس ماكو وتلفون فاصل من الشحن كلت ارجع اسولف ويا طيبة
طبيعتي ادفر الباب عليها بيناتنا ميانة لئنها صديقتي المقربة قبل ماتكون بنت عيالي
فتحت الباب ونفجعت من شفتها منضر مقرف تقشر له الابدان
بشاعة وقرف ولعبان نفس
طيبة مجردة من الملابس وفاتحة كام من دخلت فزت وحاولت تستر روحها باللحاف
بقيت مفجوعة بمنضرها بمكاني ثواني اشوف وجها صار ينطي الوان واستقر ع الاصفر وبدت تبجي
صحيت ورحت ركض شلت تلفونها واجت الصدمة الثانية الخلتني اضرب اخماس باسداس
شفتها فاتحة كام ويا اختي ضحى
الشهكة لزكت ببلعومي ضلت ضحى تباوعلي بخوف وسدته بسرعة رجعت لطيبة الصارت دموعها تنزل 10 10
الدم صعد براسي تعصبت متت غضب رحت بدون وعي ضليت اضربها راشديات وهيا تحاول تصدني بس فقدت مداشوف
: ولج ليييييش لييييش؟ بشنو مقصرين وياج اهلج ليييييش شنو هالحركات ولج ماخفتي احد يكشفج ماخفتي من الله
ضلت تبجي وماهتميت الها فقدت عقلي احترت بروحي كمت الطم
المصيبة مو ويا احد غريب ويا اختي ياناس اختي هاي شلون التمها شلون اواجه عيالي وزوجي اش اكول لاهلي حاذق ماصدكت رجعت الضحكة لوجهه اذا سمع بعملة اخته والله يذبحها عكس القبلة
اخذت الغرفة بالطول والعرض قونطرات اروح وارجع لاجت روحي واني اكل بشفتي لدرجة نجرحت
رجعت باوعتلها متغطية بالجرجف وبس تبجي وجها احمر دم
فركت كصتي بجزع وباوعتلها
: من شوكت؟
ضلت تشهك ما جاوبتني الا صحت بصوت فززها صارت تحجي
: من شوكت يا صخمااااان
طيبة: مو من زمن والله مو من زمن
: حجي
: من ورا زواجج تقريبا احنا بس صديقات جنا بس نتراسل بعدين صار بيناتنا صور وفيديوهات بعدين صارت تكلي جسمج حلو حسيت بيها بس غلست اني وشويا شويا تطورت الامور اني ماجنت هيج هيا زرعت براسي فكرة اني اسحاقية من جنت اتغزل بجسمها كالت انتي ميلوج للبنات وتطورت علاقتنا بس والله ماصاير بيناتنا شي اكثر من.....
كالتها وسكتت كمت اشيل روحي والزكها بالكاع اريدها تحجي وهاي بس تبجي
: ولج دحجيييييي
: بشرى الله يخليج لا تفضحيني والله اموت والله يكتلوني ميخلوني عايشة
: احجي كلت اش صاير بينج وبين اختييييي
: ماصار جثير بيناتنا والله اقوة شي بوسة
لطمت وكمت املخ روحي شنو بوسة وين وصلنا احنا استغفر الله ونريد الله مايقلبها بينا
ضلت تبجي وتتوسل مااحجي واني فاصلة نار مشتعلة بجوفي
مسحت وجهي خليتها وطلعت غسلت وجهي وباوعت بالمراية اشبه الارض هادئة بس بداخلها بركان لا براكين موقودة تشعل بيا
المشكلة اختي لو ما اختي جان مهتميت اي شي راح يصير راح يلوحها ويلوحني
امي ماخايفة من شي ناحيتها بس حاذق دمة حامي هسة يموتها والله
رحت فتت عليها بالغرفة جانت لابسة ملابسها وكاعدة ترجف
حجيت ببرود يعكس النار والحيرة الي بداخلي
: شوفي طيبة
الصار هسة ماراح احجي لاحد مو خوف عليج لا خوف على اختي هاي شغلة
شغلة ثانية وياها ماتحجين بعد ولا يصير بينكم اي تواصل لا تخبريها ولا تراسليها اي حجي مااريد بيناتكم افتهمتي لو لا؟ كفيلج الله احجي لاخوج والي يريد يصير خل يصير
هزت راسها بنص الغصة بمعنى اي
: ابد ماجنت اتصورج هيج ابد حيل نزلتي من عيني انتي شكبرج شكدج تقشمرج بنت بالخامس اعدادي
كلتها وطلعت من غرفتها حت درس ماعاد اكدر ادرس يربي شسوي هسة اني
ضليت كاعدة لي 10بالليل تقريبا اني بس اصفن عيالي ماجاين بعد اصلا نسيتهم
كاعدة انفتح الباب دخلو فرحانين من شافوني اختفت ابتسامتهم صارو يصفنون ببعض
ماحجيت ولا هما حجو شي حاولت ابينلهم طبيعية حت لايشكون بشي
: ها وينكم شو تاخرتو؟
مدحت: جنا بشغلة
: وشنو الشغلة التخليكم تتاخرون لهيج وقت؟
محد بيهم رد دنكو للارض
: ها شسالفة
حجت بنت عيالي الجبيرة عود هلي لماتضر احد
: رحنا خطبنا لزوجج نريدة يخلف
كالتها لو ضربتني طلقة كبل باوعت لمدحت منصدكة اريدة يجاوبني يبرد كلبي بحجاية اريد يجذب ينكر يحجي ماكو اي ردة فعل
هاي ثالث صدمة اكلها بنفس النهار اباوعلهم كلهم يباوعون عليا اريد احد منهم يتحرك يحجي ولا يمهم
حجيت بصوت يرجف والعبرة واكفة ببلعوني
: مدحت؟؟ صدك الحجتة؟
مارد دنك كلبي صار ينبض شرار صح اني ماجنت احبة ذاك الحب بس مهما كان هوا زوجي واني ماصارلي عندة سنة هيج مستعجل ع الخلفة العالم تنتضر سنين واعوام وهوا ماكدر يتحملني اشهر
اني بشنو غلطت وهيج دتجازة شنو سويت تحت رب العالمين وهيج ديعاقبني
بقى مدحت مدنك ونار بصدري فقدت بعد مااحس اخر شي سمعته صوته وهوا يصيحني باسمي
وهم.
تعشيت ويا اهلي وسمارة بيها شي غريب مدري شنو جان بس حسيت عليها مختلفة وصوت نفسها عالي
: ماما هاي البارحة جانت تشبه ادم شو اليوم وجها متغير؟
شموخ: الا تطلع الاربعين يالله يثبت وجها يمة
: هاي شلون؟
: هيا هيج تبقى وجها يتغير الا تعبر الاربعين
: احس بيها شي غريب
: اي اكيد لئنها الاولى وحجمها صغير تحسيها غريبة
: لا لا والله بيها شي غريب مااعرفه
: خليها نايمة يمة
فعلا سمعت كلام امي لي 11الليل اني اقرة وبعدني بملابس الكلية مابدلتهن ماعندي ملابس
كمت دشوف سمورة لئن مالها صوت لابجت ولا كمت اسمع صوت نفسها استغربت حيل
باوعتلها ووكف كلبي من شفتها زركة وكاطعة النفس
تسودنت شلتها اطبطب ضهرها احجي وياها ماكو رد
: سمورة سمارة ماما تنفسي اشبيج مامااا سمررررر ولج يمةةةةة بتييي سمارة الله يخليج ماما فتحي ماعايزة هبطات يووووووووم لحكيلييييييي ولج يمة بتيييييييي داتمووووت
كلتها واندفع الباب فاتت امي تركض مصدومة
شموخ: شبيج يمة؟
: يمة يمة بتي مداتتنفس تعالي شوفيها
شالتها من ايدي اطبلها على ضهرها ماكو اي حركة حطت ايدها بحلكها مالها اي ردة فعل جامدة
ماكمت احس على روحي شنو اعمل دموعي وحدهن ينزلن
اخذتها من ايد امي وطلعت اركض حافية حت بلا شال محتارة بيها شلون اديرها اركض واني بمكاني حسيت الدرب دهر
بقيت واكفة بالفرع دنيا تفتر بيا اريد اعرف وين انطي وجهي والسيارة مو يمي
رحت ركض لبيت حاذق وشعري منثور عل وجهي هجمت الباب واني ادكة
ادكة بلا توقف واصيح على حاذق
: حاذق الحكليلي وينااااااك
فتح الباب مصدوم يباوعلي واني بلا حجاب ورجليا حافية
حاذق: وهم شبيييييج؟
: بتي دتموت حاذق دتمووووت الحكليلي الله يخليك
كلتها واخذها من ايدي مخبوص يطبطبلها ماكو نتيجة قلبها ماتتحرك صاح
حاذق: ضحى السويج بسرعةةةة
جابت السويج اخذة وطفر سوا الفرع خطوتي حاولت اركض ورا بس وين شغل وتحرك اني تكومت بالشارع ادك والطم واناشغ بالبجي
طلعت ضحى حطت على راسي شال واجت امي كومتني فوتتني لبيتنا
فتت بسرعة حطيت الشال على راسي ودالبس الحذاء دخلو شاهين ونظر مفجوعين
نظر: شصار خالة؟
امي: ماندري والله يمة
شاهين: وهم شبيها الطفلة؟
ماحجيت مابيا حيل دركض ولزمني من كتافي
شاهين: ولج احجي
: راح تموت راح تروح من ايدي فدوة لاتخلوها
كلتها ووكعت على ركبي واني اناشغ سندي وكومني بسرعة
نظر: لا انشالله مابيها شي كومي خويا
: ولكم ودوني عليها راح تروح راح تموت والله
نظر: وين ناخذج لاتخافين مابيها شي انشالله
: وخرو دروحلها
: وهم خويا كافي
: وخرررر ولكم هاي بتي
: بس اهدئي مابيها شي مابيها شي كعدي
شاهين: شنو تكعد نظر كل عقلك كومي خويا اني اوصلج لي يمها
: صدك والله؟
كلتها وكمت لحيلي طلعت اركض وهوا يهرول ورايا من راس الفرع فتح السيارة وجيت صعدت بيها وطار بينا ع المستشفى
الدرب كله اني ادعي الله ميصيرلها شي
: يارب بتي يارب بتي ميصيرلها شي
شاهين: انشالله مابيها شي بت وهم قويا مثل امها
: وطايح حظها مثل امها امها هم كضتها مستشفيات وسديات ياربي احميها
وصلنا المستشفى نزلت اركض وهوا وراي اسئل وين ودوها محد يجاوبني الدنيا اسودت بعيني كلت اكيد ماتت الخاطر محد يقبل يجاوبني
اجاني شاهين سئل الاستعلامات كالت بالطوارء كومني ولزم ايدي رحت اركض عليها
وصلت الطوارء جان حاذق كاعد مدنك راسة وحاطة بين ايدي
وصلته وكعدت يم رجله اتوسل بي يجاوب
: حاذق وينها بتي؟ الله يخليك وين ودوها بعدها عايشة مو بعدها تتنفس كلبها بعدة يدك؟
رفع عيونه باوعلي بتعب الا موتني صرت الطم كلت اكيد ماتت
: يمييييي اني السبب اني مادرت بالي عليج يامييي حاذق جاوبني شبيها بتي مامعقولة تروح بهل سرعة لبارحة استلمتها بعد
لزم ايديا حت لا الطم
حاذق: كافي ياضيمي كافي
: ولكم بتييي
: ماماتت عايشة والله عايشة
:حاذق لبارحة اخذتها بس البارحة نامت بحضني ااااااخ كلبي يايمةةةة ولك ادم خويا كوم الحك لبتي ماكدرت احافظ عليها ولك محمد تركتها امانة عندي مكدرت اصونها
: كافي بويا تسوين هيج بروحج انشالله مابيها شي يستلحكوها والله يستلحكوها
حسيت راسي فتل ردت اوكع لورا انتبهلي وجرني لحضنة
حاذق: اوووف عايشة بويا انشالله
كالها وصار يطبب على وجهي
: حاذق بتي دتموت
حاذق: لابويا سباعية ماتموت
: راحت مني
: والله عايشة وداعتج عايشة هسة يطلع الدكتور يطمنا مابيها شي بويا بس انتضري
: شنو انتضر فوتوني عليها
: اهدئي بويا كافي
: وخر عني خل ينطوني اياها خل ميتة اقبل بس خل يحطوها بيدي
: كافي وهم تسودنتي دنكلج مابيها شي انشالله اول لو اخر وحدة تختنك
: انت دتكول هيج لئنها مو بتك
لو منك ماجان هيج كلت
كلتها ووجهه تغير ملامحة كانما دست ع الجرح عضيت شفتي قوي وصرت ابجي
حاذق: بتج بخير بويا انشالله تستلميها مابيها شي
كالها وصار يفوت شعري عدل بالشال لئن اني اصلا مالابسته بس ذابته هيج على راسي
دقيقة ماكو وصوت متيم الهز المستشفى كلتها كلها تباوعلة فايت ركض ويزمخ بيا
متيم: وينج عنهاااااا مال اضربج بدفرة اطلع روحج هسة ولج انتي ام انتي؟ شسويتيلها؟
شاهين: كافي متيم شبيك ترا بتها
: مااعرف شبيها والله متيم من حالها
: شنو من حالها شنو من حالها شلون من حالها محنونة انتي وين ذبيتيها شوكلتيها وصارت هييييج
: مادري والله مادريييي
كلتها وصرت ابجي اجت كحيلة حضنتني وحجت ويا اخوها
كحيلة: ها شكال الدكتور؟
شاهين: محد منهم طلع للان
انطت سنود لشاهين وراح لبيت اهلها كعدت ع الكرسي انتضر احد من الدكاترة يطلع ماكو متيم سوا الممر كورنيش ياخذة بالطول ويرد يرجع ياكل بشفته يردم حيطان يباوعلي ويلم شفته ويندار
عبالك اني السويت بيها هيج
حاذق كاعد كبالي نص كعدة ومخلي راسة بين ايدي مارفعه
مرت ساعات احسها دهر واحنا ننتضر اي خبر عنها ماكو
طلع الدكتور رحتله ركض اريدة ينطق الكلمة
: ها دكتور بتي عايشة مو؟
دكتور: الحمدلله هالمرة عدت سلامات البنت عايشة بس حالتها مو مستقرة راح تضل بالطوارء للصبح اذا ماضل بيها شي تكدرين تطلعيها كدرنا نستلحكها لئن اجت بالوقت المناسب لو تاركيها 10دقايق ماجان لحكنا نعمللها شي
: اوووف الف الحمدلله والشكر الك يارب
: بس لازم اديرين بالج عليها ماما مايصير هيج تتصرفين مرة الخ لا تطعميها اي شي يحتوي على الحليب اتوقع الدكتورة شرحتهن الج ماجي الطعام الجبس الككو وحت حليبج انتي ممنوع ترضعة اذا جنتي تاكلين هاي الاشياء ديري بالج عليها زين منا وجاي ماما
خلة وراح جريت نفس براحة وكمت ابجي اجت كحيلة حضنتني وعيونها مغوركات
كحيلة: كافي وهم حبيبي مابيها شي الحمدلله
اجا متيم يمي عاكد الحاجب باوعتله من فوك لي جوا ثنينا درنا وجوهنا بوقت واحد
خبرت امي شموخ وطمنتها وكعدت الوب الليل كله مانمته
انتضر اي خبر من اللمرضين كل شويا يجون ركض واكعد اطحن ويطلعون من يمها
للصبح كل حيل ماضل بيا حاطة راسي على كتف كحيلة ومغمضة عيوني من وجع كلبي افركه ومايهدا وحاذق راسة مارفعة
اجا الدكتور ساعة ب5الفجر كال صارلها ساعتين حالتها مستقرة اذا ضلت بعد مدة اطول نكدر نطلعها
بقينا لل9 تقريبا ماسائت حالتها يالله قبلو يطلعوها كتبولها خروج
طلعها وحطوها بيدي كانما روحي رجعتلي ضميتها لصدري وصرت اشهكها وابجي ردت افوتها بضلاعي بكد ما شتكتلها
عطرها انمزج ويا المعقملت صارت تبجي جوعانة بعدها
طلعنا من المستشفى كحيلة رادت توصلني بس رفضت لئن الاوجوه ثكيلة اني ومتيم
كلت اخبر على امي لو مرهم تجي تاخذني بس جنت تاركة التلفون لاجت روحي هسة شصخم
اجاني حاذق واني بالردها دنك باس سمارة بوسة طويلة من شال راسة كال الحمدلله يارب
باوع بعيوني الذبلانات حمر دم وجرني لحضنة حاوطني بيدي اني وبتي صرنا بداخلة
حاذق: الحمدلله على سلامتها بويا
: الله يسلمك ماقصرت
اسفة على جفاص البارحة
: عادي
: من حركة كلبي حجيت والله حاذق
: بويا لاتضلين تاكلين بروحج
: صوجي اني الدكتورة نبهتني كالت لا توكليها شي بي حليب
: لا حبيبي مو صوجج ماجنتي تعرفين
: حاذق
: ها ياضيم حاذق
: والله اعرف ثكلتها عليك خليتك تترك دوامك وشغلك وتكابلني س ماليا غيرك ولو اسوي عليك زحمة يعني تكدر توصلني للبيت بلا احراج
: بويا شهل سوالف هاي صدك جذب اذا سمعتج تحجين هيج مرة ثانية لسانج اكصة والله يالله مشي الله يهديج
كالها ولزم ايدي وطلعنا جان متيم بعدة واكف برا ينتضرني ارجع ويا
سلمت عليهم من بعيد مبين التعب بوجهم هما هم الليل كله وياي
صعدت بالسيارة وبتي بحضني نايمة حطيت راسي ع الجامة وغفيت حت شوكت حركنا ماادري
كحيلة.
متيم حيل حرجني كدام وهم بصياحة وعصبيته اش ماتكون مسويا تبقى امها حت ماعرفت شترد علي
بقينا للصبح روحه لايجة كل شويا حالتها تسوء وهذ يشيل روحة ويلزكها بالكاع يريد يحجي اخزرة ويسكت لئن ابد ممعوزها قهر وهوا من يتعصب يدج الحجي دج
للصبح استقرت حالتها وكتبولها خروج حاولت اخذ وهم ويانا لئن مانمنا ليا كله وهيا بعد تلوب
حاذق ماقصر بعد وين ما يحتاجون شي يروح ركض يجيبة اذا مغذي لو علاج
درنجع وهم ماقبلت تجي ويانة عرفت بسبب موقف متيم منها ورجعت ويا حاذق واحنا حركنا على بيتنا
: متيم ترا ميصير تحاجي وهم بهل طريقة بذات حاذق وشاهين هناك
متيم: تعصبت منها
: اي ترا هيا امها يعني كلنا بكوم وهيا بكوم
: ولج ادري والله وادري بلوعتها اني اذا يصير شي لسند لاسامح الله هم دفقد مثلها مدري شجاني وحجيت حسيتها هيا مقصرة بحق بتها وخلتها تصل لهل مرحلة الدكتورة كلتلها ممنوع تتكرب للحليب شموكلتها وهيج صارت مدري
: المهم هسة نرجع نرتاح ماشي وصالحها خطية هم نفسيتها تعبانة لا تنسى زوجها ومرة اخوها ماتو بيوم واحد وجابت بت يتيمة لاعشتو انت تعرف وهم دلوعة فجئة صارت مسؤولة عن طفلة ولازم تصيرلها ام واب وفوك كل هذ الطفلة مريضة
انت يمكن ماتعرف وهم بعد زين وهم هسة حاسبة روحة ثكلة على امها زوجها ماعندة راتب ولا مصدر للمعيشة وعيالها ساحبين ايديهم منها تحسب هسة انو اهلها ديتصدقون عليها
: وهم مااخليها بحاجة شي دام اني اشم الهوا انشالله ولا راح يجي يوم التحتاج بي صدقة هما اهلها عايشين بخيرها المعرض مالتها
: ماراح تفتهم هذ الكلام
: هسة شلون تشوفين صارت سمارة؟
: والله شفتها زينة الحمدلله بس شيقنع وهم
: شكد معلول كلبها لخاطر الله
: اوووف شتسوي الامر لله
: اني والله احبها وماجان قصدي ابد اضوجها لمن حجيت مدري شلون طلعت مني
: كون الله بس يشافي بنتها ماناقصها صدمات وعلة هيا من عرفت روحها بنت الصياد والمصايب ملاحكتها همزين ماعاشت عدهم طول عمرها جان اكيد هسة مستويا خوش من ديانا
سكت شوي كانما جان يفكر
: ها متيم اش استنتجت؟
باوعلي بحيرة وكال
متيم: كحلتي
: همم
: اريد اكلج شي عاصي بحلكي بقالة سنيييييين
: كول
: مااريد منج ردة فعل عدوانية
: شنو متيم قابل دتخوني
: لا
: لعد شكو؟
بلع ريكة وكال
: وهم ما ضاعت بذاك اليوم
باوعتلة مستغربة وفكيت عيوني
: شتقصد؟
: وهم
وهم ماضاعت بذاك اليوم وهم نخطفت والخطفتها
الخطفتها شسمة
بحلقت عيوني شيقصد شنو انخطفت شنو ما ضاعت
: متيم شدتحجي؟ منو الخطف وهم وليش؟
جر حسرة وبلع ريكة
: جاوبني
: الخطفتها امي
وهم.
كعدت على ايد حاذق تدقني براس الفرع مالتنا
حاذق: وهم بويا كعدي وصلنا
ماكمت ضليت مغمضة عيوني ومنتجية ع الجام تعبانة وكلبي يوجعني
حاذق: وهم يضيمي كعدي
بقيت مامتحركة لئن عيوني مدمعات بس احجي ابجي وضامة بنتي لصدري اذا تحركت تكعد اريد اتماسك وبعدين اكوم
حسيت على ايدة تجر خصلة من شعري وباسها بشوغة ورجع يوخر الشعر من وجهي حطة ورا اذاني وبقى ايدة على وجهي وزفر بقوة يتلمس وجهي
فتحت عيوني شال ايدة بسرعة باوعتله كلي انزلي
فركت عيوني ونزلت وهوا نزل وراي وصلني لبيتنا ضل واكف الادخلت وراح هوا هم ميت تعب
طبيت وامي تباوعلي وخايفة
شموخ: ها يمة شلون صارت؟
هزيتلها راسي يعني زينة
شموخ: ماما وهم والله مالبالي هيج تصير حالتها لو ادري والله مااوكلها والله بس شفتها تبجي ماهان عليا اشوفها تبجي من الجوع
: لا ماما انتي شنو ذنبج الحمدلله مابيها شي طابت مرة العلمت ماضرت بس اريد انام والله ميتة تعب اليل كله ماعرفت النوم شني
: ديالله ماما فوتي ارتاحي فوتي
طبيت وتمددت خليتها يمي وتغطينا ثنينا بقيت اباوعلها وبداخلي الف كسرة مشعول كلبي عليها
هاي هم معقولة تطيب بيوم من الايام هم معقولة تروح الحساسية والفتحة لو تضل تعاني كبال عيني طول العمر وتلوع كلبي اني بعد
ياربي لاتخلي عبدك بهيج اختبار انت ارحم الراحمين اصعب شي على اي بشر يشوف ضناه يتعذبون كبالة ومايكدر يخفف المهم اغلى شي بالحياة هوا الضنة
ماجنت اتوقع احس هالاحساس جنت اشوف حب واهتمام الاهل لجهالهم جنت احسبها مبالغة انو شدعوة كل هالخوف على طفل انت عرفته قبل ايام
بس الامر وتفكيري كله اختلف لمن شلت سمارة بين ايديني وشميت عطرها وحضنتها
حت لمن جنت حامل بيها وردت تعلقت بيها بكل حواسي صح حاولت اسقطها وماردتها لئنها من محمد والاكثر لئن جان مامتقبلني بس ابقى امها وهيا قطعة من روحي ماكدرت اتخلى عنها واتحمل خسارتها وهيا مجرد قطعة دم ببطني انوب طفل روح ودم وكلبها ينبض شلون اكدر اخليها تروح
رحت بالنوم على نومتها ماكعدت للعصر على صوت سمورة تبجي
حت ما فتحت عيوني حجيت واني مغمضة
: اي ماما هسة شوكلج ما تكليلي الحليب بقى بالسيارة شلون بينا هسة
متيم: لئنج فاهية ما تحسبين حساب
فتحت عيوني اريد استوعب اشوف اني بواقع لو حلم
متيم: فوك ما ثولة تصفن
كمت بسرعة ارمش هذ صوته تمام مو حلم
باوعتله جان كاعد بالارض ومنتجي ع الكنتور يباوعلي بنص عين ماعاحبة
كمت افرك عيوني وخليت الشال على راسي
: شجابك هنا؟
متيم: مو على سواد وجهج اكيد
: دكوم ولي
: اي اولي دكعدي كعدي لا اهفج بدفرة خرب لشتج اذكرج بالالام الولادة بقرة نايمة وبتها جوعانة شلون ام تهي بهي
: اوووي شتريد؟
: بتج من البارحة حت حفاضتها ممغيرتها هسة تشولكت تعرفين الله ديسوي هيج بيها بسببج انتي مهملة
تذكرت صدك اني ممبدلتهلها من البارحة الصبح من امي بدلتها دنكت راسي بالم صدك شلون ام اني والطفلة ماتبجي حت تذكرني بيها او المها بس ترضع تسكت
دمعت عيوني على وضعي اني كلت اتخلى عن حياتي واربيها اتفضالها واني حت حفاضتها مااتذكرها
حسيت ايدة على راسي زفرت بالم وباوعتله
متيم: حقج عليا
: صدك متيم اني مهملة؟
: لاخويا صدك جذب
: اي والله انسى شسوي هيا ماتبجي دتشوف انت بس لمن تجوع ماتذكرني بيها مرات انساها اصلا بس صوجها مو صوجي عود سند هم جان هيج
: والله ابني نضيف خل بس حفاضتة يصير بيها شي يخبصنا خبص الا تبدلة بس بتج جايفة
: دكوم كوم جيبلها حفاضات من المحل
: وليش من المحل كومي رحت جبت سيارتج التاركتها بالجامعة حضرتج
: صدك والله؟
: اي وهياته هزاز بتج كومي كومي
ابتسمت وكمت لحيلي رحت غسلت وجهي وجيت سويتلها ممه وكعدت ارضعها هيا رضعتها كلها جوعانة سودة عليا طبيت على ضهرها طلعت التريوعة مالتها
صدك ريحتها وصخة ايع وتنكست ابدللها صحت امي ما قصرت جت نزعتها وطبت دتسبحها
متيم: شحالج بلايا تشحطج الجلاب
باوعتله ماراضيلي بعدة كلامة مال البارحة يدك بكلبي زفر بوجهي وحجا
متيم: حجيت من لوعة كلبي بس والله
: متيم تتوقع دتخاف عليها اكثر مني واني امها؟
: مو سالفة اخاف اكثر منج بس تعرفين انتي وسمارة شنو بالنسبة ليا
: من كلامك البارحة عرفت
: هسة دوجع شكد تشيلين حقد انتي عذا بت ديانا شستغرب منج
: تاج راسك
: ديالله يابة تاج راسي تاج راسي بكيفج
: غصبن عنك
: كافي عاد بنت العفريت مو مال احترام قدري اني رحت للكلية بس دجيب سيارتج وجبتلج اغراض بتج بعد بس تعالي هاي شراح تلبسيها هسة؟
صفنت على كلامة صدك ياربي شهل جية الكشرة هاي خرب حضج وهم
متيم: هاك استلم بربي انتي ثولة
: ولك مو لبالي ابات والله كل ضني اروح ع الكلية وارجع لبيتنا
: وشوصلج لهنا؟
: هاا
: شوصلج لهنا وسيارتج بالكلية تعرفين شصار بيا يالله كدرت ارجعها حت نوم مانمت وصلت كحيلة للبيت وجيت داخذج من هنا سمعت السيارة بالكلية تركت سيارتي برا ورحت لكليتج بتكسي يا خرا والامن مايقبل يدخلني اكللهم سيارتي جوا الا رحت من غير باب ويا طلاب عود اني صاحبهم يالله خلوني اطب كلو على مودج بنت العفريت
: اووووي كل هذ جريته على مودي؟
: شوصلج لهنا وهم؟
: مووو موووو
: وجعوووو
: شسمة
فرك وجهه وباوعلي بنص عينه وكال
متيم: حاذق مو؟
لاتنسون التصويت⭐⭐⭐⭐⭐
اسراء العزاوي
💜💜💜💜