:دكتورة لا تخوفيني عليج الله
دكتورة: بنتي كلشي بيد الله وامر الله هذ
: دكليلي شبيها بتي فدوة
: بتج بيها فتحة بالقلب
كالتها والا ضربتني بكلبي صرت اشيل روحي والزكها بالكاع كامت دموعي تجري بدون سيطرة ماادري بيها صارت تنزل على وجه بتي
الدكتورة: لاتخافين ماما الفتحة متوسطة تنسد ويا الوكت انشالله اذا انتضمتو ع العلاج وها ممنوع ترضع من صدرج لئن عدها حساسية بالدم من الحليب ومشتقاته لهل سبب منعناج من الرضاعة الطبيعية يعني اللبن القشطة والجبن وهاي الامور واذا تريدين ترضعيها لازم انتي تنمنعين عنها وكلشي بي حليب حت ماجي الطعام والجبس والفوشار وهاي الامور كلها
اني اصلا مو وياها بس اباوع لوجه بتي حيل ناعمة وضعيفة لعد الاكل الجنت اسحكة وين راح وهيا هذ حجمها
امي: اصلا حليبها نشف ماراح تكدر ترضعها ودكتورة يعني اذا هاي الامور ممنوعة عليها شنو نكدر نوكلها
دكتورة: انواع حليب معينة تشتريها من الصيدلية اكتبلج هيا هسة تشربها بالممة بس لاتخافون هاي الحساسية احتمال جدا كبير انها مو دائمية ممكن جدا تروح بالسنة او 3سنوات او حت5 سنوات وممكن ايضا تكون دائمية
: يعني دكتورة اني بتي راح تضل طول عمرها بنفسها كلشي؟
: لا انشالله مو دائمية هاي ماتنحزر بالوقت الحالي
بلعت ريكي واني اشهك والدموع مسيطرة على عيوني
: والفتحة؟
: ممكن تنسد اذا استمريتي بالعلاج واذا ازداد وزنها بعد
ماحجيت بس حضنت سمارة واني ابجي بصمت
امي: مشكورة دكتورة يالله كومي وهم
كالتها وكمنا ثنينا طلعنا مرهم صفنت بوجهي واجتني
مرهم: شكو؟ ماما شبيها وهم سمورة بيها شي؟
امي: بالبيت نحجي ماما خل نطلع روحي هسة جيبي هذ الحليب
نطتها الورقة وراحت جابته من الصيدلية ورجعتنا
وصلنا البيت مابيا احجي ويا احد حاضنتها وكاعدة اباوع من الشباج ركنت سيارتها برا ودخلنا للكراج
وصلنا باب البيت قيصر جان لازم خروف ومتيم وحيدر عدنا لزمني متيم حضني وباس راسي رجع شال سمارة اذن باذانها وباسها بقوة
هاي اول مرة يشوفوها اهلي ماراحولها ع المستشفى اشوف الدموع بعيون متيم والابتسامة العريضة وهوا لازمها تكول الجنة بيدة
رجعها الي وباركلي وجنت محجبة كلهم فرحو بحجابي تكول تاج الملكة اليزابيث
حيدر وقيصر ذبحو الخروف جوا رجلي واستلموها هلاهل متيم ضم وجهي الصدرة حت لايغمى عليا من الدم
طبيت للبيت هرم موجودة وكحيلة اخذوني لغرفتي
فتتها جانو محضريها مسويها مفاجئة حاطين بالونات وردية وكاتبين Welcome ع الحايط وحاطين هزاز ومهد يمي
ضحكت على حركتهم وشكرتهم ورجعت تمددت بمكاني
اجت كحيلة اخذت بتي وباستها وجيهان بعد نفس الشي سوت وضلو يلكفون بيها وهيا ما تتحرك نايمة
خلولها بودرة اطفال لكل جسمها ولبسوها حفاضة هالكبرها عليها صارت لئنها ناعمة ولبسوها كومة ملابس دنيا باردة
كحيلة: بربج وهم هاي ردتو تسموها جهنم عليج الله هاي شخاطة ومستعملة هم
: اي هاي شخاطتي الجميلة
: دباعي وجها الخاطر الله فدوة لهل حجم ولج كل ذيج البطن وذاك الاكل وينهن؟
: بهاي النقطة الماعاحبتج
: لا دادا ليش ماتعحبني تعجبني ونص شوفي وجها شلونه حت اذا ماحلوة ميخالف ابني حلو واكيد ولدهم حلوين يصيرون
جيهان: هاها حجزتيها من هسة لا يمة هاي لشهم ابني
كحيلة: لا والله الي هاي ابني احلا واصغر من ابنج عاد اذا هيا ماحلوة امرنا لله ع الاقل ابني حلو يجون ولدهم حلوين انما اذا ابنج وهيا محلوين ثنينهم شيخلفون سايق كوستر؟
: هههههههه اوف ولج كحيلة اسكتي
جيهان: كافي عاد وهم نوم نوم نوم اتنشنشي واكعدي نسولف وياج هاي صارلج شهر
: والله تعبانة مااكدر اكعد
: يالله براحتج خية انزل احضر ويا خولة شويا واجيج
كحيلة: خذي راحتج
كالتها ونزلت اجت كحيلة تسولف وياي
كحيلة: ولج ممصدكة للان والله ممصدكة هسة هاي البزونة بت وهم يعني وهم الذاك اليوم جنا نلعب باللعابات اني وياها صارت ام
: ههههه صدكي صدكي الدنيا تركض ركض مو انتي بعد صرتي ام وابنج يجنن وبعد ذاك اليوم جنا اني وياج نحضر لدرسنا وما ببالنا شي غير ننجح ونطلع للبارك
كحيلة: ايييي ايام والله ماجان عدنا شي نفكر بي
: لا هم ولاغم
: لا عيال ولا اطفال ولا ننقهر من شي ولا ببالنا احد بس نتنمر ونقصف
: اكلنا ولبسنا بسيط ونروح للمكانات النريدها مشي بس راسنا مرتاح
: هم ترجع ذيج الايام؟
: ماتت بعد والميت شيحيي؟
: صح جنا فقرة بس والله مرتاحين ومتونسين نفرح بابسط الاشياء هسة
كالتها وهزيت ايدها
: افضل الاشياء عدنا والفلوس برخص المي بس راسنا شيصفي
الله كريم بس ما كتيلي ليش بتج هلكد طولت بالخدج اني اعرف اسبوعين بس
: اووووووووف بتي سودة عليا طلع عدها فتحة بالقلب وحساسية بالدم
كلتها وطككت عيونه مامستوعبة اني دمعت وكمت ابجي
: شنو يعني؟ ولج شدتحجين؟
: فتحة عدها كالت الدكتورة ممكن تنسد وممكن لا والحساسية من الحليب بانواعة
: انتي صدرج نشف شراح توكليها
: حليب مخصص لحالتها اكو اشتريتا من الصيدلية وراح استعملة
بالبداية بين الزعل بوجها لدرجة عيونها صارت حمرة دم بعدين مسحتهن وكالت بضحك
: اي وهم مايصير تضلين نايمة يالله كومي كومي خل ننزل
: مو نايمة سمورة
: خليها نايمة ومتيم اشترالها الجهاز هذ لاسلكي واحد يبقى يمج واحد يمها
باوعت عليها بسابع نومة بالمهد ودتحرك شفتها باوعت ابتسمت ودنكت بستها وشميت ريحتها تخبل خدها ناعم مال كرط
من بستها ابتسمت ضحكت عليها
: ولج اريد اكرطها
كحيلة: هههههه لافد يوم تبلعيها
: ااااااخ اريد اعضعضها مدااكدر اقاوم طلعوني من يمها
: دكومي خل ننزل سويا كومي لا تفقدين السيطرة عليها
كمت لبست شالي و نزلنا جوا من شافني متيم ضحك وكال
متيم: نزلت ام جهنم
: هههه ولك جهنم ماكو اني ام سمارة
: بربي اخت شموسة اسمها سمارة تركتي كل الاسماء واخترتي هذ
: شعليا ابوها الله يرحمة سماها
: اي ابوها الله يرحمة جان بدلتي الاسم
: لاميصير من عرف بيها بنت كال سمارة
: الله يرحمة دكاته ناقصة
شو وينها شخاطة
: شخاطة؟ انت ومرتك نفس الاخبالات والله
: اي شنو ماشايف طفل بهل حجم بطول السيار هاي صارت ع النص
: ولك لسانك احترم حجابي
: على هاي السيرة ولي جلبة شنو تتحجبين كدامي اني غريب جاية تتوبين براسي
: ول غير تحجبت عاد لازم التزم ماسالفة غريب وكريب انت والله اشوف بيك ادم الله يشفي بس تحجبت بعد
جفصت كبال كحيلة هيا ما تعرف بي عايش باوعتلي باستغراب رد متيم يلتمها
متيم: مفتهمج مفتهمج خويا
كالها وجرني لحضنة
: ترا تبت
متيم: وجع
فتنا للصالة بقيت بيها اسولف ويا الجاين وسمر بعد اجت لي الليل سمارة ماكعدت كل شويا اطلع اشوفها تبجي لو لا وعلى فرد نومة
اني اعرف الطفل لازم يضل نايم بس مو هيج من استلمتها من المستشفى هيا نايمة
غليتلها مي مثل تعليمات الدكتورة ورحت يمها لازم ترضع عاد كافي نوم
فتحت الجهاز الجابة ادم بي ممة صغيرة خليت بيها كمية لئن صارلها زمان ماماكلة كلت اكيد جوعانة
رحت يمها حليتها من المهد وشلتها بعدها نايمة لعبت بخدودها شويا ابوسها اشفطها هيا يادوب تكنش وجها
اباوعلها واريد احطها بكلبي اريد اضل اعض بيها اريد اكلها فدوة تخبل بس ضعيفة وصغيرة حيل كمت العب بوجها فتحت عيونها وباوعتلي ورمشت
ركزت بعيونها نفس عيون ادم طبعا اذا اني فترة حملي كلتها اباوع لصورة من عرفت بيا حامل لي ماجبت
يالله احسن ماتطلع تشبه محمد
اخذتها وطلعت فوك بكماطها على ادم فتحت الباب وسديته بهدوء عنلا احد يسمع ورحت كعدت يمة وبيدي سمسمي بست ايدة ووكمت احجي واسوي بصوت طفل عود. بتي تحجي ويا
: ها خال ماناوي تكعد وتشوف بنيتك شجابت؟ شوفها فدوة شكد حلوة نفس حدة عيونك خوية كوم شيلها وبوسها فدوة لعينك مو مليت من النوم
شفت ماكو امل شلت سمسمي وخليتها يمة صار راسها يم خشمها حت يشم عطرها اباوعلهم ثنينهن هذ بغيبوبة وهاي فتحة بالقلب شهل بيت الملعون الي كلمن يدخلة يتمرض
جنت كاعدة اباوعلهن انفتح الباب باوعت شفت كحيلة واكفة مصدومة تباوعلي اني بعد نصدمت
طلعت خليتها تلحكلي تركت بتي يمة
: اسمعيني
كحيلة: شنو هذ وهم
: الموضوع مو مثل ما تضنين
: ولج هذ ادم الجوا هذ ادم لعد الاندفن منوووووو
: هششش صوتج والله احجيلج كلشي
: ولج بعيني شفته بعيني شفته لعدد؟ الي بجيتي يم سدية مالته منو والي ندفن منو والجنازة ذيج
مااكدر استوعب غقلي وكف
: الجان بالسدية مو ادم حت اني ماجنت اعرف هالشي جايبين جثة ثانية يوهمون بيها العام محد يدري والله محد يدري اني نفسي دريت لمن ارجعت ع البيت تتذكرين لمن نطيتيني ابنج ودخل قيصر هوا الحجالي وكلي ادم مو ميت
محد يدري والله حت عيالج محد يدري وانتي هم لاتكولين لاحد عرفتي اني اوضحلج كلشي بس بعدين فدوة كحيلة فدوة
جانت تضرب اخماس باسداس بس تفهمتني وضلت ترجف الصدمة مداتقبل تروح منها
اخذت بتي ورجعت للغرفة فكيتها من الكماط وصارت تتمرخ وتكنش وجها وفركت عيونها من سوتها طلعت جعليها العافية تخبل بذات لابسة بدلة وردي وكبع ابيض وجواريب
شلتها وصرت الكف بيها فرحانة صرت ام شفت ثمرة تعبي بالولادة سمارة تستاهل كل هالالم من شفتها نسيت وجعي
حضنتها بقوة واني اشتم عطرها راحة نفسية بي ناعم لامس كلبي بدفو
كحت بصوت ناصي ورجعت تبجي بهدوء ماسامعة طفل انفاس يبجي هيج يادوب صوتها يطلع ضحكت وكمت احجي معاها بلغة اطفال
: هش مامي سبيج سنو تليدين جعتي مو هسة اوكلج
شلت الممة خليتها بحلكة انتبهت انها تريد ترضع ومادتكدر تشفط الحليب
يعني تعبانة لدرجة ماكدرت ترضع والممة جبيرة على حلكها
عصرت الممه طلع حليب بيدي وحطيته بحلكة سكتت ورجعت تبجي تريد بعد
: لا شوفي سمسي حبيبي لامن اول يوم اخذتي ميانة وتكعدين تبجين خل اتعود عليج شويا
كلتها وسمعت صوت ضحك شفت الباب هرم وكحيلة واكفات يباوعن
: شبيكم يولو؟
كحيلة: نفس متيم نفس الحركات والله كل ماسند يبجي يكله هاي الكليشة
كالتها وفاتن عليا اخذتها هرم تضحك
: ولج دوكلها
هرم: جيبي اني اطعمها جيبي
اخذتها وشفتها تعصر الممة على مهلها حت تسكت
مااكلت هوايا يعني ماخلصت ربع الممة واني جنت مسويتها مليانة تقريبا
سمارة رادت تنام جابتها
هرم: تعالي اعلمج شلون تلبسيها تراها بهل عمر تخوف مو شلون ماتريدين تحركيها
كالتها وحطتها كبالي علمتني شلون انزعها وابدللها الحفاضة وكمطتها وخلتها بالمهد
مافتهمت شي بس سايرتها راحن من يمي ووصتني مااضل شايلتها لا تتعلم على حضني تتناحس
طلعن منا حليتها وشلتها منا
ضليت الكف بيها الى ان كعدت كمت ابوسها والعب وياها اشم عطرها اليخبل
كعدت كمت احجي وياها اريدها تناغي مثل ابن كحيلة نسيت فرق العمر
: اوووغي حبيبي اوووغ حاجيني مامي حاجيني انغااا يكلب امج
تباوعلي وصافنة اللهاية بحلكها
حطيتها بحضني واخذت النا صورة ودزيتها لحاذق
: ولج دحجي شنو مجنونة اني احاجي روحي؟ عموما ماما مو موضوعنا انتي اول فرحة الي واتوقع لحد جبير الاخيرة لئن اني قررت اخصص حياتي بس الج ورا الجامعة يعني
ابوج الله يرحمة اهله موخوش اوادم بس ماراح يبعدوج عني والله فنهم انتي بتي اني مالهم شي يمي خل يولون
اباوعلها كل عقلي انتضرها ترد مو وياي اصلا بس فاتحة عيونها تباوعلي ضربت روحي راشدي
: اني هم ثولة انتضر منج رد نامي ماما نامي
جبت الهزاز خليتها بي ونمت
كعدت الصبح على صوت دكة بالتلفون رفعت عيني ساعة 7ونص اهووو منو من الصبح
شفت التلفون حاذق بحلقت عيوني هاي من جبت ممكعدني من الصبح صح نتخابر ونسولف ويوصيني بروحي وببتي بس ماصارلي منبه قبل ضحكت وفتحته
حاذق: صباح الخير ام سمورة
: صباح النور عيوني
: شلونج؟
: بخير الحمدلله وانت
: الحمدلله شلونها بتج
باوعت بالهزاز نايمة
: نايمة
حاذق: صدقة لله تخبل
: منيللها وجه ادم بيها رجولة احس والله هههههه
: لا لا بتي حليوة
سكتت مارديت رجع كلي
حاذق: وهم يمكن انتي تحسبيها طلعت بالغلط بس ترا سمارة احسها مثل بتي الي الله مارزقني بيها اتمنى ما تمانعين اذا سميتها بنتي
: احمم لاعادي
: رايح للكلية ماتجين لوناوية تطلعين اكمال
: امبلا شلون مااجي
: يالله انتضرج وجيبي حليوة وياج
: هههههه خمو حضانة حت باقي القسم ياكلها اذا جبتها
: لالا ادير بالي عليها والله
: ههههه دشوف شلون تصير يالله اروح ابدل
: باي ياضيمي
سديته وباوعت لسمورة بسابع نومة افتهم طفلة غيبوبة بس تنام دكومي بنفسي احس روحي ام بتي تعل كلبي لي ماتنام مو ليما تكعد
فتت للحمام غسلت وجهي وفرشت سناني وطلعت وبعدها نايمة
لبست فستان بينصل وبوت شتوي بكعب بسيط وبشت وكله اسود عدلت شعري ودحط مكياج
تذكرت اني مو سافرة هسة يالله ع الشال
طلعت شال بيجي ولفيته طلع حلو صح لمن اكون مطلعة شعري احلا بس هاهيا بعد الدنيا ماتسوا
للان كلام ادم بالرؤية يدك بدماغي لمن كلي اذا جيتي تتعذبين اكيد مكاني بالنار الخاطر هيج ديحجي صح الله غفور رحيم بس شديد العقاب بنفس الوقت واني ذنوبي الحمدلله جبال ما تحملها
بذات لمن رحت لاسبانيا من ناحية لبس والوشم ولمن اكابل كحيلة واكعد اثرم بالوادم هاي وحدها تكفي تسجني 100مليون سنة
كملت روحي ودطلع بجت سمارة تذكرت اني ام ولازم اهتم ببتي رجعت عليها وتخوصرت اباوعلها وهيا تتنغوج
شلتها بستها بس هالمرة ريحتها وصخة
: ولج شخاطة من الصبح هسة وكت جيفتج واني مبدلة ودطلع هسة شصخم يالله
بجت واني كمت ابجي كابلتها وكعدت هيا تصد واني ارد ثنينا نبجي
على صوتنا اسيل فتحت الباب وباوعتلنا ماراضيلها
اسيل: وهم من الصبح شكو ياستار تبجون
: اطلعي معليج
: يطبكم مرض فوك مرض
: هاي عليمن بت القشمر تدعين راسج ادوسة والله شنو يطبكم مرض بربوك بتي اذا صارلها شي ادفنج مايكفي من وراج جبتها ع السابع
كلتها وخلت وطلعت ردت اروح اكتلها بس سمارة تناحست وكامت تبجي اجت امي
امي: وهم شبيج ماما شكو تبجين؟
: ااااا ماما سمارة دتبجي لئن مسويتها
: وانتي ليش دتبجين؟
: مااعرف شسوي اني مبدلة ودروح ع الجامعة كلت اخذها وياي
: تاخذين بنت انفاس وياج للجامعة خمو حضانة؟
: امي حبابة نضفيها انتي ماريد يصير ريحة بملابسي
: ديالله امري لله حضريلها ملابس وحفاضة
كالتها واجت اخذتها للحمام اني مثل الشاطرة طلعتلها ملابس فانيلة وتيشرت وبلوز وستريج وبنطرون وحفاضة وجواريب
اباوع لحجم الملابس مال لعابات مو مال بشر والله يموتن ضحك
رحت للمراية مسحت وجهي بكلينس مبلل وعدلت المكياج والمسكارة مالتي
اني واكفة وامي طلعت من الحمام شايلتها وتركض
: ها ماما شكو؟
امي: باردة على بنيتج يمة يالله بسرعة خل ابدللها وانتي روحي لا تتاخرين
: ماما اش اتاخر داخذها
: بنيتي بتج انفاس لاتاخذ نضرة لو يلوحها برد
: لالا معليها شي
: ليش تريدين تاخذيها؟
: اي البارحة خلوني اخذها من المستشفى تريدين اليوم اتركها واروح هم حاذق يريد يشوفها وداخذها لامي شموخ
كلتها وباوعتلي مبحلقة عيونها
: ها يوم فصلت الشبكة يمج؟
امي: وهم
: ها مقلتاي
: شنو حاذق يريد يشوفها شنو شموخ
: ها يمة لها غير تفسير يعني؟
: الى متى مو كلنا ماضي مو كلنا مانحجي بي بعد هم تعالي لليش تشوفها شموخ؟
: اي واني شكلت ترا مجرد صديق مو اكثر وامي شموخ لها حق تشوفها هم حفيدتها هاي جت مرتين عليها وماجانت موجودة ويالله لبسي بتي لا تستبرد
: محمد هم جان مجرد صديق وهاي تاليها
كالتها واشرت على سمارة
: ماما رجاء شنو تريدين توصلين
: ابتعدي عنه
: ماشي يالله عاد راح اتاخر
ماجانت مصدكة بس سايرتني خلتلها بودرة ولبستها حفاضتها والملابس وخلتني اكمطها طلعت شدة رخوة حلتها وكمطتها كبالي وخلتها ببطانيتها نطتني هيا
: جيبيها جيبيها بسم الله
اخذتها من ايدها وشلت الهزاز ونزلت جوا جانت اسيل لازمة راسها وكاعدة بغرفة الطعام ردت اغثها بس شفت مومال هالسوالف هسة
غليتلها مي وسويتلها نص ممة مو مثل لبارحة ممة كاملة حت لا تنسكب
خليت وطلعت خليت الهزاز بالسيارة وخليتها ببطنه ورحت سقت للجامعة
الدرب كله عين بيها وعين بالدرب لئن لازمتها بيدي صارت تتنغوج جاعت تذكرت كحيلة لمن كلتلي من تجيبين راح تحسين ببنج شيريد
: انتضري ماما هسة ثواني ونصل عود ارضعج
ضلت تتنغوج ضوجتني هسة هاي شيسكتها وايدي ماتصل وجها دلزم الممة واسوق عاد لو عيني بالدرب لو بيها
: سمورة ماما كافي عاد راسي داخ شنو اعوف الاستيرن واكابلج وخل نفوت بالحايط انطي مجال
زدت سرعتي حت نصل ابكر وفعلا وصلت بسرعة ونزلت رحت شلتها من باب الثاني وحطيت الممة بحلكها حالتها احسن من البارحة كدرت ترضعها
احس العيون عليا كلها تباوع مستغربين شنو ماشايفين طفلة تداوم والله يالله
اجوني زميلاتي يشوفوها تعجبو من حجمها الصغير بقن يتغزلن بيها وحت بعض الزملاء اجو حطو الواجب بالبطانية رغم عنادي بس اصرو ونطوها
فتت اول محاضرتين هيا ساكته مابجت ولئن اغلب المواد مكمليها مااخذنا محاضرات بعد
صارت تبجي شلتها اسكتها بس مو جوعانة ولا موصخة مدري ليش دتبجي
اجت وحدة من زميلاتي حطتها على كتفها صارت تطبطب عليها الا ان طلعت تريوعة صغيرة مثل حجمها كامن البنات يضحكن وخلوها من ايد لايد اني بس اباوع ولا عبالك بتي
السنابات هيج بالجملة كل وحدة تلزمها تاخذلها 5لو60صورة حت الشباب يشيلوها ويصورون وياها متعجبين بيها اول مرة طفل يفوت للجامعة
اشوفهم يتناولوها ودك فوني شفت حاذق رديت
حاذق: وينج ياضيمي؟
: بالقسم
: عندج دروس؟
: لا كملت
: لعد تعالي دشوفج والله مشتاكلج
: اي يوميا دتحجي وياي
: صارلي شهر ماشايفج تعالي يالله نلتقي بالمجمع
: اوك جيت
كلتها وسديت الفون رحت اخذت بتي لئن اتركها دقيقتين بعد تدخل موسوعة جينس باكثر عدد صور خلال دقيقة وتصير وجه اعلاني دعاية للحفاضات والحليب والحجم الصغير
شلتها ورحت طلعت ع المجمع بوجهي وهيا بيدي اول ما وصلت شفته كاعد من شافني شايلة سمارة نصدم مالباله صدك اجيبها كبل صار يضحك وكام من مكانه واجاني
وصل يمي صرت اضحك اني بعد قبل مايسلم عليا اخذها من ايدي يبوسها حت ماسلم عليا
: تسلم الحمدلله بخير
حاذق: شو دكفي خل اشوف انتاجج
صدقة لله صدقة لله فدوة لهل وجه ول ياريتج مني
كالها وباوعلي بحسرة
: شنو صرت اكسباير اني محد يباوعلي
باوعلي بنضرة ماعاحبة رجع يلكف بسمارة
: اي هذ الواضح اني انتهت مدتي
حاذق: تعالي خل نكعد تعالي
: اي امشي
: مو انتي اني داحاجي بتي تعال حبيبي خل نتغدا
كالها وخلاني وراح كمت اضحك على سوادينه رحت لحكته وكعدت ويا طلب الاكل وجابة حت ما اكل التها وياها
يبوسها ويلعبها اني اكل واباوعلة شلون طاير من الفرح بيها يريد يحطها بكلبة
حاذق: اوووي فدوة خلفة وهم نسخة منها الحمدلله بس لا تطلع بالطبع هم مثلج
عوجت عيوني ماراضيلي
: اوووي وشبي طبعي بالله؟ عود ماجنت تموت علي
حاذق: جنت ولازلت وراح ابقى
: اي عبالي السنين المرن غيروك
: دهر ميغيرني وداعتج
ابتسمت واني اشوفه مهتم بيها ويحبها اني لبالي راح يكرها لئن مو بته ومحمد جان منافسة عليا بس استغربت لمن شفت حبة وتقديرة الها عبالك بته
كملت اكل
: وصلني لسيارتي درجع احضر للميد تيرم ماضله شي
: لعد اوصلج لسيارتج بسيارتي
وافقت شال بتي ماقبل حت ينطيني هيا اخذها وطلع كدامي واني اركض ورا
فتح السيارة وصعدها وهيا بعدها بيدة جيت صعدت بالصدر يالله قبل ينطيني هيا
حرك السيارة وطلع من الجامعة كلها
: ها وين سيارتي بكارج الكلية
: اي مادتروحون هسة مو خلي نشبع منكم هم فرحان بحجابج والله خل اتباهى بيج شويا
كالها وزاد السرعة ماكلت لا خل اغير جو شويا
فتلنا شويا بشوارع بغداد كل شويا يباوعلي ويضحك اكله شبيك يكلي الشال يلوكلج
بعدين اخذني للسوك اشترا لسمارة ملابس وقبعة بيضة ولهاية شكلهن كلش كيوت وممة
عزمني على حلويات مدري شبي كل مااكله رجعني يطلع عذر حت نبقى فترة اطول
سمارة تجوع سويتلها ممة جبيرة من جنت بالكلية ترضعها الا خلص الحليب الجبته الباقي ضل بسيارتي وراها بشويا تبجي اطبلها تسكت
ضلت تبجي واطبلها ميفيد التريوعة ماتقبل تطلع اتوسل بيها ماكو
حاذق: شدتسوين؟
: اطلع الغازات
: شربيها سفن
: ههههههههه ششرب منها سفن هيا بطول القوطية
: اي احنا من نصير غازات هيج نسوي
: احنا كبار هاي شعرفها شني سفن
: سفن شنو؟
: شني؟
: شني يابعد الشني هاي شني منيلج هههههههه
: شبيها
: حلوة بحلكج ماجنتي تكوليها قبل
: اي تعودت منهم
: شو جيبيها لاتبجي اني اطبلها
خلاها على كتفة ضل يطبلها الا تقيئت علي كل الحليب الرضعته على كتفة وسترتة نعدمت واليوم شاربة ممتين دمرت ملابسة حت من خشمها طلع
اول مرة اشوفها تعمل هيج خفت رحت شلتها ركض وامسح بوجها صارت تبجي واني من ثولي كمت ابجي وياها حت حاذق نسيته واصيح شبيج ولج
اجتني مرة كالت شبيها يمة شبيكم
: تقيئت
: يا كل هذ البجي لئن ذبت من راسها شويا؟ لاتخافين ماما شنو اول مرة تتقيء شكد عمرها؟
: 35يوم
: وللان ما متعودة عليها ترا عادي يمة كل الاطفال يتقيئون طبيعي هالشي لا تخافين هاي رضعت اكثر من طاقتها وذبته هسة ترتاح معدتها ووكليها
رحت غسلتلها بالمغاسل وهيا تبجي يالله شورطت روحي وجبتها اني جان بقت عد امي سويت روحي الام المضحية المصخمة اني والاطفال شنو هوا اني طفلة
رحت على حاذق ماهو شويا وطلع من المغاسل نازع القمصلة وباقي بالابلوز
: وين جنت؟
باوعلي صفح وكال اكود
: لسانك
: اصلح افعال بتج
وفعلا ضلينا لل4سوا كل شويا بمكان وامي حركت التلفون تعالي ارجعي مازين على بتج الدنيا صارت عصر كتلها راح اتاخر اليوم
: يالله حاذق عاد صارت دنيا عصر
: ماراح يدخلوج حبيبي شتسوين بالجامعة مشي اوصلج
: بربك سيارتي تركتها هناك
: اي بعدين خذيها تعالي هسة اوصلج
: زين ولو ازحمك بس مااريد ارجع ع البيت
: اوي دللي وين تريدين تروحين؟
: على ماما شموخ ماشافت سمورة اجتني مرتين هيا وابوي بس جانت بتي بالخدج
: اي سهلة اذا هيج هذ اصلا دربي
: وشغلك؟
: مالازم اليوم
: انت تغيب هوايا ترا
: المدير يحبني عادي اغيب هوا اصلا كلي لاتداوم عالفترة ومكانك محفوض على مود الامتحانات
: الحمدلله هم نعمة يالله خل نرجع تعبت اني
: مشي
كالها ورحنا لسيارته فعلا وداني على منطقتنا القديمة نزلت ماكو احد من ربعي كلمن بشغلة سلمت على حاذق راح لبيته واني فتت بيتنا
امي اول ماشافتني تفاجات وصارت تضحك اخذتها من ايدي وصارت تبوس بيها وتكول الله واكبر الله واكبر
: ههههه ماما ترا بتي مو حزام ناسف الله واكبر الله واكبر
شموخ: سكتي لج شو خل اشوفها فدوة لله شكدها نعومة وحلوة
: ههههههه انتاجي بعد
: خل اشوفها لابوج
كالتها وطبت فتت وراها نزعت الشوز نسوني اساسا يالله ميخالف
فتت لكيت ابوي حاضن بتي ومغمض عيونه حت النفس كاطعة وامي واكفة يمة ومغوركات عيونها
: يااا هاي شبيكم؟
امي: شنو اشبينا ماما؟ دنشوف بنتنا الوحيدة صارت ام وهاي البزونة بنتها هههه ذاك اليوم جنتي تبجين على لعابات والنساتل اليوم انتي ام يالله شبسرعة الوكت يمشي
: اييي كله من عمرنا
ابوي: الله يحفضها الج بابا ثبتيها على اسم سمارة هاهيا؟
: اي بابا اني ام سمارة صرت
: فدوة لسمورة ولامها
: اسم الله عليك داد
ضلو يلكفون بيها لعبو بيها فلك من ايد ابوي لايد امي اني اضحك على تصرفاتهم
امي: اليوم يالله وهم جا بالها تجيب حفيدتنا دنشوفها
: اي ماما بعد البارحة استلمتها والله
ابوي: شدعوة هيج طولتي
: اوووف يابا غير البنت مريضة الحمدلله على كل حال
بحلقولي بعيونهم
امي: اشبيها؟
: فتحة بالقلب
ثقب الحاجز البطيني
ثنينهم كالو بصوت واحد
: شنووووووو؟
باوعتلهم ما حجيت شي بس الحسرة على بتي اكلتني
امي: شنو فتحة بالقلب ليش
: لئن جت ع السبع اشهر اتوقع ماكو سبب محدد
ابوي: هاي امور وراثية
: بس ماعدهم احد بي هذ المرض
اوووف الله كريم
: زين بابا وشكد حجم الفتحة
: متوسطة
: لها علاج بابا لا تخافين
: لا يابا امر الله هذ وصابرة علي الحمدلله على كل حال هم اختبار من رب العالمين شسوي
دك الباب رحت فتحته جانت ضحى جايا تزوروني والابتسامة بوجها سلمت واجت حضنتتي
ضحى: عذريني وهم والجبار العزيز مكدرت اجي اشوفج لئن درس
: لا دادا معذورة اتذكر ضيم الخامس اني بعد
: والله من كلي حاذق انتي جيتي معرفت اشلون اجك العباية والشال اجيتج ركض كلت خل اشوف خلفة وهم
: ههههه تعااي تفضلي جوا بتي
فاتت اخذتها من ايد ابوي باستها وشمت ريحتها صارت تضحك
ضحى: اموت ع الجهال اني
: هههههه تزوجي وجيبي منها
باوعتلي ماعاجبها ورجعت تلكف بيها سحبتها على غرفتي دناخذ راحتنا
ضحى: اكول وهم
: همم
: يعني من جيت على بيتكم بفاتحة اخوج الله يرحمة والله يزيدكم خير يعني
الصالة بكد البيت
: اي صح صالتنا جبيرة
: بلا مسلتة صدك داحجي يعني ماشالله قصر
: اممم امي تحب الاشياء الفخمة اختارت فصال البيت ملكي
: زين وهم سؤال يطرح روحة ويتمرغل بالكاع
: كولي
: انتي هم عندج استعداد ترجعين تعيشين بهيج بيئة؟
: شلون يعني؟
: يعني انتي هسة من4 سنوات ببيتج هذاك يعني تعودتي على ذيج البيئة هم تكدرين تتاقلمين بهيج بيئة مرة ثانية
: والله ضحى مااعرف شكلج يعني اني مرة طلعت ماصدكت ارجع هاي ماعدا سفرتي ع اسبانيا بس هسة ماادري
: يعني؟؟؟ احم شسمة
: حجيها هيج بالمشرفحي دادا
: اذا خطبج حاذق تقبلين؟
لاتنسون التصويت⭐⭐⭐⭐⭐
اسراء العزاوي
💜💜💜💜