بشرى تكول
شـلم منك ..؟ ثلث... آآه وثلث ...خوف
وثلث عثرات يا عمري...!
شـ اكض منك..؟جزيت العافيه وشحيت
يا صبري..!!
كلماته نزلت مثل السياط على ركبتي
: ش.. شنو؟
مدحت: راح اتزوج
: تتزوج منو مدحت عليك الله اذا دتتشاقة ماليا واهس
: لابشرى مااتشاقة اني اريد طفل
: مدحت بعدنا عرسان شنو تتزوج لئن ماجاك طفل ورا زواجك ب5اشهر
: لعد اشلون اضل محروم من الابوة
: منو حارمك منها منوووووو؟ اني حت الدكتورة كلتلي كلشي بيج سليم اني مابيا شي العيب مو مني
: لعد اني معيوب؟
: مدحت
: بشرى اني قررت هاهيا باجر الكيلي مرة اريد اخلف اني خمو اموت واني بحسرة الطفل
مرهم.
مرت شهرين على خسارتي لابني
اعرف كلشي الله اله ارادة بي واني ايماني بالله جبير الحمدلله راضية بالامر الواقع
شفت مساندة من عيالي ومن اهلي بعد خسارتي لابني
امي سافرت وتركتنا للعلاج وهالشي زاد حالتي النفسية سوء
صح ماجنا قريبات من بعض بس مهما جانت امي ومن اشوفها ارتاح
جنت كل لحضة ضعف اتذكر الطفل وشلون طلعو من بطني ميت مخلوني اشوفة اشبع قهر وضيم بس ارجع افوض امري لله هوا يدبر امري
اجاني سيف مبتسم بكسرة واضحة بعيونه اعرف بشنو ديفكر
: سيفو
سيف: ها مرهمي
: حبيبي منو شاغل بالك؟
: محد حبيبي محد
كالها وطب للحمام يسبح وطلع اجا نام بصفي
وهم.
اليوم مرهم تجي تسلم على امي هيا وسمر وجيهان
اجو من سديت التلفون من حاذق فتت سبحت ونزلت لكيت سمر جايا
شويا انوب اجت مرهم ووراها مباشرة جيهان وولدها
اسيل متفرعنا مدري شبيها رغم تتحاسب وتترزل حت ضرب قيصر صاير يضربها وماكو فايدة تزيد ما تقل
الكل يشتكي منها ومن تصرفاتها على طول الكفها تدعي علينا بدون ذكر اسماء تدعي
لبسناها ونتجاهلها بالاحرا
جنا نشوف المضاهرات بالتلفزيون وبالمبايل واريد اطلع
جنت اخاف على حاذق من اسمع شنو ديخططون يسون حت يكعدوهم واكله لاتنزل معترض يكلي باجر ورانا تخرج اريد تعين
رجعنا نداوم واني كارها ام الدرس بس هم الحمدلله احسن من كعدة وصفنا بالبيت بس صارت الدروس مكثفة رغم انتقادات ع العدة مالتي وع كبر اخوج ندي ومدري شنو لبستهم محد يعرف بادم عايش حت اهلنا
لا اهل ابوي ولا اهل امي بس متيم حت كحيلة ماتعرف
بدال ما نرجع للبيت ب12صرنا نرجع ب3
رجعت فد يوم ومرهم عدنا كالت استقالت من الشغل
: ولج ليييييش
مرهم: دشتغل بشركة عمو احسن
: هم فكرة شوكت تبدين
: انشالله فد اسبوع هيج لي ماتكمل اوضاعنا
: انشالله اكول مرهم حبيبتي اليوم عندي سونار تعالي وياي امي تعبانة
: هوا اني جيت دروح وياج هههه
: ماشي لعد اروح ابدل واجي
: اليوم طبيتي بالسباع مو؟
: لا قبل اقل من اسبوع بس جنت مشغولة بالامتحانات
: يالله لعد طلعي بدلي حت اخذج عندج حجز مسبق؟
: لا خبري السكرتيرة واحجزي
كلتها وطلعت لغرفتي شفت الحية واكفة ع الدرج كالعادة تهز رجلها
اسيل: ترا اني جزعت
باوعتلها باستغراب
: اشبيج غير افتهم؟
: وهم دكلج هيا من الاخير ترا كعدتج هنا طالت
: هيهيييي ووراها؟
: شلون افهمج هيا بعد؟
: دتعالي دكلج لعد مادام الموضوع انفتح
هذ بيتي وباسمي اني انتي هنا خطار ماشي
: لا مو ماشي اني شوكت ارتاح شنو مو بشر
: هو ع المو بشر لا انتي مو بشر انتي الحشرات تتنكس منج وشغلة ثانية البيت هذ بيتي وبيت امي اني مالكته انتي هنا مو اكثر من وحدة جابها قيصر وفرضها علينا يعني اكعدي بعقلج ماما اي احسن ماتلكين روحج فد يوم نايمة بصف ثاندر
كلتها ورحت لغرفتي والله يالله ببيتي وتريد تطردني ههه
ذبيت الملازم والجنطة وبدلت ملابسي لئن جنت لابسة فستان بينصل مو مال اروح بي ع الدكتورة شلون دتاخذ السونار
لبست تنورة وبلوز عريض عليها وطلعت بعدها جنتنا كاعدة ع الدرج
: اسيل حبيبي لو بلا زحمة مجال لئن كاطعة السايدين انتي
اسيل: انتي شكد ضلج وتجيبين؟
: شهرين
: ووراها تطلعون من هنا؟
: شلحت ماما افتهمنا انتي ثولة فرد مرة ما تستوعبين يعني
: وهم ترا حقي اعيش وحدي
: الله ومحمد وعلي وياج احد كاضج؟
: اي انتو
: اسيل عاذرتج اني للان وانتي مداتستوعبين اني شايفة عين صلفة بس مثلج ماشفت ولا اضن راح اشوف شنو تطردينا من بيتنا ماما نعرف تزوجتي على مود الفلوس بس موهيج يعني تريدين شي مالج حق بي هذ بيتي تريدين تضلين وحدج كولي لزوجج يجيبلج بيت واطلعي محد يكلج انتي منو ولا احد يعتب 100نبي وولي وياج
دانزل الدرج وخلت رجلها لفتها على رجلي زحطت بيها حاولت الزم المحجل مالحكت وكعت الدرج كله تدحرج واستقريت على بطني
حسيت ضهري نقسم بقيت جامدة وكاطعة النفس احول استوعب ثواني وتحركت وطك ضهري متت الم وصرخت بكل حيلي ما جا ببالي بس صورة ادم لمن ضربو بعرسة كبالي وصرخت بعلة صوتي
: ااااااااااادددددددددددم
على صوتي طلعت مرهم وامي يركضن ما احس بيهن بس ببالي ادم والالم الي بيا
مرهم: وهم
وهم شصار يولي حجي
: ادم الحكني خوياااااا
: ولج شمالج منين اجا ع بالج ادم؟
فتحت عيني وشفتها مسكت قبضة ايدها واني ابجي
امي: وهم يمة وكعتي لو شصارلج بس شدي حيلج وياي
: اسييل اسيييييل
كلتها وباوعتلها امي بسرعة وصدمة وذيج لمت ايديها يم صدرها خايفة
اجاني وجع مزق احشائي شديت قبضتي على مرهم بكل قوتي كمت اون بشوغة الم فضيع ما ينوصف دقايق واختفى مرة وحدة اباوع ملابسي انعدمن من الدم
فقدت بعد مااحس روحي رخت بين ايديهن ماكمت احس بس لمن نضرب طسة بالدرب ويرجع جفني يثكل
يجيني وجع يموتني مابيا حت افتح عيوني بس اون ومن يروح ارخى
فتحت عيوني لكيت روحي على سدية والكانونة بيدي عدلت وجهي دتسوعب اجاني الم ببطني كطعها صرخت صوت رج المستشفى رج
شفت روحي بغرفة الولادة هاي شنو شجابني لهنا والدكتورة والممرضات يم راسي
الدكتورة: اهدئي ماما بس دقايق ونكمل
مااتحمل الوجع موت احمر احس ضهري وبطني يتكطعون الم مايرحم ماحسيت هيج ابد
الدكتورة: ساعدينة يايمة ما دا نكدر نسويلج شي وانتي هيج
شنو اساعدهن شسوي اني مااعرف شي هاي اول مرة اجر هيج واني بعدني بالسابع مو موعدي هذ
: شدتسوووووون عوفونييييي مو وكت ولادتي
: صار عندج نزيف اذا ما ولدناج هسة انتي والطفل بخطر
اجت الممرضة فحصتني ومتت بدمي من حبلت محد لامسني اريد ادفها مابيا حيل احرك روحي
ممرضة: دكتور ما عدها توسع ما راح نكدر نولدها
دكتورة: نطيتوها ابرة طلوك اصطناعي؟
: اي دكتورة
رجع الوجع اقوة من القبلة لاجت روحي واني الوب اضافري تكسرن واني اغرزهن بالسدية كاتمة صرختي مابيا حيل بعد الدكتورة تكلي ادفعي ومااعرف شتصرف
اسوي الاعرفه تكلي دتسحبين الطفل
دكتورة: هاي مراح نلحكها هيج راح يخلص دمها بسرعة ع العمليات
كالتها وشفت ادم لمن باس بطني بحنته تذكرت فرحته ببيها من طلعت بنت تذكرت اغراض الجابهن الها حسيت محد يكدر يخلصني من وجعي غيرة
: ااااااادم خويا الحكني
مدري ليش كل شويا تجي ببالي صورته من جان يلزم بطني ويحاجيها واصيح باسمه مدري جنت ابجي من وجع بطني لو ع ادم
: ولك خويااااااااااا
دكتورة: العمليات بسرعة حضرو التخدير
: خويا لحكلييي دامووووووت
: وهم اذا ما ساعدتيني ممكن فعلا تموتين كافي تلوبين ماما بس اثبتي هسة شويا وتفض
: داتكطع والله داتكععععععع
راح الوجع وماعت روحي الالم يموت بس مابيا حيل بعد اقوم اسمع الممرضة تحجي وصوتها رنان بذاني
ممرضة: دكتورة لازم عمليات بسرعة راح تروح
: ليش مادا اشوف فرغولي غرفة العمليات بسرعة
كالتها وطلعوني من كدام اهلي لمحتهم امي منهارة وبالارض ومرهم نفسها مو وضع احسن
اجو يمشون وراي بالسدية امي لزمت ايدي وتحاجيني واني روحي منتهيا
امي: يالله هانت هانت لاتخافين احنا كلنا هنا كلنا يمج ومعاج امي لاتشيلين هم
مرهم: قوي كلبج دقايق وماراح تحسين بعد بشي
كالتها وتركوني مشت السدية باوعتلهم نضرة اخيرة شفت محمد واكف بطولة يمهم مبتسم كلت هاي مكاني ماراح اطلع من نا عايشة
دخلت للعمليات لبسوني البدلة الزركة بسرعة واني ميتة روحي اجاني الوجع مكدرت اتحرك كعدت بالارض كاتمة صراخي حسيت شي نزل باوعت الارض كلها مي نازل مني شنو هذ يالله
الدكتورة صاحت بسرعة طك مي الراس بسرعة بدلولها
بدلت وتمددت وحطو المخدر بحلكي بسرعة دقايق واني الرعب مسيطر عليا والخوف والالم والحزن وفقدت
كحيلة.
كاعدة اباوع للتلفزيون وسند يلعب بالعابة نابشهن ويلعب عندة سيارة مال شرطة يموت عليها يلزمها ويصيح ويو ويو
ابتسم بالم تذكرت ادم شلون جان يكله انت تصير ضابط وتشك المتهمين
زفرت نفس ورجعت اكلب بالتلفزيون دك فوني كلت اكيد وهم لئن ما محاجيتها من زمان
رحت شفت طلعت مرهم رديت وجانت تحجي بخبصة وسرعة
: الوو
مرهم: كحيلة كحيلة لكحيلنا
: ياستار شكو
: وهم داتولد
: شنووووو؟ شنو تولد بعدها بالسابع؟
: وكعت من الدرج مااكدر اشرح شي راسي مضروب احنا رايحين للمستشفى
: جايتكم جايتكم
: تعالي بسرعة لازم تشوفيها صارلها شكد تصرخ باسم ادم الله لايقدر يمكن...
دبري احد زمرة دمة سلبي بسرعة
: لوهم؟
: لعد لامي
: ولج ثولتيني
: داتولد قيصرية
: جاية جاية
: استعجلي
كالتها وسدت الفون كمت اضرب اخماس باسداس هسة شصخم نجنيت ماكمت اعرف شسوي
خبرت على متيم ميرد اكثر من مرة ماهو
خبرت على شاهين ورد
شاهين: اكيد زوجج ماموجود ودتخبرين عليا وتريدين الحكج
: الحكلي شاهين
: عرفت والله
: مو وكت بهاتك تعال بسرعة
: شكو؟
: تعال خذني للمستشفى بسرعة وهم هناك
: شنو شبيها وهم؟
: تعال خذني كلت
: اي اي جيتج
كمت بسرعة بدلت الي ولسند لبست عباتي احاول اتصل بمتيم ولايرد مااعرف وين حاط فونه
ربع ساعة واجاني شاهين رحت ركض صعدت بالسيارة وشفت حاذق وياه هسة هذ شجابة هالمرة
صعدت بالسيارة وجهي ثكيل مااحجي ولا حت سلمت وطار بينا شاهين يحاول يعرف شبيها وحاذق بس ياكل بشفته لو يعض ايدة مانطيتهم جواب
من وصلنا المستشفى كلت لشاهين يخلي سند يم امي ونزلت ركض
سئلت على وهم ودلوني عليها رحت ركض شفت ديانا تنوح وتدك رجولها رحت لمرهم الجانت بالزور واكفة
: مرهم فهميني شنو صار
مرهم: وكعتها اسيل من الدرج
: وشلون حالتها هسة؟
: دخلوها للعمليات ماندري بعد بس نزفت نزفت هواي
جانت تحجي وعينها بالارض تصب
ديانا: يمةةةةةة وهم بنيتي شدي حيلج يابعد امج شدي حيلج مابيا حيل خسارتج انتي بعد شدي حيلج اريدج تطلعين بسلامة يمة لاتحركين كلبي عليج بعد اخيج تركج امانة يمي لازم ادير بالي عليج لي مايكعد
احنا نحجي واتصل قيصر راحت مرهم ترد علي محد بينا بحال يعرف شنو يريد
وهم طولت بالعمليات صارلي ساعة من اجيت وللان محد طلع من جوا
دقايق تمر دهر نريد احد يبرد كلبنة بحجاية تنكال ماكو الممرضين يطلعون ركض يفوتون ركض ولا يحجون شي وديانا تشيل روحها وتلزكها بالكاع
اخير شي طلعت ممرضة كالت المريضة دمها صفر ومدانلكة عليها زمرة مطابقة واذا مالكينا تروح بيها هيا والطفل
بشرى.
خبرتني امي دتسئل على حاذق المختفي من ورا الضهر وما اله اثر
: معرف
امي: بشرى انتي اكرب وحدة اله
: يمة خما اسويلة ممة قابل وهوا زلمة يجوز مبايلة ع الصامت لو قافلة لو شوف شنو السالفة اتركو بحالة
كلتها وسديت التلفون هوا اني ناقصني قهر تجيني تريد ادير بالي على ابنها بطول الحيط والله يالله
اجاني مدحت المايتحاجة واني هم هملته جزعت منه واني ابررلة واتوسلة واكله الامر بيد الله مو بيدي
يجي على كد الطلب لو السؤال حت مابتقربلي هوايا يادوب مرة مرتين بالاسبوع
خل يتزوج شسويله قابل مامرة تاكل مرة عود خل يلكي وحدة تراعي مزاجيته مثلي
صح مااحبة وكلبي مو يمة بس اش مايكون هوا زوجي
اجتني اخته طيبة دندرس وجا ببالي اسئلها
: اكو طيوبة
طيبة: هاا
: شسمة احمم اذا اخوج تزوج تركصين بعرسة
: اخوي تزوج وركصت بعرسة
: لا دتفتهميني
: معاذ من راح يتزوج هم راح اركص بعرسة
: طيبة بلا بهاتة
: كل عقلج مدحت يتزوج ولج
: والله يسويها
: لالا ميسويها ميبدلج بالكون
: ذيج المرة لكيته ديراسل
: ماكو زلمة ميراسل ويخبر تركي امعودة هسة اختج ما اقتنعت
: شنو تقتنع؟
: ما اقتنعت نخطبها لمعاذ
: لا ولا راح تقتنع
: ترا ما تلكا احسن منه
: روحي حاجيها انتي اني جزعت منها
: زين ليش ماتروحون على دكتورة مرة ثانية شوفي ليش ماحبلتي
كمت من يمها وفتت لغرفتي اوي شهل عيشة كل شويا وواحد كامز شبيكم ساحلين روحكم ع الجهال
اجاني اتصال من كحيلة
حجيت وياها وكلتلي على حالة وهم نصدمت شلون يعني بعدها بالسابع شنو ولادة مبكرة
عرفت انو وهم زمرة دمها وسالب واني دمي سالب على امي يعني اكدر اساعدها بشي ولو قليل واعرف هالزمرة هاي نادرة ماتنلكي
اتصلت بمدحت وكتله ماعارض لئن اصلا صاير مامعتبرني مرته ضجت وزفرت بتعب بس مع ذالك بدلت ورحت لوهم تحتاجني بهل وقت
كحيلة.
لي الليل واحنا فرد كعدة اتصلت بشاهين بلكت يدبر دم سالب لوهم غير حاذق
كاعدين واجت الممرضة كالت لكينة متبرعين بالدم وانشالله نكدر ننقذها وطبت
ديانا حلفت الا تروح تشوف الي انطو لوهم دم ورحنا انصقعنا لمن شفنا حاذق وبشرى
ديانا ماحجت بس شافتهم ورجعت ليم غرفة عمليات ضلينا واكفين وبشرى رجعت بساعتها وحاذق ماقبلو يخلو داخل المستشفى لئنها نسائية
كاعدين واجت مرة وكفت يمنا دقتت بوجها تذكرتها هاي ام محمد فردوس
جانت واكفة على نار ومبين جيتها شر مو خير على حركتها وتلاغت ويا ديانا
ام محمد: شنو دتجيب ع السابع؟
ديانا: ادعيلها
: شنو ادعيلها وهيا موتت ابني انشالله نفس مصيرة
مرهم: خالة رجاء انتي جاية مستشفى ووهم وضعها مو مال هيج هسة
ديانا: تركيها خل تطلع الي بكلبها
ام محمد: اي اطلعها والله لومابتج ابني ميموت انشالله تلحكة اني جيت بس دشوف بت ابني واخذها مستحيل اخليها يم هاي المرة بعد قتلت الابو وتريد تلحك بته بي
ديانا: خلصتي؟ دكعدي انتي وساكتة اذا عندج كلام زين تكولي احجي ماعندج ياريت مانسمع صوتج ترا اخلي اخوتها ينسون انتي مرة
كعدت وسكتت بس صارت تغلي وجها محتقن
ضلينا كاعدين الا دك جهاز انذار بالغرفة اشوفهم صارو الدكاترة والممرضين يركضون لغرفتها
فتحو باب الغرفة ولمحتهم
الطفلة بيديهم وجهاز نبض القلب يصوفر ووهم راسها مايل ومحضرين جهاز الصدمات
هذ كله شفته بجزء من الثانية قبل ما تنغلق الابواب وتصير وهم وراها
طلعو البنت ولحكتهم ام محمد واحنا بقينا نردم من قوة الصدمة مانعرف شنسوي حرنا بروحنا
دقيقة واجت ممرضة ثانية هم سرقت النضر شفتهم ديسولها صدمات كهربائية وبكل مرة جسمها الهزيل ينتفض مثل السقفة
ديانا ضلت بجي وتصيح اترحمولها اللحضات المرت وكفت الزمن بعيوني
وهم.
حسيت بروحي طايرة مو متوازنة جسمي بخفة الريشة
كعدت لكيت كدامي ادم لابس ثوب ابيض يضحك وايده على راسي ما صدكت روحي كمت حضنته ركض واني ابجي
: خوياااااا
ادم: هششش كافي بجي
بنيتي القوية صارت ام هسة عفية عليج كدرتي تصيرين قويا وانا مو يمج
: ادم تعرف شصار بيا بنومتك والله متت اني كسرو خاطري هاي اسيل وكعتني
: اعرف خويا اعرف كافي بجي انتي زينة هسة بعد محد ياذج
: شوكت تكعد وتحجي وياي؟
: انا مرتاح كولش الحمدلله بس مشتاكلج يابة
: لعد خذني وياك
: لا مااخذج بعد وكت عليج
: لا ادم عليك الله خذني والله مو مرتاحة يمهم انت جنت انيسي هسة لوحدي هناك انت نايم ما تحس بيا
: وبتج منو الها؟
: ها
: وهم مو وكتج دتروحين على مكان هسة مكانج مو حاضرة واذا رحتي ماراح ترتاحين
: شقصدك؟
: باعي ترجعيلهم هسة وديرين بالج على بتج ماشي بنيتي هاي حفيدتي لئن امها بنيتي هههه وتغيرين طبعج ولبسج خويا مااريد تضلين بهذ اللبس
: ادم شدتحجي؟
: والله وهم مداتشاقة غيري من روحج ولبسج والبسي حجاب صيري احسن واقوة خويا انا هسة دروح وراح ارجعلج والله ارجعلج
: وين تروح وتعوفني ادم لا تعوفني لوحدي
: راجعلج بنيتي ديري بالج على روحج
صار يتلاشى ويبعد بقيت اصرخ واشوفة يبعد اصرخ واصيحة ياخذني بعد عني هواي وخلص
فتحت عيوني لكيت روحي متمددة على سدية امي وامي شموخ ومرهم يمي وحت حاذق وكحيلة عدلت روحي بطني اذتني انتبهولي فزو كلهم واجو يبجون حاذق من شافني دنك اختنك وجهه
اباوع لروحي احس بطني فارغة وحلكة مر راسي دايفتر والم ببطني
: ماما اريد مي
جابتلي مي غسلت شربت وانتبهت بطني ماكو خفت لاصاير شي على اثر الوكعة جلبت بامي
: وين بتي ماما؟
امي: هش هش اهدئي هههههه
: شهدء ماما وين بتي؟
: بالخدج ماما اجت ضعيفة حيل
: جيبوها اريد اشوفها
: ممنوع ماما ميصير
ع الخير ماجاج يمة تربى لعزج
اجا حاذق وجهه مخنوك عيونه حمر دم
كال بصوت شبه مسموع
حاذق: حمدلله ع....
ما سمعته كمل دار وجهه عني جر حسرة اني من شفته هيج هم اختنكت ودموعي تجمعت صرت ابجي ويا اعرف بشنو ديفكر جان يتمنى هاي البنت منه
دار وجهه عليا ودموعه نازلات دنك باس راسي وطلع من شفته راح كلبي نغزني وبديت ابجي بحركة شافوني هيج طلعو من الغرفة كلهم
بقيت ابجي واشهك على حالنا وين وصلنا وشصار بينا احنا جنا جسدين بروح وحدة جنا نبني احلامنا جانت هاي امنيته يجينا طفل هوا تزوج واني صارت عندي طفلة مرد كلبي احسة
ماالحك امسح بمدوعي ينزلن من حالهن ليش الكل صار ضدنا حت الزمن عارضنا احنا ماسوينا شي غلط حبينا بعض بس شنو الحرام بالي سوينا منضرة وهوا ميكدر يحجي وياي جان كفيل انه يدمر نفسيتي
دخلت عليا كحيلة كالت اكوم اغسل حت اكل ردت اشوف بتي بس ممنوع حاطيها بالخدج كلبي نمرد عليها ممنوع تطلع
لبستني شلون ماجان فستان وسندت روحي عليها كعدت بكرسي متحرك رحت شفت بتي
جان ابسط مايقال عنها نقطة حيل ناعمة ونايمة
يكون من اجت مابجت الا قليل على كد الرضاعة
كلت اروح لبيتنا ردت اسبح واغير ملابسي ما قبلو بس طلعت بالزور وصلتني مرهم اجت ويانا كحيلة جان روحي طالعة احس جسمي ثكل ومو نضيفة وصلت البيت رحت لغرفتي اسيل ماهي ردت انهشها
: لعد هاي العكربة وينها؟
مرهم: اسكتي قيصر كتلها كتلة الا كسرها ماتت بيده
: خل تستاهل هيا الوكعتني
: والله ضلت سنة تحلف تكول هيا وكعت وهوا يضرب بيها يالله فوتي سبحي دنرجع احضرلج ملابس اني
فتت مسحت جسمي شلون ما جان اف احس روحي صارلي سنة ما سبحانة الدم حت شعري لايحة معقول اني هلكد نزفت
تمددت بالبانيو فاضي وخليت شعري خارجة كحيلة غسلت شعري وطلعت دتحضر مكاني
كمت وكفت بالزور عدلت روحي شفت جسمي بالمراية اكو على صدري مكان زركة جبيرة كانما مال صدمات وبطني مفتوحة ومخيطة منضرها بشع
اجت كحيلة لبستني ملابسي وطلعت تمددت بفراشي غطوني وكعدو يمي
: تعالي مرهم حجيلي
مرهم: شحجيلج حبيبي نامي هسة
: كل الصار من وكعت واني مداحس بشي
: اووووف حبيبي غير كطعتي كلوبنا خليتينا ما نندل دربنا انتي وكعتي وبديتي تصيحين بادم امي كالت هاي مكانها راح تموت ع ما ودينج ع المستشفى انتي فاقدة وتنزفين الدكتورة انطتج ابرة حت تجيبين طبيعي ماتحمل جسمج غير انج خسرتي دم اضطرو يسولج ولادة قيصيرة بس خسرتي دم باليعلم الله وحاذق اتبرعلج ببطلين واخته ببطل
: شعرفة اني بالمستشفى؟
: خية منو ماعرف انتي بالمستشفى احتجنة احد يساعدنا ودزينا على كحيلة اجت والضاهر كايلة لاخوها واخوها كايل لصاحبه واخته خبرتها اجا تبرع وراح وكف برا ممنوع الدخول سودة عليا القلق بعينه وانتي حالتج صارت خطرة
: شصار بيا؟
: ياا غير كلبج وكف اثناء الولادة واستعملولج صدمات
: بربج
: والله كلبج وكف من طلعو بتج واحتارينا بيج احسبي حت البنت ما اهمينالها راحت وياها بيبيتها انتي ميلتي راسج كلنا ما تطلع منا ضلو يضربوج صدمات الى ان رجع النبض احنا نبضنا راح
: هههه طلعت مهمة عدكم هاا
: يااا غير تسوين الكل انتي
: احس مكانها فارغة
: اي خية طبعا هاي 7اشهر بطنج ليش شويا
: اريدها جيبوها الي
: اي حبيبي بعد من تطلع من الخدج تجي انتي اليوم ارتاحي اكلي ونامي دانرجع للمستشفى بعد حالتج مو مستقرة
: يااا خلوني هنا مااريد لعبت روحي من المستشفى والمعقمات
: يالله هسة تاكلين
اجت خالة خولة خطية مسويتلي معلاك اني مااجرعة بس كوة خلوني اكله
: ولكم ارحمو بحالي شبعت
كحيلة: حت تعوضين الدم الراح منج دادا
كملت اكل وخلوني وطلعو عود دنام
بقيت الافكار تتناطح براسي سلبت راحتي منظر حاذق وعبرته مديروحون من بالي
حاولت اتغاضى وماافكر بي كلت لروحي هاهيا صرتي ام اهتمي بروحج وببتج انسي كلشي بس كله بعرض الحايط وين يفيد شيقنع كلبي
تعبت من التفكير واستسلمت للنوم وقررت اعيش حياتي لبنتي وبس بالنسبة لحاذق رجعنا بس مو مثل ماجنا رجعنا اصدقاء وبس ولازم اخلي هالحدود بيناتنا
بشرى.
رجعت ورا ما تبرعت بالدم لبيت اهلي
ثاني يوم اجا حاذق الظهر بس يصفن يردم حيطان وعينه بالارض خفنا لايروح وهم صاراها شي
راح لغرفته ولحكته ركض دكيت الباب وفتت جان يباوع كدامة بالخالي ولام شفته
: ها خويا الكوة
هز راسة ماجاوبني
: خويا وهم شلونها؟
هم هز راسة ماينطي جواب
: حاذق احجي
حاذق: ولدت
جابت بنت حيل حلوة تشبها
: هااا حمدلله على سلامتها لعد
هز راسة ودنك اشرلي اطلع
اباوع بعيونه الحسرة تكتل يزفر من كل كلبة والدمعة واكفة بطارف عينه
ماهذ جان لازم يكون مصيركم
نزلت جوا راسلني مدحت ديجي ياخذني راسلته وكتله يجي
باركت لوهم برسالة ورحت اتحضر
وهم.
كعدت الصبح وجسمي مفلش غير الدم المالي الفرشة اش هل بهذلة هاي
صحت مرهم جت ساعدتني طبيت للحمام وراحت نزلت الفرشة والدوشك وخلتلي جدد
بدلت ملابسي وطلعت اريد بتي مايقبلون يجيبوها الي
: مرهم اشوكت اكدر اخذها عاد؟
مرهم: بعد اسبوعين حبيبي
: والله ما اريدها اني
: كل احنا نريدها بس لازم تبقى هاي الاجرائات عود اذا ماشافو بيها شي تطلع
: شنو ممكن يكون بيها؟
: ماادري بهل امور
: اهووووو
: كافي وهم كلها اسبوع اسبوعين وتطلع
: اكول مرهم
: ها
: اريد شال
: شال؟
: اي شال
بحلقت عيونها عليا مصدومة
: شنو شبيج؟
: تتحجبين؟
: اي قررت اتحجب
: الله منين طلعت الشمس اليوم وهم تتحجب شلون اجت ببااج هالفكرة؟
: حلمت بيها
: الله تعالي تعالي اشوف عليج الشالات
كالتها وخلت وطلعت انتضرتها دقايق جت جايبة 6شالات
: منيلج ذني؟
مرهم: مال اسيل تعالي خل اشوف اللفات عليج
كالتها وكعدت تجرب بوجهي اللفات الجديدة ماخلت موديل يعتب على وجهي واني اصلا مو يمها
ضليت ببيتنا ومحد من عيالي اجا ولا مر ولا سلم
اجو كرايبي يباركون بس من يشوفون سمارة ماموجودة يروحون
جنت اروح لبتي اخليلها حليب من صدري بممة يرضعوها هيا لمدة يومين بالثالث كالولي ممنوع اروح بعد استغربت شنو ممنوع جانت امي تبات وياها بالمستشفى اشوف اكو شي مخبيته عني
ورا اسبوع رجعت للدوام والدرس رحت بالحجاب كلمن شافني بالحجاب استغرب ضل صافن
باركولي زملائي على ولادتي والبعض نطوني هداية
رجعت لبيتنا وفتت مسحت جسمي
باوعت بالمرايا شفت جسمي متغير ضوجني ماجان هيج اكيد يتغير ع الحمل والولادة وكون ماراح احبل بعد لازم اصححة
نزلت على امي وكتلها اريد اسوي تجميل
امي: تجميل مال شنو يمة هسة؟
: يوم شوفي جسمي خربان
: بس وهم انتي يعني
: شبيج؟
: وهم زوجج بعد كبرة ما نشف
باوعت الها ورحت ميفيد
رحت ع دكتورة كالت لازم ننتضر مدة لي ماتنشف العملية هم مامتضرر جسمي لئن جبت ع السابع
ماقبلو ينطوني بتي ورا الاسبوعين اجلوها اسبوعين ثانية
مرت اسبوعين وصار وكت طلعتها من المستشفى
رحنا اني وامي ومرهم جنت طايرة من الفرح دشوفها واخيرا احط بتي بين ايدية واشوف تالي تعبي
وصلنا ونزلت متحمسة فتت ركض ع الردها دستلمها
كلت للمرضة وفاتت طلعتها لزمتها جانت تخبل هالكدوتها وريحتها حلوة ضليت ابوس بيها واحضنها
احجي وياها اكللها اني امج ممصدكة صرت ام وهاي قطعة مني
كالت لازم تعرفين شغلة بخصوص بتج
: اي كولي
: التقارير يم الدكتورة المسؤولة عن حالتها
استغربت باوعتلها بخوف وصدمة
: شنو مسؤول؟ شدتحجين؟
: اكو دكتورة مسؤولة عنها تعالي ادليج عليها
الخوف سيطر عليا شنو ديكون ببتي ياستار معقول بيها شي يخوف الخاطر الممرضة ماتقبل تحجي شبيها
اخذتنا ودلتنا على غرفة الدكتورة وراحت دخلنا اني وامي وسمارة سلمنا وكعدنا كبالها سلمنا
دكتورة: اول شي الحمدلله على سلامتج
: الله يسلمج دكتورة تسلمين
: مثل ما تعرفين انتي ولادتج صارت بالسابع وتعرفين الولادة بالسابع شنو مخاطرها للطفل احيانا ينولدون بنقص
: دكتورة دتخوفيني ممكن تحجين مباشرة
زفرت باسف وكالت الكلام الحطمني وخلاني افقد كل امل بكلبي لدرجة كلبي اذاني والخنكة صارت ببلعومي
لاتنسون التصويت⭐⭐⭐⭐⭐
اسراء العزاوي
💜💜💜💜