كلامها جان غريب كلش والله تخوف
شنو كبور شنو كلب نار شسالفة
هوا ع الكلب النار اني كلبي نار على هواي اشياء بس منو الكلبة ثلج
معقول حاذق الكلبة ثلج؟ على شنو دافكر بي اني هوا شكو بحياتي اصلا كلمن صار بمكان
يجوز كلب محمد الثلج هم ممكن لئن كدر يتفهمني
اضن بس مااتوقع اذا هوا رايدني اني صرت مااريدة جنت فرحانة لئن بعيد عني ومايتقربلي معقول لئن هسة راح يصير ينام وياي
هسة هاي شجابها بالسالفة وهم شبيج تخبلتي كمتي تلوخين وتحطين براسج
ضربت روحي راشدي وبيبي تباوعلي
صار الاكل فرغتلي بصحن وكعدت ع الكرسي اكل وهما قسم بغرفة الطعام وبيت خالي فرشو بالارض وياكلون
عمامي برا اصلا مااشوفهم بس بالمناسبات بس عمي ابو سيف اكثر شي اشوفه
اسيل واهلها عدنا بس نصدمت من اشوفها تتوسل بقيصر وهوا لابسها ماادري شجانت تحجي ويا بس تاركها وكل شويا يباوع الي ولمرهم ويرجع يدنك
كملنا غدا وصدك هسة صارت الهوسة كلها صارت تطفر هيج وهيج قسم شالن الاكل والماعين ودخلن ع المطبخ
اسيل طلعت فوك تبجي مدري شبيها واهلها وياها امها واختها
ماشالله هيا ماخذة مجال مال 4واختها نص نفر
مرهم جانت هرم تمكيجلها واو اول مرة اعرف هرم هيج مكياجها حلو
ضلينا لي تقريبا ال4احنا بالبيت طلعن عيلة خالي من المطبخ وتجهزن وبيت عمامي جاهزين بس نطلع والسيارات برا
تجهزن بيت الشيخ بسرعة وطلعنا كل عائلة بسيارتها
السيارات سادة الشارع بس خالي جاي ب7سيارات عمامي كلمن سيارة واحنا 3سيارات وسيارة خالتي وسيارة متيم واهل اسيل وسيارة هرم غير سيارة حيدر
ادم وامي بسيارتي راحو قيصر نسوانه ثنينهن بسيارة شفت اسيل رادت تكعد بالصدر عاط بيها وكعدت ورا وجيهان يمة
مرهم ويا عيالها وعمامي كلمن بسيارته
خالي تووزعو بين السيارات هما كثار ماشالله يعني 7سيارات وحشكة
اني صعدت بسيارة متيم وتوزعنا ع السيارات وطلعنا رحنا للقاعة
القاعة طابقين الفوك زلم والجوا نسوان دخلنا كلتنا دخلة وحدة للحفلة جانت اسراء وبيت عمتي هناك واهلهم من الموصل جاين كلهن محجبات بس اسراء مفرعة
دخل ادم بعد نصدمت من شفت عيلة كحيلة وعيلة نظر هناك
رحت سلمت عليهم مها سمنانة شكد صارلي ممحاجيتها بس غيداء بالعكس تعصعصت
سلمت ع الاهل كلهم وعلى ماما شموخ بعد هم جايا
دورت بعيوني بالمكان مها كالت
مها: ما اجو
: هممم
: مااجو بيت حاذق
: ها واني شعليا اجو لو لا بس ليش ماعزمهم؟
: ماادري بس ع الاكثر عزمهم هما ما اجو
غلست ورحت على اسراء وكالعادة هلهولتي صفارة انذار حطيت ايدي على حلكي وجريتها بنفس واحد طولت بي 45ثانية
ورحت يمها وصرت اغني
: عروستنا ماكو مثلها
وعريسنا حبها واخذها
اسراء: ولي فضحتينا اسكتي
: ولكم شبيجن ساكتات تعالن يمي
التمن كل بنات العشيرة حت بنات عيالي ماعدا استبرق محقونة وكاعدة جبت بنات عمامي الماشوفهم وميار حت امل شحطناها وكل كرايبي البنات اجن سوينا بيها دائرة
اني ويا ادم تكول ضلعة مو اخته
: يالله يابنات خل نغني شايف خير ومستاهلها
وهنا يغنن وراي وكملت الاغنية صوتي الاكثر بروز طبعا نسيت روحي حامل وكمت ادك بالكاع
: نتشكر من كال اخذوها نتشكر من عمها ابوها
والليله حنته وباحر يزفونة الليلة حنته وباجر يزفونة
والليلة حنته وباجر يزفونة الليلة حنته وباجر يزفونه
مبارك عرسك يالهيبة ومبارك عرسك يالهيبة
عرس الزين هيل وطش بالولاية عرس الزين هيل وكش بالولاية
هذ الحجي كلة واني اركص واهز وادبج بالكاع كطعت روحي
مرهم: ولج وهم كافي دبج مازينلج روحي كعدي
: شو دوخري شكو اروح اكعد ورجلي حيل دبجيلة اخوي معرس الليلة ورجلي حيل دبجيلة اخوي معرس الليلة
هرم: عود مرهم جايا تنصح وهيا اضرب ولو روحن اكعدن ميصير هيج تكمزن جن جهال
: والليلة عرس اخونا نلعب لعب خلونا
امل: والله عرفنا صوتكي حلو دروحي استريحي عمتكي ع تكنكن تقول قعدوها
: اي والله مااكعد اليوم
شغل الديجي واشتغل الركص والردح ماكعدت واني اهز كل شويا تجي وحدة تريد تجرني ومااخليها
بيت عيالي كل شويا جايتني وحدة تكول لايصير شي والبسها
بقيت بس اركص ميتة من الفرح مرات ادم يخزرني ارجع يخاف عليا بس ماديرلة بال واستمر بالركص
مرهم تركص شويا وتكعد ماتطول بس اني الحمدلله ماكعدت اصلا
اغاني رومنسية شغلولهم التصوير طبعا ممنوع بس منو يكدر يحجي وياي واني اخت ادم
خليت الحفلة كلها كحيلة تصور خطية هم ابتلت بيا لازمة سند بيد وفوني بيد
جانت تصوني وتصور ادم واسراء
كامو يركصون سوا اشوف نضراتهم هايمين ببعض ادم يباوعلها كانها انتصار اله او حلم وتحقق
وهيا جانت تبادلة النضرات وميتة بعيونة
جانو يهمسون لبعض ويضحكون وكل شويا بايسها لو حاضنها
اباوعلهم والفرح غامرني اخيرا تحقق حلم واحد بينا واخذ اليحبة بحفلة وعرس
باوعت لمرهم واني اضحك بس عيوني مغوركة شلون جان عرسها من حبيبها وشكد بقت ويا ولمن رجعتله رجعتله بسكوت بلاحفلة
باوعت لحالي شلون صفا بيا الوكت مرة لمحمد وهسة بالتحديد زاد الصراع عليا لئن محمد صدك يريدني مرة اله وحاذق وينه عني
ربي فدوة ساعدني شسالفة يجيني بلحضات ابد مو مناسبة شكد لحيت بتفكيري بي
صحيت من شرودي وكملنا الحفلة
صارت حيل حلوة مع الركص والهوسات والاغاني اسراء وادم ذبو لحم يابو اللحم
اول مرة اشوف ادم يركص هيج هوا بطبعه ثكيل وجامد مايتحرك بس اليوم تواكح كل ساع يشيلها ويفتر
اجا ديركص ويانا اني وخواتي وفعلا شغلو اغنية ع الخوة
من طفاها كال للديجي يشغل اغنية ع الخال باوعنالة ثلاثتنا وضحكنا
ادم: لا تتصافنن ركصن ركصن
كالها وشال سامر ابن هرم يركص بي ورجع لزم ايد مرهم فرها وردح وياها
اخير شي نزل الطفل واجا عليا ركص شويا بعدين لزم ايدي وباسها
كتله بصوت طفل عود بنتي الي دتحجي
: شنو جدو ما تركص ويا بت بنيتك؟
صار يركص وعينه ببطني اخير شي لزمها وباس
ادم: فدوة غديت لاثنينكم
صار وكت الحنة راح حناها والهلاهل والركص اشتغلن وهيا حنته
دخلو الزلم اسراء لبست البركع والباقي تحجبن من ضمنهم خواتي وامي بقينا بس اني واستبرق وكحيلة
اجت بنت عيالي انطتني شال اسود اخبي بي صدري وايديا لئن الفستان حيل مفتوح
طبو والركص اشتغل صارت الساحة بس للزلم كلنا كعدنا
جاين ضلوعة ومن ضمنهم كراشي ابو عيون البزونة هذ عاد البنات كلهن صارن يدحكن علي
بالطول والهيبة الشايلها يابو الهيبة ويركص ويا الضباط الباقين
باركولة والهوسات مالهم تجنن يابة الونسة ماكو هيج
شويا وكعدو الزلم صارت كامت النسوان مرة الخ تركص كلمن لزم مرته ويركص وياها
اجاني محمد كلي اني شوصيتج
: شوصيتني؟
: مو كتلج ديري بالج على بتي؟
: وانتي شسويت؟
: ذبيتي لحم للحمزة
: والله شو جنت تنتضر هذ عرس اخوي
باوعلي ماراضيلة
: دكعد اكعد
: لا بابا شنو اكعد شو كومي انتي ركصتي وركصتي ماخليتي احد يعتب عليج ضلت عليا
كالها وسحبني فتنا بنص القاعة كمنا نركص اني ويا
خلصت الحفلة تقريبا رحت كعدت ويا ربعي اهل شاهين واهل نظر وامي كاعدين سوا رحت عليهم
سوالفت وياهم ومها جانت تصور روحها باوعت للكامرة وياها وسويت بيدي هيج✌🏻 وطلعت بالصورة
باوعتلي وضحكت كالت تقبلين اصور وياج؟
: صوري بعد اخيتج هوا اني افتح لايفات والامة العربية كلها تشوفني
اخذت جم صورة وياها وغيداء هم صورت شويا
اني جنت حاطة الشال على كتافي بس ومخبية صدري
خلصت الحفلة وكلمن رجع لبيته بس متيم رجع ويانا خالتي اخذت قسم من بيت خالي وراحت لبيتها
وخواتي واخوتي هم اجو ويانا رجعنا ميتين تعب الا اني متكسرة رجليا بكد الدبج والدك بالكاع
كعدنا كلنا بالصالة اني ومتيم واسيل ومرهم نسولف
ادم راح لغرفته يرتاح تعب من الردح وقيصر راح ويا جيهان من جيت للان هوا مايجي
متيم: تعالو نلعب ببجي
اسيل: والله اخاف على مشاعركم
كحيلة: من شنو ؟
اسيل: ترا اني محترفة عندي ام فور الثلجي
: ديالله تعالي روم
متيم: شنو وهم تنزلين روم طبو للعبة خل اضحك عليجن شويا
دخلنا اني ويا واسيل وكحيلة نزلنا تيم اخذنا الاول 4مرات
اسيل: لو مااني والله فلا نطلع الاول
: دطيري اني اكثر وحدة محترفة بيكم ثلاثتكم متكدرولي
كحيلة: اني عن نفسي بوتة
متيم: نننن تكدرلنا ثلاثتنا تعالي روم ضدي
: انزل ضد ثلاثتكم والله وهم افوز
اسيل: ديالله وهم بس لا تضوجين عود مازين على بنتج
كالتها بستهزاء عود موكدها اني اي مو بعيني
عندي رومات كومة نزلت ضد اسيل وحدها وبعدين ضد متيم وبالمرتين فزت
استسلمو ونزلي ضدي ثنينهم بالخارطة نزلت وياهم بين ماالوت
اخذت خوش اسلحة ودرع وهجمت عليهم بالبيت الهما بي
ضليت الملم نيدات وكوكتيلات اكثر من العتاد
طبو بالبيت واني تارسة الجنطة قنابل وضليت اذبلهم مليت البيت قنابل صارو يطفرون من الشبابيك بس وكعت اسيل ومتيم يصيح
: ولج منيلج مساحة لكل هالقنابل؟
: اقلبلكم البيت قصف جوي اقسم بالله البس حزام ناسف واطب
اسيل بسرعة احتركت وتفنشت ومتيم طافر لغير بيت خلصت نيداتي
فتت للبيت الوته اشيل قنابل ورحت هجمت علي مرة الخ وتواجهنا
ضل دمي نقطة على لحضة واموت اخذت العلاج وبشيت لو قاتل لو مقتول اليوم متيم
الحمدلله عاد حاصرته ومات وفزت بالروم
عفت كلشي ورحت لغرفتي دنام عاد باجر الزفة هم لازم اتحضر واروح مرتاحة مو تعبانة
فكرت بكلام محمد لبارحة واني ادعي يغير رئية ويرجع مثل ماجان مااريد يتقربلي بعد
هم احترت بروحي ساعة اريدة وساعة ارفضة وساعة اكول هاي سنة الحياة ولازم اتعود ساعة ما اتقبله وحت اني احترت بحالي
ردت انام صارت بتي تخبط هوايا
: ولي ركدي اريد انام
مايفيد ضلت تخبط بكل بطني مرة تصعد مرة تنزل مرة تصير بصفحة جزعتني اخير شي ركدت فوك ببطني حسيتها تصير يم معدتي
نزعت الذهب الجنت لابسته بس بقيت باسوار ادم ولبست تراك النوم غسلت وجهي من المكياج ونمت
نمت وكعدت ع الهوسة الصبح قالبة الدنيا كلها تطافر ضليت بغرفتي لئن الحفلة للعصر فتت سبحت وطلعت سشورت شعري بين ما تخف الهوسة شويا
ضليت كاعدة اكلت حلويات وحليب بالغرفة حضرت فستاني والحذاء والاكسسوارات والعطر كلشي
نزلت ب12جوا ادم ماخذة محمد للحلاق رايحين تغدينا اني وخواتي وكحيلة رحنا للصالون بدن يشتغلن بينا قلبن جهراتنا قلاب
اليوم ماسويت تسريحة خليته مفلول بينما مرهم لبست شال
كملنا ورجعنا للبيت نبدل ملابسنا وتحضرنا وكلشي على اتم مايكون
نزلنا جوا والعيلة كلها اجت من كل صوب اتفقنا نروح ع بيت العروس بكل السيارات وكل العشيرة تسد الشارع بالسيارات هم قدر لاسراء هم فخر لادم
احنا كاعدين بالصالة واشتغلت الهلاهل اجا ادم من الحلاق هوا وزوجي
دخل للبيت واحنا نهلهلة وامي اطش علي جكليت ومتيم يكيتله
هرم لازمة سلة بيها نكث ورد تطش على راسة
باس راس امي وحضن هرم وسلم على متيم
سلم ع الكل والكل يباركلة ويهوسلة امبارك عرسك يالهيبة
دخل دناخذ صور ويا بالبيت قبل مايطلع وفعلا صورنا اجا حضني وباس ايدي بوسة طويلة رجع باس راسي وحضني
طلعت الزفة من بيتنا والسيارات ورا سيارة المزينة باحلا الورود والنقشات
طلعنا بنية فرح دنزف اخويا وحبيبي ادم
رحنا الدرب كلة الهوسات والاغاني والركص بالشارع اني صعدت ويا ادم ومحمد بسيارة العرس الي هيا سيارة محمد لئن كلة اني ازفك بسيارتي انت التهي بعروستك
وصلنا لبيت عمتي ونزل ادم واني اصورة شلون دخل للبيت وبيدة المسكة وصوت الهلاهل والاغاني وربعة يهوسون برا
عريس وربعة يزفونة عريس وربعة يزفونه
ويرجعون يركصون ويهوسون ولعبو لعب بنفسهم وهما مو قلال ضباط وجنود جايب فوج كامل ويا يمكن
دخل ادم لبيت عمتي انطا المسكة لاسراء وباس ايدها وراسها واخذ صور وياها وويا اهلها
جاب البركع لبسها ايا وغطا راسها لئن جانت مالابسة حجاب بس بدلتها محتشمة
طلعت برا قبلهم وشفت ربعة شمسوين برا شلون يكمزون ويغنولة
ولا عبالك هما ذولة الضباط الشفتهم قبل ذيج الهيبة وذاك الثكل هيج يكمزون ويطكون الاصباعة تكول شواذي بس جانو يخبلووووون
اجو صعدو بسيارة العرس صعد اسراء وهوا ضل يكمز ويا ربعة
اجا صعد يمها ومحمد راح يسوق ردت اصعد وياهم محمد كلي روحي لسيارة متيم
ماادري ليش بس جانت عيونة تكلي روحي ما افتهمت شكو
رحت كعدت ويا متيم وكحيلة لئن يسون واهس ويعلكوها
صعدت ورا ومتيم صار يتزابك ويا السيارات الا يصير قبل سيارة محمد
احنا نضحك علي شلون يركص ويطك اصباعة لو يطلع راسة من الشباج يهلهل ويطك اصباعة
من نكف بالاشارة ينزلون الزلم يعلكوها ومن ضمنهم محمد والسيارات هوايا تيهت علينا الحسبة ماكمنا نعرف هذول منو وذوك منو
اجت سيارة مضللة ومدرعة تمشي بسرعة كانها تريد تسبق سيارة محمد انتبهت انهم يريدون يصيرون كدامهم
كلبي لعب منهم بس لبالي هذول معزومين او خطار او ربعة ع الاقل وديسوله اجواء
صارت السيارة كدام سيارتهم واحنا يمهم
وكفنا بالاشارة وصار الشي الماجنت متوقعته
صارت عيني بعين ادم سلمت علي وضحكت هاي العوايد العراقية باوعلي وضحك بوجهي ورجع راسة على اسراء جانت متمددة بصدرة
نزلو 4 ملثمين من السيارة المدرعة وشايلين اسلحة سحبو قسام وضلو يضربون طلقات على السيارة الا خلصت الشواجير بيدهم
الصراخ ملى الشارع ملي كلها تحرب حت وتصرخ ماكمت اميز الاصوات متيم نزل كحيلة جوا وخباها هيا وسند يصرخ عليا انزل اني بعد ومو يمه اني
اباوعلهم من الشباج لادم واسراء بس جسمهم يتنافض من الطلقات التخترقة وتستقر بي بذات اسراء صار جسمها كبال جسمه لئن جانت بحضنة
مكدرت اتحرك او اسوي اي شي واني اشوف اخوي وابوي واكثر شخص حبيته بكل عيلتي ينقتل باجمل يوم بحياته ويوم فرحته ومناه والسيارة امتلت دم
اجا واحد من ذولة الملثمين بسرعة فتح باب ادم الي جان كبالي وسحبة من بدلة عرسة الجان مايقبل حت يقيسها يريد ينزف بيها جديدة
سحبة كبال عيني وذبة بالكاع وهوا يجر انفاسة الاخيرة طلع مسدس وضربة 3طلقات بصدرة
فقدت عن العالم كله بهل لحضات اني كلشي نسيت حت زوجي وبتي
من ضربة هالطلقات مات بكاعة حسبت وروحي طلعت من هول الموقف ادم جان اقرب شخص الي اكثر واحد احبة بعيلتي كلها
مو مجرد اخ او صديق جان اكثر حت من اب بالنسبة ليا حسيت روحة طلعت كبالي وفصلت عن العالم
نزلو الضباط من سياراتهم يرمون بحذر لئن سيارات عوائلنا موجودة بس كدرو ينهزمون ركبو سيارتهم وطارو بيها
حاولت بالالف ياويل افتح باب السيارة ايديا ماتعيني كمت اخبط بالقفل وملامحي متحجرة بس عيوني مغوركات ماشوف من الدمع
انفتح الباب وكدرت اطلع مااسمع اي شي اذاني مسدودة وراسي طايش بس هوا كبال عيوني
رحت علي مكوم بارضة ودمه مطشر بالارض اباوعلة بصدمة وماحس باي شي ماهتميت لملابسي المفضوحة ولا لبطني ولا لاي شي بس اريد اوصل يمة اريد اشوفة مفتح عيونه وكلبة ديدك
اريد اسمع نفسه ويلزم جف ايدي يكلي بنيتي لاتخافين مابيا شي
الدرب من السيارة لي يمة صار دهر ع الرغم انه اقل من مترتين
كعدت يم راسة ماتنعرفلة ملامح من الدم الي بي شلته وحطيته بحضني امسح بوجهه دموعي ينزلن على خدة
كمت احجي بلا وعاتي اريدة يكعد احاجي ببرود يعكس الحروب واللهيب الي بداخلي
: ادم
ادم اكعد راحو خويا هاهيا كوم يالله
اذا اذوك نكدر ناخذك لطبيب هاا يعالجك وترجعلهم ورا العرس تكتلهم كلهم يابة يالله كوم هسة
خويا الله عليك افتح عيونك الحلوات ذني يالله فدوة
كوم دنروح نزفك يالله ماضل شي ونوصل للقاعة كوم شوف اسراء لابسة البدلة هذ اليوم التتمنى انت من زمان ماجانت امنيتك تشوفها بالابيض هياتها لبسته الك يالله كوم
كلتها ورفعت عيني ع السيارة البابها مفتوح واسراء صارت كدامي
الفستان قالب احمر وجسمها كله مزرف حت البركع من فوك علي دم ومنتهية
باوعت شفت محمد مايل من كرسي السايق ع الكرسي الثاني
بهل لحضات اني مابعد اشوف من صدك ضرب عقلي
كحيلة.
ماصرت اسمع او اشوف شي حاضنة ابني ومختبية تحت الكشن لئن صوت الطلقات والصراخ غمر المكان بعدين سمعنة صوت 3طلقات صارن وصوت سيارة تحركت رفعت راسي شفت وهم تحاول تفتح باب السيارة
: ولج وهم شنو دتسوين اكعدي متيم راح تنزل
حاول يكعدها ماكو وياها مو يمنا فتحت الباب ونزلت
سند صار يصرخ واني ابجي الولاول البرا مالها والي مااعرف شنو ديصير برا بس صياح وصراخ وبجي والعالم تتراكض بالشارع
خطفني نظر واني اشوف وهم حاطة راس ادم بحضنها وتحجي وسيارة محمد صايرة غربال من الطلقات
صرت اصرخ بلا مااوعي من قوة المنضر يعني هذ الرمي كله جان على ادم
الضباط تركض بالشارع وسيارتين نزلت العوائل منها ولحكوهم جنود وضباط ووهم على كعدتها
: متيم شووووووف
اندار ونفجع من المنضر نزل ركض على وهم بعد ما اطمن مابينا شي
اجا حاول يشيلها عن الارض ويبعد ادم عن نظرها
جانت بحالة تصعب ع الكافر حاول وياها ماكدر فستانها مليان دم وهيا حاضنة راس اخوها ماتهدا صافنة بالخالي تكطع الكلب
اجو الجنود واحد منهم نزع سترتة وذبها على وهم لئن فستانها حيل مكشوف ونزل اكثر من جرت راس اخوها
كلنا نعرف شنو ادم بالنسبة لوهم وشكد تحبة وشايلتله معزة على طول تحجي بي وهسة بهل برود هذ كتلو كبال عينها
كدر متيم يشيلها من كباله وجابها حطها بالسيارة وقفل الباب
الجنود منعو اهله من انو يتقربون اباوع من بعيد خواته الثانيات وامه ملخو ارواحهم لدرجة ديانا اغمى عليها وشالنها
واحد من الموجودين دخل للسيارة طلع اسراء منها والثاني طلع محمد ثنينهم غايدين بس جسد
صرخت وهم من مكانها الجانت عبارة عن صخرة محترقة من الداخل صوت طالع من كلبها كفيل انو يموت حسرة وقهر
وهم: لااااااا عوفها لاتتكرب صوبها ادم مايقبل احد يلمسها ولك ادم هذ طخ اسراء كوملة كوملة انت ماتقبل احد يلمسها غيرك كووووووم
مااكدر اكللها تهدء او تسكت الموقف الي هيا بي مستحيل احد يتحملة اخوها وبمثابة ابوها مات كبال عينها اني بس حاضنة سند وابجي سادة اذاني عن صريخها اليكطع الكلب واني مابيدي شي اسوي يهدي كلبها
حاولت تطلع من السيارة ضلت ادك الباب والشباج وماكو متيم قافلة
على صريخها يصرخ سند واحاول اسكته هيا جانت فاصلة عن الدنيا مو ويانا اصلا
دقايق مرت واحنا مثل ما احنا وسعو الشارع واخذو العوائل
اهل ادم واسراء ملخو نفسهم ماخلو شي بالزور كدرو ياخذوهم
شافتهم شالو اسراء وادم الانتفت روحها بالصريخ
وهم: ولكم عوفو اخويااااااا
مو بعازة ينتجي عليكم هسة يمشي وحدة ولك ادم لاتخلي ايدك على جتف احد كوم لحيلك انت امشي كللهم مابيك شي
ادم انت ذراعي لا تصير لاتلويها ولك خوياااااااا
محد اصلا يسمعلها مشو السيارات كلهن وخلوهم بسيارات ثانية وراحو اجا متيم ديصعد من فتح السيارة نفتح بابها فتحتة ونزلت تركض تريد توصل لاخوها بس لحكها متيم وكدرت يلزمها وهيا تدفع بي وتملخ بيدي تريدة يعوفها
صراخها ونحيبها يكعدون الميت بكبرة
ضلت تصرخ بيد متيم وهوا يحاول يسكتها اشوفة حضن راسها وكعد بالشارع ملختة تملخ تريد تروح ع السيارة البيها ادم وهوا يسكتها
الا سكتت فرد سكتة ما طلعلها صوت بعد رخت حيل بيدة
شالها وجابها ودخلها بالسيارة من ورا اني معرف اذا جان الدم الي بملابسها من ادم لو هيا دتنزف لو شسالفة بالضبط مع ذالك عقلي مايرد يهتم لوضعها لئن الصار مو هين
حسيت قيود على كل جسمي مكدرت احجي او اتحرك بس لازمة سند
كدرت بعد هالشي الصار انو احجي اخير
: متيم
مارد عليا الدموع مغركة وجهه وكوة ديتنفس ويشهك كل شويا يباوع لوهم ويمسح دموعة
: متيم
متيم: هاا
: ماتو؟
كلتها وبعد وجهه عني عرفت انو ماطلع منهم احد
: وين رايحين؟
: دنرجع لبيت ديانا نوصل وهم
: وشنو حيسون بجثثهم؟
: ياخذوهم للمستشفى
كالها وشهك اكيد ادم مات هما مستهدفينة
: الله يعين كلوبهم الله يعين كلوبهم
كلتها وباوعت لوهم صايرة تتنفس من حلكها والدم مغرك ملابسها تون
وصلنا لبيت ديانا قالب ساحة حرب من الهوسة والخبصة ديانا منتهيا
عمتهم رغد ضلت تلطم وبتها مكابلتها وبنات ديانا يلطمن
دخل متيم شايل وهم بثنين ايدي وهيا منتهية بس النفس يصعد وينزل
طلعها لغرفتها وبقيت يمها الاجواء متوترة كلش ديانا ووهم منتهيات ومرهم وهرم بس يوزعن صفنات حقهن الصار مو شويا راحو للمستشفى كلهم
ضلينا ببيتهم دقايق وكعدت وهم كانها مو ويانة
من كعدت عدلت نفسها وحجت
وهم: ولي كحيلة ساعة شكثر؟
باوعتلها باستغراب هاي شدتحجي
نعدلت وباوعتلي ببرود
وهم: شكو تبجين ولج؟
: وهم شبيج؟
: لاتبجين كومي مسحي دموعج اليوم زفة ادم
باوعتلها بصدمة هاي شدتحجي باوعت لفستانها وكامت ركض
وهم: ولج كحيلة شنو هذ الدم؟ اني معقولة دانزف
كالتها وراحت ركض للحمام اني ما مفتهمة شسالفة معقولة تاثر عقلها يالله بس لا نجنت
دقايق وطلعت من الحمام وجها اصفر ومدمعة
وهم: هذ الدم مو مني لعد منين اجا؟
: وهم بيج شي؟
: شنو بيا شي الدم مو مني اني مداانزف ليش هيج؟
بقيت اباوعلها منصدمة يالله هاي هم ضربن يمها هوا الوكت عازة
باوعتلي والدموع تجمعت بعيونها بثواني كانو رجعت للواقع وحجت بغصة وخنكة
وهم: لاااا
: وهم
: خويا ولج كحيلة ادم
: وهم اخذو للمستشفى
: كبالي يولي كبالييييييي
فرغ الشاجور بكلبة كبالي اااخ يمةة كون بروحي ولا بيك خويا
كالتها ووكعت على ركبتها رحت ركض حضنتها ماذكرت بس اخوها لا زوجها ولا اسراء
وهم: 10سنوات خويا 10سنوات يحبها وبزواجهم جتلو
ياخويا نحرمت منك18سنة شكو تحرمني من طولك هسة بعد
دتعال الله يخليك تعال شوفني وجهك وانتضر بتي تجي ماجنت تتمنى تشوفها؟
: وهم كافي الله ارحم الراحمين كافي
دنحجي وطب متيم علينا باوعلها بكسرة وهيا منتيهة بين ايديا اجا حضنها وحط راسها بصدرة يفرك شعرها وهيا غادية جسد بلا روح
بعدين لزم وجها بثنين ايدي وابتسم بكسرة كللها كومي
وهم: تاخذني على ادم موو؟
حجتها كانما طفل ويريد ياخذ وعد
هزلها براسة وهوا يبتسم يعني اي كامت على حيلها بسرعة ولا بدلت ملابسها ولا عدلت شكلها
متيم كلي اروح وياهم حت اضل معاها بهل موقف
نزلنا ماكو احد بالبيت بس جيهان وسمر ودايبجون حطيت ابني عدهم وهم ما باوعتلهن طلعت ركض صعدت بالسيارة وصدنا وحرك متيم بسرعة
رحنا للمستشفى الدرب كله متيم يبجي بسكوت ويمسح دموعة وهيا فاصلة عن العالم لازمة بطنها وتحاجيها
وهم: ماما سمورة هسة احنا رايحين نشوف جدو وبابا خوش كافي تخبطين عاد ضوجتيني وراح نشوف العروسة بعد تشوفين عروسة جدو الحلوة
اني ادعي بكلبي بس لا نجنت لو صارلها شي ساعة تبحي وتتذكر الموقف ساعة تنسى
وصلنا المستشفى وهيا دخلت ركض كبالنا اني دخلت اركض وراها اريدها توكف ابد مو يمي ومتيم يسحل بروحه ورانا
شافت حيدر منتجي وديبجي حاط راسه بين ايدي راحتله تركض
وهم: ها حيدر وينهم؟
باوعلها بالم وهيا صارت تصرخ وتضربه
: حيدر وينهم داكلك؟ محد بيهم طلع لو شالقضية؟ زوجي واخويا ومرته وينهم؟
حيدر: مايدوم الا الله
: اسكتتتتتت شنو ميدوم الا الله لا مو معقولة اخوي وينه حيدر ادم وين؟
زاد بجين وهيا تضرب بي
: محد منهم طلع؟ محد منهم عاش لا الله يوفقك ولج كحيلة كليلة خل يحجي حجي معقول شنو هذ كلامه
ههه ولج ديكلي الثلاثة ماتو دتتخيلين يعني ادم ومحمد واسراء لا لا انت اكيد بيك شي
كالتها ودخلت ركض للصوت النحيب دخلت وراها
شفت عيالها يبجون وخواتها وقيصر حت لطم وجهه
شفت حاذق وشاهين ونظر واكفين هناك بعد واهل اسراء امها انتهت من اللطم والبجي
حاولت الزم وهم عن لا طيح جانت جعلها صخر تباوعلهم بملامح متجمدة ووجه شاحب
مشت وتركتني تريد اطب للغرفة الي بيها الجثث لزموها ما خلاها قيصر خفت يضربها وادم راح منو يفزعلها هسة بس صدمني بتصرفة
اول مرة اشوفة يتعامل وياها بحنية لزمها من ايديها وحط راسها بصدرة وصار يحجي ويبجي هيا ادفة تريد ادم
قيصر: وهم اتحملي خويا تحملي
وهم: شنو اتحمل قيصر وخر عني خل اشوف اخوي وزوجي جوا
قيصر: وهم استوعبي
وهم: شنو استوعب حاجو ادم خل يكعد اليوم زفته عيب من العالم ومحمد اذا ضاج ع السيارة انطي وحدة ثانية من عندي وهسة اسراء شلون خرب مكياجها ميخالف نعدللها هوا
: وهم خويا استغفري ربج شنو هالكلام
: شنو استوعب شنو استغفر رحو صيحوهم خل يكعدون
: وهممم
: شو دوخر انت مابيك كل فايدة هسة اني اكله يكعد هوا يحبني ويسمع كلامي هسة اكله اسراء تنتضرك ويكوم ركض
: ولكم تسودنت البت صيحو دكتور احد
: لا لا ماتسودنت والله شبيك دفوت احاجيهم بس
متيم: قيصر خلها تفوت تودعهم
وهم: شنو اودع منو بابا كل عقلك انت شو بس دوخرو دكلك وخرو
كالتها ودفعتهم ودخلت للغرفة دخلت وياها لئن كل الحضور ودعوهم بقت بس وهم
اول مادخلت الغرفة انصعقت وبقت جامدة بعدين تقدمت بخطوات متراجفة على اول سدية كشفتها وطلع زوجها
غمضت عيونها بحركة واضحة وهلت دموعها بغزارة
وهم: ها محمد انت ليش وياهم؟
محمد انت وعدتني ورا العرس راح نعيش مثل ما تمنينا صح لو لا؟ شوف عندي استعداد ارجع اكص شعري والله لا تزعل اسوي بالطول التحبة انت بس اكعد وحاجيني زين لاتكعد لخاطري كوم لخاطر بتك خطية شنو ذنبها تنحرم منك وهيا ماشايفتك؟
محمد مااكدر اني اصيرلها ام واب انت تعرفني ماادبرها كوم حت تدير بالك عليها اني ماادبرها
فدوة لعينك كوم والله احبك وبتك هم ما اخلي كلبها يشيل عليك مو هيج ردت انت مو كتلي لاتشيلين كلبها عليا من هسة
دنكت علي حضنته وصارت تبوسة توديع دموعها جمر يحركن بروحي
عافته وراحت على السدية الثانية كشفتها طلعت اسراء
شكلها يقشر له الابدان ببدلة العرس الصارتلها جفن ومليانة دم وحركة الشهادة بيدها مسويتها ومبتسمة دنكت وهم مسحت على وجناتها وباستها
وهم: ها ولي اسو اليوم ليلة الجنتي تنتضريها من قبل داعش لليوم شو نمتي من وكت دادا
لاميصير هيج انتي عروس كعدي دكتورة كعدي ماتلوكلج هالنومة تعااي اني وانتي نحاول نكعد ادم ها خلي نكعده نقنعه يكوم
ها اغراض العغوس الاشتريتيم ماستعملناهم بعد قومي ما هاكذ لهجتكي
ولج دكعدي خليتيني احجي مصلاوي واني مااعرف شلون ذليتيني كومي
الله يرحمج اختي انتي والله جنتي اختي الله يرحمج بس ليش تركتينا دكومي فدوة كومي وكفاتج وياي ممسويها احد فزعتج الي جنتي حنونة ياروحي
دنكت باست راسها
باوعت للسدية الاخيرة وشهكت نهارت تصرخ وهيا حاضنة اسراء
اني مكدرت احجي او اتصرف شي مكدر ابعدها او احاجيها لو اهديها
راحت ركض للسدية وكعدت بالارض وهيا تبجي ماكشفتها كامت وحضنته هو مغطى
وهم: ماكدر اشوفك مغمض ادم ماكدر والله ولك هاي سواية تسويها بيا خويا ليش تكطع بيا دكوووووم خويا على بختك كوم اذا قيصر راد يطكني منهو اليفزعلي غيرك خويا كووووووووم
كتلك انت عيني ادم كتلك انت عيني لا تنطفي لا تعميها انت مو كتلي اصيرلج ذراع وعين واكسر كلمن يجي صوبج كوم لا تلوي ذراعي داحاجيك خويا على بختاااااااااااك على بختك كوم مو راح صوتي كوم ولك خوياااااااا ليش تيتمني مرة الخ ليييييييش
هسة اطلع قيصر متعصب من صوتي ويضربني واني مااتحمل ايدة انت تدري بيا
كعد خذني وياك لا تتركني جوا ايدهم لا تخليني عدهم وحدي مالي سند غيرك ادااااااااااااام
شوف ادم شوف اسوار الجبته اني مانزعتة من سنة وقصور اني لابسته حلو بيدي لان منك
رايح بهل سرعة مليت مني خويا مو كتلي اضل كل عمري وياج واحميج منهم؟
اليوم زفتك خويا اليوم زفتك عود ردناها فرحة وهياتها عروستك بعد
بنت اصل ماعافتك بالدنيا ولا تتركك بالاخرة
كالتها وعضت شفتها التحتانية بوجع وصاحت صوت كسر كلبي عليها من صاحته كل البرا زاد بجيهم
: عرسكم بالجنة خوياااااااا
لاتنسون تصويت⭐⭐⭐⭐⭐
اسراء العزاوي
💜💜💜💜
اكو صدمة بالبارت الجاي اكيد كلكم حتنصدمون منها