حاذق يكول
عليك الف مبارك يالمشتريها
بسمو من كل كلبي
كون الله لايهنيك بيها
حاذق.
اليوم زواج وهم
جنت اعرف انها ماراح تسوي عرس او خطوبة مجرد راح تسافر وتستقر بالخارج وهالشي ضنيت انو حيخفف من معاناتي
اتوقعت انو من مااشوفها لابسة الابيض لغيري واسمع الهلاهل عليهم واشوف فرحتهم بيها ما انقهر توقعت اخذ الامر ببساطة مثل ما تزوجت اني هيا لها حق تتزوج وتشوف حياتها
ما توقعت الشي الراح اعيشة بهل يوم الموت اهون منه بمليون مرة
بذاك اليوم حت للشغل ما رحت كلت ابقى بلبيت بس مكدرت مااشوفها حاولت اقاوم شكثر ماكدرت
التفكير اكل من روحي اليوم البنت الربيتها بحضني تربات ايديا بدموع عيني كبرت تنام بحضن واحد ثاني داتعب بيها ما سهر وياها مايستاهلها والله مايستاهلها
جزعت روحي من الكعدة وجت ببالي فكرة انو اضل اراقبها مادام هاي اخر مرة اشوفها نظرة وداع اشبع روحي منها اعرف بشنو فرطت اشوف روحي بشنو ذاب نفسي
نزلت جان الكل نايم لئن ما نمت الليل كله واني افكر
ركبت سيارتي ورحت وكفت بعيد عن بيتهم شويا بس اكدر اباوع لباب بيتهم اتاملة شكد تمنيت تطلع من هااباب بالابيض ايدي بيدها
ضليت انتضر 10دقايق لبالي بالبداية طلعت كلت احرك شفتها طالعة من البيت شاردة نضراتها وصعدت بسيارة خصوصي اتوقعتها خط
حركت من يمي ولحكتها وصلت للجامعة دخلت وراها انتضرتها برا الى ان كملت امتحان وكلعت دمعة بطارف عينها
طلعت ونضراتها كلها شرود مو بلدنيا اصلا ما تشبه العرايس
شفت خطيبها واكف راحتله وبالدوب ابتسمت بوجهه عرفت رئيها وعرفت احساسها ذكرتني بزواجي من هيل
صعدت بسيارة وراحو لبيتهم هذ كله واني امشي وراها بالسيارة بلا ما تنتبه عليا شويا وسمعت هلاهل واغاني من بيتهم طالعة شكت كلبي وجانت سيارات واكفة هناك هاي عود حفلتها
ضليت النهار كله الحكها اباوعلها من بعيد والنار تاكل بيا انتبه لنضراتها الشاردة انتبه الحسرتها الكل شويا تسحبها شطولها انتبه لاحلامها الي صارت عيونها تابوتها وهذ كله بسببي
الى ما صار وكت طيارتها اني وياها من بعيد
شفتها مرجعة راسها لورا ياترا بشنو دتفكر بشنو دتحس شنو تتمنى هسة اكيد تفكر بيا وبرماد احلامنا هسة
الى ان جا زوجها طلعو بالطيارة واقلعت
باوعت للطيارة وكلت بروحي
الله وياج ياحسرتي الماحضيت بيها
هيا طارت منا اني النار شعلتني شعل منا تمنيت اموت تمنيت ادوسني سيارة ردت الله ياخذ روحي الجاي تطلع ع البطيء احس صدري تشرح
ايدي ما تاخذ على شي حت السواقة بالزور وصلت للبيت
اول ما طبيت صارت هيل كبالي للحضة ردت اطلع روحها بوكفتها كبالي وحركاتها ونضراتها ولبسها
وكفت كبالها ضلت تباوعلي بخوف لبالها اضربها
: ما اضيع وكت اكثر وياج من وراج ضاع عمري
خليتها وطلعت لغرفتي اطحن تمنيت الموت بذيج الليلة حسيت شي على صدري مكدرت اجر النفس اتخيلها ويا اتخيلها تحضنة تبوسة يواسيها يفرك شعرها ويشمة وينام وياها
فتت غسلت وجهي وباوعت بالمراية شفت حالي شلون صاير
هوا هذ اني
هيج صفيت هذ حالي اني الى متى هيج كلشي بيا ديعذبني حت نفسي اني سويت بروحي هيج ما استاهل رحمة
بقيت اباوع لروحي بالمراية اصفن بوجهي شفت وجها بالمراية مالي تخيلتها ردت ابوسها ردت اشمها ردت اخبيها عنه ماريد يلمسها مايستاهلها كدي والله مايستاهلها
راحت صورتها ورجع وجهي نهاريت ضربتها تفلشت بيدي روحي لايجة هسة وهم بحضنة راح تنام راح يلمسها يالله راح يلمسها راح يلعب بشعرها راح يبوسها
هم يحاجيها مثلي؟ هم يخاف عليها كدي هم يغطيه عن عيون الوادم مثل ماجنت اسوي؟
الماكدرت اسوي وياها راح يسوي هوا راح يتهنى بيها اني الصبرت عليها اني التمنيتها ردتها حلمت بيها كل عمري وضلت بنفسي
وهم.
من اقلعت الطيارة محمد نام وتركني وللان هوا منطيني ضهره تكول ماخذني غصب عنه
وصلنا لتركيا دنيا صايرة ليل بس ماادري ساعة شكد بالضبط ولا اهتميت اصلا
ردت اكعد محمد عود دننزل بس لمسته رد عليا طلع كاعد
: محمد
محمد: هممم
: كون دننزل وصلنا تركيا
: نزلي انتي لاحكج
كالها بصوت مخنوك كانو جان ديبجي
ثاري طلع مو نايم لعد جم ساعة بالطيارة وانت غالق عيونك بالقماشة شجنت تحس يالله هيا بقت عليك
نزلت كعدت بالكافتريا فتحت نت منها وراسلت اختي كتلها احنا بتركيا وسديت
اجاني محمد كعد كبالي كلي جوعانة اشرتله لا سكت
يالله هذ تحسة مجبور اكثر مني مع الوقت بديت اتنرفز من تصرفاته صح ما احبه وزواجتنا صارت ردة فعل لحاذق وهيل بس مو هيج يعاملني ما بينتله
محمد: نسيت اخلي احد ينضف البيت
: يعني هسة نروح نلكة البيت مليان تربة؟
: لا هسة اخبرهم ينضفونة غير تدخل العروس ع البيت دايلمع
ابتسمت ودنك ما رديت كمت العب بتلفوني وهوا اتصل الى ما خلص البريك ورجعنا للطيارة
هم سوا نفس الحركة حط القماش على عينة ونام لبسته يالله بكيفك
محمد: وهم
: هممم
: شنو حساسج هسة؟
: هاا
: احساسج شنو؟
: من اي ناحية يعني؟
: انج زوجتي واليوم عرسنا
: احساس اي عروس بهل يوم عادي
: اممم هم خايفة؟
: على شنو اخاف
: ترا تكدرين تاخذين وقتج باي شي تحبينه
: خل نصل اسبانيا والله كريم
: اي
: اي
: وحاذق؟
باوعتله مصدومة عليش فتح سيرته ورديتله واني ارجف
: ش شبي؟
: شنو احساسج لئن ما تزوجتي؟
: سد السالفة محمد
: لا كولي عادي
: مااريد نحجي بيها
: ماشي
كالها ونطاني ضهره تحسرت وباوعت للشباك وعيوني غوركن رغم كل السوا بيا كلبي ما يقبل يحقد
كمت اغني بيني وبين روحي حت لا يسمعني محمد
بعدتني عنة الدنيا
بس هوا باقي بكلبي
منطي وعد لعيونه
للموت يبقى حبيبي
ياذكرة اني انساها
وياما عشت وياها
بس الزمن سواها اتعب واضيع تعبي
زفرت دخان النار الجانت موقدة بصدر وغمضت عيوني ما اريد افكر
كحيلة.
من يوم المشكلة ويا استبرق متيم قاطع اهله كلهم رغم هالشي راحة النا بس ما رضيت
احنا باجر بعدة يصير عدنا اطفال هم يقاطعونا مثل ما عملنا احنا باهله
حاولت ويا شكثر يصالحهم ما قبل ولا يقبل يكلي شحجا وياهم اني هم جزعت منه بعد ما احجي
ما حضرت زواج وهم لئن ما راح اتحمل اشوف نضرتها اني متاكدة شلون راح تكون
راح اشوف خيبتها وحلمها المكسور بعيونها فغلست بحجة مريضة وحملي صعب وكذا
صح حزت بنفسي بس شسوي احسن ما اشوف وضعها هيج وهم نعزمت على زواج بشرى شنو جم حفلة احضر واني حامل مو مال هيج تعب
جنت كل ما افتح موضوع جودي ويا متيم يسدة بحيله ميفهمني
مرهم اتصلت كالت اختها وصلت تركيا كعدت ابجي عليها
معقولة صديقة عمري هيج تروح لا اخذت التحبه ولا راح تعيش عدل اني متاكدة ولا راح تحضر ولادتي
وهم.
كعدت ع صوت النداء الطيارة تريد تنزل وكذا
باوعت الدنيا صبح مدري شكد بالضبط هبطنا ونزلنا من الطيارة راح يختم الباسبورتات مدري شيسوي رحت ويا من كملنا رحت للمغاسل غسلت وجهي وايديا استعملت التواليت وطلعت حطيت تينت بسيط ع المراية
انتبهت اكو اكو بعض السكان عنصرين ع العرب وبحكم اني سافرة ما عرفوني عربية
شفت تهجم وسب ع المحجبات والعرب كافة لئن وحدة اجنبية رادت تستعمل التواليت جان مشغول وطلعت منه وحدة محجبة واستلموها الاسبانيات
الي تكللها ارجعو لبلدكم صرتو كثار وناس تكول ببلدنا ماعدكم حق حت في قضاء حاجتكم
وناس تفشر وناس تهدي الوضع والعربيات مالهن حق يحجن لئن وببساطة هذ مو بلدهم واي اساءة محسوبة عليهم
بالعامية يحسبوهن نزل ويدبج ع السطح
تدخلت وحجيت مع البنت الرادت تدخل للحمام حت تفض شويا وبحكم عروبتي ما اكدر اتفرج واسكت حجيت بلغتهم
: عفوا حضرتك عملتي كل هذه الجلبة لاجل الحمام وهوا خالي الان تفضلي ادخلي
باوعتلي وبحكم شكلي ولبسي حسبتني اجنبية وكالت
: هذه النماذج صارت كثيرة في بلدنا ماتشوفين هذ يسلبون منا ابسط حقوقنا
: التواليت حق الجميع يا انسة ولا يمكنك محاسبتها عليه وفوق هذ هيا هنا بمعرفة وموافقة حكومة بلدكم مااجت تهريب او بالاكراه عدها باسبورد وفيزة ويمكنها مقاضتك
: لا ماتكدر تسوي شي انها ارهابية
: مو ارهابية
: جميع العرب ارهاب
: انا عربية ومسلمة ولست بما وصفتينا توا ان كانت محجبة فدينها امر بذالك وانتي ليس لديك ادنى حق في محاسبتها على الحجاب وتفضلي بدخول الحمام قبل ان انسى اني على ارضكم
كلتها وباوعتلي من فوك لي جوا ما راضيلها المرة تشكرت مني وطلعنا
رحت لمحمد ابتسملي ورجعنا لبيته هاي اول مرة اروحله البيت متواضع غرفتين وصالة ومطبخ وطابق الثاني غرفة وصحيات طبيت رحت لغرفة النوم جانت عادية صح مال نفرين بس ما حسيتها هيج
فتحت الكنتور اتفاجئت بي بس ملابس رجاليات شنو ممطلعلي شي؟
: محمددد
محمد: ها وهم
: وين ملابسي شنو ما جهزتلي شي؟
: ها مو ما اعرف قياسج كلت اجيبج وانتي اختاري
: وهسة شلبس؟
: ما جبتي ملابس من بيتكم البسي تراك
: واني العروس عود البس تراك؟
: مشي نروح للسوك
: مااريد تعبانة
: وهم
: كلت تعبانة روح عني
كلتها بنتر باوعلي وراح والله خوش جايبني من العراق لهنا معبرني جم دولة ديكلي انتي اختاريلج والله يالله
سديت الباب قوي ورحت طلعتلي تراك من جنطتي هيا مبينة الزواجة من اولها
فتت سبحت وطلعت لبسته ورفعت شعري كباية ولبست المنشفة علي
رحت على محمد حاط ايدة على عيونة نايم ما جايتني النومة هو هذ حضي بالزلم اختيارتي كلهن غلط
: اهووووو
محمد: شبيج؟
فزيت مستغربة
: يا انت مو نايم؟
: لا
: اي احم شسمة
: شبيج بابا؟
مديتله فوني كتله كنكنلي
اخذة من ايدي ورجعة كلي افتحي فتحته وانطيته هوا جنت تعبانة من السفر مبين عليا اتثاوب سوالي مجال ومد ايدة اشرلي عليها
رحت تمددت على ايدة وغمضت عيوني احاول اتقبل الامر واتعايش مع اني صرت زوجة هالشخص
فعلا غفيت وكعدت المغرب شبعانة نوم ما اعرف شسوي الشغل خلصان وحت اذا اكو شغل اني ما ادبرة
نزلت جوا جان زوجي دايسبح وطلع باوعنا بوجه بعض كلشي محجينا
اشرلي ع التلفزيون كتله اي شغلنا فلم وكعدنا نباوع سوا شلون دخلة تخبل
كمل الفلم واحنا ما فاتحين اي سالفة بس صوت التلفزيون وانفاسنا
كمل الفلم سدة وكلي داطلب عشا شنو اطلبلج
: ما اريد
محمد: لا اشلون يصير انتي عروسا تضلين بلا اكل
: اطلبلي نفسك
: اي ادللي
طلب الاكل واكلنا وطلعنا على غرفة النوم تمدد واني بقيت واكفة شال ايدة باوعلي اشرلي اجي انام على ايدة
: اذا تتضايق انام بغرفة ثانية
: لا تعالي وين اتضايق غير مرتي
رحت تمددت على ايدة مرة الخ ما حجيت بس كمت ازفر كلي
محمد: وهم اليوم تعبانين جينا من سفر عود باجر
: هوا شني؟
: انو اخذج يعني
فزيت وباوعتله بغضب
: هاي شبيك؟
: اعرف بشنو دتفكرين بس انطيني فرصة كم يوم
: محمد ما افكر بهل شي اني ماشي اني بعد مو مستعدة لهل شغلة بعد
كلتها وكمت من يمة نزلت جوا كلت انام بالصالة دقايق ونزل لحكني صالحني طلعني فوك نيمني يمة ونام
مشا اليوم طبيعي وممل لدرجة اسبوع احنا نفس الفلم اكبر شي يصير بيناتنا ابتسامة بين بعض
حت كلمة غزل ما بينا نصيح بعض باسمائنا انام بالليل على ايدة اكعد الصبح ماالكه طالع
مااخذني ولا متقبلني اصلا
باليوم الثامن على زواجنا كلي خل نطلع وفعلا لبست وتكشخت لئن جزعت من كعدت البيت
رحنا لاسواق بالبداية ونسيت فرق الاسعار كل ما اريد اشتري اباوع للسعر واصفن بالعراق بوين ارخص
رغم هالشي اخذت حتياجات البيت فواكه وكذا واني اصلا مااعرف اطبخ
كملنا رحنا نفتر بالسيارة ورجعنا للبيت
نمنا نفس نومتنا المعتادة يربي شهل حالة مو عروس اني لو هوا مو رجال لو شسوي
صح هالشي جان مريحني اكثر مااريدة بس هم احس بنقص وقلة ثقة
ثاني يوم كعدنا شفت مابيها مجال بعد شنو نضل هيج ناس نافرة من ناس لازم الكي حل ولو ادوس على روحي خل ابادر حت اطلع من سجن الماضي
مو قصة انو اريدة يتقربلي بس هم اريد احس حالي حال هالبنات وانو اني هسة عروس وللان ما دخل عليا هم هاي اول خطوة لازم اسويها
طبيت للحمام اشوف جسمي شناقصة وحاولت اتذكر زوجي شيحب
الوشم خف لونة اول شي ثاني شي يحب الشعر الكصير وتقليم الاضافر يالله كله سهل
نزلت علي اضحك هالمرة تغير للجو الكئيب العايشين بي تكول اخوة استغفر الله زا
كلي ديطلب اكل كتلة اني اطبخ انصدم باوعلي بعيون مفتوحة
: شبيك حبيبي؟
هاي اول كلمة غزل صارت بينا من خطوبتنا لهسة صارت صدمته اكبر
: وين رحت؟
محمد: انتي تطبخين؟
: اي
: انتي تطبخين؟
: اي اي شبيك؟
: بيج شي؟
: يو محمد
: هههههههه مستغرب شويا بس
: من شنو؟
: مو الاعرفة انتي يعني مادبرين هيج شي
: اطلع بيوتيوب
: خوش شجيبلج لعد؟
: هاا
: هاك استلم
: لا لا شوف هسة اطلع اطلع طبخة من النت وادزك على غراضها ماشي
: ناطرج
طفرت للغرفة فتحت يوتيوب واكعد ادور على طبخات شفت يمكن عشر فيديوهات ما عجبني وهم بيها زيت كومة واني اخاف احترك
ضربت روحي راشدي كافي عاد عمرج 21 بلا دلع
ثبتت على طبخة عدت الفيديو هواي حت احفظ نزلت لكيته رايح وراجع من السوك الحمدلله يعني
جايب السوك كله بهارات على مود على خضار وفواكه
: يا لليش كل هذ؟
محمد: غير مرتي صارت ام بيت هيا الراح تطبخ
: هوا اليوم بس دسوي تيست
: ماكو بعد تيست الطبخ عليج
: اني صوجي فطنتك
: يالله كافي عروس اخذت اجازة اسبوع انزلي للكرب عاد
فتت للمطبخ حضرت الاشياء التنراد للطبخة وكعدت اطبخ واني ثولة بهل امور امي بحياتها ممدخلتني مطبخ انوب خالة خولة جت صفح
الى ما كملت الطبخة المطبخ منفجرة بي قنبلة وعلوة طلعت نفس الصورة
صح طيبة صارت بس شكلها ميشهي محمد ياكل ويضحك
محمد: ماجوع بعد مرتي توكلني
: لا تحشش عليا زين مني ضبطت اكلة
: اي والله واني ممنون منج بعد بلاج اموت من الجوع
: اي منو الك غير مرتك
باوعلي ورجع كمل اكله اني اكلت بسرعة رحت سبحت ملابسي صارت ريحتهن بصل وثوم
كملت وسشورت شعري لبست نص ردن وبنطرون كابوي
ونزلت علي كتله ياخذني للصالون ما عارض وداني
بالطريق صار بيا فضول كتله يفتحلي فونة دكلب بي فعلا فتح ونطاني ايا
ضليت اكلب انتبهت حاط صور كومة لممثلة اسبانيا
: يا تحب طوكيو؟
محمد: منو ميحب طوكيو؟
: فعلا هيا تنحب
: شايفة هذ المسلسل؟
: طبعا
شتحب بيها؟
: شعرها
باوعت شهرها كيرلي وكدلتها حيل كصيرة هاي اذا اكص شعري هيج اطلع عتوي ماسبحان
سديته ورجعته اله
وصلت للبيوتي سنتر نطاني كرته وراح
دخلت ماكو ولا عربية الحمدلله يعني مغتربة كلت امشي ويا المي وكلهن شعرهن بوي ولابسات فانيلات رجالي تكول
هنا اصلا جعليهن زلم ماعدهم معالم انوثة لو ما الصوت والمسكارة اتيهن
اول شي رحت ع الوشم كالت ماعدنا او بالجهة المقابلة رحت حجزت لئن سرة لازمين ورجعت عليهن
خليتهن يقلمن اضافري بس باوعت بالمراية لشعري الواصل ركبتي استحيفته
لزمتة وجبته من كدام واعدل بي الماكيرة ضلت واكفة وراي كالت تريدين شي معين لشعرج
باوعت لشعرها جان فرد مرة بوي على شويا ويصير نمرة4
: اريد اكصة
ماكيرا: عادي الى اي طول
: اشرتلها الي يم كتافي راحت فتحت فوني نزل ستوريات
: هلو يالربع شوفو سافرت الحمدلله وتم زواجي اني هسة بالبيوتي سنتر داعدل جهرتي التدمرت من السفر سويت اضافري وهسة دطلع اعدل الوشم برا
وها هسة اصدمة الجبيرة لكل متابعيني
بس بلا مسبة المسبة حرام ماشي هههههه شوفو السربرايس بالفيديو الثاني
سديته واجت الماكيرا مشطته كبل غمضت عيوني كالت اذا تحبين وثقي هاللحضة فتحت التصوير وكمت اصور رياكشني الي اني نفسي استغربت منه
من حطت المكص على شعري وكصته بلا وعي نزلت دموعي وشهكت
ما اهتمت ضلت تكص واني ابجي مخبية وجهي سوته الى يم كتفي وخلته بطول كدلتي
ضلت تعدل بي للامانة شغلها حيل حلو
باوعت على روحي بالمراية اقترحت عليا اصبغة ووافقت سوتلي واهس
قلبت كدلتي ع الجهة وصبغتها سموكي وباقي شعري بس فتحت لونة شويا وخصل لونهن سموكي
اني خلصتها بس بجي تكول بماتم
غسلن شعري وسشورته طلع يهبلللللللل وشعري الانكص رادنة يسو باروكه
حاسبتهن ورحت للوشم لزمتني بنت عمقت الوردة وزلت الفراشة هاهيا ماريدها
ووشمت بفخذي وردة جبيرة تصير من الركبة لي فوك
فتحت سناب وصورت شعري شلون صار ونشرته ستوري
كتلهم هذ هدية لزوجي لئن يحب الشعر الكصير
اني اعرف محمد ميفتح انستا هواي بس للبثوث والمراسلة مستحيل يفتح ستوري اطمنت انو شعري راح يصير مفاجئة
اتصلت علي ديجيني وفعلا اجا
اول ما دخلت جانت عينه بالتلفون كلي عفوا حضرتج متوهمة
: همم
باوعلي ونصدم فتح عيونة ضل مبحلق بيا بصدمة
: احمم شبيك
محمد: وهم؟
: محمد
: وهم هاي باروكة لو شنو؟
: لا حبي
: كصيتي شعرج؟
: شنو ما عجبك؟ مو انت جنت تكلي احب الشعر الكصير؟
ضرب روحة راشدي وكال اخ الله
: شكو؟
: طالعة صدك كاجو
: صدك؟
: تخبلين شو كفي خل اشوف زين
شهل حلا شهل الكياتة شهل جمال فدوة رحت
: اسم الله عليك
: ولج مدا اصدك هاي انتي صدك والله
: يوووو محمد ترا اخجل
: فديت اختياري الصح
ما رديت دنكت بخجل
محمد: اشلون انطاج كلبج؟
: شلون؟
: اشلون انطاج كلبج تكصين ذاك الشعر؟
: مو انت رجلي حبيبي؟ انت كتلي تحب الشعر الكصير وماكو شي يغلة عليك حت شعري
: اويلييييييي
بوخت من المستحى يالله اني شورطني وسويت هيج
رجعت للبيت الدرب كله يباوعلي ويضحك
وصلنا ناوشني علاليك
:شني ذولة؟
: تراكات الج اسف والله مكدرت اجيب وكت الخطوبة جهاز ماعرفت قياسج كم يوم واجيبلج الباقين على ذوقج بابا
نزلت بوجهي للغرفتي لبست تراك شويا جان عريض بس ميخالف
ضليت للمغرب عصفير بطني زقزقت نزلت جوا طلعت طبخة من النت ووكفت بالمطبخ اكطع بالخضراوات ومحمد متكتف بالباب يباوعلي ويبتسم
: ترا والله بوخت خجل محمد ميصير هيجي
محمد: عليش تخجلين مشمشة؟
: اييي انت واكف تباوعلي وتضحك اي والله اخجل احس روحي ثولة
: لا لا مو ثولة تخبلين بذات هسة من كصيتي شعرج طلعتي تطكين بالكاع
: صدك يلوكلي؟
: انتي وجهج كلشي يلوكله لايكلج اكيد هم انتي كلشي تسوينه حلو عليج
ما رديت علي بس متت خجل يولي مدري توتر هاي شمالج اركدي خوب اول مرة احد يتغزل بيج
راح وعافني جريت نفس براحة كملت الاكل وقدمته
هم منضرة كلش ايع بس طعمة طيب هوا هذ هم حضي
ياكل ويباوعلي ويضحك
: بس لو اعرف المن كل هالضحك
محمد: على طبخج
: شبي
: طيب والله بس شكلة يضحك
: اهووووو
: اكلي اكلي
كملنا اكل لميت الصحون ع المطبخ دغسلهن كلي روحي اني اغسل
: ميصير وي
محمد: روحي اني اغسل
عفته غسلت ايدي وصعدت لغرفتي متوترة وتفكيري ينطح روحه هسة اني شسوي ابادر واتقرب منه لو انتضرة
وهم خلي ناسيج احسن لاتفطنين على روحج تعرفين ماراح تدبريها انتي ماتحبي
لايثولة شدتحجين انتي لازم تكملين حياتج يجوز هوا يخجل منج واذا ضليتو هيج ما تكملون
هوا ماملمح لشي بس كل اسمة رجال يعني
حاذق بالحرام ما قاوم روحه تريدين محمد العايش بنص الاجانب والحرام يقاوم احسن ما يروح لغير طريق تحملي
نزعت تراكي ولبست بدلة بيضة تحضرتله عود وفرشت سنيناتي
خليت مكياج عادي وتعطرت وبقيت كاعدة انتضرة يكمل مواعين ويجي
شحلاتها زلمة يغسل المواعين وهوا عريس جديد والله يالله
ضليت احوص بالغرفة عدلت السرير وطفيت الضوا شغلت ضو احمر عود اجواء وقذا
حسيت باب الغرفة انفتح كعدت ع التخت انتضرة دخل وشافني فتح عيونة على وسعهن
صار صمت رهيب بهل لحضة اثنينا ما حجينا شي هوا يباوعلي بصدمة واني بتوتر وخوف واضل ابلع بريكي
بلعت ريكي وكفت
: احمممم
محمد: وهم؟
: محمد اني احممم يعني شسمة
تقرب مني بخطوات بطيئة بعدها نضرة الصدمة بعيونة صرت ارجع لورا من وصلت تاج السرير وهوا وصلي تقرب وجهه من وجهي غمضت عيوني ونفسي يرجف
باس الشفة العلويا بهدوء بعدين اخذ شفافي ثنينهن
تذكرت حاذق للحضة بس بعدت افكار السلبية عن راسي اني صرت متزوجة ميصير اخون زوجي لو بمجرد تفكير افتح عيني اتخيل حاذق موجود واغمضهن مااريد افكر بي
بديت اتجاوب ويا نزل على ركبتي يبوسها ويطبع على صدراي قبلات متعددة
صار يتجرء بلمساته وحالي من حال اي بنت ادفعه على مهلي نزعني الروب وباس كتفي ورجع يبوس ركبتي
دقايق ورفع راسة باوعلي بصدمة مدري شلون افسر نضراته باوعلي كلي
نفر مني ذيج النفرة ما انساها طول عمري كام بسرعة مسح وجهه وطلع من الغرفة بدون ما يحجي ولا شي
فكرت اني ممسويا شي غلط معقول ضاج من شي لو شسالفة توني بديت اتجاوب ويا
شويا وسمعت صوت السيارة طلعت من البلكونة ركض شفته راح باوعت شلون طلع وخلاني هيج وبهل وقت يالله
امداج وهم امدا حضج وعمت عينج بهيج قسمة كشرة سودة مثل حضج
هوا انتي بشنو فلح حضج مالت حرامات شعري نكص لخاطرك ما تستاهل شعرة وحدة
غميت روحي الف مرة وفتت للغرفة متعصبة اضرب الاغراض الصارت كدامي الميز والسرير والكنتور انهاريت
ضربت الميز دفرة اجت الضربة بضفري متت وجع كمت اكمز هيا ناقصتك لئن
خدر شويا وشلت تراكي نزلت جوا ادردم فتت للحمام غسلت حلكي بعصبية ومسحت المكياج نزعت القميص ضليت اتل بي الا تمزك ولبست التراك
شعري حاولت ارفعة ما نرفع نعل ابوك انت بعد
صفنت شعري ماله ذنب عليش اسبه لخاطر الافندي نعل ابو هوا
حبيبي فرطت بيك من غبائي والله توبة بعد اخلي عليك مكص وراح استعمل احسن المنتجات وارجعك مثل ما جنت واحسن
غبية كصيتي شعرج لخاطر واحد مامعبرج ماادري ليش تزوجني يمكن ديرد الضربة لهيل ع السوتة بيا اشتعلت انشالله قلبت بيك السيارة ولا لكولك جثة
لا لا مو معقولة شهل حالة ياربي ما خليت بدربي زلمة عدل
واحد يضل يهدد ادوس ركبتج وافصم راسج واكسر رجلج جعلك بسبع جن
والثاني ماادري عليمن محسوب انس لو جن ربي لا تحير عبادك يالله
رجعت للغرفة واني داخلي متحطم وموقودة بي نار غضب وحزن من القهر كلبي صاير ثكيل عليا كمت افركه
اش هل خطوة الغبية السويتها السويتها شلون نزلت روحي وتماديت الهل درجة امداني اني بعد غبية غبرة
نفر مني جعليني شيطان الحيوان الارعن خلف الله عليا رضيت بيك بواحد اجكم ماكدر البس كعب بصفة
بقيت كاعدة انتضرة بلكت يرد ويبرر الشي الصار على نار روحي راحت وماكو ساعة صارت ب2 ماكو صارت4ماكو شفت مابيها مجال بعد استسلمت للنوم واني كلي خيبة
كعدت ثاني يوم صايرة بال10 ماجاي يالله زوج جيس حب
كمت غسلت وجهي وسناني
خليت ملابس المو نضيفات بالغسالة ومسحت البيت رجعت العب رياضة وادرب لكيت عندة كيس ملاكمة علكته وكعدت اتدرب بي ع الكراتيه
بشنو اطلع حركة كلبي اخ لو هيل هنا جان علكتها بدال هذ الكيس
صارت ساعة ب11 ماكو محمد كلت اتصل علي وتراجعت مالازم كل مرة اني انطي خطوة
نزلت جوا خل اسوي شي اكله او لا والله خل ادزلي اوردر شنو اضل اسوي لخاطرة اشياء بكثر ما يستاهل ومهتم بيا
رحت اتاكد من فلوس العندي كون تكفي الحمدلله تارك هواي اتصلت بالمطعم وطلبت وانت اضرب راسك بكل حيطان البيت عود مشكلتك
انتضرت ثلث ساعة هيج اجا الاوردر اخذته ودفعت حسابة وفتت خليتة بالصينية وكعدت اكل واباوع افلام كرتون بمبايلي وخل تحترك الدنيا شعليا
اتصل بيا متيم يالله مشتاكتله يطلعني من المود شويا
متيم: ها باربي العروس شلونج
: ها ولك مشتاقين
: اليشتاك يتصل
: وانت ما تتصل؟
: اني مو مشتاك
:نذل
: اول شي اني اكبر منج ثاني شي اني مرتي حامل وطبت بشهرها
: وانت شعليك بالله خمو انت الراح تجيبها؟
: لسانج
: ما كلت شي جذب
: وين رجلج؟
: دايح
: وتاركج وحدج ببلد ما تعرفين بي احد؟
: شسوي بعد
: يالله كلشي قسمة
: شكو ماكو
: ماكو شموسة ببيت خالتي العزيزة اليوم رايحين نزورها
: عود اشكد مشتاكلها هسة تتفل بحلك مرتك حت تولد بسرعة
: ليش زيت خروع تفلتها؟
: ههههههههههه ولا تجوز من سوالفك
: ما حبلتي؟
: ولك شهل سؤال الخرا اليشبهك
: دنجبي تستحي مني ام الكمل انجبي وجاوبي عدل
: انجب لو اجاوب؟
: جوابي وانتي مجبوبة
: امم
: وجع عاد
: انت وجع
: يالله دروح العب باعصاب بيبي شويا
: الله وياك
سديته وسديت التلفون بكبرة رحت سبحت من التعب وكمت افرفر بالبيت الملل اكل جزء مني ما عرفت شون اكضيها
فتت للببجي ميفيد فتت لنت فلكس ماكو ما بعد ادري بروحي شريد ملل جزعني ورجلي الشفية ماهو ولا اتصل
كلت هاهيا يريدنا نعيش ازواج بس بالاسم براحته شنو افرض نفسي علي خل اشوف اليمتى اكدر اتحمل هالوضع
فتت للفيس شويا شفت منشورات مال برنامج الوتباد جان عندي قبل بس هسة مسحته خل انزلة مرة الخ الكيلي قصص حلوات
نزلت وكعدت اقرا لي الليل ومحمد ماهو طكت روحي وهم خفت بيت غريب ببلد غريب ولوحدي ما اعرف احد
خليت وطلعت برا شسوي بعد اسجن روحي خل اتعرف ع الجيران
طلعت شفت الابواب كلهن مسدودات وعالم رايحة رادة يع هسة شلون بيا
شفت واحد طلع من البيت يالله هاي فرصتي رحت علي وحجيت ويا هوا سريع اكو كلمات تفوتني
: هلوو
: اهلا وسهلا
: عفوا اني جديدة هنا
: اي يا مرحبا
: اي دا ادور على صديقات من عمري ما تعرف احد من الجيران؟
: امممم اكيد اكو ذاك بي بنات وذاك بي بنات وتريدين نصير اصدقاء مو مشكلة
كالها وغمزلي ما ارتاحيت
: لا شكرا اني طبعي مزعج ماا انحمل وشكرا على وقتك
رحت للبيت الكلي علي دكيت الباب فتحته مرة جبيرة سلمت عليها وطبيت بيتها فارغ ما بي احد كتلها اني جيران جديدة وكذا
سئلتها اذا جانت وحدها اهنا لو اكو وياها كالت عايشة ويا بنتها بس غريبة شكلها تتعاطى النهار كله نايمة والليل كله تفتر
ماعجبتني عفتها ورحت
طلعت رجعت لبيتنا هوا كلشي بهل زواجة زفت هم ما لكيته ما شتهيت اكل
اي خمو جايبلك حيوانة ورابطها بالبيت انت ومختفي ولا كلفت روحك تسئل لو تتصل تكول وينها محتاجة شي
حت نفس للاكل ما ضلي ما تعشيت لململت البيت ع السريع وطفيت الاضوية رحت لغرفتي
اول ما طبيت بيها تذكرت موقف البارحة نفسي لعبت وغميت روحي
رحت تمددت بالسرير اكلب بالفون بين ما انعس كانما احد كلي كومي سدي الابواب
اول مرة حاولت اتغاضى هل الاحساس بس بعدين كمت سديت باب غرفتي وبالبلكون سركيته
رجعت لسرير واكيد كبشر لازم يقشعر بدني من الوحدة
اني صح جنت انام وحدي بس جان اكو عالم ع الاقل وياي هالمرة وحدي وببلد اجنبي ياربي رحمتك
كمت اتخيل امور حت لو عادية بس تخوفني مرات البانكة تطلع صوت لو تطير اشياء متت خوف اسمع صوت الهوا اقشعر
حاولت اغفي ماكدرت بعد وكت كمت اسمع اصوات لا اراديا هاي الامور من واحد يصير وحدة يتغلب الخوف على جوارحة
رجعت التهي بالفون وغلست ع الاصوات الاسمعهن
بس هالمرة سمعت صوت باب نفتح لا هاي مو تهيئات هذ صوت الباب اكيد يجوز محمد جا يالله واخيرا
كلت مااكوم خل يجي من حالة واذا الباب مقفول عود يدكة
ما كمت من مكاني ضليت متمددة الصوت جوا مكطوووع ماكو اي صوت مجرد كلبي يلعب زين معقول نام بالصالة
لا لا ميسويها يجي وينام بلا ما يجي يشوفني ويطمن عليا بذات النهار كله ما اتصلنا ببعض
يالله يجوز بالتواليت لو ياكل شي شويا وهوا يجي اكيد ما معقول اني الانزلة
مرت ربع ساعة ماكو صوت جوا بس خطوات تدب بالارض يالله حت ما طبع محمد هذ
خل اكوم اشوف شسالفة ويي جاي للبيت بتوالي الليل عايفني وحدي يوم كامل ديخور هيج مثل نعجة الثولة بالبيت
كمت على مهلي فتحت الباب وطلعت من الغرفة دنزل اشوفه واعرف ليش ما حاجاني
باوعت من الدرج شفت جيراني الحاجيته قبل شويا رفع راسة باوعلي والدم يبس بيا اذا اذنبح ميطلع مني قطرة
صار يركض بتجاهي واني ركضت لغرفتي هوا سريع رجولة كل وحدة بطولي
وصلت الغرفة داطب ولزم الباب
حاولت اسدة وادفع ماكو بكل حيلي رغم شكثر تدربت ماكدرت لقوته كدر يدخل للغرفة دفعة وطب
باوعلي نضرة خبيثة من فوك لجوا جان ضو خفيف داخل من البلوكن اكدر اسوف ملامحة ونضراته
قويت روحي مو مال انهار بعد كل هذ التعب تاليتي الك لو تحبل هسة
: شتريد مني؟
: لا تراوغين احسن ما ااذيج خلي الليلة ثنينا نستمتع
: اطلع برا بيتي
: هذ بيت ذاك الشاب المسلم ابو جهنم ممكن انج تكونين متسلطة علي
: اني زوجته
: ههههه واشكو بيها تعالي جربيني شوفي منو الاحسن
: ابتعد عني
: اقتربي مني
كالها لو جنني تعال الله جابك اني متعصبة وانت بطران اليوم ادفنك اطلع ضلايم كلبي بوجهك القذر
تكرب علي تذكرت دروسي مال كراتيه حاولت بالبداية اتهزم بمجرد ضربات بسيطة ما ياثرن بي هوا على كد الطخة ويرجع يكوم انت ما تمشي الا بالثكيل
بحركات سريعة ضربته ع المناطق الحساسة من دنك ضربته على خشمة بركبتي وضربة ثالثة على ركبته
صار ركعة بالكاع لعد عبالك بنت الرافدين سهلة يول سكط اشكك شك والله
رحت ركض اخذت تلفوني واتصلت بمحمد واني ارجف
حلوة والله فوك ماكاتلة الولد ارجف
ضل يدك تقريب تخلص الرنة جاوب
محمد: وهم مااكدر اجي
: محمد اكو حرامي بالبيت
: شنوووو
: تعال بسرعة
: اقفلي باب الغرفة عليج لا تطلعين
: هوا بالغرفة معايا
سدة ما جاوب نعل ابوك هيا هيج تصير
هذ يتلوة عفته اخذت فوني وطلعت اركض بعدين تذكرت هذ بيتي شنو انهزم منه والله هوا الينهزم انعل والديك اليوم اسويك وصلتين حضك اطيحة والله
فتت للحمام اخذت عودت الماسحة ومن المطبخ الشوبك ورجعت صعدتله ركض لكيتله دا يحاول يكوم
وتناوشته كفخ هريت عضامة ضربة بالماسحة 10بالشوبك ضليت اضرب بي ما خليت شي بي صاحي
مسك الشوبك ضلتلي ايد وحدة حرة لزمته من اذانه ونطحته بخشمة هذ هدني وتمدد بالكاع لزم خشمة ورجعت اضربة برجلي
: فايت تتمخطر ببيتي ابن القندرة اني ما امشي بي هيج
اسبة بالعراقي وهوا اثول ما مفتهم
: ولك اني بنت العراق اني جايني انت تكول بريعص لابس برمودة اكبر شي تسوي تتعارك بالتعليقات دتكدرلي عيب عليا بنص النسوان اذا ما اشلخك
اني اضرب بي صوت سيارات الشرطة اجت يالله جا محمد يخلصك مني
رحت ختلت بالزاوية ابجي مدري ليش عود اني مضلومة ودفاع عن النفس وكذا لئن اذا عرفو اني عراقية وضاربة هذ السكط وببلده اتحاسب
صوت الباب ندفر ورجول ادك بالارض دخل محمد ركض وصل الغرفة اني شفته زدت بالبجي
اجا حضني وخبا عيوني ورا صوت الشرطة دخلت وكعدو يحجون على هذ جيرانة شلون مسحول ومنو سحلة واخذو وطلعو كلبجو ايدينه
: محمد روح وياهم
محمد: ما اعوفج
: اخاف ما يخذو روح تاكد اخذو فدوة
: اكيد ياخذو شنو قالب على بيتنا
: دروح تاكد فدوة
: وانتي؟
: مابيا شي روح
راح واني مسحت وجهي من البجي شفت الارض بيها دمة والشوبك والماسحة تهي بهي شهل فوضة
كمت نزلت الماسحة والشوبك واخذت وصلة دمسح الدم
طلعت للغرفة ودنكت امسح تحسفت على شعري جان ينزل قبلي يالله مرة العملت ماضرت ابد يحرم عليك المكص بعد
دامسح ودخل محمد مفجوع كلي هذ دمج اذاج؟
: لا هذ من جيرانك السكط
محمد: هاي شلون صار هيج ليش دخل؟
باوعتله ما رديت رجعت امسح
محمد حجا بعصبية: وهم
: والله شاف البيت مابي احد النهار كله بس اني افرفر استغل غياب اهله
دنك ماجاوبني
: محمد تكدر تفهمني انت وين عايفني من البارحة وطالع؟
خوب كول تخاف كول ماتعرف احد كول ثولة مادبر شي انت عايفني وما سائل على شي تعرفني ما داخلة مطبخ افترض شعلته افترض انتلت افترض يصير اي شي مثل هسة لو يدري بيك موجود جان استرجا ودخل عليا هيج؟
تعرف لو ما مدربة ع الدفاع عن النفس شجان صار مالازم اكمل
ما رد يحمسني من ما يريد ياكلني ببرودة ضل مدنك
اني هم ما حجيت شي بس تنهدت وكملت مسح الارض
شلت الاغراض ودطلع وصلت يمة وكفت فكرت دقيقة وكتله
: احنا بعدنا بالبداية محمد واذا ما متقبلني انت كزوجة الك الاحسن كلمن يشوف حياته اني مو ميتة ع النومة وياك لو جاتلة روحي دتتقربلي
بس اني انسان وعندي احساس وعقل يفكر واذا متندم هم كول مادام ما صار بينا شي
هذ لا حرام ولا عيب ولا منكر هذ حقك عليا مو جبتني من عد اهلي حت تنطيني ضهرك وتنام ومحسسني بيا نقص لو ما املي العين لو ماخذني مو بيرادتك
اني كاملة ومكملة ومالامسني اي شخص قبل خاف لبالك جان عندي حبيب يعني شبعان مني لا ترا حت ماجان يبوسني ابد ولا فد مرة حاول يتقربلي خاف عندك شك بشي فطمن انت ما مخدوع بيا
ومااكدر ابقى اني هيج كلمني خبرني امثل اني مابيا شي واني زوجي نافر مني اذا متحبني كلي دعرف اتصرف
كلتها وطلعت اغلي نار ما تطفا بداخلي نزلت ذبيت السطل مال المي وخليت كلشي مكانة ورجعت دنام بالصالة شفتها ما تصرف شنو بلا غطا وبطانية
رجعت لغرفتنا جان متمدد بالسرير وحاط ايدي على راسة جيت داخذ مخدتي انتبه لزم ايدي
محمد: وين وهم؟
: وين يعني؟ دنام بالصالة
: وليش ما هاي غرفة وتخت شعرضة؟
: التخت ينامون علي المتزوجين دادا مو اني وياك امممم
كلتها وداطلع ركض سد الباب كبالي
: محمد شدتسوي؟
: اسمعيني
: وخر دطلع
: بس لحضة دكلج
كالها واخذ مخدتي ورجعها لمكانها واجا حضني
بالبداية ما قاومت بعدين صرت ادفعة
: وخر محمد عني وخر
: هشش كافي مشمشة
: محمد وخر كلت انت ما جايبلك حيوانة وتربطها بالبيت يوم كامل وماكلفت روحك حت تتصل بيا ومن خبرتك اني تكلي ما اجي هسة
: حقج عليا
: عد منو تنصرف هاي شكد تجيب بالله؟
: هششش كافي
: وخر داكلك عفتي لجلاب الشوارع انت ينهشون بيا
لزم وجهي بثنين ايدي مبتسم
: اضحك اضحك
: اي والله انتي هاطرة عضامة ومدري مخليته ينزف منين كل هذ وتكلي ينهش بيها والله نهشتي اهل اهله
: اي ليش يطب بيت بي حرمة غيرة
: حرمة غيرة هاا
كالها بمكر واني فاهية ما افتهمتها لئن متعصبة
: اي حرمة غيرة لعد اني مو مرتك بس خلي يستاهل حت مرة الخ ميطب ببيوت الوادم
باوعت بعيونة صافن على شفتي من احجي اني هم فهيت من منضرة
: شبيك؟
كلتها وتكرب باس شفتي بهدوء رجع يبوسها اكثر من مرة
نزل على ركبتي صار يشمها ويطبع بيها بوسات هادئة وايدة ييفرك بيها شعري
هاهيا وهم مو هاي الصارلج ساعة تحربين عليها دكليها عاد
نزل باس ركبتي وبطني رجع على شفايفي ويفرك وجهي بيدة
دقايق مرت واخذني صرت مرته قول وفعل
باوعلي وابتسم همس باذاني مبروك مشمشتي
محمد: صرتي مرتي هسة؟
: صرتك مرتك امم
: مرتي وكملت بيج ديني يابعد عيني انتي
: كافي ترا استحي
: ماكو خجل بين رجال ومرته انتي كلج مالي واني بخدمتج واحطج بعيوني طول العمر والله ما بقصدي هيج تحسين بيا وتعتقدين العيب بيج انتي ما بيج اي عيب انتي كاملة من كل النواحي بس اني جنت اخاف...
ما كملها حس نفسة جفص رجع يبتسم ديضيعها عود باسني من راسي
: يالله حبيبتي اسبح واجي
كالها وكام من يمي من شنو ممكن يخاف يالله مو مهم هسة احنا تزوجنا وكملنا بعض ويا الوكت عود يكلي
كمل ورجع ردت اروح اسبح ما خلاني عاد الجولة انت مو جنت ما تقبل تباوع بوجهي شهل طمع
للصبح ما خلاني انام مثل البشر
كعدت لكيته سابح وطالع من البيت اهوو هم ديعوفني نزلت جوا اتثاوب فتت سبحت واني جوا الدوش افكر بليلتي الاولى كل صفنة اجرها شطولها عود هسة انتي هم صدك عروس؟
مالت على هيج عروس اي والله الي دخل عليها ورا زفتها بسبوع
ضليت واكفة جوا الدوش هسة شنو احساس حاذق معقول تعذب مثل ما تعذبت لو عاش جزء من العشته
لا وليش ديتعذب هذ قرارة بعد ونتيجة افعالة ياكلها والي سويته اني حلال مو حرام هذ زوجي بس هوا اخذها بالحرام
ورغم سامحته ونطيته فرصة ثانية هم ما بطل ورجعلها دكلها عاد والحليم تكفيه الاشارة واني كلش حليمة اكثر من عائق واجهت وما تراجعت واكثر من باب نسد بوجهي وفتحته بس بالاخير قدر الله ومشاء فعل
صرت حلال غيره وغيري صارله حلال وانتهت قصتنا عد هالحد نكضي عمرنا كله بحسرة بعض
هم راح يجي يوم ونرجع نجتمع هم راح يصحلي اشوفة هم راح اكدر انسى واشيلة من بالي بس هوا مثل الشيب على كد ما ينشلع يكثر
صحيت على روحي اني شكد صارلي هنا هاهيا
طلعت لبست البرنص ورحت لغرفتي بدلت ونزلت دسوي غدا
ضليت افكر شنو اطبخ واني من غدا البارحة ميتة جوع
طلعت وصفة القلية شتهيتها وكمت اطبخها
صح اخاف من الزيت بس شسوي بعد اضل كل عمري بلاتعليم باجر اطعم جهالي اكل موطيب لو بطعم اصابعي المحروكة
سويتها وكملتها ساعة ونص اني بالمطبخ بين ما كطعت اللحم على مهلي والبصل وكذا
كملت الطبخة ايع ريحتي بصل
راسلت محمد كتله تعال تغدا ما جاوب
اهوووو هم سحب عليا
ضليت انتضرة يرد يدك ماكو شسالفة
طلعت برا اشوفة السيارة ماكو يعني ماخذها بقيت افر بذاني هسة شسوي معقول بس اكضيها هيج كل يوم اني
خبرته رد الحمدلله
: ها وينك؟
محمد: بالشغل
: شني؟
: شنو؟
: شني بالشغل؟
: يعني بالشغل
: هاي اشون
: جنت ماخذ اجازة اسبوع لزواجي وخلصت من البارحة
: وشوكت تجي اني ما اعرف نضام شغلك؟
: لي الليل اتغدي انتي
: ديالله باي
: باي مشمشة
كالها وسدة والله من دنعل ابوك لابو قسمتي
رجعت ازفر للاكل تعال والله ما احرم روحي لخاطر احد خل اغذي روحي بلكت يطول شعري مرة الخ وزوج اليكصة بعد والله
صار دكي ومدكوكي على شعري اريدة يرجع
بشرى.
تزوجت ورا وهم بكم يوم صح انقهرت بس مو هواي هم البيت مو ساكنتة من زمان اقل من سنة وهم دخلص من تسلط هيل خل تضللها ضحى تشعوطها
زوجي وعيالي بسيطين ومتواضعين بشكل وكلشي تمام وياهم ابد ما وجهت صعوبة بالتعامل معاهم
اخت زوجي صديقتي ومعايا بالقسم واخته الثانية متزوجة بس مامكملة هم ما اشوفها كل اسبوعين
الامور من احسن ما يكون من تزوجت للان ماعندي ولا مشكلة ولا اي حدث يذكر غير اشتياقي لاخوتي
ضحى صح شعواط بس تنحب وكل عمرنا ما افتركنا ولا يوم
اخبار وهم كلش انكطعت اخر شي سمعنا تزوجت وسافرت لا سمعنة زفة ولا سمعنا عرس حت منشور ما نزلت الا قبل يومين لمن كصت شعرها
لا يالله شعرها شحلاته تكصة هالكصة الضالمة هاي وتبجي ياخايبة لمن تبحين ليش تكصينة
نزلت بمنشور ثاني انها كصته لئن زوجها يحب الشعر الكصير الله يعين كلبك ياخوي جان روحة من الدنيا شعرها وما الومه شعرها حيل حلو
اجا مدحت دخل عليا ببتسامة كالعادة بادلته اياها بس من جذب اني صح تزوجته عن قناعة بس مااحبه وكلبي يم غيرة اجا كعد يمي
مدحت: اكول حبيبي
: ها كلبي
: شسمة احمم اختج ضحاوي
من كالها خفت لا يروح سمع شي عنها او عرف بميولها
حرج كبير من عيالي وزوجي اذا عرفو بيها
: ش.. شبيها؟
: ليش مرتبكة؟
: لا ابد بس استغربت سؤالك
: ههههه لا تستغربين
: شتريد منها؟
: مو مخطوبة او مرتبطة؟
: ليش تسئل؟
: والله كلت اذا ماحد ببالها نخطبها لاخوي معاذ طيبة هواي مدحتها واخوي عينه عليها من يوم خطبناج
من كلامة استغربت شنو عينه عليها شنو طيبة مدحتها يالله هسة هاي اذا اكللها تتخبل ما تحب الزلم
هاي الى متى اضل كل ما احد يخطبها انثول يالله تضل تخرب واركع اني
مدحت: ها شو عم الصمت
: شسمة ااا ضحى تدرس حبيبي وهالسنة هيا خامس
: نخليها تكمل وتجي وياج للجامعة بعد ما تبطل واش ماتريد احنا حاضرين بس تسمي
: ما تريد تتزوج هسة
: ننتضرها شكد متريد اصلا احسن فترة تعارف الهم
: ترا ما تشتغل شي ما تعرف تغسل استكان
: ههههه عادي تتعلم واحنا نريدها جنة مو خدامة
يالله هذمن ما اطلعلة يطلعلي شكلة ويسكت
: ماليا امر عليها اني عود اكوللهم واردك خبر
: اي فدوة حت نحضر امورنا
كالها وطلع
نسحلتي بشرى وهاي ضحى عنيدة وباهتة هسة تسويها شغلة اعناد وتوافق ومن دتصير صدك تتراجع هسة شلون ادبرها اني وياهم يالله
كحيلة.
طبيت بشهري والدنيا كلها طالهة من عيني مو جارعة احد ولو بيدي احط متيم بغسالة الصحون
خبرت وهم وحجيت وياها زوجها بالشغل كملت بسرعة سديته لئن ما ليا واهس كمت احجي ويا ابني
: ولك ماما ما ناوي تشرفنا عاد مو تعبت منك صارلك 9اشهر نايم دكوم اتحرك ازحف ابجي الطم اي شي بس فضني عاد خرب جدتك
بدال نومتك هاي شوف العالم شدا تسوي وانت اكبر شي تسوي تضربني بدفرة مو حت صدري طك
شوف اكلك من هسة ترا تالي ما تكعد تتنغوج يم راسي وعا وعي ومدري شنو ترا ما اكوم عليك والله وها تتعلم تفوت ع التواليت بحدك ما اشطفك اني ترا انت تتشطف
ودير بالك تطلع خبيث ما احب الخبثاء اني صير هيج كيوت وتحب الحياة مثلي اني وابوك لا تطلع باهت مثل عمتك
اني احجي ومندمجة تكول احجي مع واحد جبير درت وجهي شفت متيم متكتف ويباوعلي يضحك متت خجل
: هاي انت من شوكت اهنا
متيم: من جنتي تتفقين ويا ابني وتريدي يجي
عااا هسة هذ شيسكته هسة يلزمها عليا
متيم: كاعدة تهدد ابني تكله ما تكعد بالليل ما اشطفك ما مدري شنو شهل ظلم لعد منز ينضفة
: اي ماكو والله اني راح اجيب راح انشك وتكلي اكعديله بالليل
اكترب عليا وكعد يمي وهوا يضح لزم بطني
: اني عود اكعدلة وابدلة واسبحة واوكلة واعلمة يمشي واعلمة يحجي واخلي يصاحب كل بنات العشيرة ههههههه ابني راح يطلع صاك على ابو
: اي وشبيها امه بالله؟
باوعلي نضرة وكال
متيم: مابيها شي ينطلع بيها
: لا ويعوز تحجي
: اي هسة جيبي انتي وننتفاهم عود
رجع عيونه على بطني يحجي ويا ابنه
: شوف بابا ما عليك من مرة ابوك هاي انت بس تعال والله لاعيشك ملك كلشي تتمنى يجيك وضل ابجي الليل كله وكعد كل الجيران وشحد احد يضوج لو يفتح حلكة اخلي ادم يعتقلة
: علمة ع قواية العين علمة
: اي اعلمة ليش لا شوف بابا جيرانه ابو مهند عيونه خظر واشكراني حلو مثل ابوك شوف اكيد راح يصير عندة بنات حلوات عود صاحبهن
: وربي مو صاحي
وهم.
دنيا ليل واني وحدي جزعت مثل البارحة مو حالة هاي اريدلي سيارة
صح ما اندل بس اكو محدد مواقع عود اخزن موقع البيت والسوك وهاهيا ميرادلها روحة للقاضي
اتصلت بمحمد رد بسرعة
محمد: ها مشمشة
: حمودي شوكت راجع؟
: اويلي الله
: شبيك ههههههههه
: حمودي تصيحيني
: غير دلعك يا عمري
: عسى محد دلعني غيرج
: ههههههههههههه يدلل ابو جاسم
: لا اني ابو جهنم
: ههههههههه صدك هذ جيرانك البارحة كالها توقعت سمعي غلط
: لا مشمشتي اني ابو جهنم
: منيلك هاللقب؟
: اول ما اجينا لهنا جنا كل مانشوف الاشياء اليسوها اكللهم مصيرهم جهنم مصيرهم جهنم صارو الاهل يصيحولي ابو جهنم عجبني ومشا عليا هالاسم
: ههههههههههه متدين تفرق بين الجنة والنار زين ما تعرف.....
سكتت ما كملتها
محمد: ما اعرف شنو بابا؟
: احمم ما تعرف معرض سيارات قريب اريد سيارة
: شتسوين بيها وانتي ما تندلين؟
: اريد اتعلم شويا مليت واني كاعدة
: اي ادللي اختاري السيارة التريديها وندورلج عليها بالنت
: شنو ما نروح ع المعارض؟
: حبيبتي وين اكدر اترك شغلي يالله دروح هسة ولا تطبخين لا تحركين الامة
: زين شوكت ترجع؟
: ب1
: حيلللللل
: هوا هذ وكتي يالله سلام
سديته وكمت افر باذاني شنو يجي بالوحدة بهل وكت شكعد الطم وحدي يبو يبو
حاولت الهي روحي باشياء ثانية اسويها كمت رتبت البيت ومسحت الارض طمشت على افلام
خبرت خواتي وسديته رجعت خبرت ماما شموخ
امي ديانا ما اتصلت بيا ابد ولا اني اتصلت بيها احنا الاثنين ما ننحسب على اي ام وبنتها بالعالم لئن مابينا مودة الحمدلله
اتصلت بجيهان وكالت ريام رجعت للبصرة ببيت جدها تنتضر السنة مال زوجها دياخذها امير
مارتاح كلبي لهذ امير
دزيت على غدا واكلت وعزلت وراها مليت نعرف شسوي بعد
راسلت ربعي اليوم جمعة بالبيت نظر بالبيت صار يشتغل بس بالليل هلا تعال
كتلهم ننزل تيم ببجي وفعلا نزلنا
اول ما طبينا سلام وحجي وباركولي ع الزواج وهاهيا
نظر: قشمروج ببدلة وعرس؟
: ولك يابدلة ويا عرس طلعت من البيت بقاط ابيض مال مدراء تكول رايحة اعقد اجتماع مو عكدي
شاهين: بحياتي ما تخيلت وهم تتزوج هيج
: قدر الله وماشاء فعل محد يعرف مصيرة
: المهم مرتاحة
: الحمدلله متفاهمين
نظر: الله يجعلكم
طبينا لللعبة وضلينا نلعب لي الليل يمكن 5ساعات بس احنا نلعب
شويا راح نظر فصل النت يمة بقينة ننتظرة دقايق ورجع جا ودخل رقم اربعة
شاهين: اشرقت وانورت
نظر: بالمهلي
: ها ولكم منو رقم 4؟
غيداء: هاي اني عيناي
: ها هلو غيدو شلونج
: الحمدلله وانتي شخبارج؟
: كلش تمام الحمدلله وين ماوين؟
: ماكو والله وانتي؟
: بمدريد
: اشبيلية؟؟؟
: اسبانيا
: وااااو
: مو اول مرة اسافر
: اي يمة اي ليش لا اكبر مكان رحتلها اني كربلاء
: تعالي عليا والله احطج بعيوني
: الله يسلم عيونج حبيبي
: والله شبيكم تكدرون تجون هالفترة اختي دتجي يمي عود من ترجع ادز عليك
نظر: وين نجي يمة خلينا بالعراق العظيم اذا مو يوميا نتمرمط بالازدحامات والكهرباء تفصل والمي متلوث وريحة الجو تراب ما نرتاح
: تموتون ع الذل
: مو بيدينا
شاهين: كافي عاد سكواد كدامنا
بشينا وووكعت غيداء وشاهين وفنشناهم اني ونظر وجينا دنعالجهم
دلزم غيداء جا نظر يضربتي بوكسيات يريد هوا يعالجها رحت على شاهين وكمنا نصنف عليهم
شاهين: شوف شوف اللوكي هوا يعالجها وينطيها باندجات ول جنت اتوسل بيك ع الببسي ما تنطيني
: اي اي دشوفه شلون ما خلاني اعالجها جا ركض هوا الخايس وينطيها علاجات تتذكر شاهين من جان يكدي منا
شاهين: بالحيف اي والله
صار يغني
شاهين: الصاحب من يتغير كض نعالة وكطعة علي
غيداء: غير خطيبته لعد منو يعالجني منو دوا لجروحي غيرة
نظر: فدوة لهل وجه حبيبتي معليج بيهم هذول يغارون محرومين
كتله عود ماراضيلي
: ويييييي
شاهين: من شنو محرومين يول لا تصدك ترا انت المحروم هنا احنا دخلنا القفص انت بعدك بالباب
: لا تصدكون نفسكم ولو عصافير براسنا ترا انتو غربان بعدكم ع البر هوا اسبوع زواج والله تكومون تفجرون بعض
نظر: اني غرب؟
: ثنينكم شنو ماشالتك الشيمة بس على روحك
نظر: ترا اني صكر
: انت بومة
: بربج كل هالطول والعرض بومة
: لا ثور مجنح انت
: ولج هاي الرشاشة الي بحلكج ما تكف؟
: ابد
شاهين: بربي وهم وحشة كعداتج
: بربي اني هم مشتاكتلكم لكلكم تقريبا بس دنيا غبرة
: امعودة تفكرين زايد انتي بدالج اشتري منتجع سياحي او مكان احبة هواي
: هم فكرة والله
شاهين: هيج فلوسج جثيرة؟
: مو منتجع امعود شنو هذ ع المكان الاحبة والله حلوة الفكرة
نظر: شوكت تنورينا ولج؟
: ع الدور الثاني ههههههههه
شاهين: لا لا ماكو نشالله ناجحة
: مادري
نظر: صدك ناوية تكملين؟
: هيا سنة وحدة بقتلي حرامات تنترك
غيداء: حاذق ترك اخر سنة
الكل سكت من كالت هالكلمة واني شهكت مدري ليش بس عيوني غوركت
كملت اللعبة ع الصامت وهما يحششون حسو عليا ضجت
اترخصت منهم ورحت
خبرني محمد كلي تعشي انتي ولا تحسبين حسابي سويتلي اكل ع المستعجل مال نفر واحد اكلت بالمطبخ وخليت الصحون بالغسالة وغسلت الطاوة بيدي
كملت الباقي بملل كمت العب بالفون اتابع مسلسلة ملل يالله هسة شسوي اني
ساعة بعدها عشرة ما تتحرك
مرهم.
اووووف يامكان وهم شكد فارغة بيتنا حيل وحشة بلاها
امي حت كرسيها تنازلت عنه حيل استغربت
امي هذ كرسيها الخاص من مات ابوي لليوم ما تخلي احد يكعد علي غيرها
ادم راح يصيرله شهر ملتحق ماكو عندة شي وقيصر مرته الي لزكت بالسادس ما تقبل تطلع منه ولا تقبل تتزوج قبل ما تطلع منه فاضية
اتصل بيا سيف كلي ارجعي سلمت على امي الصايرة جلد على عضم منتهية بس نفس بيها بعد وهم
تريد تحاجيها وتريد تتصل وتفتح كام بس ماتكدر كبريائها طاغي ووهم ما تقبل تسامحها اول شي على سالفة شموخ ثاني شي ما وكفت بوجه قيصر لمن ضربها
وهم كلبها مو قاسي اني اعرف هيا مشتاكة لامي لئن تحاول تسئل عليها من بين الكلام بصورة غير مباشرة بس ثنينهم يريدون مبادرة مو اكثر
رجعت على بيتي سلمت على عمي ومرته ورحت لغرفتي درتاح شويا ودخل سيف عليا
سيف: نور البيت
: هههه بعد اليوم رحت ما عفتك 10ساعات ترا
: ااااخ هوايا تصير من تحسبيها
: لا لا مو هوايا
: شلون يومج؟
: تمام التمام
: امج ماصارت احسن؟
: امي لو تعترف انها مشتاكة لوهم ارحملها وثنينهن يكابرن لاذيج تقبل تتنازل وتسئل ولا هاي التقبل تعترف عبالك غربة ولا تكول ام وبنتها
: تركيهن امعودة الا يتصالحن نو هسة بعدين المهم هسة مشتاقلج تعالي
: هههههههههه اكول ما جايني محبة
: لعد شنو ولج هوا انتي ينشبع منج
ينصب عليا بسوالفة هاي بس ميخالف اتقبل كلشي منه هههههه
كام يمي يضحك فات سبح وطلع كلي اسبحي اريدج بشغلة
: اذا هيج مالازم اسبح
: انتي تحارشيني ترا اني تفكيري نضيف
: ها لعد اسبح قبل ما تبدلة
: لا تعالي بدلته
: ما والله
كلتها وطفرت اسمع ضحكته سبحت وطلعت جان متمدد يقلب بالتلفون من شافني فتح ايدي بحركة حضن رحت حضنته ونمت بحضنه
سيف: اكول مرهمي
: ها سيوف
: اليوم متقدم واحد لميار
: ها ع الخير منو تعرفه لا
: ما اعرفه وهيا هم تكول ما تعرفه دشو تعرفين شي انتي
: اني الاعرفه ميار ما دور حبجيات وغرام والله عاد مادري
: وجع
: اي منو هذ شسمة
: معاذ
: امممم وهذ منو؟
: ماادري كلشي عنه بس عندة اخ واختين يمكن اخو تخرج هالسنة وتزوج وهوا راح يتخرج السنة الجايا قسم علوم حاسبات
: وشنو رئي ميار بي؟
: والله الاعرفة ميار مموافقة خصوصي انها اكبر منه
: امعود العمر مجرد رقم واذا اكبر منها مهم يحبها ويصونها خل نشوفه
: نشوفه ليش لا
: منين عرفها؟
: ماادري والله
: الله كريم
وهم.
ساعة صارت ب12 واني اضرب اخماس بسداس عفية نهار ما ينكضي وماخذة اسم الي بالخارج هيج هوا ششفت من الخارج لخاطر الله
كمت جهزت روحي لرجلي عود لبست بدلة مال نوم والروب مالها خليت مكياج كعدت انتضرة
ساعة صارت1سمعت السيارة صفت هاهيا اجا
دقايق وطب للغرفة اتفاجئت محمد لابس بدلة بيضة باوعتله ونصدمت
: هاي شني؟
محمد: شنو؟
: شو ابيض مهزوم من ثلاجة الموتى؟
: غير شغلي
: شغلك شني؟
: شغلي مشمشة
: صاحب مطعم انت؟
: لا مجرد شيف واجيت ارتاح وارجع طلعت بالبوكة
: يصير انت عربي وتطبخ؟
: كلشي يصير اني عندي جنسية اسبانيا
: امم اسويلك اكل اني
: ماريد تعاي احجي وياج
كالها واجا تمدد يمي كل نطيني ضهرج داريت عنه سحبني لحضنة من ورا ولزم بطني
: ها محمد
محمد: ضلي هيج لا تتحركين
بقيت مثل ما يريد حاضني ويتنفس بركبتي بس ما سوا غير شي
كسر حاجز الصمت من كال
محمد: اني مااكدر وهم
نصدمت شنو ما تكدر شدتحجي بس تضاهرت بالقوة
: شنو ما تكدر؟
: مااكدر كل يوم اترك الشغل واجيج ترا حالة حال الشغل بالعراق واني لبارحة واليوم اعوفه واجيج راح اتعاقب شوفي ابقي اتصلي بيا
: شلون اكدر اشوفك واحجي وياك؟
: اجي من يخلص الطبخ
: هوا انت تنام هناك شنو واجب؟
: لا اني اشرحة بصورة مبسطة الج حت تستوعبين
: وتالي؟
: لا تشيلين همي
: واني؟
: ببين ضلوعي انتي
: شكد راح تضل تاركني؟
: ايام
بوزت وكمت ابجي دار وجهي علي وحضني
: اي ميصير هيج
محمد: كافي السيارة ماراح اخذها استعمليها انتي روحي وين ما تريدين بيها وافتحي لايفات تونسي
: اضوج وحدي
: وياج دائما اني
: بس ماجنت هيح ملتزم بدوام واشلون تجي تبقى اشهر بالعراق؟
: هسة بالجديد كمت اداوم قبل عكد المحكمة
: الله كريم
: يالله سكتي اريد انام نطيني ضهرج ولا حركة
نطيته ضهري حضني ونام يحب هالحضن يالله براحتك عود متجهزتلك اني اصلا احسن هيج
نمت وكعدت الصبح ماهو كملت الاجرائات الاعتيادة مال البيت
بشرى.
اخذني مدحت اني وطيبة الكلية دناخذ النتائج طلعت لازم استلمهن بيدي عود مدري ليش جنت افكر لحضة شلون وهم راح تعرف نتيجتها
وصلت الكلية اخذت الحمدلله ناجحة بس مو شي السعي يالله مو مهم وطيبة هم ناجحة
استلم هوا هم ناجح الحمدلله وتخرج زوجي ضليت اني وطيوبة
كتله ياخذني ع الادارة واقتصاد بلجي اكدر اخذ نتيجة وهم
رحنا حاولت ما قبل العميد اشكد كتله صديقتها وكرايب يكلي الا بيدها او اجيب بطاقتها هيا
داحجي ودخل رجال كال السلام عليكم هذ الصوت مالوف كلبي رجف منه باوعت شفت اخوها ادم
رد العميد السلام وكف وسلم علي باليد شكد شايل هيبة رغم مالابس بدلته بس مشيته وصوته واسلوبة مسوينه لقطة نوب يخازر عيونة حادة
اخخخ يا ادم اخ مو جان الاتمنى مدحت ذاك اليوم لو بس مارايحة لكربلاء جان بهواية احسن
من شفته تعلك بكلبي صرت كل مرة اشوفة بيها احبه اكثر
اني احبه واتمنى من شفت بمحرم قبل سنة وللان هوا ببالي حت من تزوحت مدحت وافقت علي بس في سبيل اقنع كلبي انو ادم مو نصيبي
محد جان يدري بمشاعري تجاهه حت طيبة اعز صديقاتي ماتدري بي خليته سر بيني وبين روحي بس هوا خاطب ويحب خطيبة عليش اضيع الكلام
فزيت من شرودي لمن رجلي صاحني
مدحت: بشرى
: هاها
: مشينا نروح عاد وين صافنة
: هذ الرائد ادم اخو وهم
ادم فز وباوعلي
: تعرفين وهم انتي؟؟
كالها باستغرب وشك بس لا لبالة عدوة لو شي
: اي وهم الصياد صديقتي
ادم: منو انتي انا ماشايفج قبل؟
همست: هلا جمالة ما يتذكرج يالثولة
ادم: عفوا؟
مدحت: احمم تفضل شرايد انت حضرتك
نزل راسة رافع تك حاجب ماعاجبة
ادم: رخي بعد عمري
كالها بنبرة تحدي ومدحت تنرفز
مدحت: شهل سلوب انت منو وتحاجيني هيج؟
ادم: جنت احاجي البنية اليمك دسئلها كم سؤال واروح
: اسئلني الي احسن واترك مرتي
: لاتصدك روح زايد حبيبي وصوتك اذا على علبا حبالك الصوتية اسويهن خيوط
:اسئل شردت عيني
: الاسئلة تخص وهم ماتخصك
: انت بس لا تحسب روحك لئن ضخم ومدري شنو وحالق لحيتك عود منتسب وكذا دتخوفني لاا تراني مااخاف من احد
: ههههههه عود صدك
كالها وطلع الدخان مال جكارته من حلكة ادم اسلوبة بارد وهوا يغلي
العميد: العفو عيني كافي لغي اعتذر منك سيدي طلاب طايشين مايعرفوك
مدحت: عرفني ع النبي
ادم: ادم بعد عمري
كالها ووجهه بي نص ابتسامة ينرفزة شكله رجولة يخرررررررررر خكيت علي وين انت وين مدحت والله مايجي قطرة ببحارك ياعمري
مدحت: قلة ادب
ادم: شوف بعد عمري
كالها وسحب نفس من الجكارة طفاها بالنفاضة مال عميد
: يمكن تحسبني متساهل وجاي بالمدني وكذا ماريد دوخة راس بس ولئن حرمتك عرف مراح احاجيك لخاطرها صديقة اختي
كالها بهدوء ورجع وجهه للجدية
ادم: بس مرة الخ تتطاول وحسك يعلى الغي من الوجود وما اعتبر الله خالقك ولا انت ولا عشيرتك توكف كبالي من يطبكن عندي افتهمت لو لا
كالها ودفعة ومدحت شويا جبان من سمع بي عسكري سكت اعتذر مني ادم ورجع اخذ نتيجة اخته
شافه وضرب الورقة لبالي طلعت بدرس استاذنت اشوفها طلعت ماخذة امتياز بكلهن
جرني مدحت من ايدي طلعت اركض وطيبة ورانا
: اشبييييك
مدحت: لا سلامتج بس اشوف مرتي واكفة تصفن بهذ الزرافة
: زرافة؟
: ماشفتي شطولة؟
: هههههههههههههههه
: ووجع اشبيج؟
: تشبيهك يضحك
: منو هذ؟
: رائد ادم
: افتهمت قندرة غير
: هذ اخو صديقتي والله وهم الصياد انت تشوف لايفاتها
: هذ اخوها؟
: اي
: اخوها من صدك؟
: اي والله شبيك اخوها
: هوا عود صدك رائد لو ينصب ع الوادم؟
سمعت صوت ادم جا من ورا خلاني نفز
ادم: مقدم مو رائد نعنشة ضلوعي
باوعنالة كالها وهوا دا يمشي لازم الفون يراسل وعاكد الحاجب مدنك عينة بمبايلة كل ايد هالضخماتها
كلشي بي ماكو كلمات توصفة شكد عشت وشكد شفت بالجامعة والا كرايبي والا المحافضات الرحنالهن ماكن شفت شخصية مثله
رزن حنون ثكيل وحلو نوب خزرتة تسطر سطر
هيبة مايخاف من احد طولة يجنن ورغم انه يبين صخر الا انه عيونه بيها حنية الدنيا كلها خصوصي من سمعت مواقفة ويا اخته
جبل ماتهزة ريح كل البنات عينهن علي حت طيبة سبلت بي بعيون الصفر الشايلهن وهيبته
لحضات جان يمشي بيها حسيت فصلت عن الدنيا الى ان حسسني مدحت
مدحت: بشرى بشرىىى
: هاها
: وين وصلتي؟
: هياتني وين دنروح هسة؟
: اريد ارجعجن
: وانت؟
: دروح على جماعتي بالكلية
طيبة: دعوفنا لعد احنا هم نشوف صديقاتنا بالكلية ومن تخلص تعال خذنا
: مشو اوصلكم
: لا ما نريد روح انت ترا نندل
: لعد ماشي روحن حت من ارجع اردج لبيت اهلج واسئليهم ع الكتلج علي
وهم.
يوم ثاني ممل بحياتي المملة الفارغة الفاضية
لكيت محمد تارك السيارة يالله جت منه
رحت للماركت اتسوكت لئن روحي لعبت من اكل المطاعم كافي عاد الى متى
رجعت مسحت نفضت عزلت خلصت
والجاي خدرت
والسمج طبكت
خطار ضيفت
والزعط شطفت
وزوجي البعير شيسوي معرفت
اي نجنيت بهل كم يوم الكضيتهن وحدي ميخالف
فتت من حر سبحت ورحت طبخت واكلت
من اكول طبخت مو يعني سويت مناسف لا طبعا اخري بطاطا بالدهن وتحترك بعد
بزعت من الفون لازم اسوي شي جديد عاد هيا كعدة وكعدة خل استفاد
شغلت يوتيوب خل استغل صفنتي شنو اضل هيج
طلعت جلسات يوكا لتفريغ الطاقة السلبية هم ثولة واستمريت بيهن مدري شكمت اعمل حركات واركز وياها بعد
كملت جلسة اليوكا وشغلت تلفزيون الملل الي احسة خاااااااارق هسة شسوي يالله
خبرت الكل وكحيلة بعدها ماجايبة شهل طفل اللازك
اتصلت بيا بشرى كامرة فتحته احجي وياها
سلمنا على بعض ضحك وسوالف وكذا طلعت ببيت اهلها
: ها ولج مبارك عرسج
بشرى: الله يباركلج ولو ما حضرتي هاي وحدة عليج
: منين اكدر اجي ولج غير امتحنت منا سافرت منا بس دزيتلج هدية
: وصلت وخلف الله عليج بس مو مثل حضورج
: يالله العمر كدامنا الا دنلتقي فد مرة
بعدين رفعت راسها مدري مع مع منو حجت بعيونها مادخلت وكالت
بشرى: وهم شوفي ششتريت
كالتها ودارت الكامرة للخلفية مشت اني زا بقيت كاعدة انتضرها تشوفني شجابت
جابت جنطة وحذاء نفس اللون كيوت وبقت دايرة الكامرة
بشرى: شوفيهن حلوات
: اي حبيبي مبروك
: عجبوج؟
: اي وعندي منهن بس غير لون اني مالوتي بيجي
: ذولي اشتريتهن بفلوسج
: ولج كافي تحجين بيها خما شكد نطيتج
: احبج وهومة
: اني هم احبج
: كل احنا نحبج
: ههههههه بلا جذب عاد ببيت الي انتي بي محد يحبني غيرج
: يا لا تكولين هيج وتعاي ليش كصيتي شعرج ولج
: زوجي يحب الشعر الكصير
: بس حرامات شعرج
: يرجع يطول مرة الخ امعودة اوادم دتموت هم تغير هم القوة تبدء من هنا
داتحجي وسمعت صوت هيل شك كلبي
هيل: ها ويا منو دتحجون؟
بشرى: ليش تسئلين؟
هيل: حاذق تعال يريدوك برا
من كالتها شفته كام من يم بشرى ما شفته لئن جانت مشغلة الكامرة الخلفية يعني جان كاعد يمها يسمع لحجي من راح رجعتها ع الكامرة الامامية
اجت هيل اخذت تلفون من ايدي بشرى وحطته بوجها
هيل: ها وهم هاي انتي؟
: لا تاج راسج
: ههههههههه رحتي لاخر الدنيا ولج
: وانتي بعدج بالقاع
: هاا ضاك العراق بيج بعد ما يحملج
: لا والله بس اكو اشكال بي تسد النفس واكو حكمة تكول اعتزل ما يؤذيك
: همزين مشيتي بيها
: اي وحدة عاقلة تمشي بيها
بس انتي مو عاقلة اذا كايمة بدفرة وكاعدة بجلاق بس الحمدلله على نعمة الكرامة
رفعت راسها دتشوفني العلامة الي بركبتها بالدوب تبين وقديمة راح تختفي عود دتقهرني
: هاي كرصة؟
هيل: لا مصة ههههههههههه
: اذا هاي مصة شوفي هاي لعد
كلتها ونزلت بلوزي لي يم الوشم اثار ممخلة جسمي كله علامات وهمزين بعدهن جدد
: هاي المصة دادا
هيل: هذ ضاربج؟
: لا ما طبعا ليش هاي انتي
: يعني زوجج ميضربج افتهم؟
: ولا يكدر يشتري سعادتي بماي عيونه اصلا مينام الا واني بحضنه
عوت وجها وكالت
: اني
حب زوجج الاول
ابتسمت بثقة على صلافتها لبالها اسكتلها رديت عليها ببرود شكت روحها بي
: واني حب زوجج الاخير
كبل وجها صار احمر من الغضب محد كللها تدنا ليا
طبت ضحى ع الغرفة وكالت
: راح امووووووت
بشرى: ووجع شبيج
: انشالله ما اطلع من هالصف الا واني حامل من المنهج
سمعتها طكيتها ضحكة
ضحى: ويا منو تحجون؟
بشرى: ويا وهم
: صدك جيبوها جيبوها
كالتها وسحبت التلفون من هيل الصارت تردم حيطان
ضحى: ها يحسرة اخوي اشلونج
: هههههههه هاي جديدة انوب
: اي مو جنتي ضيمة وهسة من رحتي يضل يكول حسرتي وهم ومن يباوع لصورج يكول يا حسرتي الماحضيت بيها
: اممم
: شخبارج بالخارج؟
: متونسة الحمدلله وماشية تمام
: الله يجعلج
: وانتي؟
: امعودة اسكتي وخليني بضيمي طلعت دور ثاني بالتاريخ الخرا شكد صعب ولا ينحفظ شكني شك احسة يكلي تمددي دشكج
: هذ تالي الادبي
: نعل ابو
: هههههه على كيفج عندج ملازم؟
: لا منيلي ومنو يجيبلي اصلا حاذق مسطول براسة وهاي الثولة تزوجت
: ههههههههههه كافي باجر يصلوج انتي رابع مو؟
: شنو باجر يصلوني؟
: هسة اخليهم يجيبولج هيا ملازم بنت اخوي جانت ادبي خطية ما كملت
: والله اذا صدك ليش لا يالله اروح اكل اني وها غطي صدرج ترا حت اني شتهيته ولا تسدو درجع احجي وياج
كمت اضحك على سوالفها يالله شنو من داهية
رجعت احجي ويا بشرى كتلها ليش حاذق جان يمها ودايرة الكامرة غيرت الموضوع سلمنا وسدته
بشرى.
حاذق من خلاني ادير الكامرة ديشوفها وهيا تحجي ويسمع صوتها
جان ميت على صوتها ذابل وجهه وتعبان بس يكابر
جانت عينه على شعرها الفرطت بي وطيرته جان خال ايده على حلكة ويباوع لعيونها ولشعرها
بتت يم اهلي بذاك اليوم حاجيتهم بموضوع معاذ امي موافقة وحاذق مايقبل يكول صغيرة
ضحى: تناقشو تناقشو يصير خير
هيل: وليش ما تقبلين بالله؟
ضحى: شنو اقبل تراني صغيرة وهذ الولد اني ما اعرفة
: يعني تريد تصاحبين اول؟
حاذق: هيل الصمي
سكتت ماحجت كملت اكلها
امي: بس اني موافقة واريدها تتزوج
ضحى: بكيفج توزعين سموحة
حاذق: كافي شنو امي موافقة دتكلج ماتريد ومانطيها انيالجبيرة ماردت انطيها بس جان بالي مشغول هسة تفضيتلكم
جان يحجي واثق جن اكو شي براسة ويريد ينفذة