حاذق يكول
شجاني وماحضنتك كبل ماتروح
عفتني وغيبتك صارت طويله
شجاني وكلتلك الله وياك
وبقيت انتظر ليله بأثر ليله
رحت بس من رحت خلصت الدموع
وشلت الروح بيدك فرد شيله
ونسيت الابتسامه وفرحت العيد
لان ضحكاتي بغيابك قليله
بعد هم تفرح عيوني بيوم ملكاك
لوجمعتنا صارت مستحيله
_____________
وهم.
وصلنا اسبانيا
نزلنا واستلمنا الجنط وختمنا الجوازات وكذا اني مااعرف شتصرف بس مرهم تجر بيا تكول طلي
تحجي وياهم اسباني اني بس اصفن اكو كلمات افهمها وكلمات تصير سريعة تطير كملنا ودانطلع شفت محمد شايل لافته وكاتب عليها hola (مرحبا)
شفته ورحت سلمت علي سلم على اختي وكذا ماجان حيل ضخم طوله بال170هيج بس عنده عضلات احسن من حاذق الناشف
مالت على وجهج هيل عفتي هذ الخيل لخاطر ذاك الطلي غبية كل عمرج
محمد: يابا نورت مدريد واسبانيا كلها
: بنورك عيني
: امانة اذا ماعدكم مكان ترتاحون بي تعالن
مرهم: راح نروح لبيتنا عود وبعدين نجي عليك تعبانات هسة والله من السفر
: اي اختي براحتكم تعالو اعزمكم على كهوة
: لا والله تعيش رحلة طويلة وشربنا بتركيا انت بيتك بمدريد؟
: اي بال......
مرهم: اممم مابعيدة علينا يعني يالله عود نلقي احنا بيتنا ب......
محمد: ديري بالج ع الضلعة ترا ماتعرف تحجي مثلنا
: ولو ليش مااعرف احجي مثلكم
محمد: اهوو دتبجي عاد يالله روحي كعدتني من نومي مالت
اني اعرف حساباته كلهن لان احنا اصدقاء طلعنا برا اجر تكسي وطلعنا بي مرهم تحجي ويا السايق تدلي يمين يسار مدري شلون
وصلنا بيتنا جبير شويا مو مثل بيتنا الي بالعراق بس هم حلو بي مسبح بس فارغ من المي وواسع 3غرف وحمامين حلو نايس طلعنا نمنا بوجهنا ما لحكنا نعمل كلشي
كعدنا دنيا عصر بدلنا هدومنا فتنا للمطبخ فارغ مابي شي واثنينا ما نعرف نعمل بيضة الحمدلله يعني
اتصلت بمطعم دلفري وصت على دجاج كنتاكي وبطاطا ومدري شنو
نكضة اول يوم بين ترتيب ملابسنا وترتيب البيت وغسلنا المسبح من ثاني يوم بدت مغامرات باسبانيا
ماخليت مكان ما رحتله رحت لمكانات مشهور للتصوير ومكانت عرض الافلام اسبانيا تخبل وطبعا يوميا اخبر الكل من امي واني نازلة لي اصغر نفر
شكلي نشاز بنص الاجانب اشوف لبسهم وحركاتهم هناك مو مثل العراق كلشي يختلف مرهم تضحك على حركاتي هاي اول مرة اسافر
اصور بالمكان 100صور وكلهن انزلهن ستوري اكو حساب يتابعتي بصمت اسمه ابو نسيم
عرفته مال منو كلت هاهيا خل ادقهم ابينله اني مو مهتمة بوجوده حال من حال غيابه الحرية لوحدها هنا تكفي
مشت الايام باسبانيا بسرعة بقينا هناك مرهم اخذتني لبيوت صديقاتها 2عربيات مغتربات ووحدة اسبانية وكلهن يحجن بطلاقة لعد شمالني ثولة بنصهم
جنت الكط كلمات مثل يكلولها اختج ماتشبهج تكللهم تشبه ابوي ويكلولها اخبار سيف ما رجعتو تكللهم لا وكذا
عرفت درب البيت للسوك واحتجنا غراض توسلت بمرهم اريد اروح وحدي
مرهم: ولج انتِ وين جاية لهنا قبل؟
: تعودت عليج الله حبابة فدوة
: لا وهم ماترحين لمكان وحدج افرع ومتاهات اكو هنا
: اندل والله اندل واذا ضعت اتصل بيج ماشي
: وهم بس اسمعيني....
: لااااااااا
: هف من يبسان راسج تروحين وترجعين بدربج
: ماشي
: ماتحجين ويا احد
: ماشي
: لا تستكشفين
: اهووو دكافي ولي عاد
كلتها واخذت جنطتي وطلعت بيها 300يورو بس طلعت
اتمشى هم كالعادة فتحت لايف وامشي واحجي عربي ويا متابعيني لو اغني
حكيت خشمي وباوعت اضافري طوال
: فدوة اضافري اموت عليهن جنت اكصهن لخاطر ناس ماتستاهل
كلتها وباوعت للفون وضحكت يعني اني ادري بيك داتشوفني
رحت للسوك وصلت اشتريت اغراض احتاجهن بالبيت فواكه وكذا بس هما يبيعون غالي حيل يعني احنا ناخذ بالعراق كيلو الموز بالفين هنا الموزة بيورو اليورو يساوي تقريبا دولار وشويا
: يالله هنا لازم اجيب وياي خزنة امي الاغراض بالنار بس ميخالف احسن مااكابل وجوه البعض
سديت اللايف لمن اشتريت كل الاشياء الاحتاجها ومشيت ضليت عدل لبالي هوا هيج يروح دك الفون شلته جان محمد لبست سماعات وخليت الفون بالجنطة مالي
: ها ولك شلونك؟
محمد: هلو عيني
: شوماكو ولك؟
: والله هياتني طالع افتر كلت اخابرج بين مااصل
: وين رايح؟
: جاي عليج
: بربك؟
: والله خل ناخذ مرهم نفتلها شويا ويانا
: ماادري اذا تقبل تطلع هي بيتوتية
: نخليها نخليها خل بس اصل
: شكد بقالك اني دامشي ورادة للبيت هسة
: وينج بالضبط؟
صفنت اني مااعرف شسم المكان وماجان هذ طريقي
: ماادري
محمد: بربج
: والله
: وتالي وياج
: ماادري اوكف اني اول مرة اجي لهنا شسالفة
: وهم
: والله اني وين فتت
: ابقي بمكانج جايج
: ماادري ويني ولك ضعت
: بس اصبري دزيلي الموقع مالج واجيج
: ماشي
ذبيت العلاليك مالوتي بالكاع وطلعت الفون دزيتله الموقع
محمد: ضلي وياي لا تكطعي واي احد يصيحج غيري لا تردين
: اني وين محمد؟
: انطي مجال هياتني كريب يمج ثواني واوصل
: اوك
كلتها وبقيت واكفة بمكاني
ثواني وسمعت صوت هورن السيارة نداريت شفته هوا نزل منها وجايني رحت ركض علي
محمد: شوصلج لهنا مشمشة
: ماادري
: ما تندلين بيتكم اوصلج
: اني لو اندل شجان ديجيبني لهنا ثم تعال انت شلون جنت جاينا وانت ماتندل البيت؟
: اعرف المنطقة مو البيت اكيد اتصل بيج تطلعولي ونروح
: ديالله وديني للمنطقة وادليك اني اعرفه بيتنا لون بابة جوزي
مسح وجهه وصعد بالسيارة
اني ماردت اصعد ويا مااعرفه وهاي اول مرة نبقى وحدنا ترددت بعدين تذكرت اني مااندل وهوا اخر امل اليا خمو اضل افتر بالشارع وهذول من يحجون تكول شعوذة مو لغة
فزيت من ضرب هورن حت اصعد ورحت صعدت ورا باوعلي ورفع حاجبه مو عاجبه
محمد: وين تروحين يا انسة
: لبيتنا
: صدكت نفسها كومي تحولي كدام سايق يمج اني
: هاا
: تعالي كدام تعاي
حولت صعدت كدام ومشا ودانا للمنطقة كتله اي هاي منطقتنا
محمد: الحمدلله عرفتي وين بيتكم
: هاا
: استغفر الله
: ددور وياي
: اي وين شايف بيتكم اني
: اوكف اتصل بمرهم لعد
اتصلت بمرهم ودلته ع البيت وصلنا من الباب ما قبل يدخل كللها
محمد: مو كتلج لا تعوفيها وحدها
مرهم: شصار؟
: ما تندل الطريق وطالعة عدل
: بلجي تمام ولج وهم
: اي شسوي مااندل
مرهم: ولج شكد لحيت عليج ما ترحين بس راسج قوي
: واشلون نضل بلا موز؟
نتبهت اني جفصت محمد ضحك ودنك اني تفشلت تمنيت الكاع تنشك وتبلعني بذاك الموقف عفت كلشي واخترت الموز عود دكحلها مالت عليج وهم
مرهم نيتها صافية ما تشطح ثولة
مرهم: ليش احنا قرود حت ما نكدر بلا موز ولي عذر اقبح من ذنب
شوف تشبهنا بالقرود
ضحك ما حجا شي واني ميتة من الفشلة عذااا شهل خزي
شكد توسل بيها دانطلع ما قبلت اني ما لحيت لان ماجنت اريد اطلع هوا راح منزعج
هوا راح وصرت اسمع الشتايم ب5لغات مختلفة الحمدلله ماقصرت بيا مرهم سوت كرامتي وصلة مال مسح
من كملت رزايل بيا كتلها بهدوء
: ترا جوعانة دزي على بيتزا
مرهم: ربي جاي تشوف الطم اشك ثوبي انتحر اهلهل
: شبيج؟
: ولج ذاب كلبي واني احرب واصيح على غبائج وهسة تكليلي جوعانة اريد بيتزا؟
: هسة ديالله حبابة فدوة
: اطلعي وهم من كدامي لا اشك حلكج اطلعي
رحت ع غرفة الحجزتها من اجينا تمددت بفراشي وحالها حال بقية الايام نزلت عليا الكابة
كحيلة.
ورا سفر وهم ولليوم الحال مثل ماهو كلشي ما تغير
متيم صح مايزورها هواي من زواجنا وصح ميخابرها بس جان اثر روحتها هي واختها جبير بكلبة
صار كل يوم يتصل بيها ونحجي وياها عادي علاقتنا حلوة
كاعدة اقلب اتصلت بيا استبرق استغربت فتحته جان اتصال كام
استبرق: هلا والله بجنتنا
: اهلين بيج كلبي
: شلونج شخبارج
: الحمدلله اسئل عليكم وين زوجج
: دايحجي ويا وهم
: ياااع ليش
: هههههه شنو ياع تعرفي شكد يحب وهم وشلون يشوفها
: اعرف شكد يحبها واشلون يشوفها بس الدور الباقي عليج انتِ تعرفين
: اكيد اعرف هوا بنفسه يكلي وهم اختي وغالية عليا
: هههههههههه عليج هم جان يكول اختي
: لا ماصايرة قبل
: وعلى جودي هم
كالتها وغمزت خلت النار تولع بيا ماجاوبتها
: ولح شنو من بشر انتِ شويا فتحي عينج لا تضلين فاهية ترا وهم بنت خالته وعرفها على كبر مو تربو سوا حتى نكول مثل اخته لا من عرفج عرفها ومن نسئله ليش تحب كحيلة يكول لان تشبه وهم صفرة مثلها
: كلامج هذ كله اعرفه
: بس دااوضحلج انو اشكد ماكلج ترا مو اخوة هما هاا
: اذا ما محتاجة شي دااروح
: لا قابل شنو دحتاج منج مثلا
سديته بوجها وضجت من كلامها اني مو عربانة دااندفع من حجيها كل لبالها يشيل كلبي على وهم ما تعرف شنو وهم بالنسبة ليا
مو سنة او اثنين اني اعرفها ومتيم صح مو من زمان ويا بس اني حافضته صم مستحيل يفكر بغيري
تعوذت من الشيطان وكمت والله يالله تحرضني على زوحي واختي
صفنت بس هم كلشي ممكن منو جان يتوقع حاذق الصارله 20سنة ويا وهم يخونها جمالة اني الصارلي ويا هالاشهر البسيطة مدايخوني وهيل جانت صديقة وهم بعد
لا لا كحيلة وعي لروحج شدتحجين مستحيل هيل ناقصة وساقطة السوتها وهم مو مثلها لا تضنين سوء بالبنت لو يريدها ضلت شكد كبال عينه بلا غباء
فززني متيم وهوا يصيحني
متيم: وين كحلتي؟
: هياتني
: تعاي كلبي اريدج
رحتله جان متمدد ع الجرباية باوعتله شافني وضحك
: شبيك تضحك
متيم: من اشوفج افرح تعالي بابا تعالي
كالها والسعادة غمرتني رحت نمت بحضنه
وهم.
اتضاهر كدامهم مو ببالي شي وفرحانة واحشش واطلع بس كله جذب
ما ببالي غير شي واحد بس هو شلون كدر بسهولة ينساني من سافرت لهسة ما تطمن على احوالي ما سئل عليا اني اعرفة يتابعني بصمت
واعرف حسابه ابو نسيم اول مشاهدة للاستوري واول مشاهدة للايف ما يعلق على شي ولا طاب خاص ابد بس اعرفة مدري جنت اقنع روحي هذ هوا
غمضت وتذكرت ذيج الليلة الكشرة الي ماتقبل ما تروح من بالي او بالاحرة اني مااريد انسهى
حت ما احن اله فتحت المجر جايبة ويايا علبة صغيرة من عطره جانت مليانة بس بكد ما استعملها خلصت تقريبا
شميتها بعمق ماادري مشتاكتله ماادري دااتذكر تصرفه واحقد علي بعد المهم اشمها
كمت من فراشي رحت سبحت وطلعت بالبرنص داادخل للغرفة صاحتني مرهم رحتلها
مرهم: تعاي
: وين؟
: مو ردتي تتزقنبين بيتزا تعاي طلبتلج
: والله
: اي لحم وخضار تعالي كلي
كعدنا ناكل اني وياها تذكرت متيم يوم الطلب اكل ب50الف وهجج امي كمنا نضحك وكعدنا نتذكر سوالفنا بذاك البيت
ولا تكول قبل شويا نسحلت كرامتي مدري اني وجهي متين مدري شلون صارت
بس هذ حال كل الخوات تعلك بيناتهم العركة للضالين ويتكافشن والمسبة والاهاين ورا دقايق يتصالحن كان شيء لم يكن
اليوم صارلنا شهرين عدل احنا مسافرين ماكو اي اخبار عن حاذق حت ربعي ميحجولي عنه ولا اني اسئل
مع اني ميتة دااسمع خبر واحد بس الكرامة ما تقبل
بالليل وكالعادة كاعدة اقلب بالفون اتصلت كحيلة كامرة فتحته وكعدنا نسولف
: ها ولج زين جيت ببالج بذاتة
كحيلة: ليش والله ماترحين من بالي
: من سافرت لهسة بس مرات مخابرتني
: شنسوي ياعيني والله مدافضة وابن خالتي عقله بالدقايق وخلينا ساكتين كل شويا تعالي اشوفج الطيور
: ههههههههههه
: وجع
: شكو شماكو ولج تعالي بس انتِ تجيبلي الاخبار
: مشتاكلج الكل والله اول شي وثاني شي جنت ببيت اهلي اليوم
: امممم شخبارهم
: زينين مابيهم شي غير عالم البيهم
: اممم منو هما ولو ميهمني
: مادام ميهمج مالازم
: كلي قنادر واحجي يالله
: ههههههه اي ماشي سمعيني
: اي
: شوفي رحت لاهلي وكت زيارتي لان وكذا وتعرفين ابن خالتج يحب كلشي من ريحتج ههههه
: رحتو باللامبر مو؟
: طبعا
: كملي بعد خالتي كملي
: اي نزلت سلمت ع الربع وكذا شفت حاذق طلع ركض من سمع صوت اللامبر بس من شافنا نزلنا منها خاب امله ههههههه راح على شاهين يهمسون لبعض وراها بدقيقة اجاني شاهين كلي دسئلج ولا تكولين لزوجج كتله ماشي
: اش سئلج
: كلي اذا جان بعد بالسيارة عطرج لو لا
: عطري اني؟؟
: يس
: ليش؟
: يعني ليش مثلا
: اممم
: كتله لا ماكو هوا انتِ السيارة شضلت عندج ديضل العطر بيها اصلا وراح كله واني فتت لبيتنا ويا متيم
: اممم احسن
: بس ترا السيارة بعد بيها عطرج لان ما استخدمناها بس هالمرة والله من رحتي لهسة
: اي عطري اصلي هههههههه
: لا وانتِ الصادكة مخلية علبة العطر بيها ومكسورة شويا
: لااااا حرامات احب هالعطر
: هسة الملخص وهم دكلج ترا حاذق مدمر والله اني شفته صاير سلابات
: شسويله؟
: لا وهم شوفي ما راح تجذبين عليا ترا حافضتج اني جم سنة احنا سوا ومو فزعة بي
: اي شسوي يعني؟
: والله مو فزعة بي وهم انتِ تعرفين شكد احبج بس والله ميت وراج شفته اليوم ماهو حاله ضعفان ومدنك عيونه مغورات بس يصفن وصاير يدخن
: حاذق يدخن؟
: والله الجكارة بنفسين تخلص شاهين يكول النهار كله بالشغل من يرجع يضل برة ما يطب البيت للتالي الليل وينام بغرفتج مايطلع منها وهيل صايرة انجس من حاله تحسين راحته من يكتلها يوميا واكعلها دك كفخ محملها مسؤلية روحتج
: خمو شاهين عايش ببيتهم؟
: لا بس هوا كلشي يحجيله
: هسة لفينا ماعليا
: شوكت ترجعين؟
: قبل محرم يمكن بس لا تكولين لاحد مو اكيدة
: تعيدين باسبانيا
: ايي ماضل شي للعيد اجي قبل محرم بكم يوم حت نصوم
: امممم خوش لعد تنورينا
: مو اكيد ترا لا تكولين لاحد
: اي ماشي
سلمت وسديته ورحت لمرهم نزلنا للسوك اشترينا اغراض للعيد وكذا ملابس واكسسوارات
اني اصوم قبل العيد ب 10ايام مرهم ما تصوم بس يوم عرفة وكعدنا نسولف اني ومرهم بيوم عرفة
مرهم: اكول ما شتاكيتي للعراق؟
: احد ما يشتاك لبلده؟؟
: ما تريدين نرجع عاد
: لا
: هاا ليش؟
: تعرفين الشفته هناك والجريته هنا اطيب واحسن
: واهلنا
: يتعودون
اول يوم العيد خابرت الكل ابتداء بامي عايدتها وامي شموخ وابوي من خبرتهم ضلو يبجون واني ابجي وياهم مرهم بس تباوع امي تحجي وتمسح بدموعها
خابرت اختي هرم واخوتي كلهم ادم بس يباوع ويحرك بحنكة مايحجي ومتيم وكحيلة اخير شي خابرت اصدقائي يمي ساعة 11يمهم 10الفرق بينا ساعة وحدة
خابرت نظر جانو برا كاعدين شاهين ونظر وانصدمت من شفت يمهم زاهر شلون صاير سمين ومدبدب ولابس نضارات عايدتهم واستلمتهم تصنيف
: ها ولكم مشتاكين ولك زاهر هاي شلون صاير حلو
زاهر: اي شعبالج حياة تغيرت الموصل تجنن جامعتها
: اش طلعلك ولك
: تربية قسم انسانية قسم عربي هسة اني صرت مرحلة ثالثة
: اني هم ثالثة صرت بس اني ادارة اعمال
: مو جنتي اداب اعلام؟
: اي تحولت شبيك
: يالله الله كريم
: شكو شماكو؟
: ماكو والله مشتاقلج كالو مسافرة وو...
: شنو؟
: عرفت بالصار خويا شوكت ترجعين مشتاقين
: امممم ضل احد مايعرف يالله كلشي قسمة
: شوكت تنورينا تعالي قبل ماارجع للموصل
: مااعرف والله زاهر يجوز ماارجع هنا العيشة تخبل حرية وبلا قيود محد يدخل بيا ولا احد يكلي كصي اضافرج لا اكص راسج او غيري لبسج لا اشك حلكج مرتاحة هنا
اشوفه من احجي يرفع عيونه كدامه يباوع لاحد ومبين بنضاراته كلت خل استغل الوضع
: اي والله شوف مثلا البارحة رحنا فطرنا بمطعم اني وصديقي محمد اليطلع وياي باللايف حت مرهم ما اجت بربك لو بالعراق منو ديخليني اروح وهاا شوف ششتريت للعيد
طلعت بلوز نص ردان وشورت جذب ما البسهن بس بالبيت
: شوف هذ الشورت شبر والله البسه واطلع محد بباله اني هذ اذا البسه بالعراق الرصافة كلها تلحكني ههههههه
طلع الكباله نظر مو حاذق امداني واني كاعدة احجي
نظر: لابسة شورت شبر ولج
: هذ انت؟
: قندرة رحتي هناك نزعتي الحيا لو شنو
: بس خل افهمك
: انجبي ديري بالج تحجين والله اشوفج لابسة هيج بعد اموتج وهذا محمد مدري محمض بعد ما تطلعين ويا
: ادلل
: وملابسج
: ولك والله مقلب ماجنت اعرفك كاعد كبالة اتشاقة والله اتشاقة
: هاااااا لبالج غير اوادم موو؟
كالها وغمز ما حجيت دار الكامرة الخلفية شفته جاي طالع للكوفي فعلا احواله متدهورة يمشي مدنك وحيله مهدود مدري وين سارح بتفكيره كعد يمهم مايقبل احد يعايده
حاولو ويا ديكلولة كل عام وانت بخير رفضهم وكعد كال لاحد يعايدني
كتلة: حت اني ما تقبل اعايدك؟
شفته فز وسحب الفون منهم يباوعلي ضل صافن واني اباوعله دنك لزم عيونه وكام راح من يمهم
: اخ ياضيمي انتي
: شلونك؟
: شلون تشوفيني؟
: مبهذل
: عاجبج حالي؟
: لازم هيل ما مريحتك؟
: ليش دا اشوفها اصلا
: شلون ماتشوفها مو زوجتك
: عوفج منها شخبارج؟
: مرتاحة الحمدلله
: بس اني مو مرتاح وهم
: اممم والله مبين هيل مقصرة وياك شنو متسويلك اكل ماتداريك
: وهم ارجعي
: ماا
: الخاطر الله وهم والله راح اموت روحي خلصت وانتِ ماكو
: لا ما تموت هياتكم عايشين الحمدلله حت مو ببالك اني
: شنو تريدين وترجعيلي؟
: مااريد شي ولا ارجعلك لو تقلب نبي من الاخير
: اطلكها والله مااخليها بس ارجعي
: حاذق صارلكم شهرين متزوجين لو تريد تطلكها جان طلكتها
سكت ما رد بس دنك وجر حسرة احسها تطلع من كلبه يعني عاجبك الوضع الاحنا بي هسة كلمن جوا نجمة
رجع كلي والخنكة بصدره
: اي شلونها مدريد؟
: كولش حلوة مابيها احد يكلي اضافرج مال شيطان
: هههه والله اضافرج مال شيطان كون الزمهم والله اشلعهم
: الحمدلله ماراح تلزمهم بعد ولا تشوفهن ولا تشوفني
: لاتكولين هيج فدوة
كالها ودنك مختنك فكرت احجي لو لا كلت بتردد
: ما اشتاكيتلي؟
: والخلق جتال مرحب مشتاكلج بكد رحمة الله كلبي صاير جهنم عليج
: اووف جهنم
: والله جهنم باردة يمه تعرفين شصار بحالي من رحتي لهسة ما احجي بس شوفي وجهي شوفي جوا عيوني الليل كله بس اطمش على صورج
: يعني زوجتك ممعوضتك غيابي؟
: اول شي محد يكدر يعوضج غيابج انتي حيلي منو اليعوض الحيل
: وثاني شي؟
: هيل مااشوفها اصلا والله احسبي حت غرفة ما اشتريتلها والله جبتلها بس دشداشتين وهي وامي راحو جابوهن
: لليش تشتري غرفة موجود الفوك
: لاااااا ذيج غرفتي محد يفوتلها غيري من اطلع من البيت اقفلها واخذها المفتاح وياي هيل تنام يم امي
: هههههه شلون مرة هاي معقولة
: وداعة نسيم
صفنت تذكرت شلون جانو يصيحوله ابو نسيم باوعتله ما حجيت
حاذق: والله شليتي كلبي والله
: امممم
: تحبيني وهم؟
: لا
: امبلا تحبيني
: لا اكرهك
: لو تكرهيني عليش تحاجيني لعد هاا
: ما تهون ال20سنة حاذق اني مو مثلك
هم ما حجا دنك راسة رفعت حواجبي يعني هيج احسلك
حاذق: وهم هيل ما تضل على ذمتي والله اطلكها يهون عليج اضل بلا مرة
: انت مو كلت هيل ما تنحسب مرة؟
: اي بس خمو اضل هيج فدوة بس رجعي سولفي معاي ع الاقل مو كلبي طك
: ترا انت بديت بهل شي مو اني خليك اندم شويا
: والله ندمت والندم طلع من عيوني وكلبي طك اتبهذلت احوالي وشتعل جد جدي ونعلتي اصلي واصل الخلفوني ترا اني راح احبل بنسيم
من كالها ما سيطرت على روحي طكيتها ضحكة
: هههههههههههه
حاذق: يمة فدوة لهل ضحكة عساها لا فاركت هالوجه وتصير كبالي
: والله ما فاركته لا تصدك ما تشوف لايفاتي
: اممم تمشيهن علينا ياضيم الله ماطالعة من كلبج اعرف تفكرين بيا
: هء ماافكر بيك
: احلف يمين طلاك من راس هيل ما تفكرين بس بيا
: يعني انت تعرف السويته بكلبي
كلتها بغصة ومسحت عيوني ردت ماابجي
حاذق: كون كلبي ولاكلبج ياروحي انتِ
باوعتله جان مكسور عيونه تلمع
اجا شاهين اخذ تلفونه منه
شاهين: يالله خويا احنا هم بشر نريد نعيد نصخم نطلع وانتي لزكتي يالله باي
: تفوو يا حقير باي
سديته والحسرة بكلبي ومتاكدة بكلبه هم بس هي هاي قسمتنا شنسوي
اجت دخلت عليا مرهم كالت بدلي
: وين؟
: نطلع
: وين؟
مرهم: اكو عالم اسلام اهنا ترا وديحتفلون بالعيد مشينا نحتفل وياهم
: شوكت نرجع للعراق؟
: هاا
: شوكت نرجع للعرااااق؟
: مو كلتي تريدين تبقين هنا؟
: يعني ماراح نرجع؟
: شوكت تريدين دااشوف الطيارة شوكت تقلع
: اممم قبل محرم
: بعد طويلة لمحرم حبيبي
: امم ادري
: يالله كومي غيري ملابسج عاد دنطلع
بدلت ملابسي وحطيت ميك اب خفيف اصلا مو ببالي جنت افكر بكلام حاذق ومنضره صاير جلد على عضم شلون جان قبل معقولة صدك يحبني ومتندم ع الصار يريدني ارجع
او دايكول هيج ديضحك عليا او بباله غير تفكر او ممكن يريد يسوي بيا مثل هيل ويعوفني حت تنكسر عيني معقولة يسويها
لا لا مو ممكن ميسويها مامسويها قبل مستحيل
بس لا ليش ميسويها كلشي ممكن يسوي هذ مو خاني ويا هيل هم مبين علي التعب خطية
ضلت فكرة تاخذ وفكرة تنطي الا ان اجت مرهم اخذتني وطلعنا
احتفالات للعيد المسلمين قسم محجبات وقسم لا اكو عرب من كل الجنسيات واكو عالم داتذبح بس بمكان مخصص لو بجوامع والكصاصيب يوزعون
هواي حصلنا بس ما نعرف نطبخه ثنينا ننطي لغير عالم احق منا وقسم اخذنا كلنا باليوتيوب نطلع طبخات
فترينا وصورنا وفتحنا لايف بس مشاهدات قليلة مبين عالم مو بلبيت طالعين اول يوم العيد بعد
اتفقنا ويا محمد اجا علينا وكمنا نفتر بسيارته ورحنا مطعم تغدينا ومدينة مائية ونسة فول مبينين عراقين من بعد سنة
شفنا عرس بالشارع والقس ديباركم مدري شنو نزل محمد يركص ويطك اصباعة وياهم يباوعلوله بستغراب لبالهم مجنون هههههههه ما يدرون هذ ابن الرافدين
رجعنا ع البيت فتحت لايف اول طبخة الي طلعنا طريقة عمل اللحم باليوتيوب وطبقناها هاي اول مرة تضبط بيدي طبخة الحمدلله
مشت ايام العيد وخلصت طبيعي ما خابرت احد بس كلام ومنظر حاذق ببالي لمن حاجيته ماراح اشكد اتلافه انسي روحي ماكو بعرض الحايط
اسكت كلبي اكله لا تنبضله لا تخلي ببالك مو وياي غصبن عني اتحصر علي
غلست علي ونمت كعدت على صوت التلفون فزيت لزمته بثواني لبالي رجعنا مثل قبل اكعد على اتصاله
ضربت روحي راشدي عود دصحى نزلت ورا العيد مرهم تحضر بالجنط
: ها ولج شكوو
مرهم: كومي وهم بسرعة حضري غراضج
: ليش؟
: دا نرجع
: مو كلنا لمحرم؟
: حضري دا نرجع بسرعة اليوم اكرب طيارة فضيني
: ولج شكو ما حسبت حساب لشي غير تحجي
: ماكو طيارات لمحرم خلي نرجع اني اصلا كرهت الكعدة هنا اجيت درتاح بس مو عيب وين من اروح لازم ينعل كلبي
: غير افتهم
: وهم تجين وياي لو ارجع وحدي الطيارة تروح العصر
: لا اجي وين ابقى خل بس اروح الم غراضي
صعدت واني اصفن شبيها هاي نثولت يالله مو مهم خل ارجع هم اريد اسوي اشياء بالعراق
طلعت ع السريع لميت ملابسي وتلفوناتي وكل الغراض الجبتهن والاشتريتهن حت الجنطة ما كفت خليتهن بعلاليك
كملنا كلشي نزلت جوا جوعانة اريد اكل بلا ريوك ماطالبة اكل
: اكول مرهم شو ماطالبة اكل
: اكو لحم من الاخذنا اكلي
: شبيج مو طبيعية اليوم؟؟
: وهم احمي الاكل واكلي لو روحي من يمي احسن
هاي شبيها نجنت فتت للمطبخ حميت الاكل واكلته احنا رايحين عليش نذبة بكل الحالات
خلصت وطلعت خابرت محمد كتله راجعين انصدم لان كايتله ماناوية ارجع ابد
محمد: شنو ترجعين وين اولي اني؟
: والله صارت على غفلة هسة مرهم كالت لو تجين لو تبقين
: هاي ليش؟
: مدري ما دا تنطي رد
: اهووو اني ما صدكت يجيني احد اعرفه بهل بلد الزفت
: تعال ارجع ويانا
: وين ارجع اني مكاني هنا مااكدر
: اني العصر رايحة كلت اودعك
: ضوجتيني والله وهم
: لا تضوج عيني راجعتلك قريبا
: كلها تكول هيج
: لا والله ارجع
: ديالله خوش
: اكمل لم غراضي اني يادوب والشريحة الانطيتني هي راح احطها بالبريد عود اخذها
: ديالله مشمشة باي حستفكدج هواية والله
: واني بعد والله
سديته ورجعت الملم الغراض واني اجمعهم رجعت افكر بحاذق معقول اذا نطيته فرصة ثانية راح يتركها لو لا او ممكن يكون يجذب عليا
صار الوكت طلعنا من البيت وقفلته صعدنا تكسي وحاجته للمطار
الطريق كله ما تحجي ودايرة راسها ما افتهمت الصاير
: بس بردي كلبي بحجاية مرهم الله يخليج شكو
: اجازتي خلصت ودا ارجع للشغل
: اجازتج جانت اطول من هيج
: عاد رادوني ودرجع وهاهيا كافي حجي
هاي ليش اسلوبها هيج تغير البارحة ماجان بيها شي شسالفة يربي
وصلنا المطار بعد شويا تطلع الطيارة لكينه محمد هناك سلم علينا توادعنا لباله ماارجع مرة ثانية
طلعنا بالطيارة واقلعت الساعة 4 جان الوضع كئيب حيل مرهم ساكتة ما حجت ولا كلمة واني مااكدر احاجيها لا ترزلني فشلة
اجت المضيفة مرهم ما اخذت الاكل بس اني اكلت وجبتين ههههه
شويا بالطيارة مرهم تخربطت وجها صار اصفر وراحت للمغاسل لحكتها وكفتلها بالباب اسمعها تتهوع ورجعت تتقيء وكفنا اني والمضيفة بالباب حت ما تغدت شدعوة هلكد
: ولج مرهم بس خل اطب وياج
ماترد اشتعلت شموسة ولي مرهم
المضيفة تحجي اسباني بسرعة ما كدرت افتهم كل حجيها بس افتهمت انها كالت تحتاج دكتور او عدها مرض
: اني مو سريعة بالاسباني
: اذا ما تتحمل تصعد الطيارة ليش اجت بالجو
: لا تتحمل بس عدها ضروفها والضاهر وعكة صحية خلتها هيج تصير او يمكن الاكل مو والمها
دقايق وفتحت الباب مرهم ترجف ووجها اصفر طبيت وياها غسلت وجها وركبتها هي بالدوب واكفة
كتلها تحتاج بعد اشرتلي لا ورجعنا كعدنا بمكانة حطت راسها على كتفي وغمضت تجر كل حسرة ورا الخ شطولها
وكعت كلبي برجولي كلت لا يصيرلها شي مااعرف اتصرف بهيج حالات هم اهلي ما كنالهم رادين احنا شويا وحسيت عليها نامت ماادري اغمى عليها عفتها
وصلنا لتركيا ب8 بالليل بتوقيت العراق كعدتها ونزلنا ناخذ بريك كعدنا بالكافتريا مال مطار حطت راسها ع الطبلة مو عاجبني وضعها ابد وجها اصفر مبين حت من فوك المكياج ايديها صفر
اجيت يمها كعدت فتحت عيونها تباوعلي
: شلون صرتي؟
اشرتلي تمام وغمضت
: ها مرهم ما تحجين لاختج هاي عود اني كلشي احجيلج
رفعت راسها بملل وباوعتلي
مرهم: شحجيلج حبيبي؟
: مرهم ترا اني اختج والله وشكلج هيج خرعني والله كلبي برجليا دسولفيلي شبيج
جرت حسرة
: سيف يريد يخطب
: هاا
: سيف يريد يخطب
: وهذ سبب رجعتج للعراق دا تشوفي شلون يتزوج؟
: لا هوا لحكنا على اسبانيا دايخطب
: شلون؟
: ماادري هوا من سمعت هوا باسبانيا كلت ارجع للعراق
: شلون عرفتي
: خابرتني ميار اخته
: اي
: اي بس
: وانتِ هيج صرتي على موده حبيبي خل يولي
: مو على مودة اني على روحي وثقت بي وتزوجته وسافرت ويا وكلشي سويت لخاطره تالي هيج يجازيني طلكني ورماني راح يصير سنتين وقصور وهسة رايح يتزوج وحدة اجنبية
: خويا لا ديرين بال هوا واحد ناقص صايع
: وهم
: لا تحجين هاهيا يالله طيارتنا راح اطير كومي نرجع وشدي حيلج كلبي ترا محد يستاهل كل هالشي منج
رجعنا للطيارة هي ما تحجي بس تصفن عذرتها مامريت بضرفها بس اعرف لوعتها
نمنا بالطيارة المسافة مو كلش طويلة وصلنا مطار بغداد ب12 كعدتنا المضيفة ونزلنا رحنا كملنا ختم ومدري بهل امور ماجانا احد يستقبلنا لان جينا غفلة
طلعنا صعدنا بتكسي كال وين
: لل.........
: اي خويا بيت منو كرايبي هناك
: تعرف ادم؟
: الرائد ادم؟
: ههههه بس لو اعرف منو مايعرف ادم
: اي شلون هذ الضلع
: يالله زين
: انتِ بته
: هههههههه لا اني اخته الصغيرة
: هلا بيج اختي ادم عزيز علينا
: الله يعزك اخويا
مرهم ما فتحت حلكها بحجاية
مشا وصلنا للبيت ونزل الجنط والعلاليك ويانا بالبداية ماقبل ياخذ كروة بس اقتنع تالي
دكينا باب الحديقة وفتحت سناب دااصور ردة فعل الراح يفتحه فتحته خالة خولة تفاجأت من شافتنا حضنتها وحضنتها مرهم وخزنت التسجيل
سئلت خالة اذا جانو كاعدين كالت اي امي وخالتي جوا واستبرق ادم ملتحق
دخلت وفتحت تسجيل دااصور رياكشن امي وفعلا من شافتنا نصدمت جمدت بالبداية بعدين كامت تبجي وحضنتنا واحنا نبجي وياها تكول صارلنا سنين مو شهرين
خزنت التسجيل وسلمت عليها بقوة حيل مشتاكتلها هم حت انشره ستوري باجر
سلمنا ورحنا نمنا جفي على وجهنا كضتها مرهم نايمة صبح وليل خطية مبين مقهورة من طلكها هم صارت هيج
كحيلة.
هذ ميسمع الكلام بلا اغرائات لبست سيت ورحتله اعرفه يفقد على هاللون عليا
بديت اتدلع علي لابسني كلت خل احجيها هيج
: متيم اريد طفل
جان يشرب عصير نزله من حلكه وكلي نسوي
: والله
: اذا نفسج بطفل ليش لا
: الله لا يحرمني منك
: بس مو هسة
: لعد؟
: ورا الكلية
: والله ماليا واهس ادرس
: يصيرلج واهس كلبي ليش لا ما اريد يتحطم مستقبلج باجر بعده بلجي متت غير شهادتج تسندج
كالها وسديت حلكه
: لليش هالسيرة ياعمري؟
: هذ حق
: عوف الحق وتعال بحضاني يا كلبي
: انتي تتحارشين ترا
وهم.
كعدت من الصبح غبشة سبحت ع السريع وسشورت شعري مشتاكة لغرفتي واغراضي
بس كل تفكيري يم حاذق مشتاكتله اريد اشوفه واشم عطره واحاجي وضعه بالعيد مو مريحني
لبست بنطرون وبدي بيجي وسترة وحذاء كعب كلكلي وجنطة هم راهمة عليهم لبست
اكسسوارات كومة رغم اني مااحبهن واكيد اسوار ادم هذ ما انزعه راح يلزك بجلدي
خليت عطر مكياج خفيف وطلعت لكيت امي كاعدة عجب ساعة توتها 7شمكعدها
شافتني ضحكت وفتحت ايديها رحت حضنتها مشتاكتلي صارت تبوسني وتشم عطري
امي: يمة شكد مشتاكتلج
: اني اكثر والله اسبانيا ماتسوا بلاج
: وين طالعة؟
: داخذ سيارتي من متيم خليتها عنده وهم راح اروح على ربعي مشتاكتلهم
: خابري ويجيبها
: لا دروحله اني وللربع
: يمة مو كتلج ابتعدي عنهم
: اي يمة شسوي ربعي احبهم
: يالله يمة بكيفج
: نطيني السويج خمو اروح بتكسي هسة حاذق يشك....
: وشدخله؟
: نسيت والله يالله نطيني السويج
: وهم ماما لا ترجعين بقرارج اي لا تنسين هوا عافج وتزوج
: اممم
: وهم
: اي يمةة اي ششفتيني سويت وها اتصلي بهرم خل تجيب ناكر ونكير مشتاكتلهم
: ماما شنو ناكر ونكير عيب وهم اختج ملتزمة بشغل
: انتِ كليلها ونشوف
سلمت على امي واخذت مفتاح سيارتها ورحت لبيت متيم ما يعرف بيا راجعة كلت اسويله مفاجأة
وصلت بيتهم وطلعت تلفوني اسجل اول تسجيل خلص ومحد طالع لغيته صورت مرة ثانية دكيت الباب فتحلي متيم شافني نصدم ضل مبحلق عيونه اني شفته كمت اضحك
هوا ضل صافن يستوعب بالبداية بعدين الضحكة شكت وجهه وصرخ
متيم: هاااااا يالثولةةةةةة
: ها يالسكط
شالني حضني وافتر
: ولك نزلني خزيتنا عيب افتهمنا مشتاقلي
: ولج مشتاكلج بنت العفريت
: دنزلني ولك اخاف
نزلني والضحكة ماراحت من وجهه حضني حيل بادلته وكطعت النفس عن لا ابجي هو صوته باذاني تقريبا يصرخ
: ياروحي ياروحي ياروحي
: اشتقتلك هواي هواي هواي
: ولج والله انتِ اغلى من استبرق والله
: اعرف اعرف وين مرتك
: هسة اكعدها ام تيم
: بربك
: لا اتشاقة هي تكول صيحلي ام تيم
: اي تيم متيم ماحلو
: خل بس يجي وعسا ما تسمي شموسة هسة اكعدلج هي
: لا لا اترك اني اكعدها خلي افاجئها
دخلت ع الغرفة جانت لابسة قميص نوم وبسابع نومة حالتها مجعوصة ومكياجها سايل بالبداية خجلت من متيم بس متنت وجهي ودخلت
طبطبت على كتافها كتلها
: ام تيم ام تيم كعدي
: امممم متيم دعوفني الخاطر الله ما تبزع انت
: ولج ستحي شهل كلام راعي اكو سنكل كدامج
فتحت عيونها تريد تستوعب نفس تصرفات اخوها
: هاا كحيلة شبيج؟
باوعتلي وبحلقت عيونها مصدومة تباوعلي من فوك لي جوا اني من شفتها ضحكت حضنتني بلهفة واني هم حضنتها تاثرنا شويا
: دصحصحي بعد عمري
كحيلة: عااااااا ولج شوكت جيتي
: لبارحة بالليل
: توني اعرف والله
: محد جان يعرف والله حت اني ع غفلة صارت وجينا وصلنا ب12ونص للبيت وهسة من كعدت اجيتكم اول شي
متيم راح دايجيب ريوك واخذتها فرصة حت تحجيلي
: اكول حبيبي كحيلة مالي غيرج والله امانة حجيلي التعرفي
: والله خية الاعرفه كلبه ساحله والله شاهين يكول هيل تاكل يوميا كل كتله تشك المطي ويوميا سماح يم عمو جبل تاخذ منه اعشاب ووصفات
: مثل
: يعني تاخذ حلبة لجنتها ديكبر صدرها بس مااتوقع يفيد وتاخذ زيوت مثل زيتون للشعر وتاخذ زنجبيل لضيق التنفس وارتفاع الضغط وها كركم هم للكدمات والزراكات وها علاقته بامه صايرة تحت الصفر
: اممم وليش كل هالطك؟
: امممم منو السبب الخلاج تولين لاسبانيا
: ووراها
: والله هذ الاعرفه يعني انتِ تدرين مو وياهم عايشة اني دا اخذ الكلمات من شاهين عوفج مني مو كلتي قبل محرم ترجعين شو من وكت؟
: تريدين ارد ارجع؟
: ولج لا بس هيح فضول
: مرهم رجعتني بالدفرات
: ديالله تعاي تريكي معانا بس دسبح ابقي
: لا شوفي جايتكم بلايا تريوكة تردون انتضركم تعيدون الجولة وتسبحون لو نتريك وتخلوني اولي لو تخلوني اولي وانتو براحتكم
: ها وين تولين؟
: ما سلمت على احد بعد والله لا اختي لا ماما شموخ ولا دقيت سلبوح خل ارجع اتغندر براسها الا اشكها وكفيلي
: هههههه لعد خل نتريك اول اكوم اغسل
: تعاي سؤال لاخ
: هااا
: هو احممم اي اسمعي
: كولي وهم
: هو شنو يشتغل
: ماادري والله ماكال شاهين بس امبين شغلة فلوسها حلوة لان سد اقصات السيارة بيها بسرعة والله
: شلون طبيعة شغله؟
: لحضة خل اتذكر
ها اذكر شاهين كال يطلع ب8ونص تقريبا ويرجع بالليل يالله خل اغسل
كامت غسلت وتريكنا سوا طبلتهم صغيرة سوت مخلمة وبيض وجاي متيم راح اشترى جبن ولبن وقشطة وكيمر وكاهي وعسل وشكال امتلت السفرة تكول امه الجايا
: كاهي وكيمر متيم هاا
: اي غير اليوم عيد باربي زارتنا
: حبيبي اخويا فديتك الله يخليك الي بس جيب السويج
: اهوووو ما يندك يمج ناعم انتِ
: شنو اسوي اشتاكيت لسيارتي والله
: ديالله والسيارة الجايا بيها شلون؟
: انت ارجع بيها لبيتنا اليوم تعالو تعشو عدنا
: ومن نرجع شلون؟
: اوصلكم عود ديالله فدوة
: ماشي ادللي اي امر ثاني
: لا هاهيا
كملت ريوك اخذت سيوجي سلمت ورحت اشرت لكحيلة تسبح خزرتني وضحكت
ركبت السيارة ياااا شكد مشتاقة بس متيم مغير الامة كلها رجعت الكرسي لي كدام وعدلت الضهر، غيرت الادوات فتحت المجر بي عطري متيم لازكة بتيب حت لا ينطش كله بس هم العلبة طايرة شلته حطيت منه وطوخت الحمرة ورحت
باوعت الساعة 8الا 10خوش بيدي مجال لعد اوصل قبل لا يطلع الحك اشوفه
شغلت اغاني ووصلت بسرعة دنيا صبح ماكو ازدحامات وصلت المنطقة مالتنا وباوعت للفرع اتذكرت شلون ودعتهم بي ههه شبسرعة الايام تركض
قبل فترة جنت وهم بنت العطار وهسة صاحبة معرض سيارات طلعت من هالمنطقة فارغة وعندي كومة اصدقاء وصديقتي المقربة هيل
هسة رجعتلها بارقى سيارة بالعراق بس شفايدتها اصدقائي قلو وهيل صارت عدوتي حاذق تزوج بس ماشي كلشي اله وقته الا يسقى كل ساق بما سق
قاطع تفكيري طلعته من الفرع على حاله ممتغير بعده ذبلان بس شعره مبلل حزرت انه سبح بس معقول يسبح وجه الصبح رفع راسه شافني فتح عيونه مصدوم
باوعتله اني ورافعة راسي هوا يريد يستوعب اني صدك لو سراب الضاهر جان يشوفني هوايا بخياله
ابتسمت من شفته هوا فرك عيونه المغورات يريد يستوعب فتحتله ايدي بحركة حضن
هو ما صدك شكله اجا ركض وحضني بلهفة قاتلة لدرجة ضلاعه احسن طبكن بضلاعي
صار يشهك بيا يجر نفس طويل مني حاضني بثنين ايدي ميريد يعوفني حسيته راد يفوتني بضلاعه كون محد يلوحني غيره
مابادلته نفس الحركات هو اني متلهفة اكثر احضنه واشم عطر المتوحشة علي بس ما ردته يحس بيا ضعفانة صرت اشمه بدون ماينتبه مغير عطرة
صح حركتي غلط لمن خليته يحضني بس مدري ليش طلعت مني مشتاكتله حيل
كمت اطبطب على ضهره حسيته كطع النفس دقيقة اختنك وشال وجهه مخنوك وعيونه حمر مبين يريد يبجي ابتسمت وكلت باستهزاء
: ياا لهل درجة مشتاقلي؟
: انتِ لو تعرفين شكد جنت محتاج هالحضن والله هسة اذا متت عادي والخلق جتال مرحب مااريد شي من الدنيا بعد
: لا بعدك صغير مو مال موت ما شبعت من اذيتك بعد وها لا تحسب هالحركة لهن سامحتك بعد كلبي ملجوم
: حقه يابة والله حقه
: شلونك؟
: هسة صرت زين
: امممم ليش جنت مريض سلامات؟
: جنت ضايع
: ولكوك؟
: هههههه لكيتيني ياضيم الله لكيتيني
: اممم
: من شوكت انتِ هنا؟
: من البارحة بالليل ب12وصلنا مطار بغداد
: اوف
: اي وهاي جيتي رحت اخذت اللامبر من متيم وجيت دا... احم دشوفكم
: امممممم
كالها مبتسم ممصدك وطلع شاهين من بيتهم شافني صفن ضحكت وميلت وجهي وصاح
شاهين: ولج وهمممم
: هااا ولك
اجا ركض عليا دايحضني من وصلني حاذق سحبني ورا وبعده باصابعه
حاذق: هوب هوب
شاهين: دولي ولك شلونج خويا؟
: ههههه هلاو شاهين الحمدلله وانت
: تمام شوكت رجعتي؟
: البارحة بالليل
: نورتينا والله
: هذ نورك عيناي وين من الصبح
: هيهي راح زمن الدلال والكعدة بالبيت هسة بالشبشب ننزل ع الشغل
: شنو تشتغلون؟
: بالمحطة الاخ واني بمصنع المنيوم
: يالله الله يرزقكم جنت ببيت اختك
: رجعنا
: روحو ما الهيكم
حاذق: لا داخذ اجازة اليوم
باوعتله
: ليش مريض
: لا طبت اليوم
: امممم ديالله انت ادرة خل اروح اني اسلم ع اهلي ورايا رجعا
حاذق: وين؟
: لبيت دندونا عازمين اخت شاهين
: هههههه ديالله كلبي روحي
: لا تسمع مرتك وتزعل
: شتعلت مرتي والخلفها بيوم واحد
: ديالله لا تدعي ع عالم ما تعرفهم حرام وهم عيب
جرني من زندي قوي وهمس
حاذق: من تعرفين العيب لابسة هاي الملابس شكوووو
سحب ايده شاهين
شاهين: هوبك بعد اليوم اجت اتركها معليك بيها
كرصني من زندي صحت اااخ وراح شاهين كله مو جنت تكول مااروح للشغل ندار وغمزلي
ماردله كملو مشي واني رحت لبيت اهلي طبعا الدراما اول ماافوت وكلشي
امي ضلت تبجي هي وابوي واني مكابلتهم وابجي كلبناها مناحة هم صورت رياكشنهم
كعدت عدهم شويا وطلعت رحت على نظر سلمت علي ومثل الباقين ضل مصدوم كل شويا صادمة احد تكول جايتهم من حرب
وكف ديحضني وتراجع مدري ليش مع اني فتحت ايدي دحضنة فشلني الله يفلشه
: ولك مو مشتاكلي حيوان؟
نظر: والله مشتاكلج كومة بذاتة ولا تسئلين
: لعد مو تحضني
همس: والغورلا الواكفة وراح شنو؟
باوعت شفت حاذق متكتف يباوعلنا ورافع راسه
غلست ورجعت اسولف ويا نظر كتله ضل بس بيت واحد مازرته وغمزت
ضحك نظر ودنك ورحت طبيت للفرع دكيت الباب مرتين بالثالثة فتحت هيل شفتها وجها مورم منعول ابو شكلها مابي مكان صاحية من شافتني صفنت
ضحكت واني اتشفة بيها وسئلتها بصيغة سؤال
: يااا هذ منو صلخج؟
نظر: محد يصلخة الكل لابسها خويا
هيل: هاي شجابج مو جنتي مسافرة؟
: هوا العراق مال ابوج؟
هيل: لا
: لعد نجبي وين عمتج سلبوح
: والله لاكللها هيج تصيحيها
: مالازم اني اكللها شو وخررريييي
دفعته ودخلت وصحت سموووووووح
طلعت سماح من غرفته
سماح: ها يالصفرة شجابج مو كلتي ماراجعة؟
: العراق مو مال ابو احد سموحة اجيت انوره على ناس واضلمه على ناس
سماح: هيهيي تضلمي على منو باله علوة توضحين
: ع الي فكرو يضلمو علي سموحة شخباركم بلايا؟
: كل خير الله لفانا
: جنتج حبلت لو بعد؟
ما جاوبت رفعتلها حواجبي يعني هيج احسلج
شفت الغرف الجوا مفتوحات وبيهن فراش دوشك بكل وحدة كلت
: هسة هاي غرفة سموحة افتهمت وغرفة حاذق فوك شنو عدكم خطار ينام بهاي الغرفة لو شنو؟
هيل: لا تدخلين
كالتها وفزت هاي شبيها
: اكول هيلة والله الكركم والليمون زينات يروحن الزراكات الي بوجهج واذا متريدين ليمون حطي مي ع الكركم بس مو مال طبخ لا تضلين ثولة كركم علاج حطي بوجهج 15دقيقة واغسلي
ما حجن شي ضلو وحدة تباوع للخ استغربت ليش ما ردن
ردت اطلع شفت حاذق واكف وراي متكتف بالباب عرفت ليش ما حجن شي من شفته ابتسمت هوا ابتسم ع الواهس
باوعت لامه شمتانة ودرت راسي وطلعت ما حجيت شي لحكني الى ان وصلت للسيارة واجا يمي حاجاني
حاذق: هاا وهم
: هااا
: شنو بهل سرعة راجعة
: اي هاهيا سلمت ع الكل
: اممم بس اني اخذت اجازة حت ابقى وياج اليوم شلون بيا؟
: امممم ما جنت اعرف تروح رزقك لخاطري
: هههههه فدوة الج كل فلوس الدنيا صدك جذب
: اممم
سكت وباوعلي بحسرة لم شفايفة
حاذق: ماناوية تحنين عاد؟
: على شنو؟
: ع العبد الفقير هذ
: العبد الفقير كال راح يطلك
: وماجذب
: ماشفت هالشي
: وهم شنو اطلكها وانتِ ممكلبتني شلون
: هاا يعني انت مستفاد من وضعها وياك
: وهمممم
: هاا
: ترا مرتي هي يعني شبيج
كالها لو سممني كلبي لجمني غصبن عني شفتي رجفت وغصة ببلعومي
: خلاص حاذق اني صوجي اصلا جيت
: ليش تحجين هيجي حبيبي
: هاهيا باي
: بس سمعيني
ما درتله بال صعدت الشباك ومشيت كلبي نغزني من تصرفه يعني هو معتبرها مرته اي وليش ما يعتبرها حقه والله هي حلوة وتدلله
بس ليش كال ما اعتبرها مرتي شنو يجذب لو يضحك عليا شسالفته هذ امداني وامدا كلبي الاثول ويايا محد طيح حضي غيره
غبية غبرة امي كالت لا تروحين لا تفكيرين بس ميفيد اني حمارة
نقهرت من شفته بالعيد خلصان على هالتصرف الغبي مو جنتي راح تنسين شرجعج اله كل عمري تصرفاتي غلط امداني
احجي ويا روحي وافرك كلبي ع الوجع الشلته منه
رحت يم دجلة نزلت يمه واشيل حجر واشمر بالمي كالعادة تذكرت حركاتي بالعراق وضحكت على روحي بخيبة
دنيا صارت ضهر لفيت سيارتي قبل ما افوت مسحت دموعي وحاولت ابين طبيعية
ورجعت لكيت امي مسوية عزيمة لخالتي توافق واختي هرم وعمتي هم اليوم ادم يرجع الحمدلله عصفورين بحجر ادم مايعرف بينا جينا
دخلت سلمت على عمتي وبناتها
عمة رغد: هلا هلا ريحة الغالي هلا بعزيزة كلب اخوي
: هلا بعمتي الغالية فدوة شكد مشتاكتلج
: يمة واني اكثر والله لعد يا بذاته من تروحين لهسة ما تخابرين عمتج
: والله عمة شافن البنات منشوراتي واللايفات ما اتصلت باحد
: ليش ما تتصلين؟
: نشغلت والله عمة
صار الاكل واتصلت امي بادم كللها صارله نص ساعة من دخل بغداد يعني هسة يوصل ما ضل شي
كعدت ويا بنات عمة واستبرق نسولف هنا ما طالعات خارج العراق بس لتركيا يالله هم بركة
شولفتلهم ع مدريد شكد حلوة وشلون بيها اسواق تجنن ومطار اسطنبول لان ما افتريت بتركيا هواي
دانسولف واجت جيهان سلمنا وصرنا نساعد خالة خولة بالاكل نزلت مرهم مارادت تبين لامي اكو شي صاير
داندخل بالاكل وسمعنا صوت السيارة مال ادم صفت اختبينا اني ومرهم دنسويله مفاجأة اختبينا نشوفه ما يشوفنا دخل وبيده جلب صغير امي سئلته
امي: هذ شنو؟
ادم: جلب
: لعد كتلك تمساح شتسوي بي؟
: وهم رادت جلب قبل فترة واليوم شفت هذ وجبته حت من تجي اسويلها هوا مفاجأة لا حد يكللها
: امممم لا منكللها انت كللها بنفسك
طلعنا من الصالة وصورنا رياكشنه لمن شافنه ضل صافن مصدوم مايدري الله وين ساته لدرجة عيونة ضلن مبحلقات ونظره يتراوح بيناتنا
ضحكنا بصوت هو مثل الفز استوعب ذب الجلب على استبرق وفتح ثنين ايدي رحنا ركض حضنا كل وحدة بيد فدوة شكد حنون وجهه اختنك يحضنة ويكول الف الحمدلله الف الحمدلله
: ياا خويا ترا ما ضلينا غير شهرين
ادم: اششش
بقة حاضنة هيج واحنا حاضني تركنا عيونه حمر حاصر الدمعة ومسح وجهه
باس مرهم براسها باوعلي وابتسم طفرت تعلكت بركبته وبست خده ضليت مجلبة بي تكول قردة وهو حاضني حيل
امي: اتركي اخوج تعبان يمة
ادم: تركيها تركيها
كالها بصوت عمييييق ومسح شعري وباسني من خدي شمني قوي
ادم: افييييش ياريحة الجنة
مرهم: هاا لعد واني؟
: انتِ عمري كله والله
كتله اشتاقيتلك كولش هواي
: اخذتن حيلي ورحتن
: يمة يمة اسم الله حيل اخوي هاي ردينه
: اي مو ثنينجن تروحن فرد روحة ابويا انتِ
كل هالكلام وادم بعده بالزي العسكري والبيريه مالته
شلت راسي باوعتله وباوعت للجلب وضحكت
: جبتلي ثاندر؟
ادم: صار اسمه ثاندر؟
: اي دباع شكده كيوت فدوة
نزلت ورحت شلت الجلب من استبرق وخليته كباله
: دباوع ما يرهمله ثاندر
ادم: ههههه اي امبلا خويا امبلا
كالها بتعب وراح لغرفته دايبدل ملابسه اسراء تسحبت وراحت لحكته كمنا نضحك عليها ورجعنا نساعد خالة بالسفرة مسويا وليمة تكول
حضرنا الصحون والخواشيك دقايق ونزل ادم سبحان شفته فتحت عيوني ولطمت
: ولك
ادم: وجع شنو ولك؟
لا مو وجع اسم الله عليج
: هاي شنو شسويت؟
: شسويت ولج شكو؟
: اندهرنااااا
: ولج شكو لا تخبليني شبيا؟
سحبته من زنده وهمست
: ليش سبحت؟
: الله يصلخج استغفر الله وهم لاتخليني ادعي عليج
: ولك انتو بس مخطوبين عيببب
: انجبي شنو هالحجي ولج احترمي انا اخوج هم ماكو الي ببالج ترا انا سبحت لان تعبان بس
: جذب
: راح افرك حلكج والله
: اهون عليك؟
: لا بس لدوسين بكلبي
: لا بربك كول
: والله شبيج سبحت لان تعبان هم طلعت بس 10دقايق شنو الحك اسوي هسة تنزل واسئليها وهالمرة حجيتي هيج بعد متحجين افتهمني
دفني ومشا ما راضيله ونزلت اسراء ورا طبيعية ممبين صار شي اطمنت كعدنا تعشينة وكملنا
رحت لغرفتي اسراء نامت وياي وامل واستبرق ويا مرهم امي بغرفتها وخالة وعمة بالصالة
اتصلت بمتيم ع اساس يجي بس الحقير ما جا كال عندة شغل اليوم واعد المتابعين بسفرة بالمنصور
دروح مالت عليك وع اليعزمك يا عار تفييي
سديته ورجعت اسولف ويا اسراء شغلت السبلت وتلفلفت بالبطانية كالعادة تكول دولمة
كعدت الصبح شفت ثاندر بغرفتي واسراء ماكو
رجعت غسلت وبدلت ملابسي ونزلت العب بثاندر هجين عيونة زرك بس صغير نزلت تريكت وكالعادة النشاط اليومي فكرت الغي البلوكات عن حاذق بس كلامه البارحة يدك بكلبي
كلت حت لو المهم اقهر هيل هوا اكيد ميتكربلها كالها حت يغيرني بس يالله ميخالف
وكالعادة التصرفات الغلط تطفر من خشمي كل مااتحرك
ندك الباب دخل متيم وكحيلة سلمت عليهم وكعدت اسولف ويا كحيلة متيم يريد يعلمها تسوق من يرجعون من باريس
: رايحة لباريس ولج
كحيلة: والله مااريد بس ابن خالتج يكول تعالي تعرفي على اهلي
: ولج ليش ما تريدين دروحي يحضي تونسي اطلعي من هلكابة
: معرف الله كريم هسة اشوف
: ماكو شي بالطريق منا منا
: هههههههههه لا دا ناخذ احتياطاتنا
: ليش ولج؟
: مايريد هسة دادا يكول خلينا متونسين هم راح رجع للكيلة هالسنة كلت ورا التخرج
: اندهرتي كحيلة لي ورا التخرج يمة تضلين 4سنوات بلاطفل
: والله هاي فكرة متيم اني اريدلي بيبي بس هوا ميريد يكول خل اشبع منج مااريد شي يلهينا
: هههههههه تضحكون والله
: انتِ شكو شماكو يمج ما افتهمت منج شي وين رحتي من طلعتي من عدنا
: رحت لل... احمم رحت شفت الربع واهلي
: امممم
: مو لبالج
: حجيلي كلشي صار
: والله اول ما وصلت شفته صاير سلابات من علايمج ورحت شفت امه بعدها عكربة
: شفتي بشرى وضحى؟
: هاي منو؟
: بربج
: منو هاي ولج حب جديد لو منو؟
: خية هاي خوات حاذق
: هاااااا
: ومدها شبيج؟
: منيله اخت؟
: بنات سموح هاي من ذاك الرجال
: بربج
: والله طلع عدها بنتين بشرى وضحى
: الله ربج سلبوح لعد ليش ما كالت؟
: مااعرف والله شاهين كالي كال حاذق طلع عنده اختين حت هوا ما يعرفهن لمن شافهن انصدم
: امممم لازم اتعرف عليهن والله
: تتعرفين على منو حبيبي ما يطلعن من البيت
: والله خوش اليوم اروحلهن
: عوفج اليوم بعد اجيتج نشوفج نشبع منج خليها غير يوم
: اممم هم هيج هسة
ضلينا نسولف لوكت الاكل طالبين قوزي من المطعم وجاين بيت خالي من البصرة
نزلت جيهان وقيصر ينامون بغرفة نزلت تحضر ويا خولة اهلها جاين خايبين خمو جينا من الحج اجت امي كالت حيدر وسمر جاين
عوجنا حلكنا كلنا فرد مرة هذ شراح يجيبه هسة ما يونس لا هوا ولا مرته الثولة ما تحجي بس بماركات المكياج وانواع العطور وبنته لابسة الشورت تكول ع البحر
اتصل عمي دايجي ويا عائلته مرهم سمعت وجها صار 100لون صارت تاكل بشفتها
اليوم بيتنا بي 100عائلة شراح يفضها
وصل عمي لان بيته كريب بسرعة دزينة ع قوزي ثاني وبيتزا وعصاير سوينا ولبن جيهان واسراء فرشن سفرة بالحديقة
اجا خالي وعائلته نسوانه ال4وبناته وولده صلوات على محمد بس جان ماراضيلهم لان كحيلة سافرة واني هم
كضوها يزفرون ومدنكين ميكدرون يحجون لان ادم موجود لو بس قيصر جان ضلو يحجون يخلو يحجبني
كعدين الزلم بالصالة طلعت كحيلة من المطبخ اتصل عليها متيم من فتحته كالت
كحيلة: هلو يعرج كلبي عمري
اي شوكت تجي
متيم تادب هههههههههه
كل الزلم دنكت ولد خالي 7ماعدا اجهال الصغار وقيصر وادم وعمي وسيف وخالي شافتهم كحيلة دنكو ضحكت وجت رافعة راسها
كحيلة: لا تحاجوني بعد
: سالمين
: ولج جم نفر بالغرفة من شافوني دنكو حسسوني شي جبير والله
: هههههههه ولي وجع من سويتي هيج اول مرة نخلع ضلعي
: ههههههههه سوري والله مو لبالي وين مرهم خل تنزل
: بشغلها حبيبي
: امممم خوش شوكت تجي
: ورا العصر
اجا متيم وكملنا الغدا طلعنا بالحديقة ادم وقيصر شدو خيمة من الشمس حسيت روحي بصحراء
طلعنا الاكل وكعدنا ناكل انتبهت وجهم ثكيل على سيف وسيف صدك صاير سلابات بعد اكثر من حاذق
داناكل واجت اسيل واهلها رحت على امي
: هذول شجابهم هسة؟
امي: هشش
: منو عزمهم؟
: اخوج
: اهوووووو
: كافي عاد
اجت اسيل تضحك شافت الاكل
اسيل: ياااا هذ قوزي ههههههههه يالله حماتي تحبني
همست: والله جذب
اجت تربعت بلا سلام تشكلت ونزلت تاكل وتحجي معرف شلون حلكها يتحمل شغلتين سوا تحجي وتاكل وميتة ضحك
اباوعلها ما عاجبني الوضع اضحك عليها وعاكدة حاجبي كملو اكل اني بس اباوعلهم مااشتهي اكل
لمن السفرة نسوان وبنات الشيخ كالعادة اسيل وامها ما تحركن
عفت الهوسة بكربها ورحت نعزلت بغرفتي الافكار تتلاطم براسي على حجي حاذق
من كلي هي مرته يعني ممكن يصير اي شي بيناتهم يربي بس مالي حق يعني ميخالف هي مرته وهذ حلال
بس هم ميصير يسوي هيج بيا راسلت كحيلة
: اكول تعاليلي
اجتني كالت خيرج
: اكول احممم دسئلج
كحيلة: اي
: متاكدة حاذق
يعني شسمة ما يجي يم هيل
: وهم مو بغرفتهم اني
: لا بربج
: والله معرف بس شاهين يكول لابسها
: واشون اتاكد؟
: شلج بي؟
: افكر ااا افكر انطي فرصة شتكولين؟
شهكت وفتحت عيونها عليا ما حجت شي
: ولج دسولفي
كحيلة: وهم كل عقلج؟
: اي يكول ما يجي صوبها ويطلكها ليش لا يعني هوا راح يطلكها كلي
: وانتِيالثولة صدكتي ولي بقرة خانج بغرفتج يالحيوانة
: واشلون؟
: تحسين روحج كد هالشي؟
: معرف بس شوفي حالي شلون صرت اني مااكدر بلا حاذق كلبي ديوجعني علي من شفت حاله ووضعه هم ما حجا وياي لمن قصفت امه
: وهم انتِ عندج عقل وتعرفين تفكرين مو جاهلة بس لازم تتاكدين يطلكها لان هاي عكربة ما تنجمعون ببيت واحد
: اي يطلكها
: اي واذا ما طلكها شلون؟
: لا لا اكيد يطلكها ميحبها والله
: بكيفج وهم بس تذكري السوا بيج شلون صرتي بيومها شلون كوة تلاحكوج للمستشفى واجت امه عليج تذكري كل هذ
: اهوووو كحيلة
: وهم حسي لا تضلين فاهية شنو تنطي فرصة؟
: ولج والله احتىك كلبي بلاه ماكدرت اتخطى كلبي معلق بي
: كيفج وهم والله مااعرف
طلعت وتركتني فكرت بكلامها هو واقعي هو تركني مرة ممكن يسويا مرة ثاني
ضليت افكر ودموعي ينزلن ع الوضع البقيت بي احترت بروحي شدبر
رحت للحمام غسلت طلعت شربت مي باوعت عيوني بالمرايا حمر بس رموشي صايرات طوال من البجي
(معلومة البجي يطول الرموش 🫰🥹❤بس لا تكلبوها مناحة)
تلمستهن حلوات صايرات ضحكت وغميت روحي
كمت افكر واخذت القرار
لغيت البلوكات من كل المواقع راسلته من الانستا
: هلو حاذق شلونك اتمنى تكون بخير
مارد شكله بالشغل فكرت ودزيتله رسالة
: اني لو هيل
وايموجي ضايج ورا دقيقة شافها ورد
حاذق: انعل ابو هيل اكيد انتِ
: متاكد حاذق؟
: والله اطلكها مااخليها بس ارجعيلي والخلق جتال مرحب اتنفسج راح اموت
: ما تتراجع بكلامك
: ابد
: شوف اني شكد حاولت واشكد ردت مكدرت اطلعك من بالي حاولت بكل معنى الكلمة انساك واستمر بحياتي مكدرت جان اكو شي يمنعني اني متعلقة بيك
: والله ولا يوم ماكدرت انساج والله محد ببالي غيرج شكد صارلي حت هيل تاركها ما اتقربلها
: اني راح اتخطى الصار هالمرة بس انطيك فرصة بشرط هيل ما تضل على ذمتك بعد وانت ما تتقرب منها ابد الا بالضرورة لان حرام
: صار
: وراها نشوف شيصير عود
: صار بعيوني دللي اصلا هو هذ الصاير هسة
: اي نشوف كون تطلع كد كلمك هالمرة
: والله مااتراجع وعد وراس امي وروح ابوي
: حاذق اذا متريديني كول من هسة لا تعلقني بيك مرة ثانية فدوة
: لا والله مارايد غيرج اصلا والخلق جتال مرحب بس ارجعيلي
سديت المحادثة وكمت افكر هل السويته صح لو غلط معقولة اندم علي بعدين بس لا مو ممكن
هوا يحبني وراح يطلكها لخاطري اني متاكدة
نزلتلهم جوا كعدت اسولف ويا النسوان لان من يجي خالي يخلي نسوان بحد وزلم بحد
كمت اسولف واغير شكل وياهم سولف وشقة وضحك سوفولي ع البصرة وع مخططاتهم ع محرم ديرحون ع كربلاء ويسون موكب يذبحون 3عجول
امي تريد تسوي موكب بعد اني مااعرف بهل امور بحكم تربيت بغير طائفة بس للان ما يعرفون بيا ما سئلوني ابد
اذن الضهر راحو توضو وديصلون الزلم وقيصر يصلي بيهم شفتهم يصلون وايديهن جوا ما كاضيهة
شو خلصو صلو مرة الخ
بقينا كاعدين شويا ورا اذان العصر اجت سمر وحيدر سلمت وكعدت
تلفوني تجي اشعارات كومة عرفت من منو ما فتحتهن
لي الليل راح خالي وعائلته وبقى حيدر واسيل سوينا عشا اكلت اسيل وراحت بقت بس سمر وبتها
صعدت لغرفتي لان مو جوي رحت لغرفتي شفت رسائل من حاذق بدل صورة والسيرة جانت قبل
(جاا ما ترد
يالكاسر بكلبي نفس
وبروحي كاسر عافية)
وهسة حط
عندما اشتاق لك
أضع يدي على قلبي
فهو المكان الوحيد
الذي أثق بوجودك فيه
خليك بس تغير بالسيرة مالتك
غلست شفت رسائلة دازلي اشعار وصور وكذا ضحكت وما رديت
مشت الايام رجعنا نلتقي مثل قبل اكعد الصبح على اتصاله القديم ونحجي شويا مرات يخبرني بالشغل ونفتح كام حجالي ع خواته
من نلتقي نفس اللهفة بعيونة نفس اسلوب حجيه بس كل شويا تلفونه يدك ويقفله
مرات يرد ويعيط لو يروح اعرف هيل الي تتصل
التقينا بالبارك هوا يحجي ويسولف وياي ع مستقبلنا شلون صار حاله احسن من قبل ووفة قسط السيارة ونطا لامي حك الغرفة البنتها مرهم
ما كلتلي امي بس ما ستغربت دانحجي وضلت هيل تتصل علي ويغلقه
تعمدت اقهرها مثل ما قهرتني والله لاكسر خشمج اكثر شلت البلوك من حساباتها وراسلتها
: شنو شبيج بس دا ادكين ما تخلين واحد براحته
قرتها وردت بسرعة
هيل: ما اتصلت بيج
: اعرف مو تصلتي بيا بس كافي ادكين على حبيبي ما دا نعرف نسولف احسن ما يحظرج
: وهم كليله خل يرجع
: والله لو يريد يرجع جاا رجع براحته
: روحي ولي
ضلت ادك علي وينطيها رفض بزعت
: انطيها بلوك
حاذق: لا
: ليش؟
: اذا احتاجن شي بالبيت اروح
: ما تعرفت على خواتك
: هاا صدك والله تعالي شوفيهن هسة
: اي يالله
رحنا لبيتهم عنده مفتاح فتح الباب ودخلنا
شفت هيل كاعدة ع الدرج وبالمطبخ امه وبنت شويا جبيرة اصغر مني بس خشنة وجوا بنت مراهقة
صاح: بشرى ضحى تعالن
الي بلمطبخ اطول مني بشويا وجسمها مليان بس وجها تبين اصغر مني سمرة والخ بعكسها طويلة شويا بس اكصر مني حيل حلوة احلا من حاذق والخ بعد
الجبيرة سمرة عيونها ناعسات جسمها مليان والثانية لا بالعكس، ضعيفة عيونها حادات وحواجبها سيوف تجنن احلا مني
هيل شفتها واكفة متكتفة ماتعرف شكو تباوعلنا باستغراب
حاذق: هاي الجبيرة بشو وهاي ضحى الصغيرونة
: هههههه هلاو
بشرى: حاذق منو هاي الكيكة؟
حاذق: هاي راح تصير مرة اخوج
ضحى: يااا لعد هيل منو؟
باوع لهيل بعين ما عاجبه ودار وجهه
بشرى باستني
: انتِ وهم مو؟
: سيطي واصل ها ههههه
: اي والله انتِ المسودنة اخوي لعد هههههه خلي يحجي بس بيج
: يااا كون يحجي بخير
: اي والله كل خير
ضحى: منيله الخير يكول شالعة كلبي وراها
باوعت لحاذق نظرة ثقة
: هاا والله
بشرى: بس ترا حقة اخوي يسوي هيج دباعي وجهج تكول لعابة
ضحى: ليش هيل شبيها؟
بشرى: احمم ما بيها شي بس والله وهم كفوو تعرفين احنا كلتنا ممنوع علينا طابق الثاني ما يقبل نصله ولا نطب للغرفة الفوك
ضحى: بس هيل تدخلها مرات
بشرى همست: مرتين دخلتها نبسطت لا تخلينا نحجي
شفت الفرق بين الاختين ضحى محبتني بس بشرى شكلها الحنينة
بشرى: تدرين وهم وحق الله اخوي ينزل من فوك بي عطر نسائي نفس الحاطته
حاذق ضحك ودنك
: يمشي ويشم بيده تدرين لو بيده يحضن الهوا البي عطرج
ضحكت وياها تباوع لهيل تتشمت باوعت لبشرى وكتلها
: شحلاتهم لو كل الوادم تشبهج
بشرى: لا يمة مااريد احد يشبهني خل يشبهوج انتِ تخبلين ومسودنا اخوي هههههه
كعدت وياهم شويا
: يالله اني لازم اروح
بشرى: لا هوب وين دبقي نتوس وياج
: لا لا لازم اروح
ضحى: اي والله دنيا صارت ليل وهيل كالت اصيحلها حاذق
لاتنسون تصويت⭐⭐⭐⭐⭐
اسراء العزاوي
💜💜💜💜