سديته ورحت غيرت ملابسي ومشطت انزل بشعري وابجي بس والله لاحركك شيب امك دصبرلي
لبست فستان بت قيصر نسته بنيشان متيم يريد يطك غسلت وجهي وخليت مكياج اخذت صورة كدام المرايا ونزلتها ستوري
رحت الحقير متيم ماخذ السيارة بس اجت منه همزين
رحت للشارع اخذت تكسي كتله عنوان بيت حاذق ووداني كلبي جان يدك بالدقيقة الف وصاحب السيارة نضرات مو مريحة وفصلتني تفصل التضاريس كلهن مال جسمي مبينة بس تحملت
قبل ما نوصل خليت يوكف خابرت كحيلة
كحيلة: الوو
: لا تكولين هاي اني
: ماشي
: وينه؟
: ويا اصحابه
: اعرف وينه؟
: براس الفرع كاعد ليش
: هيج جايتكم
: وهم لا تسوين لروحج طلايب تجين راح تثبت التهمة عليج
: لاتخافين مااحجي ويا شي روحي باي
سديته بلا ما اسمع هي شحجت
السايق: حبيبج مزعلج؟
كالها ورفعلي تك حاجب بالمراية باوعتله نضرة ماعجبني الكاله رجع كال
: شنو حضرتج سنكل؟
: اكول سوق وانت ساكت بالله
وصلنا وكف كبال الربع حاذق ايده مضبرة وملابسه بيهن دم صدك كاسر شباكي
انطيت للسايق الكروة ونزلت اتمخطر من التكسي هو مدنك رفع راسه وشافني سويت روحي مو يمه
هوا جذب اريد اكله بس والله فلا اضعف الا احركك
رحت لبيتنا اسمع نظر وشاهين يردون يكضو وهو يراوغ يريد يجيني
سرعت خطواتي ودخلت البيت لكيت امي وابوي كاعدين
سلمت عليهم وبوستهم
ابوي: جينا ببالج اخيرا
: والله بويا مدافضا من شغل لشغل
: من حفلة الحفلة يوميا احد معرس عدكم
: ماتريد نزوجك انت بعد؟
: عدكم وحدة؟
امي: بعد بعد اتفقو مو ماكو وحدة كبالكم
: يمة الشرع محلل 4 يعني عادي لعد وين هيل؟
: اووو من زمان راحت
: وين؟
: استقرت ببيت حاذق يمة
: شنو هو؟
: والله شكد صارلها ببيته جانت بس تنام ببيتنا هسة حت النومة تركتها
: بربج
اشرتلي بيدها يعني هذ الصار هزيت راسي بسيطة ندك الباب دكة قويا صحت منو صوته
: افتحي الباب وهم
جمدت هذ خبل هسة شافني جاية بهل ليل بس ميخالف اني على شنو خايفة منه عندي اخوة يهدون جبال اندك اقوة رحت فتحته شفت وجهه عيونه تصب نار جان يخوف
هوا اسمر وانوب تعصب صار بنفسجي ههههههه
: شرايد؟
: صخمان شمطلعج بهل ليل؟
: بربك كل هالبياض تصيحلي صخمان حت ابو التكسي يكلي كيمر مو بنية
عدل نضرته شفت عيونه صارت تقدح نرعصت دطب جوا لزمني من ايدي
: بشرفك عوفني
: كيمر مو
: بربي اتشاقة والله ماكال
طلعت امي شافته
امي: ايي شبيك حاذق شصاير؟
: عمة بتج تطلعني من طوري
: اي شسوت يا عمة توها اجت
: توها اجت هاا وهم كليلها شلون اجيتي
خنست محجيت راح اترزل لان
حاذق: هاك استلم ولج ردي لا تجننينيييي
امي: حاذق يمة صوتك شبيك داتفضحنا
عفتهم وطبيت يم ابوي اسولف ويا هوا جذب بالي يمهم
دخلت امي تحجي
: شسويتي ولج؟
: والله حت ويا محجيت
: بلا جذب
: والله محجيت ويا
اشويا واجاني اتصال من نظر افتهم ميخلص رصيدكم رحت يم باب المطبخ فتحته
نظر: ولج تحمدين الله ما كضج
: وان كضني اش اله حق يسوي؟
: لا بعد اخيج ماله حق يطخج اصلا منو صارت تركض من سمعت صوته؟
: هسة شكو؟
: الاحسن ميشوف وجهج ترا مستحي من امج محجا وياج
: ترا والله ماحجيت ويا شي ولا ضوجته
: لا ابد حشاج اصلا مو انتِ الكلتي على امه جذابة ولا انتِ الكلتي لو يطلع براسكم نخل مااعتذر ولا انتِ لابسة فستان مال وحدة عمرها 16سنة وجايا بوحدها بتكسي بالليل والعطر مالها حت ابو شمه من النجف ابد ممسويه شي
ضحكت ما رديت
: وهم خويا راح نطلعج تهريب متيم راح يجي ياخذج لا تخلي يشوفج
: والله ماا دطلع اتمخطر زا وشحده يحجي
: ديالله اطلعي بيج حظ بس اذا سحلج لا تبجين علينا
: خوب حت متيم يدفن راسه وراسكم اذا رجال يمد ايده عليا
سمعت صوته: اذا رجال هاا؟
جمدت ما بعد اتحرك حسيت كلبي برجليا واني اسمع صوته نداريت لكيته متكتف بالمطبخ ويباوعلي نظرة ماعاجبة الوضع اني بس صافنة وصوت نظر ميت ضحك
ضلينا صافنين ببعض تقريبا دقيقتين محد حرك ملامحه هوا رافع راسه ومتكف واني فاتحة حلكي وعيوني ما حسيت الا صوت نظر يصيب الرصيد ووجع
غلقه بسرعة واني اباوعله مستعدة للدفرة لو اي شي
حاذق: شو تجمدتي؟
: هاا
: شكلتي لنظر توتج؟
: هاا
: ومدهاا ووجع اذا رجال موو
كالها بعصبية بهل لحضة ما فكرت شسوي غير امثل علي لو اندفر
سويت روحي متت ووكعت روحي حسيت علي اجاني ركض ومسح على وجهي كوة كامشة نفسي لا اضحك ومسويا روحي سايحة احس بيدي تفرك وجهي وشعري
امي اجت ركض شالني غسلو وجهي بالمطبخ موكفني وعاصرني من خصري
امي: شسويتلها ولك؟
حاذق: والله عمة ما اجيت يمها ما شفتها الا وكعت اكيد هذ الفستان اللابسته ضيك ضايقها
سويت نفسي رجعت للوعي كوة ماسكة الضحكة كل شويا تريد تفلت فتحت عيني شفته لازمني دفعته ورحت نتجيت على امي وهي ترزله
خطية ما فتح حلكه بكلمة بس يكللها امم امم
عفتهم رحت للغرفة عود تعبانة وكذا اجتني امي
امي: بيج شي ماما؟
: لا
: شلون وكعتي؟
: مدري بس دخت شويا
: ما ضوجج لو حجا معاج بشي؟
: لا والله محجا شي بس اني معت
: الله كريم جوعانة ماما
: لا درجع
: هسة بعد اجيتي
: ميخالف متيم راح ياخذني
: مامحتاجة شي ماما
: لا كله تمام
اتصل بيا متيم كلي راجع رحتله نصدم من شافني لابسة فستان ريام
: هاي
متيم: بربي مو صاحية
: شسويت؟
: شهل فستان شلون تتنفسين بي
: شسوي ما لكيت غيره كبالي
: تحمدين الله ما فلش وجهج والله طلع النار تطفر من عيونه يكول ما اجيت صوبها اطشرت
: اي تمام من حالي وكعت
: لعد ايدج ليش مو صفرة؟
: هاا
: الي يدوخ تصفر ايدي
مارديت
متيم: ما دختي من صدك مو؟
: ههههههههه
كحيلة ماتت ضحك لكيته يحاجيها بالتلفون
: اضحكي بعد اخيتج اضحكي لو ما سويت هيج جان كرامتي اطشرت
كحيلة: ماحجيت شي اني
متيم: يالله باي حبيبي وانتي يالثولة صعدي بالسيارة عاد
صعدت ورجعنا للبيت ساعة 12ونص طبينا دااطلع صاحني
متيم: ع المطبخ
: دنجب
: سويلي زقنبوت وولي
: مااا
: مدها صارلي شكد انتضرج تطلعين
: بربك متيم
: نزلي يالله
نزلت صفنت بالمطبخ اني معرف اطك بيضة بحياتي ماداخلة مطبخ
متيم: هاا بشري
: معرف اطبخ
: ما طبختي ببيتج القديم
: شموخ ما تقبل
: جان تعلمتي هسة
: خولة ماتقبل
: والله بيج دفرة تعدل خلقتج
: باوع تعال خل نطلب
: لا اكلهم مو نضيف
: على حسابي
: بيتزا بعد اخوج
طلبنا بيتزا وزنجر وفنكر وببسي اجا المندوب مال اكل نطيته بطاقة صفن بوجهي ماعنده جهاز
: هسة اني شدبر
: ماعندج نقد؟
: لا والله
: اختي اريد ارجع عندي شغل
فتت على متيم ضربته بدفرة
متيم: تريدين تذليني قبل مااكل؟
: شلون عندك غيرة تخليني اطلع للمندوب
: انتِ راح تدفعين وغيرتي ما تقبل اخذ منج
: دنجب ولكيلي دبارة ماعندي نقد
: والخزنة الي بغرفتج؟
: دولارات مابيها نثر
: شتعلت شموسة بهل ليل ولي هسة اني ادفع بس ترا اندعيج اياهن
: دكوم اكثر الاكل انت راح تبلعه
راح يدفع ونزلت مرهم على صوتنا
مرهم: ها ولج شو اهنا؟
: طلبنا اكل اني ومتيم
: انتو مثل البزازين دورون بالكدور تالي الليل طلبتو هواي؟
: بركة
: خلولي مجال
اجا متيم شاف مرهم لطم على راسه
متيم: كفيل ايتام اني ادفع لعلفجن
مرهم: نجب اعتبر ايجار الصالة الحاجزها
: شنو متعشيتي؟
مرهم: تعاركت ويا دندون ع الاكل
متيم: يمي
نزل الاكل ومسحنا الصحونا وكعدنا نحشش على بعض ونصنف ما خلينا احد بحالة
طلعت نزلت حبشكلات وحلويات اكلناهن وشغلنا فلم كوميدي كعدنا نباوع والحقير كل شويا طاكها ضحك صوت امي بغرفتها تصرخ تريده ينصي صوته
للصبح بقينا كاعدين حت ادم نزل ع الهوسة
ادم: اكول وهم
: هاا
: بهذ ثوبج شلون تتنفسين؟
: ترا والله مابي شي
: ما كلت شي بس شنو ممضايقج
: هء
: ماشي
للصبح خلصت طاقتنا نمنا بالصالة من التعب
كعدت صعدت لغرفتي كملتي نومي بيها هما معرف شسوو ما كعدت لل12فتحت تلفوني ما جايتني ولا رسالة ولا اي خبر
شتعلت امك حاذق لعد تحسبني مريضة وما اجا منك اي خبر بس اني الك وداعة شموسة اليوم اخليك تفرفح
خابرت على اسراء
اسراء: الوو
: اخوج وينه؟
: ايمهو؟
: عمار السكط
: رجع لديالى من الصبح
: خوش انتو بلبيت؟
: اي
: جايتكم
: الف مليون مرحبا اخيرا وهومة تزور بيتنا اوزع جقليت
: لا توزعين شي جايتكم اني
سديته ورحت غيرت ملابسي ومشطت انزل بشعري وابجي بس والله لاحركك عرضك دصبرلي
غسلت وجهي وخليت مكياج لبست تنورة مفتوحة من ورا وقميص عليها اخذت صورة كدام المرايا ونزلتها ستوري كتبت زيارة لبيت عمتي الغالية
نزلت على سيارتي شفت سيارة مرهم تذكرت اني واعدتها بسيارة يالله من ارجع عود
صعدت بالسيارة خليت التلفون ع الدشبول فتحت لايف اغني ويا الاغاني وارد ع الاسئلة اجاتني رسالة من حاذق سدي الزفت غلست علي
شفت واحد من التعاليق يتغزل باظافري هن طوال ومقلمات اجاني اشعار رسالة من حاذق سدي القندرة ونزلي اضافرج
عود ما مهتمة جذب وصلت بيت عمتي فتحولي الباب سديت اللايف وخليت وضع طيران دشتعلك بكاز وهاا
ضليت بيت عمتي سوالف وشقة وضحك اجا عماد سلمت علي وطلع جاب حلويات وحبشكلات بقلاوة وكنافة حت عليا ما باوع بعكس اخو الشفية
بقيت لي الليل امل واسراء هم ينشرن صورهن عيلة طاشة
رحت عليهم
: دا افتح لايف
امل: قبل ما تجين كنتي فاتحة
: ما تعاركت ويا الحب اريد اضوجه
: بربكي
: والله وداعتج
: ماشي خل نرتب جهرتنا اول
هنا راحن ودكيت على كحيلة كتلها داافتح لايف شوفي للوادم
دزت اوك
رحنا عدلنا كعدتنا بدلت ملابسي لبست بلوز شوياااا دلع وبنطرون هنا محجبات وخليت الفون سويت عدم ازعاج وفتحنا لايف
كعدنا نسولف ونتشاقة ونضحك كمت اضحك حت اذا شي ميضحك بس هيج اعرفه جاي يشاهد البث كمنا ناكل ونقرة التعاليق
شنو كنافة تاكل كنافة
هاي اضافرج شلون طبين للحمام
الخاطر الله كيمر
ناس تمدح وناس تذم اني مو يمهم بس اريد اقهره اقرة التعاليق مرات ارد مرات لا
نحشش على بعض سهيت شويا واجا تعليق خلاني اصفن عرفت راح انسحل
الوشم بوياااااااا
احووي تذكرت البلوز دلع باوعت للشاشة طالع الوشم بدا تلفون اسراء يدك
اكلت وحل كمت عدل كعدتي ورفعت البلوز تاهت السالفة اخذت تلفون اسراء دققت بالرقم طلع رقم كحيلة سديته كتلها لا تردين ع ارقم غريبة
صار صوت دك الباب كمت داافتحه والبلوز كصير اسراء كلتلي ابقي كاعدة رجعت كعدت كامت الاتصالات تجي على اسراء ما الحك اسده ويتصل التعليقات يكولون افتحي
مع ما فتحته وصوته بعج اذاني
: سدي صخمان اهلج الله يشعلج
: هاا
: ومدها سدي اللايف والله بس اكضج لاكسر المبايل على راسج
: ليش؟
: بس سدي اللايف مو موتني ااااااااخ
: بس على كيفك
: ولك وتحجي ببرود الله يشيلني الله يشيلني حت بعد مااشوفج
يمي عصير شلته شربت بكل برود
:اححححح لا اسم الله
: ولج وهم
: ها عيوني
: والله لافرغهن بس اكضج
: عود ماشي
: لج تتهمزئين بيا؟
: هسة شرايود؟
: سدي القزالقرط وترجعين على بيتكم هسة لا كفيلج الله اندمج
: ليش ارجع؟
: القزالقرط ببيتهم انتِ وملابسج الخزيات
: لا لا مو هنا
: هاا
: والله مو هنا
: يضيمي ياضيمييييييييي
: ما والله شعليك بيا داكلك مااكو احد هم انت البارحة مو كلت كلشي ينتهي اذا ما اعتذرتي وما عتذرت ما لك حق تحاسبني
: وهمم كافي عناااااد
دخلت اسراء تركض اشرتلها بعيوني شكو صفنت لمن دخل وراها عمار
جمدت مكاني فتحت عيوني بس صوت حاذق
: الووو
لج وهم الوووو
ولج وينج متردين كومي طلعي من بيتهم الله ياخذج
مو يمه اني عمار باوعلي نظراته كالعادة ما تغيرت وطلع فوك لغرفته
اني بعد كمت بسرعة طفيت اللايف ولبست ملابسي فتحت عدم الازعاج اجاني مليون اشعار منه واتصال فتحته هم نفس الصوت
دااروح عمتي جلبت بيا الا ابات وهوا صوته يحلف
حاذق: وحك جتال مرحب اعلك راسج باب بيتكم
: عمة والله ما اكدر
: توسلي بعد توسلي يا من يخليني اكضج
عمتي: شمالج يمة ترا بحمايتنا انتِ ماراح اخلي يكرب صوبج
حاذق: مو ابن السكط ينتضر امر منج مووووو
اني اصفن بيها وبي هي ما تسمعه بس هوا يسمعها لان مافاتحة سبيكر
اتصل على اسراء ادم كلتلي ادم يقول تعالي ارجعي
سلمت على عمتي ورحت ع السيارة وهذ بعده يصيح ويهدد
: طلع حركتك بعد اخوك طلع
: ولج بس كليلي ناوية على موتي انتِ لو شنو
: والله ما سويت شي من اجيت جان بديالى وراح يرجعون للموصل تحررت بعد
: اذا مو خواته متفقين ويا يجيبونج وانتِ ما تصدكين على الله
سديته بوجهه رجع يخبر فصلته دك مرة ثانية
: هاااا خيرك
: تسدي بوجهي ولج؟
: كف عني ياخة عاد
: وهم كلشي بينا انتهى
: عود ماشي
سمعت صوت التلفون نضرب بالكاع بس ما نطفى افتهم نوكيا كل هالدكة ما صارله شي ردت اسده سمعت صوت ضليت صافنة بي
صوت هيل تحجي ويا
هيل: هاي شبيك حاذق دتكسر؟
حاذق: هيل ولي من كبالي
: ضل اطردني ابد لا تخليني اتقربلك
: لا تتقربيلي لا تجين صوبي ولتشوفيني وجهج ابد اني مااشوفج اكثر من اخت ولا تتوقعين اكو شي ثاني ممكن يصير بينا
: بس اني مااكدر بدونك حاذق حس بيا انطيني فرصة وحدة والله انسيك وهم
: لج ما تولين عني ترا اني ساكت عليج بس لان امي تحجي ولي من يمي شكو تنسيني وهم
: اريد افتهم شنو البيها وماموجود عندي ساحرتك هيج ليش حت اني احلا منها
: هيل وخري من دربي وكتلج الف مرة غرفتي لا طبيها
صوتها وهي تصيحه شهل صلافة الحمدلله التلفون ما طفا استغربت وحسيت روحي مخدوعة
لا توني حسيت امداج وهم من وصلتي لهل مرحلة هسة اتفطتني تحسين مالت عليج
شلون كدرت تسويها بيا بعد كل السويته
ماشي هيل مو بعيني شغلت السيارة توجهت للبيت بقيت افكر بيهم معقول ينطيها مجال لا مستحيل هوا يحبني
بس هي حلوة هم ممكن ينجذبلها اذا هي وامه ينكون براسه غير لساني شطوله علي
هسة اذا اعوفه راح يصير كدامهن سهل واذا احاجي كرامة ميضلي عود اجت مني هسة اني شصخم اتصلت على كحيلة طلع مشغول
استغفرك الله هسة هاي 24لو كاعدة ويا متيم لو تخابره افتهم سوالفكم ما تخلص شتحجون لخاطر الله
نزلت ع الصالة لكيته دا يخبر ومنطيني ظهرة
: احمممممم
: ها باربي
: متيم فدوة لخشمك جايتك بطلب لا تردني
: افااااا اني اردج كولي اعوف استبرق على مودج
: سد عن كحيلة دخابرها
: اعوفج على مود استبرق
: هسة بس دسده دكللها شي
: كولي
: امور بنات
: دنجبي عود محسوبة ع البنات الله وكيل بيج رجولة اكثر من مهيمن
: هسة تسده لو لا؟
: اسده اسده بس لا طولين ترا اشتاك
: ماشي
سدة ورحت خابرتها
: الوو
كحيلة: هلا بالطشة ام الوشم
: دريتو؟
: هوا اكو احد ما درا هههههه والله لو تشوفين وجهه لمن جنتي بالسيارة وتغنين ياعيني يام ادميعة يشيل روحة ويلزكها بالكاع الا لمن يحجون على اضافرج وتضحكين موضوع ثاني ههههههه يدزلج خاص يريدج تجاوبين وانتِ مو ويا
: وهيل شسوت؟
: تكول بومة حاطة ايدها على خدها لابسة النص ردن والبلوز فتحته للصرة ناكشة شعرها عبالك ساحرة تريده بس يباوعلها
: واكيد باوعلها
: اي شلون باوعلها ويدزلها خاص اساسا تلفونه انكسر وهوا يدز بالخاص طفي صخام وجهج بكد ما وجها منور ههههههه
: اي حرك دمي لبارحة والله يكلي اعتذري من امي وهيل
: يعرفهن جذابات لا تخلين ببالج
: كحيلة انتِ عفريت خابرتج حتى اشوف شتنصحيني
: هذ اطراء لو شنو يالله مو مهم اسئلي
حجيتلها كل السمعته بالاتصال
كحيلة: شوفي اني راسي نسطل
: بربج كحيلة ماليا غيرج
: اممم وهم مبين حاذق ميردها من حجيج تكولين ما طايقها هي اللزكة مو
: اي؟؟
: اي شوفي الحب مابي كرامة وانتو حب سنين وهومة هم انتِ ما قصرتي بي مسحتي بكرامته وكرامة امه المنطقة بربج احد يقبل وحدة تكول على امه جذابة والا اذا رجال طخني
: اي والله ضوجني هوا هم يكلي حجيتي ما سئلني اذا حجيت او لا والله ما فتحت حلكي وياها بس كتلها اني ح اصير عرضه
: وهم حبيبي حاذق يحبج ويموت عليج روحه من هالدنيا انتِ انطة بامه لخاطرج
: اي بس كحيلة هم عاط بيا
: ههههههه بربي مو صاحية
: ترا محجيت على امه والله
: اي ادري بس لو شفتي امه وسمعتي صوتها شلون تنعي تشكين بروحج عدها قدرة تمثيل رهيبة لازم يستقبلوها نقابة الفانين ترا
: هسة شنو اني على شنو اتصلت بيج؟
: وهم هسة حاذق معنده تلفون بس لازم تلكين طريقة تحاجي بيها
: لا فونه يشتغل يعني تكولين اتصل بي
: اي والله وهم لا تخسري
: هسة اشوف
: ها ترا مو بلبيت هوا يعني خاف تدكين علي
: شعرفج؟
: هياته مبين من شباجي كاعد ويا شاهين ونظر
: اخابر على شاهين؟
: رصيد منيلج
: دندونة تشترك شهري ولج
: ديالله باي مني دنام
: حت متيم ينحرنا
سدته بوجهي تفلت عليها كلت ادك على شاهين دكيت مشغول دكيت على نظر رد
نظر: ها مسحولة
: ناوشني اليمك
سكت شويا
: محد يمي خويا شتريدين
: ترا جنت احاجي كحيلة اتصلت على شاهين مشغول
: اي ولج غير شاهين طلع عنده حبيبة
: بربك
: والله
: شوف لا تغلس جيب اليمك
: ميريد يحاجيج
: هاا
: والله
: ماشي لعد اسفين ع الازعاج
: لا خويا ما كو ازعاج الله وياج
: لعد هيج ضيم الله يهون عليك
كلتها وكمت ابجي من كلتها صارت هدوء شويا صوت مشي
حاذق: الوو وينج
: هاا
: شبيج تبجين؟
: انت متحبني
: بربج اني مااحبج؟
: لعد ليش متريد تحجي ويايه هاا هيج ضيم الله مو عزيزة عليك تردني
كلتها وكمت اشهك
حاذق: ولج ياضيم الله كافي مو نبشتي كلبي
: ليش ماتريد تحجي معايا هاا؟
: جذب ما كلت اني هذ نظر الحقير كالها وكام من يمي
: هاا
: وداعتج يا ضيمي
: ليش هيج سوا يعني؟
: يحسب دايحفظ كرامتي يمج ما يدري شي من يجي صوبج حت الكرامة انعل ابوها
: حاذق
: كلبه
: ترا والله ما حجيت ويا امك هيج بالنيشان والله
: اوووف وهم سدي السالفة
: لا والله بس لا تحسب دا اجذب ترا والله محجيت وياها شي غير الكتلك علي هاي جم سنة اني وياك شفتني فرد مرة تطاولت على احد
: مصدكج والله
: ليش صحت بيا لعد؟
: لان من كالتها بالبداية عبالي تمام حجيها لان هي تحجي وهيل تايدها
: امم اريد اكلك شي
: هاا
: ترا مبايلك شغال وو....
: و شنو؟
: سمعت هيل شحجت وياك
: وهم
: حاذق عليك الله انت الك نفس بيها
: وهم شجاي تحجين والله ماافكر بيها مجرد تفكير هي امي لازكة بيها والله حت بالبيت مدا اكعد اكضيها برا من ارجع اكعد بغرفتج مسموط جد جدي بالحر بيها وهسة الدنيا دا تبرد واني بيها وجمالة كسرت الشباج اي حر الا برد يلوحني
: ليش كسرته حاذق؟
: عوفج ليش كسرته
: اذتك ايدك موو؟
: ما احس بيها ميخالف
: لا مو ميخالف انت مو تبع روحك وحدك لو صايرلك شي
: ها من تخافين عليا ليش ترفعين ضغطي ماتكولين لا انجلط
: اني اجلطك اي بس انت ما تاذي روحك
: يا طلابة الخير ادللي
: تحبني؟
: والخلق جتال مرحب اعشكج
: ما تخوني حاذق
: مستحيل
: ما تحب غيري ترا اموتك
: ولج ياضيم الله هوا العنده انتِ هم يفكر يحب بعد كون اموت
: امين
: لج
: هسة اطمنت عليك وها لا تنام ببيتكم واذا داتنام تنام بغرفتنا تقفل الباب وتحط بردات هم وسركي
: ما تريدين اربط جلب بالباب واحط باسورد؟
: تسوي فضل
: هسة يالله وكت تاخر روحي نامي اذا لكيتج نشط اموتج
: انت هم روح نام يالله
: باي يا ضيم الله
: باي ابو نسيم
: اووو ذكريات الماضي
سديته ورتاحت نفسيتي لان حجينا وبررنا مواقفنا لبعض بس هم كلام هيل يدك بكلبي اني ابد متوقعتها تغدرني اني حسيتها اخت وفوتتها بيتي جنت اشاركها ابسط تفاصيل يومي تكوم تحب حبيبي
كمت غسلت وجهي من البجي ولبست بجامتي جبت القميص رشيته عطر ودخلت بسبات
كعدت ع اتصالة والروتين اليومي مال كل مرة لكيت متيم كاعد ياكل
: ول انت ما تكلي عليش لازك عدنا حسرة بكلبي انزل مااشوفك
متيم: دنجبي انتِ 24ساعة دايحة وين تشوفيني
: اكول صدك متيم
: هاا
: يعني صارلك اكثر من سنة خاطب ليش للان ما تزوجت
: لا تسودين وجهج
: هسة فضني واحجي
: اريد الكي بيت نستقر بي
: استقر هنا
: دنجبي هوا انتِ اني لحدي تعيريني نوب اجيب مرتي
: اي ووراها شلون تعيشون؟
: وراها اشتغل تكسي بالرانج
: بلا غباء
: ترا اني يوتيوبر ومودل يعني اخذ ارباح من هل شي غير عندي شهادة فرنسية اتعين بيها
: مودل وجه الجريدي
: البارحة على شنو خابرتي كحيلة؟
: ردتها بموضوع يخصنا مالك علاقة
: اممم مادام عطر بلو دي شانيل طالع من ملابسج عرفت الموضوع شنو
: ههههههههه
: صالحتكم؟
: اي
: بيها الخير
: رايح لمكان؟
: لا تعبت والتايرات متتحمل بعد
: اكول ماعندك سيارة بفرنسا انت؟
: شنو تريدين اجيبها للعراق؟
: لا بس اسئل
: اي عندي بس راح ابيعها وازيد عليها اخذلي بيت بفرنسا حت من نسافر اني وكحيلة نكعد بي
: واو مفكر لي بعيد يالله اني طالعة
: وين؟
: دطبخ ع نهار هادئة
: وداعة شموسة انتِ نجرة
عفته ورحت بدلت ملابسي لبست محتشم هالمرة فستان للكعب تقريبا نيلي وسويت شعري ذيل حصان فرغت الريحة عليا ونزلت اطفر
رحت للمنطقتنا القديمة لبيت اهلي سلمت عليهم ونطيتهم فلوس رحت لبيت حاذق دكيت الباب فتحته امه وابتسامة شماته على وجها
سماح: هم انتِ يالصفرة؟
: سموحة شلون تفتحين الباب بدون ما تكولين منو افترضي ارهاب
: لعد انتِ شنو؟
: اني جنتج عمة هههههههه
: شلون جنتي مو بعد ميكلبج ترا راح ينساج
: لا هههه عمة انتِ شكلج ما مطلعة على اخر الاخبار غير تصالحنا ورجعنا لبعض وكلي اخذج من حلك الاسد
ما حجت شي كامت تطحن وجها صار اسود اكثر ما الله مفحمة
: وين زوجي؟
: ولي منا لج
: بس دسئل ترا
: ويا تاج راسج
سدته بوجهي لعد اكيد ويا هيل ماشي تكلي ما تفكر بيها اذا ما دفنتك انت وياها
وصلت الكوفي دايتريكون كالعادة وهيل كاعدة وحدها مامعترفين بيها صرت ورا وشاهين كبالي
شاهين: اشرقت وانورت هلا بوجه الخير
حاذق ندار شفنا بعض من شافني ضحك طلعن سنانه اني هم ضحكت كام اجا صوبي بخطوات سريعة راد يحضني وتراجع باخر لحضة بس لزم ايدي وشاورني
: مشتاكلج بكد رحمة الله
: اني بعد مشتاكتلك
رحنا كعدنا كبالهم لازمين ايدين بعض بس لازمني بيده المضبرة هيل كل الي بالها مااعرف تفكيرها اجت كعدت يمي
هيل: مشتاكين عيني وهم
: اني بعد مشتاكة خير سمعت عفتي بيتي وكاعدة ببيت حاذق
: اممم كلت ثكلت على اهلج خطية خل يرتاحون
: لا انتِ خفيفة ما تثكلين لو تموتين
ضيكت عيونها تباوعلي بحقد والباقين يضحكون
كحيلة: حاذق ايدك لا توجعك البارحة مكدرت تلزم استكان جاي
: لا ما توجعني
شال ايدي وباسها ويتنفسها وكال
: هاي ردت رويحتي هسة
ابتسمت من حركته وباوعتلها عينها بيدينا وكامت تاكل بشفتها
حاذق صار ياكل بيده اليسرى لان لازم ايدي باليمنة احتركي بنارج هيل عينج بحبيبي مو بسيطة
جت ببالي فكرة واقترحتها
: اكول خل نروح لكربلاء
شاهين: ليش؟
: اجت ببالي خل نروح نزور هين الدرب نروح ونرجع اليوم هي جم ساعة
كحيلة: اهلي ميقبلون
: هياته اخوج وهسة اخابر زوجج بعد يجي حت ابن خالتي ويانا ماكد عذر والباقين
حاذق: معندي شي اليوم
: وانتو يالزوج؟
هيل قبلت ركض من شافت حاذق جاي ونظر كال ميكدر هو وشاهين خابرت متيم كال لامي واجا صرنا 5اجت ام حاذق هم ويانا على شنو ماادري
رحنا اشترينا اكل وعصير للدرب ومتيم ساق حاذق بصفه واحنا البنات ورا صح السيارة جبيرة بس تضايقنة
وانطلقنة حت ما حاسبين حساب لا ملابس ولا مكياج الدرب كله متيم صار يشغل انشايد ويلطم
: ولك راح تكلبها بينا
متيم: ميخالف نموت بنية صادكة
: مااريد اموت ولك بعدني صغيرة
حاذق: لا تكتلنا امعود بعد ما تزوجنا ما حققنا احلامنا
: حققوهن يم الله
حاذق: بس احنا نريد يمك نحققهن
: متيم اذا متنا منو ينطيك الرانج
متيم: اي هم صدك والله
خفف كال لخاطر السيارة مو لزراكم
وصلنا اشترينا جادرات تغطينا بيهن وسبحات مدري شنو هاي الامور كلهن هاي اول مرة ازور كربلاء
دكات كلبي الف تقرا واني اشوف الضريحين كبالي رجفت وشهكت من عظمة المكان
عظيم لدرجة متنوصف قشعر بدني
رحنا زرنه دخلنا للضريح الناس اكوام الجاي يطلب والجاي يصلي شفنا شكال الطوائف هناك واكفين يصلون ناس كاضة ايديها وناس منزلتهم
واكو كراد وشكال شفنا دخلنا للضريح متيم وكحيلة سويا
سماح فاتت ركض بقينا اني وحاذق وهيل دخلنا لازمين ايدين بعض وكفنا بالداخل هيل تمشي ورانا عدل الجادر مالتي وباس راسي ندار للضريح رفع ايدي هوا لازم ايدي وكال
: طالبها منك يابو الفضل دخيلك لا تردني
العالم تباوعلنا وتضحك متت خجل خبيت وجهي بيدي الثانية اجت مرة جبيرة من يمنة كالت نشالله تصير قسمتك
: يابو الفضل خلي بس الي كون ماتحبة وحدة ولا يحب احد بعدي
حاذق: ترا هذ طمع
: ميخالف انت حقي لازم اطمع بيك
دخلنا وكملنا كل الامور وطلعنا خارج الضريح صار وكت الاكل كعدنا اكلنا ويا المرة الجبيرة عزمونا
: يمة انتو منين؟
حاذق: من بغداد خالة
: يااا والبزونة الكاعدة جارك مو وجه عراقي والله
ضحكت على كلامها لان فعلا ملامح مو عراقية
: لا خالة عراقية من اهل عراقين وطول عمري بالعراق انتو من وين؟
: من البصرة يمة جنتي حبلة صارلها 13سنة عاكر وحبلت جان زلمتها ناذر بس تحبل يوكل 40غريب يم ابو الفضل
: انشالله تكوم بالسلامة خالة
: يمة يوم الكم انتِ والي بصفج
خجلت من كلامها دنكت هو كللها انشالله من حلكج لباب السمة يمة غير يوم المنى هذ يصير عندي طفل منها
: يمة انتو كرايب؟
متيم: شجابهم كرايب خالة دباعي الفرق حاذق تكول تاير محروك
حاذق: لا بس احنا نعرف بعض من الطفولة
كحيلة: بس لبارحة تخاربو وصلت بينهم للمحاكم زعلها وخلاها تبجي
: جاا انت ما تحبها يمة ليش تبجيها خطية؟
: شلون ما احبها خالة
ندار ع العباس واشر
: وحك هذ الضريح اعشكها
شفت هيل وسماح يردمن بعض متيم ضحك ورفع تك حاجب متت خجل خبيت وجهي فشلة وناس غربة هيل تركت الاكل وكامت عفتها تردم
حاذق راح دخل للضريح 10دقايق وطلع
: وين جنت؟
: نخيت ابو الفضل بشغلة
متيم: ترا كلنا نعرف الشغلة
: اي طلبتها طلابة منه مايردني اني متاكد
المرة: لا ابو الفضل ميرد احد يمة الله يفتح شكو باب مسدود بينكم
متيم: وهم امج باب الله يفتح امج وامه
لي ما انتبه لجفصته سكت متنا ضحك على جفصته وجهه صار ميتفسر خطية
كملنا وسلمنا ع العالم رجعنا هالمرة امه صعدت كدام وهوا اجا صعد بصفي راح متيم يصيح هيل التربعت بنص الضريح
اجت بس هيل صعدت بجهتة الثانية ويمها كحيلة خليت راسي على كتفة وغمضت جذب مو دنام بس دحركهن
سماح: راسج ثكيل شيلي من متنه هو تعبان
سويت نفسي نمت ماردت
حاذق: لا يمة مو تعبان عوفيها
حط ايد على كتفي وايد على عيوني حت لا افز من الشمس بس كل شويا يتافاف كانه متضايق فتحت عيوني وباوعتله شافني صارت وجوهنا كريبة
: صدقة لمحمد عيونج حالفة يمين تسبيني
متيم: احمممممم
حاذق: خليك بدربك
: هيج عيوني حلوات؟
: وحك كل حرف بالقران مدوخاتني
: تحبني؟
: اموت عليج
: لعد ليش تصيح عليا وتريد تذبحني هاا
: لان اغار
: اش طلبت من ابو الفضل؟
: تعرفين
: لا بربك كول
: طلبت الله يفك قفلة امج وتقنع تنطيني اياج وتشيل المهر الي يكسر الضهر هذ
: اموت عليك
: لا تتلوكين ترا وراج حساب
: هاا شسويت؟
: اخابرج البارحة اكلج سدي اللايف وتغلسين هاا
: ههههههه
: اضحكي اضحكي والله ماكاضني عنج غير هاي ضحكتج
خليت ايدي على لحيته لزمها باس اصابعي وشتمهن بعدين باوعلي
: ذني ينكصن
: لا حباب
عض اصبعي الصغير كسر الاضفر
: خليهن بيج حض
: يا خبيث
متيم فتح المجرة طلع منها كصاصة نطاني هي
متيم: طيريهن طيريهن
كعدت اكص وابجي يخبلون كملت ورجعتها ديلزم وجهي دفعت ايده جرني بقوة بحضنه ومسح دموعي وهو يضحك
حاذق: دباع شكد ترفة على اضافر تبجي
ما رديت خلى ايدي على وجهه سحبتها دمغني ورد اخذها كعد يعض اصابعي على كيفة
سماح كل حسرة تجرها شطولها هيل اشوفها بالمراية وجها اختنك تريد تبجي كحيلة تضحك ويا متيم
حاذق مرة يبوس مرة يعض اصابعي وع هالوضع وصلنا لبغداد وصلهم نزلت وراهم دااحول كدام حاذق مد راسه من الشباك ديشوفني بعدني مطنكرة على اضافري
: لا تنقهرين ياضيم الله بس اغار والله اغار
رد مد راسه همسلي
: والوشم ينمسح لا امسح بيج الكاع ماشي
غمزلي وراح ومتيم حرك
متيم: وهم ارد اكلج شي
: كول
: مااريد تزعلين مني
: لا كول
: شوفي ترا حركاتكم اني ماراضي عليها
: ايما حركات؟
: انتِ وحاذق شنو يبوسج لو يحضنج لو مدري شنو افتهمنا تحبون بعض بس ترا مو بلا غيرة فرد مرة
: شبيك متيم ليش هيج دتحاجيني؟
: احنا مو قليلين غيرة ترا وانتِ مو صغيرة يضل يحضنج يبوسج هم حرام هم عيب جنت اسكت قبل هسة مااقبل شوفي شاهين شسوا من عرف اني واخته نحب بعض
: بس انتو مو مثل شاهين انتو طول عمركم بالخارج المفروض تفكيركم متفتح يكون هم اني وحاذق نعرف بعض من الطفولة
: وهم خويا سمعيني اني بعد مااقبل الي ديصير
: شوكت نقلب تفكيرك هيج هاا
: من جنا كبال العباس وهو لازم ايدج
: متيم كافي تحجي وصلني وانت ساكت
وصلنا ما حاجي كلمة فعلا رحت كعدت ويا امي
امي: تونستي بكربلاء يمة؟
: اي
: شسويتي هناك
: والله شفت عائلة جاهم طفل بعد 13سنة عزمونة ع الغدا
: منو راح وياج؟
: كحيلة وهيل وحاذق
: هم هذ الاسمر؟
: اه يالاسمر يا زين
: وجع شوكت تعوفي لهذ الولد
: مااعوفة ابد والله احنا نحب بعض وراح نتزوج لو شكد ما تعارضين
عفتها ورحت لغرفتي اتصلت بيا كحيله وكعدت تحجي ع الروحة فرحانة بيها شوفتني شويا غراض شترتهن من هناك
كحيلة: والله كلبي صار ثلج من كلامه دباعي شسوا بيها من اجو لهسة حابسة روحها كل شويا امه ادك علي يكللها شسويلها
: ياا ما سوينا شي والله
: ولج ما كام يعض اصابعج تكولين موتها وجها صار اسود من شعرها ههههههه الا امه والله دمها مشتعل هيل صارت تضايقه ما تشوفي كام يعضج
: ترا مالهن حق بي هو حبيبي اني هنا ليش يضوجن
: ولج ما انتبهتي كل شويا يتافاف هاي هيل دا دقة وخلاها تطحن لمن لزم ايدج
: صوجها تحط عينها على شي مو مالها خلها تبقى تردم
: عوفج منهن خل يولن ترا هيل حجت ويا متيم من وراكم كلتله شنو بت خالتك لازكة بي كبالك ما تغار ماعندك غيرة
: اني اربي معليج بيها خير انشالله
فترة وبدا الدوام صرت مرحلة ثانية قلت مراسلاتنا وحجينا صار اغلب شي بالجامعة لان درس وامتحانات
حت علاقتي بمتيم قلت اشترا بيت واثثه وفتح مشروع على كد فلوسه حت يتزوج
مرت ايام الدوام عادية حيل جبرتني امي اخذ دروس لغة انكلش واسباني لان كلهم بالبيت يحجون اكثر من لغة
لازم الدورة تستمر 6اشهر دااكمل الاسباني رجعت من الدورة عادي يوم طبيعي طبيت لبيتنا واشوف الصدمة كدامي ما توقعتها شفت
مرهم تبجي وقيصر ملابسه كلهن ملطخات دم امي تلوم بي وعائلته عدنا
: ولكم هاي شكو؟
امي: قيصر جتل زلمة مات هسة اهله يردون دم قيصر
نزل الخبر عليا صاعقة شلون كتله شنو من كلب يخليك تكتل بشر
ندفر الباب ودخل ادن الغضب يطلع من عيون يصيح ويعيط
ادم: مو 100مرة كلنا لا تشيل الخرا كنالك لا تروح صوب ذولة الناس برد كلبك هسة
قيصر: هوا اجا كبالي وبدا يذب حجي
: وحضرتك ما تحملت بلا ما تظربه مجنون ما تكدر تكمش روحك هذ السلف كله بضهره عشاير وراها هسة هذول شنو يسد حلكهم؟
: ينسد بفصل
: وشكثر ديفصلوك انت ما تعرف تفكيرهم يعرفون الفلوس تنحل بس راح ياخذون فصلية منا انا متاكد ضل طول عمرك سوي بلاوي وذب براسنا احنا نحل وراك وانت عميد ركن يعني تعرف شراح يسون
: وان رادو فصلية عندي اخت خل ياخذوها
: اي والله انطي اختي لخاطر جنون حضرتك مو اي لو تنحكم 100سنة والله ما انطي بوحدة بيهن
: انطيهم بتي عود
: قيصرر قيصررررر انت تريد تجنني لو شنو بالضبط بتك طفلة شنو تنطيها وهذول كفار ما يخافون الله غير احنا اعداء دينتقمون منها دذبهن انت
: بتي وبكيفي وين ما اريد اذبها مااحسن ما يطلبون دمي
: والله اذا طلبو دمك راح يريحون كثار بعدك
هما يلغون ودخل خالي الشيخ وولده كعدو بالصالة اني ومرهم موجودات صاح بينا صوت خلانا ما نعرف باب الصالة طفرنا لغرفنا بقن امي وجيهان
: ولج بس حجيلي مو نسطل راسي والله
مرهم: شنو المافهمتي وهم اخوج كتل واحد
: ليش ولج حجيلي والله كلبي راح يطلع من مكان
: هذ عداوة ويا من زمان ما ناس تحب ناس
: ليش؟
: حرب قديمة من زمن جدج العشيرتين ما معترفين ببعض وحالفين اذا احد شاف الثاني يكتله
: وليش هيج داتكولين شغلة من زمن جدنا يعني ماتت وياهم شنو هالعقليات
: وهم كافي تحجين والله كلبي واكع اني هم ما معوزة انتِ بس ادعي مايخذوج فصلية
: ليش دياخذوني اني شنو ذنبي خل يحلوها بينهم
: وهم احنا تحكمنا العشاير بعدنا لو دم لو فلوس
احنا نحجي ونسمع صوت الطك الرمي شتغل مرهم واني انبطحنا بالكاع اني اصيح بمدري شنو ما اوعى شباج البلكون تكسر وصار طشار بالغرفة من الرمي وصوت الصريخ ماندري منين نتلكاها
ادم يصيح انبطحوو لاحد يوكف من جوا ضربو يمكن 100مخزن بس ع البيت وكف الطكو بدو الزلم برا يصيحون
: اطلع لك جباااان اطلع اليوم الدم للرچاب يصير
انكطع الصوت وصوت رجول تركض والزلم تحجي ما فهمت كلامهم لان بس يعيطون واني مصدومة من الصار بيتنا صار غربال دخلت امي تركض حضنتنا اني ومرهم
امي: لا تخافن لاتخافن ماما
: ماما البيت انترس طلقات
: لا تخافين ماما بالجو ذني
تاذيتن بيجن شي
لج ماما بيج شي مرهم بيكم شي شو خل اعاين
فحصتنه ماكو اي شي بس الرهبة بيا حضنتني هي ومرهم
: اادم ادم وين ادم اريد ادم
امي: ويا الزلم اخوج يمة اهدئي
: اااا ادم اا ادم اريده اريده
: هسة يجيج امي بس اصبري
مرهم امي انتِ بيج شي
هزت راسها لا شويا واجا حيدر لوحده لبغداد هدت العركة شويا
خالة خولة وخالتي بيتنا امتلا نسوان نضفنا الكزاز كوة خلص النهار ندك على اخوتي محد يرد جيهان وامي مكابلات بعض ويلطمن لو يبجن شلعن كلوبنا لي الليل
واجو بالليل حيدر وادم امي تلكتهم
امي: وين اخوكم؟
ادم: وخري يمة بالدوب واكف والله خل ارتاح
وهم وين وهم؟ وهم خويا مرهم وينجن
امي: هياتهن خواتك يمة
: تعالن
فتح ايدي رحنا علي حضنه ثنينا وكعد يبوس براسنه
مرهم: ادم بيك شي حبيبي
ادم: خفت عليجن مكدرت اجيجن من صار الرمي
: وهم خافت اني ماخفت هواي هديها الها
: صدك؟ شبيج ابويا باوعيلي
رفع راسي شافني شفتي ترجف حضني اكثر
: لتخافين ابويا لتخافين
: الرمي
: مايلوحج بنيتي
امي: وهم من صار الرمي صارت تصيح باسمك يمة
مرهم كامت لمني بيدي ثنينهن اله واني حظنته قوي ارجف وابجي
ادم: يبوي اهدئي لترجفين هيج لتخافين
: ادم جنت راح اموت
: غير اموت وراج
: خفت عليك بعد ياذونك
: لتخافين ابويا وياج والله ماعوفج لو ميت من صدك تحتاجيني افز من كبري
حيدر بصفة كعد ورجع راسه لورة دايخ واحنا عينه على حلكة نريدة بس يحجي
امي: يمة بس برد كلبي بحجاية
حيدر: ما اتفقنه على شي روحو البسو دانطلعكم هذول بلا شرف لا يجون عليكم
: شلون يمة ما تفقتو لعد من الضهاري وينكم شجنتو تسون؟
ادم: الزلمة مات قافلين على دم قيصر ما يقبلون يحجون الا يستلمون قيصر يكولون روح بروح واذا قيصر ما سلم نفسه من هسة لي ورا الفاتحة ياخذون 7زلم منا
امي لطمت على وجها وصارت تنوح
: دخيلتك يا علي يا مولاي دخيلك ردلي وليدي
حيدر: كافي يمة والله ما بيدنا شي نسوي خل بس يخلصون العزا وبلجي تفض بفصل
: لا لا انا اعرف كليبي حسني وليدي رايح
ادم: يمة والله تفض بس انطي مجال
: وينه هسة؟
حيدر: طلعنا ويا ولد عرف راح للشمال راح يبقى هناك فتره الى ماتفض
: ودوني علي
: لا ما نكدر يمة مراقبين احنا
ادم: البسن نوديجن
: وين؟ ادم تتركني؟
: ابويا انتِ وياج انا بس كم يوم احافظ عليج بيهن اذا ماسويت هيج ياذونجن
شفتي رجفت اباوعله عاجزة عض شفته وحظني
: خذني وياك وين ما تروح
: لج لو اكدر بعيني اخليج واروح بس ماكدر امي انتِ بس افهميني لازم احافظ عليجن واذا ابقى وياج تتاذن بس كم يون يروح اخوج بس كم يوم
كام ديطلعنا رحنا بسرعة تفالتنا كل قسم راح لمكان جيهان خذت جهالها وراحت للبصرة ادم اخذ امي ومرهم للموصل رجعت وياهم عمتي وبناتها
واني رحت لبيت بابا جبل وصلني متيم واخذ السيارة وراح دكيت الباب هجمته فتحته امي وفتت انهج كوة اسحب النفس
امي: شمالج يمة شصار بهل ليل؟
كمت ابجي وحضنتها هي ما فاهمة شسالفة بس تباوعلي حسيت روحي رخت من البجي خلتني انام كعدت الصبح
ماكو اي خبر وادم موصينا ما نفتح مبايلاتنا ولا نتصل باحد كعدت وحدي اردم بالغرفة الدنيا ضاكت بيا
دخلت امي صاحتني للاكل طلعت غسلت وكعدت وياهم مااكلت بس اصفن وهمَ ساكتين
كملنا الغدا ورجعت للغرفة دخلت امي
امي: يمة شبيج من البارحة مو طبيعية شو للجامعة مارحتي؟ ماسئلتج لان شفتج تعبانة
: والله يمة مصيبة ووكعت على راسنا حت ع الجامعة مااكدر اروح بهل فترة
: ليش يمة شصاير؟
حجيتلها شصاير لطمت خدها
امي: يا مصخممممم
: يمة والله خايفة لا ياخذوني فصلية
: لا يمة انتي شلج علاقة هم ادم ماراح يخليهم يصلوج
: بس ماما كالو يردون دمه يعني....
: معليج بيهم يمة ضلي هنا هسة يمة بتي اسم الله عليها يسونج فصلية يايمة اموت والله
للعصر ماكو اي خبر من احد كاعدة على نار كلبي يجويني اجت كحيلة لتن متيم خابرها كعدت تحجي معاي تهديني
بس كلبي يفور حسيت راح يصير شي وماخاب احساسي بالتالي
طلعت كحيلة لئن شافت ماكو نتيجة من اقناعي جابتلي ملابس دااغير وطلعت بدلت ملابسي بدون واهس عيوني ورمن البجي والتفكير
انو اصير فصلية واني اعرف حياة الفصليات شلون تكون مرات افكر لا يكتلون قيصر خطية عنده اطفال
مرات افكر اذا ما نلزم ياخذون السبع زلم من ضمنهم ادم وحيدر 100فكرة اجت بدماغي
كلبي يوجعني افركه باب غرفتي مفتوح كبال باب البيت ندك وفتحته امي دخل حاذق وكحيلة ورا خايف لو قلق شكلها كحيلة كلتله
شفنا بعض واني القلق مرسوم بوجهي وافرك كلبي جر حسرة طويلة وتقربنا لبعض جرني لحضنه حط راسي بين ايدي ويفرك شعري
حاذق: لا تشيلين هم محد يجي صوبج
: خايفة حاذق
: لا تخافين اني يمج مااعوفج والخلق جتال مرحب
: راح يخلوني ابتعد عنك
: خوب انتِ صاحية ودا تحجين والله محد يكدر ياخذج مني اذبحهم ومااخليهم يجون يمج
: احس داموت والله
: كافي ياضيمي كافي مو موتيني
مسح وجهي وباس راسي ضل وياي لي الليل افرك كلبي ماكو خبر ع اهلي اخابرهم من تلفونه مغلق وحساب ادم بعد. مغلق
دخلت لحسابه اشوف صوره القديمة وابجي
: يانظر عين اختك
حاذق: مو اخته حيروح نظرها من البجي
: اشتكتله اريده يجي حاذق متعودة علي وعلى صوته
اريد اخوي حاذق اريده
: بعد مو قيصر المطلوب
: ادم ابوي
شهكت ابجي وحضنت التلفون على صورته حاذق ضاج اعرف بس مهتميت طلعت صورته يضحك بيها وعيونه الصفر بيهن فرح
: ياخويا ماتسئل عليه فدوة
ابتسم يطمني متحملت شهكت ابجي
ثاني يوم نفس الشي ماكو اي خبر حسيت كلبي مردني عليهم شتاكيتلهم لامي وسوالف متيم واعصاب قيصر وفزعة ادم الي
لبرائة مرهم ستوحشت عليهم كلبي بدا يوجعني وافركه ميفيد شكثر اخذ علاج ميفيد بالي يمهم
ضليت اسبوع ماكو اخبار كطعت الاكل كلبي حركني اتصل بحاذق من تلفون امي او ع النت واحجي ويا كالعادة بس صوتي تعبان
: شبيج صوتج رايح؟
: تعبانة
: والله صوتج جاي يستنزفني وهم كافي تسوين بروحج هيج
: حاذق ذولة اهلي
: بس شوفي شدي حيلج ماضل شي تفرج
: راح اموت
: لا تكولين هيج انشالله ماكو شي بس صوتج لا تحجين هيج والله حيلي رايح
: كلبي خلصان
: وهم
: روحي تعبانة حاذق
كلتها والمبايل وكع من ايدي اخير شي سمعته ع يصيح اسمي
: وهمممم الوووو ولج وهم ردي
ما وعيت على روحي كمت اصحى ثوني وارجع انام صحيت على دك الباب نهجم وامي فتحته
رديت فزيت جنت بسيارة وراسي بحضن وحدة بعدين فزيت جنت ع السدية
صحيت لكيت بيدي كانونة ومغذي راسي يفتر وبصفي كحيلة شافتني اجت حضنتني ودمغت راسي
: شكو؟
: ولج والله كلبنا شلعتي
: شجاني؟
: اخذنالج فحوصات هسة تطلع وتعرف شبيج
: وين حاذق؟
: راح يجيب التحاليل خية خليتي ينطح حيطان الكل سمع صوته
: ليش وين شنو؟
: جان ويا شاهين بالكوفي واتصلتي حجا وياج وبدا يصرخ الوو الووو وطلع يركض من الكوفي شاهين اجا علينا كال كومي مااعرف شبيها وهم
: ياا ومنين عرف؟
: على هيل ديصرخ هيج مثلا؟ المهم طلعت من بيتنا جان شايلج وحاير بيج وين يوديج وانتِ جنتي ذايبة بيده شافج شاهين وكف تكسي وصعدنا جبناج بسرعة اخذولج فحص دم قسنا ضغطج خلولج المغذي واخذنالج تخطيط بالدوب كلبج ينبض خية خليتي يشيل روحه ويلزكها بالكاع
: اووف كحيلة والله تعبانة
: هههههه لو تشوفي لمن الدكتور طلع صدرج دايحط الطبوعات صار يردم الا لمن الدكتور صفن بالوشم كب علي كله شوف شغلك بس
: هههههه وتالي شصار؟
: والله وصلج ودخلتي للطوارئ هو هم بعد رجوله ما تشيله كعد بالممر بس مانطى كسارة بروحة قاوم
: عطشانة
كامت دا تجيبلي مي دخل حاذق شافني جر نفسه واجاني طاير حط التقارير يمي
: شصابج ياضيم الله
: تعبت
: حبيبي ميصير كل هبطة اكلها منج اكبر من الكبلها والله كلبي طاح نكطع خلفي
: خوفتكم عليا والله اسفة
جر حسرة ومسح راسي
: بويا بس شدي حيلج مااريد شي
اجت كحيلة شربت المي وجانت فرحانة
: شبيج فرحانة شنو طلع بيا ولكم؟
كحيلة: وهم ترا ميصير تاخذين ادوية من دماغج انتِ
: شسوي جنت اريد شي يبرد كلبي
: هسة شويا ويبرد لا تستعجلين
: شيبرد ولج على اخوتي وامي والله كلبي محترك
ادم ماسئل عني
ولا حتى امي
كلتها وكمت ابجي هي تضحك شاورت حاذق معرف شكلتله مسح دموعي وطلع هوا وياها
كاعدة اصفن وابجي اريد اخوتي وامي الى ان نفتح باب الغرفة البيها اني ودخل متيم
اني شفته نجنيت عيد وجابة الله الي شهكن ابجي فتحتله ايديا اجا ركض حضني وباس راسي واني تعلكت بي مخنوك يريد يبجي
متيم: ها ولج كالو راح تموتين
شكو شكو كافي بجي حبيبي وهم كافي
ولج اتشاقة اتشاقة ياعمري ياروحي لاتبجي لتبجين هذ اني يمج والله
:وين رحتو عني متيم وين ياروحي رحتو وتركتوني كلتكم
محد بيكم سئل عني محد.بيكم اخذني وياه كلكم اطشرتو وعفتوني
: مالكينهومكان افضل نخليج بي ادم الكال
: وااااا ادم مسئل عني ابد
: محد مفحط كلبه بكد ادم ولا حتى دندونا وواكفلنه ع الكلمة يريد احد يكله بخ ديتلكبشه وما بباله بس انتِ بنت العفريت
: يانظر هين اختك اريده اريده متيم الله يخليك اي خبر منه
: زين الحمدلله عايش داير باله على امج واختج بس باله يمج ولتخافين مو ناسيج مخليلج وادم تشوف طلعاتج وفوتاتج ومنو يجي لبابكم بحيث خابرتني امج تكلي وهم متخربطة روحلها لان الثور مزنجلي صوته بعج اذاني وهو يكول هدوني اروح لبنيتي
بت كلب
: ولك حقير شلون عفتني كل هالايام ما تسئل عليا بيهن
: منهو العافج خويا ليش بهل ايام اني كدرت اسوي شي حابسينه بالبيت مكدرنا نمد راسنا اهلي واهلج اطشرو كلمن محافضته ما ضلج لا عم ولا خال ببغداد كلها طفرت بس نحلت هسة
: وشلون نحلت تالي؟
: يجيج الصافي ما خلينا احد ماتنخينا بي لا شمال ولا جنوب ولا اوسط توسلنا بالكل يحجون ويا اهل الولد واقتنعو الحمدلله ماياخذون دم بس...
: بس شنو على شنو اتفقو قيصر راح يصيرله شي؟
كلتها وكمت الطم واملخ روحي
متيم: بسج مابي شي قيصر تكول ثور
: لعد؟
: طيبي وهم ويجيج الصافي والله انتِ اجالج
: ماادري ما شفت تقاريري عد مرتك
: هسة عود طيبي والله كريم راح يسجلولج خروج اليوم ارجعج لبيتكم
: لااا كمت اخاف من ذاك البيت باي لحظة ممكن يطبون علينا والله اخاف متيم حباب لا تاخذني الله يخليك
: هذوا هذوا خويا ما اخذج براحتج هم يحتاجله شبابيج الكزاز كله طار منا لجم يوم ردي ماشي
: متيم وين اخوتي شو ما اجو وياك
:ادم رابطي بس اتوقع فكو اللحبال منه هسة
دايتفقون وياهم ع الفصل مادام شالو من سالفة الدم بقى شراح ينطوهم بس
: عرفو بيا هنا
: اكيد مو كتلج ادم مربوط لان انتِ وكعتي واني من عرفت انتِ دا تودعين كلت اجي اضمن السيارة وبعدها توكلي
: ايا حقير جاي ع السيارة مو علية
ضحك وكال
: ولج انتِ الروح والريا والله من عرفت بيج هنا جيت ما اندل دربي بس ردت اشوفج
: اريد اخوتي
اشر من عيوني وطلع برا مدري ليش طولو ودخلو حاذق ومتيم وكحيلة وشاهين وجوهم ما تتفسر كل واحد بعيونه اكو حجاية
: ترا ما اموت والله شمالكم
شاهين: لا اسم الله عليج خويا شيموتج انتِ بسبع ارواح
: شبيهن تقاريري؟
محد رد كلهم عيونهم بالكاع لو يباوعون لبعض يريدون واحد يرد
: ولكم بس لا سرطان
كحيلة: لا اسم الله ووجع شنو تفاولين على روحج
: لعد شبيكم متكولون
متيم: يحتاجلج شويا راحة بس كتبولج ادوية تمشين عليهن ومرة ثانية لا تسوين روحج اختصاص قلبية وتاخذين ادوية لان راح اهفج بدفرة اعدل خلقتج
حاذق ماحجا شي خال ايدي بجيوبه وساكت مدنك مغمض عيونه
حجيهم ما اقنعني بس سويت روحي مصدكتهم لان تعبانة وماليا خلك اترادد دخلت ماما شموخ سلمت عليا وبدت تبجي
ماما: سودة بوجهي يمة شصابج كون بيا ولا بيج
: اسم الله عليج ماما بس كافي تبجون كلكم خمو شبيا
ما ردت بس ضلت يمي لي الليل نكتبلي خروج طلعت متيم وصلنا كلتنا لبيتنا دخلت البيت وتفاجئت من شفت ادم واكف باب غرفتي ومدنك
على صوت فتحة الباب رفع راسه شافني
اني من شفته ماوسعتني الدنيا من الفرح شهكت رحت حضنته ركض هوا دنك عليا ودموعي يصبن من حالهن ابجي بخنيك هو يريد يبجي بس كاطع النفس حت لاشوف دموعه بس مبين من حضنته ضام شي عليا
اناشغ بحضنه وهو احتار شلون يحضني شلت راسي لزمت جفوفه بجفوفي
: وينك عني ياخويا وينك عني
شلون انطاك كلبك تعوفني كل ذيج الايام
ادم: اوووووووف بنيتي مشتاكلج والله
: ليش عفتوني ادم مو اني اختكم محد بيكم سئل عليا شلون نطاكم كلبكم بيا
: ولج والله اروح للمضيف جسم بس يم الوادم كل تفكيري بيج وباختج اكول هاي ثولة شراح ادبر
: طلعت ثولة ادم والله متت خوف عليكم كل شويا تجي ببالي فكرة عليكم كلت راحو اخواني فحط كلبي على صوتك حتى اسئل حاذق وامي
اطلع صورك بالتلفون وابجي
: اندفن انا لان بجيتي بسببي كون غسلوني وجفنوني
: لا ادم لا لااااا لتكولها لا
والله اموت اني والله
: هسة فضت الحمدلله وهم بابا صيري زينة عاد كالولي وكعتي يابويا حسيت حيلي نهد مشي نرجع لبيتنا اي اريد تنامين بحضني الليلة يخوي
: مابيا شي ترا من تصلحون شباج البلكونة ارد للبيت
جر حسرة طويلة وفرك راسي
: اريد افوتج بكلبي والله
: خويا صاير شي الله عليك؟
: لا والله بس مشتاكلج وهومتي بس هسة راجع انا ديري بالج على روحج باجر لو بعده اجي اخذج وارجعي لدوامج ماشي
: ابقى وياي
: اتمنى هيج كون اخليج عمر بحضني ولا تنلمس شعرة من راسج بس لازم اروح
برطمت لزم ايديا ثنينهن بوسهن ولزم وجناتي صار، يبوس بخدودي تركهن وراح واني فتت لغرفتي ارتاح كلبي شويا من حجيهم حيل فرحانة بلمسات ادم لوجهي
بقيت ابوس ايديمكان الباسها واتحسي خدودي مكيفة وانها فضت بس اكو اشياء قالقتني
من طلعت التحاليل محد حجا شي وهسة ادم مبين ضام شي ومتيم مثله يعني ضربتين بوكت واحد
مادرت بال حضرت ملابس للدوام من كحيلة ورحت ثاني يوم للكلية اخذنا دروس مشا يوم طبيعي يوم الورا نفس الشي بس جزعت روحي اريد ارجع لبيتي
رغم كلشي احس ذاك هوا بيتي لان تعودت علي وعلى اجوائة صح اول اسبوع ما انتبهت لان جان تفكيري قلق
بس من ادم كلي فضت ردت ارجع
رجعت لبيتنا لكيت ادم جاي دياخذني بدلت ورحت ويا ركض متوحشة لغرفتي ولسريري ولاهلي
صعدت من كدام واجا ضايج يسوق لزم ايدي خلاها ع الهاند بريك ويسوق بينا اباوعله يتحسس السيارة ويرجع يسوق
رحت لبيتنا ولا عبالك الطلقات كسرت الشبابيج مبدليهن كلهن بس الحيطان مدمرة هم راح تصلحهن امي
دخلت شفت قيصر بوجهي نقهرت علي رحت حضنته وكمت ابجي هاي اول مرة هيج اسوي
ع الرغم من قساوته عليا وميحبني بس يضل اخوي حضنته قوي هو هم حضني
: قيصر ليش هيج سويت والله وكعت كلوبنا
: دبس وهم كافي
: شلعت روحي بعملتك هاي
: تدرين وهم انا مدين الج لان انتي انقذتيني
: ها شلون؟
كلتها وشلت راسي اباوعله داشوف شيقصد
: رادو فصل 500مليون ونطيتهم من سيارات الي بالمعرض مالتج
: فدوة الك خويا اهم شي تركوك مو مهم فلوس
: اي مو مو بس فلوسج الخلصوني
: لعد؟
: يااا شكله ادم ما كلج بس ميخالف انا اكلج رادو فلوس وفصلية واني نطيتج الخميس يجون ياخذوج خويا
اني سمعت كلامه لو ضربني طلقة بكلبي شلون ينطيني فصلية ادم شلون وافق ولا جاي يكولها بكل برود وفرحان بقيت واكفة اريد استوعب
: تتشاقة مو؟
: لا ليش داتشاقة؟ لعد تقبليها اخوج ينحبس؟
: بس خويا اني مااريد اتزوج مااروح فصلية انت شلون تقرر هيج قرار عني
: والله وهم شوفي بكل الحالات ما توقعتج تستغربين وهذ طلبهم ونطيتهم اليريدو فصل وفصلية انطيهم منو فصلية مرهم مطلكة انتِ ماكو غيرج
: قيصر اني مااكدر اتحمل نتيجة افعالك
: تكدرين لو لا هذ الصار لو ما نطيتج جان اخذوني جتلوني تقبلين انا اموت؟
: لعد الملايين الراح ياخذوهن شنو؟
: رادو فوكاهن فصلية انطيهم منو مرهم مطلقة وريام صغيرة ما لكيت غيرج
هوا يحجي ببرود ومكيف بروحة اني مداستوعب اش جاي يحجي افرك كلبي وارجف
باوعت ادم واكف وراي دايسمع ومدنك مغمض قوي
: ادم؟
ادم: وهم خويا
: الديحجي من صدك ادم؟
ما كام يحجي بس ياكل بشفته
: ادم لخاطر الله رد كلمة شنو الديكولة؟
انطيتوني فصلية خويا شلون هنت عليكم لعد مو اختك الصغيرة اني ومحد يكرب صوبي وانت موجود؟ لخاطر الله ادم رد بكلمة مو كلبي راح يوكف ادم شدا يحجي فصلية اني اروح ادم فصلية
اجا تكرب عيونه مغوركة لزم ايدي وحتى هو يرجف
: وهم ماجان اكو طريقة ثانية نسكتهم عنا بيها لا تخافين مااخليج يمهم بس كبال العالم جم شهر ونرجعج بس اهدئي
: جم شهر؟؟
: خويت
: ذبيتوني انتم
: ينظر عيوني اذب عيوني وماذبج والله بس مجبورين وداعتج ومعزتج بكلبي مجبورين
: واني جنت ابجي عليكم ادم وبالي يمكم تذبوني هيج
يمة يمة كلبي
: ياخويا كون كلبي الينوجع ولا انتِ وداعتج وداعة عيونج ماخليج يمهم ايام والله بس اهدئي
: شهدء انتو نطيتوني فصلية لناس ماتخاف الله شراح يسون بيا ذولة اني ما مجبورة اتحمل اغلاطكم
قيصر: وهم بلا حجي زايد الخميس يجون ياخذوج هاي اخر كلمة
: والله انتحر وما اروح اموت وتبتلون بيا عود سد حلوك العالم اختهم نتحرت قبل زواجها
حجيتها وضربني راشدي طير صفحة وجهي سمعت صوت ادم صاح بي ودفه
ادم: تضربها فوك ما نطيتها فصلية تضربها
قيصر: داتسمع لسانها شطوله مداتقبل تروح
: خلها هي تقتنع معليك بعد ما متقبلة الموضوع للخميس ترضا
: انتو جاي تحلمون ترا لو اموت مااقبل بذولة الناس ولا تفكرون اتقبل الفكرة ويا الايام والله 100طريقة انهزم بيها
ادم: خويا الله يوفقج كلبي ماناقصه
: قيصر ما جنت استغرب منه شي بس انت
شلون كدرت تسويها بيا ادم مافكرت بيا
: وهم
: خذلتني
: خويا
: مشكولة ذمتكم ليوم الدين ولا تتوقعون ارضى
ولك اشلون مو بنت ابوك اني؟ هيج تذبتي هيج؟
: لا خويا والله ماذبيتج والله العظيم مهان كلبي عليج
: ماروح ادم ماروح بداعتي بداعة اسراء لتخليهم ياخذوني
: مياخذوج مياخذوج ابويا بس لتشهكين هيج والله دتسحبين روحي خلي يتبدى دمي انا انتِ بس لتبجين هيج مو يردون دم انا اموت ميخالف بس لتبجين
قيصر: شني كيفك هي متروح تروح غصبن عنك وعنها شكو يردون دم
نداريت لقيصر
: لو دمك يطشر ما اقبل ماشي خلها ببالك ومااضل والله
عفتهم رحت لغرفتي 100فكرة براسي راح يخلوني اروح فصلية راح تدمر حياتي شلون قبلو يسون هيج بيا شراح يصير بحاذق يربي شهل ورطة
الى متى يضلون بهل عقلية فصل وشيوخ وصخمان وجه اشنو ذنب الاخت لو البنت تروح ضحية طيش اخوتها الى متى يضلون بهل تفكير
وجهي يوجعني وافرك كلبي من القهر
دخلت عليا مرهم تبجي يعني تعرف بالموضع ما تحملت طردتها
: اطلعي
: وهم الله يخليج كلبنا خلصان
: داكلج اطلعييييي مااريداشوف احد بيكم كلكم تعرفون بالي ديسو بيا ومحد عارض
: مجنا نكدر نعارض على شي يكتلون قيصر
: لعد يكتلوني واني طيبة انتِ تعرفين شنو يعني فصلية
: وهم حبيبي ماراح يخلوج تطولين عدهم كلها كم شهر ويردوج
: مرهم طلعي داكلج من هيج عاجبج روحي انتِ
طلعت وتركتني حالها مو احسن من حالي
ماحسيت على روحي الا نمت ما كعدت لثاني يوم بسرعة بدلت
لاتنسون تصويت⭐⭐⭐⭐⭐
اسراء العزاوي
💜💜💜💜