ياسمين : سدي داركم و يله باتي معايا اليوم و غدا نمشيو لصالون نقاادو شعرناا و نيت قطعي حتى أنتي كصة راع شعرك ولا خايب بهاد شكل و حتى أنا غنخربق شي حاجة في شعري و ندوزو نشريو ليغوب دو سواغي عندي فلوس و فالليل نرجعو لداركم نبدلو و نمشيو
أمال وسعات عينيهاا : واش حفلة بالليل نااري معرفتش خربقتيني
ياسمين كتوسوس ليهاا بحال شيطان : مالك أ صاحبتي يله فوجي حتى أنتي تبقاي حابسة راسك هناا حتى تمرضي غير يله غيعجبك الحال حفلة فيهاا غير البنات فقط يله أصاحبتي
أمال بقات كتفكر في كلامهاا و ياسمين مصغرة فيهاا عينيهاا حتى تنهدات أمال و بتسمات : صافي مشات هه
ياسمين بتسمات بإنتصار و وقفات : إذا نوضي نمشيو و سورتي داركم غذاا غادي نزهيوهاا و غتدوزي أحسن نهار في حياتك عمرك تنسايه و غتفكريني بيه ديمااا
أمال : وبلاتي نهز حوايجي بااش نبااات
ياسمين جراتهاا : غير زيدي كلشي عندي متخافيش
أمال هزات سوارت و سورتات دارهم و هبطو غادين خارجين مع درب حتى كيبان ليهم سكفاندري جاي مقابل معاهم ياسمين صرطات ريقهاا دابة إلا شافهاا غادي توحل و تصدق حاصلة معرفات مادير و داكشي لي وقع نيت حمزة شافهم و ركز مع ياسمين ضحك و جاا كيجري عندهااا حتى وقف قدامهاا : رانياا فين الغبور توحشنااك
ياسمين ولات غير كتدور عينيهاا و ضربتهاا بسقلة أمال مسكينة يسحاب ليهاا معرفاتوش و شافت في حمزة وقالت : أحم سمح ليناا خاص نمشيو رانياا مريضة متقدرش تهضر
حمزة بخوف : مريضة كيفاش شنو بيهااا أجي وقفي قولي ليااا
أمال جرات ياسمين كيتمشاو بزربة مبعدين منو و قالت بصوت مرتافع : غير ضارهاا حلقهاا مرة آخرى و تهضر معااك مزروبين
مشاو خلاوه واقف تماك مافاهم والو ياسمين دارت فيهاا بوهالية : شكون هو هااد دري
أمال : هذا هو بزناز ثاني لي كتهضري معااه من بعد تايغر ياك بعداا وصلاتك خبار شكون تايغر راه هو لي حاكم هاد منطقة و خااسر بزااف تلاقيتي معاه شي مرة
ياسمين كتبوهل عليهاا : لا عمري شفتو واش هاد حمزة حتى هو مصاحبة معاه أنااا
أمال : لا أنتي كتبغي تايغر وهو لي مصاحبة معاه أماا هاد سكفاندري كان كيعجبك في الأول ولكن على ماقلتي ليناا نتي هادي شحال كتعتابريه بحال خوك
ياسمين ميقات فيهاا : أممم و مين عارفين كنعتابرو بحال خوياا علاش رديتوني أنتي و داك ريضاا مصاحبة معاه شوهتوني
أمال : و غير زلة لسان و صافي أصااحبتي ..
كملو طريقهم الدار ياسمين دخلو لقااو سلوى جالسة في صالة كتفرج و إكرام شادة واحد قنت حاطة يديها على ذقنهاا و عينيهاا منفوخين كتخمم ياسمين دخلات هي و أمال و سلمو عليهم و طلعو بيت الفوق عطات لأمال بيجامة لبساتهاا و جلسو العشيى كاملة كيتحتو ياسمين طالقاهاا على أمال جالسة كتعاود ليهاا على شنو دوزو مع بعضهم وهي جالسة تشقلب عينيها بملل حتى وصل وقت العشاء هبطو تعشااو مع عائلة مجمعين حكيم شاف في ياسمين و قال بجدية : خلصتي داك سوايع لي عطيتك فلوسهم
ياسمين بتوتر : هاا أه خلاصتو خلاصتو
حكيم : إمتاا غادي تبداو مراجعة ديال بااك تماك
ياسمين : أحم شي سيمانة و نبدااو
أمال كانت غير كتدور عينيهاا بستغراب : إن سوايع ديال باك
ياسمين : تسجلت في مراجعة ديال الباك حيث مابقاا ليه والو يله نبدا نحفظ
أمال هزات ليهاا راسهاا و رجعو كياكلو منين كملو طلعو بيت باش ينعسو إكرام تلاحت مباشرة فوق ناموسية مغمية ياسمين شافت فيهاا بشك عرفاتهاا بيهاا شي حاجة ولكن مابغاتش تجبد معاها موضوع قدام أمال
ياسمين جابت غطاا آخر و فرشات ليهاا في الأرض هي أمال حيث سرير ديال شخص واحد مغايقدهمش تلاحو حتى هوماا باش ينعسو ياسمين كانت غير كتشوف في سقف و كتحس برحم ديالهاا كيضرهاا كمشات ملامحهاا قرمات شفايفهاا كتحاول تنااسى موضوع كتعصر في عينيهاا و كتأوه بصوت منخفض كتسمعو غير هي ...
عند أمجد لي كان ناعس على كرشو صدرو عرياان صونا ليه تيليفون عند راسو زفر بغيض و هزو حطو على وذنو و وهو باقي مغمض عينيه سمع صوتهاا أنثوي صغير لمنرفز وهي كتشكي عليه : أمجد هء هء
أمجد سمع صوتها بحال إلا كتبكي ناض جالس عاقد حجبانو : مالك شنو واقع علاش كتبكي
هي : دادي مخلانيش نمشي لواحد سواغي كاينة غذا بالليل هء هء و قالتهاا ليك أنت باش تخليني حيث إلا عرفك سمحتي لياا نمشي مغاديش يعارض
أمجد بحدة : عندو حق أنتي أش غيخرجك بالليل من دار سيري جلسي و تكمشي في بلاصتك و لا نجي نسخن ليك ضلوعك
هي بدات كتبكي و كتهضر بطفولة باش تقنعو : حبيبي أنت عارف ناسيونال ديالي مابقاا ليه والو و عيت من لبغيباغاسيو بليز خليني نمشي و هضر معاه قول ليه بلي غادي تكون معايا أنت و هكذاا غادي يخليني منين غيعرف بلي لحبيب ديالي هو لي غاادي يراقبني بلييز بليز متخصرش لياا ياك أناا حبيبتك و أميرة ديالك لي عندك قبل و هضر معاه
أمجد تنهد بإستسلام من صوتهاا بريئ لي مايقدرش يعارضو : واخة سيري تنعسي حتال غذاا و يكون خير
هي بفرحة : إذاا قبلتي يااك
أمجد بتاسم : أمم يله غير خليني نعس راه عياان مقادرش نهضر و أنتي مصونية لياا في نصاصات الليل كتبكاي علياا مطيحة رواح على قبل سواغي
هي : ههه باقي كتخلع عليااا راه كبرت مبقيتش صغيرة
أمجد بهيام : واخة تكبري حتى تكبري غتبقاي أميرة ديالي و حبيبت قلبي لي مربيهاا علي يدي
هي بحب : كنبغيك بزاف أ أمجد كون مكنتيش في حياتي معرفتش شنو غادي يوقع لياا مع دادي لي خانقني
أمجد حط راسو على مخدة : حتى أنا يله تصبحي على خير
هي : بون دودو ماي هيرو ..
حل صباح جديد مليئ بأحداث جديدة عند أبطالناا و بداية عند ياسمين لي فاقت بكري هااد مرة ناضت غسلات وجهاا و جات فيقات أمال لي حتى هي فاقت مقلوبة : أمال نوضي نوضي أصاحبتي راه تبعناا شحال من حاجة لسواغي
أمال تقلبات : أمم باقي حال يله صباح هذا و يااك حفلة حتال الليل
ياسمين بهمس : نوضي براكة من هضرة راه خاصناا نمشيو نشدو نوبة ديالناا عند باديعة مولات صالون راه كتكون عامرة وونوضي خلاص أزمرة
أمال ناضت كتحك عينيهاا : والله حتى حرام عليك منوضااني على نبوري بحال إلا غادي نوجدو العرس
ياسمين تحت سنانهاا : أم عرس ديالك أزين (رجعات هضرات بجهد) تهزي طوي لغطاا خانمشي نعلم ماما غنقول ليهاا غادي نبقاا عند أمال هاد سيمانة كاملة في دارهم مونساك زعمة بينماا جيت نلقاك لبستي حوايجك راه ماريو ديالي لبسي لي بغيتي راه غندوزو لشي بوتيك نختاارو لكسااوي أكي
أمال هزات ليهاا راسهاا و ناضت دخلات حمام و ياسمين توجهات بيت واليديهاا كتخبط في بابل و تغوت : سلوى سلوى وااا لوااليدة و تي نوضي جاوبيني يعطيك ماتاكلي وااا عماالة و حكومة
حلات سلوى باب وهي كتقاد في بينوار ديال شوميز و وجهاا مجلخ عكر و عاد حمورية في عنقهاا ياسمين غير شافتهاا شداتهاا ضحكة : واا نقول شكون كان كيزدح عليناا بالليل قولو نتوماا كنتو لاعبين ماتشاات أسلوى و حتارموناا غير حناا لي باقي سعدناا متسكمش
سلوى خبطاتهاا لدراعهاا : الله يمسخك أقيقلة لحيااا كوني تحشمي راه موك أناا ماشي صاحبتك
ياسمين : واخة أ موي جيت نقول ليك راه غنمشيو أنا و أمال لدارهم مسكينة واليديهاا ماكينيش و مجاتش تجلس بوحدهاا ممزيانش ليهاا غبقاا معاهاا هاديك سيمانة بين ما جااو عائلتهاا
سلوى : و مالهاا متبقاا معاناا هي حسن بلاش متبقاو نتوما جوج بنات بوحدكم في دار
ياسمين : مشكيلة سوارت تودرو ليهاا و خاص تبقاا في دارهم لا يدخل ليهاا شي واحد فهمتيني غير خليني الله يخليك
سلوى : أبنتي هنتي قلتيهاا بفمك سوارت ماكينينش يصدق فارع عليكم شي حد باب
ياسمين بتدمر : و نااري أ سلوى مالك عكسي راه كاين زكروم غاانسدو علينااا من الداخل الله يسهل عليك ديري غير على وجه صاحبتي كنواعدك مااندير تحاجة مانخرج ماا والو و مغانديرش مشاكل ثيقيني
سلوى عوجات فمهاا بتفكير : أش غنقول ليك و الله مع عرفت و مدراسة شنو غديري معاهاا
ياسمين دورات عينيهاا كتقلب على كذبة : كاين إضراب سيمانة على مدارس كامليين
سلوى بتعجب : أويلي شفت هااد مدراسة عندك فينماا يدورو يديرو إضراب مالهم أش كاين
ياسمين بقلة صبر : مشاكل ديال أساتذة لمتعاقدين و مانعرف عوتاني دابة هانتي غادي نمشي أناا عند صاحبتي نبقاا معاهاا حاولي تقنعي حكيم الله يخلي ليك لميمة ياقوت
سلوى بإستسلام : واخة يله سيري و ردي البال راسك حكيم خليه علياا و ماضربي ليه حساب و عنداك منين نصوني ليك جاوبيني واخة دارهم غير قريبة ولكن عرفاك أنتي خاصك غير سبة بااش تغبري
ياسمين تلاحت عليهاا بي بوسة : أخخخ الله يحفظك لياا ياا زين ديال أماهاات أناا بغيت حااكيم غير يولي يشوفك قشااوشو يطلعو السمااء هههه
سلوى قردفاتهاا كتضحك : الله يمسخك البرهوشة مبقيتيش تحشمي يله سيري خليني ندخل نكمل نعااسي راه صباح هذاا معرت أش جاااك
دخلات سلوى لبيتهاا و ياسمين مشاات حتى لبيت لقاات أمال لبساات واحد كسوة عادية في كحل من عند ياسمين و جامعة شعرهاا كوت شوفاال ياسمين بفرحة : ماما قبلات تخلينا نمشيو لسواري و نبقاا عندك اليوم عطيني خمس دقايق أزين نلبس علياا و نهز الفلوس و نمشيو
مشات ياسمين لبساات بسرعة كيطمة بيضة مع سبرديلة كحلة و شعرهاا جمعاتو كعكة الفوق هزات صاك لي فيه الفلوس و تيليفون لي عطاهاا أمجد أما القديم خلاتو في دار خزنااه ..
هبطو البنات خرجو مع الدار و تاجهو أولا لقيصارية ديال الحوايج لي كتعمر بكري لقاوهاا نيت عامرة هوماا مشااو ليبوتيك لي تمااك كيقلبو على غوب دو سواغي كل مرة داخلين محال حيث ياسمين دوقهاا صعيب حتى طاحت عينيهاا على واحد كسوة حمقاتهاا و جاتهاا على دوقهاا دخلو و لقاتها غالية و هي خاصهاا تقتاصد عندهاا شلا ماتشري بقات كتشطر مع مول محال و تحلون عليه حتى خلاهاا ليه بنص ثمن خداتهاا و شافت لأمال واحد كسوة زوينة حتى هي خدااوهاا عاد تاجهو المحال ديال طالونات و صيكان كذالك و مثال سلاحهاا هو لسانهاا و تعواجهاا شرواا تقريباا كاع داكشي لي خااصهم و خرجو من قيصارية تاجهو لصالون لقااوه عاامر خداو نوبة ديالهم و خرجو لواحد سناك كلاو فيه بينماا حسو بنوبة وصلاتهم عااد رجعو لصالون جاو مع دقة نيت جلسو كل وحدة في كرسي مقابلين مع مراية و كوافورات وراهم
نطقات باديعة كوافورة : إيواا أش باغة تقادي أ شنيولة ديالناااا
ياسمين بتفكير : صراحة أناا دابة مزروبة غاادي غير تبدلي ليا لون شعري كنفكر نصبغو بالكحل و هاانتي مغادي نقص منو والو خليه على طولو ديري لياا بروشينك و شعري كامل يكون ليس حتى كوصة صاافي
بديعة كتمشط ليهاا في شعرهاا و كتفرقو ليهاا : غيجيك لكحل كيحمق و عاد حتى أنتي شعرك جاك هكذاا طويل شوية حسن من القصير
ياسمين ضحكات : يااك أناا بعداا معنديش مع طويل غندوز بيه غير شوية وقت و نحسكوو عوتااني
باديعة : أم لي عجبك أصلا أنتي زوينة و فنة تبارك الله لي درتيهاا تجي معاك (وجهات كلامها لأمال)و أنتي أ أمال شنو باغة تقااادي (نقزات ياسمين) قطعي ليهاا غرة و خدميه ليهاا سامبل
أمال مكانتش باغة تقطع الغرة ولكن مقدراتش تعارض ياسمين حيث كتحس بذنب من جيهتهاا على داكشي لي دارت فيهاا بتسمات ليهاا : أه قادي لياا كيف قالت أناا كنثيق في دوق صاحبتي
بدات مولات صالون خدامة مع ياسمين و بنت لي معاهاا شدات أمال بقااو ساعات و هوماا في صالون كيتقااادو حتى من ميكااب قادوه تمااك مااكملو حتى تعشاات لعشية خلصو و لاحو شيلان على راسهم و مشااو قصدو دار أمال و كل وحدة جبداات كسوة لي خداات لبسوهم و عاادو قادو شعرهم و ميكاب ديالهم جااو كيحمقو و بزاف إثارة و إغراء هوماا سيدااتو
بالنسبة ياسمين كانت لابسة كسوة فوق الفخااض بشوي في لكرونة ثوب ميبراا و كااامل معرية من ظهر غمزات لي أسفل ظهرهاا باينين مع طاطو تايغر لي زاادهاا إثاارة صدرهاا خارج من كسوة و خايط ديز من كسوة لعنقهاا شعرهاا كان واصل ليهاا أسفل ظهرهاا بالقليل كان طوال حيث عام تقريباا محطاات عليه لمق و زيد عليهاا ديكراادي و في اللون أسود جاهاا كيحمق مع بشرهاا بيضاء لي مالت للإسمرار بكثرة الخروج و عاد دايرة في عنقهاا عقد ألمااسي رائع و ميكاب لي على وجهاا كان صارخ عكس عاادتهاا و عااد طالو كاان في الأسود مع بوشط ديالو كانت فاتنة و بقوة
أما أمال كانت لابسة كسوة في اللون الأحمر كتجي لاسقة من ناحية صدر و خصر و مفرفرة من تحت و حد ركبة عاد فيهاا حوج سميطات خفاف و شعرهاا طويل منساادل على كتافهاا مع غرة لي واصلة ليهاا لعينيهاا دارت هي ميكاب بسيط و سامبل من غير أحمر شيفااه في لون أحمر نااصع و دايرة سنسلة خفيفة في عنقهاا و طالو في أبيض مع بوشيط ديالو و ماكانتش أقل من ياسمين في جمال و إثارة
بقااو كيشوفو في بعضهم و كيضحكو ياسمين بإعجاب : واو وااو وااو جيتي وااعرة كتحمقي بزااف اليوم غيكون طايح كثر من نايظ
أمال ضحكات حتى هي بتوتر : حتى أنتي جيتي فنة بزااف عرفتي متوترة بزاف هااد حفلة ماكنعرف فيهاا حتى واحد خايفة ياك صحبتك مغاتمانعش على حظور ديالي
ياسمين كتبرد عليهاا : متخافيش هاديك راه كنعرفهاا من صغر متقدر تقول والو بعكس غادي تستقبلك أحسن إستقبال والله بلاش ماتخاافي
أمال : نتمنى شوفي بعداا شحال ساعة راه ظلام حال لنكونو تعطلناا و منلقااوش مركوب في هااد الوقت ...
ياسمين شافت في ساعة : ويلي عندك حق سواغي غادي تكون بداات يله نهبطو لشاارع متخاافيش من جيهة مركوب أناا تكلفت بموضوع
هبطو البنات بشوية عليهم كيتسلتو بين دروبة حاظين لا يراقبهم شي واحد و قبل ماتخرج ياسمين من منطقة كارتي كوباا طفات تيليفون على حساب أمجد لا يعرفهاا فين كاينة وقفو في شاارع كيتسنااو طاكسي و لي دوز ياسمين كتصدرو بحجة عاامر ولا شي حاجة ما إلا دقائق حتى وقفات قدامهم طونوبيل وااعرة ديال لفريع في لبيض ياسمين بتسمات بإرتيااح خرج من طنوبيل شاب وسيم وهو شاب في عشرينات تقريباا ياسمين مشاات تلاحت عليه معنقااه كتضحك : عثمان أفف حمد الله منين جيتي خفت تخوي بياا أ صاحبي تعطلتي بزاف
عثمان ضحك : شكون ينسااا بناني هه راك تخرجيني في جرائد صباحية راني عند كلمتي أ هو جاني عجب علاش عطيتيني موقع ديال هاد بلاصة بعيدة بزااف هناا غير أحياء شعبية أش جابك ليهم
ياسمين : تعلم دخل سوق راسك أ لعشير شي حاجة كتخصني
عثمان هز عينو شاف في أمال طلعهاا و نزلهاا بعينيه و سهاا فيهاا حمقااتو وهي حانية راسهاا كتهز فيه مرة مرة عينيهاا و غمز لياسمين بمعنى واش هي هاادي و هي هزات ليه راسهاا بخبث و هو قال : متعرفينااش بآنسة زوينة لي واقفة هنااا
أمال حناكهاا تزنكو و حنحنات كتفرك يديهاا بتوتر و ياسمين جرات أمال مقرباهاا لعندهم : هادي أمال صاحبتي جديدة شتي شحال زوينة هه (شافت في أمال) و هذاا عثمان صديق ديالي واخة يبان ليك كبير علياا ولكن ختك شلتهاا عامرة غير بشاب لكباار
عثمان ونصف إبتسامة على شفايفو كيشوف فيهاا بإعجاب مد ليهاا يديه : مشرفين أ زين
أمال عضات على شفايفهاا بإحراج مقدراتش تمد ليه يديهاا و هو هز فيهاا حاجب بمكر : غير سلمي مغاديش تخلصي عليهااا
أمال ترددات في الأول ولكن في أخير صفحاتو و هرباات يديهاا بالسرعة ...
ياسمين : يله خليوناا نمشيو غاادي نتعطلو أ دراري
مشاات ركبات لور و أمال بغات تبعهاا و هو يشدهاا عثمان من يديهاا : ركبي القداام حسن غانحس براسي شيفور ديالكم ههه
أمال بتسمات بتوتر : لا غير خليني نطلع حداا ياسمين حسن من (ماخلاهااش تكمل هضرتهاا جرهاا من يديهاا و دخلهاا القدام صدمهاا ورجع هو ركب في مقعد سياقة أمال وجهاا حماار حسات بسخانة طالعة معاهااا هو شافهاا مدارتش صمطة ستغل فرصة و قرب منهاا كيقاد ليهاا فيهاا و لحية ديالو خشنة كتلامس خدهاا لي كانت مدورااه جنب ياسمين معجبهااش الحال حيث هي متافقة معاه على حاجة أخرى ماشي لهااد دراجة يقرب منهاا حنحنات هازة حاجب) : عثمان مشينااا
هو بتسام ليهاا من لمراية و غمزهاا : وي زين مشيناااا ...
نطالق عثمان بسيارة قااصد داار ديال سندس لي غتكون فيهاا حفلة طريق كامل كان صمت هو سيد مكاان و عثمان كل شوية يدور يشوف في أمال لي كتشوف في زاج و كتغرق في حوايجهاا و هي جنب شاب ماكتعرفوش قلبهاا كيخفق
ياسمين وجهات كلامهاا لعثمان : بب تيليفون ديالك واحد دقيقة بغيتو (غمزاتو من مراية باش يعيق و عطااه ليهاا شوية وهي تسوط بلعاني ) أفف عثمان معندكش ريزو أمال حبيبة واخة تعطيني تيليفونك نرسل لماما ميسااج نطمنهاا علياا عفااك
أمال عطاتهاا تليفون و رجعات كتشوف في المراية و ياسمين بدات كتخربق في تيليفونات بجوج و هي مبتاسمة بخبث حتى كملات و ردات ليهم تيليفوناتهم
دااز بعض وقت حتى وقف بسيارة أمام واحد فيلة كبيرة هبطو بثلاثة أمال حلات شفايفهاا نصف حلة كتكتاشف مكان بعينيهاا كيبانو ليهاا فيلات كباار و واعرين عااد صوت موسيقى لمسوع حتال براا و أضواء لي كيباانو في فيلة كاملة أمال مشاات وقفات حداا ياسمين قلبهاا كيضرب كتحي بإحساس خايب في شكل و ممرتحاش لهااد سواغي ...
دخلو بثلاثة الداخل و عثمان من وراهم عينو على أمال حاظيهاا كيفاش كتمشى و خصرهاا كيتحرك عاض على شفايفو بإبتسامة جاتو على gانة ياسمين كيف دخلات بداو كيتلاحو عليها البنات كيعنقوهاا و فرحانين بيهاا و دراري حتى هو كيسلمو عليهاا كانت دائماا هي مصدر إهتمام كل بكونهاا أشهر وحدة بيناتهم و كل كيعرفهاا أمال بقات واقفة بوحدهاا غير كتحرك عينيهاا و حشمانة وقف جنبهاا عثمان خاشي يدو في جيبو هاز فيهاا حاجب و قال بصوت شجي : عينيك حاادة بزاف ولكن تصروفاتك العكس لاحظت أنك متوترة و خايفة
أمال هزات فيه عينيهاا ولي الأول مرة جات في عينيه مبااشرة حسات بضوء زعزعهاا و قلبهاا تكهرب ماهزاتش فيه عينيهاا قبيلة ولا شافت في وجهو ولكن دابة كانو ملامحو باينة حلقهاا نشف مقدراتش تخرج هضرة من غير أنها حنات راسهاا الأرض كتحس براسهاا غريبة على هاد مكان و هاذاا ماشي مستواهاا خلاتو واقف و مشاات عند ياسمين لي بدات كتعرفهاا على صحابهاا و هي كتضحك بقااو مجموعين في واحد قنت و موسيقى خدامة و هوما كيشطحو أمال كتفات غير بإبتساامة بسيطة على شفايفهاا و عثمان هااز كأس ديال مشروب كيشوف فيهاا غادي ياكلهاا بعينيه ...
بعيد عليهم بشوي كانت واقفة أنثى بقامة ديالهاا قصيرة و بشرتهاا قمحية لابسة كسوة مارو حد لفخااض لاصقة على طايتهاا شفايفهاا منفوخين و عينيهاا عسلية مشفرة بأسود مراقبة ياسمين بعينيهاا وهي هازة كأس ديال عصير و جنبهاا شاب شهب و عينيه زرقين طويل و مكلضم دو بشرة بيضااء و حتى هو كيشوف في نفس شخص ولي هي بنااني نطق بصوت حاقد : معرفتش علاش ديماا كيديرو هاد حالة على قبلهاا مطريالس لاخرة مكرهتش نعفط عليهاا ...
هي قالت بصوت أنثوي ناعم و رقيق : خليهاا عليك نائل ياك تفارقتو حناا دابة مع بعض خليهاا هي تدير لي بغات ياك هضرناا في هاد موضوع بب
نائل دار عندهاا كيضحك حط يدو على خدهاا : أهه أ حبيبة موضوعهاا سديناه شحال هااذي ولكن هي معندهاا أصل بقات كتدور حتى طيحات أمجد
يارا كمشات ملامح وجهاا : شنوو أش كتقول أنت وااش تسطيتي منين أمجد غادي يعرفهاا أصلا كنعرفو هو ماكيعاشرش وحدة صغر منو بسنين و خصوصاا لكاانت بحال بناني أمجد كيكره هااد نوع
نائل بعصبية : إيواا الالة علاش داك نهار أمجد ضربني راه غير حيث قربت ليهاا كان غيقتلني و نبصم عليهاا حتى هي معااه
يارا بإنفعال و غيرة : إلا كان هكذا غنمشي نهضر معاهاا تفارق على حبيبي هو ديالي بوحدي متجيش بيتش (العاهرة =بيتش) تخطفو ليااا
نائل بغاا يوقفهااا ولكن هي ضربات فيه و زادت مشاات جرات ياسمين من يديهاا حتى دارت عندهاا هازة فيهاا حاجب : إدريسي شنو كاين مالناا على هااد جرة
يارا بإنفعال : شنو بينك و بين حبيبي
ياسمين بقات كتشوف فيهاا و هي تطلقهاا بواحد ضحكة : شنو هو كتسطاي علياا أنتي نائل راه خليتو ليك سليناا أناا وياه شحال هاادي أ لفنيكيشة سيري بعدي مني حسن ليك راه نضربك نعسك أزين و أنتي ماتقدي على والو ههه
يارا هزات فيهاا صبعهاا : أناا كنهضر على حبيبي أمجد أش علاقتك بيه
ياسمين عقدات حجبانهاا و بدات كتطلع ليهاا جنية ديالهاا : عاودي عاودي شنو قلتي أمجد حبيبك و بربي عظيم و متقولي لياا منين كتعرفي حبي حتى نهروش ختي
يارا : أنا لي خاصني نسولك منين كتعرفيه و أش دخلك بيه مكتافيتيش بي نائل لي كنتي كتدوري بيه كيف حية بقاا ليك غير أمجد تفوو على محلولة (كيف قالتهاا ياسمين هزات يديهاا حتى لسمااء و صلاتهاا معاهاا حتى شدات يارا على حنكهاا كلشي دار كيشوف فيهم و كيتهافتو بعبارة 《بناني ضربات إدريسي 》يارا شافت كلشي كيشوف فيهاا و هوماا حابسين ضحكة عينيهاا غرغرو و مشااات كتجري دخلات الحماام نائل مشاا قاصد ياسمين : شكون يسحاب ليك راسك أنتي باش تحطي عليهاا يدك
ياسمين بعصبية : ممسالياش ليك القو*_اد سير تبع حبيبت قلب لا تموت ليك و خرجو علياا من حفلة ديالي يله ديكاااج
نائل خنزر فيهاا و مشاا تبع يارا كيدق عليهاا في باب حماام و هي كتبكي داخل جبدات تيليفونهاا من ساك كترعد ختارت رقم لي بغات و حطاتو على ودنيهاا حتى تسمع صوتو خشن : آلوو
يارا كتنخصص و تشهق : حبيبي جي عندي دابة لسواغي غادي نرسل ليك لعنواان هء هء محتجاك
مخلاتوش يهضر قطعات و رسلات ليه عنواان و جلساات في حماام كتشهق كتسنااه يوصل ...
عند ياسمين لي شدهاا عصاب ولات كترعد باان ليهاا واحد مشروب فوق طابلة هزااتو و شرابتو في دقة و زادتهاا واحد آخر شافت في سندس و غمزاتهاا بااش تبدى تنفد خطة لي تاافقو عليهاا هزات سندس كأس ديال مشروب و توجهاات لحداا أمال و دارت راسهاا تعكلات و كبات ليهاا مشروب على كسوتهاا و شهقات بلعاني : أوو ماي كود سوري سوري مقصدش
ياسمين جات عندهم : شنو وااقع مالكم
سندس : خويت مشروب على ضيفة ديالك بدون قصد والله
ياسمين : شنو دابة غاادي تبقااا بهااد كسوة في حفلة لا ميمكنش
أمال بتسمات بتوتر : ماشي مشكيل والله عادي غادي نصبر
سندس : نوو غلطت و خاصني نصحح غلاط ديالي بليز طلعي معايا البيت نعطيك شي كسوة تلبسيهاا
أمال : لا والله بلاش (قطعتهاا ياسمين ) : صافي غير سيري معاهاا بدلي عليك هاد كسوة ولات حالتهااا متخافيش
أمال هزات ليهاا راسهاا بآه و مشاات طلعات مع سندس غير طلعو وهي تغمز ياسمين عثمان هو بتاسم بخبث و مشااا تبعهم ..
دخلات أمال مع سندس البيت جبدات ليهاا كسوة عطاتهاا ليهاا تلبسهاا و خرجاات خلات باب مردود أمال بدات كتحيد في كسوة ديالهااا حتى بقاات غير بدو بياس وهي مراداش بال لشخص لي دخل و سد باب من ورااه قرب منها بخطوات بطيئة و جرهاا من دراعهاا لاحهاا فوق سرير و طلع فوق منهااا و قبل مااتغوت حط شفايفو على شفايفهاا مسكتهاا بقبلة عميقة و ماإلا دقائق حتى تحل عليهم باب بجهد باش يبان ريضاا واقف و مخرج عينيه بصدمة من هول منظر و معاه سارة صاحبت ياسمين و ياسمين حتى هي كيشوفو فيهاا عريانة فقط أنوثة ديالهاا و صدرهاا لي مغطين و عثمان طالع فوق منهاا كيجبد في شفايفهااا ....
ريضاا عينيه تعمااو حس بقلبو كيتقطع أجزاء وهو موسع عينيه لي حمارو و بان فيهم بريق من دموع كيشوف البنت لي كيبغي في سرير بين يدين شخص آخر غاطسين في مااهو حرام أه ريضا كيبغي أمال و بزاف حتى هو من صغرو مخبي عليهاا هاد حقيقة و مخليهاا بينو و بين نفسو خاف يعتارف ليها و تكون مكتبادلوش و يخسر حتى صداقة واخة كان من وحدة لوحدة و زهواني ولكن عمر شي بنت عمرات ليه عين بحالهاا هي كانت مختالفة على البنات ستيل ديالها و لبسهاا كان بحال دري هدشي لي حمقو فيهاا شخصيتهاا قوية و إلا طحتي ديماا كتوقف معاك وقف ضد ياسمين على قبلهاا و ضربهاا حيث ضرباتها كيتعصب إلا شافها لابسة بحال البنات حيث دراري غادي يشوفو فيهاا هدشي كامل من حب و غيرة كاتمو في قلبو من جيهتهاا ولكن تصدم لدرجة نفس تحبسات فيه صرط ريقو و صدمة باقة لاعبة عليه ماتيقش ياسمين فاش قالت ليه شفتهاا مع دري هابطة من طونوبيل و هي مقطعة غرة و لابسة مقزب و ديك ساعة نفظ شكوكو واخة بقاا دارو راسو من جيهتهاا ولكن دابة شاف كلشي بعينيه و عينيه مغاديش يكذبو عليه قال بصوت شبه مسموع و دمعة ديالو علاين طيح : أمال
صدى سميتهاا ضرب ليهاا في ودنيهاا هذا صوتو أه صوتو عمرو يخفى عليها قلبهاا تهز من بلاصتو و جمدات مبقاتش قادرة تحرك شي لي خلا عثمان يبتاسم بخبث و سط شفايفهاا و يزيد في وثيرة قبلة و هبط يدو كيعصر بيهاا خصرهاا حتى فاقت من سهوتهاا و بسرعة دفعااتو عليهاا من صدرو حتى ناض واقف و رجع بلور شاف جيهة باب بانو ليه واقفين هو دار نصف إبتساامة خبيثة حتى بانو سنانو ناصعين و ربع يدو عندو مهمة ديالو سلات ..
أمال ناضت واقفة بسرعة شافت في ريضاا بصدمة ولات كلهاا كترعد و عينيهاا عمرو بدموع كتشوف فيه و جسمهاا كيتنتافض سرطات ريقهاا و مشاات عندو كتجري بدون ماتحس تلاحت عليه معنقااه كتبكي و تشهق ولكن تصدمات من دفعهاا مع عليه حتى جات طايحة في الأرض هي هزات فيه عينيها و دموع جمدو فيهم حالة شفايفهاا بصدمة وهو كيشوف فيهاا بقرف و تقزز مكمش ملامح وجهو هز فيهاا صبعو بتحذير : آخر مرة تقربي ليااا ولا تجهي لجيهتي سمعتي حيث نقتلك و ندفنك القح*_بة لي ولدااتك
أمال عرفاتو فهم داكشي لي شااف غلاط و شافو من وجهة نظر ديالو أمال و قفاات بغات تقرب ليه و هي كتبكي : عفاك سمعني أنت مفااهم والو هء هء
هو رجع بلور مبغهااش تقيسو و بداا كيغوت : أش غاادي نسمع منك هااا اش غادي نفهم القح_*بة شفتك بعيني هااد مرة شفتك بعيني أ أمال آخر وحدة توقعتهاا منهاا هي أنتي ديماا كنت كنقول أنتي متميزة على البنات لخرين ساعة طلعتي حتى أنتي قح*__بة بحالهم
أمال شدات على راسهاا كتنخصص : تيقني راك مفااهم والو كنحلف ليك بالله عفااك أ ريضاا متقولش هااد هضرة عفاك (شهقاات حتى تقطع فيهاا نفس كتمسح على وجها) أنت وحيد لي كتعرفني مزيان و كثر من راسي وااش أنت ثيقتي هدشي لي شفتي بعينك هااا
ريضاا مسح ديك دمعة لي كانت غتنزل من عينو و قال ببرود : مابقيتش كنعرفك من يوم مبقيتش كنعرف شي وحدة سميتهاا أمال صافي باح
كان غادي يمشي وهي تعنقو من لور : لا لا عفاااك متعطينيش بظهرك و تمشي هء هء مديرش هكذاا خاصك تفهم موضوع هء هء هو لي تقرب مني مااشي أنااا هء
ريضاا دار عندهاا و دفعهاا من عليه : قلت ليك متقربيش لياا متقيسنيش بيدك لمسخين وااش كتسنايني نتيقك و أناا شفتك جالسة كتمحوااي مع وااحد قدام عيني
أمال كتشهق و تبكي دورات ليه راسهاا بلا : أناا مدرت والو والله كنحلف ليك إلا غير ظلمتيني هنتاا سولو هء هء سولو أنا مابيني و بينو والو (مشاات عند عثماان و شدااتو من يدو و كرزات عليه بيديهاا صغيرة كتشوف فيه بعينيهاا لحمرين و ساردين بدموع و صدرهاا كيتهز أثر شهيقهاا كتشوف فيه بنظرة ترجي ) هء عفااك قول ليه الحقيقة هء قول ليه بلي أنت لي دخلتي علياا بيت و قربتي لياا أناا بريئة ماادرت والو عفاااك كنترجااك يااك أنت لي تقربتي مني ياك هء شرح ليه بلي مابيني و بينك والو عفاك ..
عثمان سرط ريقو و قلبو ضرو من جيهتهاا و هو كيشوف في منظر ديالهاا كيشفي و دموعهاا سردو خدودهاا مقدرش يشوفهاا بحال هكذاا خاف يضعااف و يفضح داكشي لي متافق عليه مع ياسمين صحيح أمال عجبااتو و مندمش أبدا حيث قرب منهاا حس بشي حاجة من جيهتهاا الأول مرة يحسو معرفش شنو يصنف إحساسو ولكن مايقدرش يخون وعد لي عطاا لياسمين شاف في أمال بنظرة حزينة و دور ليهاا وجهو بمعنى معااندو ما يدير و طلق من يديهاا قالب عليهاا وجهو
ريضا ضحك بستهزاء : صافي هاادشي لي قدرتي عليه كون غير جيتي عندي أناا و قولي لياا بغيت نتح*_واا و نبرعك ولا نسيت نتوماا البنات كيعجبكم راجل يكون عندو الفلوس عااد تحلو ليه
أمال وقفات في نص الغرفة كتضرب على راسهاا و تبكي بحال لمسطية : لا لا لا هدشي مايمكنش هء هء مايمكنش أناا مكنكذبش أناا مظلومة هء مظلومة علاش مابغيتيش ثيقني
ريضا بحرقة : عرفتي أ أمال شنو كنتي بالنسبة ليا عمري مااتخايلت يجي نهاار و نقولهاا ليك ولكن أناا بغيتك أه بغيتك ولكن خبيت بااش منخسركش كنتي أنتي بنت مثالية في عيني ولكن دابة كلشي تبخر كنحمد الله منين ياسمين شاافتك كنتي مع واحد في طونوبيل و كنظن هو هذا ههه واخة في الأول مثيقتش ولكن هااد مرة شفت بعيني لي مغاايكذبوش عليااا دابة غير ديري لي بغيتي أناا غنمشي كملي قصارتك مع هااد زا*_مل لي بحالك
عثمان خنزر فيه كان غادي يمشي ليه و هي توقفو ياسمين بعينيهاا أمال بزربة تمشاات عند ريضاا و شداات ليه وجهو بين يديها حاطة راسهاا على راسو : أناا مظلومة أريضاا مظلومة
هو بغاا يبعد منهاا ولكن زادت تمسكات بيه و قالت بصوت هاامس : كنبغيك هء هء كنبغيك ثيقني راك ظلمتيني
ريضاا نتر منهاا حتى جاات مدفوعة و قال بصوت حاد كيشوف فيهاا بحقد : و أنااا كنكرهك
عطاهاا بظهرو و هبط كيجري مع دروج وجهو حمر بعصااب و تبعااتو سارة صاحبت يااسمين كتجري من ورااه ...