السلام عليكم
نور ال زياده
~~~~~~~~~~~~
فيان :فتحت عيني اني بالغرفه مااعرف شوكت غفيت
اني ونايمه بمكاني سمعت صوت الباب
وبعده صوت شيماء ونرجس يطلبون مني افتح الباب جاوبتهم.....
--شتريدون روحوا عوفوني بحالي
شيماء :فتحي الباب لخاطري اريد احجي وياج
نرجس :فيان فتحيها لتخوفينه عليج
فيان :مابيه شي روحوا
شيماء :ليش هيج سويتي خليتي يخاف عليج ولج يريد يصعد يشوفج ضل باله كوه منعنا
هو شنو ذنبه وحملتي مسؤليه موت ابنج ؟
فيان :استفزني كلامها فتحت الباب بعصبيه وكلت.....
--شنو هل الكلام هو منو محمله مسؤوليه موت احمد ليش هو شعلي ؟؟
شيماء :تصرفاتج واسلوبج كل شي يدل على هل شي خليتي ياكل بروحه اكل
كوه قنعته ميصعدلج وهو بهل وضع اخذنا للغرفه
يريد يحجي وياج ....
اعرف انتي تعبانه والي دتمرين بي جدا صعب بس هو مااله ذنب هو هم تعبان ورجع من الموت ارحمي بحاله لتزيديها عليه
فيان :اني ماكلت اي شي حتى هيج يفكر واذا هو تعبان قاط اني الف قاط راعو وضعي رجائا ولتضغطون عليه
نرجس :حبيبتي نعرف ومقدرين وضعج بس هو خايف عليج وبنفس الوقت وضعه صعب راعي وضعه وامشي شوفي واحجي ويا لتخلي يتلوع
فيان اذا صار بي شي لاسامح الله عود شتكولين وشتسوين
بصعوبه الولد سحبو واخذوا يرتاح حتى كوه يتنفس ومع ذلك باله يمج امشي ياعيني ولتشلعين كلبه
فيان :نزلت وياهن دخلت للغرفه
الولد ترخصوا وطلعوا
من شافني كعد نفسه عدل وهو ماسك صدره وينضر الي بلهفه
رحت يمه بس ماكلت ولاكلمه يمكن لان ماضل كلام
جر ايدي وكعدني امامه
حازم :شلون صرتي ؟
فيان :زينه
حازم :اعرفج موزينه وسالتج احاول افتح حديث وياج لان اعرف انتي ماخذه مني موقف
فيان :رديت بعصبيه....
على شنو اخذ موقف قابل انته موته شنو شايفني بلا عقل حتى هيج افكر ؟
حازم :مرات الانسان بسبب صعوبه الموقف والضغط الي يمر بي يحس الكون كله ضده وسبب معاناته حتى اقرب الناس
هيج فكرت لان ردت فعلج اتجاهي كانما كارهتني او رافضه تشوفيني لهذا هيج فكرت
فيان :ماكو داعي هيج تفكر مااتهمت احد اصلا كل الي مريت وداامر بي بحياتي سببي وحدي اني الي اختاريت امشي بهل طريق
اختياري الغلط هو الي وصلني لهنا لاانته ولاغيرك السبب
لهذا لتفكر بيه فكر بنفسك وبصحتك
من رخصتك ...
ردت اكوم سحبني علي وضمني لصدره وكلي ....
حازم :كافي تحملين نفسج السبب حتى انتي موالسبب هذا قدر ومفروض علينا
صدكيني حاولت احمي بكل الطرق بس امر الله نافذ
من فتحت عيني وسمعت بي تمنيت لوميت ويا ولا ارجع للبيت وهو مو ويايا
يمكن لوما اخذته ويايا ماكان صار الي صار
بس هذا قدرنا
سامحيني فيان لان ماكدرت احافظ علي واحمي
فيان :ضليت ابجي رفعت راسي وكتله ....
كل شي انتهى والكلام بعد ميفيد ماحملتك ولاراح احملك المسؤوليه
هسه انته ارتاح وصير زين والله كريم ولتضل تفكر بيه
حازم :اذا بيج مافكر بيمن لعد؟
ياريت لوميت ولا اشوف نضراتج الي استقبلتيني بيها بس ماالومج انتي تعبانه والي مريتي بي يهز جبال
ارتاحي شويه شكلج كلش تعبان مااتحمل اشوفج هيج اي شي سوي بس لتئذين نفسج
فيان :لتشيل همي مابيه شي نام وارتاح
حازم :ابقي يمي خليني اساعدج واحاول اشفي جروح روحج واواسيج
اني محتاجج وانتي محتاجتني لتعزلين روحج وتضلين تئذين بنفسج
فيان :من سمعت كلامه صرت ابجي بقوه جرني وضمني وهو يمسح على راسي ويتكلم كلام يحاول يواسيني بي
بوقتها كنت فعلا محتاجته بس مع الاسف شكد القدر ضلمني واخذ مني اشياء ماكفا لان حتى الناس تحالفت ويا وقررو يضلموني استكثروا عليه حتى الشخص الوحيد الي ممكن يساعدني ويطيب جروحي
بلحضتها نسيت كل شي وردت بس احس بالهدوء والسكينه ردت ابقى يمه حتى انسى المي بفراق ابني حتى اخذ القوه حتى بعدين اواجه الم جديد الم فراق حازم
كان جسمي محتاج هدنه حتى استجمع قوايا واكدر الم لم قطع حطام روحي وانكسار نفسي
كان قربه وكلماته و صوت الدعاء والقران الي بدى يردده على راسي هو علاج لروحي وقلبي التعبان
ضلينا على هل الحال وارتاحيت الى درجه تمنيت تتوقف الحياة هنا ونضل بس اني وهو
بس اكيد هل شي مستحيل بديت اهدء ويمكن ردت انام من السكينه الي حسيت بيها بس فززني وفززره صوت الباب من انفتحت ودخلت زينب شايله بيدها صينيه اكل
عاط بيها حازم ...
حازم :اقلها دكي الباب شلون تفوتين بهل طريقه ورجال ومرته بالغرفه وحدهم ؟
فيان :رجال ومرته ،،،،هل كلمتين صحتني على واقعي المر
بحياتنه ماراح نصير ازواج حقيقين ماراح نكمل سوا ابتعدت عنه واسمع زينب تتعذر وطلعت كمت اريد اطلع
حازم :وين رايحه ليش كمتي ؟
فيان :تعبانه اريد اروح انام
حازم :لتروحين خلي ناكل سوا وضلي هنا يمي واذا تريدين هم نامي هسه امنعهم بعد يدخلون
فيان :ماكو داعي اخذ راحتك وارتاح
عفته وطلعت شفتهم كاعدين بالهول وزينب تبجي من شافتني خزرتني عبالك لكتني نايمه بحضن رجلها
عفتهم وصعدت اول مادخلت الغرفه دخلت نرجس بعدي ضلت يمي وتسولف وتواسي بيه بس اني بغير عالم
اصلا اعرف هو دزها لان يخاف يصير بيه شي والا نرجس متسويها وتصعد من كيفها
اخر شي عفتها وطلعت هدوم ابني وحضنتهن ونمت ماصحيت غير ثاني يوم من التعب
حسيت نفسي بحال افضل ولو قليل
لكيت ماكو احد يمي نزلت لكيت الكل ديتريك صبحت عليهم شيماء طلعت من الغرفه كلتلي حازم يريدج
رحتله صبحت علي طلب مني اتريك ويا بس رفضت عفته وطلعت صارت خاله بوجهي اشرتلي اروح للغرفه اول مادخلت كلتلي ...
ام فاروق :فكرتي بلي كتلج علي
فيان :اي
ام فاروق :وقررتي ؟
فيان :حازم البارحه رجع بكل الاحوال مو وقتها
عاطت بيه بصوت منخفض ...
ام فاروق :لعد شوكت وقتها من ابني يموت؟؟
اقلها اذكريله زينيته وياج انتي وابنج لتصيرين انانيه
فيان :عصبت من طريقتها بالكلام جاوبتها ....
اني لوانانيه مثل متكولين كان كتله على كلامنا اني وياج
ولو انانيه كان ابسط شي سويته طلبت منه نترك العراق ونهاجر سوا خصوصا واني صرت متاكده من قوت تمسكه بيه
ام فاروق :اي عفيه اخذي وفرقي عن اهله وعن شغله وسنين تعبه ودراسته يروح بلد غريب ويشتغل انكس شغله ويعيش اتعس حياة علمودج
هو هذا تفكيرج وردج للجميل؟؟
فيان :ولايوم نكرت فضلكم عليه ولاراح انكره لهذا ماطلبت منه هل طلب ولاممكن اخلي يكون بموقع اختيار بيني وبينكم
راح ابتعد باختياري علمود سلامته بس لتصدكين يرتاح بغيابي لان صرت اعرفه اكثر من نفسي
عفتها وردت اطلع وسمعتها تهمس بصوت منخفض...
ام فاروق : انتي بس روحي وفكينا من فكرج تريد تاخذه وتسافر هو لو رحتي للمريخ فكرج يروح وياج
سمعت كلامها لوشبت نار بداخلي رجعتلها وكلت ...
تكوليلي لتصيرين انانيه بس ترا مو اني الانانيه تفكيرج هذا هو الاناني
كتلج راح اعوفه بعد ليش هل كلام وواعدتج مااكله شي
ليش مصرين كلكم تئذوني؟
شنو سويتلكم؟
لتخافين راح اعوفه وزوجي على مزاجج واهم شي وحده مونحس وفكر وحده كون تحبكم وتحترمكم مثلي
وتحب حازم الىى درجة تضحي علمود راحته وسعادته
واهم شي وحده كرايب لان الغريبه مو خوش ادميه بس الكرايب امثال هديل هي الي تسعد ولدج
لتخافين راح اعوفه لان حازم روحي من كان بداخلي روح اماهسه ماضل عندي شي اقدمه اله
ام فاروق :اعذريني موقصدي اعصابي تعبانه
عفتها وصعدت فوك واني دمعه مانزلت مني بس جسمي يرجف من العصبيه
بلشت الم غراضي كلها واغراض وملابس والعاب ابني
اصلا بس هل الاشياء بقتلي بحياتي جمعتهن بحقائب واتصلت على نرجس اجتي من شافتني انصدمت!!!
رادت تحجي عطت بيها كلتلها ...
--قسما بالله يابنت امي وابويه اذا ماسكتي وساندتيني بقراري لااترك الكل وتنسون شي اسمه فيان وان لزم الامر حتى انتحر اصلا ماضل عندي شي كل شي خسرت
اخذت الحقائب ونزلت من غير كلام
بدلت وحطيت الشال على راسي ونزلت شافتني شيماء وخالو سالوني وين رايحه؟
جاوبتهم ....
--راح اروح لبيت اختي
فاروق :حقج غيري نفسيتج ورجعي حتى الخمبس نسوي ثواب بس لتتاخرين علينه البيت اضلم بلياج
فيان :بلعت الغصه وكلت ....
انتو اعز من اهلي بس بعد خلص راح اروح اعيش يم اختي ديربالكم على حازم وعلى نفسكم وابروني الذمه لان اعرف نفسي هواي ثكلت عليكم
قبل لااخلص كلامي سمعت صوت حازم....
حازم :ياذمه يااهل ياصخام وين رايحه ؟؟
فيان :اعيش ويا اختي
حازم :وشوكت كنتي ناويه تكوليلي وتستشيريني بما انو يكولون اني رجلج ؟
فيان :ماكو داعي لهل كلام حازم لتصعبها علينه كل شي انتهى وماضل معنى لوجودي هنا احمد ومات والاتفاق انتهى
جاوبني بعصبيه ومسك صدره متئلم
حازم :واني ،،اني شنو بحياتج يااتفاق موانتهى الاتفاق وغلقنه موضوعه
فيان :لاماانتهى
ابو خالد :يااتفاق فهمونه يابه
فيان :اني وحازم مامتزوجين حقيقي تزوجنه علمود احمد وهسه انتهى اتفاقنا
حازم :فيااااان
فيان :ليش ضجت هي هاي الحقيقه كلهم يعرفوها بس ساكتين
عالعموم دكتور شكرا الك وشكرا للكل وكفتوا ويايا وماقصرتوا نهائيا واعذروني لان ثكلت عليكم بس كنت مجبوره بس هسه خلص صار الوقت ننفصل
حازم :انتي تحجين صدك لوضرب فيوز بدماغج من الصدمه ؟؟
احجي لتخبليني ؟
اني وانتي وحبنا وينه ؟
موقبل كم يوم اتفقنا نتزوج رسمي مواعترفتلج بمشاعري وانتي وافقتي موكعدنه نحلم ونخطط سوا لحياتنه ؟؟
فيان : كل شي راح منا راح حلمنا راح الي كان يلمنا ويجمعنا ماعاد اله وجود
حازم :لتسوين هيج فيان لتضلميني وتضلمين نفسج ومن اكلج محملتني المسؤوليه تكولين لا
فيان :منوضلم ومنو انضلم ومنو السبب مومهم
الموضوع انتهى ،،احنا انتهينا خلص،،،
اذا عندي خاطر يمك طلكني باسرع وقت اريد ارتاح اني انتهيت ماضل عندي شي اقدمه الك اقلها انته عيش
حازم :مواكلج تخبلتي رسمي امشي كدامي
فيان :جرني من ايدي بعصبيه وصعدني الدرج الكل صار يعيط علي لان موزين علي تجاوز الكل وصعد ودخلني للغرفه وقفل الباب حررت ايدي وعطت بي
--ليش هيج سويت واصلا شلون تصعد وانته موزين عليك؟؟
عاط بيه ....
حازم :ليش اهمج؟ يهمج اذا متت لو عشت؟ مافكرتي بيه وبمشاعري من ردتي تروحين بهل سهوله ؟احجي كولي ؟
فيان :صار يعيط عليه وبعصبيه شمر التيبل لامب فلشه
حازم :شلون تريدين تتركيني وانتي تعرفين صرت مااكدر اعيش بدونج؟
انتي اذا تغيبين عني ساعه اتحطم اضيع
شلون تريديني اقتنع راح تتركيني طول العمر؟
ليش تريدين تكسريني شنو سويتلج اني؟
فيان :بحياتي مافكرت ائذيك وخصوصا انته ماقدمتلي بس الخير
بس احنه اتفقنه من البدايه وواعدتني وعد شرف بس اطلب منك ينتهي الاتفاق وننفصل
حازم :واعدتج صح وماانكر بس تغير كل شي واعترفتلج بحبي وانتي وافقتي
فيان :ماوافقت ماكلت موافقه ولاكتلك اي شي
حازم :لتكذبين كل تصرفاتج وكلامج كل شي بيج يدل على موافقتج اني موغشيم واعرف انتي تحبيني مثل مااني احبج
ليش تدمرين حبنا ؟شلون تريديني اكمل بدونج؟ وشلون مااشوفج كل يوم؟
فيان اني حبيتج مثل ورقه بشجره بحديقه من حدائق الخريف طول الوقت الهوا يحركها بس هي متمسكه بهل شجره متريد تعوفها صار سنين واني متمسك بيج رغم كل شي مريت بي لتكطعيني من مكاني وتخلين الهوا ياخذني بعيد عنج لان هنا تكونين قضيتي عليه وضيعتيني
فيان :كنت متاكده من مشاعره بس مع ذلك كلامه عصر كلبي متحملت غطيت وجهي بيدي وصرت ابجي بقوه اجه عليه حضني وكعدني وكعد صرت ابجي بحضنه بقوه وصوت عالي ضليت اصيح....
مااكدر ،،،،مااكدر ،،،،،اني انتهيت ،،عوفني،،،، عوفني وعيش ،،،،،الله يخليك عوفني بحالي
حسيته حضني اقوى وكانما يفهمني قوة تمسكه بيه بس الي ماحسبت احسابه ومتوقعته من حسيت بمي حار ينزل على وجهي رفعت راسي شفت دموعه تنزل ماتصورت بحياتي راح اشوف دموع المغرور
اصعب شي دموع الرجل وخصوصا من يملك شخصية وكبرياء حازم
ماكدرت اسوي اي رد فعل على هل شي غير بس ازيد بالبكاء
اخر شي مددني ونام بصفي وحضني لان مبين تعب ردت ابتعد منعني وقربني اله اكثر ضل يمسح على راسي وضهري حتى اهدء بلحضتها كنت محتاجه لحضن والدي حتى يحسسني بالامان وحسيته بحضنه
واحتاجيت لاخوتي يسندوني ويهونون عليه مصيبتي ومالكيتهم وهو كالعاده سندني
محتاجه لحنان امي وحنيتها ومالكيت غيره يحن عليه
كنت محتاجه لحبيب ينسيني هموم الدنيا ويحبني واحبه كل شي لكيت بي وكلت هذا عوضي عن كل الي مريت بي بس الدنيا استكثرته عليه
ل لحضه قررت اصير انانيه وانسى كل شي واضل يمه وبحضنه طول العمر ولهذا ماابتعدت وبالعكس حضنته واتمسكت بي الى ان غفيت
كنت بحفره وطلعت منها شفت الافعى العملاقه بوجهي كلتلي :كتلج امني بيه واني اضل اساعدج بسبب عنادج خسرتي ولدج وراح تخسرين بعد اكثر راح اقتل كل الي تحبيهم ابتعدت عنها وصرت اركض وهي تضحك ضحكه مليانه شر
فزيت مفزوعه كمت بسرعه
حازم :اسم الله ،،،،اسم الله ،،،شبيج،، ليش هيج فزيتي ؟
فيان :باوعت بوجها بخوف وسحبت نفسي بسرعه وكمت رحت لغرفتي قفلت الباب
اجى ضل يطرق الباب مافتحتها ضل يتوسل بس اني كنت مرعوبه لان هل الافعى نفسها شفتها قبل موت ابني
يعني شنو راح حازم هم يموت لان احبه؟
تخبلت طلعت بسرعه لكيته كاعد على سريره توجهت للباب حتى افتحها وانزل لكيتها مقفوله ومابيها مفتاح انداريت وبعصبيه كتله....
-- وين المفتاح جيبه اريد اروح انته متكدر تجبرني ابقى يمك موكوه هيه اني مااريدك اريد اروح ويا اختي
حازم :لاحول ولاقوة الابالله ،،،شبيج بابا فهميني ليش فجئه تتخبلين عليه؟
قبل شويه هادئه وشلونج ليش هيج دتتصرفين ؟
فيان :لان مااريدك اريد اروح اتركني بحالي افهم اني تزوجتك علمود ابني وابني راح شكو مبقيني يمك وين وعدك الي ؟
حازم :واعدتج اعوفج من تطلبين بس قبلها واعدت نفسي احميج من كل الدنيا حتى من نفسج اذا اضطريت وانتي هسه مو بوعيج واخاف تئذين نفسج
فيان:فتح الباب ودفعني للداخل وطلع وقفله ضليت اضرب على الباب بس ماكو رد
شيماء :فاجئتنا فيان بكلامها وتصرفها بس الي خلانا نستغرب اكثر تصرف حازم من اخذها وصعد كدام الكل وماهمه اي شخص اول ماصعدوا سمعنه شي انكسر وعياطهم ردت اصعد منعني ابو فاروق وكلي...
ابو فاروق :عوفيهم وحدهم خلي يحلون مشكلتهم لتدخلون
نرجس :عمي بس فيان مصره على الانفصال
ابو فاروق :اعصابها تعبانه هسه وهيج تحجي
ام فاروق :وهو شنو ذنبه يتحمل ؟
الطفل ومات اذا تريد تروح هذا اختيارها واصلا من البدايه هذا اتفاق بعد شكو
ابو فاروق :يامره ابنج عاشكها اكو طفل ولا لا الي بينهم مينتهي بهل سهوله
هديل :عمو بس همه تزوجوا علمود الطفل شلون يحبها شتكول علينا الناس حب مرته لابن عمته واخذها
ابو فاروق :مرته وطبيعي يحبها وبعدين هي ارملة ابن عمته لتنسين امير الله يرحمه
هديل :بس كل الناس تكول حط عينه عليها من كان عايش ومن مات اخذها
فاروق :لصمي حلكج ياهو الي يكول هيج اصلا حازم من قبل يحبها لفيان ورادها
ابو فاروق :فااااروووووق ،،،،سد هل موضوع ولتجفص بالكلام ويله كلمن لمكانه رجال ومرته يحلون مشكلتهم شكو احنا
شيماء :ورا ساعه نزل حازم كمت على حيلي اشوفه صاح نرجس واخذها يحجي وياها رحت يمهم
حازن :تعالي ام عمر فهميني اكو شي صاير ماادري بي ؟
نرجس :ليش مافهمت ؟
حازم :فيان بيها شي واني متاكد هاي تصرفاتها مومن موت احمد لااكو شي ثاني
صار شي واني ماموجود سامعه شي احد مهددها فهموني ترا عقلي انشل مدا افتهم ولااركز
نرجس :ماصار شي غير الي تعرفه
شيماء :اني هم ماشفت ولاسمعت شي بس هي من سمعت بموته لسه وضعها مخربط
حازم :اذن ما الها غير تفسير واحد هي محملتني المسؤوليه ومترضى تعترف
والا قبلها كانت زينه وكل تصرفاتها ووضعها يدل هي تحبني ومستعده نكمل سوا
نرجس :مااضن
حازم :ام عمر بداعت ولدج كوليلي شنو سبب تغيرها وليش فجئه حسيتها كرهتني؟ معقوله اني متوهم وهي مارايدتني ؟
نرجس :وداعت جهالي مامسولفتلي شي بهل موضوع بس اني قبل ليصير كل شي من طريقة كلامها حسيتها حابتك بس هسه مااعرف
شيماء :واني هم هيج حسيت
حازم :يعني اني ممتوهم هي هم تريدني
راح احاول اماطل وياها واخليها يمنا الى ان تهدء يجوز بسبب الضغط اعصابها تعبانه وتحس نفسها ضايعه ومشتته ومدتعرف شنو تتصرف
رجاءا لتعوفوها هي هسه محتاجتنه كلنا ترا الي دتمر عليه اكبر من تحمل اي بشر
فيان :تركني وراح ضليت مثل المجنونه افتر بمكاني خايفه من الحلم
حازم راح ونساني بالغرفه للضهر اجت شيماء ونرجس جايبيلي اكل وصعدوا ملابسي لااكلت ولاحجيت وياهم صرت مااطيق اي بشر
من شافو وضعي هيج عافوني وطلعوا رجعت لغرفتي وكل شويه تهاجمني ذكرياتي ويا ابني ضليت ابجي لما دموعي خلصت وحتى كلبي تعب
خليت ونمت اني ونايمه سمعت صوت حازم يمي قريب صحيت بس مافتحت عيني سمعته ....
حازم :ليش هيج دتسوين بينا؟
شلون تريديني اعوفج ياضوا عيوني.....(اتنهد وجر حسره قويه )
اعرف هسه انتي شكد تعبانه بس صدكيني اني هم مثلج تعبان ،،،،اني هم ابني راح
ابني الي ربيته على ايدي وليالي حضنته ونمت واول طفل كلي بابا كل مشاعر الابوه عشتها ويا لحد ماصار قطعه من روحي
صدكيني لويخيروني بيني وبينه اختار اني اموت بمكانه
صورته مافارقتني دقيقه حتى من انام اشوفه صدكيني ماكو كلام يوصف شعوري بغيابه بس شنو بيدي اسوي القدر اقوى منا ومن امالنا
لتعاقبيني على شي موبيدي احجي ،،اصرخي،،، عاتبي ،،،اي شي سوي بس لتسكتين وتعوفيني محتار والاسئله تنهش بدماغي
ليش تريدين تعوفيني؟ معقوله مااعنيلج شي؟
اعرف دتسمعيني افتحي عينج وجاوبيني خلي ارتاح موكلبي راح يوكف ودماغي راح ينفجر من التفكير
فيان :فتحت عيني ونزلت دموعي الي كنت حابستها من الي سمعته
باوعت بعيونه وكان جوابي بس الدموع لان ماعندي جواب
مسح دموعي بايده وكلي .....
حازم :لتروحين وتعوفيني بداعت حبنا ابقي يمي شلون تريدين تعوفيني وتروحين وانتي تعرفين بدونج الدنيا متسوى عندي شي
فيان : ما راح ننجمع كل شي قسمه وهذا قدرنا القسمه متجمعنا
حازم :شلون تريديني اقتنع بعد ماشوفج لوحتى يوم
فيات :ولامره انطيتك وعد او حتى وافقت انو نكمل سوا لتصعبها علينه من البدايه كان اتفاق وصار الوقت ننهي اتفاقنا
طلكني،،،،طلكني وكمل حياتج ويا انسانه تستاهلك وتستاهلها
اني انتهيت من راح ابني ومات متت ويا اني هسه جسد بدون روح
حازم ؛يعني صدك نويتي اللفراق ؟؟؟
فيان :كام من مكانه وضل يروح ويجي بالغرفه وماسك صدره الضاهر عنده الم رجع وكف كدامي وكلي بصوت يرجف....
حازم :انتي الضاهر دخلتي بحالة اكتئاب وحقج ماالومج ومو من حقي اضغط عليج ويجوز المكان والذكريات الي هنا دتزيد الضغط عليج
خلص روحي يم نرجس ارتاحي فتره خلي نفسيتج تتحسن وبعدها لكل حادث حديث اهم شي هسه عندي راحتج
بس اريدج تعرفين شي واحد حبج بالنسبه الي الهوا الي عايش بي واتنفسه لتطولين غيابج عني لان معناها دتموتيني
فيان :ياربي كلامه دمار بالنسبه الي وسكاكين تذبح بقلبي ونضرات التوسل الي بعيونه من يتكلم تعصر بروحي بس مابيدي شي عليه خايفه ليصيرله شي لان صرت متاكده اني ملعونه واذا صارله شي بسببي هل مره صدك اعوف كل شي بالحياة وكل حلال وحرام واموت نفسي ورا
بوقتها فعلا دخلت باكتئاب وصار عندي مثل الوسواس
حازم :خلينا نبتعد عن بعضنا فتره نعتبره بعد مؤقت لحد ماترتاحين وتستجمعين نفسج وتصفين بالج ويخف حزنج حتى تكدرين تفكرين بشكل اصح ها شتكولين ؟
فيان :وافقت حتى بس يتركني اطلع من البيت لان صرت متاكده ماراح يعوفني بهل سهوله ماتصورته متمسك بيه ويحبني لهل درجه اشهر واني اتمنى واحلم بس يحبني وكنت احسد حبيبته ومن اكتشفت حبه وتعلقه بيه القدر فرقنا
بوقتها نزل لمستوى راسي وباسني من راسي بكل حب بس انتبهت جسمه يرجف عافني وطلع
اخذت غراضي وخلص نويت اروح لبيت نرجس تفاجئت من دخلت عليه للغرفه هديل كعدت يمي ونزلت دموعها وكالت...
هديل :اسفه فيان اذا فد يوم قهرتج صدكيني متندمه وكلش مقهوره على موت حمودي اعترف جنت اغار من اشوف فاروق شايله بس بالحقيقه من يجي يمنا بالغرفه العب ويا وتعلقت بي وكلبي محروك عليه
فيان :ماجاوبتها بس دموعي نزلت
هديل :سامحيني صدكيني اني مااكرهج ولاعندي شي وياج ،،،صح بالبدايه ضجت وغرت منج بس بعدين عر فت حقيقة معدنج وردت اتقرب بس كرامتي منعتني خفت تصديني
فيان :هذا الكلام بعد ميفيد اني راح اترك البيت انسي
اني اصلا ماشايله بكلبي عليج
هديل:اشكرج انتي صدك كلبج طيب وتستاهلين كل الخير وان شاء الله تنسعدين بحياتج ويجيج الانسان الصح الي يسعدج
فيان :لكيت الانسان الصح بس ماكو نصيب
هديل :صدكيني لوحازم الشخص الصح ماكان الله بعده عنج
يجوز الله راد يخلصج،،، صدكيني فيان حازم ميستاهلج
حازم موالشخص الي انتي تشوفي حقيقته مختلفه حازن شيطان بهيئة ملاك
فيان :وكفت منتفضه من كلامها وكلت ...
انتي شنو تحجين مااسمحلج انتي ليش لهل درجه تكرهين حازم؟
هديل :صدكيني مااكرها بس لان اعرفه واعرف بلاويه وماضيه الاسود هيج حجيت
ترا حازم شخص مرعب ومئذي وحتى مريض نفسي واكو ادله على كلامي بس الكل مطم طم الحقيقه
صدكيني اهل هل بيت مختلفين مومثل الضاهر هاي موخالتي تشوفيها من برا زينه بس بالحقيقه شيطان من تدوسيلها طرف يطلع منها شخص ثاني كلهم هيج لتغرج وجوه الملائكه اني اعرفهم لهذا هيج اعاملهم
فيان :ليش هيج تحجين عليهم وهمه يعاملوج احسن معامله ؟
هديل :مجبورين يعاملوني زين حتى لاافضحهم وافضح بلاوي حازم القاتل
حتى الي كان يموت عليها مريم تسبب بموتها حتى ينتقم منها
اطلعي منا وانفذي بجلدج حازم حيه يسوي نفسه خيير وهو نفسه الي يلدغ بس يلكي الوقت المناسب
مريض نفسي حتى دخل المصحه حتى يتعالج والكل يعرف بي
اني الي عليه كتلج وحذرتج وانتي بكيفج بعد بس فيان بروح ولدج لتكولين اني الي كلتلج
فيان :يعني كل الي سمعته وتريديني اسكت ؟
هديل :لمصلحتج اسكتي واتطلكي ولو متاكده ماراح يعوفج بسهوله مولان صدك يحبج بس هو مريض نفسي
واعديني اترجاج لتجيبين اسمي ترا حازم يدمرني
فيان :وشنو مصلحتج ليش كلتيلي اذا انتي خايفه؟
هديل :خلي يعرفون ميهمني بس موهسه الى ان اتطلك واترك بيتهم يله
اخاف يسوولي شي وانتي اخاف اذا عرفوا دريتي يئذوج مثلي
فيان :عافتني وطلعت واني كلمة صدمه لاشيء كدام الي حسيت بي !!!!!
يتبع ....
شنو رئيكم بكلام هديل معقوله نطلع كلنه مغشوشين بحازم ويطلع هو اللعنه الحقيقيه الي دمرت حياة فيان ؟؟؟
انتضروني بالبارتات القادمه