لعنة حبي الكاذب

البارت الخامس والثلاثين

السلام عليكم

نور ال زياده

فيان :دخلنا ولكينا شيماء وفاروق واكفين ووياهم طبيب من المستشفى واكف يشرحلهم

بس تفاجئت من سمعت كلامه وخفت بشكل موطبيعي على حازم

فاروق :يعني شنو هسه دكتور ماكو حل؟

الدكتور :مع الاسف لازم يخضع لجراحه لان القرحه منفجره ومئديه الى ثقب ودتنزف

وحاليا حياته معرضه للخطر واخاف نخسره اذا نتاخر اكثر لان دينزف داخلي

تدخلنا طبيا مؤقتا بس منكدر نتاخر اكثر والدكتور حازم يعرف بهل شي وكان المفروض يتوقع وهو صارله ايام يتقيء دم

فاروق :ااااخ منك حازم اااخ كل هذا بي وهو فوكاها صار ايام ياخذ بالبارستول وحذرته لان اعرف البارستول والاسبرين موزين على القرحه

شيماء :بس هو الي بي قرحه طبيعي يتقئ دم شنو الجديد واصلا من صارت بي صار كم سنه كل ما تتهيج يتقئ دم شنو الي تغير

الدكتور :الي تغير كبرت وانفجرت يعني هو طبيب المفروض ميهمل نفسه وصحته بهل طريقه

شيماء :هو كلش معتني بصحته وبئاكله بس هل فتره مااعرف تغير ونفسيته تعبانه كلش ومنا راسه يوجعه فنجبر ياخذ ادويه وفوكاها من غير مياكل

الدكتور :دائما امراض المعده مرتبطه بالحاله  النفسيه وخصوصا القرحه والقالون

على العموم المفروض منئجل وضعه اكثر وندخله عمليات لان وضعه حرج بس هو ماقبل زملائه وطلابه يعرفون الى ان تجون

فاروق :هذا هو نتوكل على الله

فيان :من سمعت الكلام شبعت قهر يعني البارحه للصبح يتقئ دم واني كرامتي منعتني اطلع اشوفه شنو بي واساعده

وهو لو شنو يصير بي يوكف ويايا وطلع عنده قرحه نازفه ومافهمت شنو بي

صرت ابجي من كل كلبي  راح الطبيب واجتي شيماء يمي من شافت حالتي حضنتني

فاروق :لتخافين يابه ان شاء الله سهله بس ادعوله

شيماء :امشي ندخل انشوفه

فيان :فوتو انتو اني وفاطمه ننتضر هنا

فاطمه :تنتضرين وحدج لان اني اجاني اثير وراح اطلع

هذا ديتصل يلله من رخصتكم سلمولي على الدكتور وان شاء الله يكوم بالسلامه

شيماء :الله يسلمج يوصل وشكرا على جيتج

فاطمه :لا صدك ،،جذب شتكولين هذا واجب ودكتور حازم كلنا نعزه

فيان :راحت فاطمه ودخلنا نشوف حازم واني متوتره عبالك اول مره بحياتي راح اشوفه مااعرف شنو بيه