السلام عليكم
نور ال زياده
فيان :كل شي توقعت بس ماتوقعت من حازم هيج تصرف خجلني كدام الكل وصيح عليه
شيماء :حبيبتي لتضوجين اكيد اكو سبب لهذا تصرفه
فيان :اي اكيد والسبب واضح واني فاهمته
شيماء :اذا فاهمته يافيان شتنتضرين هو ميكدر يحجي بس انتي الموضوع كله حله بيدج
فيان ؛يصير خير هذا حمودي نام حبيبي
شيماء :انتي هم نامي شكلج تعبانه يله حبيبتي تصبحين على خير
فيان :طلعت شيماء وقفلت باب غرفتي وراها
ماردت اي مواجهه ونقاش جديد ويا حازم
طفيت الضوا ومددت بفراشي وبديت اتذكر الي صار
سمعت اسمي بصوت عالي
فيااااان سكتي !!
انداريت لكيته حازم بس كان وجها وعيونه عباره عن كتله من نار كلت....
بس اني مو.....
رد قطع كلامي وكال....
حازم : اخذي ابنج وصعدي فوك بسرعه
زينب :حااز.....
حازم :رجائا مااريد اسمع شي وانتي فيان بسرعه اخذي ابنج وصعدي مااريد اي نقاش
فيان :باوعت علي بغضب وكلش ضجت بس شيماء جرتني اني واحمد وصعدنه
بهل لحضه كرهت كل شي بالحياة ماتصورت هل تصرف يبدر من حازم
معقوله لهل درجه كرهني ويريد يتخلص مني وصار وجودي مضايقه؟؟
وين كلامه لعد اني واني ،،،واني سندج وماعوفج
بس ماالومه اني موقفه حياته وسبب اذيته
واصلا كالها انتي مئذيتني ...
بس لهنا وكافي صار الوقت انفصل وابتعد عن الكل احسن شي
هاي العائله مااجاني منهم غير الهم اني شحصلت من امير واهله حتى احصل من بيت خاله
حاولت انام شويه وسمعت طرق خفيف على الباب سمعت صوت حازم بس ماعبرته ولا فتحتله الباب
صرت ابجي ليش مااعرف ليش هلكد مقهوره منه واني اصلا من قبل متعلمه اني ويا نتجاذل طول الوقت بس هسه صرت اتئثر ؟
سمعته راح واني من التعب نمت ماحسيت للصبح
سمعت صوت الباب حازم يكعدني ماجاوبته انتضرته يطلع وطلعت غسلت وبدلت وطلعت حتى احمد عفته نايم بمكانه
نزلت باوعت من بعيد لكيتهم كاعدين يتريكون
انتضرت الخط يله فتت صبحت عليهم وطلعت من غير مااباوع بوجه اي شخص
سلامي كان عابر وعالماشي
ورا ماصعدت الخط ارسلت رساله لشيماء علمود حمودي حتى تدير بالها عليه
وصلت اول مانزلت من السياره دخت بس توازنت ودخلت
ثاني محاضره دخت كلش متحملت احس انتهيت تذكرت ماماكله من غدا اول البارحه اخر وجبه كانت الي وحتى ماكملتها لان اجه قيصر الغثيث وعفت اكلي وطلعت ادور على حازم
من اضوج انسى الاكل نهائيا ونفسي متريده
حاولت اتماسك لحد ماخلصت المحاضره شافتني فاطمه كالتلي مبين وضعج موتمام جاوبتها....
ماماكله صار يومين ودايخه
فاطمه :عزه بعينج ولج شلون هيج باقيه ؟
شنو ناويه تموتين انتي يولي ؟
كومي خلي نروح ناكل لتوكعين
فيان :حاولت اوكف بس ماكدرت دخت فد مره اخر شي وكعت وماحسيت بشي
.
.كعدت لكيت نفسي بغرفة حازم الي بالجامعه وفاطمه يمي ودكتوره نسرين
فاطمه :ها حبيبتي سلامتج بشنو دتحسين ؟
فيان :مابيه شي
فاطمه : راح نوديج للمستشفى هسه بس يجي دكتور حازم
فيان :ماكو داعي مابيه شي
فاطمه :شلون ما بيج شي يولي
نسرين :مبين مابيها شي لتكبريها عوفيها على راحتها
فيان :باوعت عليها بغضب وكمت على حيلي بس هم دخت
فاطمه :هاج هذا العصير اشربي بلكي تصيرين احسن
فيان :اخذته وشربته مره وحده وطلعت واني من الدوخه مااشوف زين
فاطمه :يولي وين رايحه انتضري
فيان :رايحه للبيت
فاطمه :انتضري دكتور حازم
فيان :لا انتضره ولا ينتضرني بعد
واصلا حبيبت الكلب موجوده موبحالي هو
راح اروح للبيت ...
ضلت فاطمه تصيح ورايه عفتها وطلعت لمحته من بعيد جاي غيرت اتجاهي انتضرته يروح وطلعت اجرت تكسي ورجعت للبيت
دخلت سلمت واخذت ابني وصعدت لغرفتي مباشر مااريد اشوف اي شخص حاليا
قفلت على الكل وماطايقه اي احد
شفت جهازي حازم متصل ٢٠ مره بس مارديت ولارجعت اتصلت عفته
صعدت شيماء طرقت الباب وكالت....
شيماء :فيان انتي زينه ؟يمعهوده هذا حازم حرك الموبايل حرك ضل باله ليش متردين من يتصل ؟
فيان :لان مااريد ارد وخلص
شيماء :شبيج يمعوده
فيان :مابيه اريد انام تعبانه
شيماء :اكول لواحد من الولد ناخذج للطبيب
فيات :مابيه شي كتلج مابيه شي لتلحين عليه رجاءا ترا تعبانه
شيماء :راح اخذ احمد وانتي ارتاحي
فيات :حسيتها ضاجت من اسلوب كلامي بس ماالي خلك لاي مخلوق بشري تعبانه نفسيا وجسديا
كله سببه بس اكيد فيان شنو حاير بحبيبة الكلب الي كاعده بمكتبه لو اموت هو موبحالي
بس خلص اليوم انهي كل شي اني موبلا كرامه وابقى بعد كل هاي تصرفاته وبعد ماسمعت كلامه خلي يعيش حياته ويا الي يحبها
غسلت وبدلت طلعت نستله من مالت حمودي رغم مااشتهي جبرت نفسي مااريد اوكع مره ثانيه واصلا ماكو احد بحالي حاليا
مددت من التعب شويه وسمعت صوت الباب كلت
ادخلي شيماء
كنت دايره نفسي على الجه الثانيه ومدده اجاني صوت
حازم :شلون صرتي ؟
فيان :من سمعت صوته راسن كعدت استغربت راجع هيح وقت وعايف الدوام جاوبته...
--زينه مابيه شي
حازم :اكلتي ؟
فيان :اي
حازم :بس شيماء كالت مااكلت
فيان :اكلت بالشارع ومابيه شي ..
حازم عندي كلام ضروري وياك
حازم :اي اسمعج تفضلي
فيان :بدون مقدمات راح اكلك
اريد ننفصل ...
حازم :شنوووو؟!
فيان :انصدم ووجها تغير جاوبته....
مثل ماسمعت اريد ننفصل باسرع وقت
حازم :ليش فيان اخاف علمود مشكلة البارحه ويا زين......
فيان :قبل لتخلص لازينب ولا غير زينب
انتهت مشكلتي والفلم هم خلص وماكو داعي نطول اكثر بتمثيليه المتزوجين خلي ننفصل وكلمن يشوف حياته انته وعدتني من اطلب الانفصال توافق مباشرتا
باوعت عليه بلع ريكه بتوتر وكال...
حازم :يجرالج مثل متريدين اني حاضر باي شي تريدي انتي ارتاحي هسه وديربالج على نفسج وصحتج والباقي سهل
فيان :عافني وطلع واني مااعرف ليش نزلت دموعي
مو هو هذا الي اريده وهذا قراري مو هو من البدايه انجبرت اتزوجه حتى احمي ابني
شبيه هسه مخنوكه من قررت انفصل ؟؟
ضليت اليوم كله بغرفتي مانزلت اجتي شيماء جايبتلي اكل ولبن مالح شربت اللبن وماكدرت اكل جبرتني شيماء اكلت لفه صغيره ونمت
ماحسيت غير بالليل حتى حمودي نايم يمي والاضويه مطفيه بس ضوا النوم مشتغل والبيت هدوء باوعت ساعه ١بالليل
كلت حيييل شكد نمت من التعب ماحسيت
رجعت انام هستوني غفيت سمعت صوت بالحمام صوت حازم كمت اتسنط سمعته يتقيء
كلت هاي شبي ليش هيج ؟؟
ردت اطلع بس ترددت رجعت بس ضليت الوب خصوصا ورا ربع ساعه هم سمعته يتقيء
ورا شويه سمعت صوت شيماء وفاروق هنا كلت لابد اطلع
طلعت وسلمت لكيته كاعد وماسك بطنه وشيماء وفاروق واكفين فوك راسه
فاروق :كوم يمعود خلي نروح للمستشفى وعوف البارستول لخاطر الله بالمستشفى ينزلون ضغطك البارستول موزين عليك
حازم :مابيه شي روح نام هسه اخذ علاج وانام الي بالمستشفى اطباء واني طبيب شنو الفرق
روح نام يااخي
فاروق ؛راح اروح انام واذا احتاجيتوا شي كعدوني
شيماء :تمام اكلك شلون لعد تضل هيج هاي صار ٣ايام وانته هذا حالك بلله ضغطك هينه بس بطنك
فيان :شبيها بطنه
شيماء :مو هو بي ....
حازم :مابيه شي روحي نامي انتي هم تعبانه اخذي راحتج واعتذر ازعجتج وكعدتج من نومج بسبب الصوت
فيان :لا عادي المهم انته مابيك شي
رفع راسه وباوع عليه بنضرات كلها عتب وكال ....
حازم :ليش مهم بالنسبه الج يكون بيه اومابيه شي ؟
فيان :اكيد مهم شلون لعد
جاوبني مستهزء ...
حازم :اي واضح
فيان :ماعجبني رده كلت تصبحون على خير ودخلت لغرفتي
صرت ادردم ويا نفسي موصوجك صوج الي يسال عنك ويهتم لامرك
ردت انام ماكدرت بس اسمع صوته للصبح يتقيء
كل شويه اريد اطلع واتوقف من اتذكر كلامه
ضليت الى ان غفيت كعدت الصبح طلعت ماكو احد بالغرفه
غسلت وبدلت ورحت للدوام استقبلتني فاطمه والطلاب يتحمدولي بالسلامه
فاطمه :شلون صرتي ؟
فيان :زينه مابيه شي
مروه : ضل بالنه عليج البارحه شجاج ؟
اني من شفتج كلت راحت اللبنيه كلنا خفنا عليج
سها :اي بس كلها خوفها بكفه ودكتور حازم بكفه ثانيه متصورته هيج تخبل عليها
فيان :شنوووو؟انصدمت من كلامها!!وباوعت على فاطمه حتى تفهمني
فاطمه :مو هو البارحه من تخربطتي ماعرفت شنو اسوي وطلعت لكيت دكتور حازم وصحته يجي يشوفج شنو بيج وهو ماقصر تعرفين بعد هاي وضيفته هو دكتور
سها :بس اني حسيته بالغ بردت فعله وخوفه
مروه :طبيعي فيان احد طلابه قابل غريبه
سها :واحد طلابه هيج ينرعب عليها ويكلها ياعمري ويشيلها وين صايره
وبعدين عود ليش صحتوا دكتور حازم شنو ماكو غيره ؟
فاطمه :ليش تحسسينا يخصج وضايجه علموده؟
فيان :اسمع نقاشهن ومستغربه جرتني فاطمه وكعدنه كلتها....
--احجيلي شنو الي صار ولتضمين شي
فاطمه :شوفي هو من خربتي وشفتج هيج ماعرفت شنو اصرف ولاعليمن اروح
لهذا ركضت على دكتور حازم كان بمكتبه بس خطيه كان كاعد ولازم بطنه مبين عنده وجع وحتى وجها اصفر
كتله على الي صار وياج ومن سمع تخبل طلع شايط واجينا عليج بس انتي لاايد ولارجل ضرب على خدج راد يصحيج وانتي فاقده
من شافج هيج حسيته انرعب عليج بس المشكله من شاف وضعج موتمام وفاقده ومتصحين كال...
حازم :فياان شبيج ياعمري شجاج جاوبيني لتخوفيني
من شافج ماصحيتي من غير مقدمات شالج وطلع والكل ضل متفاجئ
اخذج لغرفته ودكتوره نسرين من شافته شايلج اشتغلت الدوده واجتي ورانا
وبعدها طلع مي وعصير لان عرف ضغطج هابط من كتله مماكله وقاس نبضج
وطلع مااعرف يمكن يقرب السياره على مااضن وانتي صحيتي والباقي تعرفي
فيان : واني عبالي مااهتم ولاعبر وضليت الوم بي وهو خطيه مريض وتعبان
فاطمه :صدك شبي صار كم يوم اشو كلش تعبان حتى وجها اصفر ؟
فيان :مااعرف معدته ماادري شنو بيها والي افتهمته ضغطه هم مرتفع
فاطمه :ليش هو بي ضغط ؟
فيان :لا مااضن هيج يمكن عارض صحي مؤقت
مرت المحاضرات عادي الى ان صارت محاضرت حازم توقعته ممداوم بس استغربت من دخل !!
واستغرابي صار اكبر من شفت وجها كان تعبان بشكل موطبيعي
بحيث احسه كوه واكف باوع باتجاهي بس اول ماصارت عيني بعينه نزلتها
مااريداشوفه بهل شكل واضعف واحنا خلص راح ننفصل
بدا يشرح بس فجئه توقف ومسك معدته
وراها رجع يكمل بس هل المره حسيت صار عنده الم اكبر واقوى خصوصا من غلق عينه بقوه و بتعب
حسيته بصعوبه ياخذ النفس خلال ثواني مو اكثر
شفت منضر اول مره اشوفه بحياتي بحيث انفزعت
حازم تقيء وخرج من فمه نافورة دم بشكل غريب لايمكن شرحه بالكلام كان موقف مرعب
كمت ركضت باتجاها من غير وعي ولاتردد
وهواي طلاب سووا مثلي...
وصلت يمه رفع راسه وحلكه كله دم وشكله مخيف حسيته راح يفقد
صحت من غير وعي
حاااازم شبيك ؟!!!
انتبهة هواي اشخاص عينهم عليه لان كلتها من غير دكتور
جابوله مي وكلينكس نضف نفسه من الدم بس الارض بيها بقعه كبيره من الدم لان تقيئه و خرج على شكل نافوره
طلب منه نرجع لمقاعدنا بس اني مارجعت حاولت اسنده بس رفض
وانتبهتله يتنفس بصعوبه لهذا اجوي ولد ويانا سندوا وطلع من المكان كله
قررت اروح ورا اعرف شنو الوضع رغم عيون الكل الي صارت تراقبني بسبب ردت فعلي
بس حاليا اني بالي كله يم حازم مهما صار بينا حازم عزيز عليه ومواقفه الزينه الي ولابني ولاممكن انساها
ومن هل لحضه صرت متاكده انو معزت حازم بداخلي اكبر من تصوري
طلعت متوجها نحو غرفت مكتبه بس مالكيته
ضليت ادور مثل المجنونه بكل مكان ماكو شبسرعه اختفوا ووين راحوا اخر شي اجتي فاطمه وكالت....
فاطمه :ولج فيان دكتورحازم من طلعوا من القاعه تخربط وشايلي وماخذي للمستشفى
فيان :من سمعت الخبر جن جنوني جسمي كله صار يرجف مثل ماتوقعت بي شي وشي كبير
رحنا اني وفاطمه للمستشفى واني اجر بروحي جر وحتى نسيت اتصل باهله
وصلنه ودخلنه بعد دخولهم لكيت هواي طلاب ودكاتره ويانا موجودين وهو مدخلي طوارئ
واني مثل الغريبه واكفه وياهم ولا لا ليش استغرب اني فعلا غريبه
ضليت اسال نفسي اني شنو يربطني بي مالكيت شي غير عقد زائف وراح تنتهي صلاحيته باقرب فرصه
حتى يعيش حياته ويا الانسانه الي يحبها وتحبه
واني ارجع وحيده من جديد لااهل ولازوج ولا حبيب ولا حتى صديق حقيقي مثل حازم الي صارلي سند وامان وصار اب لابني
رفعت راسي وشفت دكتوره نسرين واكفه وتبجي
من شفتها كلش انقهرت وكرهت نفسي وحياتي ومااعرف ليش اجاني شعور غريب من الغيره واتمنيت اكون اني بمكانها مولان تبجي على حبيبها لا ....
لان حبيبها حازم وهو هم يحبها
بهل اثناء طلع الطبيب وطمنه على وضعه وكال مابي شي
شفت وجودي مااله داعي دكتوره نسرين كلش كافيه واكيد راح تدخل تطمئن عليه وهو يواسيها ويطلب منها تهدء
انرسم سيناريو بدماغي خلاني اعصب وقررت انسحب من المكان بهدوء
طلعت وطلعت ورايا فاطمه بس مااعرف ليش دموعي نزلت وماعرفت اسكت
فاطمه تهدء بيه واني مااعرف شنو بيه
رفعت راسي صار فاروق وشيماء امامي وملامح الرعب والخوف مرسومه بوجهم ونضراتهم
سالتني شيماء بلهفه وخوف وكالت....
شيماء :بشريني فيان شلونه حازم خوما بي شي ؟
فيان :كال الطبيب زين
شيماء :لعد ليش تبجين اذا مابي شي ؟
فيان :ارتبكت من سؤالها فعلا ليش خايفه علي اذا مابي شي وليش ابجي
جاوبتها ....
لاهيج توترت وخفت وتذكرت ابني من شفت منضر الدم
لطمت على صدرها وكالت....
شيماء :ولج يادم شنو صار عنده نزيف؟
فيان :مو هو تقيء دم
فاروق :والله عرفته رجعتله من جديد بس هو عنودي الله يسلمه ،، دخلي نفوت نشوفه امشي فيان ويانه شعندج برا
فيان :لاخليني هنا افضل لان جوا موجودين الي بالجامعه ومااريد يشوفوني
فاروق :واذا شافوج مرته وخايفه علي وجايه تشوفي شنو يعني
فيات :ارتبكت من كلامه وماعرفت شنو ارد قابل اكله مااريد اشوف حبيبته لوشنو
جاوبيته ...
لا مو كل الي بالجامعه ميدرون بينا متزوجين ومااريد احد يفهم
فاروق :ولو للان مافاهم ليش ضامين الموضوع بس على راحتج امشي شيماء ندخل
فيان :دخلو واني كعدت على جهه اني وفاطمه
فاطمه :اكلج للان مافاهمه ليش متريدين احد يعرف شنو علاقتج بحازم؟
فيان :شنو اكول للناس مثلا زوجي وهو موزوجي
لو شنو بالضبط اذا اني نفسي مااعرف شنو الي يربطني بي شلون اوضح للناس
وبعدين اصلا احنا راح ننفصل وهو يريد يعيش حياته ويا الي يحبها ومااريد اسببله مشاكل واخرب سعادته لان ميستاهل اجازي على الي سوا ويايا بالاذيه
فاطمه :قصدج نسرين مووو؟
فيان :اي الواضح هيه
فاطمه :زين هو هذيج المره موكلج ميحبها ولايربطه بيها شي؟
فيان :صح هيج كال بس بعدين افتهمت يحب وحده وميريدني اعرف حتى لااتحسس واطلب ننفصل
فاطمه :معناها الج معزه خاصه عنده؟
فيان :هو يعرف اذا انفصلنا راح يرجع اوس يهددني ونرجع للصفر
واكيد هل مره لو راح انجبر على اوس لو اخسر ابني و هو ميريدني اتاذى واصلا واعدني يصيرلي سند ويحميني
متحملت نزلت دموعي وكلت....
دتشوفين وفائه واخلاصه وانسانيته
علمودي ديضحي حتى بحبيبته مخرب حياته وسعادته بسببي
واني الانسان الي كسرت كلمة اهلي وضحيت بكل شي علموده غدرني واذاني ودمر حياتي وخلى ابويه يموت بحسرته عليه
فاطمه :انتي تحبي؟
فيان :باوعت بوجها مستغربه سؤالها وجاوبت....
شنو قصدج؟
فاطمه :قصدي واضح احس عندج مشاعر اتجاها ومتحسره انو راح تنفصلون
وحتى انتبهتلج ضايجه وكارها نسرين برئيج هل شي ميدل على انو عندج مشاعر حب لحازم ؟
فيان : الي بيني وبين حازم كبير بس مااعرف معنى ولااكدر اوصفه
الي بينا .....
احترام وموده وصداقه ومحنه
حازم اول شخص حسسني بالامان والسند الي اعتمد علي بعد ابويه
وهو الي خلاني احس اكو بعد بالحياة انسانيه وموده ورحمه بين الناس
احسه اب لابني حتى اكثر من امير
اشوف بعيونه خوف علينه ماشفته بحياتي غير بس بعيون امي وابويه
رغم كلامه بهواي اوقات يكون عكس نضرته
اشوفه مغرور بس بعيونه بساطة وحنية الكون كلها
من يوم شفته للان كل مااوكع هو يسندني
وكل ماتضيق عليه الدنيا هو يلكالي طريق
حتى من يقسي عليه بالكلام اشوف بعيونه نضرت خوف واهتمام
تصدكين طول الوقت يطلب مني ادير بالي على نفسي وحتى يهتم باكلي وابسط التفاصيل عني يعرفها
كنت اكرها كره العمى اما هسه صرت......
فاطمه :تحبي ....انتي تحبي فيان
فيان :احبه كصديق لااكثر
فاطمه :كلامج عنه ميدل على هل شي بس اكيد انتي ادرى بمشاعرج ،،بس ارجع واكول مااحس بينه وبين دكتوره نسرين شي
فيان :ميهمني ،،يهمني هسه يكوم بسلامه وننفصل ويرجع يعيش حياته ويا الي يحبها سواء نسرين ولا غيرها اهم شي عندي سعادته
لان حازم ميستحق غير بس السعاده
ضلينه ننتضر اتصلت على شيماء وكلتلي بعدين نحجي ولتروحين انتضري راح الكل يروح
وفعلا نص ساعه وبعد كلامها طلعوا كلهم ودخلنا اني وفاطمه
وياريتني مادخلت ولا سمعت الكلام الي سمعته ؟!!
يتبع