السلام عليكم
نور ال زياده
فيان :باوعت الحجيه علينه اني وحازم بنضرات كلها شك وريبه وكالت.....
ام حيدر :صدك ؟! يعني الي سمعته صحيح ؟
حازم :ليش عمه شنو الي سمعتي؟؟
ولو هيه ضلت عليج اذا مرت اخويه وبنت خالتي وعايشه ويانا نفس البيت تشكك بينا
بلله فيان متعرفوها واني هم متعرفوني؟
هديل :ماكاذبه ولامتبليه على احد الكل يعرف زواجكم علمود احمد وحتى تخلصين من اوس وزواجكم كله كذب
شكو واذا عرفوا قابل عمه ام حيدر غريبه ؟
ام حيدر :جاوبني ياحويزم هل كلام صدك لو جذب ؟
حازم :اذا صدك ولاكذب شنو يتغير مثلا ؟
ام حيدر :هواي اشياء تتغير واهمها الاولى تطلكها وتاخذ اوس ويتربى اللوليد يم اهله همه اولى بي وبيها
فيان :انصدمت من كلامها للان مصرين على اوس رغم الكلام الي سمعته عنهم
من حازم سمع هل كلام عيونه صار تجدح نار من العصبيه وكف على حيله وكال ....
حازم :حجيه انتي على عيني وراسي وان ماشالتج الارض اشيلج بعيوني بس زوجتي خط احمر مااسمحلكم كل شويه جايبين طاريها وتطلكوها وتزوجوها بكيفكم وكلامج هذا ممقبول واسم اوس مااريد بعد اسمعه وصدكتو ولا لا فيان زوجتي على سنة الله ورسوله ومامجبور اقنع اي مخلوق بشري بزواجي منها او حتى اسباب الزواج
باوع على فيان وكال ...
اني احبها لفيان وهي زوجتي وام بيتي وابني احمد
رد باوع على هديل وكال....
وانتي هديل طول عمرج تحبين لفت الانتباه عفتي مشاكلج ويا زوجج وحرتي بينا ،،
مراح احجي شي على تلفيق الكلام
لان عندج رجال هو يحاسبج واني اكبر من انو انزل لمستوى امراه واحاسبها على افعالها وخصوصا عدها رجال كول وفعل وهو الي يحاسبها
فيان :كان جدا عصبي بس يمثل الهدوء كال هل الكلام وخلى هديل يصفر وجها والحجيه سكتت ونزلت راسها
عافنا وطلع من البيت كمت ورا بس مالحكت لان طلع
كعدت بالمطبخ ضجت من كلامهن وضجت اكثر على حازم شنو ذنبه يعيش كل هل توتر والمشاكل بسببي
بهل اثناء رجع فاروق ردت اخذ حمودي ماوافق اخذه ودخل اجتي شيماء
شيماء :شكو ،شنو الصاير ؟؟اشو اللوجوه متبشر بخير
فيان :ماكو شي
وينج اشو ماكو من نزلت لسه
شيماء :جانت سهر (بنت الحجيه )تحفلنا اني وام فاروق بالغرفه
فيان :ها بالعافيه
شيماء ؛الله يعافيج ،شعندج كاعده وحدج هنا؟
فيان :لا هيج اجيت اشوف شنو نسوي عشا
شيماء :راح اطلع اللحم اسوي عروك يعني نواشف وشوربه وفنكر وعدنا كبه وبورك وبقا هواي من الغدا
اكل هم نحمي وسلطات هم نسوي
فيان :تمام يله لعد خلي اساعدج
حضرنا العشا ورتبنا السفره اني وشيماء وحازم ماكو ضل بالي لان طلع وهو معصب
كعدنا نتعشى وكلت حمودي وماكدرت اكل ولا لكمه
احس نفسي مسدوده عن الاكل مبين ام حيدر هم ضايجه واحس بنضراتها ندم بس بعد شيفيد غثتنا وخلص
خلصنا اكل وغسلنا المواعين اني وشيماء
وسهر صبت جاي وطبعا هديل اول ماخلصنا عشا اختفت كالعاده صعدت فوك
محملتهم مانيه باقيه ويا ابنهم وهو ميصير عنده اطفال وهمه ساكتين لخاطر فاروق
خلصنا واستاذنت واخذت ابني وصعدت ردت ادرس لان ثاني يوم دوام وعندي امتحان وماكملت دراسه وعندي كم موضوع مافاهمته شغلت الغساله بالحمام وتوضيت وصليت العشاء بهل اثناء
نام احمد وبلشت ادرس قريت المواضيع السهله والصعبه ماكدرت افهم شي عفتهن وطلعت الهدوم وطلعت شريتهن
طبعا حازم مقدما رفض اغسل هدومه لان شيماء تغسلهن واني احترمت خصوصيته
نضفت الغرفتين والحمام تنضيفه سريعه وسبحت حتى اتنشط واكمل دراسه خلصت صارت ساعه ١١ وحازم ماكو ولل ١٢ يله اجى
سمعت صوت الباب اطمئنيت مااعرف ليش مجرد دخوله لغرفته واحساسي انو هو موجود داخل محيط المكان الي اني موجوده بي احس بالامان
يمكن بسبب الي صار بالشقه من دخلو الحراميه صار عندي رهبه
دقائق وسمعت صوت طرق على الباب واجاني صوت حازم
حازم : فيان انتي كاعده؟
فيان :كمت فتحت الباب
حازم :اسف داازعجج بهيج وقت بس شفت الضوا وعرفت بيج كاعده
فيان :لا عادي وصح بعدني مانايمه تعرف عندي امتحان وعندي كم موضوع صعب لهذا تاخرت
حازم :اذا تحبين عادي اني ادرسج
فيان :اخاف تعبان مااريد اضايقك
حازم ؛لا عادي واصلا ماجايني نوم خصوصا بعد مغثة عمتي صدك اجيت ردت اسالج هم حجت شي من طلعت ؟
فيان :لا سكتت وحتى حسيتها ندمت من حجت
حازم :اي افضل تدخلها ماعجبني ماالها حق تتدخل اني امي والوالد ماناقشوني بقراراتي لليوم تجي عمتي تامرني اطلك واتزوج على مزاجها
احنا باي عصر عايشين؟
عمتي واحبها وعلى عيني وراسي بس اني موصغير وتحدد بمكاني شنو اسوي ومااسوي
فعلا استفزتني اما هذي هديل فحسابها بدا يكبر ويايا وصار الوقت تتربى
فيان :حازم رجائا هي من غير شي علاقتهم متوتره هي وفاروق اخاف من يسمع تكبر المشكله بينهم ونكون سبب بخراب بيتهم الافضل منكله
حازم :تدرين السبب الرئيسي الي خله هديل تتفرعن بالبيت هو لان الكل يطمطم سوالفها وماكو احد يوصل لفاروق ولهذا تعلمت تتجاوز على الكل وحتى على فاروق ورا
بس هي ابد ماكان عدها الجرئه تدور مشاكل ويايا
دائما كانت تتلافاني ومازال ادخلت بيه معناها صار لازملها جرت اذن موحازم الي ينلعب ويا
فيان :اخاف تكبر السالفه؟
حازم :من اامن العقاب اساء الادب وصار الوقت هديل تتعاقب حتى تتادب وانتي ماالج دخل موضوعها ويايا اني احلها
جيبي كتبج وتعالي لحد مااخذ شور سريع واصلي العشا لان ماصليت واصلا راح انجبر اصلي قضاء لان فات الوقت
سبح وصلى واني طفيت الضوا ورديت الباب على حمودي حتى ليكعد
خليت طبله امام القنفه وكعدت اجى حازم كعد على القنفه القريبه وبدى يشرحلي الموضوع كان صعب عاده مرتين يله فهمت
ضل يشرح الى ان وصلنا للنهايه بهل اثناء انتبهتله خله ايده على معدته وتاالم
كتله....
خير حازم بيك شي ،شبيها بطنك
حازم :لا هيج مابيه شي
فيان :حازم انته على الغدا للان لو اني غلطانه؟؟
حازم :شبعان
فيان :شبعان ليش وين اكلت واني اعرفك تكره اكل برا ،،راح اكوم اسويلك اكل
حازم :دنيا ليل متسوى خليها للصبح
فيان :تمام على راحتك
باوع عليه وكال....
حازم :دقيقه انتي مثل طبعي من تنغثين متاكلين يعني انتي هم ماماكله؟
فيان :ارتبكت من كلامه ماتصورت لهل درجه يعرفني ويعرف طباعي
كتله هاا ،اي يعني اكلت على كولتك متسوي ليل
حازم :من الاخير اكلتي لو لا؟
فيان :اي اكلت طبعا
حازم :زين لعد بما انو تبرعتي تسويلي عشا قررت اتعشا لان جعت فجئه
فيان :مااعترضت كمت وقرر هو هم ينزل ويايه
نزلنا البيت هدوء نايمين عبرت ساعه ٢ بالليل
دخلنا للمطبخ مثل الحراميه على رؤوس اصابعنا فتحنا الثلاجه وصفنا ثنينا بيها واحد باوع على الثاني وضحكنه
حازم :بلله هذا حال صافنين بالثلاجه وفوكاها مامخليلنه اكل هسه شراح ناكل؟
فيان :ماادري
حازم :ولايهمج راح اسويلج اكله بعرس امج ماماكلتها
فيان :هههه اكيد ماماكلتها لان ماحاضره عرس امي بس اني ماكله انته شنو تريد نسويلك اكل ؟
حازم :معليج يمي اني احلها وصراحه مشتهي اكله خلي اشوف موادها موجوده
فيان :طلع معكرونه طويله سلكها وخله ملح من استوت صفاها بالمصفي
واني ثرمت بطلب منه ....
بصل وفلفل اخضر وطماطه
حمس البصل وخله علي لحم مثروم ومن استوا خله بهارات مشكل واضاف الفلفل وحمسه وبعدها الطماطه واضاف شويه ملح
خلط الخليط مع المعكرونه مزج المكونات
بعدها طلع جدر صغير خله ثلاث اكواب مي وماجي مكعبين واربع ملاعق حليب واربع ملاعق زيت واربع ملاعق طحين واضاف ملعقتين جبنه موتزريلا
خلاهن على النار مع الخلط الى ان ثخن قوام المزيج بعدها خله نص الكميه على خليط المعكرونه والحشوه وخلطهن كلهن ووضعهن بقالب بايركس ووضع على وجه الخليط باقي الخلطه مال بشميل واضاف جبنه موتزريلا وخلاهن بالفرن
بهل اثناء غسلت المواعين الي وصخناهن وهو ساعدني ورجع كل شي بمكانه كنا نشتغل ونسولف ونضحك على نفسنه بهيج ساعه كاعدين نسوي اكل
بهل اثناء سمعنا صوت ورانا احنا ونسولف اندارينه وتفاجئنه بالحجيه واكفه بالباب الي بين المطبخ والهول وصافنه علينه
حازم :هلا حجيه تفضلي
ام حيدر :يمه شنو دتسون تالي هل ليل ؟
فيان :عمه دنسوي اكل لان حازم مامتعشي
ام حيدر :علساس انتي تعشيتي يعني؟؟
شفتي مارجع ولا اكل انتي هم مااكلتي مثله
فيان :باوع عليه حازم وضيق عيونه وكال....
حازم :بالعلامه علساس متعشيه
فيان :يعني اكلت شويه
حازم :والله عرفتج لاماكله ولاشي
ام حيدر :ثنينكم ماتعشيتو بسببي كدرت خاطركم عذروني يمه يمكن كلامي غثكم
تقدم حازم باتجاها
حازم :حجيه انتي الخير والبركه احنا منزعل منج بس انتي هم قدري وضعي اني رجل وكل شويه جايبه اسم اوس هل شي اهانه لرجولتي وانتي هم اعذريني اذا بدر مني كلام موبمحله
ام حيدر : دكتور طول عمرك ماتطلع منك العيبه بس انا تسرعت من سمعت الكلام لان شايفه زواجكم مومناسب بس هسه غيرت رائيي
حازم :اكيد اقتنعتي بزواجنه
ام حيدر :مااقتنعت بزواجكم ولاراح اقنع بس اقتنعت بشغله اكبر منه
حازم :شنو هو؟
ام حيدر :اقتنعت انته احسن واحد يربي الولد انته الوحيد الي تستحق تصير اب لاحمد وتستحق تصير زوج لهل البنيه الاصيله
بس لتتوقع مني اصدك بزواجكم لان واضح زواجكم مو حقيقي بس الحقيقي بينكم والي ميحتاجله لاشهود ولاعقد ولا كلام الناس كلها
هو مشاعركم انتو واحد يحب الثاني ولهذا هسه يله تطمنت ومن هل ساعه بعد ما اتدخل بيكم لان تنوعت بعيوني حبكم
انته ماتستاهل غيرها وهي ماتستاهل غيرك والله يسعدكم
فيان :انصدمت من كلامها وحازم مو اقل مني راسن باوع عليه هزيت راسي حتى افهمه مشي السالفه لتعلق على كلامها هو هم ماكال شي حتى لتشك اكثر
كللها.....
حازم :هذا الكلام الزين الي مايطلع غير بس من الحجيه بدريه ام الكلام الموزون
ام حيدر :لا تاكل بعقلي حلاوه وشوفوني شسويتو اكل اني جوعانه ماتعشيت من شفتكم مااكلتو لوين كدرت خاطركم
فيان : اي حجيه تفضلي خلي ناكل جنج على اكل
حازم :اروح فدوه للبصراويه الي تحجي بصراوي تنوعت وتكدر خاطركم
ام حيدر :جا شعبالك كضيت كل عمري بالبصره وصرت منهم ونسيت حتى هلي بس مانسيت العجل
مالتهم
بس انتو الي ناسين اهلكم صرتو بغدادين ماكو لاعجل ولاشي
حازم :حجيه نولدنا وتربينا وكبرنا هنا طبيعي مانعرف العجل
ام حيدر :حويزم اكعد راحه لاتعلمني بيك انته لوبيدك تحجي ويانا بالفصحى والانكليزي كله من ابوك
فيان :طلعت المعكرونه من الفرن وخليتها على الميز قطعناها كانما كيكه وخلينا بالمواعين
الحجيه :خايب شنهي هاي لاهي كيكه ولاهي مثروده
حازم :معكرونه بالبشميل وجبنة الموتزريلا
ام حيدر :شنهي ،،شنهي ،مزريلا شنهي اكلاتك الغربيه جاي تمشيها براس عمتك يويل
فيان :ههههه عرفتك انته مسويها
حازم :بربج لوعاجبتها ماكان كلتي اني سويتها واتباهيتي؟
فيان :لا والله اني اصلا موزينه بالطبخ
حازم :شوفي اني ماردت ااكل بس استخطيتج وكلت جوعانه خلي انزل اسويلها اكل وانتي بعتيني
فيان :وين كتلك جوعانه؟
حازم :ميحتاج تكوليلي حسيت بيج جوعانه وتراكذبج مكشوف متكدرين تضمين عليه شي
ولهذا عقوبه الج تاكلين لما اني اكلج كافي
فيان ؛لا والله وين اكدر اكل هسه انفجر
حازم :والله مااعرف دبري حالج موتعبان واطبخ وانتي تتبطرين
باوع على الحجيه وكال....
حجيه بربج بدينج فد يوم الحجي كعد نص الليل وسوالج اكل لان جوعانه؟
ام حيدر : ماسواها ولا يسويها لو اعرف اموت جوع
يولي يفيان اكعدي راحه وخلي الرجال الله هادي عليج ويداريج ولاتتبطرين عليه ترا حويزم زلمه براسه ستين حظ
فيان :هههههه حجيه حتى من تمدحين تقصفين
شيماء :ياخونه يالماغزر بعينكم النساتل والحب واللجباس والعصاير والعشره بعتوني وكاعدين وحدكم تاكلون وماكلتو شلون ناكل وشيماء مو ويانا هاي تاليتها حازم هاي يسموها خيانه مع سبق الاصرار والترصد
حازم :عوفي الدراما مالتج وتعالي اكلي ام النساتل والعصاير اني سامع ماغزر الزاد والملح بس انتي فعلا الي بينا هل السوالف وين تقتنعين بالملح
شيماء :زين سامحتكم بس اكو بقى اكل مو؟
فيان :ههه باعت ام القضيه دتعالي اكلي هسه بلشنه اكل
طبعا ماكذبت خبر كعدت وبلشت تاكل والحجيه ماحبت شكلها للاكله بس من اكلتها حبتها
ضلينا ناكل ونسولف سبحان مغير الاحوال قبل ساعات كنا مغثوثين وهسه كاعدين ناكل ونسولف ونضحك
خلصنا وغسلنا المواعين وكل واحد راح لغرفته
اما اني وحازم خلصنا دراسه وصلينا ونمنا
ماحسيت غير على صوت المنبه طبعا ماشبعت نوم بس المهم خلصت دراسه صراحه كعدت متفائله وكلي حيويه ونشاط
حضرت نفسي وعجبني اكشخ صار فتره طويله من وفاة ابني وامير مامرتبه نفسي زين حتى ملابسي غامقه رغم تركت الاسود من فتره طويله بس لا مكياج ولا شي
سبحت وسرحت شعري وفتحته وخليت مكياج وبدلت وشلت احمد ونزلت نيمته يم شيماء وطلعت لان اجه الخط
اول مادخلت للجامعه شفت طالبات زميلاتي تفاجئن من شافني وشافن التغيير
بعدها اجتي فاطمه واثير سلمت على اثير وراح مشينا اني وفاطمه سوا متوجهين للقاعه
فاطمه :انته ياحلو ،شنو السالفه اليوم اكو شي جديد لو اني غلطانه؟
فيان :شكو يعني بطلي سوالفج اعرف وين تعزفين
فاطمه :لا اعزف ولا شي كلامي واضح
فيان :وين تريدين توصلين؟
فاطمه :لا هيج سكتنا يمعوده
بس على فكره الدكتور يستاهل كال هل اهتمام
صاك ويخبل وشخصيه
فيان :والخلقج اذا متسكتين الزمج انتف عطوبج هنا بنص الكليه
فاطمه :يمه ،صايره شرسه ،يالبوة الدكتور
فيان :شو دتعالي ....
صارت تركض واني وراها مااحس الا ارتطمت بشخص
رفعت عيني شفت شاب خجلت كلش من الموقف اعتذرت منه
جاوبني جواب جلطني
--شتنطيني حتى اقبل اعتذارج
فيان :شنووو!!؟
---هههه دااتشاقه مصار شي بس مره ثانيه لتركضين لان وجهج صار طماطايه واني افقد عالطماطه
فيان :شنو هل كلام اشو انته متستحي؟
،شو دوخر موصوجك صوج الي يعتذر منك شو دوخر
اباوع علي صار يضحك استفزني عفته ومشيت واني ادردم واغلط على فاطمه الي اختفت الحقيره
اليوم اموتها بسببها الي صار
دخلت واخذت المحاضره الاولى والثانيه امتحنت والحمد.الله جاوبت
اول ماخلصت الامتحان اجاني اتصال من حازم رديت واجاني صوته
حازم :الو
هابشريني شلونج بالامتحان ؟
فيات :كلش زينه احتمال اطلع درجه كامله
حازم ؛سباعيه مينخاف عليج
فيان :هههه شنو السالفه اخاف اليوم مبدليك الدكتور حازم بجلالة قدره يمدح بيه لا هاي مصايره
حازم :موصوحج صوجي مخابرج اسئل دروحي ياكسوله
فيان :سده واني ضليت اضحك على كلامه
فاطمه :ها هذا الحب هيج مضحكج؟
فيان :فاطمه ترا بعد مااتحملج كافي مغثه ياحب ياصخام عيب هل كلام ليروح يسمعج
فاطنه :هاي شبيج دنتشاقه وبعدين حضرتج ضايجه انتي تطولين واحد مثله ومعاجبج
فيان :اليوم يجي اثوري واكله على سوالفج وهو يحاسبج اني ولا ادوخ نفسي ولا اسوي شي
فاطمه :لا حبابه كلشي ولا اثير هو من غير شي يغار غير يبطلني ويكعدني اذا سمع
حبابه اسكتي وهاي حلكي سديته ابد بعد مااحجي
فيان :راح اسكت اليوم واذا مره ثانيه سمعتج تحجين هيج اكله لخطيبج
فاطمه :تمام ،وحتى ارضيج رايحه اجيبلج لفه
فيان :اي هيج اريدج حبابه ولطيفه
راحت فاطمه وكعدت سمعت صوت ورايه
كمت وكفت وانداريت وانصدمت من شفته !!!
يتبع