شرفي عندك

البارت الخامس العشرون

أحيانًا نتمنى ان تكون احلامنا حقيقه
وأحيانًا نتمنى لو كانت حقيقتنا حلمًا

بقلم الكاتبة الزهيريه الزهيريه
آيسن / اكو مثل يگول لا حظت برجيلها ولا خذت سيد علي هذا المثل ينطبق عليه بكل حذافيره اني ضيعت نفسي واطفالي بعلاقتي بصائب إني ما أعرف عقلي وين چان وشفكرت يعني من كذبت عليه وگتله اني ما عندي أطفال وآني زواجي بيزن بس على الورق يعني ما فكرت من يكتشف الموضوع والكذب مالتي كله يعني شراح يسوي ما معقوله ياخذني بالاحضان
ويگلي تعالي نزوج هنا شفت كل شي حقيقه كأنهُ چانت على عيني غمامه وانزاحت بس بعديش بعد ما راحت السكره واجت الفكره

من أيهم شرب القاصر والله ندمت على كل علاقتي بصائب وقررت أنهي علاقتي بي بس ليس كل ما يتمناه المرء يدركه واني مالحگت انفذ ألي قررته لإن من رجعنه فاجئني يزن من سألني شصار بالجامعه ظليت لا أبث ولا استلم وحتى جوابي كان بي كذب لان ما جاوبت الجواب الصحيح بس هو فاجئني من گلي آني اعرف شصار وياچ يعني ظليت كأنه شلون الزجاج المكسور الي اشوف من خلاله بس أشوف الشي مكسور نصين لكون الزجاج مكسور هيچي چنت گدام يزن

وبعد الكلام الجارح الي وجهه يزن ألي موبايلي من طلعت للمستشفى اودي أيهم آني أصلاً چنت دى احچي ويا صائب من سمعت أبني يشهگ ذبيت الموبايل على السرير وحتى من طلعت ورحت للمستشفى نسيت موبايلي واني بسبب علاقتي بصائب دائماً موبايلي صامت لهذا يزن من جابه الي وخلا بيدي گلي ردي عليه شوفي شيريد منچ زوجچ المستقبلي

اخذت الموبايل انصدمت من شفته صائب دى يتصل أول ما رديت عليه من گال شلونچ ام جود
هنا اتسمرت بمكاني لان ما چنت متوقعه يعرف صائب عندي أطفال وحتى لو بيوم عرف بس بهذا الوقت بالتحديد الي بيومها الدنيا عندي ماشيه عكس وياي جبتها من مشكلة الجامعه الى شرب أيهم للقاصر إلى معرفة يزن بعلاقتي بصائب إلى هسه صائب نفسه عرف عندي أطفال وكذبت عليه يعني من منين ما اريد الزگهه تنفتگ

لهذا من گلي صائب شلونچ ام جود بسرعه غلقت الخط ورجعت غلقت الجهاز كله لإن بعد ما عندي عذر اگوله لأي احد بس چان همي آنه أبقى ويا يزن ما أريد اعوف لا بيتي ولا اطفالي لهذا من توسلت بي ما قبل واصر إلا يسلمني لسجاد

توسلت بي انه اريد أبقى ويا الأطفال حتى لم يحبسني بالبيت بس ما قبل واصر إلا أبدل وأروح ويا لبيت أهلي

وگالي/ اخذي حريتچ يا بنت الناس ليش طامره نفسچ ويا واحد شايب انتي بعدچ بعز شبابچ والچ حق تعيشين ويا واحد شاب بس انتبهي على شي وآني متأكد من كلامي آيسن الشاب فضحچ وهسه دى يسوي علاقة حب وياچ حتى وانتي على ذمة رجال بس خليها ترچيه بأذنچ والله ما يثق بيچ وراح يحول حياتچ جحيم لإن راح يگول مثل ما سوت هيچي ويا زوجها الي قبلي راح أسوي وتخوني واحفظي هذا الشي بدماغچ
اما الشايب الي ستر عليچ قبل وهسه اني ما راح احچي سبب طلاگي منچ راح اگول ما توالمنه أفضل وأنتي هم گولي هيچي حتى لا احد يحچي عليچ لخاطر اطفالچ مو لخاطر احد والا انتي صدگي طلعتي من عيني يله بسرعه شكو غرض الچ اخذي ما اريد أشوف الچ اي شي هنا

وجبرني أجمع عراضي كلها بس بداية الموضوع إني عبالي راح آخذ أطفالي ويايه بس من ردت اجمع ملابس أطفالي ما قبل
گال / شوفي اني سترتچ وما حچيت شي بس مال انطيچ الأطفال الچ تحلمين ما انطيهم وروحي أزوجي صائب وشنو يعني انتي مصوره صائب راح يقبل بالأطفال وياچ ولو يقبل يصرف عليهم لا متوهمه وسكتت بس مال اقبل تاخذين الاطفال وياچ ما تنعقل

گتله/شوف يزن مال اعوف أطفالي اعتذر منك اذا ما تقبل أرفع قضية عليك بالمحكمه واخذهم منك

گال / حقچ وكل واحد اله حق يدافع عن حقوقه بس لا تلوميني على اي شي أسوي وياچ

گتله/ بس جود ورودينا مو أطفالك أخذهم وخلي يمك أيهم

گال / منو يگول مو أطفالي روحي أثبتي هذا الشي وبعدها الله كريم بس مال اطلعين وتاخذيهم وياچ أنسي بس اگلچ من هسه ترى مو بكل وقت راح تلگين واحد مثل يزن يتقبل وياچ كل شي

بعدها اتصل بيعرب بس گله تعالي اريدك ما مضى هوايه وقت واجى يعرب وكل مره ما يدخل يعرب بس هاي المره دخله يزن وگدامي
گله ليعرب/ أبقى هنا يم الأطفال الى ما أوصل آيسن لبيت أهلها وأرجع

وگتله/ لو اموت ما أروح بدون أطفالي

گال يزن / اشششش صوت ما أسمع وگدامي هسه طلعين أحسن ما يصير غير شي ما محسوب اله حساب

أنتبهت على يعرب نظراته مال واحد مشفي بيه شلون واحد يگلي شوفي شلون طلعتچ اني بقيت افور ضليت انتفض من العصبيه بس ما اگدر احچي أخاف لا يزن يفتح موضوع مال الجامعه گدام يعرب وهذا يگله شفتها ويا وساعتها شيخلصني وصير فضيحه

طلعت واني احس روحي موجره نار بس بقيت أريد اعرف منين عرف يزن وبعد صائب هم شلون عرف وفردوس نفسها شلون عرفت بموضوعي ويا صائب لهذا اول ما صعدت ويا يزن بالسياره
سألته / يزن انت منين عرفت بموضوع الجامعه

گال / شنو منين عرفت اني من زمان شاك بيچ عندچ شي لهذا چنت مؤمن انه بيوم راح يبين الي ضامته والله ما خيب ظني اليوم من اتصل بيه أبو علي وگالي / على أيهم رجعت للبيت اني عبالي أنه مرجعچ للبيت لهذا اجيت على البيت من دخلت  ما لگيتچ دگيت عليچ متردين بس انتبهت انه موبايلچ على السرير وبعده يضوي في حين اني غلقته وما دى اتصل من اخذته وشفته چانت صديقتچ كوثر من فتحت خط انهدت رزايل وغلط لان أختها محاولة تنتحر وهمه مانعيها
ويگول يزن من سمعت صوتي

بدت تغلط ومن هدئتها وطلبت منها تحچيلي شنو الموضوع حچتلي الموضوع كله وآخر شي ختمتها من أختها شكت انه خطيبها عنده وحده يحبها وظنها بمكانه من شايفتچ تراسلي وماخذه الموبايل منچ الى مشكلة الجامعه

ومن خلصت سبحان الله اتصل الي ما چنت متوقعه لان كوثر من حچتلي السالفه نسيت أسألها أهم سؤال وهو منو هذا الشخص وشلون شافته وتعرفت عليه وحبته بس من اتصل عرفت أجوبة لكل اسألتي عرفت هذا صائب ألي لعب بحوالچ لعب بس من هسه اگلچ انتي رجعتي للحاويه الي طلعتي منها وهسه راح ارجعچ عليها وخلي في بالچ انه باچراروح أرفع قضية طلاگ

ردت منه توسلت بي ما قبل وصلني لبيت أهلي ودخلني للبيت وسجاد ماكو ما موجود بس دموع وما حچى شي وياها بس گاللها هاي آيسن واني راح اطلگها وعافنه وطلع

وهي أصلًا ما هتمت لحچي يزن وحتى سالتني على شي وحتى سجاد ماكو طالع سياحه حتى ضحكت هو ماعنده فلوس شلون طالع سياحه وينطبق عليه مثل ألي يگول / مجدي وعليگته قديفه بقيت ما يقارب 3 أيام من أفتح الجهاز الگى اتصالات ورسائل صائب بس ما أرد عليه وأكثر رسائله يگلي ردي دى أتفاهم وياچ وإلا اخليچ تندمين

بس اني تجاهلت كل شي وبس اتصل على يزن وهو ما يرد عليه آخر شي حضرني وبقيت الوب على أطفالي أخر شي يمنه جيرانه باحثه اجتماعيه
گلت أسألها عسى وعلى اكو حل

ورحت عليها واستقبلوني ودخلت يمها وحچيتلها كل شي وهي ظلت متفاجئة من الي صارلي كله
اخير شي گالت/ شوفي حبيبتي آيسن انتي الچ حق بحضانة اطفالچ بس اكو شي يمنعچ من تحقيق غايتچ أولها أنتي بفضل ابوچ ما عشتي لقيطه لان هو انطاچ اسمه وبنفس الوقت يزن هم نطى أسمه لأطفالچ يعني هسه اذا رفعتي قضية ضم الحضانه من يزن لأطفالچ بهيچي حاله يگدر يزن يرفع قضية انكار نسب وينكر اطفالچ من نسبهم إله وتگدرين ترفعين قضية على سجاد وتثبتين نسبهم لسجاد من خلال التحاليل بس اكو شغله ما تعرفيها بهيچي حاله سجاد راح يعاقبه القانون لان هذا تحرش جنسي من المحارم

واكيد سجاد ما راح يسكت راح يثبت انه انتي مو أخته حتى لا يعاقبه القانون فاشيسوي يلجئ الى أثبات للمحكمه انه انتوا مواخوه وبس يثبت هذا الشي وسهل إثباته راح ينسحب اسم ابوچ منچ ويبقى بس اسمچ فقط وهذا الشي بالدوله العراقيه ما يمشي يعني دراستچ وكل شي يخصچ مو الچ لكون انتي مجهولة النسب

گتلها / ست يعني شنو اعوف أطفالي

گالت ما الچ حل خليهم عنده وعسى فتره وترجعون

توسلت بيها اريد اشوف أطفالي
گالت / انطيني رقمه واني احچي ويا والله كريم عسى يقبل

انطيتها الرقم واتصلت بيزن وحچت ويا وطلبت منه انه آني اشوف اطفالي بس رفض نهائيًا ما أشوف أطفالي ومن غلقت ويا الموبايل
طلبت الباحثة انه نسكت فتره عسى انه تبرد أعصابه ونرجع نتواصل ويا لان بعده أعصابه نار

رجعت واني أقدم رجل وأخر رجل بعدها بيومين أجى تبليغ من المحكمه آنه أحضر للمحكمه لانه يزن رافع قضية طلاگ تخبلت اتصل عليه بعده حاضرني وين أروح والمن احچي خليت غصتي بگلبي وسكتت ورحت
وبعدها بأيام رحت راجعت على جامعتي وانه حالوني على مجلس تأديبي يقتضي بفصلي من الجامعه لمدة شهر هاي الفتره الفاتت كلها اني ما محاچيه صائب وحتى موبايلي افتحه احچي ويه إلي أريد احاچيهم واغلقه بيوم قبل يوم موعد الجلسة مال الطلاگ من فتحت الموبايل لگيت هوايه رسائل يگلي بيهن صائب الچ بس اليوم اذا ما جاوبتني افضحچ بالمحكمه

وبالفعل هل مره اني اتصلت بي ومن جاوبني نزل بيه دگ رزايل وغلط وفشار اني هذا كله ساكته آخر شي يگلي / اني اعلمچ ولچ شسويلج حتى أشفي غليلي منچ اني تكذبين عليه وتگليلي ما عندي أطفال وزواجي من يزن بس على الورق تحملي لعد مني وشوفي شراح يصير وانتي كل عقلچ انتي اني ازوجچ أزوج وحده حتى اطفالها نكرتهم تريدين آمن انه اخذ وحده خانت زوجها ويايه  شصدگ منها

وغلق حتى الموبايل بوجهي وما سمع مني هنا صدگ اني ضيعت المشيتين لا اني بقيت يم يزن ولأ إني حصلت صائب كل شي ضاع مني هاي الفتره الي اني بيها يم دموع اكو شغلتين غريبات لا حظتهم

اول شغله موج دائماً تجي وتشكي من ياسين وهو كذلك هم دائمآ يشكي منها ويگول اني متاكد موج عدها واحد بس دموع  گبل تگب بوجهه على انتوا تريدون شوهون سمعة بنتي

والشغله الثانية سجاد دموع گالت طالع سياحة بس هو يجي بنص الليل يجي ويروح وما يطول أبد هذا الشي وحده عليه علامة أكس بس ما فهمت من شنو يتختل وما معقولة من يزن مرت أيام اسوء ايام حياتي اطفالي ممنوعه منهم وخسرت كل شي واجى يوم المحكمه وحضرت اني ويزن وحولونه على الباحثه وكل واحد وبينه حچى الي عنده ومن سالت الباحثه اذا تريدون فرصه عسى تتفاهمون رفض يزن الموضوع رفض نهائي والقاضي حدد جلسه حتى ينطق بالحكم وهذا الموعد بعد أسبوعين

ومن طلعنه من يم القاضي اتقربت عليه
وگتله/ أريد أشوف أطفالي لو هسه اروح اشتكي عليك

گال / روحي حبابه أشتكي والله اثبت عن طريق المحكمه انتي خنتي زوجچ وخاف الچ أمل انه اسويلچ أستثناء تجين شوفين اطفالچ هسه لغيتها خصوصاً بعد ما اثبت انتي خاينتي ويشوفون التصوير الي مصوره يعرب

وهذا التصوير موضوع ثاني يعني كل موضوع اكبرمن الثاني رجعت والحيره ماكله گلبي وعقلي معقوله هيچي خسرت كل شي بسبب غبائي لو شنو هسه

بس كل حل ما عندي لازم اقبل بواقع اني سويته بيدي ورجعت على سالفة الفلوس ومال متكفيني وخصوصًا قبل چنت يزن يصرف عليه وما مقصر بس هسه بعد يزن ما يصرف عليه ولازم أعتمد على نفسي مرت الأيام بحلوها وبمرها واكو مرات تغيب بيها دموع وحتى ما تبات بالبيت ومرات أشوف سجاد بس شنو جيته للبيت خطف عبالك واحد يركض ورا وكله يجي للبيت من بعد الساعه 2 بالليل وحتى إذا نايمه أعرفه جاي من أشوف بقايا الجگاير مالته

ورجعت أداوم بالجامعه وطلاگي من يزن تم وجيرانه ام أيوب خطيه ذوله مبتلين بيه دلتني على واحد عنده محل كوزمتك يريد عامله ويا بس يريدها من الساعه 4 العصر الى ساعه 10 بالليل وافقت لان ما عندي حل وبيوم اني بالليل حسيت على حركه غريبه بالبيت من رفعت راسي شفته سجاد اول الامر ما اهتميت اله يطبه مرض اني شنو بي بس بعدين گمت دى أروح للصحيات سمعته يحچي ويا دموع
ويگللها/ الفلوس الي نطاهم الي يزن قربوا يخلصن بين البيت الي مأجره وبين مصرفي شسوي وهي
دموع تگله / بعد ما تگدر تاخذ منه
وهو يجاوبها مستحيل ما اگدر هسه لازم يعدي فتره يله اطلب منه

حتى شگد چنت محصوره نسيت كل شي ودخلت عليهم وگتلهم / بس گلولي ليش يزن ينطيك فلوس  أريد اعرف

دموع دخلت بفراشها وغطت حتى راسها ام سجاد طلع من الغرفه واني امشي ورا
واگله / متطلع اذا متگلي ليش يزن يدفعلك فلوس وسيارتي من نباعت نطى فلوسها الك

گال / عفيه صحيح فلوس سيارتچ انطاهم الي

ظليت الح ويا گال / راح انطيچ نبذه ثانيه وبعد لا تفكين حلگچ وتحچين فهمتي

گتله/ موافقة بس احچي عود آني أربط الأحداث

گال سجاد/ تذكرين من گتلچ يزن عم هاي البنيه الحامل ووياها زوجها

گتله اي

گال / في وقتها أنتشر خبر موتهم لان هناك مناطق زراعية وكلها ناس تعرف ناس من طش خبر موتهم اثنينهم والولد قبل ما يموت ما ذكر غير بس لون السياره وهي لونها احمر بوقتها الشرطة سوت حمله على كل واحد سيارته لونها أحمر وتنفحص ولكون يزن چان سكران وما يذكر شي اجتي الشرطه عليهم حالهم حال الناس من فتشوا السياره من جوه لگوه دم اخذوا سيارة يزن للفحص طلع الدم يطابق دم البنيه والولد واخذوا يزن الشرطة وبوقتها آهل البنيه اجوي دگوا بيت اهل يزن وصارت ملحمه واهل البنيه واهل الولد اعتراضهم ليش ما نقلهم للمستشفى

بعدها محامي شاطر ثبت انه يزن چان سكران وحكمته الدوله 7 سنوات وبعدها بسنتين طلع بعفو انطى صدام حسين واما بالعشاير أهل يزن نكسر ظهرهم بفصلين لأهل الولد ولأهل البنيه بس مبالغ الفصل چانت كلش چبيره وحتى العشيره ما قبلت تدفع لكون چان سكران لهذا تعتبر عمله سوده وهاي العمله السوده تبقى بوجهه أهلها يعني اهل يزن يدفعون وحدهم العشيره ما إلها دخل فهمتي

گتله/ انت گلت احنه مو اخوه هسه هذا الكلام كله ما يهمني السؤال ليش يزن ينطيك فلوس

گال / لا السؤال يزن ليش چان واگف وياچ وليش هو چان يدفع فصول بشغلتچ والسؤال الاهم يزن بشغلته مال حادث السياره ومات بيها الولد والبنيه الحامل منين يزن جاب فلوس الفصل الي ندفع

يتبع

ملاحظه/ إلى كل متابعيني الاعزاء الي احبهم ويحبوني وينورون صفحتي بتعليقاتهم الحلوه تحية لكم من القلب الى القلب

دمتم في آمان الله وحفظه
اختكم الزهيريه الزهيريه
تصويتكم يسعدني