شرفي عندك

البارت الثاني والعشرون

سيخبرك جحيمهم
ان قلبي كان جنه

بقلم الكاتبة الزهيريه الزهيريه
آيسن / اي انسان ممكن يكون راسم شي براسه من أنه يبني نفسه بس الاقدار تكون ضده بس أكو أقدار احنه نسويها بيدنه واكو أقدار تكون رب العالمين كاتبها النه بس اني قدري ما اعرف رب العالمين كاتبه عليه لو أيادي البشر خطت ملامحه وكتبت تفاصيله وكل شي يجي من رب العالمين هو خير النه اما البشر ما يجي منهم غير بس الشر

اني بعد تصرفات يزن ويا سجاد صارت ألف علامة استفهام عندي واسئلة ما إلها حصر براسي وأريد اجوبة الها ومن رحت على أبويه وردت أعرف شنو الموضوع آجله أجى وبعد ما گدرت اسأله واخذ كل شي ويا يعرفه لمثوى الأخير وهو هسه بين ايد رب العالمين اذا كان غلطان او صح بعد حسابه يم رب كريم غفور رحيم وبنفس الوقت شديد العقاب

بقى بس بلوتي سجاد أساله لان يزن حاولت ويا ما حچى شي لهذا بس اخذت اطفالي للحضانه رحت على بيت اهلي من دخلت لگيت ست دموع گاعده ومحنكه وتتريگ عبرتها ودخلت على الغرفة لگيت سجاد نايم اجيت ظليت أهز بي واگعده واگله/ اگعد احچيلي شنو الموضوع القديم

فتح عين وحده ويگلي/ إذا نفتح الموضوع القديم راح يحترگ الاخضر واليابس وأول واحد يروح بالرجلين هو يزن

گتله/ ما يهمني منو يحترگ ان شاء الله تحترگون كلكم بنار جهنم وحتى نفسه يزن ما يهمني احچيلي شنو الموضوع

گبل گام سجاد على طوله وگلي / هااا الي افهمه انه يزن تكرهي حمدلله يعني شعور مشترك بينه بس انصحچ اي شي يخص الماضي لا تعرفي لان راح تنفتح أبواب عليچ أنتي بغنى عنها ودوخة راس إلها اول ما إلها آخر

گتله/ سجاد معليك انت اني مو بس أريد أبواب جهنم تنفتح عليه أريد ادخل جهنم نفسها

ضحك وگلي / شوفي اني مبدئي احب اخلي اصبع عدوي جوه ضرسي وشوكت ما يعجبني اضغط على اصبعه وشوكت ما أريد ارخي لهذا علاقتي بيزن شوكت ما أحب اضغط عليه وشوكت ما احب انطي هدنه بس اذا گتلچ ما راح بعد اگدر ليزن بشنو أضغط عليه شوفي شلون عنده أهم شي ما ينكشف الموضوع القديم

گتله/ سجاد حقير لا صير گلي لا احرگ الدنيا فوگ راسكم

گال / ما احچي ورقة الرابحة ضد يزن شوكت ما چان أطلعها

شفته يلعب بأعصابي عفته ومن دى أطلع من البيت ويم الباب الرئيسي تحديدًا اذكرت هو اذا سجاد يعرف معقوله دموع ما تعرف رجعت على دموع چانت تحچي ويا سجاد

وتگله/ اي حچي بالموضوع القديم ما ينحچي بي ويا آيسن خلي الي صار مطمور ولا تلعب بالنار سجاد ترى انت هم تحترگ بيها

گاللها/ اني ما احچي بس يزن إذا زلمه خلي هو يگللها

دخلت صرت گدامهم همه سكتوا اثنينهم دخل سجاد للغرفه ودموع راحت للمطبخ واني رحت وراها گتلها / بس سوي شي بحياتچ زين الي گليلي شنو الموضوع القديم