قصص عراقية حقيقية بقلم ابو بغداد سائق التكسي

ابو الداطلي

بسنة ٩٩ اني جنت شريك بمكان صغيروني نسوي بي داطلي .. المكان مو رسمي يعني عربانة بس جان بيها خبزة بصراحة .. مكان العربانة قريب كلش على كراج بغداد الجديدة .. شغلي اني و شريكي جان زين يعني يدخلنه ربح زين .. الربح مو معناته اني صرت زنكين من وراه .. لا مو لهل الدرجة .. بس جنت مطلع مصروفي و مصروف علاكة البيت و شوية فليسات اخليها على صفحة للزمن …. شريكي الي هو عود جان صديقي .. اجاني فد يوم فجاءة و كالي اكلك انت صديقي واني احبك بس بصراحة سالفة الشراكه معاجبتني .. و عندك حلين حتى لا اظلمك و لا تظلمني .. كلتله شنو ؟؟
كال لو تنطيني فلوس نص العربانة و تاخذها انته كلها لو اني انطيك نص فلوس العربانة و اني اخذها كلها .. كلتله بس اني عاجبني شغلي وياك .. كالي خوية اني اريد اشتغل وحدي ولا تزعل مني .. كلتله زين اني انطيك فلوس نص العربانة و الغراض .. كال ماشي و قبل بسرعة .. انطيته نص فلوس العربانة و نص فلوس القناني مال الغاز و البريمز و حتى الطشوته الفافون الي نكلي بيها …. كلشي كلشي قاسمته نصه و انطيته فلوسه .. و هو الولد للامانة ما دور وياي غلب بذاك اليوم .. اخذ فلوسه و راح ..  اني بقيت افتح بنفس المكان .. ورى اسبوعين بالضبط شفته يم ابو الكشك مال جكاير و جرايد القريب من مكاني الي اوكف بي العربانه … طلع متفق وي ابو الكشك يفتحون هو وياه سوى .. و طبعا اكو فسحة صغيرونه ورى الكشك هو كام يسوي بيها الداطلي و يعرض شغله مقابيل الكشك .. بصراحة اني مضجت بالعكس دعيتله الله يوفقه .. و بقيت اني اطلع رزقي و هو يطلع رزقه .. بس الي متوقعته هو يحاربني برزقي وهو جان شريكي … كام يدز عليا اهل البلدية يطردوني من مكاني … و طبعا هو ميطردوه لان ابو الكشك مكانه رسمي .. وخرت من المكان و كلت الرزق على الله بس حرامات هالمكان جان زين اليي .. لان قريب عالباب مال الكراج و الطالع و الطاب للكراج يشوفني … رحت بغير مكان و شغلي بالبداية قل و بعدين الحمدلله تحسن … و طبعا الولد بعد محاجيته ابد مع العلم هو ابن منطقتي و صديقي … هو الله وفقه و ورى فترة شفته مسوي بنفس الكشك تطويرات .. جايب خلاطات مال شربت و طبعا ابو الكشك (شريكه) هم عايف بيع الجكاير و الجرايد و كام يساعده بهل السالفة … و مسوي نشرات ضوئية عالكشك و جايب مسجل و اغاني مشغل .. يعني مرتب نفسه و عليه ناس كومه واكفين … اني طبعا بمرور السنين عرفت هو الي دز عليا اهل البلديه (صح اني حسيت بوقتها بس كلت مستحيل يسوويها فلان) … ليش مستحيل لان صديقي .. لان ابن منطقتي .. بس للأسف هذا الي صار .. وفوكاها من يشوفني مرات صدفه يدير وجهه بصفحة ثانيه هههههه يعني فوك الحكه دكه … فوك ما ضرني هو الزعلان ..
عالعموم السالفة بيها رباط .. هالشي مر عليه سنين واني هسه شغلي بعيد كل البعد عن الداطلي و عايش يومي بخير و طبعا اعتبر من اصحاب الدخل المحدود .. بس هاي ولدي الحمدلله و الشكر هم يشتغلون و هم اني اشتغل و هاي عايشين على الله .. و طبعا ذاك شريكي او الي جان شريكي ماعرف اخباره و شصار وياه .. بس الي صار وياي اني متاكد مليون بالميه صاير وي غيري هواي بس بطرق ثانية .. الرباط مال السالفة .. اني كلت ما اتوقع شريكي و صديقي و ابن منطقتي يسوي بيا هيج لعدة اسباب .. لان هو مني و بيا .. بس سواها .. زين تعالو اليوم نشوف الي جوي من الخارج و جانو مرتاحين عالتبريد و عالبخيخ .. جانو ياخذون رواتب و همه لاجئين سياسين يحاربون حزب البعث … اجوي و كلنه يا الله ذوله منا و بينا و شافو ظلم حزب البعث مثلنه و جاعو مثلنه و فوكاها تشردو برى العراق و انحكمو غيابي لان معارضين .. ذوله الي حسبناهم ابطال .. ذوله الي حسبناهم خوش زلم و راح يخلونه فوك النخل و يسوون العراق باريس .. ذولة الي جانت دعايتهم اذا اخذنا الحكم راح نوزع النفطات عالشعب .. ذولة الي كالو الكهرباء راح نصدرها مو بس ٢٤ ساعة … ليش .. ليش دتحاربونه برزقنه و هسه صعدتو السوك .. احنا من ذاك الوكت نلزك حياتنه تلزيك .. و هسه على حطتنه متغير شي .. هم كاعدين نلزكها ابو مولدة على انترنت على ايجار على علاج على على على على على .. ليش .. يعني اني بذاك الزمن اشتغل بالداطلي و بهل الزمن اشتغل بأفران بس لان كبرت خلوني عالميز احاسب الناس .. و كل ذاك الوكت جنت مكابل باب الفرن و النار بوجهي .. و كل حلمي جان اعيش شوية احسن من الي عشته .. ما اكول اني هسه جوعان الحمدلله و الشكر مطلع رزقي و رزق البيت و ولدي هم سباع يساعدوني .. بس ليش .. شبقى بالعمر حتى اعيشه بخوف من باجر وهاي اذا اجه باجر .. يعني ما مكفيكم بيوتكم و قصوركم و رواتبكم و هسه جايين تصعدون اسعار السوك .. ليش .. شفرقتو انتو عن نظام البعث و عن وقت الحصار .. انتو حالكم حال شريكي .. بس شوية صار عنده ظهر اول شي استفحل عليه شريكه .. بالبداية جيتو تبوسون قنادر (مكرم القارئ) حتى بس ننتخبكم .. و بس صار عدكم ظهر و منصب .. استفحلتو عالشعب ..
اني بس اريد افتهم هالبلد شوكت راح تصيرله جاره و يعيش حاله حال الدول؟؟؟
عمت عين سنين عمري الخلصت ازمه ورى ازمه ..
(ابو الداطلي)
انتهى
اخوكم ابو بغداد سايق التكسي
#ابوـبغداد