قصص عراقية حقيقية بقلم ابو بغداد سائق التكسي

فرقتنا الطائفية

جانت دائما عيوني تاخذني عالسكف مال الغرفة .. سكف غرفتي النايم بيها اني و اخوية ماعرف شبي عبالك يضحك عليا .. سكف طالعه منه حديدة (شيلمانه) مال بناء .. و واكع منه الصبغ مثل المكشر .. و مرات بالصيف من البنكه تفتر سريع الكشور مال الصبغ توكع بالغرفة و امي تكنسها .. اكثر من مرة اصبغ السكف و هم ترجع نفس الحالة .. فترة و يرجع يكشر .. كالو رطوبة بالسكف … يجوز رطوبة يجوز عين على كولة امي .. امي المسكينة اي شي يصير عدنا بالبيت غلط لو نتمرض لو ينكسر شي لو نرسب لو أي شي تكول عين .. احنا محسودين .. بس دقيقة احنا ننحسد على شنو ؟؟
مرات جنت اسألها اكلها يمه على شنو يحسدونه هو احنا شعدنا .. اشو ابوية  موظف على كد حاله و اني و اخوية طلاب و نشتغل على شنو يحسدونا هو حتى البيت مو ملك ؟؟
تكول اكو ناس يحسدون على اللمه و على الخلفه .. يعني اني عندي ولد ثنين (انته واخوك) و همه ماعدهم ترى يحسدون .. و خطية ترى الي يحسد مو قصده بس يخوف الحسد … و تجيب و تطكطك بهل الحرمل .. امي طيبه و من اهل الله .. متعرف تقرا و تكتب و بسيطة كلش .. ابوية موظف بسيط بس مثقف لدرجة جبيرة .. بكلشي ابوية يعرف بكلشي .. وعنده هواية يقرأ كتب .. تاريخية و دينية عن الاسلام و عن المسيح  و حتى كتب عن الالحاد و عن الماركسية عنده .. عنده صندوك خشب جبير .. تارسه كتب و مجلات .. قديمات كلش و بيهم جدد … الكتب الي يقراهم و يكملهم يوديهم للصندوك يضمهم .. و الباقيات (الجدد) يخليهم يمه يقرا بيهم بوقت فراغة … ابوية (الله يرحمه و يرحم والديكم) جان موسوعة لكلشي .. تعلمت منه هواي شغلات و الحلو بي مجان يغصبنا على شي لا اني ولا اخوية … من بدينا نكبر شوية اني واخوية .. شفت نفسي اريد اكمل دراسة و حبيت اكمل .. بس اخوية مراد يكمل و ابوية مغصبه بس كاله ترى اذا تبطل تلبس جيش .. اخوية مهتم .. و بقى يشتغل و عاف الدراسة .. اني استمريت بالدراسة و بصراحة اخوية جان الى فضل جبير عليا من بعد ابوية … اخوية جان يشتغل و يساعدني بسالفة اللبس و حتى المصرف مع العلم هو اصغر مني واني الجبير … اخوية بعد وفاة والدي صرنا اني وياه هواي نداري امي لان امي كلش حساسة و تأذت هواي ورى وفاة والدي … اني من دخلت كلية شوية امور تغير بحياتي والسبب هو المحيط الي داير مداير صار مفتوح بعكس ذيج الايام الي جنت بيها بالمتوسطة لو الاعدادية الي بمنطقتي .. صارات علاقاتي هواي .. بس اغلب الي تعرفت عليهم شباب نكدر نكول عليهم او نسميهم منفتحين بالنقاش .. كمت احجي و اناقش بلسان مفتوح و اصلا اني ماخذ معلومات هواي من ابوية الله يرحمه … صار عندي توجه علماني .. كمت احجي و مو بس بداخل الكلية .. حتى بمنطقتنا من اكعد وي جماعتي احجي بالشي الي اني مقتنع بي … اخوية جان ميعجبه هالشي و دائما يحذرني يكلي يابه الزم لسانك ترى الناس تحجي و حتى مطلعين عليك لقب بالمنطقة .. كلتله شنو بله شملقبيني ؟؟
يكول مسميك الملحد .. اني ضحكت مع العلم اني مو ملحد بس اني احجي بكلشي و اذا اكو اخطاء اسولف بيها عادي من باب التوعية … و جنت حتى على سوالف العشاير هم احجي مال الفصل و هالسوالف جنت ضدها .. ما اتقبلها اشوفها ظلم …
المهم .. بالكلية تعرفت على بنية حبابة و مودبة و مثقفة جدا .. و نقاشها جان يشد الكل .. مرات جنت ادخل وياها بنقاش حاد على مواضيع معينة و جنت احاول بس احجي وياها … هي جانت تسألني على شغلات تريد تعرف اني ليا درجة واصل بالدراسة و بالمعلومات التاريخية .. جنت اجاوبها و لا مرة جاوبتها شي غلط … شفت بعيونها نظرة اعجاب اليا مع العلم اني هم جنت معجب بيها بس ماكدر اروح اكلها لان اني من النوع الكلش خجول و اخاف كلش على شي اسمه (كبرياء) بداخلي .. يعني اخاف ترفضني و نظرتي بنفسي تنهز … بس هي الي كامت تدور عليا حتى نسولف و نحجي و نضحك .. يوم ورى يوم البنية صارت جزء من حياتي .. تقربت منها لدرجة جبيرة و صار بيني و بينها اتصالات بالبداية و حجي و جنا نتناقش بسوالف هواي لحد ما اجى اليوم و اعترفت بحبي الها … هي مصدتني و لا رفضتني و جان ذاك اليوم احلى يوم بحياتي … و بدينا صفحة جديدة من العلاقة و كمنا نرتب للمستقبل و طبعا هي من عائلة هم محدودة الدخل مكونة من ٣ ولد و بنات ثنين و اب وام …و كمنا نطلع سوى و مرتين تعاركت بالكلية من وراها بسبب الطلبة الي يداومون جدد بالكلية ميعرفون انو هي شبه خطيبتي و يحاولون يتقربون منها .. هي جانت تحبني من اتعصب بس كلش تخاف عليا من العركات ..
و مره بجت لان ردت اروح اضرب واحد رايح يريد ينطيها رقمه و باست ايدي بس اعوفه لان تصير مشاكل وتخاف عليا … حبيتها و حسيتها بنتي .. بذاك الوكت قبل ما ابوية يتوفى .. جانت عدنا قطعة كاع ابوية مستملها مال الوظيفة يعني .. موزعين عليهم كياعين .. الكاع قبل جان سعرها فلس ونص .. بس الشارع الي بي قطعة الكاع صار تجاري و حيوي كلش بمرور الزمن … سعر الكاع صار كلش كلش غالي .. طبعا ابوية الله يرحمه و يرحم والديكم جان مقرر يبنيها .. بس من شفنه سعرها هيج صعد و الشارع صار كله محلات و اسواق امي كالت ليش منبيعها و نشتري البيت الكاعدين بي و نعمره براحتنا … لان البيت سعره مناسب و منطقتنا هاي متعلمين عليها … بعنا الكاع و اشترينا البيت و عمرناه و هم بقت عدنا فلوس … بالفلوس الي بقت اخوية قرر يفتح محل مال ميزانية و بلنص و فيتره هم و بنجرجي .. محل مرتب يعني .. و ابوية قبل و فتح المحل و جاب اصدقاءه ثنين يشتغلون وياه .. و لأن اخويه عنده خبره المحل صار معروف بالمنطقة و شغله ميوكف … الوضع المادي مالتنا انكلب و اضافه لهل الشي اني اشتغلت محاسب بمجمع مال ملابس بالكرادة … محل مال ولد صديقي بالكلية هو عرض عليا الشغل و اني مكلت لا .. قبلت .. و الامور مشت و بقت علاقتي بحبيبتي … جانت تجي مرات هي واهلها للكرادة يتسوكون .. جنت اروح بس امشي وراهم اخاف لا احد يصجمها وطبعا هي تنطيني الاحداثيات بالتلفون … اختها الاصغر منها تدري بعلاقتي بيها بس امها متعرف … جنت امشي وراهم و من يوكفون يريدون يشترون شي ابقى واكف يم محل بحجة اباوع عالغراض هههههه … و مشت الايام و قررت اخطبها و فاتحت اهلي بالموضوع .. وهي هم فاتحت اهلها بس اهلها كالو انتظري لحد متتخرجون ثنينكم .. لان هو بعده ماعنده وظيفة ثابته … و اني هم كلت ماشي .. بس هالحجي مثل مكلت بس اختها تعرفني معرفه شخصية بس اهلها مشايفيني ولا يعرفوني مجرد يعرفون اني اريد اخطب بنتهم و هي حجتلهم روس اقلام عني … الحاصل بذيج الفترة جانت ستوها احداث الطائفية مشتغلة … اني جنت مالي شغل بأي شي .. يعني لا وي ذول و لا وي ذولاك .. اني ما اتدخل لان اعرف هالشي ممختاري الطائفتين و كل واحد انولد مختار يطلع س او ش …
انولد لكه اهله هيج هو صار مثلهم .. و طبعا هالتفكير مو تفكيري وحدي .. تفكير هواي ناس و منهم حبيبتي لان هي من طائفة واني من طائفة … و بيوم من الايام خابرتني حبيبتي تبجي و صوت صياح بالبيت و بجي .. كالت اخوتي خطفوهم و كتلوهم و السالفة طائفية علمود احنا من فلان طائفة .. كلتلها يمعودة شتحجين كالت اي والله و بوقتها جانت منطقتهم مقسومة نصين .. و سألت اني بوقتها طلعت صدك السالفة طائفية بسبب اسماء اخوتها و طائفتهم … اني جانت صدمة اليا السالفة و البنية تمرضت بقت بالفراش تقريبا شهرين و ابوها من ورى الصدمة ٣ اشهر معبرت عن السالفة هو هم توفى بسبب القهر … البنية تغيرت معاملتها وياي … و حسيت بهل الشي .. جنت اخابرها دائما حزينة و كامت تحجي بالمسميات الطائفية هواي و تسب .. اني جنت اسكت ما احجي شي لان اعرف مصيبتها … اخر شي كلتلها اكلج انتي خو مدتحمليني ذنب بلي صار .. لان داحس مثل الضايجة مني .. كالت لا بس شغلتنا انسدت .. كلتلها شنو انسدت يمعودة .. كالت ماعرف بس مترهم بعد .. كلتلها يعني لان اني من فلان طائفة الي اني اصلا مختاريتها اتحمل ذنب شي جهله و قتله سوى و اعوف حب عمري .. كامت تبجي هي كالت باع امي هي الوحيدة البقت عندي وامي مراح اكلك عنصرية ولا اني عنصرية وطائفية بس مترهم الله يخليك ماريد احجي ازيد .. وسدت التلفون .. البنية حسيت بوجعها وهي مرادت تكول امي متقبل بيك بعد لان من فلان طائفة …. و رجعت اتصل بالاخير انفجرت عليا جان تكول احنا بيتنا انهجم من وراكم … و تبجي بصوت عالي بالتلفون … كلتلها من ورانه شنو انتي اقرب وحدة اليا بهل الدنيا وتعرفين اني مالي دخل بهل السوالف .. جان تكول احبك بس عوفني خلص انساني الله يخليك … و تعاوفنه الطائفية فرقتنا … و خلصت كلية اني و طبعا هي عافت الكلية و بطلت … بس بقى أمل بداخلي ان تتغير الظروف بمرور الوكت و بقيت عايش بأمل اتزوجها .. تخرجت و توظفت و مرت سنين واني متزوجت لان هي عايشة براسي ..
بس الشي الصار سببلي مثل المرض اسمه (اتخبل و اتعصب من واحد يحجي وياي بأمور بيها طائفية) و توصل لحد الصياح .. و سنه ورى سنه انتهت مرحلة الطائفية واني جنت دائما ادور على اخبارها بس اخر مره عرفت همه شالو من بيتهم بس معرفت وين سكنو .. ناس تكول بفلان منطقة وناس تكول بفلان منطقة حتى جوارينهم ميعرفون لان همه ماحجو وكالو وين … جنت مرات مثلا طالع وي اصدقائي بمكان اشوف وحدة مثل طولها لو مثل ظهرها بالضبط اعوف جماعتي والحكها و من اتقرب عليها تطلع مو هي .. هالسالفة صارت اكثر من مرة وياي .. حتى بالفيس بوك دورت هواي على اسمها ملكيته … حتى على اسم اخوها و اختها دورت هم ملكيتهم .. حتى مرات ادور بالاعجابات مال الصفحات بالصور اكول بلكي اشوفها و هم ملكيتها … اختفت و اخر شي عن طريق طالبه بالكلية وياي جان عدها علاقة بالبنية كالتلي هذولة سافرو يمعود ورى ما اخوتها انقتلو … لهناك كطعت الامل نهائيا … و قررت ان انسها بس ما انسى الطائفية الي سوت بي و بيها هيج … و تزوجت … بس سبحان الله اخذت بنية مو من طائفتي .. و عايشين بخير و سعادة و طبعا كلشي صار بحياتي حجيته لزوجتي …
قبل ما اتزوجها حجيت على موضوعي وي البنية الي جنت احبها … وهي تفهمت الموضوع و كالت الي صار وياك ردة فعل و اكيد جان عليها ضغط .. يعني امها عمامها اخوها و تريد الصدك مراح اكول حقها بس خلي نكون واقعيين اذا هي منفتحه و مثقفة و شافت هيج عائلتها صار بيها اكيد راح تنحاز لرأي الاغلبية .. يعني ميه بالميه امها تنام و تكعد تبجي و تحجي على فلان طائفة لان اخذو ولدها شلون تريد تكون ردة فعلها .. و بالمناسبه انت لا اول حاله و لا اخر حاله يصير وياها هيج شي .. يمعود اكو ناس اصلا بدون شي ميقبلون يزوجون بناتهم و لا ولدهم من غير طائفتهم .. بس عالعموم الله يوفقها و يسعدها و يوفقني اني وياك هم .. و الحمدلله على كل حال .. اني لليوم ماعرف مكان البنية بس اتمنالها كل الخير .. و لعنة الله على كل طائفي قاتل .. لعنة الله على الي بذيج الفترة زرعو الطائفية بعقول الناس و خلوهم يكتلون واحد الثاني .. مع الاسف .. شكد فرقت هالطائفية الناس .. و شكد فرقت احباب ..مع الاسف ..
(فرقتنا الطائفية)
انتهى
اخوكم ابو بغداد سايق التكسي
#ابوـبغداد