قصص عراقية حقيقية بقلم ابو بغداد سائق التكسي

(اصحاب المواهب)

جانت أمي تطلعني برى للحديقة و تكعد يمي … و تفوت كل شوية تراقب الاكل اذا تطبخ .. لو تغسل الكراج .. لو ترتب بالبيت بس كل شوية تطلع تباوع عليا … و جانت تخلي كل الملاعيب الي العب بيها قريبة مني .. يعني داير مدايري …. و مرات جانت تجي ركض تكول ها يمه صحتني .. تتخيل اني صحتها بس اني مصايحها اني من العب اطلع اصوات و اتفاعل وي الملاعيب الداير مدايري … و جانت مرات تغير مكاني .. يعني بالصيف جانت كل شوية تحولني من مكان لمكان .. تختار مكان بي فيي .. فيي ما بي شمس حتى لا احتر و جانت من تطلع تشوفني تسألني (حمام) يعني اذا محصور توديني للحمام (مكرم القارئ) .. وبالشتاء متطلعني برى للحديقة من المطر و اصلا الحديقة مبلله .. جانت توخر الغراض الي يم الشباك و تكعدني قريب من الشباك … اني بذاك الوقت مجنت احس اكو نقص عندي .. لان طفل و بعدني سالفة التفكير مجاية براسي .. بس من بديت اكبر عرفت اني عندي خلل بجسمي .. و خلل جبير … الخلل برجليناتي .. جنت اشوف الجهال يركضون و يمشون و يروحون و يجون بس اني رجليناتي جانو (امي و ابوية) .. بدونهم اني ما امشي و ما اتحرك اصلا .. ابوية و امي بكل شغلة يشيلوني .. حتى الحمام ماكدر اسوي وحدي .. و شوية شوية علموني على صديقتي و حبيبتي الي شايلتني و الي بدونها اني ما اسوى شي .. العربانة .. عربانتي حبيبتي .. تعلمت عليها و كمت اطلع اني للحديقة و بالبيت افتر و حتى بالكراج .. دخلوني مدرسة .. بس المدرسة مكانها مو بمنطقنه و تقريبا كلنه الي بالصف نفس الشي ..
كل واحد عنده حاله مختلفة عن غيره .. مرات من اشوف سلسلة افلام (اكس مين) الفلم الي يطلعون بي ناس عدهم مواهب واحد يطير و واحد يلعب بالثلج و واحد ينفخ نار و واحد يوقف الزمن …  اتذكر اول يوم دراسي الي .. ابد ما حسيت اني عندي اعاقة .. و لا حتى الداير مدايري عدهم اعاقه .. جنت احسهم موهوبين و هاي الي عدنا موهبة .. كل واحد بالصف عنده موهبة تختلف عن الثاني .. هيج جنت اشوف نفسي و احسس روحي براحة  و بوجود عربانتي حبيبتي كمت مرات اطلع برى يم باب الحوش اكعد بالعربانة اباوع عالناس.. جان يعجبني العب وي جهال المنطقة و اسوي علاقات برى .. بس اغلبهم جانت علاقتهم وقت قليل .. يعني اتذكر احمد و زيد .. جانو اخوان و بيتهم بصف بيتنا .. جنت كل ما اشوفهم اصيحهم يمي .. ابقى اطلع مواضيع من جوى الكاع حتى بس اسولف وياهم و ابقيهم يمي .. بس همه عدهم طاقة يريدون يلعبون طوبة لو ركيضان .. يعوفوني .. مرات جنت اتعارك وي روحي .. اكول اخاف مواضيعي تافهه و همه يضوجون منها .. و من افوت جوى ابقى بليل افكر شراح اطلع موضوع جديد حتى اسولف بي و يبقون كاعدين يمي و ميعوفوني و يروحون .. و حجيت هالحجي لطالب وياي بالمدرسة كالي حجاية محبيتها ابد .. و كلت هذا شكد متشائم … بس يوم ورى يوم حجاية صديقي كامت تطلع صح .. و عرفت اني هالموهبة الي عندي مو كل الجهال يحبوها .. و بديت اتأقلم وي الوضع .. طبعا احمد و زيد جتهم ايام من يشوفوني كاعد ميسلمون حتى ما اصيحهم .. يريدون يلعبون و حقهم هذا الشي .. اني اصلا كمت ما اصيحهم .. مقابيل بيتنا اكو بيت شالو .. و جوي بمكانهم غير ناس .. اني جنت اعرف اهل المنطقة واحد واحد بالشكل بس .. يعني ماعرف اساميهم بس حافظ اشكالهم كلش زين .. من كعدو بالبيت وراها بفترة شفت امهم تطلع بره تكعد .. و هي تباوع عليا و اني اباوع عليها .. بس الي جان محيرني انو هالمرية ماعدها موهبة مثلي .. يعني ليش تكعد بره ؟؟؟
و هي من كثر متشوفني بره كامت تسلم عليا .. فد يوم بليل كلت باجر اذا اشوفها اروح يمها .. لان صار عندي فضول اتعرف عليها .. و رحت يمها .. سلمت عليها شلونج خاله .. كالت هلا يمه .. كلتلها خير خاله ليش دائما تكعدين بره .. كالت يمه ماكو شي اني احب اكعد هنا مثلك .. كلتلها زين .. و سولفنا عالمنطقة و هي كالتلي اسم منطقتها القديمة و عرفت انو هي عدها ٤ ولد متزوجين و بنات ثنين هم متزوجات .. و رجلها ميت .. و حسيت انو هي تطلع بره تكعد من ضوجتها .. لان اني من كمت اروح اكعد يمها اسمع صياح دائما بالبيت .. و طلعت عدها اكثر من موهبة .. سكر و ضغط و قلب و تصلب بالشرايين و ضاربتها جلطه .. و كله من ورى مشاكل البيت و نسوان ولدها بيناتهم .. من صار بينا حجي هواي .. هي كامت ترتاحلي كلش و اني جنت احجيلها كل الاشياء الي جنت اتمنى احجيهم لزيد و احمد .. بس هي جنت اشوف الضحكه بعينها و تضحك هواي وياي .. حبيتها كلش و امي جانت كلش مكيفه بعلاقتي بخاله ام نجم .. لان كمت يوميا اروح يمها .. و كامت تحجيلي قصص عنها بطفولتها و شلون حبت عمو ابو نجم الله يرحمه .. و شلون اول مرة تعلمت تخبز بالتنور الطين .. جانت تحب سوالفي واني احب سوالفها .. جنت احجيلها على الاشياء الي تصير بمدرستي و حتى احجيلها على مواهب الطلبة الي وياي .. ومن جنت اكلها كلمة موهبة تكلي صدك هاي موهبة الله رازقك بيها .. نفسيتي كلش تعدلت بوجودها .. بس خاله ام نجم لان حبيتها و لان جانت احلى شي يصير بيومي (ماتت) .. ماتت من قهرها بسبب ولدها و مشاكلهم و نسوان ولدها .. اني بيوم الي عرفت ماتت و جان واضح هالشي لان نصبو جادر و اسمها عالقطعه .. بجيت .. و عرفت راح ارجع وحدي مثل قبل .. و رجعت .. كمت احس روحي مثل الشجرة الي تمر عليها فصول السنة و هي بمكانها .. تمر سنة ورى سنة يتغير شكلي .. شعري يتغير .. تنبت لحية و شوارب بوجهي .. و اني بمكاني .. و كبرت شوية .. ابوية و امي هم كبرو .. حاولت اقنع ابوية ان افتح اسواق غذائية و اني اكعد بيها .. و أشغل شخص وياي هو الي يخلي الغراض و اني شغلتي بس ابيع يعني .. الحلو ببيتنا على شارع عام من شارعين .. يعني شارع سايدين .. ابوية جاب عمال و خلفة مال بناء ..
و سوينا محل جبير بالحديقة .. اني بذاك الوكت عمري جان عشرينات .. جبت تلفزيون للمحل و حتى مبردة و ثلاجة و مجمده .. و غراض كومة و ولد اشتغل وياي .. رتبنا المحل و بديت اشتغل .. و جنت هم اكعد بره .. بذاك الوكت جان اكو ابتدائية بنهاية شارعنا .. الابتدائية كلبوها اعدادية و متوسطة للبنات .. جان طريق البنات من يم محلي .. يجون دائما يشترون شغلات .. اني جنت اخجل من الحجي وياهم و اخلي فارس الي يشتغل وياي هو يجاوبهم و هو يحجي وياهم .. فارس مرة سالني ليش تستحي بله اني مموجود وجوي البنات يشترون .. كلتله ماعرف اني استحي .. بوقتها جنت بفترة مراهقة و جنت اتابع افلام اجنبية بالتلفزيون و حتى افلام مصرية بيها حب .. بكل فلم جنت اشوفة اكول هم راح اعيش هيج شي .. بس جنت اكول مستحيل .. لان هنا بالفلم الممثل طلع وي الممثله للسينما و راحو يتمشون و هنا بهل الفلم الممثل و الممثله يركضون .. جنت انقهر لان موهبتي متركضني و لا تمشيني .. و جنت انسى سالفة الحب ..
بيوم من الايام ابوية تمرض .. و يوم ورى يوم كام يتعب .. فارس هو و امي جانو يودو من دكتور لدكتور .. جانو الدكاتره يكولون ما بي شي بس هو يكول اني مو طبيعي مو مثل قبل .. و توفى … ابوية توفى و اني صرت رجال البيت .. و الحمدلله المحل و راتب ابوية و عدنا بيت مأجريه جان معيشنا احسن عيشه و ازيد هم .. امي كالت اريد ازوجك .. كلتلها يمه شتزوجيني اني ما اريد اتزوج كالت قبل ابوك جان موجود و هسه ابوك راح و اني هم راح اروح ميصير تبقى وحدك .. كلتلها ماشي يله زوجيني منو تقبل بيا و اني بهل الموهبة ؟؟
كالت هواي يقبلون قابل انته شناقصك  .. كلتلها اني مناقصني شي بس ماكدر امشي يمه .. كالت كومه غيرك ميكدرون يمشون و متزوجين و عدهم جهال و انته سمعت بأذنك الدكتور اكثر من مرة سالته تكدر تتزوج انته كالك اي بس اكو علاج لازم تاخذه بس تتزوج يعني من نلكيلك بنت الحلال تاخذ علاجك و تتزوج و خلص بس انته متريد … كلتلها ماشي .. و كامت تدورلي مرية  .. و لكتلي بنية .. البنية كرايبي .. سالت امي كلتلها شبيها مطلكة لو ارملة لو شبيها .. كالت يمه كل شي ما بيها .. كلتلها لعد مغصوبة لان حلها و ربطها بيد ابوها اكيد .. كالت لا وكامت تحلف ..
كلتلها اني ما اتزوج اذا ما اكعد وي البنيه .. و رحنا لبيت اهل البنية و كعدت وياها و لان كرايبنا من بعيد خلونا وحدنا نسولف .. كلتلها شوفي اني هذا وضعي .. انتي قابلة حسب ما امي كالت و اهلج قابلين .. بس اريد اعرف انتي مغصوبة و ابوج كالج تاخذي لان كرايبنا لو انتي راضية .. كالت ليش تكول هيج هو انته شبيك و شناقصك .. كلتلها يعني مولود بموهبة .. كالت شنو موهبة .. كلتلها عوفج من هالكلمة لان قصة طويلة قصدي مولود و اني ما اكدر امشي .. كالت اي شكو بيها .. كيفت اني و تزوجنا .. البنية فقيره لابعد الحدود .. طبعا هالبنية عبالك جائزة جانت بالنسبة اليا .. شلون واحد داخل سباق بحياته بس سباق متعب كلش و موذي كلش و بالنهاية ياخذ جائزة تنسي التعب و الارهاق .. بالضبط هيج .. طبعا من جنت احجيلها شلون جنت اتمنى احمد و زيد يوكفون يمي تبجي عليا خطية .. تكلي ياريت جنت اعرفك بذاك الوكت جان بقيت يمك والله .. و جنت احجيلها على ام نجم و على كعدتي يم باب الحوش لوقت طويل وحدي .. جانت تبوسني و تسكتني تكلي انسى انسى .. هسه اني وياك اني رجلك و ايدك و روحك .. و صدك نستني كل الدنيا .. هلكد ما ارتاحيت وياها بحياتي كمت ما اروح للمحل .. عفت المحل لفارس و فارس والله اخ و صديق و لا احسبه يشتغل وياي .. و الله رزقني بساره و نبأ .. بنات ثنين عندي صارو .. اني هسه مرتاح بحياتي و ما اكول الشي الي بيا و انولدت بي ما تعبني .. بس لليوم اكول موهبة .. و امنيتي تتبدل كلمة اعاقة لكلمة موهبة .. لان جنت اكثر كلمة تخليني اختنك هي كلمة اعاقة .. و اتمنى الصحه و السلامة للكل و خصوصا لاصحاب المواهب مثلي و اكلهم نهايتها خير ..
(اصحاب المواهب)
انتهى
اخوكم ابو بغداد سايق التكسي
#ابوـبغداد
روابط صفحات قصص ابو بغداد سايق التكسي

صفحة التيك توك  للقصص القصيرة …
https://vm.tiktok.com/ZMeLYRHDw
صفحة الانستغرام للقصص المصورة و القصص القديمة  …
https://www.instagram.com/iraq.txei/
صفحة اليتيوب للقصص المسموعة لذوي الهمم و للاخوة و الاخوات الي نظرهم قليل …
https://www.youtube.com/channel/UCER9QkmohGeDKgFFQ8WNAxA

و صفحة السناب بالصورة الشخصية للصفحة و شكرا لكم ..