قصص عراقية حقيقية بقلم ابو بغداد سائق التكسي

الموعد

بالمنطقة مجان عدنا معارف هواي ولا حتى عدنا اختلاط وي الجوارين … يعني على كد السلام و عليكم السلام .. حتى جوارينه الي حايط عالحايط منعرفهم زين .. أبوية جان رافض سالفة الاختلاط وي ألجوارين يكول الاختلاط يجيب مشاكل .. البيت الي بصفنا عدهم ولد وبنية بس .. بنتهم تداوم وياي بنفس المتوسطة جانت .. مره مرتين سلمت عليها و كمنا نرجع سوى للبيت .. يعني نمشي اني وياها سوى .. حتى مره رادت تجيني مقبلت و حجيتلها انو ابوية ميحب الاختلاط .. هي تفهمت الموضوع و بقينا نلتقي بس بالدوام و بطريق الرجعه .. مسافة الرجعه للبيت هي المسافة الي جنا نحجي بيها اني وياها و نحاول نسولف على كل شي .. اني كلتلها اسماء خواتي كلهم و حجيتلها اشياء هواي عنا و عن عائلتنا .. وهي هم حجتلي كلشي .. عدها اخ واحد اسمه تحسين .. و هي اسمها رفل .. اخوها رسام و خطاط جان يداوم بأكادمية فنون الجميلة و بطل منها علمود يشتغل .. و هسه يشتغل بمكتب مال خطاط بمنطقتنا .. رفل جانت من النوع الي تحجي كلشي بسرعه .. كالت اخوية هسه هارب من الجيش و ينام بالمحل مال الخطاط هههههه أني بوقتها مجان عندي معرفة بهل السوالف .. لان ماعندي اخ و ماعرف سالفة الجيش .. وحتى كرايبنه علاقتنه بيهم جانت سطحيه .. بيومها سألت ابوية كلتله بابا احجيلي عالجيش .. لان هو رجال ويعرف .. وافتهمت منه انو الي يهرب من العسكرية يصيحوله فرار و اذا يلزموه ينحبس و يرجع يكمل عسكريته … طبعا الموضوع مجان مهم بالنسبة الي بس يعني اكدر اكول نوع من الفضول الي يصيب أي بشر اذا يسمع موضوع جديد عليه .. ثاني يوم التقيت برفل و كلتلها اخوج خلي يديرباله اذا يلزموه يحبسوه .. كالت اي اعرف وهو هم يعرف و ابوية اصلا منطي مهله يسلم يروحه هالشهر اذا ميسلم روحه ابوية نفسه يبلغ عليه لان كل شوية جايين علينا الحزبية للبيت يدورون عليه .. أني بوقتها اخوها تحسين مشايفته غير مرتين لو تلاثة .. بس لان عالمي صغير و ماعندي علاقات هواي وي الدنيا غير بس وي اهلي بالبيت و هالبنية و كم صديقة بالمتوسطة ماعندي ذيج العلاقة القوية وياهم .. شغل راسي هالولد و جمعت تفاصيل عنه هواي واني اصلا ما اعرفه و محاجيه وياه ولا مسلمه عليه ابد ..
المهم ..
وراها بأسبوع تقريبا ابوية عنده منقله مال مشاوي مخليها بالحديقة يشوي بيها بين فترة و فترة النا للبيت يعني … شوينا بيها و اكلنا و كملنه و دخلنه جوى .. اني جان عندي دفتر مال مراجعات اكتب بي الشغلات الي اراجع بيها .. و الدفتر هذا بي كلشي يعني مو لمادة وحدة بس .. بيومها من طلعت برى بالحديقة بقى بيدي اراجع بي لان عصرية و الشمس طالعه جانت ..
كمت سويت شغله وي أمي و عفته بالكاع .. نسيته برى بالحديقة .. بليل تذكرت هو برى كلت خلي اطلع اجيبه .. طلعت داجيبه جان اشوف رجال خاتل يم المبردة القديمة .. وراها خاتل .. اني عبالي حرامي ردت اصيح بس شفته تحسين اخو رفل اني اعرفه شايفته مرتين لو تلاثه  .. معرفت شسوي كبل رجعت للغرفة مالتي بس والله العظيم بيومها حسيت صوت دكات كلبي اسمعها .. كلبي راد يوكف .. قفلت باب المطبخ و فتت لغرفتي .. ردت احجي بيها لابويه بس المصيبة ابوية عنده سلاح .. واذا طلع بره وشافه اني متاكدة يكتله .. رحت صحت امي وحجيتلها .. امي هم خافت تكول لابوية .. و رحنا باوعنا من الشباك مال الصالة ملكينه شي .. امي كالت انتي متوهمة يجوز خفتي و حتى طلعت وياي للحديقة جبت دفتري  .. الظاهر هو من شافني انهزم .. و ثاني يوم حجيت هالشي لرفل .. كلتلها اخوج جان البارحة بحديقتنا .. كالت هو البارحة جان يمنا و جوي الحزبية و انهزم .. و راح اليوم من الغبشه لوحدته العسكرية راح يسلم روحه .. و انتهت السالفة و مرت ايام و علاقتي جانت يوم ورى يوم تقوى برفل .. و جنت اسألها دائما على اخوها تكول ابوية راحله زيارة لوحدته العسكرية هو هسه محبوس بس فترة و يطلع و يكمل عسكريته و يتسرح .. و امي قنعت ابوية بالكوه انو عادي بنات صديقاتي يجون يمي .. ابوية كال ماشي بس هي ممنوع تروح لاي وحدة (يقصد عليا) يعني صديقاتي يجون لبيتنا عادي بس اني ممنوع اروح لبيتهم … و قويت علاقتي ببنات وياي بالمتوسطة و رفل هم .. كامو يجون يمي بين فترة و فترة .. كام شوية شوية العالم مالتي يكبر بالتفاصيل الي اسمعها من صديقاتي ..
الي تحجيلي قصه عن كرايبها و الي تحجي موقف مر بي ابوها لو امها .. و كملت المتوسطة و فتت اعدادية .. فد يوم الاعدادية رادو تبرعات مو شرط فلوس .. يعني الي تكدر تجيب بردة لو مزهرية لو صورة لو صبغ .. أي شي المهم تبرعات .. رفل بوقتها كالت اني تبرعت راح اخلي اخوية تحسين يجي يكتب عالحياطين الخارجية (اقوال و هالسوالف) المديرة تختارهم .. كلتلها زين اني حتبرع بفلوس احسن .. و ورى هالسالفة بيومين خلصنا دوام وطلعنا .. رفل كالت تعالي شوفي شغل تحسين .. و رحت برى وياها شفناه واكف ديخط .. أني مسلمت عليه لان استحي .. هو سلم عليه (طبعا هالحجي هو سلم روحه و تسرح من الجيش) و ابتسم بوجهي كالي راح احجي شغلة حتى رفل متدري بيها .. والسالفة صارلها وكت طويل من راحت .. اني اشكرج لأن بيومها من جوي الحزبية و ختلت ببيتكم انو انتي مصيحتي من شفتيني … لأن لو مصيحه جان عرفو وشبعت كتل ههههه .. رفل كالتله والله هي كالتلي ومن جيت كتلك حلفت مو انته ههههه .. اني ضحكت بوكتها و كلتله مصار شي .. بس ماعرف ليش الولد بقى براسي .. يعني هاي اول مرة جانت احجي وياه مباشر .. صح اشوفه بس ممسلمه عليه ابد .. يعني اشوفه صدفة .. مثلا من اطلع وي اهلي لو من اروح للدوام .. بس ابد محاجيه وياه .. مع العلم عندي معلومات عنه كومه بسبب رفل .. و مشت ايام و جتي ايام  وفد يوم جتني رفل للبيت .. كالت اكو شغلة مهمة اريد اسألج بيها و اذا وافقتي و ماعندج اعتراض اهلي يجون .. كلتلها خير شكو ؟؟
كالت شوفي .. خلي ابدي من البداية .. اكو اشياء جذبت عليج بيها او مو جذبت جذبت .. بس مجبتلج طاريها قبل ..
كلتلها شنو بله ؟؟
كالت تحسين دائما يسألني عنج اسأله هواي .. و هالحجي قديم ترى .. و حتى جان يسأل اسأله عن انتي مصادقة لو ممصادقة .. تباعين عالولد من نروح للدوام لو متباوعين .. يعني بين قوسين يريد يعرف وضعج انتي شنو .. خوش بنية مو خوش بنية .. كلتلها دسكتي لج شنو هالحجي .. كالت دسمعي خلي اكمل .. المهم .. جان يسألني هواي عليج بس كل مره يحلفني ما اجيبلج طاري .. و دائما يتبع اخبارج .. بالبداية اول مره شافج بيها جان يسميج ام شوارب .. جنت اضحك هواي على هالتسميه .. حتى من تعرفت عليج بالمتوسطة جنت اركز على وجهج هههههههه بس انتي ماعندج شوارب ماعرف ليش هيج يسميج .. المهم هو يحبج و هسه يريد يتقدملج و يريد يعرف قبل كلشي انتي موافقة لو لا .. حتى اذا موافقة باجر امي تجيكم و بعد همه الكبار يرتبون …
اني بصراحة ماعندي مانع جان عالولد .. بس بقت يم اهلي يقبلون ميقبلون ماعرف .. وقبلت بوقتها وثاني يوم جتي امهم و حجت وي أمي و أمي كالتلها خلي ابلغ ابوها ونشوف .. و ابوية طبعا يعرفهم معرفة سطحية و سأل عنهم .. و اكيد ناس زينين و مجان عنده اي اعتراض … وبصراحة حسب مسمعت من أمي ابوية جان مكيف لان البيت لزك بالبيت .. يعني قريبة على اهلي .. و اتزوجت … الولد فقير و اعترفلي على شغلات ابد مجنت اعرفها هههه جان يراقبني هو دائما .. و حتى شوفني فوك عدهم بالطابق الثاني شباك .. هالشباك عالشارع العام ..
يكول مرات جنت من اسمع رفل تطلع كبل اكوم افتح البردة شوية و ابقى انتظر تجين و تروحون سوى .. و ضحكني على سالفة ام شوارب كلتله انته شلون هيج جنت مسميني .. كال ماعرف مرة شفتج و جانت الشمس ضاربه على وجهج تخيلت عندج شوارب ههههه .. و عشت وياه احلى وكت بعمري و خصوصا رفل هم صديقة عمري واكثر من اختي يمي  .. و كعدنا اني وياه بنفس البيت .. جنت يوميا اروح لبيت اهلي …
ماعرف شوصف عيشتي جانت احلى من الجمال الله …
الحاصل ..
هو جان يشكي من قلة الشغل بسالفة الخط و الرسم .. و هو اصلا قبل جان عنده واهس بالحلاقة قبل ميدخل فنون جميلة .. ومشتغل فترة عامل بحلاقة .. كال راح ارجع للحلاقة لان تقريبا الشغل شبه ميت .. و رجع فترة يشتغل وي صديقه حلاق لحد مضبط نفسه و فتح محل حلاقة عالشارع العام مال منطقتنا .. الحمدلله اموره كلش تحسنت و اشترى سيارة .. و طبعا هالحجي صارت احداث الفين وتلاثة .. احنا تأخرت عدنا سالفة الحمل .. الله مرزقنا بطفل .. و عادي جنا نكول نعوفها على الله .. ورى الفين وتلاثة صار السفر سهل .. قررنا نروح لعمان اكو دكتوره اسمها ابتسام وصفوها النا .. هي عراقية بس عايشه هناك .. طبعا الخلل جان من عندي .. رحنا لعمان وسويت عملية هناك … رجعنا و سبحان الله صار عندي حمل .. طار من الفرحه تحسين و اني هم كيفت ..
و حملي جان طبيعي و كل ما اراجع الدكتورة المختصة هنا ببغداد جانت تكول كلشي طبيعي … و فد يوم جان عندي موعد وي الدكتورة .. اتصلت بتحسين جان بالحلاقة .. كلتله حبيبي مو تنسى .. كاله مخبله انتي شلون انسى بس بعد وكت .. عندي شباب ثنين بس ازينهم و اجيج طاير .. و لا تاكلين شي حبيبتي ناكل برى عود .. كلتله زين حبيبي و سديت التلفون .. صارت وكت الموعد وتحسين ماكو .. ادك عليه يدك و ميجاوب .. ادك ادك ماكو .. نزلت من الدرج شفت عمي كاعد و رفل و عمتي جانو بالمطبخ .. كلته عمو تحسين دادك عليه ماكو .. كال صدك انتو مو عدكم موعد دكتورة .. كلتله اي .. كال هسه اتصل بي .. اتصل بي هم ميرد .. ورى شوية رجع اتصل رقم تحسين على عمو .. جاوب عمو .. الو منو انته وين تحسين ..
عرفت اني انو المتصل مو تحسين بس الرقم مال تحسين .. و سكت عمي بس يكول أي أي أي و الله العظيم والله العظيم .. عمي لونه انكلب ازرك و عرفت اني صاير شي .. و جان يكول هسه ارجع و كلنا التمينا داير مدايرة .. طبعا اختنك هو .. و مسيطر على روحه جان يبجي .. حضنا كلنا و كام يبجي .. واحنا ننلطم بوجوهنا احجي شكو .. الي اتصل على عمي ابو محل بصف الحلاقة .. بذيج الفترة الارهابية كامو يقتلون بالدلالين و الحلاقين .. و فايتين عالحلاقة مالت تحسين قاتلي هو و الحلاق الثاني الي يشتغل وياه .. ما اريد اكول شصار بينا بذيج اللحظة .. من كثر مضربت وجهي و جريته بأظافيري .. خدودي صارو مخططات .. و رفل حايرة بأمها لان تخربطت و اهلي جوي عالصياح .. اني محسيت بروحي هم تخربطت .. و راح تحسين … كمت احجي وي روحي بوقتها اهلي عبالهم تخبلت .. جنت اكلهم هسه يجي نروح للدكتورة و ناكل برى .. و كل ميجيبولي اكل اكلهم بابا ماريد تحسين كالي لا تاكلين راح ناكل برى ورى الموعد … و بقيت على هالحال لحد ما شدولي مغذي و خفت عالطفل الي ببطني .. لان بس هو بقالي من تحسين .. و اجه ابني .. وسميته عمار مثل ما تحسين راد .. بس عمار اجه وابوه ماكو .. مكملت فرحتي على خير .. والله العظيم جنت هلكد محاسة بسعادة عرفت راح يصير شي .. وصار .. و مشت سنين و هسه عمار كبر .. وبعدنا بيت بصف بيت .. و عايشه هسه الحمدلله .. بس عندي خوفه على عمار .. حتى هو كام يضوج من هالشي يكلي اني مو صغير .. ما اخلي هواي يطلع و من يتأخر برى ابقى اتصل بي لحد ميرجع .. حبيبي هو من ريحة ابوه .. والحمدلله على كل حال ..
انتهى
(الموعد)
اخوكم ابو بغداد سايق التكسي
#ابوـبغداد