قصص عراقية حقيقية بقلم ابو بغداد سائق التكسي

كلنا بشر

والدي من ذوي الدخل المحدود جان .. يعني كاسب .. بالدراسة ميعرف شي …. بس بالدنيا اعتبره ماخذ شهادة بالحياة و بأعلى درجات .. رجال فقير و الناس تحلف براسه .. و مرزوق خطية .. جان يشتغل عدة شغلات بس بالاخير ثبت على تصليح السيارات و تحديدا الكهربائيات مال سيارة .. لان فترة اشتغل يم كهربائي و تعلم الصنعه منه .. ابوية جان حلمه ياخذ محل وحده و يشتغل بي .. و كدر يداين منا و منا و رتبها و اخذ محل بحي صناعي .. بداخل الحي الصناعي اكو هواي محلات .. و تقريبا اكو ثمن محلات مطشرات منا و منا بداخل الحي الصناعي كلهم ملك لشخص واحد .. هالشخص رجال جبير كلش و يجي دائما يكعد يم ابوية .. يعوف محلاته و يجي يم ابوية ماعرف ليش .. اني هالرجال جان اسمه غريب عليا .. ما اعرف احفظه .. اسمه مو مثل اسامينه .. هو تورنجي قديم ببغداد كلش و الناس حتى محافظات يجون على اسمه .. صح هو كبر و بطل يشتغل بس العمال بمحلاته كلهم شاربين الصنعه شرب منه ..

عالعموم .. اني جان ابوية ياخذني وياه علمود اتعلم الشغل و جنت بنفس الوقت اداوم ابتدائيه .. جنت اوكف بصف ابوية من يشتغل اباوع على ايديناته شلون يشتغل و اتعلم .. الرجال الجبير جان دائما يكول لأبوية لا تجيبه للشغل خلي يكمل دراسه لان ابنك اذا بطل من الدراسة و بقى بهل المكان مراح يتقدم ابد .. اني جنت اسمع هالكلام بس ما احجي و لا انطي رأيي .. لان صغير جاهل شمعرفني شنو قصده .. و بديت اكبر و اتعلم بالشغل اكثر و اكثر .. و شوية صار عندي ميول انو ابطل من المدرسة … و طبعا هالرجال بعده يجي يم ابوية و بديت شوية احجي وياه و نسولف .. الرجال كام يحبني مثل حبه لأبوية .. و جان يشوف بيا ذكاء ابوية نفسه مشايفه .. و دائما يسألني على دراستي .. اكله زين .. و بيوم الي قررت ابطل ابوية حجاله لصديقه و صديقه اخذني لمحله كالي اريد احجي وياك وحدنه بدون ابوك .. و رحت وياه لمحله .. كالي ابني اني اعرف وضعكم المادي مو زين و ابوك ديحاول بكل امكانيته يعيشكم عيشه زينه .. و اعرف انته تريد تساعد ابوك بس صدكني مراح تساعده بوكفتك بالمحل وبس .. التعليم هو الي راح يساعد ابوك و يساعدك و يساعد امك واخوتك .. اني مستعد اساعدك بكل المصاريف و اساعد ابوك بكلشي بس ابقى ادرس .. و هالحجي بيني وبينك لان ابوك مستحيل يقبل مساعدة لا مني ولا من غيري .. كلتله عمو طريق الدراسة طويل .. كالي ميخالف ابقى كمل واني وياك .. اساعدك و تعال بوقت فراغك ساعد ابوك .. ما بيها شي اهم شي متبطل .. وصدك والله اقتنعت و بقيت بالدراسة بس مقبلت مساعدة ماليه .. كلتله اني اشتغل و اطلع مصرفي من اجي يم ابوية .. كال زين بس كام مرات يجيبلي هدايا مثلا ملابس .. ترانشوز جديد .. قمصله حلوة .. تراكسود رياضي .. و بدت تمشي السنين و دخلت اعدادية و صدك جنت اجيب درجات كلش زينه .. و صار شي خربط حياتي مع الاسف .. القدر اختار ابوية .. من بين تسع اشخاص كاعدين يساعدون ابو محل يرفعوله غراض و من ضمن الغراض شيلمانه جبيرة .. وكعت على ابوية و كتلتله بمكانه .. بمكانه مات (الف رحمه على روحه) اني بيومها جنت بالدوام .. رجعت للبيت كالعادة ابدل و اروح لأبوية ..