قصص عراقية حقيقية بقلم ابو بغداد سائق التكسي

الفيتر

بحياتي مشتغلت … جان ابوية فوك راسنه هو الي معيشنه و ممخلينه نحتاج شي .. ورى وفاة ابوية حسينه بنقص .. نقص جبير بكل شي .. مو بس بالمشاعر الي فقدناها و بالحنيه و بريحته و بسوالفه و بصوته .. صار عدنا نقص حتى بعيشتنا … كل الي داير مدايرنه رادو من عدنا فلوس و هالشي حقهم … بس كل هالاشخاص مجنا نعرفهم اصلا و لا نعرف شي اسمه ديون .. مجنا نعرف شي اسمه ايجار البيت .. مجنا نعرف شي اسمه وصولات مي و كهرباء و مسواك .. المسكين الف رحمه على روحه جان هو الوحيد الي يعرف هالاشياء و طبعا امي بدون خجل احجيها (امي مريه مسكينه على كد حالها و متعرف تقرا و تكتب و فقيرة لدرجة حتى المسواك جان ابوية يروح وياها من تتسوك ) فقيرة كلش اصلها من عائلة ريفيه من جنوب العراق و  كلش من اهل الله .. كل همها جان تنظيف البيت و تسويلنه اكل … كل همها جانت تربينا عالحب و تزرع بداخلنه شي اسمه محبه … ابوية جان جندي هناك (بمحافظة اهل امي) .. وخالي جان وياه بنفس الوحده العسكرية .. تعرف عليه و صارت بيناتهم علاقة كلش قوية … و ورى متسرح ابوية راحلهم مرتين و مره اخذ بيبيتي (الله يرحمها) وياه .. و طلبو ايدها لأمي و تزوجو و جوي هنا لبغداد لان بيت جدي هنا ببغداد … ابوية جان الوحيد رجال ببيت جدي (يعني جدي الله يرحمه و بيبيتي الله يرحمها وعمتي وبس) عمتي متزوجه و هم حالتهم على كد حالهم .. ورى وفاة ابوية امي رادت تاخذنا و نروح نعيش يم خوالي .. يعني خارج بغداد .. اني جان عمري تقريبا ١٤ سنه .. و جنت الجبير على اخويه .. احنا ولد ثنين بس و امي و ابوية الله يرحمه .. وفاة ابوية صارت فجاءة .. على حسب قول الدكتور سكته قلبيه مع العلم هو ابد مشتكى من قلبه و جان جسمه و بنيته العضليه كلش قوية .. بس قدره و قسمته .. اني و اخويه مجان عدنا أي مانع من سالفة نروح خارج بغداد .. بس جوارين أمي و صديقتها كالت لأمي شكو تروحون لهناك و اصلا حالة خوالي الماديه هم تعبانه .. قنعت أمي ان تبقى بالبيت و هي و زوجها يساعدون أمي بالايجار بس سالفة العيشه امي لازم تشتغل و تعيشنا … و حتى بوقتها كالتلها ابنج جبيره هسه ١٤ سنه يكدر يشتغل .. و رجل هالمريه كام يطلعني وياه اشتغل .. جان فيتر هو … و امي اهل المنطقة ساعدوها لان بقت وحدها و كل هالحجي و هالمساعدة بسبب هالمريه جوارينه ابد مينسي فضلها علينا .. افترت عالجوارين و جمعو فلوس لأمي و قنعو ابو الملك (يعني ابو البيت الي احنا كاعدين بي ايجار) قنعوه يفلش الحايط مال البيت الامامي و يبنون محل صغيروني امي تكعد بي و يجيبولها غراض غذائية تبيع للمنطقة .. و اهل المنطقة الف رحمه على روح اهلهم .. وكفو وكفة اهل ولا عبالك جوارين ..فلشو الحايط و بنو المحل الصغير و حتى المسواك همه جابوه لأمي .. و كالولها من يخلص المسواك تكدرين تتسوكين من اهل الجملة الي ببغداد جديدة .. لان قريبة على بيتنا ..
يعني مو مال امي تروح للشورجة .. و كعدت امي بالمحل و كل يوم جانت تجي جوارينا تكعد يمها لان تنقهر عليها .. و بذاك الوقت امي جانت صغيرة .. يعني بعدها مداخله تلاثين سنه .. اهل المنطقة اعتبروها اخت الهم مو غريبة والله العظيم .. جانو يخافون علينا و يساعدونه بكل شي .. و اني بديت رحلتي لأول مره بالشغل .. عالم الحي الصناعي عالم جديد جان بالنسبة اليا … يعني اني جان كل همي انجح بالمدرسة وبس .. بس هالمرة دخلت بعالم بي اعمار جبيرة .. ويوميا التقي وي ناس اشكال والوان .. ناس من بغداد وناس مو من بغداد .. بس اني ابد منجرفت وي الصنايعيه الي بعمري .. لان اكثرهم جانو يدخنون لو يدورون سوالف غير الي براسي .. اني ركزت بالشغل وبس جان همي الوحيد احصل فلوس و انطي لأمي .. و بديت اتعلم الفيتره على اصولها … و تعلمت و كل الفضل يرجع لهل الرجل الي طلعني وياه .. كمت انزل محرك وحدي والله العظيم .. افتح كير .. ومو بس فيتره .. حتى بكهربائيات السيارة كمت اشتغل .. يعني هم فيتر وهم كهربائي صرت .. بطلت من المدرسة .. و الوارد الي جنت اطلعه من الشغل جان يعيشنا و حتى اكدر ادفع بي ايجار البيت و هم يبقالي .. جان الفيتر بذاك الوقت خصوصا اذا فيتر يشتغل زين .. يحصل فلوس قيامة الله .. وخصوصا اذا ميشرب لو يدخن لو يدور مكسرات .. يعني الفلوس كلها تبقى بجيبه .. و اخوية اكثر من مرة راد يطلع وياي للشغل جنت ما اقبل .. كلتله انته ابقى بالمدرسة .. و هالحجي سنه ورى سنه اني شغلي يتحسن و عمري يكبر و انعرف اكثر واكثر واكثر بالحي الصناعي … اسمي صار ليره ذهب بالحي الصناعي … ماكو سيارة ما اصلحها .. والله العظيم يجيبولي عرباين مو سيارات .. عرباين يجيبوهن سحل .. اطلعهم من المحل (نكره سلف) .. و قررت اخذ محل وحدي بعد ما الرجل جوارينه كبر بالعمر و قرر يكعد بالبيت .. و ولده مقبلو يشتغل بعد لان ولده خريجين و موظفين صارو .. يعني همه يصرفون عالبيت و حسيت مجرد احساس والله اعلم .. حسيت ولده يستنكفون من شغلته ..
عالعموم ..
الرجل كالي ليش تشتري محل .. اخذ هالمحل لان اني حطلع منه .. و اصلا المعاميل يعرفوك بهل المكان .. و اخذت المحل وحدي .. الشغل صار الي وحدي .. كمت اجمع فلوس .. لان بس ردت اخذ قطعة كاع حتى لو بأي منطقة .. بس اهم شي ببغداد … وطبعا من ضمن المعاميل الي يجون يمي اصلحلهم سيارات .. اكو دلالين .. اكو دلال حاجيته على الموضوع كالي اخذلك بالبداية ١٥٠ متره .. كلتله كلش كافي .. مرايد اكثر من ١٥٠ متر بس اهم شي ملك .. كالي ارخص منطقه تكدر تاخذ بيها و ببغداد هي جكوك .. جانت بعدها ممبنيه .. بس حسيتها بعيده .. كلتله ماكو ارخص على صفحة بغداد جديدة .. كالي اكو  بالرستميه .. كلتله ميخالف .. واخذت هناك ١٥٠ متره .. و بديت كل فترة اجمع و ابني .. بس البناء طول اكثر من ٤ سنوات .. لان ماعندي دفعه وحده .. و كمل البيت الحمدلله .. طبعا بالبداية مجان اكو خدمات واصله للمربع الي بي بيتنا .. بس مثل مكلت اني تعطلت اربع سنين يله كملت البيت .. بهل الاربع سنين وصلت خدمات للمنطقة .. و الحمدلله تحولنا لبيتنا الملك .. صح بعيد بس اسمه ملك .. البيت جان بي تلث غرف نوم .. غرفة لأمي و غرفة الي و غرفة لأخوية .. اخوية جان طالب كلية بذاك الوقت .. و يشتغل بس خفيف خفيف .. يعني شغلة نازك هههههه .. يشتغل بمحل البسه رجالية .. يبيع (بياع) .. يعني شغلته  مو تعب .. بس الحمدلله مطلع مصرفه .. و امي عافت المحل اكيد .. شغلي جان بعيد عن بيتنا .. قررت اخذ سيارة و ارتبها بيدي (لان شغلتي ) بالطريق اليومي للشغل .. جنت اشوف سيارة ضاربيها جادر و موكفيها بصف بيت … مبينه السيارة مدعومة دعمه قوية .. بس الظاهر ابو السيارة ممحتاج يبيعها .. عايفها كبال بيته .. فد يوم نزلت قريب من السيارة و رفعت الجادر بدون ما ادك الباب .. بس بسرعه رفعته .. جانت برازيلي نظيفة كلش بس البجم منتهي .. دكيت الباب طلعلي ولد .. كلتله السيارة هاي الكم .. كال اي..
كلتله تبيعوها ؟؟
كال والله ما اتوقع هي مال ابوية .. كلتله ممكن احاجي الوالد .. 
كال ابوية بالمحل هسه اذا تريد روحله .. كلتله وين محله ..
كال ليش انته مو من المنطقة متعرف ابويه .. كلتله لا والله ..
كال ابويه ابو حسن ابو الاثاث .. كلتله وين محله .. كال بس روح عالشارع العام اسأل اي واحد يدليك .. رحت والله و الحمدلله جان محله بنفس المنطقة .. وصدك بس سألت دلوني ورحت للرجال .. الرجال جان مبين ابن خير .. عرفته بنفسي و كلتله اني يوميا اشوف السيارة من اروح للشغل و صار عندي فضول اشوفها و للامانه ترى رفعت الجادر شفتها .. و لان اني فيتر كلت اذا ماكو مانع تبيعليها .. واني على كيفي اصلحها وارتبها .. كالي اخذها و بالسعر الي يناسبك مع العلم هو مجان مخلي فكرة براسه يبيعها .. جان اكو فكره يصلحها بس وقت ماعنده .. و اصلا هو عنده غير سيارة .. و دفعتله سعر قليل وهي صح تسوى اكثر بس الرجل اقتنع .. و سحبتها للسيارة للحي الصناعي و لعبت بيها خلقه .. اول شي وديتها يم سمكري صديقي خبلها للسيارة (بدون ولا فلس) مقبل ياخذ فلس مني .. لان صديقي و صارلي سنين وياه بالشغل .. و بعدين صبغتها صبغ كامل .. من الاخير السيارة رجعت جديده مال شركه ..بذاك الوقت السيارات جانت غاليه نااااار .. دفعولي بيها سعر احلم بي بس ما بعت .. و بديت اروح واجي بيها للشغل .. اخوية راد يتعلم سواقة .. علمته .. و من شافني ركبت سيارة كام يدك على سيارة .. يريد سيارة .. كلتله جمع واني اساعدك .. كالي اريد تشوفلي وحده لكطه مثل هاي .. بديت افكر بسالفة .. كلت ليش ما افتر على السيارات المدعومة و اشتريهم و اصلحهم و استرزق منهم .. كمت اوصي شكو واحد عرف يشوفلي هيج شغلات .. و سبحان الله لان نيتي خير و ما فايت بأي شي غلط .. الله رزقني .. كمت اشتغل بهيج مواضيع .. اجيب سيارة مدعومة و اسويها وابيعها .. و سيارة جرت سيارة و الفلوس لعبت بيدي .. و كمت اشتغل بالبيع و الشراء مال السيارات .. كمت الصبح اروح للمحل و العصريات انطلق للمعارض .. و طبعا من خلال شغلي تعرفت هم على ناس اهل معارض .. كمت افكر افتح معرض .. بس مترهم لوحدي لازم ادخل شريك بالبداية .. و دخلت شريك وي ابو معرض .. بس ابد المحل ما عفته .. كمت اخذ سيارات اصلحهم هناك بمحلي و يم السمكري صديقي .. و اذبهم بالمعرض ..
و سبحان الله وين ما ادخل اسمي ينعرف بسرعه … انعرفت بالمعارض و اخوية هم علمته عالسالفة هو الي صار بمكاني بالمعرض .. لان اني مكاني الاساسي الحي الصناعي .. وعلى شرط ما ارتاح اذا ما اشتغل بيدي … اخوية مرتب مو مال فيتره .. بذاك الوقت جان متخرج ستوى من الكليه و هو مثقف لسانه حلو .. جان يعرف يتعامل مثلي بالضبط .. و سنه تجر سنه و تزوجت اني و اخويه هم تزوج .. و بعنا بيتنا بالرستمية اخذنا بيت اكبر ورى افران الدرويش .. و الحمدلله حالتنا تغيرت كلش .. بس ابد معفت الحي الصناعي لان هو ابو الخبزه .. و بيوم من الايام حسيت اخويه عنده شي ضامه عليا .. حتى زوجته حست بهل الشي و كالت لزوجتي .. سالته كالي داحب وحده .. كلتله يمعود مرتك بنت اوادم انته شتحجي .. طبعا اني عندي جهال وهو هم عنده جهال .. كالي حبيت وخلص .. كلتله يعني لان صار عدنا فلوس كمت تدور على زوجتك .. نسيت ايام من جنت تروح للكليه تداين قميص من حازم .. نسيت من امك جانت كاعده من الصبح لليل بمحل بكد المرافق (مكرم القارئ) و هسه من صارت فلوس عدنا رأسا تريد تتزوج على مرتك .. كالي ليش هو شرط اتزوج .. كلتله يعني بالحرام .. و تعاركت وياه و زعل وطلع بره .. رجعت للبيت امي صاحتني كالتلي شبيك وي اخوك .. كلتلها ماكو شي خو ما اروح اكلها هو كاعد يحب .. استحي من امي اني كلش .. واعرف اذا احجي كلمه تروح تخلي الكلمة بحلك زوجته .. و رحت صالحته اني لان والله مجنت احسه اخويه جنت احسه أبني والله العظيم اعز عندي من اولادي .. صالحته و كلتله عوف هالسالفه .. كالي ماشي .. و بيوم من الايام اني بالمعرض و هو موجود هم .. طبكت سيارة بيها خمس زلم .. نزلو شايلين سلاح .. بذاك الوقت مجان اكو تسليب بهل الطريقة .. السالفة مبينه ذوله جايين لشي ثاني .. طبو رمو علينا طلقات و شريكي عنده سلاح رمه عليهم .. اني تصوبت برجلي و نمت بمكاني .. و اخويه انقتل .. بوقتها نشرو السالفة بجريدة بابل .. و طبعا انكشف الفاعل .. بس بعديش .. بعد ما انقتل اخويه .. والصوج منه الف رحمه على روحه .. رايح مصادق وحدة متزوجه و زوجها عرف بالموضوع و باسطها و حارك ايدها حتى بس تعترف منو .. كايلتله فلان و عدهم معرض بفلان مكان .. طبعا بذاك الوقت اني تخبلت و حقيقه تخبلت .. صار عندي خلل براسي و بقيت احجي مخربط مدة طويلة .. لان شفته كبالي مات .. صح هو غلطان بس الحاله جانت كلش مخيفه .. دم و اشوف اخويه يلفظ انفاسه الاخيره كبال عيني .. و عاف جهال ثنين و زوجته بركبتي .. و امي هم وكعت و مستشفيات و دكاتره و بالكوى رجعت طبيعيه بس مو مثل قبل .. يعني هو من فات بهيج موضوع الله يرحمه ما فكر بالعواقب ..
اني لهذا يومنا ماعرف شلون تعرف على البنيه وماعرف اي تفاصيل .. بس الي عرفته انو هو يدري بيها متزوجه .. و بقى بالعلاقة .. ليش .. ضيعت روحك و دخلتنا بحالة حزن سنين .. ليش … الف رحمه على روحه .. ماعرف شحجي والله ..
المهم .. السنين كالعادة متوكف .. و مشت حياتنا ورى هالحادث .. و جهاله صارو جهالي وكبرو .. الجبير زوجته بنتي .. و الصغير بعده طايش مو مال زواج بس طالب كليه حاليا .. و جهالي الحمدلله .. هم كبرو .. الجبير وياي بالمعرض و هو شايل مكاني .. و الاصغر منه خريج وعنده محل تجهيزات رياضية لان روحه بالرياضة .. و البنيه مثل مكلت زوجتها لأبن اخوية .. و الحمدلله والشكر على كل حال .. هاي قصتي .. وهاي حياتي .. كل حياتي جانت حلوة رغم صعوبتها .. بس الحمدلله بنيت روحي بروحي .. ما رحت شربت وكبسلت و ذبيت الصوج بالزمن .. ما رحت دورت مكسرات لان اب ماكو على راسي .. حياتي جانت حلوة .. لحد وفاة اخوية .. و اكول الله يسامحه و يغفرله ذنبه .. والله يوميا ادعيله الله يغفرله ذنبه .. اني محبيت ادخل بتفاصيل الي صار وي الي جوي قتلو اخويه .. وكل شي راح بوقته .. يكفي الفضيحه الي صارت بحقنا وبحقهم .. عالعموم .. الله يكفيكم الشر و يبعد عنكم كل سوء ..
(الفيتر)
انتهى
اخوكم ابو بغداد سايق التكسي
#ابوـبغداد