قصص عراقية حقيقية بقلم ابو بغداد سائق التكسي

ابو التلفونات

الي يشتغل شغلتي يعرف الي جايه صدك محتاج و يريد يبيع تلفونه لو حرامي و بايكه و يريد بس فلوس … اكو هواي محلات يمي ماعدهم مانع يشترون التلفونات حتى لو مسروقة .. و يحللون هالشي بحجة ( اني شعليه هو جابلياه و بسعر مناسب و التلفون ممسوح محتواه و حتى لو مبيوك اني شعليه  اني دفعت فلوسه و اخذته ) وفوكاها يزعلون مني من اكلهم الجهاز (مثال) سعره خمس اوراق المستعمل .. وهو يبيعلكياه بورقة شلون ؟؟
يزعلون من احاجيهم هيج .. و من ورى صراحتي وياهم كرهوني و حتى من يفوتون من يمي ميسلمون و طلعو عليا لقب (َضياء العجس) .. صرت عجس و حقنه و ما انجرع بس لأن حجيت الحق .. بس لو رايح و كايللهم اي عفيه خوش سعر تاخذون الاجهزة .. و صفكتلهم جان هسه اني صاحبهم و صديقهم المفضل و مجان صرت عجس و حقنه جان صرت ضياء الضلع الما ينشلع …
و من ورى اسلوبي وياهم …بقيت بنصهم مثل الغريب .. اني هم كلت شسويلهم خلي يزعلون .. قابل شمسوي اني .. و كمت اروح بدربي و اجي بدربي ..
الحاصل
بيوم من الايام اجتني بنيه تريدني افتحلها باسورد مال جهاز سامسونج .. البنيه شكلها مو حرامية مرتبه و مبين عليها بنت اوادم …
سألتها الجهاز مالتج .. جان تكول اي بس نسيت الباسورد ..
كلتلها زين شلون اعرف الجهاز مالتج و اسف طبعا عالحجاية بس تعرفين اكو ناس حشاج حشاج يبوكون تلفونات و يفتحوها اذا بيها رقم سري و بعدين يبيعوها لان اذا مقفولة سعرها ارخص من مفتوحه .. كالت عندي الباكيت و عندي الوصل بس بأسم زوجي .. لان هو اشترالي الجهاز هدية ..
و راحت لسيارتها جابتلي الكارتونة و الوصل (من مكتب بالكرادة) و المكتب معروف كلش .. من شفت هيج السالفة كلت خلي افتحه و طبعا بالمناسبة .. الي يشتغلون بالسوفت وير مال اجهزة محمولة الاغلبية بيهم ( مو كلهم ) يعرفون يفتحون الرمز و حتى هذا الايفون شكد صعب و شكد هوسه بس هم بي حل و ينفتح ..
عالعموم ..
اني و داشتغل بالجهاز اجه سوال براسي .. و سألتها كلتلها زين ليش موديتي لأهل المكتب الي اشتريتي منهم .. كالت اكلك اشو سويتها تحقيق وياي مو انطيتك الكارتونه و الوصل .. هو تلفون و فتحه و هاي هيه  .. بهل الحجي اجه ابنها .. طبعا ابنها جبير (تقريبا بصف ثاني متوسط) جان كاعد بالسيارة ينتظرها بس ضاج من الانتظار .. كالها ها ماما مكملتي ؟؟
كالتله لا بعد شويه .. و بقى يباوع على الغراض بالمحل ..  اني محلي بي تلفونات و تابلت هم ابيع و حتى ماك بوك هم ابيع .. يعني مسوي كوكتيل حلو للاجهزة .. ابنها شاف تابلت عجبه و امه اخذته اله و خلته عالميز بين ما اكمل فتح الجهاز حتى تدفعلي سعره .. و فتحت الجهاز بس الذاكرة انمسح .. الذاكرة الداخليه .. من انطيتها الجهاز كالت هاي شنو التلفون فارغ .. كلتلها اي انتي كلتي فتحه و مينفتح اذا مينمسح كل شي بي .. كالت زين شلون اني عندي صور مهمه بي و فديوات انته غير تحجي قبل متسوي هيج .. كلتلها والله ماعرف بعد بس الجهاز مفتوح و بين ايديج .. كالت زين (بس شكلها ضاجت كلش) و دفعتلي فلوس التابلت و دفعتلي فلوس فتح الجهاز و راحت … ورى هالسالفة بكم يوم جاني واحد مو بشر طبيعي .. بشر جبير .. بشر ضخم .. والله العظيم بحجم (حجيران بكارتون حكيم الاقزام) .. دخل ما سلم .. كالي انت ابو المحل .. كلتله اي .. كال ماعندك عامل يشتغل وياك ؟؟
كلتله لا وحدي ليش .. سد باب المحل و طلع مسدس وكالي انته شلون تفتح جهاز مقفول هي ابن الهيج و الهيج .. طبعا اني خاتل ورى الميز و ارجع ليوره بس وين اولي الغراض بظهري و الشاحنات … طبعا هاي الحدايد الي معلك عليها الشاحنات و الكفرات فاتت بظهري  من الخوف كمت ما احس بيهم و بس ارجع ليورى .. و رافع ايدي اكله ياتلفوووون ..
كالي قبل كم يوم جتك زوجتي و ابني و حتى اشترو منك تابلت .. جابتلك تلفون شلون تفتحه بدون علمي و هو مسجل بأسمي .. كلتله والله انطتني الوصل و كالت الجهاز  انته مشتري الها هدية ..
جان يضرب الجامه مال المعرض الي عارض بي تلفونات كل الجامه تكسرت .. و افتر علي فاتلي لورى الميز ولزمني من ياختي و ضربني كالي .. هسه احبسك والله .. كلتله احبسني بس لا تكتلني .. من كلتله هيج هو ضحك رغم عصبيته .. و وخر المسدس و كال هسه شسويلك بله  .. كلتله شتسويلي والله اني ممسوي شي بس بداعة امك لا تكتلني .. كال زين خو ما نسخت الصور لحاسبتك افتحلي حاسبتك اريد اشوفها ..
كلتله ياصور ؟؟
التلفون من فتحته انمسحت كل ذاكرته ..
كال صدك تحجي انته ؟
كلتله والله و كمت احلفله مخليت لا نبي لا كتاب سماوي لا امام .. حلفت بشكو واحد قريت اسمه بدرس الدين بالابتدائية و شكو واحد مذكور بالانجيل و بالقران من الخوف .. هو ضحك كالي خلص اسكت .. و طلع شريف هههههههه .. دفعلي فلوس مال الكزاز الي اتكسر و انطاني فوكاها فلوس .. و كعد على الكرسي مالتي كالي ما عندك شي ينشرب .. كلتله شتريد بس اامرني .. كالي أي شي لان بلعومي نشف .. كلتله انته بلعومك ينشف اني بنطروني تبلل من الخوف .. من كلتله هيج خرب من الضحك .. كام حضني طبعا هو ضخم مخيف بس كلبه ابيض .. و رغم ما هو ضحك بس اني خايف بعدني .. كلتله الله عليك خو مراح تسويلي شي .. كالي شوف .. اول شي جيبلي شي اشربه .. رحت جبتله ببسي و رجعت .. شرب و ارتاح جان يكلي  اسف  .. كلتله ولو متفيد بس ميخالف ..كالي الي جتك قبل كم يوم زوجتي .. و وياها ابني .. عندي تلفون ثاني بدون متعرف بي هي .. هالتلفون عايفه بالمكتب مالتي و هي رايحه للمكتب بدون ماعرف ماخذته و ماخذه حتى الباكيت لان شافته مقفول (يعني بي رقم سري) .. التلفون ماخذه من مكتب  مال جماعتي بالكرادة (يعني مكتب مال وكالة سامسونج) ..  اهل المكتب اصدقائي و كل اجهزتنا الي بالبيت هم منهم اشتريهم .. لان اصدقائي .. و طبعا هالحجي اني مجنت ببغداد .. و جتي عليك هي لان تعرف جماعتي اهل المكتب مراح يفتحوه … وانته فتحته للجهاز بس هي باكت لساني كالت لكيت صور من فتحته واني غبي صدكت .. كمت اعتذرلها و اكلها غلطه غلطت .. واني من كل عقلي هي شافت الصور .. و صارت مشكله جبيرة بيني و بينها و هسه اني كاعد يم بيت اخويه .. و داحاول ارجع اصالحها .. و ابني دلاني عليك (انطاني الوصل) و كلت اجي اسويلك مشكله لان وكعتني انته بمشكله .. بس ماعرف من شفتك هههههه هيج تحجي والله ماعرف كل العصبية طارت من راسي .. بس امانة ترى الي سويته ممنوع و تنحبس من وراه .. و هاي درس الك بالمستقبل .. كلتله عمي يامستقبل هو غير لو اكو مستقبل اني من الفزه يمكن شكل بيا سكر .. مو زين ما انجلطت من الخوفه .. كالي اعتذر والله .. و من يومها صار صديقي .. و رجع لزوجته بس للأمانه بطل السوالف المكسره .. و من يومها الي يجيني يكلي تفتحلي الجهاز اكله ماعرف رأسا ولو ابوية ينسى الرمز هم اكله معليه … و الحمدلله على كل حال ..
بس بصراحه مرته ذكيه .. يعني باكت لسانه بكلمتين .. و الله النسوان يخوفون .. اذا يحطون راسهم بشغله يسووها يسووها .. شلون تفكير .. يعني راحت اخذت الجهاز و اخذت الكارتونه و الوصل .. لان عرفت راح تنسأل الجهاز مالتج و شلون نعرف مالتج ..
و حتى من ما لزمت شي عليه خوفته و كالتله لكيت صور ولو هو ممتاكد اكو صور جان معترف رأسا .. بس والله حيل بي .. و اني من صرت وياه ميانه كلتله حيل بيك .. عندك زوجه و عندك ولد مثل الورده شكوووو تخون .. لو هي بالدم .. متتوبون الا تنلكفون  .. عالعموم الله يبعد الجميع عن المشاكل و ينطيكم الصحة والعافية .. و الله يرجعلي صحتي لان من يوم الفزه لليوم اني بيا خوفه و حتى شغلت عامل وياي بالمحل .. مع العلم اني اكدر امشي الشغل وحدي بس للضرورة احكام هههههه ..
ابو التلفونات
انتهى
اخوكم ابو بغداد سايق التكسي
#ابوـبغداد