Inversely Proportional(ပြောင်းပြန်အချိုးကျခဲ့သော)-Complete

Part - 24

ကောင်းကင်ကြီးတစ်ခုလုံးသည် အပြာရောင်အတိနှင့် လှရက်လွန်းနေသည် ။ ခပ်နွေးနွေးနေရောင်ခြည်လေးက စိတ်တို့ကို ကြည်လင်စေလိုက်တာ ။ ရှူရှိုက်လိုက်တဲ့ လေထုထဲမှာရှိနေတဲ့ carnation ပန်းနံ့လေးဟာ ဒီနေ့မှ ပိုမွှေးလွန်းနေသလား ။

ကားမှန်ကိုဖွင့်ထားရင်း အပြင်ဘက်က သဘာဝတရားရဲ့အလှကို ခံစားနေတဲ့ သူ ။ လက်ထဲက အဖြူရောင် carnation ပန်းလေးကိုတစ်ချက်မွှေးကြူလိုက်ရင်း အလှဆုံးပြုံးရယ်နေသေးသည် ။

*** ရောက်ပြီ လူလေး ***

ဆေးရုံတစ်ခုရှေ့တွင်ရပ်သွားသော ကားလေး

*** ကျေးဇူးပါဗျ ***

*** လူလေးရဲ့ ပန်းလေးတွေက တော်တော်လှတာပဲ ဆေးရုံမှာ ဘယ်သူရှိတာလဲ ***

ကားဆရ ဦးလေးကြီးက သူ့လက်ထဲမှ ပန်းတွေကို ကြည့်ပြီးမေးသည် ။ အင်းလေ သေချာရွေးထားတာပဲ ။

*** ဖေဖေအတွက် မေမေကြိုက်တဲ့ပန်းလေးတွေနဲ့ ဂုဏ်ပြုလက်ဆောင်ပေးဖို့ပါ ***

သူ့အမေးကို ပြုံးရယ်လျက်ပင် ပြန်ဖြေကာ Taxi ခ ရှင်းပေးပြီး ဆင်းသွားသော လူငယ်လေးရဲ့ ၊ မည်သည့်ခံစားချက်မှရှာမတွေ့နိုင်တဲ့ မျက်ဝန်းတွေက တောက်ပနေလိုက်တာ ။

*** အကိုလေး ***

ဆေးရုံရှေ့ပေါက်မှာ ရပ်စောင့်နေသော ကောင်လေးတစ်ယောက်က အပြေးလာပြီး ခေါင်းငုံ့နှုတ်ဆက်သည် ။

*** စောသားပဲ ရော့ ကူညီပေးပါဦး ***

လက်ထဲမှ ပန်းစည်းကို ထိုကောင်လေးကို ပေးလျက် တစ်ဖက်သို့ ထွက်သွားသော သူကို ၊ ထိုကောင်လေး သေချာလိုက်ကြည့်နေမိသည် ။ အေးဆေးစွာပင် ပြောသွားတဲ့ ထိုသူရဲ့ မျက်နှာလေးသည် ပူလှောင်နေတဲ့ မျက်နှာမျိုးမဟုတ်ပေမယ့် အေးချမ်းနေတဲ့ မျက်နှာမျိုးလည်းမဟုတ် ၊ အေးဆေးတည်ငြိမ်နေရုံသက်သက်ပဲ ။

ဖြူဝင်းနေသော အသားအရည်နှင့် shirt လက်ရှည်အဖြူသည် လိုက်ဖက်နေသလို ၊ တွဲဖက်ဝတ်ဆင်ထားသော style pan အနက်ရောင်နဲ့ ထိုသူသည် အခြားဘာမှ ပြင်ဆင်ထားခြင်းမရှိတာတောင် သိပ်ကိုပြည့်စုံလွန်းနေတာအမှန် ။